בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
די חשוב'ע טיטשער ... תחי'
אלע זאגן אויף אייך אז איר זענט זייער א גוטע טיטשער, די מיידלעך און די עלטערן זענען זייער צופרידן; א גרויסן יישר כח.
אין דעם זכות זאלט איר בקרוב טרעפן אייער זיווג.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד מיין טייערער ... נרו יאיר
יישר כח ... פאר דיין געטרייע ארבעט, פאר'ן העלפן די מוסד אזוי געטריי.
שרייב מיר לכל הפחות איינמאל א וואך וואס טוט זיך אין חדר, איך וויל זיין דארט.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד מיין טייערער ליבער ... נרו יאיר, קרית יואל
נישטא קיין ווערטער ארויסצוברענגען דאס גרויסקייט פון זיין א מלמד פאר תינוקות של בית רבן שלא טעמו טעם חטא.
מיר באקומען אזעלכע גוטע גרוסן אויף די חדר אין קרית יואל, מאנרא; די קינדער קומען אהיים אנגעפילט מיט אמונה, ווער עס זעט די קינדער קען אביסל פארשטיין וואס די הייליגע חכמים זאגן (ירושלמי סוטה ה, ד), ביי קריעת ים סוף האבן די קליינע קינדער, די זייגעדיגע קינדער געוויזן מיט די פינגער (שמות טו, ב): "זֶה אֵלִי וְאַנְוֵהוּ"; ביי דיר אין כתה הערשט אזא גילוי אלקות, די פיצלעך שרייען: "אייבערשטער, אייבערשטער!"
מיר דארפן זיך צאמזעצן זומער צו זען די פלענער פאר שנת תשפ"ב.
בעזרת ה' יתברך
יום ד' פרשת קרח, כ"ט סיון, ערב ראש חודש תמוז, שנת תשפ"א לפרט קטן
לכבוד מיין טייערער ... נרו יאיר, קרית ברסלב
יישר כח פאר'ן העלפן מיט די חדר, סקול, קעמפ וכו'; וואס מיר טוען - טוען מיר נאר פאר אונז, דאס באדינען דעם רבי'ן - דאס איז פאר אונזער תיקון, עס וועט קומען א צייט וואס מיר וועלן זען וואס דאס מיינט משמש זיין דעם רבי'ן; אויף יענע וועלט איז מען מקנא דער וואס איז משמש דעם רבי'ן.
בנוגע די טרענספארטעישן וכו'; איך וועל רעדן צו הבחור ... ער זאל אראפנעמען דעם עול פון טרענספארטעישן פון דיר, ער זאל זיין אחראי אויף דעם במשך די זומער וואכן.
איך שיק דיר ארויס צוויי בחורים זאלן דיר העלפן אנגרייטן די בנין פאר די אינספעקשן.
בנוגע קעמפ; רעד צו די משפחות און צו די מיידלעך זיי זאלן נישט לייגן קיין פאפיר און ווייפס אין די בית הכסא, עס מאכט חרוב די סוער.
אויך זאלסטו זען די משפחות און די מיידלעך זאלן אכטונג געבן אויף ריינקייט, עס זאל זיין ריין אזוי ווי עס פאסט פאר'ן רבינ'ס פלאץ.
בנוגע די מיידלעך וואס קריכן ארויף אויפ'ן פרידזשידער; זיי זענען לעבעדיג, דערפאר קריכן זיי, טראכט נישט אז זיי זענען שלעכט, זיי זענען געזונטע קינדער; זאג זיי שטרענג אן זיי זאלן דאס נישט טון.
בעזרת ה' יתברך
יום ד' פרשת קרח, כ"ט סיון, ערב ראש חודש תמוז, שנת תשפ"א לפרט קטן
לכבוד ר' ... נרו יאיר
מזל טוב פאר די שמחה ביי דיר, יארן לאנג האסטו געווארט אויף קינדער און יעצט האט דער אייבערשטער דיר געגעבן א בן זכר.
דער אייבערשטער זאל דיר העלפן זאלסט זוכה זיין אים צו מגדל זיין לתורה ולחופה ולמעשים טובים.
יעצט ביסטו געווארן א גרויסער בעל חוב, יעצט דארפסטו דאנקען דעם אייבערשטן אויף די גרויסע חסדים, אז דו האסט א בן זכר און אויף אלע חסדים. דאנק און לויב דעם אייבערשטן - וועט זיך עפענען די הימלען, עס וועט קומען נאך חסדים.
דאס דאנקען און לויבן דעם אייבערשטן - ברענגט אלעס גוטס; אין אנהייב איז נישט גרינג דאס רעדן צום אייבערשטן, אין אנהייב זאלסט זאגן אפילו בלויז די ווערטער: "יישר כח אייבערשטער פאר אלעס", דאס זאלסטו זאגן טאג און נאכט אן א שיעור מאל, דאס וועט דיר גרינגער מאכן דאס רעדן, צוביסליך וועסטו קענען אויסרעכענען אלעס און דאנקען אויף יעדע פרט.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי', קרית ברסלב
בארעכנט זיך, טראכטס אריין א מינוט וואס איז דאס די לעבן פונעם מענטש; מען לעבט דאס ביסל יאר וואס איז באשערט, דאס ביסל יארן איז פול מיט צער און עגמת נפש, נאר דאס ביסל גוטס וואס מען טוט - דאס איז א זאך וואס בלייבט.
דאס וואס איר האט געטון מיט די מוסד, געראטעוועט די מוסד זאל נישט פאלן, מסדר געווען די אפיס - דאס איז אייערס, דאס וועט אייך באגלייטן בזה ובבא.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי', קרית ברסלב
האברך ... נרו יאיר האט מיר געזאגט די וואך ווי גוט איר ארבעט, ווי געטריי איר טוט די ארבעט אין אפיס, ווי געשיקט איר זענט.
איך האב גרויס הכרת הטוב פאר אלע אפיס ארבעטער; געבט איבער פאר אלע ווייבלעך אז איך דאנק זיי אלע פאר'ן העלפן די מוסד אזוי געטריי.
נאך אביסל וועט איר האבן א אייגענע הויז אין שטעטל מיט גרויס שפע.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי', קרית ברסלב
עלטערן האלטן מיר אין איין שרייבן פון זייערע טעכטער ווי זיי קומען אהיים אזוי פרייליך און ווי זיי ווארטן צו גיין אין סקול מיט אזא שמחה.
זיי זינגען ניגונים פון אמונה, זיי זינגען "אה מחי' צניעות, אה מחי' שבת"; דאס איז אלעס די פירות פון אייער ארבעט פון א גאנץ יאר.
א גרוס פון אייער מאן ... נרו יאיר, איך פריי זיך זייער יעדעס מאל איך טרעף אים.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי'
יישר כח; איך האף איר וועט מיר העלפן קומענדיגע יאר אין סקול.
א גרוס פון אייער מאן; ער לערנט זייער פלייסיג און ער פירט זיך מיט יראת שמים.
אייער אנטון איז זייער איידל און זייער שיין; איך בין זיכער אז אלע קינדער פון סקול קוקן אנדערש אויף צניעות ווען מען זעט אייך, מען קוקט אויף א טיכל ווי א שיינע זאך, נישט ווי א יאנטשי זאך.
דאס איז מיין חלום, אז תלמידות בית פיגא וועלן גיין אנגעטון איידל און שיין.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד ... נרו יאיר, קרית ברסלב
גיי מיט די קינדער התבודדות.
מאך זיך א סדר צו גיין מיט די קינדער הפצה.
אויך זאלסטו מיר שרייבן די נעמען פון די קינדער, ווער עס העלפט רייניגן די שול.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד ... נרו יאיר, קרית ברסלב ליבערטי
דער באס מלמד דערציילט מיר, ער האט אונטערגעהערט א שמועס פון צוויי קליינע פיר יעריגע קינדער אויפ'ן באס, איינער זאגט דעם צווייטן: "קום קוקן אויפ'ן הימל, ווייל דער רבי זאגט אז מען קוקט אויפ'ן הימל באקומט מען אמונה".
איך בין זייער נתעורר געווארן פון דעם, וואס פאר א חינוך דו לייגסט אריין אין די פיצלעך קינדער; זיי זאלן קוקן אויפ'ן הימל, זיי זאלן רעדן פונעם אייבערשטן, פון אמונה.
שטארק זיך, זיי ממשיך מיט דיין הייליגע ארבעט.
זומער וועלן זיין מער קינדער, עס קומען אסאך משפחות פון שטאט; זאלסטו ארבעטן אינאיינעם מיט ...
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי'
יישר כח פאר אייער געטרייע ארבעט אין סקול.
א גרוס פון אייער מאן ... נרו יאיר; ער איז א טייערער אינגערמאן, ער לערנט זייער פלייסיג און פירט זיך מיט גרויס יראת שמים.
איר מאכט א קידוש השם מיט אייער שיינע אנטון; אלע וועלן אייך נאכמאכן, ווייל איר ווייזט אז צניעות איז נישט יאנטשי, עס איז שיין, רייך און הערליך.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
מרת ... תחי'
יישר כח פאר'ן העלפן די סקול אזוי געטריי, די עלטערן זענען זייער צופרידן פון אייער איבערגעגעבענע ארבעט.
דער עיקר זאלט איר זען עס זאל זיין שמחה אין קלאס, א פרייליכע אטמאספער; אז עס איז דא שמחה - איז נישטא קיין פראבלעמען.
געבט גוטע ווערטער פאר יעדע איינציגסטע קינד, בפרט פאר די וואס זענען מיט די רינעדיגע נאז; זיי באקומען געווענליך נישט קיין גוטע ווערטער, זאלט איר זיי געבן גוטע ווערטער.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד מיין טייערער ... נרו יאיר, קרית ברסלב ליבערטי
מען דארף זייער אכטונג געבן ביים קומען אין חדר און ביים אהיימגיין – אז די קינדער זאלן נישט בלייבן אינעם בנין.
יעצט איז דא א פרישע פרשה מיט הילד ... נרו יאיר, די עלטערן וויינען, זיי ווייסן נישט וואס צו טון, עס איז אריין אין אים א פחד, ער האט מורא ער וועט בלייבן איינער אליין אינעם בנין. אנגעהויבן האט זיך דאס פאריגע וואך, ער איז אראפ פון באס עפעס נעמען וואס ער האט איבערגעלאזט, ווען ער איז צוריק געקומען איז די באס שוין געפארן, ער איז דאס נאכגעלאפן, למעשה האט דער דרייווער און דער באס רבי געוויסט אז ער דארף נאך קומען, זיי האבן נאר אויסגעדרייט דעם באס, אבער דער קינד שלאפט שוין נישט; ער ציטערט, ער וויינט, ער וויל נישט גיין אין חדר.
דאס איז שוין די צווייטע פרשה די יאר, דארפסטו אכטונג געבן; איך האב דיר געשטעלט צו זיין אחריות - זאלסטו בארואיגן די קינדער.
מאך א סדר ווי אזוי מען קוקט אויב קיינער פעלט נישט וכו'.
בעט דעם אייבערשטן עס זאל נישט זיין קיין פחדים ביי די קינדער.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
לכבוד מיין טייערער ... נרו יאיר
איך וויל פארשטיין, דו ווייסט דאך אביסל וואס טוט זיך אין אנדערע חסידות'ן, דו קענסט דאך די פאליטיק וואס טוט זיך אין אנדערע פלעצער וואו מען קריגט זיך ארום ווי קליינע קינדער; פאר אביסל כבוד, פאר אביסל דמיון איז מען גרייט יענעם אויפצועסן לעבעדיגערהייט; איך וויל דיר פרעגן, וואס האבן מיר זיך צו שעמען פון אנדערע פלעצער? וואס איז אזא בושה צו זיין א ברסלב'ער?!
עס איז א בושה צו א ... חסיד, א ... חסיד - וואס די גאנצע עקזיסטענץ פונעם פלאץ איז נאר תאוה, שררה, קנאה און שנאה; וואס איז אזא בושה צו זיין א תלמיד היכל הקודש, וואס די גאנצע קאפ, מח מחשבה איז נאר רצונות און כיסופים צו זיין אן ערליכער איד, מען גייט התבודדות, מען בעט דעם אייבערשטן מען זאל זיך נישט לאזן נארן.
וואס פארקויפט ... רבי? וואס?! וואס פארקויפט ... רבי? וואס?! שטייט מיט א פארמאכטע האנט, אלע חסידים לויפן זיי נאך און ווילן זען וואס דער רבי האט אין זיין האנט, און ביים סוף, ווען דער מלאך המות וועט קומען וועט דער רבי עפענען זיין ליידיגע האנט און עס וועט גארנישט נוצן.
אשרינו טויזנט מאל, אז מיר זענען ביי א רבי וואס נארט אונז נישט.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
לכבוד מיין טייערער ... נרו יאיר
איך וויל דיר מחזק זיין דו זאלסט לערנען יעדן טאג דעם בלאט גמרא, א בלאט גמרא רייניגט דעם מענטש פון אלע טומאות. מוהרא"ש זאגט, נישטא נאך א זאך וואס דער סמ"ך מ"ם האט אזוי מורא דערפון ווי פון א בלאט גמרא, דאס פארברענט אלע קליפות.
דו זוכסט דאך אוועק צו לייגן, צו אינוועסטירן וכו' וכו'; נעם די אינוועסטמענט, לייג דיר אוועק בלעטער גמרא; דאס וועסטו מיטנעמען מיט דיר אויף אייביג, דאס וועט דיר היטן פון אלעם שלעכטס.
בנוגע די דירה אין שטעטל; יעצט איז דער בראוקער צוריק געקומען אז דער וואס האט געוואלט צאלן מער געלט האט זיך ארויסגעצויגן. איך האב געזאגט פאר אונזער בראוקער, דער בראוקער מטעם הקהילה - זאל זיי זאגן אז מיר נעמען דאס פאר פופצן טויזנט ווייניגער, דארט האלט עס יעצט.
איך מוז שטיין פעלזן פעסט קעגן די וואס זוכן אויפצוהייבן די פרייזן; אז אלע וועלן פאלגן - וועלן מיר דאס מאכן, אלע וועלן פארקויפן פאר ביליג. אז מען וועט גיין אונטער מיין רוקן, מען וועט הייבן די פרייזן - וועל איך נישט נעמען די קינדער אין מוסד; ביים סוף וועלן מיר געווינען.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
לכבוד מיין טייערער ... נרו יאיר
אז דיין ווייב לאזט דיר פארן קיין אומאן אויף ראש השנה, זי זאגט דיר אז דו קענסט שוין קויפן א טיקעט - דארפסטו איר קויפן א שיינע מתנה און איר זייער באדאנקען.
מילא א פרוי וואס קומט פון א ברסלב'ע שטוב, אדער א פרוי וואס האט געלערנט אין בית פיגא, אדער אלטע מקורבים - ביי זיי איז דאס א פשטות; ביי זיי איז פארקערט, זיי קויפן א מתנה פאר'ן מאן אז זיי פארן קיין אומאן, די פרויען דארפן דאס מער ווי די מענער, ביי זיי איז דאס שטערקער, זיי האבן שטארקע אמונת חכמים, אבער ביי דיין ווייב וואס זי קומט פון אן אנדערע חסידות, אירע עלטערן האבן נישט אזוי שטארק ליב ברסלב וכו', זי האט נישט חבר'טעס, אז זי זאגט דיר דו קענסט פארן - איז דאס א גרויסע וואונדער, דארפסטו איר דאנקען און לויבן און קויפן א שיינע מתנה און שרייבן א שיינע בריוו.
אפילו דו האלסט שוין דא, דיין ווייב איז מסכים וכו', דארף מען נאכאלץ רייסן תפילות מיר זאלן טאקע אנקומען געזונטערהייט, זיין אין אומאן אויף ראש השנה.
בעזרת ה' יתברך
יום ג' פרשת קרח, כ"ח סיון, שנת תשפ"א לפרט קטן
לכבוד ... נרו יאיר, נכד מוהרא"ש זכותו יגן עלינו
איך בין אזוי פרייליך אז איך קען עפעס צוריק טון פאר מוהרא"ש מיט'ן מחזק זיין זיינע אייניקלעך.
מוהרא"ש האט זיך מוסר נפש געווען פאר מיר, ער האט אלעס אוועק געגעבן אז איך זאל קענען לעבן; מוהרא"ש וואלט געקענט זיין א שענערע רבי ווי דער גרעסטער רבי, ער האט אלעס מפקיר געווען אבי איך זאל קענען לעבן, איך זאל וויסן אז עס איז דא א באשעפער אויף די וועלט, ער האט אלעס אוועק געגעבן אז איך זאל קענען לערנען, דאווענען און האבן שלום בית וכו' וכו'. עס איז נישט שייך אויסצורעכענען, עס איז נישט שייך מסביר צו זיין וואס מוהרא"ש האט מיר געגעבן; פריי איך זיך זייער אז איך קען צוריק געבן פאר מוהרא"ש.
ווער געדענקט דען נישט די שמחה וואס מוהרא"ש האט געהאט יעדע מאל די אייניקלעך זענען געקומען; ער האט זיי אזוי מקרב געווען, זיך אזוי געזארגט פאר זיי. ער האט פרובירט מיט אלע וועגן זיי זאלן אויך גיין אויף דעם וועג, איך געדענק איין מאל האט מוהרא"ש מיר געבעטן איך זאל ארייננעמען אן אייניקל ביי מיר אין די דירה אין אומאן. איך בין געווען צענדליגער מאל אין שטוב נאכן ליל שישי שיעור מיט אייניקלעך, ווי מוהרא"ש האט פרובירט אויף אלע וועגן זיי מסביר זיין דעם סדר דרך הלימוד פון רבי'ן, די פראקטישע וועג פון אנהייבן מעביר סדרה זיין אנהייב וואך; א טייל האבן זיך אויסגעלאכט, א טייל האבן אויסגעהערט און א טייל האבן יא שטילערהייט אנגעהויבן גיין אין דעם וועג.
זיי נישט ברוגז אויף מיר אז איך מאך אן עסק פון דיר יעדעס מאל דו קומסט ארויף; וואס זאל איך טון, איך שפיר ווי מוהרא"ש שטייט אויבן און קוועלט פון דעם וואס די אייניקלעך קומען אין ישיבה און זענען זיך מחי' און מחזק מיט די עצות און חיזוקים פון הייליגן רבי'ן.
יעצט בין איך אביסל פארנומען, איך וועל דיר נאך שרייבן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ג' פרשת קרח, כ"ח סיון, שנת תשפ"א לפרט קטן
לכבוד ... נרו יאיר
איך האב ערהאלטן דיין בריוו.
פארליר זיך נישט, דו וועסט זוכה זיין צו א שטוב מיט קינדער; דו זאלסט שטארקן דיין ווייב, מאך איר פרייליך. דער רבי זאגט (ספר המידות בנים, סימן כב): "מַה יַּעֲשֶׂה אָדָם וְיִהְיֶה לוֹ בָּנִים", וואס זאל א מענטש טון צו האבן קינדער? "יְפַזֵּר מְעוֹתָיו לַעֲנִיִּים, וִישַׂמַּח אֶת אִשְׁתּוֹ", ער זאל געבן צדקה און פרייליך מאכן זיין ווייב; געב אפאר פרוטות לצדקה, די געלט זאלסטו געבן פאר דרוקן ספרים פון מוהרא"ש, און מאך פרייליך דיין ווייב - וועסטו געהאלפן ווערן מיט קינדער.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ד' פרשת קרח, כ"ט סיון, ערב ראש חודש תמוז, שנת תשפ"א לפרט קטן
לכבוד ... נרו יאיר, גבאי בית המדרש היכל הקודש קרית ברסלב ליבערטי
איך בין געווארן זייער פארשעמט, איך געדענק נישט איך זאל אזוי פארשעמט ווערן; ווען איך בין ארויסגעקומען פון בית המדרש נאכן געבן א שיעור פון רבינ'ס התחזקות האב איך געזען צוויי אינגעלייט קריגן זיך, איינער שטעכט די רעדל פון א אינגערמאן און דער אנדערער שרייט צוריק; אין אונזערע ד' אמות, ביי אונז אין בית המדרש - זאל אזא זאך פאסירן?! איך בין אנטלאפן פון דארט, ווייל בטבע קען איך נישט זען קריגערייען, עס שטעכט מיר אין הארץ ווען מען קריגט זיך, בפרט ביי אונז אין שטעטל אין בית המדרש. איך ווייס דיר נישט וואס צו זאגן, איך בין אזוי פארשעמט; אזא זאך זאל פאסירן ביי אונז?! איך זע אז עס איז נאך דא אסאך ארבעט, איך דארף נאך אסאך אקערן מיט די אינגעלייט מען זאל נישט צוקומען צו דעם.
אויך איז דא וואס פירן זיך אויף זייער נישט שיין מיט ... נרו יאיר; ער העלפט אונזער קהילה מיט זיין גאנצע הארץ, כח און מח; ער איז מיר זייער געטריי, ער איז ביי מיר באגלייבט אין געלט זאכן מער ווי אנדערע ביי אונז אין די קהילה, אויף אים שרייט מען 'גנב' וכו'.
וואס זאל איך דיר זאגן, איך טראכט אסאך וואס דוד המלך זאגט (תהלים נה, ז-ח): "מִי יִתֶּן לִי אֵבֶר כַּיּוֹנָה", ווי קען איך זיך נעמען פליגלעך ווי א פייגל, "אָעוּפָה", איך וועל אוועקפליען, "וְאֶשְׁכֹּנָה", זיך אביסל אפרוען, "הִנֵּה אַרְחִיק נְדֹד", איך וועל זיך דערווייטערן, "אָלִין בַּמִּדְבָּר סֶלָה", איך וועל נעכטיגן אליין; וואס פעלט מיר אויס די גאנצע ארבעט? נעמען בחורים און ארבעטן מיט זיי יארן, עס איז נישט גרינג, און שפעטער וויל איך זען אביסל נחת - זע איך דאס פארקערטע, מען קריגט זיך, מען האט זיך פיינט, מען שטעכט רעדער; איך ווייס דיר נישט וואס צו זאגן.
איך בעט דיר זייער, ווען דו רעדסט ביי שלש סעודות - זאלסטו רעדן דיבורי תכלית, דיבורי אמונה. רעדט זייער אסאך פון אמונה; אז מען הערט נאכאמאל און נאכאמאל פון אמונה, צוביסליך הייבט מען אן צו ווערן ריין פון די אלע שלעכטע מידות - קנאה, שנאה און רציחה וואס איז ראשי תיבות שק"ר. מוהרא"ש זאגט, אלע מחלוקות הייבט זיך אן מיט ק'נאה, דאס איז די מיטלסטע אות פון שק"ר, נאכדעם קומט ש'נאה און נאכדעם - ר'ציחה, מען שטעכט רעדער, מען ברענגט אונטער א צווייטן.
איך האב אסאך חוקר ודורש געווען צו זען אויב ... נרו יאיר איז ערליך אין מסחר אדער נישט, איך נעם נישט סתם איינעם און אים געטרויען. ווען איך הער פון איינעם טענות - גיי איך דאס נאך, איך בין דאס מברר; שעות אויף שעות בין איך געזעצן שטילערהייט מיט אינגעלייט, נאכגעגאנגען חשבונות וכו' וכו', ביז איך האב געזען אז ער איז ערליך, ער גנב'עט נישט פון קיינעם.
דאך איז דא משפחות וואס רעדן, קאכן, שרייען 'גנב' וכו'; זיי זאגן ער קויפט מיר אונטער, זיי מיינען אז מיר קען מען אונטערקויפן, מיר קען מען נישט אונטערקויפן, עס ארבעט נישט ביי מיר די זאכן; איך האב ליב גראָדע מענטשן, איך שטיי נישט אין ווארט מיט א גנב, א שווינדלער, אדער א ליגנער; דעריבער, יעצט אז איך הער וואס טוט זיך אין שטעטל און איך זע מיט מיינע אויגן ווי מען קריגט זיך, טראכט איך 'מה לי ולצרה הזאת, וואס דארף איך דעם גאנצן שטעטל? איך האב דאך גענוג ארבעט, וואס דארף איך דאס?' אז מען שרייט 'גנב' איינער אויפ'ן צווייטן דארף מען א שטעטל? אז מען האט טענות - איז דא א תורה; גיי צו דין תורה, וואס די תורה זאגט - דאס וועט מען טון; שרייען 'גנב', רעדן צו אנדערע קעגן דעם און יענעם - דאס איז נישט וואס איך דארף, נישט דאס איז מיין כוונה.
פרעג האברך ... אויב מען קען מיר אונטערקויפן מיט געלט; ער האט געוואלט מאכן דעם היי יעריגן קאמפיין נישט אזוי ווי איך וויל, ער האט געוואלט מאכן א קאנצערט וכו'; איך האב אים געזאגט: "איך דארף נישט דעם קאמפיין, איך דארף נישט קיין געלט", איך האב אים געזאגט: "מיר וועסטו נישט פארדרייען, איך ווייס וואס איך וויל"; למעשה האט ער מבטל געווען די גאנצע דמיון זיינע, די נאכט מיט די זינגערס וכו'. מיר איז נישט אנגעגאנגען פארלירן געלט, מאכן געלט - מיר קענסטו נישט אונטערקויפן; איך טו וואס איך האב מקבל געווען פון מוהרא"ש, איך שטעל זיך נישט אפ פאר קיינעם נישט.
איך בעט דיר זייער, העלף מיר בויען די שטעטל; דו ביסט דאך פון די עשרה ראשונים פון שטעטל. זע מען זאל רעדן שיין איינער צום צווייטן, די וועג ווי אזוי מען רעדט אין אנדערע פלעצער, מען פליקט זיך, מען שטעכט זיך - דאס זאל נישט זיין ביי אונז. די וועג ווי אזוי כלומר'ישע חברים רעדן, מען שטעכט זיך מיט לאכעדיגע פנים'ער און ווען מען זעט יענער ווערט צעשטאכן זאגט מען "זיי מיר מוחל וכו'"; דאס זאל נישט זיין ביי אונז.
שלמה המלך זאגט (משלי כו, יח): "כְּמִתְלַהְלֵהַּ הַיֹּרֶה זִקִּים חִצִּים וָמָוֶת", אזוי ווי דער וואס ווארפט שטיינער און פיילן, "כֵּן אִישׁ רִמָּה אֶת רֵעֵהוּ", אזוי איז דער מענטש וואס טשעפעט זיין חבר, "וְאָמַר", און ער זאגט "הֲלֹא מְשַׂחֵק אָנִי", איך האב נאר געמיינט א געשפעט, איך האב נישט געמיינט וכו'; זע אז אין שטעטל, אין אונזער ד' אמות - זאל זיין שלום און ליבשאפט.
איך האב געזען די קליינע צעטל וואס דו האסט געלייגט אינדרויסן פון שול מען זאל נישט רייכערן; נישט דאס האב איך געמיינט, איך וויל דו זאלסט לייגן א גרויסע טאוועל מען זאל דאס זען קלאר, אז מען זאל נישט רייכערן ביים רבינ'ס ד' אמות.
איך זאג דיר נאכאמאל, מיר אינטערעסירט נישט גארנישט; איך דארף נישט קיינעם און איך האב נישט קיינעם, איך וועל ווייטער טון וואס מוהרא"ש האט אונז געלערנט, איך קויף נישט קיין חנופה און איך חנפה נישט אנדערע, אויב איך וועל זען אז מען קריגט זיך, מען שטעכט זיך - וועל איך זיך זוכן אנדערע פלעצער וואו צו גיין. עס שטייט מיר פאר די אויגן די ווערטער וואס מוהרא"ש האט געשריבן אינעם טאג פון זיין הסתלקות: "אִיר זָאלְט זִיךְ זֵייעֶר הִיטְן אַז עֶס זָאל נִישְׁט זַיין קַיין מַחְלוֹקֶת צְוִוישְׁן אַייךְ, עֶס גֵייט מִיר אִין לֶעבְּן אַז מַיינֶע תַּלְמִידִים זָאלְן זִיךְ הַאלְטְן צוּזַאמֶען מִיט שָׁלוֹם אוּן לִיבְּשַׁאפְט".
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד ... נרו יאיר
איך האב ערהאלטן דיין בריוו.
איך מוז דיר זאגן א גרויסן יישר כח פאר די הערליכע מתנה וואס דו האסט מיר געגעבן; אסאך ברענגען מיר מתנות, רוב מתנות נוץ איך בכלל נישט, איך דארף נישט קיין מתנות; אבער די מתנה וואס דו האסט מיר געברענגט, די 'צעבראכענע סמארטפאון', האסט צעבראכן דיין סמארטפאון און דאס שיין איינגעפאקט און געשריבן א בריוו אז דאס איז בזכות די שיעורים, די ווערטער פון רבי'ן האט דיר געברענגט יראת שמים - דאס איז פאר מיר די שענסטע מתנה.
דו ביסט נישט דער ערשטער וואס שיקט מיר אזא מתנה, איך האב שוין באקומען אסאך צעבראכענע טעבלעטס, אייפאדס, סמראטפאונס; מען זעט ממש וואס דער רבי האט געזאגט: דריי זאכן האב איך גע'פועל'ט ביים אייבערשטן, איינע פון זיי אז אן עבירה וועט אייך קרענקן, עס וועט זיין אן קיין הענט און אן קיין פיס, איר וועט שוין נישט קענען טון אן עבירה גאנצערהייט; ווען מען ווערט מקורב צום רבי'ן, מען הייבט אן הערן די חיזוק, די יראת שמים אויף אזא זיסע וועג, עס גייט אריין שטילערהייט אינעם מענטש און דאס הייבט אן פייניגן, עס לאזט נישט מנוחה; אפילו דער מענטש איז נאך צוגעקלעבט צו זיינע תאוות רעות און מידות רעות, ער פאלט נאך אראפ, דאך הייבט אן די ווערטער פון רבי'ן דרייען די קישקעס, ביז מען ווערט אן ערליכער איד.
וואויל איז דיר אז דו האסט צעבראכן די געטשקע, האסט צעבראכן די סמארטפאן דיינע; האסט געהאט די שטארקייט צו זאגן 'ניין' פאר'ן יצר הרע, אן דעם וואס איינער זאל בכלל וויסן אז דו האסט א טעלעפאן. שטילערהייט געקויפט, שטילערהייט געקוקט וכו' און שטילערהייט צעבראכן און געברענגט א מתנה פאר'ן ראש ישיבה.
וואויל איז דיר און וואויל איז דיין חלק.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ה' פרשת קרח, א' דראש חודש תמוז, שנת תשפ"א לפרט קטן
לכבוד די מנהלת מרת ... תחי'
דער אייבערשטער זאל אייך געבן כח איר זאלט קענען ווייטער מחנך זיין אונזערע קינדער, איר זאלט מצליח זיין זומער מיט די קינדער, זיי אנפילן מיט גוטע מידות און יראת שמים.
יעדן טאג ווערן די קינדער מער און מער אנגעזאפט מיט אמונה און גוטע מידות.
יישר כח.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
מרת .. תחי', בית שמש
איך האב ערהאלטן אייער בריוו.
זאגט אייער טאכטער זי זאל זיך פארנעמען לכבוד איר בת מצוה צו זאגן תהלים יעדן טאג. אז זי וועט קענען זאגן דעם יום וועט זי זאגן דעם יום, און אז זי איז פארנומען, זי האט נישט קיין צייט צו זאגן דעם יום תהלים - זאל זי זאגן וויפיל זי קען.
אויך זאל זי זיך פארנעמען צו זאגן יעדן טאג די דרייצן אני מאמין'ס.
בנוגע אז זי האט לחץ אין סקול פון דעם וואס מען פארלאנגט אז מען מוז זיך פארנעמען קבלות טובות; רעדט מיט איר אז זי זאל זיך אויסנעמען די אלע קבלות בלי נדר, ווען זי נעמט זיך פאר די גוטע קבלות זאל זי קלאר זאגן אז דאס איז בלי נדר. זי דארף נישט זאגן אין מייק הויך אז דאס איז בלי נדר, זי קען זאגן פארדעם אז די אלע גוטע קבלות וואס זי גייט אויסרופן איז אלץ נישט קיין נדר.
ביי אונז אין סקול אין בית פיגא זאגן די מיידלעך יעדן טאג דעם יום תהלים, אזוי ענדיגן זיי יעדע וואך דעם ספר תהלים.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
לכבוד מיין טייערער ... נרו יאיר, קרית ברסלב
א גרויסן יישר כח פאר'ן מיר העלפן אזוי געטריי, דו העלפסט די מוסדות מיט אזא איבערגעגעבנקייט; וואס זאל איך דיר זאגן, מען דארף האבן א זכות, נישט יעדער איז זוכה צו משמש זיין דעם רבי'ן; דאס איז א זכות וואס בלייבט אויף אייביג.
האסט אוודאי געהערט די גוטע נייעס, איך האב א שידוך געטון מיט מיין טאכטער תחי', מיט הבחור החשוב החתן הרב ... שליט"א, בן הרב .... דער חתן איז א חשוב'ער תלמיד פון אונזער ישיבה, ער קומט פון זייער א חשוב'ע משפחה; די עלטערן זיינע זענען גרויסע מפיצים, שוין צענדליגער יאר וואס זיי פארשפרייטן דעם הייליגן רבינ'ס עצות, ביי מיר איז דאס דער גרעסטער געווינס.
ביי איינעם איז חשוב געלט, מען זוכט ביי שידוכים א געלט משפחה; ביי איינעם איז חשוב כבוד, מען זוכט אנשים מכובדים; ביי איינעם איז חשוב צו זיין א רבי וכדומה, ביי מיר איז דאס גרעסטער כבוד, זיך משדך זיין מיט א משפחה וואס זייער גאנצע תכלית אין ציל איז איין זאך, לאוקמא שכינתא מעפרא, אויפהייבן די שכינה הקדושה פון דער ערד, אריין צו שיינען די ריינע אמונה אין אידישע נפשות, להשקות צמאי חסדך מנחל נובע.
חסדי השם יתברך מיין גאנצע שטוב איז אויף דעם גאנג, 'וואס נאך קען מען טון פאר א צווייטן איד?' און אלע מיינע מחותנים זענען כל כולו הפצה.
שטארק זיך, גיי ווייטער אן מיט דיין הייליגע ארבעט; קוק נישט אויף קיינעם, ווער נישט צעקלאפט פון קיינעם, קריג זיך נישט מיט קיינעם - וועסטו זוכה זיין צו זיין א משמש פאר'ן רבי'ן בזה ובבא.
בעזרת ה' יתברך
יום ב' פרשת קרח, כ"ז סיון, שנת תשפ"א לפרט קטן
לכבוד משפחת ... שיחיו
פאר מיר איז א גרויסע שמחה אז איר ווילט קומען וואוינען אין שטעטל קרית ברסלב ליבערטי; איר זענט א חשוב'ע משפחה, איך פריי זיך אז גוטע משפחות קומען קיין שטעטל.
איך לייג אייך אויף די ליסטע פון די נייע דירות; יעצט האבן מיר געענדיגט זעכצן דירות, גלייך נאכן זומער הייבן מיר אן נאך צוואנציג נייע דירות, איך לייג דיר אויף די ליסטע.
טייערער ..., בעט דעם אייבערשטן אויף דיין שפראך אלעס וואס דו דארפסט; שמועס מיט אים, דערצייל אים ווי שטארק דו ווילסט זיין ערליך, דערצייל אים דיינע נסיונות; התבודדות ותפלה ראטעוועט דעם מענטש מען זאל נישט אוועק פאלן, עס הייבט אויף און ברענגט צוריק צום אייבערשטן.
