בריוון פונעם ראש ישיבה שליט"א

בעזרת ה' יתברך

יום ה' פרשת פנחס, כ"ב תמוז, שנת תשפ"ב לפרט קטן

די חשוב'ע תלמידת בית פיגא ... תחי'

זייט פרייליך, זייט שטארק; דער אייבערשטער וועט אייך מאכן גרויסע ניסים.

פאלגט דעם רבי'ן בתמימות ובפשיטות. דער הייליגער רבי זאגט (לקוטי מוהר"ן חלק ב', סימן כד) שמחה איז א רפואה פאר אלעס, שמחה היילט אויס, שמחה ברענגט נאנט צום אייבערשטן (עיין לקוטי מוהר"ן חלק ב', סימן י).

זארגט נישט וועגן די גאנצע זאך וואס איר האט, עס וועט אייך נישט שאטן פאר אייער שידוך, עס וועט אלעס זיין גוט, איר וועט זיין א געזונטע מאמע.

בעזרת ה' יתברך

יום ה' פרשת דברים, ז' אב, שנת תשפ"ב לפרט קטן

לכבוד ... נרו יאיר, גבאי בית המדרש היכל הקודש בראכפעלד

איך האב ערהאלטן דיין בריוו.

ביי אונז מאכט מען נישט קיין שום אבילות שבת חזון; מען זינגט לכה דודי אזוי ווי אלע וואכן און מען ליינט די פרשה אזוי ווי אלע וואכן, מען זינגט נישט דעם פסוק "איכה אשא לבדי" מיט'ן ניגון פון איכה.

שבת טאר מען נישט ווייזן קיין שום צייכענעס פון אבילות.

ביי אונז מאכט מען אלעס געהעריג אזוי ווי אלע שבתים; מען עסט אינאיינעם שלש סעודות, מען הויבט אן אביסל פריער, מען ענדיגט עסן ביי די שקיעה און מען בלייבט ווייטער זינגען אינאיינעם ביזן זמן רבינו תם. מען גייט אהיים זיך איבערטון וואכנדיגע קליידער און מען קומט צוריק צו מעריב און מגילת איכה.

פרויען און קינדער וואס פאסטן נישט מאכן נישט קיין הבדלה, זיי עסן אן הבדלה; זיי הערן הבדלה פון די מענער ביים אויספאסטן.

זע צו האבן חיות פון הפצה, נישט פון אויסלעשן די לעקטער ביי איכה, פון אראפנעמען די פרוכת וכו'; אונזער חיות דארף זיין 'ווי קען מען נאך א איד מקרב זיין צום אייבערשטן'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת קרח, כ"ח סיון, שנת תשפ"ב לפרט קטן

לכבוד ... נרו יאיר

בעט דעם מעלער ער זאל מאלן א בילד ווי א איד ליגט אין בעט מיט א פרייליכע געזיכט, אין די זייט א פענסטער מיט א געשטאלט פון א דערשראקענע פרוי, און ווי דער איד גלעט זיין בארד און פאות מיט א שמחה.

אַ מְחַיֶ' פֵּאוֹת!

טֵייעֶרֶע קִינְדֶער, דִי וָואךְ וֶועלְן מִיר דֶערְצֵיילְן פוּנֶעם גְרוֹיסֶע צַדִּיק רֶבִּי יִשְׂרָאֵל הֵיילְפְּרִין זִכְרוֹנוֹ לִבְרָכָה; מִיר רוּפְן אִים רֶבִּי יִשְׂרָאֵל קַארְדוּנֶער וַוייל עֶר שְׁטַאמְט פוּן אַ שְׁטָאט קַארְדוּן, אַ שְׁטֶעטְל אִין פּוֹילְן.

דֶער רֶבִּי יִשְׂרָאֵל קַארְדוּנֶער זִכְרוֹנוֹ לִבְרָכָה אִיז אַרוֹיפְגֶעגַאנְגֶען קַיין אֶרֶץ יִשְׂרָאֵל אוּן דָארְט חֲתוּנָה גֶעהַאט מִיט זַיין וַוייבּ גִיטְל עָלֶיהָ הַשָּׁלוֹם. עֶר הָאט גֶעוואוֹינְט אִין דִי שְׁטָאט טְבֶרְיָ', דָארְט הָאט עֶר גֶעדִינְט דֶעם אֵייבֶּערְשְׁטְן. עֶר פְלֶעגְט גֵיין קַיין מִירוֹן, עֶר אִיז גֶעזִיצְן אִין דִי מְעָרָה פוּן רֶבִּי שִׁמְעוֹן בַּר יוֹחַאי טָאג אוּן נַאכְט, דָארְט הָאט עֶר זִיךְ מִתְבּוֹדֵד גֶעוֶוען אוּן גֶעלֶערְנְט זַיינֶע שִׁיעוּרִים.

לֵיידֶער אִיז עֶר גֶעוָוארְן זֵייעֶר נִישְׁט גֶעזוּנְט, דֶעמָאלְט הָאט אוֹיסְגֶעבְּרָאכְן אַ שְׁרֶעקְלִיכֶע מַגֵיפָה, כָאלֶערֶע; זֵייעֶר אַסַאךְ מֶענְטְשְׁן זֶענֶען גֶעשְׁטָארְבְּן דֶעמָאלְט. זַיינֶע צְוֵויי קִינְדֶער מָרְדְּכַי אוּן אֶסְתֵּר זֶענֶען קְרַאנְק גֶעוָוארְן אוּן זֵיי זֶענֶען נֶעבֶּעךְ גֶעשְׁטָארְבְּן, אוֹיךְ זַיין וַוייבּ גִיטְל אִיז זֵייעֶר קְרַאנְק גֶעוָוארְן, עֶר הָאט אָבֶּער זֵייעֶר שְׁטַארְק גֶעבֶּעטְן דֶעם אֵייבֶּערְשְׁטְן אַז זִי זָאל וֶוערְן גֶעזוּנְט אוּן זִי אִיז טַאקֶע גֶעזוּנְט גֶעוָוארְן.

נָאכְדֶעם אִיז רֶבִּי יִשְׂרָאֵל קְרַאנְק גֶעוָוארְן מִיט דִי מַחְלָה חוֹלִירַע; עֶר הָאט גֶעדַארְפְט לִיגְן אִין אַ לֵיידִיגֶע צִימֶער, קֵיינֶער הָאט נִישְׁט גֶעטָארְט דָארְט אַרַיינְגֵיין; עֶר פְלֶעגְט רֶעדְן מִיט זַיין וַוייבּ דוּרְךְ אַ קְלֵיינֶע פֶענְסְטֶער. זִי הָאט אִים גֶעפְרֶעגְט: "יִשְׂרָאֵל, וָואס מַאכְסְטוּ? יִשְׂרָאֵל וִוי אַזוֹי שְׁפִּירְסְטוּ זִיךְ?" הָאט עֶר אִיר גֶעעֶנְטְפֶערְט: "אִיךְ בִּין נִישְׁט דֶערְשְׁרָאקְן פוּן שְׁטַארְבְּן, אִיךְ הָאבּ אַ בָּארְד אוּן פֵּאוֹת, אִיךְ דַאנְק גָאט אַז מַיין נְשָׁמָה גֵייט אַרוֹיס פוּן מִיר מִיט מַיין בָּארְד אוּן פֵּאוֹת".

אַזוֹי הָאט דֶער צַדִּיק צוּרִיקְגֶעגֶעבְּן זַיין נְשָׁמָה צוּם אֵייבֶּערְשְׁטְן; מֶען הָאט אִים בַּאעֶרְדִיגְט אִין דִי שְׁטָאט טְבֶרְיָ'.

טֵייעֶרֶע קִינְדֶער, מִיר לֶערְנֶען פוּן דִי מַעֲשֶׂה וִוי שְׁטַארְק מֶען דַארְף זִיךְ פְרֵייעֶן מִיט בָּארְד אוּן פֵּאוֹת; מִיר דַארְפְן טַאנְצְן פַאר שִׂמְחָה אַז מִיר הָאבְּן פֵּאוֹת, אוּן וֶוען מִיר וֶועלְן וֶוערְן עֶלְטֶער וֶועלְן מִיר אוֹיךְ הָאבְּן אַ הֵיילִיגֶע בָּארְד; מִיר וֶועלְן קֵיינְמָאל נִישְׁט אָפְּשְׁנַיידְן אוּנְזֶערֶע הֵיילִיגֶע פֵּאוֹת אוּן דִי הֵיילִיגֶע בָּארְד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת פנחס, כ"ב תמוז, שנת תשפ"ב לפרט קטן

מרת ... תחי'

הכנסת אורחים איז א גרויסע מצוה, אבער מען דארף אכטונג געבן אויף די יראת שמים פון די אייגענע קינדער. אזוי ווי דער רבי האט געזאגט פאר רבי נתן, ער זאל נאר נעמען געסט וואס די קינדער וועלן קענען זיצן מיט זיי ביים טיש (עיין אשר בנחל חלק כ, מכתב ג'סא; מסכת אבות עם פירוש חסדי אבות, עמוד יד).

געבט אכטונג אז אייער שטוב זאל זיין א שטוב פון יראת שמים, אייערע קינדער זאלן אויפוואקסן ערליך און ריין. די הייליגע מלאכים וואס קומען שבת ביינאכט זאלן נישט גלייך ארויספליען, אז מען זיצט נישט בצניעות חס ושלום.

דאנקט און לויבט דעם אייבערשטן פאר אייער שיינע משפחה, איר האט א טייערער מאן מיט ליכטיגע קינדער; דער אייבערשטער זאל העלפן זיי זאלן אויסוואקסן ערליכע אידן, איר זאלט זען אסאך נחת פון זיי אלע.

בעזרת ה' יתברך

יום ג' פרשת מטות מסעי, כ"ז תמוז, שנת תשפ"ב לפרט קטן

מרת ... תחי'

איך האב ערהאלטן אייער בריוו.

איך האב שוין געשריבן פאר אייער טאכטער זי זאל זיך שטארקן, זי זאל נישט מורא האבן פון קיינעם.

צעברעכט אייך נישט, בלייבט שטארק מיט די אמונה, קלאפט אייך נישט אראפ מיט די מעשיות וואס האט פאסירט מיט אייערע קינדער; בלייבט געטריי דעם אייבערשטן, וועט דער אייבערשטער אייך העלפן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ה' פרשת פנחס, כ"ב תמוז, שנת תשפ"ב לפרט קטן

לכבוד ... נרו יאיר, בית שמש

איך האב ערהאלטן דיין בריוו.

דערצייל נישט פאר קיינעם דיינע עבירות, נאר פאר'ן אייבערשטן.

אז דער משגיח ביי ענק אין ישיבה זאגט דיר דו זאלסט שרייבן דיינע עבירות, זאלסטו אים זאגן: מיינע עבירות דערצייל איך נאר פאר'ן אייבערשטן. חכמינו זכרונם לברכה זאגן (ברכות לד:): "חָצִיף עָלַי מַאן דִמְּפָרֵשׁ חֶטְאֵיהּ", עס איז א חוצפה צו דערציילן עבירות; נאר דעם אייבערשטן זאלסטו דערציילן.

דער רבי האט אונז געגעבן א וועג ווי אזוי צו לעבן, התבודדות ותפילה און זיך מתוודה זיין פאר'ן אייבערשטן; וואויל איז דעם וואס לעבט מיט די וועג.

בנוגע אז מען וויל דיר לייגן אויף ריטעלין וכו'; אויב יעדער איינער נעמט ריטעלין איז א גוטע עצה ער זאל נעמען פאר זיך, אויך זאל ער געבן פאר זיין ווייב און קינדער, וויבאלד יעדער איינער נעמט סיי ווי... דו דארפסט נישט, דו ביסט געזונט און שטארק.

נעם איין דעם רבינ'ס מעדעצין; נעם א משניות און זיי גורס ח"י פרקים משניות. טו דאס יעדן טאג - וועסטו ווערן מיושב, דו וועסט זיין רואיג און פרייליך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת פנחס, כ"ב תמוז, שנת תשפ"ב לפרט קטן

מרת ... תחי'

לייגט אוועק אלע אייגענע חשבונות, לייגט אין די זייט אלעס אויף די וועלט; אבי נישט צו צעברעכן און חרוב מאכן אייער בית המקדש. על פי תורה גייט די ווייב וואוינען דארט וואו דער מאן וויל, דארפט איר גיין מיט אייער מאן; אזוי זאלט איר טון, אזוי וועט אייער שטוב בלייבן גאנץ.

לאזט זיך נישט פארפירן פונעם יצר הרע וואס בלאזט אויף אלע חסרונות און שוואכקייטן פון אייער מאן, ווייל יעדער איינער האט חסרונות און שוואכקייטן, די ארבעט פון א איד איז אויפצוזוכן גוטס ביי יענעם; זוכן דאס גוטס פונעם מאן, זוכן דאס גוטס פון יעדן פלאץ, בפרט אייער מאן איז דאך א טייערער אינגערמאן, אן ערליכער איד; דארפט איר זיין פון די העלדישע פרויען וואס האבן געבויט זייערע שטובער, געקוקט גוט אויף זייער מאן, געבויט דעם מאן.

בלייבט נישט קיין איין מינוט אליין; גייט צו אים, פרעגט אים וואו ער וויל וואוינען און דארט זאלט איר וואוינען. א שאד אזא שיינע שטוב זאל צעפאלן צוליב אזא שטות.

גלייבט מיר, איך ווייס וואס איך זאג, איך ווייס וואס איך רעד; מען קען זיך געפונען אין די אנדערע זייט וועלט און זיין נאנט צו היכל הקודש, און מען קען זיין אין שטעטל - און גארנישט האבן מיט היכל הקודש.

עס זענען דא ביי אונז משפחות אויסגעשפרייט אין אלע לענדער וואס לעבן און אטעמען דעם רבי'ן, אטעמען די הייליגע אמונה, זייער שטוב איז געבויט אויפ'ן רבינ'ס עצות און לימודים. איך האב א תלמיד אין ארגענטינא, ער איז דארט א מפיץ, ער לעבט דארט אין גן עדן, ווייל מיט'ן רבינ'ס לימודים, איז וואו מען איז - די גן עדן; ממילא איז א שאד זיך צו עקשנ'ען און צעברעכן די שטוב צוליב אזא שטות.

דער הייליגער רבי האט געזאגט (עיין אשר בנחל חלק יב, מכתב א'תפה): "ווען דער יצר הרע זעט אן ערליכער איד - טשעפעט ער אן אין אים א משוגעת"; ביי אייך זאל נישט זיין קיין משוגעת'ן, לאזט נישט דעם יצר הרע אייך געווינען.

איך בין גרייט אייך מדריך זיין ווייטער אויף טריט און שריט, אבער נאר אז איר וועט לייגן אין די זייט אלע חשבונות און טון רצון השם.

איך האב תלמידים אין ארץ ישראל, אין קאנאדא, זיי לעבן מיט'ן רבינ'ס עצות. עס איז זיי אזוי גוט, ווייל דעם רבינ'ס לימוד איז נישט באגרעניצט אין א פלאץ, אזוי ווי דער רבי זאגט (לקוטי מוהר"ן חלק ב', סימן נו): "כְּשֶׁיֵּשׁ לְהָאָדָם לֵב" ווען מען האט א הארץ צום אייבערשטן, "אֵין שַׁיָּךְ אֶצְלוֹ מָקוֹם כְּלָל" איז ביי אים נישטא די זאך פון א פלאץ.

איך בעט פאר אייך איר זאלט האבן אסאך כח און שטארקע נערווען.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

לכבוד מיין ליבער טייערער ... נרו יאיר

איך בין אזוי פרייליך אז דו ביסט געקומען אין קעמפ, דו ביסט אין ישיבה, דו האלסט מיט די סדרים, די שיעורים; עס איז אזוי וויכטיג צו האבן די שיעורים, בפרט אין די יונגע יארן.

א שאד יונגע בחורים זענען נישט מעריך וואס זיי האבן, מען ווייסט נישט ווי וויכטיג דאס איז פאר'ן לעבן, ווייל דער לעבן גייט נישט ביי יעדן גלאטיג, עס איז דא אין לעבן אסאך סורפרייזעס; א יונגער בחור חלומ'ט נישט וואס די לעבן קען ברענגען, מען טראכט 'איך וועל זיכער זיין דער ערשטער חתן פון כתה און גלייך האבן קינדער, און איך וועל זיך קויפן א הויז, און ... און ... און ...' די חלום גייט ...; פלוצלונג זעט מען נישטא קיין שידוך, א צווייטער האט יא זיין שידוך אבער ער דארף זיך גט'ן ה' ישמרינו, א דריטער ווארט אויף קינדער, און אזוי ווייטער. נישטא קיין פרנסה, נישטא קיין מנוחה; וואלט ער געהאט חיזוק, וואלט ער געהערט שיעורים נאכאנאנד פון אמונה - וואלט ער זיך געקענט דערהאלטן.

האלט זיך שטארק, לאז נישט אפ די הייליגע ישיבה; זע צו קומען יעדן טאג און אויסהערן שיעורים; טרינק די חיזוק פון רבי'ן - וועסטו זיך קענען דערהאלטן.

רבי נתן האט געזאגט, זיין שווערסטע זאך איז געווען ווען דער רבי האט אים געוויזן א שטרענגע פנים; אלעס האט ער געקענט דערהייבן, אבער ווען דער רבי האט אים פארטריבן - דאס איז אים געווען זייער שווער. דאך איז ער אלעס איבערגעקומען, ער האט געזאגט פאר'ן ברסלב'ער רב רבי אהרן זכרונו לברכה: "אפילו דער רבי וועט מיר האקן מיט א דראנג - וועל איך אים נישט אפלאזן".

מען דארף אסאך בעטן דעם אייבערשטן מען זאל בלייבן צוגעקלעבט ביים רבי'ן בזה ובבא; ווי מער מען בעט אויף דעם פרט - אלץ נענטער ווערט מען, אלץ מער צוגעקלעבט ווערט מען צום רבי'ן.

זארג נישט וועגן דיין שידוך; דו פיר זיך ווייטער אויף מיט דיינע גוטע מידות, לערן ווייטער דיינע שיעורים - וועסטו בקרוב טרעפן דיין זיווג און אויפשטעלן א שיינע אידישע שטוב.

בנוגע אומאן; איך האב געמאכט טיקעטס פאר מיר און מיינע קינדער, איך בין מתפלל מיר זאלן זיין ראש השנה ביים רבי'ן; פועל'ן אלעס גוטס פאר אונז און פאר כלל ישראל.

בעזרת ה' יתברך

יום ג' פרשת חקת, ו' תמוז, שנת תשפ"ב לפרט קטן

... נרו יאיר

זיי פרייליך, נאך אביסל ביסטו א חתן; דראפע זיך און דערהאלט זיך.

פון דיין ראש ישיבה וואס ליבט דיר.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

מרת ... תחי'

איך האב ערהאלטן אייער בריוו.

די ערשטע זאך זאלט איר מעלדן פאר די פאליציי און איינשפארן דעם מניוול אין תפיסה אן קיין רחמנות.

צווייטנס, איר זאלט זיך נישט קלאפן מיט וואס עס איז געשען, איר זענט נישט שולדיג, די תורה זאגט (דברים כב, כו): "כִּי כַּאֲשֶׁר יָקוּם אִישׁ עַל רֵעֵהוּ וּרְצָחוֹ נֶפֶשׁ כֵּן הַדָּבָר הַזֶּה", עס איז אזוי ווי א רוצח קומט און הרג'עט; איר האט דאס נישט געוואלט טון, איר זענט אומשולדיג; זאלט איר זיך נישט קלאפן.

דריטנס; שפארט זיך נישט איין אין שטוב, גייט יא ארויס צווישן מענטשן, גייט אן מיט אייער לעבן, גייט שפאצירן מיט אייער משפחה, און אויב עס איז אייך שווער, איר קענט נישט אויסהאלטן וואס איז געווען, די זאך לויפט אייך נאך אן אויפהער - זאלט איר נעמען די עצה פון רבי'ן, די עצה פון תפילה והתבודדות; שמועסט אויס אייערע מחשבות, אייערע בלבולים מיט'ן אייבערשטן; דערציילט אים אלעס, דאס וועט אייך העלפן.

תפילה והתבודדות איז אזוי שטארק, עס געבט דעם מענטש נייע מוחין, עס ווייזט א ליכטיגקייט אין די גרעסטע פינסטערניש; עס עפנט די פארקניפסטע קניפן, עס שלעפט ארויס פון די גרעסטע פלאנטער.

בעטס דעם אייבערשטן: "רבונו של עולם, העלף מיר, איך בין אזוי מיאוס אריינגעפאלן מיט א מניוול און דאס לאזט מיר נישט קיין מנוחה; איך קען נישט אנגיין ווייטער מיט מיין לעבן, איך קען נישט זיין א מאמע פאר מיינע קינדער. איך בעט דיר אייבערשטער, האב רחמנות אויף מיר, העלף מיר איך זאל זיך קענען באנייען, איך זאל קענען אנהויבן דאס לעבן פונדאסניי ממש, איך זאל זיך קענען ליידן, איך זאל פארגעסן וואס איז געווען, און העלף מיר, היט מיר - איך זאל נישט אנקומען צו אזעלכע זאכן, איך זאל נישט האבן צוטון מיט אנדערע, איך זאל לעבן א גוט לעבן מיט מיין מאן, מיט ליבשאפט און מיט שלום".

אזוי זאלט איר בעטן, און לייגט צו אייערע אייגענע תפילות, וועט איר זען ביז א קורצע צייט וועט איר צוריק ווערן געזונט און שטארק.

ווייזט דעם בריוו פאר אייער מאן, וועט ער זיך אויך מחזק זיין, און איר וועט זיך אינאיינעם שטארקן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

מזל טוב פאר דיין נייע געבוירענע מיידעלע! זאלסט זוכה זיין איר צו מגדל זיין לבעל תורה ולחופה ולמעשים טובים בנקל ובנחת.

בנוגע די קידוש וכו'; גיי צו דיינע עלטערן, מאך דארט די קידוש; אזוי וועסטו פארמיידן פראבלעמען וכו'.

א גרויסן יישר כח פאר די צדקה פון צען טויזנט דאלער; די געלט גייט פאר זייער א וויכטיגע צוועק. בזכות די מצוה פון צדקה זאלסטו זיין אפגעהיטן פון אלעם שלעכטס, און דו זאלסט האבן פרנסה בריווח און נחת ביי דיינע קינדער.

דאנק און לויב דעם אייבערשטן פאר אלעס וואס דו האסט, פאר אלעס וואס ער טוט מיט דיר. פאר דיין שיינע שטוב, פאר דיין ווייב, פאר דיינע קינדער.

גיי אביסל שפאצירן אין פעלד הינטער דיין שטוב - וועסטו שפירן טעם גן עדן.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

לכבוד מיין טייערער ... נרו יאיר

איך באקום זייער גוטע גרוסן פון די אינגל קעמפ, אויך דערציילט מען מיר ווי געטריי דו ביסט פאר די קינדער. די עלטערן זאגן אז די קינדער רופן אהיים אזוי צופרידן - עס גיסט זיך שמאלץ ווען זיי דערציילן וואס טוט זיך אין קעמפ, ווי מען לעבט מיט'ן אייבערשטן.

איך האב זייער הנאה געהאט צו זיין פאריגע וואך ביי די סיום הש"ס פון הבחור ... נרו יאיר, און איך ווארט ווען מען וועט מיך איינליידענען צו נאך סיומים.

אויב דו שפירסט ווי די ארבעט איז דיר זייער שווער, בעט איך דיר, כאפ א שמועס מיט אינגעלייט; פרעג זיי אויס אויב פאר זיי איז גרינגער... ווייל וויפיל איך הער פון אינגעלייט - הער איך פון יעדן איינעם ווי שווער מען ארבעט, ווי שווער עס איז זיי; ביי יעדן איז שווער, ביי דיר וועט כאטשיג בלייבן די יראת שמים, די מידות טובות און די אמונה וואס דו לייגסט אריין אין זיי.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

א גרויסן יישר כח פאר'ן מיר העלפן מיט יעדן פרט; עס איז אזוי געשמאק צו זיין דא אין שטעטל צווישן אנשי שלומינו.

אינדערפרי אום 8:00 לערן איך פאר דעם בלאט גמרא הונטערן בית המדרש, צווישן די ביימער. עס קומען אנשי שלומינו מיט האלטן דעם שיעור גמרא, עס איז א מחי', עס האט אלע טעמים. איך זאג פאר די אינגעלייט אז דאס איז טעם גן עדן, פרעגט מיך איינער: "דער ראש ישיבה איז שוין געווען אין גן עדן, צו זאגן אז דאס איז טעם גן עדן?" זאג איך אים: "איך מיין צו זאגן אז איך האף צו שפירן דעם טעם אין גן עדן; די טעם פון לערנען גמרא מיט אנשי שלומינו הונטער ביימער"; נישטא עפעס בעסערס.

איך וויל דיר בעטן אויב דו קענסט פאררעכטן די לעקטער ביי די פארקינג לאט; עס איז וויכטיג, ווייל מען זעט נישט קיין מענטשן און קארס פארן. בפרט מאנטאג נאכט ביי די פרויען צאמקום, איז א סכנה.

אויך אויב דו קענסט ארויפלייגן א ספרינג אויף די טירן אין ישיבה, ווייל עס ארבעט די עירקאנדישן, עס קאסט אזויפיל די לעקטער; עס איז ממש א שאד אידיש געלט.

נאך א וויכטיגע זאך; ברענג אריין צווישן אנשי שלומינו ליבשאפט. ווען דו זעסט א פייער צינדט זיך אן - גיס וואסער אדער ווארף זאמד, דערשטיק די פייער עס זאל זיך נישט פארשפרייטן.

ווען אלע וואלטן אזוי געטון - וואלט גוט געווען; בפרט די וואס העלפן, די גבאים - די דארפן האלטן קאפ אויף דעם; דעמאלט וועלן מיר זייער מצליח זיין.

בעזרת ה' יתברך

ערב שבת קודש פרשת בלק, ט"ז תמוז, שנת תשפ"ב לפרט קטן

לכבוד מיין טייערער ליבער הארציגער ... נרו יאיר

יעצט איז אפאר מינוט פאר'ן זמן שבת קודש, איך האב געהערט אז דו האסט א טעלעפאן אן קיין פילטער.

עס טוט מיר אזוי וויי; איך האף דו וועסט זיך קענען שטארקן אויף דעם נסיון און דאס אוועקווארפן, ווייל טייערער ליבער ..., אויב מען היט נישט די אויגן, מען קוקט עבירות - פארלירט מען אלעס! מען פארלירט די וועלט און יענע וועלט.

איך האב אזוי רחמנות אויף דיינע טייערע עלטערן, און איך האב רחמנות אויף דיר; איך קוק אזוי ארויס אז דו וועסט אויפשטעלן אן ערליכע שטוב, יעצט אז דו האסט א טעלעפאן אן א פילטער - ווער ווייסט וואו דאס וועט דיר אוועקטראגן...

טייערער ... נרו יאיר, נעם די עצה פון רבי'ן, זיי זיך מתבודד; רעד זיך אויס דיין הארץ צום אייבערשטן, בעט אים ער זאל דיר געבן כח צו זיין ערליך.

עס איז ממש א שאד, דו ביסט יעצט אין די יארן פון א שידוך, איך פרוביר דיר צו מאכן א שידוך, אבער אז דו האסט א טעלעפאן אן א פילטער - איז זייער שרעקעדיג, ווייל קודם פארלירט מען די געפיל צו רוחניות, צו דאווענען און לערנען, און נאכדעם פארלירט מען די געפיל צו אלעס, אפילו צו די וועלט; מען קען נישט לעבן מיט א ווייב, מען קען נישט ערציען קינדער, מען פארלירט אלעס.

איך בעט דיר זייער, נעם אן מיינע ווערטער וואס איך שרייב דיר פון מיין הארץ, איך ווארט זאלסט מיר ענטפערן; אדער קום רעדן מיט מיר, אדער בכתב.

א גוט שבת.

פון דיין ראש ישיבה וואס האט דיר ליב און ווארט צו זען נחת ביי דיר.

בעזרת ה' יתברך

יום ה' פרשת בלק, ט"ו תמוז, שנת תשפ"ב לפרט קטן

לכבוד מיין טייערער ... נרו יאיר

א גרויסן יישר כח פאר'ן צאלן רענט פאר אלע אונזערע בנינים מידי חודש בחדשו; שוין לאנגע יארן וואס דו מיט ... נרו יאיר נעמען צוזאם צדקה, מעשר, חומש פון אנשי שלומינו - פאר די בנייני המוסד. מאכסט מיר גרינגער צו קענען עוסק זיין מיט די בחורים מיט ישוב הדעת.

יעצט וויל איך דיר בעטן, היות די מוסד אין קרית ברסלב האט זיך אזוי שנעל צואוואקסן, עס איז שוין נישטא קיין פלאץ אין 39 טשעסטנאט סטריט, מיר האבן געקויפט נאך א בנין פינקט אנטקעגן איבער די ערשטע בנין, ממש פאר בחנם, דרייסיג טויזנט דאלער, אבער מען דארף אריינלייגן לכל הפחות דריי הונדערט טויזנט דאלער.

אפשר ווילסטו האבן די זכות צאמצונעמען פאר דעם בנין צדקה פון אנשי שלומינו, אפשר איז דא וואס ווילן קויפן זכותים פון כיתות; ווייל איך מוז שוין יעצט ענדיגן די ארבעט, מיר מוזן האבן דעם בנין גרייט אויף דעם קומענדיגן יאר, שנת תשפ"ג הבא עלינו לטובה.

שטארק זיך, זיי שטארק מיט לימוד משניות וגמרא; דאס איז נצחיות, דאס איז וואס מען נעמט מיט.

אויך ערלעדיג מיר די האלטערס פאר די זילבערנע ה.

יישר כח

בעזרת ה' יתברך

יום ה' פרשת בלק, ט"ו תמוז, שנת תשפ"ב לפרט קטן

...

שלמה המלך זאגט (משלי טו, יג): "לֵב שָׂמֵחַ" א פרייליכע הארץ, "יֵיטִב פָּנִים" האט א שיינע פנים, א שיינע אויסזען, "וּבְעַצְּבַת לֵב" און א טרויעריגע הארץ, "רוּחַ נְכֵאָה" ווערט צעבראכן די גייסט.

מיט די הקדמות פון הייליגן רבי'ן, וואס ער זאגט (לקוטי מוהר"ן חלק א', סימן קסט) שמחה היט דעם מענטש פון פגם הברית, און עצבות ווארפט אראפ אין עבירות; קען מען זאגן, "לֵב שָׂמֵחַ" - א פרייליכע הארץ, "יֵיטִב פָּנִים" - זעט אויס שיין; ווייל די שמחה היט אים פון עבירות. דער רבי זאגט (שם): "כְּשֶׁתִּזְכֶּה לְשִֹמְחָה" ווען מען איז פרייליך, "אֲזַי הַשֵּׁם יִתְבָּרַךְ בְּעַצְמוֹ יִשְׁמֹר לְךָ אֶת הַבְּרִית" היט דער אייבערשטער אליינס דעם מענטש פון פוגם זיין באות ברית קודש.

"וּבְעַצְּבַת לֵב" און אויב חס ושלום מען איז בעצבות ומרה שחורה, "רוּחַ נְכֵאָה" - פאלט מען אראפ, מען ווערט צעבראכן, מען איז פוגם בברית, אזוי ווי דער רבי זאגט דארט ווייטער: "כִּי עִקַּר פְּגַם הַבְּרִית הוּא עַל יְדֵי עַצְבוּת" דער עיקר וואס מאכט דעם מענטש אראפפאלן אין פגם הברית, הוצאת זרע לבטלה רחמנא לצלן - איז דורך עצבות.

וואויל איז דעם וואס פריידט זיך מיט זיינע גוטע מעשים, ער פריידט זיך אז ער איז א איד, ער איז דעם אייבערשטנ'ס א קינד; וועט זיין: "לֵב שָׂמֵחַ, יֵיטִב פָּנִים", והבן למעשה.

בעזרת ה' יתברך

יום ג' פרשת בלק, י"ג תמוז, שנת תשפ"ב לפרט קטן

לכבוד מיין טייערער ... נרו יאיר, תלמיד ישיבת תפארת התורה

איך הער יעצט זאגן אז דו האסט זיך גענומען צום ביטערן טראפ, עס זענען דא בחורים וואס טרינקען ברוינפן.

איך בעט דיר זייער, "אַל תֵּלֵךְ בְּדֶרֶךְ אִתָּם" (משלי א, טו), גיי נישט אויף די וועג, דו דארפסט א שידוך, דו דארפסט חתונה האבן; אין בית פיגא איז נישטא קיין תלמידות וואס ווילן א מאן א שיכור, ווער דארף א מאן א שיכור? ווער וויל אן איידעם א שיכור?!

איך האף אז דער בריוו וועט זיין גענוג, ווייל איך וועל טון אלעס אין די וועלט אז עס זאל נישט זיין אין ישיבה קיין טרינקען.

בעזרת ה' יתברך

יום ג' פרשת בלק, י"ג תמוז, שנת תשפ"ב לפרט קטן

מרת ... תחי' ברסלב, ליבערטי

איך האב ערהאלטן אייערע בריוו.

נעמט נישט קיין פרעשור פון גארנישט, נישט פון אייער מאן און נישט פון די קינדער, אז אייער מאן הייבט נישט אויף די טעלעפאן - זאלט איר נישט ווערן אנגעצויגן, און אז ער קומט נישט אהיים צייטליך - זאלט איר נישט האבן פרעשור און אריינגיין אין א שלעכטע גיסטע; טראכטס גוט און נעמט די לעבן גרינג.

אזוי אויך מיט די ארבעט; נעמט נישט קיין פרעשור, ווערט נישט היסטעריש פון גארנישט, ארבעטס לויט אייערע כוחות; וויפיל כח איר האט - אזוי זאלט איר ארבעטן.

דער הייליגער רבי זאגט (לקוטי מוהר"ן חלק ב', סימן פב) פארוואס גייט פאר'ן מענטש פארקערט ווי ער וויל? ווייל ער וויל עפעס; וואלט ער גארנישט געוואלט, וואלט מען געוואלט נאר טון רצון השם - וואלט אלעס געגאנגען כסדר; די עצה איז בדוק ומנוסה פאר אלע וואס קרעכצן אז עס גייט זיי נישט, די גאנצע לעבן איז איין שטיק דורכפאל, דאס איז ווייל זיי לעבן נישט מיט אמונה; וואלט מען זיך איינגעבויגן דעם קאפ צום אייבערשטן, וואלט אלעס געגאנגען כסדר.

בעזרת ה' יתברך

יום ג' פרשת בלק, י"ג תמוז, שנת תשפ"ב לפרט קטן

לכבוד מיין ליבער ... נרו יאיר

איך האב רחמנות אויף דיר, איך זע ווי דו גייסט איין, דו עסט זיך אויף, דו פירסט חשבונות מיט דעם, מיט יענעם; א שאד זיך אויפצועסן, א שאד זיך צו פייניגן. ענדערש זאלסטו חזר'ן די אמונה, חזר טאג און נאכט די ווערטער: "אלעס איז אייבערשטער", און "אייבערשטער איז אלעס"; קיינער קען מיר נישט שלעכטס טון, קיינער קען מיר נישט גוטס טון, אלעס איז פון הימל.

חכמינו זכרונם לברכה זאגן (חולין ז:): "אֵין אָדָם נוֹקֵף אֶצְבָּעוֹ מִלְּמַטָּה", א מענטש צעקלעמט זיך נישט זיין פינגער, "אֶלָּא אִם כֵּן מַכְרִיזִין עָלָיו מִלְּמַעְלָה" - נאר אז מען רופט אויס אין הימל; איז דאך זיכער אז דיין טאטע, דיין מאמע, דיין משפחה, דיינע צרות ויסורים - איז אלעס דער אייבערשטער.

גלייב מיר, וואלסטו געפאלגט דעם רבי'ן און געגאנגען שרייען אין פעלד: "רבונו של עולם רחם עלי, רבונו של עולם ראטעווע מיר, האב רחמנות אויף מיר, איך בין פארכאפט ביי די נישט גוטע, איך האב מיט יעדן א חשבון, יעדער איז מיר שולדיג; וואס איז מיט מיר? ווען וועל איך שוין תשובה טון? וויסן און געדענקען אז עס איז גארנישט דא נאר דו אייבערשטער".

וואלסטו געמאכט התבודדות - וואלסטו שוין פון לאנג געווען א פרייליכער, און אלעס וואלט דיר גרינגער געווען.

ברודער, הויב אן פונדאסניי; איך טו דאס און אלעס איז מיר גוט.

בעזרת ה' יתברך

יום ג' פרשת בלק, י"ד תמוז, שנת תשפ"ב לפרט קטן

לכבוד מיין טייערער ליבער ... נרו יאיר ברסלב, ליבערטי

קום שבת אין שול מיט'ן שטריימל, אויך ביים אהיימגיין זאלסטו גיין אנגעטון מיט'ן שטריימל, און אויב עס איז דיר שווער צו גיין א לאנגע וועג - קענסטו דאווענען נעבן דיין שטוב. מיר האבן שוין היינט פינף בתי מדרשים אין שטעטל, ענדערש דאווען נעבן דיין שטוב און גיי אנגעטון מיט'ן שטריימל, ווי איידער זיך שלעפן די לאנגע וועג צו קומען הערן ספורי מעשיות און אויסטון די שבת'דיגע קליידער.

דורות רוקן זיך אוועק, אויב מען כאפט זיך אן, מען איז נישט משנה - וועלן די קינדער אויך בלייבן ערליך.

גיי הפצה, יעצט זומער זענען דא ארום די שטעטל צענדליגער טויזנטער משפחות וואס ווארטן איינער זאל זיי מדריך זיין, איינער זאל זיי אויפווייזן אז זיי קענען נאך תשובה טון און אז דער אייבערשטער האט ליב זייערע מצוות.

בעזרת ה' יתברך

יום ב' פרשת בלק, י"ב תמוז, שנת תשפ"ב לפרט קטן

מרת ... תחי'

די עיקר עבודה פון א מענטש אויף די וועלט - איז זיין פרייליך; זיך פרייען מיט'ן אייבערשטן, זיך פרייען מיט תורה ומצוות.

דער סמ"ך מ"ם וכת דילי' זוכן אלע וועגן ווי אזוי צו צעברעכן דעם מענטש, און אונזער ארבעט איז ווי אזוי זיך צו שטארקן אויף זיי, און זיין פרייליך.

שטארקט זיך מיט אלע אייערע כוחות נאר זיין פרייליך.

בעזרת ה' יתברך

יום ג' פרשת פנחס, כ' תמוז, שנת תשפ"ב לפרט קטן

... תחי'

דער שידוך וואס איך האב אייך אנגעטראגן איז נישט אינטערעסאנט; איך האף איר וועט נישט ווערן צעבראכן, איך האף עס וועט ארויסקומען יעצט אייער העלדישקייט, אז איר גייט ווייטער אן מיט'ן לעבן - זאל זיין וואס זאל זיין.

יעדער איינער אין היכל הקודש פון דער קלענסטער ביזן גרעסטער ווייסט וואס מוהרא"ש לערנט אונז: "ווער עס דארף מיר נישט - דארף איך אים טויזנט מאל נישט"; דאס האבן מיר געלערנט פון מוהרא"ש זכותו יגן עלינו, ער האט אריינגעלייגט אין אונז אזא גרויסע שכל, מען זאל נישט נאכלויפן קיינעם, מען זאל זיין זיכער מיט זיך, און אז יענער וויל מיר - וויל איך יענעם, און אז יענער וויל מיך נישט - וויל איך אים טויזנט מאל נישט.

אזוי זאלט איר יעצט זאגן: 'אז יענער וויל מיר נישט - דארף איך יענעם טויזנט מאל נישט'.

איך טראכט אסאך פון א גוטע שידוך פאר אייך, איך האף צו זיין אייער שדכן און בקרוב זענט איר א כלה, און גלייך נאכדעם וועט זיין די חתונה.

געבט א גוטע שלינג, שלינגט אראפ די זאך, און קלאפט ארויס פון קאפ דעם נאמען; זאגט מיר ווען איר זענט גרייט צו גיין ווייטער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ב' פרשת בלק, י"ב תמוז, שנת תשפ"ב לפרט קטן

מרת ... תחי'

אייער מאן העלפט מיר זייער געטריי, ער העלפט מיר אן קיין אייגענע חשבונות; ער איז דא צו העלפן די מוסד וואס האט אים געהאלפן.

אויך איר זענט זייער א גוטע טיטשער, מיר זענען זייער צופרידן פון אייער ארבעט.

ברענגט אריין אין די תלמידות - שמחה.

זעט אז די סקול זאל בלייבן היימיש, עס זאל בלייבן א סקול וואו יעדע מיידל איז א קינד - נישט א נומער. איך האף אז אפילו ווען מיר וועלן וואקסן, די מוסד ווערט גרעסער - וועט דאס בלייבן א ווארעמע פלאץ וואו מען ערציעט קינדער מיט א ליבשאפט צום אייבערשטן און צו די תורה.

גייט מיט איידעלע קליידער, זוכט נישט ארויסצושטארן פון אנדערע.

בעזרת ה' יתברך

יום ב' פרשת בלק, י"ב תמוז, שנת תשפ"ב לפרט קטן

מיין טייערע טאכטער ... תחי'

איך באקום זייער גוטע גרוסן פון סקול אז דו טוסט זייער א גוטע ארבעט, די קינדער זענען צופרידן.

איך האב נחת פון דיין מאן נרו יאיר. יעצט זומער זיצט ער מער אין ישיבה, איך האלט מיט פון דער נאנט זיין התמדת התורה, זיין יראת שמים און זיין גוטע הארץ. ער העלפט מיר זייער מיט די בחורים אין ישיבה, ער זארגט פאר זייער וואוילזיין.

שרייב מיר יעדע וואך וויפיל תהילים דו זאגסט. תהילים איז א טרינק, דער רבי זאגט (חיי מוהר"ן, סימן תפה): "א קאפיטל תהילים אז מען זאגט, איז אזוי ווי א פאנטש"; יעצט זומער ווען עס איז הייס, די נסיונות זענען גרויס - דארף מען מער טרינקען נישט צו ווערן דיהיידרעיטעד, אויסגעטרוקנט.

פון דיין טאטע.

בעזרת ה' יתברך

יום ב' פרשת בלק, י"ב תמוז, שנת תשפ"ב לפרט קטן

מרת ... תחי'

איך האב ערהאלטן אייער בריוו.

איך פריי זיך זייער צו הערן אז די שכינה רוט צווישן ענק, עס איז דא שלום; דארט וואו עס איז דא שלום - איז די שכינה דארט. חכמינו זכרונם לברכה זאגן (שבת י.) דעם אייבערשטנ'ס נאמען איז 'שלום'.

נאכן הערן טאג און נאכט יעדנ'ס קרעכצן איז גוט צו ליינען א פאזעטיווע בריוו און זען אז עס גייט צוביסלעך אריין די דיבורים אין די הערצער; מען לעבט מיט'ן אייבערשטן, מען לעבט בשלום ובשלוה.