בעזרת ה' יתברך - יום א' פרשת לך לך, ז' מרחשון, שנת תשפ"ז לפרט קטן
... נרו יאיר
איך ווייס אז דו ביסט אריבער שווערע יארן מיט דיין טאטע און נאכאלץ גייסטו אריבער שווערע טעג מיט אים, אבער וויסן זאלסטו, דאס איז נישט קיין תירוץ אויף זיין א מחוצף און אן עזות פנים.
וויסן זאלסטו, מען טאר נישט טענה'ן מיט א טאטע, מען טאר נישט ענטפערן אדער זאגן פארקערט; אז דיין טאטע זאגט דיר זאכן וואס דו ווילסט נישט - טארסטו נישט זאגן אנדערש, ווייל "עז פנים לגיהנום" (אבות ה, כ), מען באקומט גיהנום אז מען ענטפערט טאטע מאמע; און אז עס איז דיר נישט מעגליך נישט צו ענטפערן - זאלסטו גיין שלאפן ביי א צווייטע דירה, און אז דו האסט נישט וואו צו שלאפן - זאלסטו ענדערש בלייבן שלאפן אין ישיבה ווי איידער חס ושלום אהיים גיין און זיך מתחצף זיין.
איך בעט דיר, בעט איבער דיין טאטע, און זיי זיך מקבל אז מהיום והלאה עפנסטו נישט דיין מויל אים צו ענטפערן מיט חוצפה, און אז ער זאגט דיר זאכן וואס דו ווילסט נישט - זאלסטו בלייבן שטיל און חס ושלום ענטפערן.
אז דו וועסט מכבד זיין דיין טאטע - וועסטו האבן א גאלדענע הערליכע לעבן, דו קענסט זיך נישט פארשטעלן די שיינע לעבן וואס מען באקומט פארן טון די מצוה, ווייל אויף אלע מצוות באקומט מען נישט שכר דא אויף די וועלט, נאר שפעטער ווען די נשמה גייט ארויף אין הימל - דעמאלט איז די צייט צו באקומען שכר, אבער אויף די מצוה פון כיבוד אב ואם באקומט מען דא אויף די וועלט שכר (משנה פאה א, א).
דער אייבערשטער זאל העלפן זאלסט האבן הצלחה אין אלע ענינים.