בריוון פונעם ראש ישיבה שליט"א

בעזרת ה' יתברך

יום ד' פרשת דברים, ה' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

איך האב שוין אסאך מאל געזאגט און געשריבן פאר דיין ווייב זי זאל רעדן פאר די פרויען, זי דארף מיר נישט איבערפרעגן יעדעס מאל מען בעט איר וכו'.

עס איז נישט קיין סתירה אז די מנהלת תחי' געבט א שיעור איינמאל א וואך פאר די פרויען, עס איז נישטא קיין שיעור אויף וויפיל התחזקות מען קען געבן; כל זמן מען קומט צו איר, מען בעט איר זי זאל רעדן – איז זי מחויב צו רעדן. זאג איר אז זי קען נישט אונזער מנהלת תחי', זי וויל גארנישט, זי וועט זיך נאר פרייען אז נאך פרויען געבן שיעורים.

מיר האבן א פליכט דאס צו טון, דער רבי האט אונז געהייסן מחזק זיין מענטשן; מחזק זיין נאנטע מענטשן, מחזק זיין אנשי שלומינו – איז א גרעסערע מצוה ווי זוכן פון אינדרויסן וכו'.

זיי איר מחזק זיי זאל מחזק זיין די טייערע פרויען, משפחות אנשי שלומינו; זאג איר זי זאל אויפהערן טראכטן אזויפיל פון זיך. די אלע מחשבות וואס דרייען זיך אין קאפ 'איך בין יא ווערד צו קומען רעדן, איך בין נישט ווערד צו קומען רעדן וכו' וכו'', דאס איז דער יצר הרע, ווייל וואס איז א חילוק וואס מען איז? וועם גייט אן וואס זי איז? דער עיקר איז אז מענטשן גייען אהיים מיט חיזוק.

שטעל זיך פאר א מענטש הערט שרייען "הצלה!" דער מענטשן קען געבן ערשטע הילף, ער קען יענעם צוריק ברענגען צום לעבן, אבער ער טראכט: 'בין איך דען ווערד?' ער טראכט: 'אלע קוקן ווי איך לויף מיט מיין לייטס און סיירינס וכו' וכו'', וועם גייט אן די זאכן? דער עיקר איז אז א מענטש ווערט געראטעוועט.

זאג דיין ווייב זי זאל שוין אפלאזן די פאלשע ענוה, פון היינט אויב איינער רופט איר – זאל זי רעדן.

ווען זי רעדט זאל זי רעדן פון אמונ"ה און פון פאלגן דעם רבי'ן.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ... נרו יאיר

איך האב געהאט אזא מעשה נאך איינער פון מיינע קינדער, איך האב געבעטן מוהרא"ש אז איך דארף א ברכה פאר מיין ווייב, וויפיל זי פרובירט – האקט זיך עס אפ וכו'; מוהרא"ש האט מיר געזאגט אויפ'ן טעלעפאן: "איך קום היינט נאכט קיין וויליאמסבורג, איך וועל דיר עפעס ברענגען", איך האב נישט פארשטאנען וואס מוהרא"ש זאגט, 'עפעס ברענגען? וואס?' איך האב איבערגעפרעגט, און מוהרא"ש זאגט מיר: "איך ברענג דיר א סגולה פון רבי'ן", איך האב נישט געהאט קיין שום אנונג וואס מוהרא"ש זאגט.

ביינאכט האב איך געטראפן מוהרא"ש ביי די חתונה, מוהרא"ש האט מיר געגעבן א באטל גרעיפדזשוס און מיר געזאגט: "דער רבי זאגט דאך (לקוטי מוהר"ן חלק א', סימן כט): 'אִשָּׁה שֶׁדָּמֶיהָ מְרֻבִּים וְאֵין לָהּ וֶסֶת, אַף שֶׁיַּיִן מַזִּיק לָהּ וְכוּ', עִם כָּל זֶה רְפוּאָתָהּ עַל יְדֵי יַיִן שֶׁהִסְתַּכֵּל בּוֹ צַדִּיק אֲמִתִּי'", און מוהרא"ש זאגט מיר: "געב דיין ווייב צו טרינקען אביסל פון די גרעיפדזשוס וועט זי האבן א ישועה", וכך הוה.

איך שרייב דיר דאס ווייל דו ווילסט אן עצה וואס צו טון, עס נעמט שוין עטליכע וואכן; די פראגע איז נאר 'וואו נעמט מען א צדיק אמת?' מיר דארפן וויינען און שרייען: "רבונו של עולם, וואו איז מען זוכה צו טרעפן דעם אמת'ן צדיק וואס קען אונז העלפן?"

אינטערעסאנט, מיר האבן דאס געהאלטן פאר א לאנגע צייט; מיין ווייב האט געגעבן דערפון פאר נשות אנשי שלומינו, אלע האבן גלייך געזען ישועות.

ביי מיר איז געווען א חידוש וואס מוהרא"ש ברענגט מיץ ענבים (גרעיפדזשוס), אז דאס איז וויין.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין ליבער טייערער ... נרו יאיר

האסט מיר זייער מחי' געווען אז דו האסט א שיעור אין ספר הקדוש והנורא 'תיקוני זוהר'; דו האסט ממש יעצט אנגעהויבן און שוין מסיים געווען. איך האף מארגן מסיים צו מסיים זיין נאכאמאל דעם הייליגן ספר אינעם יארצייט פונעם אריז"ל.

מוהרא"ש פלעגט אונז מעורר זיין מיר זאלן לערנען אסאך תיקונים, בפרט אין די טעג פון בין המצרים וואס מיר קלאגן אויפ'ן חורבן בית המקדש, די שכינה הקדושה זוכט א הויז וואו צו וואוינען. ווייל אין די הקדמה זאגט רבי שמעון בר יוחאי אז מיט דעם חיבור 'תיקוני זוהר' וועלן מיר מאכן א נעסט פאר די שכינה הקדושה; איז דאך פאסיג צו לערנען יעצט אסאך תיקונים.

איך פריי זיך זייער אז דו העלפסט ארויסגעבן דעם נייעם אלבוים; איך טראכט זאלסט געבן א נאמען דעם אלבוים: "איך דארף נישט קיינעם, נאר דיר באשעפער", ווייל אונזער דור איז אזוי געפאלן, מענטשן זענען ממש נישט ביי זיך, יעדער ליידט פון אנדערע מחשבות און דמיונות; די רפואה פאר דעם איז נאר אמונה, איינ'חזר'ן אן א שיעור מאל 'איך דארף נישט קיינעם, נאר דיר באשעפער אליין'.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

טייערער ליבער ... נרו יאיר

איך זע דיין צעריסענע הארץ, איך זע דיין ווייטאג, ווי שטארק דו ווארטסט שוין צו טרעפן דיין שידוך, דו ווילסט שוין אזוי שטארק חתונה האבן כדי צו קענען זיין ערליך, אפגעהיטן פון שלעכטס.

גלייב מיר, איך פרוביר יעדן טאג צו טון פאר דיין שידוך, מיין נישט אז איך פארגעס פון דיר, איך האב אינזין אלע מיינע תלמידים און אלע בחורים וועם איך ווייס, אפילו די וואס לערנען נישט אין ישיבה.

איך בעט דיר טייערער ..., בלייב שטארק, דערהאלט זיך; באלד ווערט טאג, עס וועט פארגעסן ווערן אז עס איז אמאל געווען נאכט. אזוי האט דער מענטש פון וואלד געזאגט פאר'ן אמת'ן בן מלך (ספורי מעשיות, מעשה יא), ווען ער האט געפרעגט וואס איז דאס די גרויסע געלעכטער וואס מען הערט אינדערפרי, האט ער אים געזאגט, די נאכט פרעגט דעם טאג פארוואס ווען דו קומסט האב איך שוין נישט קיין נאמען? טוט דער טאג א גרויסע געלעכטער, עיין שם.

דאס פאסירט ווען מען איז זוכה צו די ישועה, מען ווערט אזוי פרייליך, מען פארגעסט בכלל אז אמאל איז מען געווען אין א צרה.

דראפע זיך און דערהאלט זיך.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

א גוטע עצה געהאלפן צו ווערן מיט נאך קינדער, אז מאן און ווייב זאלן ביידע דאנקען דעם אייבערשטן אויף אלע קינדער באזונדער. אויסרעכענען זייערע נעמען און אויף יעדן קינד דאנקען דעם אייבערשטן בפרטי פרטיות; ווען מען דאנקט דעם אייבערשטן עפנט זיך אויף די הארץ, נאכדעם קען מען זיך גוט אויסבעטן אויף ווייטער.

ווען דו שטייסט אויף אינדערפרי זאלסטו זיך מאכן צייט אפאר מינוט; גיי אין א שטילע פלאץ און דאנק דעם אייבערשטן אויף אלעס וואס ער געבט דיר, נאכדעם זאלסטו אים בעטן דיינע בקשות.

טייערער ברודער, וואס זאל זיך דיר זאגן; דו וועסט שפירן טעם גן עדן, דו וועסט ווערן א 'צופרידענער מענטש', דו וועסט שפירן א זיסקייט אין לעבן. א רחמנות אויף די מענטשן וואס ווייסן נישט פון די עצות.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

זה היום עשה ה' נגילה ונשמחה בו, אז מען האט געגאסן די מקוה ביי דיר; א מקוה טהרה מיט אלע דקדוקים און אלע הידורים.

דער דיין שליט"א איז דארט געווען און געגעבן דעם הכשר, ער זאגט מיר אז די מקוה איז זייער מהודר.

אויך דער וויזניצער דיין שליט"א, בנוסף - די צוויי מומחים, ר' ... נרו יאיר, און הרב ר' יצחק טריגער שליט"א האבן זייער באוואונדערט די גאנצע ארבעט.

די מקוה האט א מעלה אז עס איז געמאכט געווארן דורך תלמידי חכמים; די חשוב'ע כולל אינגעלייט האבן דאס געמאכט פון אנהייב ביז'ן סוף, די גרוב האבן די בחורים געגראבן. דער מומחה הרב טריגער שליט"א האט זיך מפלפל געווען מיט זיי, ער זאגט מיר: "די אינגעלייט זענען תלמידי חכמים".

דער אייבערשטער זאל העלפן אינעם זכות וואס דו און דיין ווייב האבן אוועקגעגעבן אייער דירה פאר א מקוה טהרה, זאלט איר זוכה זיין צו בנים ובני בנים עוסקים בתורה ובמצוות, עס זאל זיין שמחות ביי דיר שטענדיג.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

דיין טאטע נרו יאיר האט מיר דערציילט אז דו האסט פחדים; זייער אסאך מאל אינמיטן טאג כאפט דיר אן א פחד, דו ווילסט אן עצה, דו ווילסט די פחדים זאלן אוועק גיין.

טייערער ... נרו יאיר, נעם די עצה פון הייליגן רבי'ן, די עצה פון תפלה והתבודדות. יעדעס מאל עס פאסירט א פחד, דו הייבסט אן מורא האבן, זאג די ווערטער צום אייבערשטן: "הייליגער באשעפער, היט מיך, וואטש מיך, העלף מיר איך זאל נישט מורא האבן, איך זאל געדענקען אז קיינער קען מיר גארנישט טון".

יעדעס מאל עס קומען די שלעכטע מחשבות, זאלסטו זאגן שטילערהייט די תפלה – וועלן אוועקגיין אלע פחדים.

איך בין זיכער אז אלע נישט גוטע מחשבות וועלן בקרוב אוועקגיין; איך ווארט דו זאלסט מיר דערציילן די גוטע נייעס.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ליבער ... נרו יאיר, קרית ברסלב

בנוגע דיין פרנסה וכו'; וויסן זאלסטו, עס זענען דא מענטשן וואס ווערן ממש פארלוירן פאר געלט, פאר אפאר דאלער שרייען זיי אויף זייערע ארבעטערס, זיי פארשעמען וכו' וכו'. עס זענען דא בעלי בתים וואוילע מענטשן, אבער זיי האבן א שרעקליכע נסיון ווען עס קומט צו זייער געלט; זיי פארשעמען, זיי כעס'ן, זיי טראכטן נישט וואס זיי טוען.

דעריבער בעט איך דיר, נעם עס נישט צום הארצן, נעם עס נישט פערזענליך ווען דיין בעל הבית שרייט אויף דיר, ווען ער זעט דיר אין שול דאווענען אין די צייט וואס דו דארפסט שוין זיין ביי די ארבעט און ער פליקט דיר וכו'; דו פרוביר זיך צוצושטעלן דאס מערסטע, און אז מען שרייט אויף דיר נעם עס נישט פערזענליך, טראכט צו זיך 'דאס איז זיין פראבלעם, ער איז נעבעך פארקנעכטעט פאר זיין געלט'.

אויב איז דיר גאר ביטער, דו קומסט אהיים מיט אן אראפגעלאזטע נאז – קענסטו זוכן א צווייטע פרנסה, אבער דאס זאלסטו געדענקען, יעדע פלאץ האט מעלות און חסרונות.

דערהאלט זיך מיט אלע כוחות, בעט דעם אייבערשטן זאלסט האבן פרנסה גרינגערהייט.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

טייערער ליבער ... נרו יאיר

איך בענק זיך זייער נאך דיר, פאריאר פלעגסטו ארויסקומען זומער מזמן לזמן; איך טראכט עס איז כדאי די הוצאות הדרך און די טירחא זיך אריין צו שטעקן דעם קאפ צווישן אנשי שלומינו זיך אביסל אויפפרישן, אנפילן די בעטערי.

איך ווארט צו הערן פון דיר בנוגע אומאן; איך האף אז דו רישט זיך צו קומען אויף ראש השנה. דער רבי האט געזאגט (חיי מוהר"ן, סימן רכ, תג): "ראש השנה ביי מיר איז גרעסער פון אלעס, קיינער טאר נישט פעלן". היי יאר קען מען פארן פאר שבת, אויך קען מען פארן נאך שבת; דאס הייסט מען פארט ארויס מוצאי שבת.

מיט'ן אייבערשטנ'ס הילף פאר איך קיין אומאן פאר שבת קודש, מיר דאווענען מיר זאלן זוכה זיין אנצוקומען געזונטערהייט און צוריק קומען מיט תיקונים און ישועות.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

טייערער ליבער ... נרו יאיר

איך האב שוין זייער לאנג נישט געהערט פון דיר; איך ווייס ניטאמאל וואו דו וואוינסט. איך בין במשך די זומער וואכן אין קרית ברסלב ליבערטי, איך האב געמיינט איך וועל דיר טרעפן דא, דו פלעגסט דאך וואוינען דא אין געגנט (איך ווייס נישט אויב דו וואוינסט נאך דא).

געדענקסט די טעג ווען מיר האבן זיך געטראפן? וויפיל חיזוק דו האסט געטרינקען מיט דורשט, דו פלעגסט זאגן ווי דו ביסט זיך אזוי מחי' מיט די דיבורי התחזקות, מיט די עצות. איך האף אז דו האסט זיך נישט אפגעקילט, איך האף אז דו ווילסט נאך אלץ זיין א איד, דו בענקסט נאך, דו ווילסט נאך, דו ווארטסט נאך וכו' וכו'.

טייערער ..., דא ביי אונז האט זיך גארנישט געטוישט, מיר רעדן די זעלבע דיבורים פון אמאל, אויב מען שפירט (דברים לב, מז): "רק הוא", זאגן חכמינו זכרונם לברכה (ירושלמי פאה א, א): "מכם", איז דאס פון די אידן, נישט פון די הייליגע תורה, פון די הייליגע צדיקים.

אז דו וועסט מיר שרייבן וועסטו מיר מחי' זיין.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין ליבער ... נרו יאיר, קרית ברסלב

זעט אויס די שטעטל איז שוין גרויס, אז עס גייט אריבער אפאר וואכן וואס איך בין דא זומער און עס איז מיר נאכנישט אויסגעקומען צו רעדן מיט דיר אדער אפילו דיר באגרוסן.

איך האף צום אייבערשטן אז אלעס איז אין ארדענונג ביי ענק. דיינע קינדער זע איך יא, איך זע זיי אין חדר און אין סקול, זיי זענען זייער ליכטיג און טייער.

טייערער ברודער, פארגעס נישט פון תכלית; מיר זענען דאך ביים בעל תפלה (ספורי מעשיות, מעשה יב) וואס ער פלעגט ארומגיין זאגן: "עס איז נישטא קיין אנדערע תכלית בזה העולם נאר צו דינען גאט ברוך הוא"; לערנען שיעורים כסדרן, דאווענען דריי תפילות מיט מנין און זיך מתבודד זיין – נאר דאס איז תכלית, אלעס אנדערש איז הבל הבלים.

איך האף דיר צו באגריסן, צו האבן מיט דיר שיחות חברים.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין טייערער ... נרו יאיר

האסט געטון א קלוגע זאך מיט'ן קומען זומער אין שטעטל, אזוי וועסטו זיך צוריק אויפפרישן מיט די שיעורים און עצות פון רבי'ן.

קום צו די שיעורים, יעדן טאג איז דא לכל הפחות צוויי שיעורים, אינדערפרי די גמרא שיעור און ביינאכט א שיעור אין ספר סיפורי מעשיות. די שיעורים וועקן אויף צוריק צו קומען צום אייבערשטן, די שיעורים שלעפן צוריק צום אייבערשטן; עס איז זייער וויכטיג נאך די חתונה צו בלייבן מקושר מיט די פלאץ.

קענסט זיך נישט פארשטעלן צו וואס פאר א מדריגה דער רבי וועט אונז ברענגען. ווער עס פאלגט דעם רבי'ן, ווער עס לערנט שיעורים כסדרן, ער איז זיך מתבודד און פריידט זיך מיט די מצוות – ווערט א גרויסער צדיק.

יעדעס מאל איך זע דיר קומען אין ישיבה – פריי איך זיך.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד מיין ליבער ... נרו יאיר, קרית ברסלב

איך פריי זיך צו הערן אז דו ארבעטסט מער נישט אזוי שווער, האסט אראפגענומען איבריגע שעות, דו קוקסט אויף תכלית. אנשטאט צו מאכן נאך א דאלער גייסטו אהיים צו דיין משפחה, דו העלפסט דיין ווייב און נאכדעם האסטו צייט צו לערנען און דאווענען.

אז מען טראכט אריין זעט מען אז די גאנצע לעבן פליט אריבער ווי א שאטן פון א פייגל וואס פליט, אזוי ווי עס שטייט (תהלים קמד, ד): "כְּצֵל עוֹבֵר"; זאגן די הייליגע חכמים (בראשית רבה צו, ב): "הַלְּוַאי כְּצִלּוֹ שֶׁל כּוֹתֶל, אוֹ כְּצִלּוֹ שֶׁל אִילָן, אֶלָּא כְּצִלּוֹ שֶׁל עוֹף בְּשָׁעָה שֶׁהוּא עָף", עס איז דא אסאך ערליי שאטנ'ס, אפשר איז די לעבן ווי א שאטן פון א בוים אדער א שאטן פון א וואנט וואס איז נישט אזוי שנעל? ניין, נאר ווי א שאטן פון א פייגל וואס פליט; וואס וועלן מיר מיטנעמען מיט אונז? דאס דאווענען און לערנען און גוטע מעשים.

איך בין שטאלץ צו האבן אזעלכע אינגעלייט אין שטעטל; אינגעלייט וואס טראכטן פון תכלית.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד מיין טייערער ... נרו יאיר

איך האב זייער הנאה געהאט צו זיין מיט דיר דעם פארגאנגענעם וואך אין שטעטל, איך האב באטראכט דיין סדר היום; איך בין זייער איבערגענומען ווי דו דאווענסט און דו לערנסט, איך האב געזען ווי דו נוצט אויס די צייט מיט גוטע זאכן.

איך האף דו האסט הנאה געהאט צו זיין און שטעטל, דו וועסט מיט נעמען די חיזוק מיט דיר; ווייטער לערנען און דאווענען. זיך מתבודד זיין יעדן טאג, זיך מיישב זיין 'מָה הַתַּכְלִית מִכָּל הַתַּאֲווֹת וּמִכָּל עִנְיְנֵי הָעוֹלָם הַזֶּה?' ווי דער רבי זאגט (לקוטי מוהר"ן חלק ב', סימן י): "וְהָעִקָּר לְהִשְׁתַּדֵּל לְיַשֵּׁב עַצְמוֹ הֵיטֵב, מָה הַתַּכְלִית מִכָּל הַתַּאֲווֹת וּמִכָּל עִנְיְנֵי הָעוֹלָם הַזֶּה, הֵן תַּאֲווֹת הַנִּכְנָסוֹת לַגּוּף, הֵן תַּאֲווֹת שֶׁחוּץ לַגּוּף, כְּגוֹן כָּבוֹד, וְאָז בְּוַדַּאי יָשׁוּב אֶל ה'", ווען מען וואלט זיך מיישב געווען, מען וואלט אריינגעטראכט 'וואס האט מען פון די וועלט?' דעמאלט וואלט מען זיך צוריק געקערט צום אייבערשטן; ווייל ווען מען וואלט געהאט יישוב הדעת וואלט מען זיך צוריק געקערט צום אייבערשטן.

דאס באקומט מען דורך התבודדות. אז מען מאכט זיך א סדר יעדן טאג צו רעדן מיט'ן אייבערשטן, באקומט מען אביסל יישוב הדעת.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

מרת ... תחי'

איך פריי זיך זייער אז איר שטארקט זיך, איר זענט שוין מער פרייליך, איר שלאגט זיך מיט אלע כוחות נישט צו ווערן בעצבות ומרה שחורה.

דער הייליגער רבי זאגט (לקוטי מוהר"ן חלק ב', סימן מח): "וְדַע", זאלסט וויסן, "שֶׁתֵּכֶף כְּשֶׁאָדָם רוֹצֶה לִכָּנֵס בַּעֲבוֹדָתוֹ יִתְבָּרַךְ", גלייך ווען מען הייבט אן דינען דעם אייבערשטן, "אֲזַי תֵּכֶף הִיא עֲבֵרָה גְּדוֹלָה כְּשֶׁיֵּשׁ לוֹ עַצְבוּת, חַס וְשָׁלוֹם", איז א גרויסע עבירה אז מען איז דעפרעסט, "כִּי 'עַצְבוּת הִיא סִטְרָא-אָחָרָא", אין זוהר הקדוש שטייט (זהר נח דף עא) אז עצבות איז פון די קליפות, פון די סטרא אחרא, "וְהַשֵּׁם יִתְבָּרַךְ שׂוֹנֵא אוֹתָהּ", דער אייבערשטער האט זייער פיינט אז מען איז טרויעריג.

דעריבער בין איך זייער פרייליך אז איר האט אפגעמאכט אז איר גייט שוין זיין פרייליך, איר גייט מער נישט זיין דעפרעסט.

אין אמת'ן אריין האט איר נישט אויף וואס צו זיין דעפרעסט, איר האט נאר גוטס; איר האט זייער א טייערער מאן און איר אליינס זענט א גרויסע צדיקת; פארוואס זאלט איר ווערן בעצבות? עס איז קלאר אז די עצבות קומט פון די נישט גוטע וואס זיי וויל אייך שלעכטס טון.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד מיין טייערער ... נרו יאיר

דער רבי האט אן עצה מען זאל נישט קענען שלעכטס טון דעם מענטש, מען זאל אים נישט קענען אוועק נעמען אדער אוועק שטופן. דער רבי זאגט (לקוטי מוהר"ן חלק א', סימן עט): "עַל יְדֵי זֶה שֶׁזּוֹכִין לִרְאוֹת שִׁפְלוּתוֹ בֶּאֱמֶת", אז מען איז זוכה צו וויסן ווער מען איז, מען ווייסט ווי נידריג מען איז, "עַל יְדֵי זֶה אֵין שׁוּם אָדָם יָכוֹל לְהוֹצִיאוֹ וְלִדְחוֹתוֹ מִמְּקוֹמוֹ", קען מען אים נישט אוועק שטופן פון זיין פלאץ, "דְּהַיְנוּ לְקַפֵּחַ פַּרְנָסָתוֹ, חַס וְשָׁלוֹם", מען קען נישט אוועק נעמען די פרנסה, "כִּי מֵאַחַר שֶׁהוּא עָנָו וְשָׁפָל בֶּאֱמֶת", אז מען איז ביי זיך גארנישט, - "הוּא בִּבְחִינַת אַיִן, וְאֵינוֹ תַּחַת הַמָּקוֹם כְּלָל, עַל כֵּן, בְּוַדַּאי אֵין יְכוֹלִין לִדְחוֹתוֹ מִמְּקוֹמוֹ".

דערפאר בעט איך דיר זייער, אנשטאט זאלסט מורא האבן טאג און נאכט אז מען גייט דיר צונעמען פרנסה, דו גייסט פארלירן א קאסטומער, גייסט פארלירן געלט, איינער גייט דיר אויסכאפן וכו' וכו', - זאלסטו נעמען די עצה פון רבי'ן; טו תשובה, זיי זיך מתודה, וועסטו ווערן ביי זיך מער און מער בטל ומבוטל צום אייבערשטן, וועט מען דיר נישט קענען שלעכטס טון.

אשרינו מה טוב חלקינו אז מיר האבן א רבי וואס העלפט אונז, וואס דערנענטערט אונז צום אייבערשטן.

בעזרת ה' יתברך

יום ה' פרשת מטות מסעי, כ"ח תמוז, שנת תשפ"א לפרט קטן

לכבוד ... נרו יאיר

די קומענדיגע וואך זאלסטו לייגן אין די 'קינדער עצתו אמונה' די מעשה ווי אזוי דער רבי האט זיך געטראפן די נאכט פון זיין חתונה מיט זיין תלמיד רבי שמעון.

איך שרייב דיר די מעשה אויף א וועג ווי אזוי מען רעדט צו קינדער; איך לייג אריין אין די מעשה די גרויסקייט פון קדושה און פון זיך אכטונג געבן פון שלעכטע חברים, ווייל ווי דו ווייסט דאך איז א שווערע זאך ביי אסאך עלטערן צו רעדן קלאר צו די קינדער פון קדושה; רוב עלטערן רעדן נישט צו די קינדער פון זיך אכטונג געבן נישט צו לייגן די הענט ביים אות ברית קודש, מען זאגט נישט אן זיך אכטונג געבן פון מניוולים, און אז מען ווייסט נישט - קען מען אראפפאלן אין פוגם זיין בברית, מען איז פוגם ביסוד, און אז עס איז נישטא קיין יסוד גייט אלעס חרוב.

איך האף אז די עלטערן וואס ליינען פאר פאר די קינדער די וועכנטליכע מעשה פון "קינדער עצתו אמונה", וועלן האבן א פתח ווי אזוי צו רעדן צו די קינדער, אזוי וועלן זיי אויפוואקסן הייליג און ריין.

א גוטן טאג קינדער'לעך, מען גייט יעצט דערציילן די "קינדער עצתו אמונה"; אלע קינדער קומען צום טיש, אלע ווארטן שוין א גאנצע וואך מיט דורשט, ווען גייט טאטי און מאמי דערציילן די מעשה פון עצתו אמונה.

דער טאטע הייבט אן ליינען די "קינדער עצתו אמונה"; ער ווערט זייער ערנסט, ער זאגט פאר די קינדער: "די וואך דארפט איר זיך גוט צוהערן, עס איז א שיינע מעשה וואס מען קען זיך לערנען פון דעם זייער אסאך".

דער טאטע פרעגט: "קינדער, ווער ווייסט וואס איז די גרעסטע סכנה פאר'ן מענטש?" די קינדער ווילן הערן וואס, פון וואס דארפן מיר זיך היטן? וואס קען אונז לייגן אין א סכנה? דער טאטע זאגט: "איידער איך וועל אייך ענטפערן די ערשטע פראגע, וויל איך אייך פרעגן נאך א פראגע, ווער ווייסט וויפיל יאר איז געווען דער רבי ווען ער האט חתונה געהאט?" און דער טאטע הייבט אן דערציילן:

דער הייליגער רבי האט חתונה געהאט ווען ער איז געווען א קינד פון דרייצן יאר, ער האט חתונה געהאט יונג, בקדושה ובטהרה; גלייך נאך זיין בר מצוה איז ער געווארן א חתן און אביסל שפעטער איז געווען די חתונה, די כלה איז געווען א גרויסע צדקת, זי האט געהייסן סאשיא, א טאכטער פון רבי אפרים פון שטאט זאסלאב.

וויבאלד דער רבי איז געקומען צו פארן צו א נייע שטאט האט דער רבי געוואלט וויסן ווער פון די קינדער פון אוסיאטין זענען גוטע קינדער, דער רבי האט געוואלט האבן גוטע חברים, ערליכע חברים, ער האט זייער מורא געהאט פון זיך חבר'ן מיט קינדער וואס טוען עבירות, ווייל אויב מען חבר'ט זיך מיט קינדער וואס רעדן מיאוס'ע ווערטער, קען מען חס ושלום ווערן מיט געשלעפט מיט זיי, אזוי אויך איז דא קינדער וואס זיי באהאלטן זיך מיט אנדערע קינדער און זיי כאפן זיך אן דארט וואו דער אייבערשטער לאזט נישט (דער טאטע זאל געבן צו פארשטיין פאר די קינדער וואו דער אייבערשטער לאזט נישט לייגן די הענט), זיי מיינען מען קען זיך באהאלטן פונעם אייבערשטן, זיי ווייסן נישט אז עס איז מלא כל הארץ כבודו, דער אייבערשטער איז איבעראל.

דער רבי האט נישט געקענט די קינדער פון די שטאט אוסיאטין, האט דער רבי געזוכט צווישן די קינדער ווער עס איז ערליך און ווער נישט, ביז ער האט געטראפן א קינד מיט'ן נאמען שמעון, דער רבי לויפט צו אים און מאכט זיך כאילו ער וויל נישט זיין ערליך, עכט איז דער רבי שוין דעמאלט געווען א גרויסער צדיק, נאר ער האט געוואלט זען אויב שמעון וויל זיין ערליך, אויב שמעון וויל זיין גוט; האט ער זיך געמאכט ווי ער וויל נישט זיין גוט, דער אינגל שמעון פון אוסיאטין האט זיך זייער דערשראקן, ער האט געמיינט אז דער רבי איז נישט ערליך, ער האט גארנישט געענטפערט פאר'ן רבי'ן. ווען דער רבי האט געזען ווי ער מאכט זיך נישט וויסנדיג האט אים דער רבי געפרעגט: "דו ביסט נישט קיין מענטש? דו ווילסט נישט טון וואס אלע טוען?" רופט זיך אן שמעון: "איך בין א תם, איך האב ליב תמימות", דער רבי האט אויפגעלאכטן און געזאגט: "עס זעט אויס ווי מיר וועלן זיין נאנטע חברים". דער רבי האט אים גערופן אין א זייט און אים אויסגעזאגט דעם אמת, אז ער האט אים געוואלט אויספרובירן זען אויב ער איז ערליך, ער האט אים דערציילט אז די אנדערע קינדער זענען זייער ווייט פונעם אייבערשטן, זיי זענען פוגם און טוען עבירות רחמנא לצלן.

דער רבי האט גענומען זיין נייער ערליכער חבר שמעון און ארויס מיט אים אין פעלד, ער האט דארט מיט אים גערעדט ווי גוט עס איז צו דינען דעם אייבערשטן און ווי נאריש די וועלט איז, דער רבי האט אים געזאגט: "איך האב דאך היינט חתונה, דארף איך זיכער אנהייבן דינען דעם אייבערשטן"; שמעון האט זיך גוט צוגעהערט צו זיין נייער חבר – דער הייליגער רבי, און ער איז געווארן א גרויסער צדיק, אן ערליכער איד.

טייערע קינדער, אויב א חבר נעמט דיר אין א שטילע פלאץ און ער וויל דיר אנכאפן אויף א פלאץ וואו דער אייבערשטער לאזט נישט - זאלסטו אוועק לויפן פון אים! אויב איינער וויל דיר אנרירן ביים אות ברית קודש - זאלסטו שרייען: "גיוואלד! ראטעוועט!" זאלסט נישט מורא האבן צו שרייען, ווייל אויב דו וועסט זיך לאזן וועט זיין זייער ביטער. נעם א גוטער חבר מיט וועם צו שפילן, לויפן, טאנצן און שפרינגען. קינדער וואס רעדן איידל, מיט זיי דארף מען זיך חבר'ן; דעמאלט וועט איר אלע אויסוואקסן גרויסע צדיקים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד ... נרו יאיר, לעיקוואד

איך האב ערהאלטן דיין בריוו.

על פי זוהר הקדוש איז א גרויסע איסור צו שניידן די בארד; אז מען שניידט די בארד שניידט מען אפ אלע צינורות וואס ברענגען די שפע.

האלט זיך שטארק מיט דיין בארד און פאות, שנייד נישט דיין בארד. דער רבי האט געזאגט: "וואס דארף א נפטר זארגן אז ער ליגט אויף דער ערד מיט זיין בארד און פיאות"; בארד און פיאות איז דער באווייז אז מען איז א איד, די בארד און פיאות איז דער צלם אלוקים.

די הייליגע חכמים זאגן (שבת קנב ע"א; זוהר הקדוש נשא קלט:): "הַדְרַת פָּנִים, זָקָן", דאס שיינקייט פונעם מענטש איז ווען מען האט א בארד; מיר דארפן זיין שיין אין די אויגן פון די חכמים, שיין איז וואס איז ביים אייבערשטן שיין; אז מיר שפירן אן אנדערע שיינקייט, אז אין אונזערע אויגן איז שיין אן א בארד, מיט לאנגע האר וכו' - דארפן מיר תשובה טון.

בעט דעם אייבערשטן: "הייליגער באשעפער, העלף מיר איך זאל דיר ליב האבן; איך זאל ליב האבן דיין תורה, איך זאל ליב האבן די וועג ווי אזוי די תורה זאגט מען זאל גיין, איך זאל ליב האבן א בארד און פאות, איך זאל ליב האבן די וועג ווי אזוי א איד שערט זיך אפ די האר, איך זאל ליב האבן אידישקייט", - וועסטו מיט די צייט באקומען א געפיל צו די זאכן.

האלט זיך שטארק מיט דיין בארד און פאות וועסטו טרעפן א גוטע שידוך, אן ערליכע מיידל, און דו וועסט מיט איר אינאיינעם אויפשטעלן א אידישע שטוב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד ... נרו יאיר

איך באקום כמעט יעדן טאג נישט גוטע גרוסן אויף די באס דרייווערס; סיי עלטערן רופן אריין זאגן אז מען דרייווט זייער ווילד און סיי די גוים די שכנים זאגן אז די וואס דרייוון די באסעס דעם זומער דרייוון זייער ווילד. איך ווייס נישט פארוואס איך דארף אזויפיל מאל בעטן מען זאל דרייוון לויט די געזעץ, עס איז דאך סכנות נפשות! איך שפיר ווי איך רעד צו א וואנט.

אפשר זאלסטו צוריק געבן די גאנצע אפערעישן פון דרייוון פאר די מלמדים פון שטעטל? זיי דרייוון רואיג, זיי פאלגן מיר, זיי דרייוון לויט די געזעץ.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד המלמד ... נרו יאיר

איך האב ערהאלטן דיין בריוו.

אשריך ואשרי חלקך אז דו האסט די זכי' צו זיין א מלמד פאר קינדער - תינוקות של בית רבן שלא טעמו טעם חטא, וואס אויף זייער תורה שטייט די וועלט. חכמינו זכרונם לברכה זאגן (מדרש איכה, פתיחתא ב): "מָאן אִינוּן נְטוּרֵי קַרְתָּא, אֵלּוּ סוֹפְרִים וּמְשַׁנִּים, שֶׁהֵם הוֹגִים וּמְשַׁנִּים וּמְשַׁמְרִין אֶת הַתּוֹרָה בַּיוֹם וּבַלַּיְלָה", ווער זענען די וואס היטן אפ די שטאט פון שלעכטס? די מלמדים וואס לערנען תורה מיט קינדער, זיי היטן אפ די שטאט פון אלעם שלעכטס.

אויף דיין פראגע וכו'; קוקן אויף בא'חנ'טע קינדער איז נישט קיין תאוה, חן ווייזט אויף א ריינע נשמה. א בא'חנ'טער מענטש האט א ליכטיגע נשמה, עס איז דא וואו די ברכה זאל חל זיין; אדרבה, לייג אריין אסאך אין דעם קינד.

געב אבער אכטונג אז אלע קינדער זאלן באקומען גוטע ווערטער; עס קען פאסירן ביי מלמדים מען זאל זיך נישט כאפן, מען געבט גוטע ווערטער פאר די בא'חנ'טע קינדער און מען פארזעט די אנדערע. אזוי אויך קען מען פארזען ווען א קינד קומט שפעט; אויב האט דער קינד חן באקומט ער נישט קיין פסק, און די אנדערע - טשעפעט מען און מען שפעט פון זיי.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת דברים, ב' מנחם-אב, שנת תשפ"א לפרט קטן

לכבוד ... נרו יאיר

איך האב ערהאלטן דיין בריוו.

עס איז נישטא קיין כלל אין דעם, דאס ווענדט זיך אין דיין ווייב; אז זי וויל שוין אויפהערן זייגן קען זי אויפהערן און געבן באטלעך, אדער קען זי מאכן ביידע אינאיינעם.

אז דאס קינד האט שוין א ציין און עס טוט וויי וכו'; דאס איז א זאך וואס מען קען אויסלערנען. ווען דאס קינד געבט א בייס געבט מען א פאטש, מען זאגט: "מען טאר נישט בייסן", אזוי טוט מען איינמאל, צוויי מאל - ביז דאס קינד לערנט זיך אויס נישט צו בייסן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת דברים, ב' מנחם-אב, שנת תשפ"א לפרט קטן

לכבוד ... נרו יאיר

איך האב ערהאלטן דיין בריוו.

וואויל איז דיר אז דו האסט אנגעהויבן גיין אין מקוה יעדן טאג. דער הייליגער בעל שם טוב זכותו יגן עלינו האט געזאגט אז ער איז צוגעקומען צו אלע זיינע מדריגות ווייל ער איז געווען זייער נזהר צו גיין אין מקוה יעדן טאג. דער הייליגער רבי אהרן קארלינער זכותו יגן עלינו האט געזאגט: "מקוה איז טאקע נישט קיין מצוה, אבער צו וואס מקוה קען צוברענגען קען נישט קיין שום אנדערע מצוה צוברענגען".

בנוגע גיין שבת אין מקוה וכו'; אודאי זאלסטו גיין שבת אין מקוה. מיר נעמען אן די שיטות אז מען קען זיך טובל'ן אפילו אין הייסע וואסער אז מען האט אינזין לשם טבילה. דאס וואס די הייליגע חכמים האבן גע'אסר'ט איז נאר ווען מען האט נישט אינזין לשם טבילה (קרבן נתנאל שבת סימן כב, אות ק; נודע ביהודה מהדורה תניינא, אורח חיים, סימן כד; ועוד).

אויך אין די ניין טעג זאלסטו גיין אין מקוה, און אז דו שוויצט זייער שטארק - קענסטו זיך אפוואשן ביי די פלעצער וואו עס איז דיר פארשוויצט. דער איסור רחיצה אין די ניין טעג איז אויף רחיצה פאר תענוג, אבער אראפנעמען די שווייס - דאס זענען די פוסקים מתיר (עיין נטעי גבריאל בין המצרים פרק מב, אות ד; פרק ע, אות ה).

וואויל איז דער וואס גייט אין מקוה, וועט דאס אים ברענגען קדושה וטהרה. אזוי ווי חכמינו זכרונם לברכה דערציילן (ברכות כב.): "מַעֲשֶֹה בְּאֶחָד שֶׁתָּבַע אִשָּׁה לִדְּבַר עֲבֵירָה", עס איז געווען א מענטש וואס האט געוואלט טון אן עבירה מיט א מיידל, האט זי אים געפרעגט: "רֵיקָא, יֵשׁ לְּךָ אַרְבָּעִים סְאָה שֶׁאַתָּה טוֹבֵל בָּהֶן?" דו ליידיגגייער, האסט דען א מקוה וואו זיך צו טובל'ן נאך די עבירה? ער האט נישט געהאט קיין מקוה, "מִיַּד פָּרֵשׁ", האט ער זיך צוריקגעהאלטן פון טון די עבירה.

אלע פרעגן שוין, וואס איז פשט אז די מקוה האט אים צוריק געהאלטן פון טון די עבירה?! אויב איז ער אזא מענטש וואס וויל גיין זינדיגן וכו', וואס איז אים א חילוק צי ער וועט יא גיין אין מקוה אדער נישט? נאר די קשיא איז דער תירוץ; דא זעט מען וואס מקוה איז, א מענטש וואס איז שטארק מיט מקוה, ער גייט יעדן טאג אין מקוה - וועט אים די מקוה צוריקהאלטן פון טון עבירות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

מרת ... תחי'

בנוגע אויב מען מעג גיין מיט א בעדינג סוט אונטער די שווים קלייד; א בעדינג סוט פאר א פרוי איז א פריצות'דיגע זאך. ליידער מיינט מען אז דאס איז א חומרא, מען איז אויסגעמישט צווישן גוים, מיר זענען איינגעזינקען אין גלות, הייבט מען אן זיך אפצולערנען פון זיי, ביז מען מיינט אז עס איז א חסידי'שע פרומע זאך צו שווימען מיט א שווים קלייד, ווען דאס איז נישט קיין חומרא, דאס איז נישט קיין פרומע זאך; דאס איז א אידישע זאך.

אויב זענט איר נאך ווייט פון דעם, איר קוקט אויף דעם ווי א יאנטשי זאך וכו'; זאלט איר בעטן דעם אייבערשטן ער זאל אייך העלפן איר זאלט זוכה זיין צו באקומען א געפיל פאר צניעות. צניעות איז אן איידעלע זאך, נישט יעדער האט אין דעם א געפיל, מען דארף זיין איידל צו וועלן זיין איידל, מען דארף זיין ריין צו האבן א געפיל אין זיין ריין, אפילו ווער עס איז ווייט פון איידל, ווייט פון זיין ריין - קען צוקומען צו דעם דורך תפילה והתבודדות.

בנוגע זיך וואשן אין די ניין טעג; די פוסקים זאגן אז אויב מען איז פארשוויצט מעג מען זיך וואשן ביי די פלעצער וואו מען איז פארקלעבט און פארשוויצט, דער איסור איז זיך באדן פאר תענוג.

בנוגע וכו'; מען קען זיין אין ברסלב און נישט זיין קיין ברסלב'ער, און מען קען זיין אינדרויסן פון ברסלב און זיין א ברסלב'ער חסיד; עס איז נישט געוואנדן וואו מען איז.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום א' פרשת דברים, ב' מנחם-אב, שנת תשפ"א לפרט קטן

... תחי'

געבן גוטע ווערטער איז זייער א גרויסע מצוה; ווען מען געבט יענעם א גוט ווארט - געבט מען יענעם ממש לעבן. אמאל קען א גוט ווארט ראטעווען יענעם, עס זענען דא מענטשן וואס האבן שרעקליכע יסורים, קיינער ווייסט דאס נישט, זיי ווילן נאר אנטלויפן ה' ירחם, און מיט איין גוט ווארט ראטעוועט מען יענעם.

עס איז נישט קיין עסק צו געבן פאלשע גוטע ווערטער, עס האט נישט קיין טעם ווען מען געבט יענעם א קאמפלימענט און דאס איז נישט אמת; מען דארף געבן גוטע ווערטער וואס איז וואר. אז מען וועט גוט אריינקוקן, מען וועט זוכן א גוטע זאך אין יענעם - וועט מען שטענדיג האבן גוטע זאכן וואס זענען אמת מיט וואס יענעם צו מחי' זיין.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום א' פרשת מטות-מסעי, כ"ד תמוז, שנת תשפ"א לפרט קטן

לכבוד מיין טייערער ליבער ... נרו יאיר

איך פריי זיך זייער אז דו האסט בדעה צו קומען וואוינען דא אין שטעטל, קרית ברסלב ליבערטי.

די צען טויזנט דאלער וואס דו האסט היינט געגעבן צו קענען קויפן א דירה אין שטעטל האט מיר זייער פרייליך געמאכט; איך פריי זיך אז אזעלכע משפחות ווי דיר פלאנען צו קומען וואוינען אין שטעטל.

דו האסט א גרויסער חלק אין די הפצה וואס קומט ארויס פון אונזער קהלה מיט דעם וואס דו העלפסט אזוי געטריי די ישיבה די אלע יארן. דער אייבערשטער זאל העלפן מיר זאלן ווייטער קענען ממשיך זיין צו פארשפרייטן דעם הייליגן רבי'ן אונזער גאנצע לעבן פאר די גאנצע וועלט; דאס וועט זיין אונזער תיקון, דאס וועט מתקן זיין אונזער נפש, רוח און נשמה, מיר זאלן זיך נישט דארפן שעמען אויף יענע וועלט.

געב איבער א יישר כח פאר דיין ווייב פאר'ן העלפן מיט די פלעי; די פלעי וואס די מיידלעך גייען פארשטעלן, דאס כאפט מען אפ און דאס פארשפרייט מען נאכדעם; דאס איז נאך א רינגעלע אין הפצה.