בריוון פונעם ראש ישיבה שליט"א

בעזרת ה' יתברך - יום ד' פרשת וזאת הברכה א', צווייטע אות פון שם הוי"ה, י"ב תשרי, שנת תשפ"ז לפרט קטן

... נרו יאיר

איך זע אז דו גייסט זייער שטארק מצליח זיין ביים הייליגן רבי'ן, לויט דאס וואס גייט אריבער, און יעצט האט מען זיך פריש גענומען אויף דיר וכו'; ווייל דער רבי זאגט (לקוטי מוהר"ן חלק א, סימן קפה), ווי מער מען גייט אריבער שוועריקייטן ביים קומען צום צדיק – אלץ מער איז מען זוכה מקבל צו זיין, ווייל די מניעות ורדיפות מאכט א כלי לקבל הרבה קדושה וטהרה.

אזא שאד אז עלטערן הערן די לשון הרע וואס מען רעדט אויף ברסלב'ע חסידים, און זיי זענען דאס מקבל, און דאס איז גורם אז זיי זאלן האבן אזופיל צער און ווייטאג; וואלטן די עלטערן געוואוסט וואס פאר א דרך ארץ, וואס פאר א יראת שמים און אמונה דער רבי געבט אונז – וואלטן זיי געדאנקט און געלויבט דעם אייבערשטן אז זיי האבן א קינד וואס איז נתקרב געווארן צום צדיק אמת, און איז זוכה צו באקומען פון צדיק חיזוק און עצות ווי אזוי צו ווערן אן ערליכער איד; דער הייליגער רבי זאגט (שיחות הר"ן, סימן קפב): "אויף מיר קריגט קיינער נישט, מען קריגט אויף איינעם וואס מען האט אויסגעטראכט אויף אים לשון הרע וכו', און אויף אים קריג איך אויך, אבער אויף מיר קריגט קיינער נישט".

שטארק זיך און דערהאלט זיך, עס וועט אריבערגיין, אויך אויף מוהרנ"ת איז דאס אריבערגעגאנגען; זיין טאטע מאמע, שווער און שוויגער האבן אים גע'רודפ'ט פארן ווערן א ברסלב'ער, אויך מוהרא"ש זכותו יגן עלינו איז דאס אריבער, אלע גייען דאס אריבער, אבער ביים סוף זענען טאטע מאמע מודה אז דיקא די ברסלב'ע קינדער פירן זיך מיט גרויס דרך ארץ, מיט כיבוד הורים וכו'.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד מיין ליבער ... נרו יאיר

דאס העלפן משמש זיין דעם הייליגן רבי'ן – דאס היט אפ דעם מענטש פון די קליפות ומזיקים, איך האף דו וועסט מער און מער העלפן אין די קהילה, דאס וועט דיך באשיצן פון די קליפות ומשחיתים וואס ווילן דיך פארציקן; ווייל כל זמן דו וועסט זיך אנהאלטן ביים רבי'ן – וועסטו נישט פאלן, דו וועסט האבן א שמירה עליונה; ווייל דער רבי האט געזאגט (חיי מוהר"ן, סימן תרה), אפילו מען איז נישט ערליך זאל מען זיך האלטן ביים צדיק, און דאס איז וואס די הייליגע חכמים זאגן (אבות ב, יג): "וְאַל תְּהִי רָשָׁע בִּפְנֵי עַצְמְךָ", אז אפילו מען איז חס ושלום א רשע, זאל מען נישט זיין 'בִּפְנֵי עַצְמְךָ', פאר זיך אליין, "רַק יִשְׁתַּדֵּל לְהִתְקָרֵב לְהַצַּדִּיק", מען זאל זיך האלטן ביים צדיק, "כְּדֵי שֶׁיִּהְיֶה לוֹ אֵיזֶה אַחֲרִית וְתִקְוָה עַל כָּל פָּנִים", עיין שם, אז מען זאל ביים סוף האבן א תיקון.

האלט זיך ביים הייליגן רבי'ן, וועסטו זוכה זיין צו ווערן א גרויסער ערליכער איד, דער רבי האט געזאגט (חיי מוהר"ן, סימן שי): "איך האב מענטשן וואס איך ווייס נישט אויב די שאול תחתית וואלט זיי גענוג געווען, אויב מען וואלט געקענט גראבן טיפער, מער טיפער פון שאול תחתית – וואלט דאס געווען די פלאץ וואו זיי זענען געווען, "וְעַל יָדִי נִתְקָרְבוּ", און דורך מיר זענען זיי מקורב געווארן וכו', עס שטייט נישט ווייטער די אויספיר פון די שיחה, מען האט ארויסגענומען געוויסע שיחות צוליב די מחלוקת וכו', קוק אין די השמטות די אויספיר: "וְעַל יָדִי נִתְקָרְבוּ אֵלָיו יִתְבָּרַךְ", און דורך מיר זענען זיי געווארן נאנט צום אייבערשטן, "בְּהִתְקָרְבוּת כָּזֶה שֶׁאֵין לָהֶם לְהִתְבַּיֵּשׁ מִצַּדִּיקִים גְּדוֹלִים", מיט אזא נאנטקייט צום אייבערשטן וואס זיי האבן זיך נישט צו שעמען פון גרויסע צדיקים, עיין שם.

הערסט ווערטער, פחד פחדים, צו וואס דער הייליגער רבי וועט אונז ברענגען, צו ווערן אזוי נאנט צום אייבערשטן; אבער נאר דערהאלט זיך און פארבינד זיך, פארקניפ זיך צום רבי'ן, פאלג די עצות.