בריוון פונעם ראש ישיבה שליט"א

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

דער אייבערשטער זאל העלפן זאלסט פטור ווערן פון גיין אין מיליטער; זאלסט קענען דינען דעם אייבערשטן, לערנען און דאווענען בקדושה ובטהרה.

שטארק זיך און שטארק דיין ווייב; דאנק דעם אייבערשטן אויף די גרויסע ניסים אז דו האסט חתונה געהאט, האסט באקומען א מתנה פון הימל אן ערליכע וואוילע פרוי; דאנקען דעם אייבערשטן ברענגט נאך און נאך ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר, יבנאל

איך האב ערהאלטן דיין בריוו.

"ספורי מעשיות" איז לויטערע סודות התורה; וויפיל מיר מיינען אז מיר פארשטייען - איז דאס גארנישט קעגן וואס ליגט אין די מעשיות.

קוק די הקדמה וואס דער הייליגער רבי נתן שרייבט:

"לְהִתְוַדַּע וּלְהִגָלוֹת, אַז אִיטְלִיכְס וָוארְט וָואס דָא שְׁטֵייט אִין דֶעם הֵיילִיגֶען סֵפֶר אִיז קֹדֶשׁ קָדָשִׁים לוֹיטֶער סוֹדוֹת הַתּוֹרָה. מֶען זָאל נִישְׁט מֵיינֶען אַז דָאס זֶענֶען חַס וְשָׁלוֹם פְּרָאסְטֶע מַעֲשִׂיוֹת, וָוארִין דִיא מַעֲשִׂיוֹת וָואס אִין דֶעם סֵפֶר שְׁטֵייעֶן הָאט דֶערְצֵיילְט דֶער גְרוֹיסֶער צַדִּיק דֶער קְדוֹשׁ עֶלְיוֹן דֶער הֵיילִיגֶער רֶבִּי נַחְמָן זֵכֶר צַדִּיק לִבְרָכָה, זַיין זְכוּת זָאל אוּנְז בֵּייא שְׁטֵיין. זַיין כַּוָּנָה אִיז גֶעוֶוען אוּנְז צוּא לֶערְנֶען וִויא אַזוֹי דֶעם אֵייבֶּערְשְׁטְן צוּא דִינֶען. אוּן הַלְוַאי מִיר זָאלִין פַאר שְׁטֵיין דִיא גְרוֹיסֶע סוֹדוֹת אוּן דֶעם מוּסָר וָואס עֶס שְׁטֶעקְט אִין דִיא מַעֲשִׂיוֹת. וֶועלִין מִיר זַיין פְרוּמֶע יוּדֶען אַזוֹי וִוי מֶען דַארְף צוּא זַיין. אוּן הַשֵׁם יִתְבָּרַךְ וֶועט אוּנְז שִׁיקֶען דֶעם גּוֹאֵל צֶדֶק בַּאלְד אִין אוּנְזֶערֶע צַייטְן בִּמְהֵרָה בְּיָמֵינוּ אָמֵן".

מוהרא"ש שרייבט אין די הקדמה אויפ'ן ספר להבות אש, א פירוש אויף תיקוני זוהר:

"יָדוּעַ לְכָל מִי שֶׁרָגִיל בְּתִקּוּנֵי זוֹהַר, אֲשֶׁר כִּמְעַט כָּל שׁוּרָה וּשְׁתֵּי שׁוּרוֹת, הֵם כְּבָר עִנְיָנִים אֲחֵרִים, סוֹדוֹת אֲחֵרִים, עוֹלָמוֹת אֲחֵרִים".

אזוי אויך איז די מעשיות; אזוי ווי דער רבי האט בפירוש געזאגט, נאכן דערציילן די מעשה פונעם בן מלך און בן שפחה וואס האבן זיך פארביטן (ספורי מעשיות, מעשה יא):

"פַארְצַייטִין", אין די פריערדיגע דורות, ביז רבי שמעון בר יוחאי איז געקומען, פלעגט מען נישט שמועסן קבלה אפענערהייט, נאר "אַז מֶען פְלֶעגְט שְׁמוּסִין קַבָּלָה פְלֶעגְט מֶען שְׁמוּסִין מִיט אַזוֹי אַ לָשׁוֹן (וִוי דִי מַעֲשֶׂה אִיז) וְכוּ'", שפעטער האט רבי שמעון בר יוחאי אנגעהויבן שמועסן קבלה באתגליא.

דעריבער, ווען מען לערנט די מעשיות, דארף מען וויסן אז דאס איז סודות התורה און פרובירן ארויסנעמען חיזוק און עצות פאר עבודות השם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר, גבאי בית המדרש עצתו אמונה חסידי ברסלב ליבערטי

מיר קומען זיך צוזאם שבועות ביינאכט ארום איינס אזייגער, מיר זינגען אביסל לכבוד יום טוב, נאכדעם זאגן מיר אינאיינעם דעם "תיקון ליל שבועות", אזוי ווי מיר האבן מקבל געווען פון מוהרא"ש; מיר זאגן די ערשטע פסוק פון יעדע פרשה און די לעצטע פסוק פון יעדע פרשה, נישט מער און נישט ווייניגער.

אזוי גייען מיר פון תורה צו נביאים און פון נביאים צו כתובים, פון יעדן ספר זאגן מיר אינאיינעם הויך אויפ'ן קול. ווען מיר ענדיגן תורה זינגען מיר א ניגון, און ווען מיר ענדיגן נביאים זינגען מיר, אזוי יעדעס מאל זינגען מיר.

נאכדעם זאגן מיר תרי"ג מצוות; מיר זינגען נאך יעדע הונדערט מצוות א ניגון כדי דער עולם זאל נישט איינשלאפן.

אז עס בלייבט איבער צייט רעד איך אפאר ווערטער, נאכדעם גייען מיר אין א טאנץ, און ביים עלות השחר גייען מיר אין מקוה.

איך שרייב דיר דאס אלעס ווייל דו האסט מיר געבעטן אז דו ווילסט וויסן ווי אזוי צו מאכן ביי ענק אין בית המדרש. אבער איך וויל דיר קלאר שטעלן אז עס דארף נישט זיין פונקט אזוי, מיר מאכן אזוי ווייל אזוי ארבעט זיך אויס ביי אונז, דו מאך ווי אזוי עס ארבעט זיך אויס ביי ענק; מען דארף נישט נאכמאכן די זאכן.

איין זאך דארף מען אכטונג געבן, גבאים דארפן זען אז יעדער מתפלל, יעדער איד וואס האט נאר אריינגעטראטן אינעם שול - זאל יענעם גוט זיין, יענער זאל זיין פרייליך.

גבאים דארפן האלטן קאפ אויב איינער פעלט, איינער קומט נישט - וואס איז די מעשה, אפשר דארף יענער הילף.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב פריער אראפגעשריבן דיין ווייב'ס נאמען צו מתפלל זיין פאר איר; פלוצלונג האב איך געהאט א שטארקע בזיון און איך האב מתפלל געווען פאר איר; איך בעט נאכאלץ פאר איר, איך געב ענק אוועק דעם בזיון.

איך האף זי וועט זיין געזונט און שטארק.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

מזל טוב פאר דיין נייע געבוירענע אינגל, דער אייבערשטער זאל העלפן די ברית זאל זיין אין צייט, און דו זאלסט אים מגדל זיין לתורה ולחופה ולמעשים טובים.

בנוגע מאכן א וואך נאכט יום טוב; זאלסט מאכן די וואך נאכט אינאיינעם מיט די סעודת יום טוב, דארפסט נישט מאכן קיין גרויסע זאכן; זיי מודיע פאר די משפחה און נאנטע פריינט, זיי זאלן קומען ווינטשן ברכות.

בנוגע רופן קינדער ליינען קריאת שמע נעבן דעם קינד; יעצט אז עס פאלט אויס אום יום טוב - קענסטו רופן קינדער פאראויס ליינען קריאת שמע.

בנוגע דיין פראגע אויב דו זאלסט רופן א מנין צום סעודת הברית; דער רמ"א זאגט (יורה דעה הלכות מילה, סימן רסה, סעיף ב): "וְנָהֲגוּ לָקַחַת מִנְיָן לִסְעֻדַּת מִילָה, וּמִקְרֵי סְעֻדַּת מִצְוָה", מען פירט זיך צו נעמען צען מענטשן צום סעודה; זאלסטו פרובירן צו ברענגען צען מענטשן צו די סעודה, און אז עס איז נישט שייך - זאלסטו מאכן אן דעם.

דאס ווייסטו דאך, אז ביי א ברית איז דער אייבערשטער מוחל אלע עבירות פאר טאטע מאמע און פאר אלע משתתפים; מען קען פועל'ן בשעת'ן ברית גרויסע זאכן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

האב סבלנות, עס גייט נישט אין איין מינוט; זוכה זיין צו שפירן מתיקות התורה - דאס גייט נישט אזוי שנעל, מען דארף אסאך לערנען אן קיין הרגשה - ביז מען קומט אן צו שפירן מתיקות התורה.

שטארק זיך, זיי ממשיך מיט דיינע שיעורים כסדרן. אויך זאלסטו גיין יעדן טאג התבודדות; זוך א ליידיגע פלאץ וואו דו קענסט זיך מתבודד זיין, בעט דעם אייבערשטן ער זאל דיר ווייזן די זיסקייט פון די הייליגע תורה, דו זאלסט זוכה זיין צו שפירן די עריבות ומתיקות התורה.

אויך זאלסטו דערציילן פאר'ן אייבערשטן אלעס וואס גייט אריבער אויף דיר; רעד צו אים כדבר איש אל רעהו, אזוי ווי מען רעדט זיך אויס צו א גוטער פריינד, רעד צו אים אין דיין שפראך, רעד צו אים אמת'ע רייד; נישט געמאכטע זאכן, מאך נישט נאך קיינעם, רעד ווערטער פון דיין הארץ, זאג אים ווי שטארק דו ווילסט זיין גוט און ווי דער יצר הרע קומט יעדן טאג צו דיר מיט א פרישע מעשה.

מען קען זיך נישט פארשטעלן דאס גרויסקייט פון רעדן צום אייבערשטן, מען ווערט אינגאנצן צוגעקלעבט צו אים; תפילה קלעבט צו דעם מענטש צום אייבערשטן (לקוטי מוהר"ן חלק ב', סימן פד).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר, חיפה

איך האב ערהאלטן דיין בריוו.

איך האב זייער הנאה צו הערן ווי דו שטארקסט זיך מיט דיין עבודות השם, איך פריי זיך צו הערן אז דיין גאנצע לעבן האט זיך איבערגעדרייט צום גוטן פון ווען דו ביסט מקורב צום הייליגן רבי'ן.

עס איז א פארגענוגן צו הערן אז דו כאפסט אריין יעדן טאג אפאר שעה לימוד התורה; דו ארבעסט ניין שעה א טאג, ועם כל זאת לערנסטו יעדן טאג דריי שעה, און שבת ויום טוב לערנסטו זעקס שעה, דאס וועט דיר בלייבן; דאס וועט דיר באגלייטן אויף די וועלט און אויף יענע וועלט.

איך האב איבערגעליינט אפאר מאל די ווערטער וואס דו שרייבסט אינעם בריוו: "צוואנציג יאר פאר איך צו מיין רבי אויף שבועות און איך האב גארנישט באקומען, די יאר בין איך געקומען צום הייליגן רבי'ן אויף ראש השנה די ערשטע מאל און דער רבי האט מיר אזוי שיין אנגעטון מיט אזויפיל תורה, אזויפיל תפילה, אזויפיל עבודות השם".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

קענסט זיך נישט פארשטעלן ווי חשוב א בעל תשובה איז אויבן אין הימל, חכמינו זכרונם לברכה זאגן (ברכות לד:): "בְּמָקוֹם שֶׁבַּעֲלֵי תְּשׁוּבָה עוֹמְדִין אֵין צַדִּיקִים גְּמוּרִים יְכוֹלִין לַעֲמֹד", גרויסע צדיקים קומען נישט אן צו די הויכע פלאץ וואו בעלי תשובה דערגרייכן; ווייל ווען די וואס האבן שוין אפגעטון שלעכטע זאכן שטארקן זיך און לאזן אפ די אלטע שלעכטע מעשים – איז דאס זייער חשוב ביים אייבערשטן.

יעצט זאלסטו זיך שטארקן בלימוד משניות, דאס וועט דיר געבן כח נישט צוריק צו פאלן צו די עבירות. ווען מען זינדיגט אין פגם הברית, הוצאת זרע לבטלה רחמנא לצלן - איז זייער שווער ארויסצוקריכן פון דעם, נאר מיט די הייליגע תורה, נאר מיט משניות און גמרא - קען מען זיך אוועקשטעלן, זיין אפגעהיטן פון דעם.

דעריבער זאלסטו זיך שטארקן מיט לערנען משניות; פרוביר מיט אלע דיינע כוחות צו לערנען יעדן טאג אכצן פרקים משניות, דאס איז די רפואה פאר די עבירה; נישטא א שטערקערע זאך אין פאררעכטן פגם הברית ווי לערנען משניות; עס לויטערט אויס די בלוט, עס לויטערט דעם מח, עס איז א וואונדערליכע סגולה.

בדרך כלל, דער וואס איז נעבעך אריינגעפאלן אין די עבירה פון פגם הברית, הוצאת זרע לבטלה רחמנא לצלן - דער האט מער נישט קיין כח צו אויס ווארטן, מען ווערט נערוועז, מען פארלירט דעם קאפ זיך צו קענען קאנצעטרירן צו לערנען און דאווענען; דורך זאגן משניות באקומט מען צוריק די כח, די מח, מען ווערט ניי געבוירן.

דער אייבערשטער זאל העלפן זאלסט טרעפן דיין שידוך שנעל און גרינג.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

דאס וואס דו שרייבסט אז מען קען נישט ברענגען דעם קינד אזוי ווייט וכו' - איז נישט וואר.

איך האב זוכה געווען צו מאכן צוויי ברית'ן ביי מוהרא"ש; מיין זון יצחק דוד נרו יאיר און מיין זון הערשל נרו יאיר. הערשל'ס ברית איז געווען זומער, מיר זענען געווען אין קעמפ און מיר האבן אריינגעברענגט די ברית קיין בארא פארק צו מוהרא"ש. מיין ווייב האב איך נישט מיטגעברענגט, א יולדת דארף זיך אפרוען, עס איז נישט קיין עסק אריינצושלעפן א יולדת א לאנגע וועג, און עס האט גארנישט פאסירט פאר'ן קינד, נאכן נישט זיין מיט די מאמע פאר קרוב צו זעקס שעה; איז זיכער אז צו ברענגען א קינד יום טוב, א וועג צו גיין צוואנציג מינוט - איז נישט קיין פראבלעם; עס זעט אויס ווי עס פאסט נישט צו מאכן א ברית אין ישיבה.

דיין שווער איז א גוטער מענטש, ער איז זייער אן ערליכער, א תמימות'דיגער; איך געדענק ווען ער האט געפלאקערט פאר'ן רבי'ן, ער האט געאטעמט דעם רבי'ן, ביז והוה מה דהוה... א שלאנג האט אים געביסן, אריינגעלייגט אין אים גיפט וכו'; די גיפט האט אים נעבעך פאר'סם'ט, עד היום קען ער זיך נישט היילן.

דער אייבערשטער זאל העלפן מיר זאלן בלייבן געטריי ביים רבי'ן, מיר זאלן שטענדיג געדענקען וואו מיר זענען געווען, וואס דער רבי האט אונז געטון.

בעזרת ה' יתברך

יום ד' פרשת במדבר, ב' סיון, מ"ו לעומר, שנת תשפ"ב לפרט קטן

מרת ... תחי'

איך האב ערהאלטן אייער פראגע.

אז דער דיין אויף וועם איר פארלאזט זיך, איר פרעגט אים און ער לערנט ענק ווי אזוי צו היטן די תורה - האט אייך שוין גע'פסק'נט, איז וואס דארפט איר איבערפרעגן?

נאכן באקומען א קלארע תשובה פרעגט מען נישט א צווייטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת בחוקותי, כ"ד אייר, ל"ט לעומר, שנת תשפ"ב לפרט קטן

לכבוד ... נרו יאיר

איך פריי זיך זייער צו הערן אז דו קומסט שוין וואוינען אין שטעטל, עס איז א הערליכע פלאץ דער שטעטל; די גאנצע שטאט איז געבויט אויף דעם רבינ'ס יסודות – תורה, תפילה און גמילות חסדים.

איך האב אהיים געברענגט די נייע קינדער ביכלעך "מעשה'לעך פאר קינדערלעך" פון ארץ ישראל, עס איז זייער שיין אויסגעקומען; איך האף דו וועסט זיך נישט פארזוימען, דו וועסט גיין א באנד נאך א באנד.

דעם קומענדיגן וואך, שבועות, זאלסטו אריינשטעלן די מעשה פון רבי נתן, ווי ער האט ארויסגענומען די תורה יום טוב שבועות און געטאנצן.

דא האסטו די מעשה אראפגעלייגט פאר קינדער:

עֶס אִיז יוֹם טוֹב שָׁבוּעוֹת אִינְדֶערְפְרִי, מֶען הָאט שׁוֹין גֶעעֶנְדִיגְט הַלֵּל, מֶען גֵייט שׁוֹין בַּאלְד זָאגְן "אַקְדָמוּת", מֶען וַוארְט מֶען זָאל שׁוֹין עֶפֶענֶען דֶעם אָרוֹן הַקּוֹדֶשׁ, אַרוֹיסְנֶעמֶען דִי הֵיילִיגֶע תּוֹרָה.

פְּלוּצְלוּנְג הֶערְט מֶען שְׁרֵייעֶן הוֹיךְ: "אַ נֵייעֶ תּוֹרָה...! אַ נֵייעֶ תּוֹרָה...!" דֶער אִיד וָואס נֶעמְט אַרוֹיס דִי תּוֹרָה אִיז אִיבֶּערְגֶעדֶעקְט מִיטְ'ן טַלִּית אוּן שְׁרֵייט: "אַ נֵייעֶ תּוֹרָה! אַ נֵייעֶ תּוֹרָה!" עֶר הוֹיבְּט אָן זִינְגֶען: "סְ'אִיז בֶּעסֶער צוּ לֶערְנֶען דִי הֵיילִיגֶע תּוֹרָה מֶער פוּן אַלֶע גָאלְד אוּן זִילְבֶּער!"

אַלֶע מֶענְטְשְׁן וואוּנְדֶערְן זִיךְ 'וָואס גֵייט דָא פָאר? וָואס אִיז הַיינְט - שִׂמְחַת תּוֹרָה? הַיינְט אִיז יוֹם טוֹב שָׁבוּעוֹת! וָואס טַאנְצְט עֶר אַזוֹי? וָואס שְׁרֵייט עֶר אַזוֹי?!'

קִינְדֶער, אִיר וֵוייסְט וֶוער עֶס אִיז דֶער אִיד וָואס טַאנְצְט אַזוֹי?

גֶעוֶוען אִיז דָאס דֶער הֵיילִיגֶער רֶבִּי נָתָן זְכוּתוֹ יָגֵן עָלֵינוּ, עֶר פְלֶעגְט אַלְץ מַאכְן פְּתִיחַת הָאָרוֹן, עֶר פְלֶעגְט אַרוֹיסְנֶעמֶען דִי הֵיילִיגֶע תּוֹרָה פוּנֶעם אָרוֹן הַקּוֹדֶשׁ; פַּאסִירְט אֵיין יָאר יוֹם טוֹב שָׁבוּעוֹת, רֶבִּי נָתָן נֶעמְט אַרוֹיס דִי תּוֹרָה אוּן עֶר וֶוערְט אַזוֹי פְרֵיילִיךְ אַז דֶער אֵייבֶּערְשְׁטֶער הָאט אוּנְז גֶעגֶעבְּן דִי הֵיילִיגֶע תּוֹרָה, מִיר זֶענֶען אוֹיסְדֶערְוֶועלְט פוּן אַלֶע פֶעלְקֶער; רֶבִּי נָתָן נֶעמְט אַרוּם דִי תּוֹרָה אוּן הוֹיבְּט אָן טַאנְצְן, עֶר שְׁרֵייט: "אַ נֵייעֶ תּוֹרָה...! אַ נֵייעֶ תּוֹרָה...!" אַזוֹי וִוי אֵיינֶער פְרֵיידְט זִיךְ מִיט אַ נֵייעֶ זַאךְ, אַ נֵייעֶ קְלֵייד, אַ נֵייעֶ חֵפֶץ.

עֶר הָאט גֶענוּמֶען דִי תּוֹרָה אוּן אָנְגֶעהוֹיבְּן טַאנְצְן אַרוּם דֶעם בִּימָה, אוּן וֶוען אַנְשֵׁי שְׁלוֹמֵינוּ הָאבְּן דָאס גֶעזֶען הָאבְּן זֵיי אוֹיךְ אָנְגֶעהוֹיבְּן טַאנְצְן, עֶס אִיז גֶעוָוארְן מַמָּשׁ אַזוֹי וִוי שִׂמְחַת תּוֹרָה, מֶען הָאט זִיךְ זֵייעֶר גֶעפְרֵיידְט מִיט דִי תּוֹרָה.

לָאמִיר אַלֶע טַאנְצְן מִיט דִי הֵיילִיגֶע תּוֹרָה, לָאמִיר אַלֶע שְׁרֵייעֶן הוֹיךְ: "שְׁכּוֹחַ אֵייבֶּערְשְׁטֶער אִיךְ בִּין אַ אִיד! אִיךְ פְרֵיי זִיךְ צוּ זַיין אַ אִיד!"

מאך א בילד ווי א איד איבערגעבויגן מיט'ן טלית אויפ'ן פנים - שפרינגט אין די לופט מיט די ספר תורה אין די האנט; א טייל מענטשן וואונדערן זיך וואס גייט פאר, און א טייל פאטשן מיט די הענט, אויפ'ן בילד זאל מען זען אז עס איז יום טוב שבועות, עס זאל זיין ביימער אין בית המדרש.

איך בעט דיר זייער זאלט זיך שטארקן און זאלסט שטארקן אלע וואס העלפן דיר, אלע וואס ארבעטן אין מכון עצתו אמונה; אויך משפחת ... און משפחת ... פון ארץ ישראל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת במדבר, ראש חודש סיון, מ"ה לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

אחי, חזק ואמץ, דראפע זיך און דערהאלט זיך! עס וועט אריבערגיין די שווערע טעג; גיי נישט אוועק פונעם באשעפער, נאך אביסל וועסטו זען גרויסע ניסים.

בעזרת ה' יתברך

יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן

...

איך האב זיך דערוויסט אז עס זענען דא משפחות וואס כאפן מיך אפ ווען איך געב פריוואטע שיעורים.

עס איז נישט קיין גערעכטע זאך דאס צו טון; אלע ווייסן קלאר אז דאס איז פריוואט, מען לייגט דאס נישט אויפ'ן טעלעפאן. די אלע וואס כאפן אפ פריוואטע שמועסן זענען נישט גערעכט, עס איז גניבת דעת.

ווי עס זעט אויס וועל איך מער נישט רעדן קיין פריוואטע שמועסן; איך וועל זיך זייער אכטונג געבן.

בעזרת ה' יתברך

יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן

מרת ... תחי'

איך האב ערהאלטן אייער בריוו.

בארגט געלט צו פארמאכן אייערע פענסטערס, אזוי וועט איר זיין רואיג, איר וועט האבן ישוב הדעת; איר וועט קענען גרינגער אנגיין מיט די שטוב ארבעט.

בנוגע אייער מאן'ס ארבעט; ער דארף נישט בלייבן ארבעטן דארט, זאגט אים ער זאל זוכן א גרינגערע פרנסה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן

לכבוד ... נרו יאיר

וואס איז געשען אז מען דרוקט מער נישט פרישע חלקים פון ספר עצתו אמונה? אזויפיל מענטשן ווארטן אויף דעם, אזויפיל מענטשן זאגן אז דאס איז זייער גאנצע חיות, דאס איז זייער שכל פאר'ן לעבן.

באמת איז נישטא קיין חידושים אין די בריוו; עס איז ווערטער פון הייליגן רבי'ן, פון הייליגן רבי נתן, אויף די וועג ווי אזוי מוהרא"ש האט אונז דאס געלערנט; עס איז נאר געשריבן אויף א וועג אז מענטשן זאלן דאס מקבל זיין, עס זאל זיי מחזק זיין.

איך האף דו וועסט זיך שטארקן ביתר שאת וביתר עוז ווייטער ארבעטן אין די הייליגע ארבעט, וועסטו האבן א חלק אין די גאולה וואס וועט זיין במהרה בימינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן

לכבוד ... נרו יאיר, בני ברק

איך האב ערהאלטן דיין בקשה.

דו ווילסט איך זאל שרייבן פאר די גבאים ביי אונז אין שול אז מען זאל דאווענען פריער, כדי דיין שווער זאל נישט דארפן ווארטן אויף דיר; ריכטיג איז אז דו זאלסט זיך טרעפן א מנין וואו מען ענדיגט פריער.

וויסן זאלסטו, אז מען עסט די שבת סעודות ביי עלטערן, טאטע אדער שווער - איז נישט גערעכט צו קומען שפעט און לאזן די עלטערן ווארטן. אז מען עסט ביי די עלטערן דארף מען דאווענען וואו זיי דאווענען, אדער אין א שול וואו מען ענדיגט דאווענען אין די צייט ווען זיי ענדיגן דאווענען; עס איז נישט גערעכט אנצוקומען שפעט ווי א שיינער איד נאכדעם וואס אלע שטייען און ווארטן, בפרט, וואס דו שרייבסט אז דיין ווייב וויינט אויף דעם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת במדבר, כ"ט אייר, מ"ד לעומר, שנת תשפ"ב לפרט קטן

... תחי'

לאזט זיך אפ פון די פרוי, עס האט נישט קיין זין די גאנצע פרשה; וואס דארף א פרוי וואס איז עלטער פון אייך מיט אזויפיל יארן - פון אייך? עס איז נישט גוט פאר אייך, עס קען צומאל זיין אויך שעדליך פאר'ן לעבן; גייט נישט צו איר אין שטוב.

וואלט די מעשה געווען פארקערט, די מיידל איז די וואס זוכט חיזוק, זי דארף האבן ווארעמקייט וכו' - דארף מען אויך וויסן ווי איין און ווי אויס, אבער אז די פרוי זאל אייך נישט אפלאזן, זי רופט אייך צו איר אין שטוב, זי וויל ליבשאפט פון אייך וכו' וכו' - דאס שמעקט נישט גוט.

שטארקט זיך מיט רעדן צום אייבערשטן, דערציילט אלעס פאר'ן אייבערשטן, שמועסט זיך אויס אייער הארץ מיט'ן אייבערשטן - וועט איר זען אז אלעס וועט אייך גיין גרינג און געשמירט.

דער אייבערשטער זאל העלפן איר  זאלט האבן הצלחה אין אלע ענינים.

בעזרת ה' יתברך

ה' פרשת בחוקותי, כ"ו אייר, מ"א לעומר, שנת תשפ"ב לפרט קטן

לכבוד ... נרו יאיר, גבאי בית המדרש עצתו אמונה ליבערטי

דו ווילסט איך זאל שרייבן בריוו פאר גבאים וכו'.

ווען א מענטש קומט אין שול - קומט ער נישט צו הערן מוסר, ער האט שוין באקומען פון די ווייב מוסר וכו', יעצט איז ער פשוט ארויסגעלאפן פון שטוב; געב אים א שמייכל, דארפסט אים גארנישט זאגן.

לאז אים האבן כח צו קענען אהיים גיין און ווייטער קענען האלטן הלכות, ווייטער קענען האלטן אידישקייט, ווייטער קענען ציען נאך א טאג; ער קומט אין בית המדרש - וויל ער הערן נאכאמאל אז עס איז דא א באשעפער, דער אייבערשטער האט אים ליב.

די חידושי תורה וואס דו רעדסט ביי סיפורי מעשיות און שלש סעודות זאל אלץ זיין געבויט אויף איין ציל: יענעם מחי' זיין און מחזק זיין; קענסט רעדן מיט משלים, קענסט רעדן מיט מעשיות, אבער אלץ דארף ארויסקומען דערפון אז די מענטשן זאלן זיך מחי' זיין. דער רבי זאגט (לקוטי מוהר"ן חלק א', סימן כט) מענטשן האבן ליב ווען מען רעדט פאזעטיוו, און אז מען רעדט מיט שכל - רעדט מען פאזעטיוו, אז מען רעדט פאזעטיוו האבן עס מענטשן ליב, אז מענטשן האבן עס ליב נעמט מען עס אן; ווי אזוי קען מען רעדן מיט שכל? אז מען רעדט בשבח הצדיקים.‎

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת אחרי ב', מברכים החודש, כ"ח ניסן, שנת תשפ"ב לפרט קטן

לכבוד מיין טייערער ... נרו יאיר

דא האסטו א מעשה פאר די קינדער עצתו אמונה:

עס איז געווען א גרויסער צדיק רבי לייב פון טראסניץ זכותו יגן עלינו, ער איז געפארן קיין ארץ ישראל מיט א שיף פול מיט מענטשן, אימיטן ים האט פאסירט א שרעק פון א מעשה, עס איז פלוצלונג אנגעקומען א ריזיגע חי' פון אונטער די וואסער, די חי' האט ארויסגעשטעקט די קאפ און געקומען נענטער און נענטער צום שיף, עס איז געפאלן א פחד אויף אלעמען, מענטשן זענען געפאלן חלשות, מען האט געשריגן און געוויינט.

די חי' קומט נענטער און נענטער, ביז דער גרויסער צדיק רבי לייב זכותו יגן עלינו האט זיך שנעל אנגעטון א טלית מיט תפילין און ארויס אויף די דאך פונעם שיף, ער איז געשטאנען און געקוקט אויף די חי', ווען די חי' האט געזען די הייליגע פנים פונעם צדיק איז זי אנטלאפן אין די טיפע וואסער און אלע מענטשן פונעם שיף האבן זיך בארואיגט.

קומענדיגע וואך וועלן מיר ווייטער דערציילן די מעשה וואס איז געשען נאכדעם אויפ'ן שיף מיט דעם גרויסן צדיק.

טייערע קינדער, וואס לערנען מיר זיך ארויס פון די מעשה? צדיקים האבן נישט מורא פון קיינעם, זיי ווייסן אז דער אייבערשער היט, און אז מען טוט אן די הייליגע טלית מיט די הייליגע תפילין ווערט מען געראטעוועט פון שלעכטס.

מאך א בילד פון א שיף אין וואסער, מיט א שרעקעדיגע חי'; עס האט א קאפ מיט צוויי הענט און שפיציגע ציינער, עס קומט צום שיף, מענטשן אויפ'ן שיף מיט שרעקעדיגע פנים'ער, א צדיק מיט טלית און תפילין שטייט אנטקעגן די חי'.

דא האסטו נאך א חלק פון די מעשה; אין די וועכנטליכע קונטרסים זאלסטו דאס צעטיילן, אבער שפעטער ווען דו וועסט דאס צאמנעמען קענסטו עס צאמשטעלן.

מאך א בילד ווי מען זעט א קליינע שיף פון דערווייטנס, א פארט וואו מענטשן קוקן זיך צו מיט וואונדער און א ברעט שווימט אויפ'ן וואסער מיט א נפטר, מיט א פייער זויל ביזן הימל.

טייערע קינדער, פאריגע מאל האבן מיר דערציילט פון דעם גרויסן צדיק רבי לייב טראסטינעצער זכותו יגן עלינו ווען ער איז געפארן קיין ארץ ישראל, די מעשה מיט די שרעקעדיגע חי' וואס איז געקומען אנטקעגן די שיף, די וואך וועלן מיר דערציילן ווייטער:

דער צדיק רבי לייב זכותו יגן עלינו איז נפטר געווארן אויפ'ן שיף פארנדיג קיין ארץ ישראל, פאר'ן נפטר ווערן האט דער צדיק געזאגט: "וואלט מיין איידעם רבי יודל געווען מיט מיר דא אויפ'ן שיף - וואלט ער זיכער געמאכט איך זאל נישט נפטר ווערן דא אויפ'ן שיף".

קינדער, איר ווייסט ווער רבי יודל איז געווען? רבי יודל איז געווען זייער א גרויסער צדיק, א תלמיד פון הייליגן צדיק רבי פנחס קאריצער זכותו יגן עלינו.

דער צדיק רבי לייב האט געבעטן די מענטשן פון די שיף: "גלייך ווען איך וועל נפטר ווערן זאל מען מיר לייגן אויף א א ברעט אין וואסער"; אזוי האט מען טאקע געטון, ווען דער צדיק איז נפטר געווארן האבן די מענטשן פון די שיף גענומען דעם הייליגן גוף און ארויסגעלייגט אויפ'ן וואסער אויף א ברעט.

פלוצלונג זעען זיי א שיין פון פייער גייט ארויף ביז'ן הימל, זיי קוקן גוט און זעען אן אינטערעסאנטע זאך, א פייער זויל גייט פונעם הייליגן גוף פונעם צדיק ביזן הימל, דער ברעט איז געשווימען ביז עס איז אנגעקומען צו א בארטן.

נישט ווייט פון ים איז געווען א שטאט, דארט האט געוואוינט א חכם וואס האט געלאזט צוואה מען זאל קיינעם נישט באערדיגן נעבן אים, אויסער איינעם זאל מען לייגן נעבן אים, ווען עס וועט קומען צו שווימען א נפטר מיט א פייער זויל ביזן הימל - זאל מען יענעם באערדיגן נעבן אים.

יעצט ווען די מענטשן פון שטאט האבן געזען די אינטערעסאנטע זאך, ווי עס קומט צו שווימען א נפטר מיט א פייער זויל ביזן הימל, זענען אלע ארויסגעגאנגען מקבל פנים זיין דעם נפטר, און מען האט באערדיגט דעם צדיק רבי לייב נעבן יענעם חכם.

די מעשה האט דער הייליגער רבי דערציילט. נאך האט דער רבי דערציילט אז דער צדיק רבי לייב איז געקומען צו אים אין חלום און געבעטן: "זייט מקרב מיינע קינדער צו אייך"; דער גרויסער צדיק האט געבעטן דעם רבי'ן ער וויל אז זיינע קינדער זאלן זיין ברסלב'ער חסידים, און אזוי איז געווארן, זיינע קינדער; זיינע זין, בפרט זיין איידעם דער צדיק רבי יודל איז געווארן פון די גרויסע תלמידים פון הייליגן רבי'ן.

טייערע קינדער, וואס נעמען מיר ארויס פון די מעשה? מיר לערנען זיך פון דעם אז די גרעסטע צדיקים וואס ווייסן אלעס און קענען אלעס, ווילן אז זייערע קינדער זאלן זיין נאנט צום רבי'ן, ווייל זיי ווייסן דאס גרויסקייט פון זיין נאנט צום הייליגן רבי'ן, וואס מען באקומט ביים רבי'ן; מען באקומט אמונה, דער רבי לערנט אויס צו רעדן צום אייבערשטן, זיין צוגעקלעבט צום אייבערשטן.

לאמיר זינגען: "טאטע איך וויל נאר דיר, טאטע איך דארף נאר דיר, טאטע איך וויל נכלל ווערן אין דיר".

א פרייליכן שבת.

בעזרת ה' יתברך

ערב שבת קודש פרשת בחוקותי, מברכים החודש, כ"ו אייר, מ"א לעומר, שנת תשפ"ב לפרט קטן

לכבוד ... נרו יאיר

וואס מאכסטו? איך האב שוין לאנג נישט געהערט פון דיר; איך האף צום אייבערשטן אז דו דערהאלסט זיך, דו ביסט ווייטער ממשיך מיט דיין עבודות השם.

אז דו וועסט זיך דערהאלטן, דו וועסט נישט אפלאזן דיין עבודות השם, דו וועסט ווייטער לערנען דיינע שיעורים כסדרן און גיין אין שול דאווענען - וועסטו געהאלפן ווערן, דו וועסט זען א ישועה.

שטעק אריין דיין קאפ צווישן תלמידי היכל הקודש חסידי ברסלב, גיי דאווענען א תפילה צווישן זיי - וועסטו האבן חיות, דו וועסט זיך קענען דערהאלטן. דער רבי האט אזעלכע חיזוקים פאר יעדע מצב, א שאד אז דו דרייסט זיך מער נישט צווישן אנשי שלומינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת בחוקותי (במדבר בא"י), מברכים החודש, כ"ו אייר, מ"א לעומר, שנת תשפ"ב לפרט קטן

לכבוד מיינע טייערע חברים, אנשי שלומינו תלמידי היכל הקודש ארץ ישראל, ה' עליהם יחיו

איך בין נאך זייער איבערגענומען מיט געפילן פון זיין מיט אייך, איך האב הנאה געהאט יעדע מינוט; איך האב זייער הנאה פון די פרישקייט וואס איז דא צווישן אייך און די ליבשאפט וואס הערשט צווישן אייך.

איך וויל אייך שרייבן פון די פרשה פון די וואך (במדבר), אבער ביי אונז איז דא אן אנדערע פרשה, ביי אונז איז די וואך פרשת בחוקותי; איך וועל אייך שרייבן א קליינע זאך פון וואס מיר האבן גערעדט דעם ליל שישי.

דער אייבערשטער זאגט פאר אידישע קינדער (ויקרא כז, ג): "אִם בְּחֻקֹּתַי תֵּלֵכוּ", אויב איר וועט גיין אין די וועגן פון די תורה, וגו', זאגט רש"י הקדוש: "שתהיו עמלים בתורה"; וואס איז עמלות בתורה? דאס איז דער סדר דרך הלימוד פון הייליגן רבי'ן (כמבואר בשיחות הר"ן, סימן עו). ווען א מענטש איז זוכה, ער לערנט און ער פארשטייט דאס לערנען, ער האט א געשמאק אין לערנען - איז דאס נישט קיין פלאג, דאס איז דאך די זיסטע זאך אין די וועלט, אזוי ווי דער רבי האט אמאל געזאגט פאר רבי נתן (שיחות הר"ן, סימן יז): "ווען די תורה וועט דיר ווייזן איר פנים - וועסטו שוין גארנישט דארפן", וועסט נישט דארפן קיין שום שכר, דו וועסט נאר דארפן די תורה; עמל איז פשט אז מען האט נאכנישט קיין טעם, מען האט נאכנישט קיין פארשטאנד, מען פארשטייט נישט דאס לערנען - דאך פלאגט מען זיך, מען זאגט משניות, מען זאגט גמרא, מען פלאגט זיך - דעמאלט קומען אלע ברכות.

עמלות בתורה איז ווען מען פארשטייט נישט דאס לערנען און מען פלאגט זיך, מען זאגט די ווערטער. אזוי ווי דער הייליגער זוהר זאגט (קדושים פה:): "מַאן דְּתִיאוּבְתֵּיה לְמִלְעֵי בְּאוֹרַיְיתָא", ווער עס וויל לערנען די הייליגע תורה, "וְלָא אַשְׁכַּח מַאן דְּיוֹלִיף לֵיהּ", און ער האט נישט ווער עס זאל אים אויסלערנען און געבן צו פארשטיין וואס ער לערנט, "וְהוּא בִּרְחִימוּתָא דְּאוֹרַיְיתָא, לָעֵי בָּהּ, וּמְגַּמְגֵּם בָּהּ בְּגִמְגוּמָא דְּלָא יָדַע", אבער וויבאלד ער האט ליב צו לערנען, לערנט ער אן פארשטיין, "כָּל מִלָּה וּמִלָּה סַלְּקָא", זאל ער וויסן אז יעדעס ווארט תורה וואס ער לערנט אן פארשטיין - גייט ארויף אויבן אין הימל, "וְקוּדְשָׁא בְּרִיךְ הוּא חַדֵּי בְּהַהִיא מִלָּה", און דער אייבערשטער פריידט זיך מיט דעם. "וְקַבִּיל לָהּ", דער אייבערשטער נעמט די ווערטער, "וְנָטַע לָהּ סָחֲרָנֵיהּ דְּהַהוּא נַחֲלָא", און ער פלאנצט איין די ווערטער אויבן אין הימל ארום א טייך, "וְאִתְעָבִידוּ מֵאִלֵּין מִלִּין אִילָנִין רַבְרְבִין", און עס ווערט פון די ווערטער גרויסע ביימער, "וְאִקְרוּן עַרְבֵי נַחַל", וואס מען רופט זיי אן 'ערבות', "הֲדָא הוּא דִכְתִיב (משלי ה, יט): בְּאַהֲבָתָהּ תִּשְׁגֶּה תָמִיד"; דאס איז דער וועג ווי אזוי מען איז זוכה צוצוקומען צו פארשטיין דאס לערנען.

טייערע ברידער, איך בעט אייך זייער, איר דארפט צוריק אנהויבן מיט א פרישקייט מאכן הפצה; ווי איך זע איז די הפצה ביי אייך אביסל איינגעשלאפן. עס איז נישט ריכטיג, מען טאר נישט זיין באקוועם פאר זיך אליינס, מען דארף ברענען פאר אנדערע אידן. שמועסט אייך אפ, יעדע חבורה אין יעדע פלאץ, טיילט אייך איין וויפיל גליונות און קונטרסים יעדער זאל נעמען, איינער גייט אין די פאר שולן, א צווייטער אין אנדערע פאר שולן; מען טאר נישט ווערן באקוועם, אין היכל הקודש אויב מען ווערט באקוועם, מען טוט נישט אין הפצה - קען מען אליינס ארויספאלן, מען ווערט א אלטער איד, אן אלטער חסיד; אלט איז א סכנה (שיחות הר"ן, סימן נא).

גייט פארשפרייטן דעם רבינ'ס חיזוק פאר בחורים און אינגעלייט, זיי דארפן די חיזוק דאס מערסטע; עס איז אזא רחמנות אויף בחורים, זיי ווילן זיין ערליך און גוט און זיי פאלן אין ביטערע עבירות; וואויל איז דעם וואס האט א חלק אין מחזק זיין אידישע קינדער.

א פרייליכן ליכטיגן שבת.

בעזרת ה' יתברך

יום ה' פרשת בחוקותי, כ"ה אייר, מ' לעומר, שנת תשפ"ב לפרט קטן

לכבוד ... נרו יאיר

בנוגע הערן ניגונים פון ...; איך ווייס נישט וואס האט פאסירט מיט אים, עפעס א רוח רעה איז אריין אין אים.

הער ניגונים פון זינגערס וואס זינגען פון אייבערשטן, זינגערס וואס זינגען: "איך וויל ליב האבן דעם אייבערשטן", "איך וויל ליב האבן די הייליגע תורה", "עס בענקט מיין הארץ", "איך וויל ליב האבן די אידישע לעבן" - די ניגונים קען מען הערן; עפעס איז מיט אים געשען, עפעס א רוח איז אין אים אריין; דער אייבערשטער זאל אים אויסהיילן.

דער אייבערשטער זאל רחמנות האבן אויף אידישע קינדער, אלע זאלן תשובה טון.

בעזרת ה' יתברך

יום ה' פרשת בחוקותי, כ"ה אייר, מ' לעומר, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

איר זאלט נישט פאלגן דעם דאקטער וואס זאגט אז מען טאר נישט לעבן אינאיינעם; איר קענט ווייטער לעבן אינאיינעם וכו'.

בנוגע מאכן בדיקות וכו'; איר קענט מאכן וואס די דאקטורים זאגן מען זאל מאכן.

דער אייבערשטער זאל העלפן אלעס זאל אריבערגיין בנקל ובנחת, דיין ווייב זאל האבן געזונטערהייט און גרינגערהייט.

בעזרת ה' יתברך

יום ה' פרשת בחוקותי, כ"ה אייר, מ' לעומר, שנת תשפ"ב לפרט קטן

לכבוד ... נרו יאיר, בית שמש

מזל טוב ..., דער אייבערשטער זאל העלפן זאלסט אויפבויען א בית נאמן בישראל, דיין שטוב זאל זיין א פלאץ פאר השראת השכינה.

איך וויל דיר בעטן אויב דו ביסט מסכים צו אכטונג געבן אויף די קינדער אין די צייט פון שלש סעודות. עס איז זייער א גרויסע זאך צאמצונעמען די קינדער זינגען מיט זיי - ווען מען זינגט די זמירות, און שפעטער ווען מען זאגט דברי תורה - זיי נעמען אין די זייט דערציילן א מעשה און זיי געבן א גוטע עסן אדער א גוטע זאך.

גלייב מיר, ווען איך דארף ווען נישט זאגן דברי תורה אין ישיבה - וואלט איך געכאפט די זאך, איך וואלט אריינגעבלאזן אזא חיות אין די קינדער.

די צייט פון שלש סעודות, ווען די קינדער זענען הפקר - דעמאלט פאסירן געווענליך נישט גוטע זאכן וד"ל.

לאז מיר וויסן אויב דו ווילסט זוכה זיין אין דער זאך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת בחוקותי, כ"ד אייר, ל"ט לעומר, שנת תשפ"ב לפרט קטן

מרת ... תחי', ברסלב

איך האב ערהאלטן אייער בריוו.

איך זאג אייך נאכאמאל איר זאלט איר אפלאזן, הערט אויף רעדן מיט איר; ווייל א כלה וואס האט שטילערהייט שייכות מיט א פרעמדער מאן - איז א פארדארבענע, א שלעכטע, א קראנקע.

וואלט דאס געווען א מיידל - איז עפעס אנדערש; ווען עס וועט קומען צו אייך א מיידל און דערציילן וואס גייט איבער אויף איר, זאלט איר זי מחזק זיין, אבער אז מען טרעפט שוין א שידוך, מען האט א חתן און מען פאפט אויס דעם חתן, מען האלט ווייטער קשר מיט א פרעמדן מאן - אזא איינע איז א שלעכטע; שטייט ווייט פון דעם.

אז איר ווילט טון אנדערש - קענט איר טון ווי אזוי איר פארשטייט, איך זאג אייך וואס איך טו.

דער אייבערשטער זאל העלפן איר זאלט האבן הצלחה אין אלע ענינים.