בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן
לכבוד ... נרו יאיר
שטארק זיך זייער, לאז זיך נישט פונעם יצר הרע וואס ברענגט דיר שלעכטע מחשבות אז דו ביסט א פארפאלענער וכו'; הער אים נישט אויס, גלייב דעם הייליגן רבי'ן וואס זאגט אז דו ביסט יא ווערד; ווייל אפילו אויב מען האט געזינדיגט, אויב טוט מען תשובה – ווערט מען צוריק באליבט ביים אייבערשטן, אזוי ווי די הייליגע חכמים זאגן (מדרש שוחר טוב תהלים, יח): "כל העושה תשובה מעבירה שבידו", ווער עס טוט תשובה אויף די עבירות וואס ער האט געטון, "הקדוש ברוך הוא מוסיף לו כבוד", געבט אים דער אייבערשטער מער כבוד, "וקורא לו שם חביב", און ער רופט אים מיט באליבטע ווערטער, "בא וראה בבני קרח", אזוי ווי מען זעט ביי די קינדער פון קרח, "שעד שלא עשו תשובה לא נקראו חביבים, ומשעשו תשובה נקראו חביבים", נאכן תשובה טון רופט זיי דער אייבערשטער אן 'חביבים' און 'ידידים'.
דער הייליגער רבי זאגט (לקוטי מוהר"ן חלק ב, סימן קיב): "אִם אַתָּה מַאֲמִין שֶׁיְּכוֹלִין לְקַלְקֵל", אז דו גלייבסט אז דו קענסט מקלקל זיין – "תַּאֲמִין שֶׁיְּכוֹלִין לְתַקֵּן", זאלסטו גלייבן און וויסן אז דו קענסט אלעס פאררעכטן; דאס הייסט, מען האט אמונה שלמה, א גאנצע אמונה, מען גלייבט אז מען קען אויך מתקן זיין.
גיי נישט ליידיג, אדער טו עפעס ארבעט, אדער קאר סערוויס; אויך זאלסטו נאכמיטאג גיין הפצה, אז דו זאלסט קענען אהיים ברענגען פרנסה און ארויסגיין פון דיינע חובות. אויך איז וויכטיג צו האבן א סדר היום ווען מען שטייט אויף, ווען מען דאווענט, וואס איז נאכן דאווענען, און ווען אהיים צו גיין.