בריוון פונעם ראש ישיבה שליט"א

בעזרת ה' יתברך

יום ד' פרשת בחוקותי, כ"ד אייר, ל"ט לעומר, שנת תשפ"ב לפרט קטן

מרת ... תחי'

מענטשן זענען זיך זייער מחי' מיט די בריוו וואס איר טייטשט איבער, די אלע וואס פארשטייען נישט אידיש - זענען זיך זייער מחי' מיט די איבערגעטייטשטע בריוו.

איך בין מתפלל פאר אייך איר זאלט האבן כח ווייטער צו טון די הייליגע ארבעט, איר זאלט באקומען א ברכה אין די צייט, איר זאלט האבן כח צו די קינדער, און נאר זען נחת פון זיי.

ווער עס טוט אין הפצה, אין קירוב - דער באקומט שכר אויף אלע גוטע מעשים וואס די אלע אידן טוען; מען קען זיך נישט פארשטעלן דאס גרויסקייט וואס ווארט אפ.

א גרוס פון אייערע ליכטיגע קינדער, זיי זענען אזוי טייער, זיי האבן א ספעציעלע חן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ב' פרשת בהר, ט"ו אייר, ל' לעומר, שנת תשפ"ב לפרט קטן

... תחי'

אייער טאטע האט מיר געבעטן איך זאל אייך שרייבן אפאר ווערטער לכבוד אייער יום הולדת.

עס שטייט פון צדיקים מען זאל זיך פארנעמען א גוטע זאך אינעם יום הולדת, די געבורט'ס טאג איז פאר'ן מענטש אזוי ווי ראש השנה; זאלט איר זיך מקבל זיין א גוטע זאך.

א סגולה אוועק צו נעמען פחדים; דער רבי זאגט (ספר המדות אות פחד, סימן ה): "בִּצְדָקָה תְּבַטֵּל אֶת הַפַּחַד", צדקה נעמט אוועק שרעק; נעמט א צדקה פושקע, געבט א פרוטה לצדקה און בעטס דעם אייבערשטן:

"הייליגער באשעפער, העלף מיר איך זאל נישט האבן קיין שרעק, איך זאל נישט מורא האבן פון קיינעם - נאר פון דיר".

אויך זאלט איר דערציילן פאר'ן אייבערשטן אלעס וואס גייט אריבער אויף אייך, און אויב חס ושלום איר האט געטון עפעס שלעכטס - זאלט איר זיך מתודה זיין. אז מען שמועסט מיט'ן אייבערשטן, מען דערציילט אלעס, און אויב מען טוט חס ושלום שלעכטס איז מען זיך מתודה - גייען אוועק אלע פחדים, און אויב מען איז זיך נישט מתודה - האט מען שרעק. דער רבי זאגט (שם, סימן לד): "מִי שֶׁאֵינוֹ מִתְוַדֶּה עַל עֲווֹנוֹתָיו", ווער עס איז זיך נישט מתודה, "מוֹרָא בָּא עָלָיו", באקומט א שרעק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

ה' פרשת אמור, י"ב אייר, כ"ז לעומר, שנת תשפ"ב לפרט קטן

לכבוד מיין טייערער ... נרו יאיר

איך האב דיר שוין אפאר מאל געזאגט, איך וועל דיר עס נאכאמאל זאגן: "אויב עס וועט נישט זיין אין ענקער דירה קיין אינטערנעט און אנדערע כלי משחיתים – וועט ענקער גאנצע דירה, אלע בחורים - ווערן בקרוב חתנים, און אז איר וועט לאזן אין ענקער דירה אפילו נאר איין בחור מיט אינטערנעט, מאוויס, גלוי עריות, וועט נישט זיין קיין שידוכים – מיט אלע סגולות, מיט אלעס וואס מען וועט נאר פרובירן צו טון".

איך זע פאר דיר צוויי וועגן, אדער ביסטו שטארק, דו האסט נישט מורא פון קיינעם, דו ווארפסט ארויס די אלע וואס ווילן בלייבן מיט די שמוץ, אדער זאלסטו אפלאזן די דירה, גיין שלאפן אין א זויבערע פלאץ, אדער גאר א דריטע וועג, בלייבן מיט בחורים וואס קוקן ניאוף, און פארשווארצט ווערן בזה ובבא.

בעזרת ה' יתברך

יום ה' פרשת בהר, י"ח אייר, ל"ג בעומר, שנת תשפ"ב לפ"ק, פה מירון

לכבוד מיין טייערער זון ... נרו יאיר ברסלב, ליבערטי

א גרויסן יישר כח פאר'ן נעמען ..., ... און ... – איך זאל קענען פארן קיין ארץ ישראל מיט מאמי. געווענליך פאר איך אליינס, מאמי קומט נישט מיט ווייל עס איז שווער צו צעטיילן די קינדער, אבער דאס מאל האט מאמי יא געוואלט קומען צו רבי שמעון בר יוחאי פועל'ן ישועות.

איך האב מיטגענומען שמעון נרו יאיר, איך האב אים שוין פון לאנג צוגעזאגט אז אויב ער וועט מסיים זיין ש"ס וועל איך אים נעמען קיין ארץ ישראל, ער האט שוין געוואלט קומען פאריגע נסיעה ביי די הקמת המצבה פון זיידע זכרונו לברכה, איך האב אים געזאגט אז עס לוינט זיך צו ווארטן צו קענען קומען ל"ג בעומר צו רבי שמעון בר יוחאי.

דיר זאג איך דאס זעלבע, עס לוינט צו קומען ל"ג בעומר צו רבי שמעון בר יוחאי, און אז מען קומט איין מאל, מען איז דאס טועם – קומט מען שוין יעדע יאר. מוהרא"ש פלעגט דאס זאגן, ווער עס קומט קיין מירון צו רבי שמעון בר יוחאי ל"ג בעומר – דער קומט שוין יעדעס יאר.

קומענדיגע יאר הבא עלינו לטובה זאלסטו קומען מיט דיין ווייב תחי', מיט דיין נחמן נתן, אים אפשערן ביי רבי שמעון בר יוחאי.

בעזרת ה' יתברך

יום ה' פרשת בהר, י"ח אייר, ל"ג בעומר, שנת תשפ"ב לפ"ק, פה מירון

לכבוד מיין טייערער ... נרו יאיר

איך בין אנגעקומען בשלום קיין ארץ ישראל. אין עירפארט האט מיר אפגעווארט האברך ... נרו יאיר מיט די נייע מעשה ביכל "מעשה'לעך פאר קינדערלעך"; איך האב זיך אזוי געפרייט, אויך האט ער מיר באוויזן ספר איש אמונות חלק א', דאס איז אזוי שיין, איך בין זייער פרייליך.

איך וואונדער זיך אויף זייער ברען צום רבי'ן, זיי האבן אלעס אוועקגעגעבן פאר'ן רבי'ן; ער מיט זיין ווייב ארבעטן טאג און נאכט מתרגם זיין די בריוו, די גליונות, דאס דרוקן און פארשפרייטן, אויך די חדר איז ביי זיי אין די דירה.

איך שיק דיר דא א שטיקעלע חדושי תורה וואס דער אייבערשטער האט מיר מזכה געווען היינט פארטאגס לערנענדיג תיקונים ביי רבי שמעון אין מירון.

רבי שמעון בר יוחאי זאגט (תיקון כא, דף מז:): "וּמַה דַּהֲוָה סְגוּלָה לְעֵילָא כְּגַוְונָא דָא . ֹ . כַּד נָחְתָא לְגַבֵּי צַדִּיק אִתְעֲבִידַת סֶגוֹ"ל כְּגַוְונָא דָא ֹ . ֹ "; מיט די הקדמה פון הייליגן רבי'ן, (לקוטי מוהר"ן חלק א, סימן רעט): "דַּע, שֶׁיֵּשׁ שֶׁאוֹמְרִים תּוֹרָה מִלְּמַטָּה לְמַעְלָה, וְהִיא מִלְּמַטָּה רְחָבָה מְאֹד, שֶׁלְּמַטָּה מַרְחִיבִין הַדָּבָר וּמַגְדִּילִין אוֹתוֹ מְאֹד", עס איז דא וואס זאגן תורה, אונטן איז דאס א ברייטע תורה, זייער א ברייטע, "וּלְמַעְלָה הוּא קָצָר" ; דאס הייסט מען רעדט גרויסע זאכן, מען פארלאנגט אסאך, עס זעט אויס זייער ברייט, "וּלְמַעְלָה הוּא קָצָר, וְהוֹלֵךְ וּמְקַצֵּר וְעוֹלֶה, עַד שֶׁלְּמַעְלָה מַעְלָה הוּא קָצָר מְאֹד מְאֹד", אבער אויבן ווערט די תורה קלענער און קלענער, ביז עס ווערט ממש קליין, "כִּי לְמַעְלָה לֹא נִשְׁאָר מִמֶּנָּה כְּלוּם", אויבן בלייבט כמעט גארנישט פון די תורה, "רַק מְעַט מְעַט, כִּי בְּוַדַּאי יֵשׁ שָׁם אֵיזֶה נִיצוֹץ הַקָּדוֹשׁ", עפעס א פינטעלע בלייבט.

מוהרא"ש געבט אונז צו פארשטיין די ווערטער פון רבי'ן, עס זענען דא וואס זאגן דרשות און תורות, עס זעט אויס זייער ברייט, עס זעט אויס זייער גרויס, אבער וואס קומט ארויס פון די תורה? וואס נעמט מען ארויס פון די דרשה? גארנישט! דעריבער זעט דאס אויס אזוי:  ברייט פון אונטן, און אויבן בלייבט גארנישט. "אֲבָל יֵשׁ לְהֵפֶךְ, שֶׁאוֹמְרִים תּוֹרָה מִלְּמַעְלָה לְמַטָּה" , עס זענען דאס וואס זאגן תורה פון אויבן צו אונטן, "וְשָׁם לְמַעְלָה הִיא רְחָבָה מְאֹד מְאֹד", אויבן איז דאס א ברייטע תורה, "וְכָל מַה שֶּׁיּוֹרֶדֶת לְמַטָּה מִתְקַצֶּרֶת וְיוֹרֶדֶת, עַד שֶׁלְּמַטָּה הִיא קְצָרָה מְאֹד, וְהִיא רַק מְעַט מְעַט לְמַטָּה", ווי מער עס קומט אראפ דא אונטן ווערט דאס קלענער און קלענער, "אֲבָל לְמַעְלָה הִיא רְחָבָה מְאֹד", אבער אויבן איז דאס זייער גרויס.

מוהרא"ש איז מסביר, עס איז דא צדיקים וואס זאגן תורה, אונטן זעט דאס אויס זייער קליינטשיג, עס איז נישט קיין ברייטע תורה, אבער ווען מען גייט אוועק פון אזא דרשה ווערט מען א גרויסער צדיק, אויבן אין הימל ווערט עס ברייט, דער צדיק זאגט אז קליינע תורה, ער זאגט אונז מיר זאלן רעדן צום אייבערשטן, מיר זאלן לערנען תורה אפילו אן פארשטיין, עס זעט אויס ווי א פינטעלע, ווי א קליינע דרשה, א גארנישט, אבער עס ווערט ברייט, מען ווערט א גרויסער צדיק.

דאס קען זיין, רבי שמעון בר יוחאי זאגט: "כַּד נָחְתָא לְגַבֵּי צַדִּיק אִתְעֲבִידַת סֶגוֹ"ל כְּגַוְונָא דָא ֹ . ֹ ", דער צדיק לערנט אויס "טו קליינע פינטעלעך, טו קליינע זאכן", אויבן איז עס נישט קליין, נאר דא איז עס קליין, אזוי אויך, "הויב אן דינען דעם אייבערשטן אפילו דו האסט נישט קיין טעם, קיין הרגש", שפעטער וועט ווערן ברייטער; והבן למעשה.

בעזרת ה' יתברך

יום ד' בהר, י"ז אייר, ל"ב לעומר, שנת תשפ"ב לפרט קטן

לכבוד מיין טייערער ליבער הארציגער ...

ווען דו ביסט געווען ביי מיר מיט דיין ווייב און געבעטן אן עצה וכו' האב איך דיר געזאגט איך וועל רעדן מיט דיר פריוואט, למעשה בין איך אוועק געפארן קיין ארץ ישראל, יעצט בין איך אין מירון, איך ווייס נישט ווען עס וועט אויסקומען צו רעדן, וועל איך דיר קודם שרייבן ברמיזה, ווען עס וועט אויסקומען צו רעדן פנים בפנים – וועלן מיר רעדן.

די זאך איז אזוי, אז די ווייב שפירט ווי איר מאן לויפט איר נאך – וועט זי זיך אוועקציען, ווי נאר די ווייב באקומט די הרגשה אז איר מאן לויפט איר נישט נאך, איר מאן איז איר מכבד, ער זארגט פאר איר, ער העלפט איר און רעדט שיין צו איר – וועט זי טון רצון בעלה; דאס איז בדוק ומנוסה.

דער פראבלעם איז אז נישט יעדער כאפט דאס, אדער כאפט מען יא וואס מען האט צו טון – אבער מען האט נישט כח און סבלנות דאס צו טון, דאס אויסצואווארטן; דארף מען טון די עצה וואס דער רבי האט אונז געגעבן, זיך אויסוויינען צום אייבערשטן, אים בעטן אויף די פשוט'ע שפראך: "רבונו של עולם, העלף מיר, געב מיר שכל איך זאל וויסן וואס מיינט מכבד זיין - דאס צו טון, און וואס מיינט נאכלויפן – איך זאל דאס נישט טון; ווי אזוי טוט מען, וואס טוט מען, וויפיל טוט מען וכו' וכו'", מען דארף בעטן דעם אייבערשטן: "הייליגער באשעפער, איך וויל לעבן מיט מיין ווייב א געזונטע לעבן, איך וויל לעבן מיט איר, נישט איר באצווינגען, ווי אזוי טוט מען דאס?"

מיט תפילה באקומט מען שכל. מוהרא"ש זאגט, "שכל" איז די ראשי תיבות פונעם פסוק (איכה ב, יט): "שִׁ'פְכִי כַ'מַּיִם לִ'בֵּךְ", גיס זיך אויס דאס הארץ פאר'ן באשעפער; דאס איז שכל, תפילה והתבודדות געבט שכל, מען ווייסט וואס מיינט 'יענעם ליב האבן', און וואס איז 'זיך אליינס ליב האבן'; א ווייב קויפט נישט אפ דאס זאגן מען האט איר ליב – ווען די געפילן זאגן 'האסט זיך אליינס ליב וכו''.

איך וועל רעדן מיט דיר פנים בפנים.

דערווייל זיי זיך קובע שיעורים אין מקרא, משנה, גמרא און מדרש. אויך זאלסטו גיין אין פעלד יעדן איינציגסטן טאג; שריי צום אייבערשטן ער זאל רחמנות האבן אויף דיר.

איך מוז מקצר זיין, איך הער מען קען גיין צו די מערה, איך לויף ארויף.

בעזרת ה' יתברך

יום ד' בהר, י"ז אייר, ל"ב לעומר, שנת תשפ"ב לפרט קטן

לכבוד מיין טייערער ... נרו יאיר

הער נישט אויס די וואס רעדן צו דיר פון זיך אפטיילן חס ושלום פון דיין ווייב, דער וואס רעדט פון זיך אפטיילן – קען דאס אליינס מקיים זיין, אויב האט ער א ווייב. נאר דער סמ"ך מ"ם רעדט צו זיך צו צעטיילן, צעברעכן משפחות, זיין זאך איז המשל ופירוד, ביי די קדושה איז נאר דא שלום, דעם אייבערשטנ'ס נאמען איז שלום (שבת י.), "ה' יְבָרֵךְ אֶת עַמּוֹ בַשָּׁלוֹם" (תהלים כט, יא).

דו זאלסט פאלגן דעם רבי'ן, דער רבי זאגט (שיחות הר"ן, סימן רסד) מיר דארפן מכבד זיין די ווייב, איר האלטן טייער, רעדן מיט דרך ארץ, בלאז אריין האפענונג אין איר, וועט זי ווערן שטארק, וועט זי האבן כח פאר קינדער.

בנוגע די מחלוקות וואס דו גייסט אריבער יעצט צוליב ברסלב; מאך זיך א חשבון, וואס האסטו באקומען אין די האלבע יאר ביים רבי'ן און וואס האסטו באקומען צוואנציג יאר – אדער מער – ביי דיין וכו'? וואלסט געקענט אויסלעבן דיין לעבן דארט אן ענדיגן איין מאל חמשה חומשי תורה, ששה סדרי משנה, בבלי וכו', און אן די אלע גוטע זאכן; נאכן זיך מאכן א חשבון מיין איך איז מער נישטא קיין בחירה.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

לכבוד מיין טייערער ... נרו יאיר

מזל טוב צו דיין חתונה, איך בין יעצט אויפ'ן עראפלאן, איך פאר קיין מירון צו רבי שמעון בר יוחאי, איך וועל זיך נישט באטייליגן ביי דיין חתונה; א ברכה וויל איך דיר וואונטשן:

דער אייבערשטער זאל העלפן דו זאלסט לעבן מיט דיין ווייב באהבה, אחוה, שלום וריעות, דיין שטוב זאל זיין א פלאץ פאר השראת השכינה.

פון דיין ראש ישיבה.

בעזרת ה' יתברך

ג' פרשת בהר, י"ז אייר, ל"ב לעומר, שנת תשפ"ב לפרט קטן, פה מירון

לכבוד מיין טייערער ... נרו יאיר ברסלב, ליבערטי

א גרויסן דאנק פאר'ן העלפן אריבערטראגן אלע מאשינען און אלע ספרים צום נייעם בנין קרן הדפסה היכל הקודש. געב איבער פאר אלע אינגעלייט און בחורים וואס האבן געהאלפן, אלע וואס העלפן האבן די גרויסע הבטחה וואס רבי שמעון בר יוחאי האט צוגעזאגט.

איך געפון זיך יעצט אין מירון, איך בין געקומען צום הילולא, איך וועל אם ירצה ה' זיין אין מירון ביז נאך שבת. איך טראכט, וואס קען זיין גרעסער פון העלפן דרוקן און פארשפרייטן די הייליגע ספרים און קונטרסים, עצות און חיזוק פון הייליגן רבי'ן – וואס איז אזוי מחי' אידישע קינדער.

דער הייליגער רבי שמעון בר יוחאי זאגט (תרומה קכח:) "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר: א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; דער מענטש נעמט אוועק טומאה פון די וועלט און ער מאכט אז דעם אייבערשטנ'ס נאמען זאל ווערן געהייליגט אויף די וועלט, און דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחֲמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף די וועלט און אויף יענע וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכט'ס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן.

דאס איז דער גרעסטער תיקון, דער רבי זאגט (ספר המדות אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה, שֶׁיִּשְׁתַּדֵּל לְהַחֲזִיר בְּנֵי אָדָם בִּתְשׁוּבָה", א תיקון פאר די עבירות איז ארבעטן צוריק צו ברענגען מענטשן צום אייבערשטן; וואויל איז דעם וואס האט א חלק אין הפצה, און א חלק אין הדפסה – וועט ער אלץ פאררעכטן.

געב איבער פאר אלע אינגעלייט און בחורים א פערזענליכע דאנק, ווייז זיי אלע דעם בריוו.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

לכבוד מיין טייערער ... נרו יאיר

געלויבט דעם אייבערשטן איך זיך יעצט אויפ'ן פליגער, מיר פארן צו די הילולא פון רבי שמעון בר יוחאי; דער אייבערשטער זאל העלפן מיר זאלן פועל'ן ישועות און רפואות פאר אלע אידן.

איך פאר מיט מיין ווייב, אויך מיט מיין זון שמעון נרו יאיר. איך בין מעודד מיינע קינדער זאלן ענדיגן ש"ס כסדרן, און איך זאג זיי אז אויב זיי וועלן לערנען און מסיים זיין ש"ס – געב איך זיי א מתנה, איך נעם זיי קיין ארץ ישראל; יעצט איז געקומען זיין רייע. געלויבט דעם אייבערשטן אלע קינדער ביז דערווייל האבן זוכה געווען צו מסיים זיין ש"ס, דער אייבערשטער זאל מיר העלפן ווייטער.

איך שרייב דיר דאס, איך וויל דיר מחזק זיין דו זאלסט אויך אנהויבן ש"ס, לערנען יעדן טאג דפים גמרא. עס איז דאך א מחי' צו לערנען די הייליגע תורה, די הייליגע גמרא; נישטא עפעס בעסער'ס ווי לערנען.

דער הייליגער רבי האט אונז געגעבן א זיסע וועג ווי אזוי צו לערנען (כמבואר בשיחות הר"ן, סימן עו), אפילו מען פארשטייט נישט וואס מען לערנט – זאל מען לערנען אן פארשטיין, נאר זאגן די ווערטער.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

מרת ... תחי' ברסלב, ליבערטי

מיר שטייען יעצט אין א הייליגע צייט, ערב ל"ג בעומר; יעצט איז א פאסיגע צייט זיך צו דערנענטערן צום אייבערשטן. חכמינו הקדושים זאגן (ירושלמי ברכות א, ה) דער אייבערשטער בעט פון אונז צוויי זאכן, די הארץ און די אויגן, "לִיבָּא וְעֵינָא תְּרֵי סַרְסוּרֵי דַּחֲטָאָה נִינְהוּ", די צוויי זאכן זענען וואס ברענגט דעם מענטש נענטער צום אייבערשטן, אדער חס ושלום טוט עס אים דערווייטערן, "אָמַר הַקָּדוֹשׁ בָּרוּךְ הוּא, אִי יְהַבְתְּ לִי לִיבָּא וְעֵינָא, אֲנָא יָדַע דְּאַתְּ לִי".

ווארפט אוועק די נישט גוטע טעלעפאן, האט נישט מורא דאס צו טון, אייער מאן נרו יאיר וועט אייך נאר ארויפקוקן. אז איר וועט זיין שטארק, איר וועט נישט קוקן די עקלדיגע זאכן – וועט דער אייבערשטער אייך באגליקן מיט גליק און פרייד.

מיר מוזן עפעס טון פאר אונזערע דורות; אז מיר וועלן נישט זיין שטארק – וואס וועט שוין זיין מיט אונזערע קינדער... יעצט קומט אזעלכע נסיונות – וואס איז נאכנישט געווען; מיר מוזן זיין פעלזן פעסט נישט צו האבן די זאכן וואס מען קוקט אין דעם עבירות.

בעטס דעם אייבערשטן איר זאלט האבן די שטארקייט צו זיין אפגעהיטן פון די זאכן, איך וועל בעטן פאר אייך אין מירון ביי רבי שמעון בר יוחאי.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

מרת ... תחי' קרית ברסלב, תלמידה בית פיגא

בעטס דעם אייבערשטן די תפילה יעדן טאג:

"הייליגער באשעפער, העלף מיר איך זאל זיין פרייליך, העלף מיר איך זאל זיך קענען שטארקן אויף דער יצר הרע וואס וויל נאר אלץ טרויעריג מאכן, העלף מיר אוועקשטופן אלע שלעכטע מחשבות. א גאנצן צייט טראכט איך שלעכטע זאכן, אז עפעס גייט פאסירן מיט מיר, עפעס שלעכטס גייט פאסירן צו מיינע קינדער; די מחשבות זענען אזוי שטארק, עס ווארפט מיר אראפ אין תהום, איך ווער שוואך, איך פארליר די אמונה.

אנא ה', העלף מיר, האב אויף מיר רחמנות, ווען וועל איך שוין זיין פרייליך; נאר דורך שמחה קען מען אוועקשטופן די שלעכטע געדאנקען, העלף מיר טאטע איך זאל גלייבן אין דיר, איך זאל געדענקען אז דו ביסט מיט מיר, דו היטסט מיר, דו היטסט מיינע קינדער, דו ביסט אלעס, נישטא גארנישט אויף די וועלט, אלעס ביסטו, אלעס איז א לבוש פון דיר.

אנא ה', העלף מיר איך זאל ליב האבן די תורה, ליב האבן צניעות. פארוואס וויל איך זיך אנטון ווי די גוים טמאים? פארוואס וויל איך אנטון מיינע קינדער פראסט? וואס איז מיט מיר? פארוואס האב איך נישט ליב די תורה וועג?! העלף מיר טאטע, געב מיר א ריינע הארץ, א ריינע מח, איך זאל נאר ליב האבן די תורה וועג".

איך פאר יעצט קיין מירון, איך וועל בעטן פאר ענק.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

לכבוד מיין ליבער טייערער ... נרו יאיר ברסלב, ליבערטי

איך וויל דיר מחזק זיין דו זאלסט זיך דערמאנען די חסדים וואס דער אייבערשטער מאכט מיט דיר, די חסד חנם אז דו האסט חתונה געהאט. דערמאן זיך צוריק, ביסט געווען א שברי כלי, א בחור א רחמנות, האסט זיך געוואלגערט וכו'; יעצט האסטו באקומען א מתנה פונעם אייבערשטן, א טייערע פרוי.

דער הייליגער רבי דערציילט אונז (ספורי מעשיות, מעשה יג) די צוויי קינדער וואס זענען פארלוירן געווארן אין וואלד, נאך די חתונה האבן זיי זיך שטענדיג דערמאנט די חסדים פונעם אייבערשטן, ווי די בעטלערס זענען זיי געקומען העלפן; דאס לערנט אונז מיר זאלן נישט נעמען אונזער לעבן אז אזוי קומט עס, מיר זאלן שטענדיג דאנקען און לויבן דעם אייבערשטן.

דו פרעגסט מיר טאג און נאכט וואס נאך דו קענסט מיר העלפן, מיט וואס נאך דו קענסט מיר גרינגער מאכן די ארבעט; אז דו ווילסט מיר גרינגער מאכן די ארבעט - זאלסטו פון היינט און ווייטער נאר רעדן שיין אין שטוב, נאר רעדן ווייך און איידל. דיין ווייב איז גאר אן איידעלע פרוי, זי ווערט דערשראקן ווען מען רעדט צו איר שנעל, הויך און שארף. איך ווייס אז דו ביסט א גוטער מענטש, דו מיינסט בכלל נישט קיין שלעכטס, דו רעדסט טאקע רוב מאל ווייך, שיין און איידל, נאר די פאר מאל וואס דו ווערסט איבערגעשטרענגט רעדסטו שנעל, הויך און שארף, זי ווערט פשוט דערשראקן דערפון, קען זיך נישט קאנצעטרירן וואס דו זאגסט, ווערסטו נאך מער אנגעצויגן, רעדסטו נאך שנעלער וכו' וכו'; זאלסט מיט אלע דיינע כוחות זיך קאנצעטרירן נאך רעדן ווייך, איידל און שיין, מיט דעם וועסטו מיר העלפן און גרינגער מאכן די ארבעט.

דאס איז נישט קיין תירוץ, צו זאגן 'עס איז דא צייטן ווען עס איז אנגעצויגן ביי די ארבעט, דארף מיין ווייב פארשטיין אז עס איז אנגעצויגן'; ווער דארף די ארבעט? ווער דארף די געשעפטן? ווער דארף געלט? נישטא אזא זאך רעדן שנעל, הויך און שארף.

מוהראש זכותו יגן עלינו דערציילט אונז, דער גרויסער צדיק רבי אברהם בן רבי נחמן האט אמאל געהערט ווי איינער רעדט הויך, ער שרייט צו זיין ווייב, האט דער צדיק אפיר גענומען דעם איד און די זייט און אים פארגעהאלטן: "אויף א ווייב שרייט מען?! צו א ווייב דארף מען רעדן פוטערדיג, ווייך, שטיל, איידל און שיין".

איך בין יעצט אויפ'ן וועג קיין מירון, איך וועל בעטן פאר דיר.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

לכבוד מיין טייערער ... נרו יאיר

האברך ... נרו יאיר האט מיר געוויזן דיין נאמען צווישן די משפחות וואס קומען אינעם נייעם ברסלב'ער קאנטרי.

איך פריי זיך זייער אז דו וועסט זיין זומער מיט אנשי שלומינו, עס איז זייער וויכטיג זיך צו דרייען צווישן אנשי שלומינו ברסלב'ער חסידים; ווייל א מענטש וועט באאיינדרוקט פון די ארומיגע.

קענסט זען וואוילע אינגעלייט וואס האבן נאך א ברעקעלע יראת שמים, זיי גייען אין קאנטרי מיט נישט א גוטע סביבה, עס האט אן השפעה אויף זיי, ביז זיי פארלירן דאס ברעקל יראת שמים.

מיר געפונען (פסחים קיב:), רבינו הקודש האט געזאגט פאר זיינע קינדער: "אַל תָּדוּרוּ בִּשְׁכֶנְצִיב", זיי זאלן נישט גיין קיין שכנציב וואוינען; דעמאלט איז געווען א קאנטרי וואס האט געהייסן "קאנטרי שכנציב", וואס איז געווען דער פראבלעם דארט? זיי זענען געווען לצים; זעט מען פון דעם אז אפילו אזעלכע הייליגע מענטשן ווי רבינו הקדוש'ס קינדער האבן זיך אויך געדארפט באווארענען מיט וועם זיי דרייען זיך.

זיי שטארק מיט נעגל וואסער; פאר דיר, דיין ווייב און דיינע קינדער זאלסטו אנגרייטן נעגל וואסער – וועט די שטוב זיין הייליג און ריין.

איך בין יעצט אויפ'ן פליגער, אויפ'ן וועג קיין מירון, איך וועל בעטן פאר דיר.

בעזרת ה' יתברך

יום ג' בהר, ט"ז אייר, ל"א לעומר, שנת תשפ"ב לפרט קטן

מרת ... תחי' ברסלב, ליבערטי

בנוגע וכו'; צינדט נישט קיין לעכט אין שלאף שטוב. אין זוהר הקדוש שטייט (הקדמה יד:): "בַּר מִן אַסִימוֹ"ן וְכָל כַּת דִּילֵיהּ דְּאַזְלֵי עַל שְׁרַגֵּי בִּטְמִירוּ לְמֶחֱמֵי עַל גִּלּוּיֵי דְּשִׁמּוּשָׁא", עס זענען דא שרעקעדיגע מלאכים וואס באהאלטן זיך אין די לעכט וואס ברענט אין שלאף שטוב פון מאן און ווייב, זיי ווארטן דארט אין די לעכט ביז וכו', נאכדעם גייען זיי צום קינד וכו' און שעדיגן, (מען רעדט נישט פון א לאמפ, מען רעדט פון א לעכט).

מוהרא"ש זכותו יגן עלינו שרייבט זייער אסאך מען זאל נישט צינדן קיין לעכט אין שטוב, נאר נירות שבת ויום טוב, אלץ סכנה; דאס איז אפילו אין קאך און אין שבת שטוב, אפגערעדט אין שלאף שטוב פון מאן און ווייב – איז א סכנה.

מען קען האבן א זיסע לעבן מאן און ווייב – אן טון די אלע זאכן. איך האב אייך שוין געשריבן כמה פעמים, אז מען קוקט מאוויס מיינט מען נעבעך אז מען קען זיך נאר ליב האבן ווי אזוי דער גוי טמא טוט; וויי און ביטער ווער עס קוקט די עקלדיגע זאכן, מען קען נעבעך נישט לעבן, מען פייניגט זיך שטענדיג, מען טראכט אלץ נאכצומאכן די עקלדיגע זאכן.

זאגט תהלים וועט ארויסגיין פון אייך די אלע זאכן וואס איר האט געקוקט.

בעזרת ה' יתברך

יום א' פרשת בהר, י"ד אייר, כ"ט לעומר, שנת תשפ"ב לפרט קטן

מרת ... תחי'

איך האב ערהאלטן אייער בריוו.

ענדערש זאלט איר ענדיגן די זאך וואס איר האט אנגעהויבן ווי איידער זוכן פרישע עסקנות; איר האט אנגעהויבן מאכן דעם ענגלישן גליון - זאלט איר אין דעם אריינלייגן אייער עסקנות.

קויפן א לעקטער פאר קינדער וואס זענען געל אז די ברית זאל קענען זיין אין צייט - דאס קענען אנדערע אויך טון, צושטעלן נאכטמאל פאר משפחות וואס קענען זיך נישט קיין עצה געבן - קענען אויך אנדערע טון, אבער דער ענגלישער גליון וואס טויזנטער מענטשן ווארטן אויף דעם - איז ביזדערווייל נישטא קיין אנדערע וואס זאלן דאס טון, איז ממש א שאד איר זאלט זוכן פרישע עסקנות.

מיר ווילן יעצט אויפארבעטן די ענגלישע גליון דאס זאל זיין אין אלע שטעט, אין אלע אידישע הייזער וואו מען רעדט ענגליש; איך האף צום אייבערשטן איר וועט אריינלייגן אין דעם אייער גאנצע הארץ.

עס איז דא א אינגערמאן וואס איז גרייט איבערצונעמען דאס אויסשטעלן דעם גליון, ער דארף נאר פון אייך די חומר; איר וועט אים שיקן בריוו מתורגם אויף ענגליש און ער וועט דאס שיין אויסשטעלן.

ביטע זיך פארבינדן מיט'ן קרן הדפסה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

ערב שבת קודש פרשת אמור, י"ב אייר, כ"ז לעומר, שנת תשפ"ב לפרט קטן

לכבוד ... נרו יאיר, יבנאל

איך האב ערהאלטן דיין בריוו.

איך האב נישט קיין באמערקונגען אויפ'ן ספר, עס איז א הערליכע ספר, איך קען שוין קוים ווארטן אויף נאך חלקים.

זאלסט זיך נישט אפשטעלן, מאך נאך אזעלכע ספרים; "אשר בנחל לילדים", "אשר בנחל למלמדים", "אשר בנחל לחתנים", און אזוי ווייטער.

היות דו בעטסט מיר איך זאל דיר שרייבן מיינע הערות, איין קליינע הערה: מיר שרייבן אויף אלע ספרים וואס מיר דרוקן "מאת מוהרא"ש זי"ע"; איך האב אמאל געהאט א מעשה מיט מוהרא"ש, איך האב געשריבן מוהרא"ש'ס נאמען אויף א מודעה און מוהרא"ש האט מיר דעמאלט געזאגט: "איך האב נישט קיין נאמען, מיין נאמען איז מוהרא"ש, מער זאלסטו נישט שרייבן מיין נאמען"; דעריבער ווען מיר דרוקן אונזערע ספרים - שרייבן מיר נאר "מוהרא"ש"; איז אפשר כדאי דו זאלסט לייגן אויפ'ן דעקל: "אוצר מכתבים וכו' מאת מורינו ורבינו מוהרא"ש זי"ע, הצדיק מיבנאל".

טו ווי אזוי עס שיינט דיר; מאך אזוי, מאך אזוי - דער עיקר זאלסטו דרוקן און דרוקן אן אויפהער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת אמור, י"א אייר, כ"ו לעומר, שנת תשפ"ב לפרט קטן

לכבוד די טייערע גבאים שיחיו פון בית המדרש היכל הקודש ירושלים

איך האב אייך געוואלט זאגן, עס האלט אין איין קומען צו מיר גוטע גרוסן פון אונזער שול אין ירושלים.

היינט אינדערפרי גיי איך אין גאס, שטעלט מיך אפ א פרעמדער איד און הויבט אן רעדן מיט א פייער; ער זאגט מיר: "איך בין געווען אין ירושלים, איך האב געזוכט א שלש סעודות, איך בין אריין אין היכל הקודש מיט נאך א איד א תלמיד חכם, מיר זענען ארויס פון די כלים; אזא שול! אזא ערנסטקייט! אזא אחדות! אזעלכע שיינע ניגונים זינגט מען דארט, און מען ליינט פאר א בריוו"; דער איד זאגט מיר: "יענער איד, דער תלמיד חכם זאגט מיר 'עס זעט אויס ווי יש דברים בגו, עס איז נישט אוועק צו מאכן'".

מיט'ן אייבערשטנ'ס הילף וועל איך קומען קומענדיגע וואך, איך וועל זיין אין מירון ביז נאך שבת, נאך שבת קום איך צו ענק; איך וויל באזוכן די חדר, אויך וויל איך דאווענען מיט ענק און זיך מחזק זיין מיט ענק.

נאך איין זאך, איך וויל זיצן מיט די בחורים. זייט מודיע פאר אלע בחורים אז איך וויל זיך מחזק זיין מיט זיי; אפשר מאנטאג אינמיטן טאג. ביטע נישט מפרסם זיין קיין שום צעטלעך, איך דארף נישט קיין אנלויפעניש, איך וויל זיצן מיט די בחורים וואס זענען מפיץ און די בחורים וואס העלפן אין שול.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

ערב ל"ג בעומר, שנת תשפ"ב לפרט קטן

מתנה פאר מיין טייערער ליבער ... נרו יאיר

זע צו לערנען תיקונים יעדן טאג.

צדיקים זאגן: "תיקוני זוהר וואשט אפ די נשמה"; דאס וועט דיר ברענגען צו ווערן נאנט צום אייבערשטן.

פון דיין ראש ישיבה

בעזרת ה' יתברך

ערב ל"ג בעומר, שנת תשפ"ב לפרט קטן

מתנה להבחור ...

זע צו לערנען יעדן טאג אביסל תיקונים, עס רייניגט די נפש רוח ונשמה.

איך האב זייער הנאה פון דיין עבודת השם; פון דיין לערנען, פון דיין דאווענען און בעיקר פון דיין ברען און פלאקער פאר הפצה.

פון דיין ראש ישיבה.

בעזרת ה' יתברך

ערב ל"ג בעומר, שנת תשפ"ב לפרט קטן

מתנה להבחור ...

זע צו לערנען יעדן טאג תיקונים, עס וואשט אויס די נשמה.

צדיקים זאגן: "תיקונים איז אזוי ווי א באד פאר די נשמה"; וואויל איז דעם וואס לערנט תיקונים.

פון דיין ראש ישיבה

בעזרת ה' יתברך

ערב שבת קודש פרשת, י"ב אייר, כ"ז לעומר, שנת תשפ"ב לפרט קטן

טייערע ליבע חברים, תלמידי היכל הקודש ארץ ישראל, ה' עליהם יחיו

איינע פון די שיינע זאכן וואס מיר האבן זוכה געווען צו הערן פון מוהרא"ש זכותו יגן עלינו איז די ווערטער וואס דער הייליגער רבי נתן זכותו יגן עלינו זאגט וועגן "פסח שני" (לקוטי הלכות ברכת הפרות הלכה ה, אות טז).

די פרשה פון פסח שני, די מצוה פון פסח שני – איז ארויסגעקומען נאר נאכדעם וואס די אידן וואס זענען טמא געווארן, זיי האבן נישט געקענט מקיים זיין די הייליגע מצוה פון "קרבן פסח" – זענען געקומען צו משה רבינו מיט א טענה (במדבר ט, ז): "'לָמָּה נִגָּרַע', וואס זענען מיר אנדערש? איך בין טמא, איך טאר נישט מאכן דעם קרבן פסח, פארוואס? איך וויל אבער אויך מאכן די הייליגע מצוה!" משה רבינו האט געזען די רצון, די ווילן פון אט די אידן, האט ער זיי געזאגט: "איך גיי פרעגן דעם אייבערשטן", ער האט פארשטאנען אז דא גייט עפעס זיין, ווייל ווען מענטשן ווילן זיין גוט, זיי בעטן זיך: "למה נגרע" – העלפט דער אייבערשטער. די הייליגע חכמים זאגן דאך (שבת קד.): "הבא לטהר", ווען מען וויל זיין גוט, "מסייעים אותו", העלפט מען פון הימל; דער אייבערשטער האט געזאגט פאר משה רבינו זאל זיי געבן נאך א געלעגנהייט צו מאכן יעצט דעם פסח.

דאס איז א שטארקע חיזוק פאר אונז, מיר זענען דאך ווי אזוי מיר זענען, "וכולנו אין פנינו יפות כלל" (לקוטי מוהר"ן חלק ב', סימן לט), מיר דארפן רחמי שמים, דער אייבערשטער זאל רחמנות האבן אויף אונז; אז מיר וועלן נישט אפלאזן די רצון, מיר וועלן בעטן דעם אייבערשטן, מיר וועלן שרייען צום אייבערשטן: "למה נגרע, וואס בין איך אנדערש? איך וויל אויך זיין א צדיק, איך וויל אויך האבן א ריינע מח מחשבה. איך האלט אין איין פאלן, רבונו של עולם, איך בין ממש א פארלוירענער, העלף מיר, ראטעווע מיר" – וועלן מיר זוכה זיין, מען וועט אונז געבן נאך א געלעגנהייט אנצוהויבן פונדאסניי.

טייערע ליבע חברים תלמידי היכל הקודש, מיר גייען יעצט אריין אין א ליכטיגע וואך, אין די ספירה פון הוד. די וואך זענען תַּרְעִין פְּתִיחָן, די טירן זענען אפן (זוהר הקדוש פרשת בהעלותך, דף קנג.). די וואך האבן מיר די גרויסע הילולא פון רבי שמעון בר יוחאי, איך האף מיט'ן אייבערשטנ'ס הילף צו זיין ל"ג בעומר אין מירון, אויך די שבת נאך ל"ג בעומר. נאך שבת וועל איך זיין אין ירושלים, איך וועל דאווענען אין אונזער שול, אויך וויל איך באזוכן די חדר, די צאן קדשים.

איך וויל אייך נאר בעטן איין זאך. רבי שמעון בר יוחאי זאגט אין זוהר, איידער ער האט אנטפלעקט די הייליגע סודות אין פרשת נשא, די אידרא קדישא, זאגט רבי שמעון בר יוחאי א לשון וואס מוהרא"ש פלעגט אסאך חזר'ן מיט אונז, רבי שמעון בר יוחאי זאגט פאר די הייליגע חברים (נשא קכח.): "אֲנָן בַחֲבִיבוּתָא תַּלְיָא", אונזער זאך איז זיין חברים, אונזער כח איז נאר אז מיר וועלן זיך ליבן, "אֲנָן" איז ראשי תיבות: א'נשי נ'חל נ'ובע; ברסלב'ער חסידים מוזן זיך ליב האבן, מיר מוזן זיך ליידן. מוהרא"ש פלעגט זאגן: "מיר קענען זיך נישט פארשטעלן צו וואס פאר א מדריגות דער רבי וועט אונז צוברענגען אז מיר וועלן זיך ליב האבן, מיר וועלן לעבן באחדות".

זייט מיר נישט מפרסם, זייט ענדערש מפרסם די נומער פון די שיעורים, די בריוו און גליונות. גייט הפצה מיט די שיינע קונטרסים עצתו אמונה מתורגם; עס איז אזוי שיין, אזוי זיס; נישטא א קונטרס וואס מען זאל זיך נישט טרעפן דערין, יעדע קונטרס עצתו אמונה איז דא דערין אזויפיל חיזוק און שכל ווי אזוי זיך צו קענען דערהאלטן.

איך וועל זיין אם ירצה ה' אין ירושלים זונטאג; די גבאים וועלן שוין מודיע זיין ווען און וואו, איך דארף נישט מען זאל מיך מפרסם זיין.

שבת וועל איך זיין ביי מיין טאטע שליט"א אין מירון. איך קען נישט לאדענען מענטשן, איך בין דארט אליינס א גאסט. איך וועל מאכן צייט נאך שבת צו קענען רעדן מיט ענק, מיט יעדן איינעם באזונדער.

דער עיקר דארפן מיר זיך אויפפרישן פונדאסניי, פריש מקורב ווערן, אנהויבן נוצן די ליכטיגע עצות פון רבי'ן. זיך מתבודד זיין; א שאד דאס נישט צו טון, מען ווערט דאך אויסגעלייזט פון אלע פראבלעמען ווען מען רעדט צום אייבערשטן, מען שמועסט מיט אים ווי מען שמועסט מיט א גוטע פריינט; דאס לעבן ווערט אזוי זיס, אלע צרות און פראבלעמען איז נאר ווען מען פארגעסט פונעם אייבערשטן, אלע מרירות איז כל זמן מען לעבט אן אמונה; ווי נאר מען דערמאנט זיך 'עס איז דאך דא א באשעפער, עס איז דא איינער וואס פירט מיך, איך בין נישט אליינס, איך בין ביים אייבערשטן אין די האנט' – ווערט אלעס גוט.

בנוגע מירון; ווער עס קען קומען צו רבי שמעון בר יוחאי – זאל זיכער קומען, ביי רבי שמעון בר יוחאי באקומט מען ישועות. צדיקים טייטשן, די הייליגע חכמים זאגן א לשון (ברכות ט.): "כְּדַאי הוּא רַבִּי שִׁמְעוֹן לִסְמֹךְ עָלָיו בִּשְׁעַת הַדְּחַק", דאס מיינט צו זאגן, ווען עס דרוקט, ווען מען איז בדוחק – קען מען זיך פארלאזן אויף רבי שמעון בר יוחאי; אבער מען דארף זיך נישט קריגן, און חס ושלום זיך שלאגן צוצוקומען ביזן ציון, אינעם מערה.

מוהרא"ש זאגט בפירוש: "די גאנצע הר מירון איז א מקום צו פועל'ן ישועות"; זיכער זיך נישט קריגן מיט די ערב רב. מוהרא"ש האט אונז געזאגט זיך אכטונג געבן פון זיי, די ערב רב זענען רוצחים, עס איז נישט כדאי צו האבן מיט זיי. מיר האבן די זאך פון תפילה והתבודדות; וואו מען שטייט – קען מען זיך מתבודד זיין.

איך ווארט שוין צו זיין מיט ענק.

בעזרת ה' יתברך

יום ה' פרשת אמור, י"א אייר, כ"ו לעומר, שנת תשפ"ב לפרט קטן

לכבוד מיין טייערער ... נרו יאיר, קרית יואל

איך האב ערהאלטן דיין פראגע.

דיין זאך זאל זיין הפצה, מוהרא"ש האט דיר דאך בפירוש געזאגט זאלסט נישט טון קיין וכו', איז וואס פרעגסטו איבער?

אז דו וועסט טון אין פארשפרייטן די ספרים, דו וועסט טון אין הפצה – וועסטו האבן שפע, עס וועט דיר נישט פעלן קיין געלט.

פרוביר עס אויס, הויב אן צוריק "הפצה" – וועט דיר נישט פעלן קיין געלט.

אינדערפרי זאלסטו לערנען דיינע שיעורים: מקרא, משנה, גמרא, מדרש, הלכה ואגדה, זוהר, תיקוני זוהר וספרי רבינו, און מיטאג זאלסטו זיך ארויסלאזן אויפ'ן פראנט, ווי א סאלדאט גייט אין מלחמה – מיט ספרים וקונטרסים, דאס איז די געווער – וועסטו זייער מצליח זיין.

בעזרת ה' יתברך

ה' פרשת אמור, י"ב אייר, כ"ז לעומר, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

איך ווארט צו הערן פון דיר וואס דו לערנסט, איך וויל דו זאלסט נעמען א חברותא, לערנען יעדן טאג. א שאד די יונגע יארן זאלן אריבערגיין מיט זאכן וואס בלייבט נישט, יעצט איז דיין שענסטע צייט פון לעבן, פארוואס זאלסטו נישט אויסנוצן דיינע שענסטע יארן.

זעץ זיך צו צום שיעור וואס דער דיין שליט"א לערנט פאר. אפילו דו פארשטייסט נישט די שיעור אזוי גוט, דאך איז גוט צו זיצן ביים שיעור. אנהויב איז שווער, ביז מען געוואוינט זיך צו מער און מער, ביים סוף פארשטייט מען.

איך בעט דיר זייער זאלסט מיר שרייבן דיינע שיעורים, דיינע חברותות – און אזוי ווייטער.

איך האף דו לייגסט אוועק די אלע בריוו וואס איך שרייב דיר, און דו לערנסט עס נאכאמאל און נאכאמאל.

בעזרת ה' יתברך

יום ה' פרשת אמור, י"א אייר, כ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

ליידער דרייען זיך ארום מנוולים וואס זענען מטמא אידישע קינדער. מוהרא"ש זאגט, א מנוול וואס לויפט נאך קינדער און בחורים – דארף מען איינשפארן אין תפיסה, מען טאר נישט מחפה זיין אויף זיי, די זענען רוצחים, מען טאר נישט רחמנות האבן אויף זיי.

בנוגע דעם אינגערמאן וואס דו שרייבסט מיר וכו'; איך האב מקבל געווען פון מוהרא"ש זכותו יגן עלינו ווי אזוי זיך צו פירן אין די זאכן, וועם יא ארויסווארפן און וועם נישט, וד"ל.

איך האף דו שטארקסט זיך, איך האב דיר שוין לאנג נישט געזען ביי שיעורים; אפשר וועט זיין פון צייט צו צייט די ליל שישי שיעור אין די בארא פארק שול, אפשר וועסטו קומען, עס וועט דיר זיין גרינגער.

העיקר שטארק זיך באמונה פשוטה, אמונה איז די מקור הברכות. רבינו אמר (לקוטי מוהר"ן חלק א', סימן לא): "אֱמוּנָה הִיא מְקוֹר הַבְּרָכוֹת, בִּבְחִינוֹת (משלי כח): 'אִישׁ אֱמוּנוֹת, רַב בְּרָכוֹת'".