בעזרת ה' יתברך
יום ד' פרשת אמור, י' אייר, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
בנוגע קעמפ וכו'; מיר ווייסן נאך גארנישט וועגן קעמפ. אז דו ווילסט קומען אין קעמפ זאלסטו בעטן דעם אייבערשטן פאר אונז מיר זאלן האבן פלאץ פאר די מיידלעך פאר'ן זומער. זאג פאר אלע דיינע חבר'טעס זאלן שטענדיג בעטן פאר די מוסד מיר זאלן האבן הצלחה, ווייל מיר גייען אריבער אסאך שוועריקייטן און נאר מיט תפילה וועלן מיר געהאלפן ווערן.
בעזרת ה' יתברך
יום ד' פרשת אמור, י' אייר, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
וואס איז בכלל דיין שאלה וואס דו פרעגסט צי דו זאלסט זאגן תהילים אדער העלפן דיין מאמע? אודאי זאלסטו העלפן דיין מאמע! עס איז נישט דא קיין גרעסערע מצוה ווי העלפן טאטע מאמע. אז דיין מאמע בעט דיין הילף זאלסטו לויפן געשווינד איר העלפן, נישט בלייבן זאגן תהילים און זיך שפירן גוט אז מען טוט יעצט א גוטע זאך, ווייל גארנישט שטייט העכער פון העלפן א מאמע.
בעזרת ה' יתברך
יום ד' פרשת אמור, י' אייר, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
איך פריי זיך זייער אז דו זאגסט תהלים און דו האסט שוין מסיים געווען דעם דריטן מאל ספר תהילים; דער אייבערשטער זאל העלפן זאלסט זוכה זיין צו אלע גוטע זאכן וואס מען באקומט דורך זאגן תהילים. דער הייליגער רבי זאגט (ספר המידות, אות התנשאות, סימן כז): "עַל-יְדֵי אֲמִירַת תְּהִלִּים נִתְרוֹמֵם", דורך זאגן תהילים ווערט מען דערהויבן; מען ווערט נאנט צום אייבערשטן און מען איז זוכה צו א גוט לעבן.
דו פרעגסט וואס דו זאלסט טון אז דו פארשטייסט נישט די טייטש פון די ווערטער פון תהילים; איך וועל דיר דערציילן א מעשה וואס מוהרא"ש האט דערציילט פונעם הייליגן בעל שם טוב זכותו יגן עלינו. די תלמידים פונעם בעל שם טוב האבן געפרעגט זייער רבי פארוואס ער רעדט אזויפיל פון דאס גרויסקייט פון די תהילים פון פשוט'ע אידן, וואס זענען זיי דען - פשוט'ע מענטשן, זיי פארשטייען ניטאמאל קיין עברי טייטש?! האט דער הייליגער בעל שם טוב זיי געזאגט זיי זאלן זיך פארמאכן זייערע אויגן וועלן זיי שוין פארשטיין, ווען זיי האבן פארמאכט זייערע אויגן האבן זיי פלוצלינג אנגעהיבן צו הערן א שיינע קול פון א זיסע געזאנג ווי איינער זינגט: "אשרי האיש אשר לא הלך בעצת רשעים; הייליגער באשעפער העלף מיר, דער פריץ וויל מיר ארויס ווארפן פון מיין דירה, איך האב נישט קיין געלט פאר רענט", און זיי הערן ווייטער ווי א זיסע קול זינגט: "למנצח מזמור לדוד... רבונו של עולם, העלף מיר אז מיין קו זאל צוריק אנהייבן געבן מילך, לעצטענס קומט נישט קיין מילך"; זיי האבן זיך זייער מחי' געווען צו הערן די זיסע קולות וואס האט זיך געהערט מיט אזא געשמאק, ווען זיי האבן געעפנט זייערע אויגן האט זיי דער הייליגער בעל שם טוב זכותו יגן עלינו גאזעגט: "יעצט פארשטייט איר שוין דאס חשיבות פון די תהילים פון די פשוט'ע אידן? אזוי זיס הערט זיך דאס אויבן אין הימל".
ווען דו זאגסט תהילים זאלסטו אריין פלעכטן דיינע אייגענע תפילות; מען מעג אויסרעדן צום אייבערשטן אפילו אינמיטן א קאפיטל און אינמיטן א פסוק, אזוי אויך אינמיטן דאווענען. אז מען פלעכט אריין די אייגענע תפילות בשעת אמירת תהילים איז דאס זייער חשוב אין הימל.
בעזרת ה' יתברך
יום ד' פרשת אמור, י' אייר, שנת תשע"ט לפרט קטן
מרת ... תחי'.
איך האב ערהאלטן אייער בריוו מיט די גוטע בשורה.
איר שרייבט מיר אז ווען איר זענט געווען ביי מיר מיט אייער מאן דערציילן אייער פראבלעם אז איר קענט נישט האבן קיין קינדער, און איך האב אייך דעמאלט געזאגט: "מיט אמונה און תפילה וועט איר האבן נאטורליך נאך קינדער" - האט איר געלאכט פון דעם, און יעצט זעט איר מיט אייערע אויגן אז דער אייבערשטער געבט קינדער. אזוי ווי מיר געפונען אין די ווערטער פון די הייליגע חכמים (תענית ב.): "שְׁלֹשָׁה מַפְתְּחוֹת בְּיָדוֹ שֶׁל הַקָדוֹשׁ בָּרוּךְ הוּא", דריי שליסלען איז נאר אין די הענט פונעם אייבערשטן, איינע פון די דריי שליסלעך איז "מַפְתֵּחַ שֶׁל חַיָּה", דאס הייסט קינדער; וויל איך אייך זאגן אז ווען איך האב גערעדט מיט אייך און אייער מאן איז ביי מיר געווען ברור כשמש אז איר וועט זוכה זיין צו ליכטיגע קינדער. נישט דער דאקטער געבט קינדער און נישט דער דאקטער געבט לעבן, נאר אלעס קומט פונעם אייבערשטן; מען דארף אין דעם גלייבן אזוי ווי מען זעט דאס מיט די אויגן, דעמאלט איז מען זוכה צו גרויסע ניסים.
בנוגע אייערע פחדים וכו'; איך בעט אייך זייער איר זאלט זיך שטארקן מיט אמונה וועט איר זיין געזונט און שטארק, ווייל אמונה איז די רפואה פאר אלסדינג. א שאד מענטשן זאלן זיך פייניגן מיט מחלות קשים ומרים ווען עס איז דא א וועג ארויס צו גיין פון דעם גרינגערהייט; דורך אמונה גייען אוועק אלע פראבלעמען, אלע דמיונות און אלע שרעק וכו' וכו'. לייגט אייך אריין אין אמונה וועט איר זען ווי אלעס איז א גרויסער דמיון און איר וועט לעבן רואיג און צופרידן.
איך שרייב אייך אפאר אמונה ווערטער וואס איר זאלט זאגן יעדן טאג אויפן קול פאר זיך אליין; דאס איז נישט קיין תפילה, דאס איז אמונה ווערטער וואס איר דארפט דאס חזר'ן צו זיך אליינס; איר זאלסט ארויס זאגן די ווערטער אויפן קול און הערן וואס איר רעדט, וועט איר זען אז ביז א קורצע צייט וועט אוועק גיין פון אייך אלע שרעק און דמיונות וכו' וכו':
"אִיךְ גְלֵייבּ מִיט מַיין גַאנְצֶע אֱמוּנָה אַז אַלֶעס וָואס פַּאסִירְט מִיט מִיר אִיז מִיט אַ פּוּנְקְטְלִיכֶער חֶשְׁבּוֹן פוּנֶעם אֵייבֶּערְשְׁטְן אוּן קֵיינֶער קֶען מִיר גָארְנִישְׁט טוּן; קֵיינֶער קֶען מִיר נִישְׁט שְׁלֶעכְטְ'ס טוּן וַוייל דֶער אֵייבֶּערְשְׁטֶער אִיז דָא נֶעבְּן מִיר, עֶר הִיט מִיר אוּן גֶעבְּט אַכְטוּנְג אוֹיף מִיר.
אִיךְ גְלֵייבּ אַז דֶער אֵייבֶּערְשְׁטֶער אִיז דָא; עֶר אִיז מִיט מִיר, בַּיי מִיר אוּן נֶעבְּן מִיר אוּן אַלֶעס וָואס אִיךְ זֶע אִיז אַ פַארְשְׁטֶעלַאכְץ פוּנֶעם אֵייבֶּערְשְׁטְן. אַלֶעס אוֹיף דִי וֶועלְט אִיז עֶר אַלֵיין; עֶר גֶעבְּט מִיר לֶעבְּן, עֶר גֶעבְּט מִיר קִינְדֶער אוּן אַלֶעס וָואס אִיךְ דַארְף.
עֶס קֶען מִיר גָארְנִישְׁט גֶעשֶׁען; נִישְׁט קַיין שְׁלֶעכְטְ'ס אוּן נִישְׁט קַיין גוּטְ'ס, נָאר אַז דֶער אֵייבֶּערְשְׁטֶער בְּרֶענְגְט עֶס, אוּן אוֹיבּ עֶפֶּעס שְׁטֶערְט מִיר וֶועל אִיךְ אִים בֶּעטְן עֶר זָאל מִיר הֶעלְפְן אוּן עֶר וֶועט מִיר הֶעלְפְן".
דאס זאלט איר חזר'ן יעדן טאג אן א שיעור מאל; זאגטס עס אויפן קול איר זאלט דאס הערן. דאס וועט אוועק נעמען פון אייך אלע אייערע פחדים און אומזיסטיגע שרעק.
בעזרת ה' יתברך
יום ד' פרשת אמור, י' אייר, שנת תשע"ט לפרט קטן
לכבוד ... נרו יאיר.
איך האב ערהאלטן דיין בריוו און דיין ווייב'ס בריוו.
איך האב זיך אזוי געפריידט צו הערן די גוטע בשורה אז איר ווארט למזל טוב אן קיין הילף פון א בשר ודם; דער דאקטער וואונדערט זיך און גלייבט אייך נישט אז איר זענט אויפגעראכטן געווארן מיט די גוטע נייעס אן קיין שום הילף, נאר מיט תפילה, גוטע מעשים און מיט אסאך סבלנות.
דאס דארף פארשטערקערן ענקער אמונה איר זאלט נישט מורא האבן פון קיינעם אויף די וועלט; איר זאלט זען אז דער אייבערשטער פירט די וועלט און מיט תפילה קען מען אלעס באקומען אפילו ווען דאקטורים זאגן אז זיי זעען נישט קיין ישועה.
דער הייליגער רבי זאגט (ליקוטי מוהר"ן, חלק ב', סימן א'): "כִּי כְּשֶׁנִּגְאֶלֶת הַתְּפִילָּה, אָז נוֹפְלִים כָּל הָרְפוּאוֹת, כִּי נִתְרַפְּאִין עַל יְדֵי דְבַר ה'", ווען מען דאוונט צום אייבערשטן פאלן אוועק אלע רפואות ווייל מען ווערט אויסגעהיילט פונעם אייבערשטן אליינס, "וַאֲזַי כָּל הַדָּאקְטוֹרִים מִתְבַּיְּשִׁין בָּרְפוּאוֹת שֶׁלָּהֶם", און אלע דאקטורים שעמען זיך מיט זייערע רפואות; זיי זאגן אז זיי האבן נישט קיין ישועה און דא זעט מען קלאר ווי דער אייבערשטער העלפט.
דאנק דעם אייבערשטן אויף די גוטע בשורה און בעט אים אז אלעס זאל אריבער גיין בנקל ובנחת. רעד צום אייבערשטן אויף דיין אייגענע שפראך - אויף אידיש, אלעס וואס דו דארפסט זאלסטו אים בעטן וועסטו זען גרויסע ניסים.
מען קען זיך גארנישט פארשטעלן דאס גרויסקייט פון התבודדות; די גאנצע לעבן פונעם מענטש ווערט אנדערש. מען באקומט א געפיל אין שחרית, מנחה און מעריב. מען הייבט אן שפירן ביים דאווענען ווי דער אייבערשטער הערט צו יעדעס ווארט, דאס גאנצע דאווענען איז געפלאכטן מיט התבודדות; אפילו די פלעצער וואו מען טאר נישט רעדן ביים דאווענען, אבער צום אייבערשטן מעג מען רעדן וואו אימער. וואויל איז דעם וואס געוואוינט זיך צו צו די הייליגע הנהגה, וועט ער האבן די וועלט און יענע וועלט.
א גרויסן יישר כח פאר די געלט וואס דו האסט מיר געשיקט לכבוד די חתונה פון מיין זון נרו יאיר; דער אייבערשטער זאל דיר העלפן, בזכות העלפן חתן כלה אז זיי זאלן קענען חתונה האבן זאלסטו זוכה זיין צו האבן הצלחה אין דיינע מעשים, זאלסט מצליח זיין מיט דיינע תלמידים און דיין ווייב זאל האבן א שנעלע רפואה בגוף ובנפש.
בעזרת ה' יתברך
יום ד' פרשת אמור, י' אייר, שנת תשע"ט לפרט קטן
מרת ... תחי'.
א גרויסן יישר כח פאר'ן מאכן די יערליכע פארטי פאר אונזערע מוסדות; איך דאנק אייך זייער פאר דעם אז איר האט דאס יאר - אזוי ווי די פריערדיגע יארן - אוועק געגעבן אזויפיל צייט, כח און געזונט אז דאס זאל זיין מיט הצלחה.
א גריס פון אייער חשוב'ער זון ... נרו יאיר און פון אייערע חשוב'ע אייניקלעך וואס לערנען ביי אונז אין מוסד; א גריס פון הבחור ... נרו יאיר, ער פירט זיך מיט יראת שמים, מיט גוטע מידות און ער לערנט פלייסיג. אויך א גריס פון אייער אייניקל ... נרו יאיר, ער האט די וואך געמאכט א סיום אויף 'ספר המידות'. ער לערנט יעדע נאכט פאר ער גייט שלאפן דעם ספר המידות וואס דער רבי האט מחבר געווען נאך אלץ קינד, דער רבי האט געזאגט פאר זיין תלמיד רבי נפתלי (איינע פון די צוויי עדים וואס דער רבי האט געשטעלט אויף תיקון הכללי): "מיין ליבער הארציגער חבר, די ספר האט מיך געמאכט פאר א איד".
זאל דער אייבערשטער אייך באגליקן און די זכותים וואס איר טוט פאר אידישע קינדער זאל אייך צוריק קומען, אז איר זאלט זען נחת ביי אלע אייערע קינדער און אייניקלעך; דאס איז די בעסטע ברכה וואס איך וואונטש אייך, וואס נאך דארף דען א אידישע מאמע אויף די וועלט מער פון נחת ביי די קינדער און איינקלעך...
בעזרת ה' יתברך
יום ב' פרשת אמור, ח' אייר, שנת תשע"ט לפרט קטן
מרת ... תחי'.
איך האב ערהאלטן אייער בריוו.
יישר כח פאר די שיינע ווערטער און גוטע גריסן; איך פריי זיך צו הערן אז איר האט הנאה געהאט פון די פרויען צוזאמקום און פון די שיעור, אזוי אויך אז איר האט הנאה צו הערן אויף קול ברסלב די שיעורים פאר מחנכות, ווי דאס קומט אייך צוניץ צו וויסן ווי אזוי צו מחנך זיין אייערע קינדער.
מען זעט אן אינטערעסאנטע זאך, ווען עס קומט וויי צו טון מענטשן, אריין זאגן, פארשעמען, וכו', דעמאלט טראכט מען נישט פאר דעם: 'ווער בין איך דען צו זאגן וכו'?' 'ווער בין איך בכלל וויי צו טון יענעם?' נאר מען זאגט, מען פארשעמט און מען טוט וויי מיטן גאנצן כח השם ישמרינו, ווידעראום ווען עס קומט זיך צו באדאנקען און שרייבן ווערטער פון דאנקבארקייט, דעמאלט טראכט דער מענטש: 'ווער בין איך דען?' 'ווער דארף מיר?'
דער אייבערשטער זאל העלפן מיר זאלן שטענדיג מכיר טובה זיין פאר ווער עס העלפט אונז, זיך שטענדיג באדאנקען ווען מען באקומט א טובה פון א צווייטן, און זיכער מכיר זיין דאס גוטס וואס דער אייבערשטער טוט מיט אונז שטענדיג און אים דאנקען און לויבן דערויף, דורכדעם וועלן מיר זוכה זיין צו באקומען נאך און נאך גוטס.
בעזרת ה' יתברך
יום ב' פרשת אמור, ח' אייר, שנת תשע"ט לפרט קטן
לכבוד ... נרו יאיר.
איך האב ערהאלטן דיין בריוו.
געב אכטונג נישט צו מחנך זיין דיינע עלטערן און אויך נישט דיין ווייב'ס עלטערן; אז דיין שוויגער שטייט איין ביי דיר אין שטוב זאלסטו איר מכבד זיין מיט די גרעסטע מאס דרך ארץ. זאג איר גארנישט קיין מוסר אויף דעם וואס זי גייט מיט אפענע האר השם ישמרינו.
דער עיקר זאלסטו לעבן בשלום מיט דיין ווייב תחי'; זאג איר גארנישט אנטקעגן איר מאמע, עס טוט איר אליינס וויי אז איר מאמע האט זיך אויסגעטון איר שייטל און דריידט זיך ארום מיט אפענע האר. דאנק דעם אייבערשטן אז דיין ווייב איז ערליך און אפגעהיטן, זי גייט מיט א שייטל און מען זעט נישט ארויס איר האר, דורכדעם וועסטו זוכה זיין צו אלע ברכות וואס דער זוהר הקדוש זאגט (נשא קכה.) אז א פרוי וואס געבט אכטונג עס זאל זיך נישט ארויס זען איר האר איז זוכה צו ערליכע קינדער, צו פרנסה בשפע און צו אלעס גוטס.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
חכמינו זכרונם לברכה זאגן (מדרש תנחומא עקב, סימן ו; הובא ברש"י דברים ח, א): "אִם הִתְחַלְתָּ בְּמִצְוָה, גְמוֹר אוֹתָהּ", ווער עס הייבט אן א מצוה דארף דאס ענדיגן; אז דו האסט זוכה געווען צו אנהייבן מיט די חיזוק יומי המתורגם, דו האסט געברענגט דיין חבר ... נרו יאיר זאל יעדן טאג מתרגם זיין פאר די אידן וואס פארשטייען נישט קיין אידיש און צענדליגער טויזנטער אידן בלי גוזמא פלעגן זיך מחי' זיין דערמיט טאג טעגליך, דארפסטו זען אים צו מחזק זיין ער זאל ווייטער ממשיך זיין דאס צו טון.
מיט די היינטיגע וועלט וואס איז אזוי פארגעשריטן קען מען זיצן אין שטוב, ווינטער אין א ווארימע שטוב און זוממער און א שטוב מיט פיינע ערקאנדישן און מחזק זיין צענדליגער טויזנטער אידן מיט גרינגע ארבעט. שטעל זיך פאר ווי דער הייליגער רבי נתן האט ארומגעקלעטערט פון שטאט צו שטאט פארשפרייטן די הייליגע ספרים פון רבי'ן, אויפן וועג צוריק פון ארץ ישראל האט אים די שיף געטראגן קיין מצרים, רבי נתן האט געהאט גרויס צער דערפון, ווייל אין די תורה שטייט אז מען זאל נישט אהין גיין (דברים יז-טז): "לֹא תֹסִפוּן לָשׁוּב בַּדֶּרֶךְ הַזֶּה עוֹד", (דברים כח-סח): "לֹא תֹסִיף עוֹד לִרְאֹתָהּ", (שמות יד-יג): "לֹא תֹסִפוּ לִרְאֹתָם עוֹד עַד עוֹלָם'; נאכדעם האט ער מפיץ געווען דארט א ספר פון רבי'ן; שרייבט רבי נתן מיט גרויס פרייד אז עס האט זיך אים געלוינט אהין צו גיין כדי מפיץ צו זיין.
וואס זאלן מיר שוין זאגן ווען מען קען ארויסשיקן חיזוק, שכל און עצות פון רבי'ן, חיזוק יומי פאר טויזנטער מענטשן; דארפן מיר דאס טון מיט די גרעסטע שמחה.
בעט איך דיר אחי היקר, חזק ואמץ מחדש לעסוק בהעסק הקדוש לתרגם את החיזוק היומי.
איך פאר יעצט קיין ארץ ישראל, מיר זיצן יעצט אינעם פליגער אין הימל העכער די וואלקענעס; איך וועל בעטן פאר דיר און דיין ווייב און קינדער ביי מוהרא"ש און ביי אלע קברי צדיקים.
דו האסט מיר געוואלט נעמען צום ערפארט, אבער איך פאר שטענדיג מיט דעם יונגערמאן וואס מאכט מיר די טיקעטס און שטעלט מיר אויס די נסיעה. אם ירצה ה' ביי אן אנדערע געלעגנהייט וועל איך פארן מיט דיר.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
אשריך ואשרי חלקיך אז דו פארשפרייטסט די נייע ספרים "עצתו אמונה" פאר בחורים און יונגעלייט. עס גייט נישט אריבער א טאג וואס בחורים און יונגעלייט זאלן מיר נישט זאגן אז דאס האט זיי געטוישט זייער לעבן צום גוטן.
ערב יום טוב האט מיר א פרוי פון מאנסי געשריבן אז זי האט באקומען אן עצתו אמונה (פרשת בשלח, ע"ט) און דאס האט איר געטוישט איר לעבן. זי קריגט זיך מיט איר מאן שוין פאר איבער 40 יאר און די קונטרס האט איר געגעבן שכל צו האבן שלום בית; אזוי אויך אז 50 יאר ליידט זי פון פחדים און דמיונות און אין דעם קונטרס איז דא א תפילה פאר א פרוי ניצול צו ווערן פון פחדים, זי זאגט דאס יעדן טאג און עס ווערט איר בעסער און בעסער. אויך האט זי זיך אנגעהויבן פארטראגן מיט אירע קינדער וכו', וכו'.
לויט ווי איך שטעל זיך פאר האט זי דאס באקומען פון דיר, ווייל דו ביסט דער מפיץ אין מאנסי-מאנרא; דו ווייסט גארנישט וואס א קונטרס טוט מיט א מענטש. די מפיצים ווייסן נישט וואס זיי טוען אלץ אויף, בעט איך דיר טייערער מפיץ, הייב אן פון פריש מיט א פרישקייט מפיץ זיין די נייע ספרים "עצתו אמונה" און די בריוון פון "איש אמונות", דאס איז נישט קיין נייע זאכן, דאס איז אלעס גענומען פונעם ספר הקדוש והנורא "אשר בנחל", עס איז נאר אנדערש געפאקט, אויף א נייע שפראך פאר די היינטיגע דור, אויף א וועג אז בחורים און מיידלעך זאלן דאס פארשטיין.
טייערער חבר, ליבער ברודער, שטארק זיך מיט אלע דיינע כחות צו זיין פרייליך; ווארף אוועק אלע עצבות ומרירות און לאז זיך פירן פונעם אייבערשטן. גיי ארום שטענדיג מיט א שמייכל.
ווען דו גייסט ארויף צום ציון פון הרב הקדוש מסאטמאר זכותו יגן עלינו אדער צום ציון פון הרב הקדוש מריבניץ זי"ע זאלסטו מיר מזכיר זיין: יואל בן ריצא רעכיל, איך זאל האבן כח ממשיך צו זיין מיט'ן משמש זיין דעם רבי'ן, משמש זיין מוהרא"ש, און קענען ווייטער פארשפרייטן די זיסע עצות פאר די וועלט.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד ר' ... נרו יאיר.
איך האב ערהאלטן דיין נדבה פאר די ישיבה, יישר כח.
איך זיץ יעצט אויפן פליגער אויפן וועג קיין ארץ ישראל, איך פאר קיין יבנאל מיט די בחורים פון ישיבה; איך זיץ דא מיט דיין זון הבחור ... נרו יאיר, ער איז א טייער קינד, א ירא שמים און א גאלדענע הארץ. ער העלפט די ישיבה זייער געטריי, מיט יעדע זאך וואס מען דארף.
מיר פארן קיין יבנאל פועל'ן שידוכים פאר אלע בחורים; מיר גייען אויסזאגן תהלים ביים ציון אזוי ווי מוהרא"ש שרייבט (צוואת מוהרא"ש, אות ה): "אִיךְ זָאג צוּ אַז יֶעדֶער בָּחוּר אָדֶער מֵיידְל וָואס דַארְף אַ שִׁידוּךְ אוּן זֵיי וֶועלְן קוּמֶען דָא אוֹיף מַיין קֵבֶר אוּן דוּרְכְזָאגְן גַאנְץ סֵפֶר תְּהִלִים פוּן אָנְפַאנְג בִּיזְ'ן סוֹף פַאר מַיין זְכוּת, וֶועל אִיךְ טוּן אַלֶעס וָואס אִיךְ קֶען אַז זֵיי זָאלְן טְרֶעפְן זֵייעֶר שִׁידוּךְ. אוּן דָאס זָאג אִיךְ צוּ מִיט אַ שְׁטַארְקֶע צוּזָאג".
דער אייבערשטער זאל העלפן אז מיר זאלן אלע פועל'ן ישועות פאר אונז און פאר אלע אידן.
א יישר כח פאר'ן העלפן די ישיבה.
...
בעזרת ה' יתברך
ערב שבת קודש פרשת אחרי ב', מברכים החודש, כ"ח ניסן, שנת תשע"ט לפרט קטן
לכבוד ... וזוגתו ... שיחיו.
איך האב ערהאלטן אייער בריוו.
בנוגע מופן צו א צווייטע דירה היות איינער איז דארט געשטארבן רחמנא לצלן; דו דארפסט נישט מורא האבן פון די מעשה פון די פריערדיגע מענטש וואס זיין ווייב איז לא עלינו נפטר געווארן.
אבער בנוגע אז עס איז זייער שווער פאר דיין ווייב צו קריכן אזויפיל שטאק מיט די פיצלעך קינדער אן קיין עלעוועיטאר, צוליב דעם איז יא כדאי זיך אומצוקוקן פאר א דירה מיט ווייניגער טרעפ אז עס זאל נישט זיין אזוי שווער פאר איר אויפצוציען די קינדער.
זיי מחזק דיין ווייב, אזוי אויך זאלסטו איר העלף איר מיט די קינדער, און ווען דו העלפסט איר זאלסטו עס טון מיט הארץ, נישט זי זאל שפירן ווי דו טוסט איר א טובה און דו זוכסט יעדע רגע וואו דו קענסט זיך פטר'ן.
וואס דו דארפסט זאלסטו בעטן נאר פונעם אייבערשטן, וועסטו זען גרויסע ניסים.
לעת עתה בלייב וואונען אין קרית יואל.
א גוט שבת.
בעזרת ה' יתברך
יום ב' פרשת קדושים, ב' דראש חודש אייר, שנת תשע"ט לפרט קטן
מרת ... תחי'.
איך האב ערהאלטן אייער בריוו.
שטארקט אייך מיט אלע אייערע כוחות צו זיין פרייליך, ווייל דער רבי האט אונז בפירוש געזאגט (ליקוטי מוהר"ן, חלק ב', סימן כד): "כָּל הַחוֹלַאַת הַבָּאִין עַל הָאָדָם - כֻּלָּם בָּאִין רַק מִקִּלְקוּל הַשִּׂמְחָה", אלע מחלות און אלע קרענק קומען אויף א מענטש ווייל ער איז דעפרעסט און נישט פרייליך, "גַם חַכְמֵי הָרוֹפְאִים אָמְרוּ, שֶׁכָּל הַמַּחֲלוֹת וְהַחֳלָאִים רָעִים בָּאִים רַק מַחֲמַת חִסָּרוֹן הַשִּׂמְחָה", אפילו די דאקטורים זאגן אז אלע מחלות קומען פון דיפרעסיע, ווייל מען איז נישט פרייליך.
עס איז נישט גרינג צו זיין פרייליך נאכדעם וואס דער יצר הרע פארלייגט זיך זייער שטארק אז דער מענטש זאל נישט זיין פרייליך. ער ברענגט אריין שלעכטע מחשבות אינעם מענטש; דמיונות, פחדים, בלבולים - און וואס נישט, אלעס כדי צו צונעמען די שמחה פונעם מענטש. מיר דארפן אבער פאלגן דעם רבי'ן וואס האט אונז געהייסן זיין פרייליך, דורכדעם וועלן אוועק גיין אלע צרות און אלע יסורים.
דעריבער זאלט איר פרובירן מיט אלע כוחות צו זיין פרייליך; איר זאלט טאנצן אין שטוב מיט די קינדער, דורכדעם וועלן אוועק גיין אלע אייערע ווייטאגן. מוהרא"ש זאגט (מקור השמחה שיחות וסיפורים, סימן פד) בשם רבי אברהם בן רבי נחמן: "מיט'ן זיין פרייליך וויפיל מ'איז נאר פרייליך, איז מען נאך אלץ נישט יוצא די מצוה וואס דער רבי האט אונז געהייסן זיין פרייליך".
דער אייבערשטער זאל העלפן עס זאל אוועק גיין פון אייך אלע ווייטאגן און איר זאלט זיין געזונט און שטארק. איך בעט פאר אייך איר זאלט האבן א רפואה שלימה.
בעזרת ה' יתברך
יום א' פרשת קדושים, א' דראש חודש אייר, שנת תשע"ט לפרט קטן
מרת ... תחי'.
איך האב ערהאלטן אייער בריוו.
איך פריי זיך זייער צו הערן אז איר שעפט חיזוק פון די פרויען האטליין, פון די שיעורים און פון די מעשיות פון תפילה.
בנוגע צו באקומען א היתר פאר נאך צייט וכו'; מען קען נישט זיך אפהאלטן פון האבן קינדער נאר ווען עס איז נוגע צום געזונט פון די פרוי אדער דער מאן, סיי פיזיש און סיי גייסטיש; נאר דעמאלט געבט דער רב א היתר וכו', אבער אויף דאס וואס איר שרייבט אז איר שפירט אז איר קענט אויפבויען א נאנטע קשר צווישן אייך און אייער מאן אן קליינע קינדער וכו' - אויף דעם קען מען נישט געבן קיין היתר. קינדער שטערן נישט פון האבן א נאנטע קשר, אויב עפעס איז נאר פארקערט, מיט קינדער וועט אייער קשר נאר ווערן שטערקער און שטערקער.
בנוגע וואס וועט זיין מיט געלט וכו'; אויף דעם דארפט איר נישט זארגן. דער אייבערשטער איז א זן ומפרנס, ער געבט געלט פאר יעדן איינעם בפרט ווען עס קומט א קינד דעמאלט קומט גרויס שפע, אזוי ווי צדיקים טייטשן דעם מאמר חז"ל (עיין נדה לא:): "בָּא תִּינוֹק לָעוֹלָם, בָּא כִּכְּרוֹ בְּיָדוֹ", אז ווען עס ווערט געבוירן א קינד קומט שוין מיט אים שפע.
וואס זאלן מיר טון אז בעוונותינו הרבים האט זיך אריין געכאפט ביי אידישע קינדער די זאך פון נישט האבן קינדער רחמנא לצלן; מענטשן טוען איבעררעדן אנדערע נישט צו האבן קינדער מיט'ן אויסרייד: "וואס וועט זיין מיט פרנסה?" אדער אנדערע נארישע סברות, אזוי אויך האלט מען פאר מענטשן: "אויף וועמענ'ס חשבון האסטו קינדער?!"
דעריבער, אז איר שרייבט נישט אז איר בעט דאס צוליב אייער כח צושטאנד נאר צוליב בויען א קשר וכו' איז זיכער אז איר זאלט זיך נישט צוריק האלטן וכו'.
דער אייבערשטער זאל אייך געבן כח צו מגדל זיין אייערע קינדער אויפ'ן דרך התורה.
בעזרת ה' יתברך
יום א' פרשת קדושים, א' דראש חודש אייר, שנת תשע"ט לפרט קטן
מרת ... תחי'.
איך האב ערהאלטן אייער בריוו.
איך פריי זיך זייער צו הערן די גוטע בשורה אז איר ווארט למזל טוב; דער אייבערשטער זאל העלפן איר זאלט זוכה זיין צו האבן בנקל גרינגערהייט, גרינג האבן און גרינג ערציען לתורה ולמצוות.
בנוגע וואס מען עסט נישט אין די טעג וכו'; דער הייליגער רבי זאגט (ספר המידות, אות קשוי לילד, סימן א): "אִשָּׁה שֶׁאוֹכֶלֶת צְנוֹן בְּעִבּוּרָה, תֵּלֵד בְּקִשּׁוּי", א פרוי וואס וועט עסן רעטעך אין די טעג וואס זי ווארט וועט האבן שוועריקייטן ביים געבוירן, דעריבער איז גוט זיך צוריק צו האלטן פון עסן אין די טעג רעטעך. אויך איז גוט מקפיד צו זיין נישט צו עסן אין די טעג וואס מען ווארט וכו' און אין די טעג וואס מען זייגט רויע קנאבל און רויע צוויבל, אזוי זאגט דער רבי (ספר המידות, אות הריון, סימן ד): "עֻבָּרוֹת וּמֵינִיקוֹת לֹא יֹאכְלוּ שׁוּמִין וּבְצָלִים".
דער אייבערשטער האט געמאכט אין מדבר אז מען האט געקענט שפירן אלע טעמים אין די מן חוץ פון צוויבל און קנאבל כדי עס זאל נישט שאטן פאר די פרויען אין די צייטן, אזוי ווי חכמינו זכרונם לברכה זאגן (הובא ברש"י במדבר יא, ה): "אָמַר רַבִּי שִׁמְעוֹן, מִפְּנֵי מַה הַמָּן מִשְׁתַּנֶּה לְכָל דָּבָר חוּץ מֵאֵלּוּ? מִפְּנֵי שֶׁהֵן קָשִׁים לְמֵּנִיקוֹת".
איר פרעגט וואס איר קענט טון כדי זוכה זיין צו א געזונטע הייליגע קינד; מוהרא"ש פלעגט זאגן פאר אלע פרויען וואס ווארטן וכו' אז זיי זאלן מזכיר זיין שמות הצדיקים, אזוי ווי דער רבי זאגט (ספר המידות, אות צדיק, חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", דורכ'ן דערמאנען די נעמען פון צדיקים קען מען טוישן די טבע; דעריבער איז גוט מען זאל זאגן כסדר די נעמען פון די צדיקים וואס מען געדענקט אויסנווייניג, צום ביישפיל: אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך און שלמה המלך, רבי שמעון בר יוחאי, רבי יצחק לוריא אשכנזי, רבי ישראל בעל שם טוב, רבי נחמן בן פיגא מברסלב, רבי נתן מברסלב, מוהרא"ש מיבנאל וכו' וכו' און נאך נעמען פון צדיקים וואס מען געדענקט, און נאכדעם זאל מען זאגן די תפילה: "יְהִי רָצוֹן מִלְּפָנֶיךָ אָבִי שֶׁבַּשָׁמַיִם, אִין דִי זְכוּת וָואס אִיךְ הָאבּ דֶערְמַאנְט דִי נֶעמֶען פוּן דִי צַדִּיקִים; בִּזְכוּת זֵייעֶר תּוֹרָה, זֵייעֶרֶע מַעֲשִׂים טוֹבִים אוּן זֵייעֶר מְסִירַת נֶפֶשׁ וִוי זֵיי הָאבְּן זִיךְ מוֹסֵר נֶפֶשׁ גֶעוֶוען פַאר דַיינֶעט וֶועגְן זָאלְסְטוּ מִיר הֶעלְפְן אִיךְ זָאל גֶעבּוֹירְן גְרִינְג אַ גֶעזוּנְט קִינְד בְּרַמַ"ח אֵיבָרִים וּשְׁסָ"ה גִּידִים, אִיךְ זָאל זוֹכֶה זַיין אַרִיבֶּער צוּ גֵיין דִי אַלֶע טֶעג וָואס אִיךְ וַוארְט גְרִינְגֶערְהֵייט. נֶעם אַוֶועק פוּן מִיר אַלֶע מִינֵי עַיִן הָרַע'ס אַז קֵיינֶער זָאל מִיר נִישְׁט קֶענֶען שֶׁעדִיגְן. הֶעלְף מִיר אִיךְ זָאל זוֹכֶה זַיין צוּ הָאבְּן עֶרְלִיכֶע קִינְדֶער וָואס וֶועלְן טוּן דַיין וִוילְן זֵייעֶר גַאנְץ לֶעבְּן. רִבּוֹנוֹ שֶׁל עוֹלָם הֶעלְף מִיר אִיךְ זָאל זַיין גֶעזוּנְט אוּן שְׁטַארְק מַיין גַאנְצֶע לֶעבְּן, אִיךְ זָאל אֵייבִּיג טוּן נָאר גוּטֶע מַעֲשִׂים וָואס דוּ וֶועסְט הָאבְּן פוּן דֶעם אַ נַחַת רוּחַ, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ, יְ"יָ צוּרִי וְגוֹאֲלִי, אָמֵן כֵּן יְהִי רָצוֹן".
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
מזל טוב פאר דיין חתונה! איך האב געהאט בדעה צו קומען צו דיין חתונה, למעשה בין איך געווארן פארנומען און איך האב נישט געקענט ארויספארן צו די חתונה; וואונטש איך דיר יעצט אן אז דער אייבערשטער זאל העלפן זאלסט אויפשטעלן א בית נאמן בישראל, עס זאל זיין א בנין עדי עד און איר זאלט זוכה זיין אויפצושטעלן דורות נאמנים לה' ולתורתו, אמן.
זע צו לערנען יעדן טאג לכל הפחות א בלאט גמרא; אויב דו קענסט קובע זיין דעם שיעור אין שטוב – מה טוב ומה נעים, אזוי וועט דיין ווייב זען ווי דו לערנסט און זי וועט הנאה האבן, דורכדעם וועט זי דיר ארויף קוקן און שעצן.
אפילו דו פארשטייסט נישט וואס דו לערנסט זאלסטו זיין שטארק מיט'ן לערנען א בלאט גמרא א טאג; גיי כסדרן א בלאט נאך א בלאט, און יעדעס מאל דו ביסט זוכה צו מסיים זיין א מסכתא זאלסטו דאס מיטטיילן מיט דיין ווייב, זי וועט דיר צוגרייטן א שיינע סאפער פאר א שיינעם סיום, אזוי וועסטו האבן א גוטע שלום בית. זי וועט דאס נאכדעם דערציילן פאר איר משפחה, אזוי וועלן אלע האבן נחת פון דיר.
געדענק טייערער ... צו זיין דער געבער אין שטוב; דו זאלסט געבן גוטע ווערטער פאר דיין ווייב, ווארט נישט אויף איר און מאך נישט חשבונות צי עס קומט אריין יעצט א ווארט פון ליבשאפט. אז דו וועסט ווארטן אז זי זאל אנהייבן און זי וועט ווארטן אז דו זאלסט אנהייבן – וועט איר נישט זיין צוזאמען וכו', נאר דו זאלסט שטענדיג זיין דער וואס הייבט אן געבן גוטע ווערטער וכו'.
חכמינו זכרונם לברכה זאגן (סוטה כ:): "רוֹצֶה אִשָׁה בְּקַב וְתִּפְלוּת, מִתִּשְׁעָה קַבִּין וּפְרִישׁוּת", א פרוי דארף גארנישט, נאר איין זאך: זיין צוזאמען מיט איר מאן. מער פון תִּשְׁעָה קַבִּין געלט און מתנות, וּפְרִישׁוּת, אבער נישט זיין צוזאמען.
דער אייבערשטער זאל העלפן זאלסט מצליח זיין אין אלע דיינע וועגן.
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער תלמיד ... נרו יאיר.
איך האב ערהאלטן דיין נדבה פאר די ישיבה, יישר כח.
פסח האבן מיר זוכה געווען צו עסן די הייליגע מצה וואס דער זוהר הקדוש רופט אן (זוהר שמות, קפג:): "מֵיכְלָא דִּמְהֵימְנוּתָא", 'עסן וואס ברענגט אמונה', אזוי אויך רופט עס דער זוהר הקדוש אן (פרשת תצוה, קפג:): "מֵיכְלָא דְּאַסְוָותָא", 'עסן וואס ברענגט א רפואה'; זאל דער אייבערשטער דיר געבן און פאר אונז אלע - א רפואה.
איך וואונדער זיך זייער צי דו לערנסט נאך משניות און גמרא; אמאל פלעגסטו מיר זאגן דיינע סיומים, דאס האט מיר מחי' געווען הערנדיג אז דו כאפסט אריין עפעס אייביגע גוטס וואס וועט בלייבן מיט דיר.
זע צו פאלגן דעם הייליגן רבי'ן מיט די עצה פון "התבודדות"; נעם זיך אראפ אפאר מינוט א טאג ווען דו זאלסט גיין אויף א פלאץ וואו קיינער איז נישט דארט און דו זאלסט זיך אויסשמועסן דאס הארץ מיט'ן אייבערשטן. בעט אים אלעס וואס דו דארפסט און דערצייל אים אלעס וואס דער יצר הרע טוט מיט דיר במחשבה, דיבור ומעשה; דער רבי האט געזאגט (ליקוטי מוהר"ן, חלק ב', סימן כה): "הִתְבּוֹדְדוּת הוּא מַעֲלָה עֶלְיוֹנָה וּגְדוֹלָה מִן הַכֹּל", די עבודה איז העכער פון אלעס, און אלע צדיקים זענען צוגעקומען צו זייערע מדריגות דורך די הנהגה פון התבודדות.
זע צו רעדן שיין צו דיין ווייב תחי'; דו האסט באקומען א מתנה פון הימל א טייערע ווייב, זאלסטו איר אויפהייבן מיט גוטע ווערטער וועט זי דיר זיין געטריי דיין גאנץ לעבן.
דאנק און לויב דעם אייבערשטן אויף די ליכטיגע קינדער וואס דו האסט; ווי מער דו וועסט דאנקען וועט דער אייבערשטער מאכן מיט דיר נאך ניסים.
פון דיין ראש ישיבה וואס האט דיר זייער ליב.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער תלמיד ... נרו יאיר.
איך האב ערהאלטן דיין נדבה פאר די ישיבה, יישר כח.
איך שרייב דיר א בריוו פון הימל, פון העכער די וואלקענעס; איך פאר יעצט קיין ארץ ישראל צו מקומות הקדושים וואו איך וועל מתפלל זיין פאר דיר און פאר דיין משפחה.
איך ווארט צו הערן פון דיר אז דו האסט א שיעור אין משניות; אלץ בחור פלעגסטו לערנען זייער פלייסיג משניות. וויל איך הערן פון דיר אז דו לערנסט נאך אלץ יעדן טאג משניות; דאס וועט בלייבן מיט דיר און דאס וועסטו מיטנעמען מיט דיר אויף יענע וועלט.
אויך בעט איך דיר זייער זאלסט לערנען יעדן טאג אביסל חומש מיט'ן תרגום, אזוי וועסטו ביז סוף וואך האבן געענדיגט די פרשה שנים מקרא ואחד תרגום, וואס חכמינו זכרונם לברכה זאגן (ברכות ח.) "לְעוֹלָם יַשְׁלִים אָדָם פַּרְשִׁיוֹתָיו עִם הַצִּבּוּר שְׁנַיִם מִקְרָא וְאֶחָד תַּרְגוּם, שֶׁכָּל הַמַּשְׁלִים פַּרְשִׁיוֹתָיו עִם הַצִּבּוּר מַאֲרִיכִין לּוֹ יָמָיו וּשְׁנוֹתָיו", אז דאס איז א סגולה צו האבן אריכות ימים.
פון דיין ראש ישיבה וואס האט דיר ליב.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער מחותן ... נרו יאיר.
איך האב ערהאלטן דיין נדבה פאר די ישיבה, יישר כח.
איך שרייב דיר פון אונטערוועגנס קיין ארץ ישראל וואו איך פאר מיט אפאר תלמידים צו קברי צדיקים, אויך מיין זון דער חתן קומט מיט.
ברוך ה' מיר קומען שוין נענטער און נענטער צו די חתונה; מיר הערן נישט אויף דאנקען און לויבן דעם אייבערשטן אויף די גרויסע נס וואס ער האט מיט אונז געטון, אז מיר האבן זוכה געווען צו טרעפן אזא חשוב'ע כלה פון אזא חשוב'ע שטוב.
וואו טרעפט מען היינט א כלה מיט מחותנים וואס זענען צופרידן מיט וואס מען האט, מען דארף נישט קיין שום נארישקייטן. מען איז פרייליך אפילו די חתונה איז אין ישיבה אן בלומען, אן א שפילער, זינגער, בדחן; אן פיקטשערס און אן סארווערס וכו', וכו'; חתן כלה זענען פרייליך מיט די שידוך אליינס, דאס אלעס קומט פון א גוטע חינוך וואס די קינדער באקומען אין שטוב.
בנוגע די טליתים; די שבת טלית, די וואכן טלית און די קיטל, דאס וועל איך באצאלן, דער מחותן דארף דאס נישט באצאלן. אויך דער שטריימל וועל איך אים קויפן, דער מחותן דארף נישט דאגה'נען דערפאר.
דער גאנצער חשבון וואס קאסט מיר פאר'ן צד החתן וועט לכאורה אויסקומען ווייניגער ווי עס האט מיר געקאסט די תפילין רש"י ור"ת פאר'ן חתן ביי זיין בר מצוה.
ווי גליקליך זענען מיר אז מיר האבן א צדיק מוהרא"ש וואס גראד אונז אויס אונזער קאפ, אונזער שכל אז מיר זאלן נישט פארשווארצט ווערן פאר אביסל כבוד המדומה. זיך נישט אן חובות'ן פאר נארישע כבוד, נארישע עטענשן. א רחמנות אויף אידישע קינדער וואס ווערן נעבעך בעלי חובות בעת שמחתם; אן שכל און אן קיין שום פשט פארשוועמט מען צענדליגער טויזנטער דאללער, אלץ מיט'ן תירוץ: "יענער טוט אזוי", "יענער וועט לאכן", יענער וועט זאגן", וכו', וכו'. פרעג איך דיר: איז נישט טויזנט מאל אשרינו?!
א גריס פון דיין חתן; איך זיץ דא נעבן אים אויפ'ן פליגער, ער פירט זיך מיט יראת שמים.
דער אייבערשטער זאל העלפן אז די חתן כלה זאלן גיין צו די חתונה בשעה טובה ומוצלחת און אויפשטעלן שיינע ערליכע ליכטיגע דורות.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך האב געשריבן א בריוו פאר דיין ווייב תחי' איר צו מחזק זיין מיט איר הייליגע ארבעט וואס זי טוט מיט די בריוון; אלע מפיצים זאגן אז מענטשן זענען זיך מחי' מיט די ענגלישע קונטרסים מתורגם פון "עצתו אמונה" און פון "איש אמונות".
דאנק און לויב דעם אייבערשטן אז עס איז אייך אונטערגעקומען אזא זכות, אז פון אייער שטוב גייט ארויס א "ליכטיגקייט פון אמונה", וואס מאכט ליכטיג פאר אידישע קינדער.
בעט איך דיר דו זאלסט זיך שטארקן און שטארקן דיין ווייב; דו האסט זוכה געווען צו א וואוילע ווייב תחי', דארפסטו איר פרייליך מאכן. פארברענג מיט איר, אזוי אויך זאלסטו זען צו מאכן צייט אביסל ארויסצוגיין מיט איר; עס איז זייער געזונט פאר א פרוי אביסל ארויסצוגיין פון שטוב. זיי זיצן טעג, נעכט און וואכן אין שטוב מיט די קינדער, דארף דער מאן האבן שכל ארויס צו נעמען די ווייב אביסל צו שעפן פרישע כחות.
פון דיין ראש ישיבה וואס האט דיר ליב.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך שרייב דיר די בריוו פון הימל, פון העכער די וואלקענעס. איך זיץ יעצט אויפן פליגער אויפן וועג קיין ארץ ישראל נעמען אביסל פון איר הייליגקייט וואס מען איז זוכה דורכ'ן זיין דארט; אמונה, אריכות אפים, תיקון הברית, ועוד.
איך וויל דיר מחזק זיין דו זאלסט מקפיד זיין צו דאווענען אלע תפילות דוקא במנין. חכמינו זכרונם לברכה זאגן (ברכות ז:): אויפ'ן פסוק (תהלים סט, יד): "וַאֲנִי תְפִלָּתִי לְךָ ה' עֵת רָצוֹן", "אֵימָתַי עֵת רָצוֹן?" ווען איז אן עת רצון, "בְּשָׁעָה שֶׁהַצִּבּוּר מִתְפַּלְּלִין", ווען דער ציבור דאוונט; אז מען דאוונט מיט מנין איז אן עת רצון אז די תפילות זאלן אנגענומען ווערן, נאך זאגן חז"ל (תענית ח.): "אֵין תְּפִלָּתוֹ שֶׁל אָדָם נִשְׁמַעַת אֶלָּא אִם כֵּן מֵשִׂים נַפְשׁוֹ בְּכַפּוֹ", דער אייבערשטער נעמט אן די תפילות נאר ווען מען האט אינזין וואס מען דאוונט. פרעגט די גמרא, עס שטייט דאך (תהלים עח, לו-לז): "וַיְפַתּוּהוּ בְּפִיהֶם, וּבִלְשׁוֹנָם יְכַזְּבוּ לוֹ, וְלִבָּם לֹא נָכוֹן עִמּוֹ, וְלֹא נֶאֶמְנוּ בִּבְרִיתוֹ", די אידן האבן געפאפט דעם אייבערשטן מיט זייער מויל, זיי האבן נישט אינזין געהאט ווען זיי האבן געבעטן דעם אייבערשטן וכו', דאך שטייט נאכדעם (תהלים עח, לח): "וְהוּא רַחוּם יְכַפֵּר עָוֹן" וגו', אז דער אייבערשטער האט אנגענומען זייערע תפילות און ער האט זיי מוחל געווען אויף זייערע עבירות? ענטפערט די גמרא: "לֹא קַשְׁיָא, כָּאן בְּיָחִיד כָּאן בְּצִבּוּר", אויב מען דאוונט ביחידות קוקט מען נאך דעם גאנצן דאווענען אויב מען האט אינזין יעדעס ווארט, מה שאין כן ווען מען דאוונט בציבור דעמאלט, "וְהוּא רַחוּם יְכַפֵּר עָוֹן" וגו', ווערן אנגענומען די תפילות אפילו אן כוונה.
דו האסט א שטארקע עקשנות, זאלסטו דאס נוצן בקדושה; זיי אן עקשן צו דאווענען אלע תפילות מיט מנין וועסטו האבן פרנסה בשפע.
איך בעט פאר דיר יעדן טאג; יעצט ווען איך פאר צו מקומות הקדושים וועל איך דאווענען פאר דיר דו זאלסט מצליח זיין אין אלע דיינע וועגן.
פון דיין ראש ישיבה וואס האט דיר ליב.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר, תלמיד ישיבה תפארת התורה.
איך האב ערהאלטן דיין נדבה פאר די ישיבה, יישר כח.
וויסן זאלסטו אז יעדע זאך וואס דו טוסט אין ישיבה, אנגעהויבן מיט'ן רייניגן, מסדר זיין, פאררעכטן וכו', וכו' – וועט דיר בלייבן פאר אן אייביגע זכות.
חכמינו זכרונם לברכה זאגן (ברכות ז:): "גְּדוֹלָה שִׁמּוּשָׁהּ יוֹתֵר מִלִּמּוּדָהּ", ווען מען איז משמש א צדיק איז דאס אסאך מער ווי ווען מען לערנט תורה פונעם צדיק; ווייל מיט דעם וואס מען איז משמש דעם צדיק ווערט מען א כלי לקבל די יראת שמים און די שכל פונעם צדיק.
דאס וואס דו טוסט האב איך געטון לאנגע יארן, סיי אלץ בחור ביי מיין זיידע; איך האב לאנגע יארן געוואשן דעם בית המדרש און מסדר געווען די ספרים, אזוי אויך פארראכטן און אלעס געטון פאר'ן בית המדרש. אויך ווען איך בין מקורב געווארן צום רבי'ן און איך האב אנגעהויבן דאווענען אין בית המדרש "היכל הקודש" אין וויליאמסבורג פלעג איך מיט ... נרו יאיר יעדע וואך וואשן לכבוד שבת דעם בית המדרש און די בית הכסא'ס, וכו' וכו'; קיינער האט מיר נישט געבעטן דאס צו טון און קיינער האט נישט געוויסט אז מיר פלעגן דאס טון פאר לאנגע יארן. מיר האבן געשפירט ווי מיר טוען די עבודה אין בית המקדש.
חכמינו זכרונם לברכה זאגן (משנה תמיד ב, ב): "מִיָּמָיו לֹא נִתְעַצֵּל הַכֹּהֵן מִלְּהוֹצִיא אֶת הַדָּשֶׁן", עס האט קיינמאל נישט פאסירט אז מען זאל דארפן בעטן די כהנים זאלן רייניגן דעם מזבח.
דעריבער בעט איך דיר זייער, שטארק זיך ווייטער צו העלפן שיין מאכן די ישיבה, חדר און מיידל סקול, העלף מיר אויפשטעלן מוסדות וואו מיר זענען מחנך אונזערע קינדער מיט די ריינע אמונה. אין דעם זכות וועסטו בקרוב זוכה זיין צו א גוטע שידוך.
זיי מיר מודיע יעדע סיום וואס דו מאכסט; מיין גאנצע חיות איז צו הערן פון נאך א תלמיד אז ער לערנט און איז מסיים מסכתא נאך מסכתא.
פון דיין ראש ישיבה.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך שרייב דיר א בריוו פון הימל, פון העכער די וואלקענעס אויפ'ן וועג קיין ארץ ישראל. איך פאר צו מוהרא"ש פועל'ן ישועות; איך וועל בעטן און מתפלל זיין פאר דיר און פאר דיין משפחה.
דו ביסט ביי מיר זייער חשוב ווייל דו העלפסט מיר אויפשטעלן א נייע דור קינדער וואס לעבן מיט אמונה.
דו קענסט זיך נישט פארשטעלן דיין זכות מיט'ן זיין א מלמד; בכלל איז א מלמד זייער חשוב אין הימל, בפרט א מלמד וואס האט די הקדמות פון רבי'ן.
איך בעט דיר זייער טייערער ..., זיי ממשיך ביתר שאת וביתר עוז מיט דיין הייליגע ארבעט; זינג און טאנץ מיט די קינדער ניגוני אמונה. אפילו יעצט אין די ספירה טעג ווען מיר הערן נישט קיין מוזיק זאלסטו זינגען און טאנצן מיט די קינדער: "אוי טאטע, אוי פאטער, איך וויל זיין אן ערליכער איד"; אזוי אויך זאלסטו זינגען מיט זיי: "אה מחי' ציצית, אה מחי' קאפל, אה מחי' פיאות, וכו', וכו'", עס זאל זיי אריינגיין אין די ביינער דאס געשמאק פון זיין א איד.
אויך זאלסטו אכטונג געבן זיי זאלן רעדן איידל; אויב א קינד רעדט נישט איידל זאלסטו אים מחנך זיין ער זאל נישט זאגן די נישט איידעלע ווערטער. אפילו עס איז נישט אזוי געפערליך פאר ערוואקסענע וכו', דאך זאלסטו זען זיי זאלן נישט רעדן נישט איידעלע ווערטער ווייל אז מען איז נישט מחנך אויף דעם ווען זיי זענען יונג וועלן זיי שפעטער ווען זיי ווערן עלטער רחמנא לצלן ארויס גיין לתרבות רעה, אזוי ווי עס ווערט געברענגט אין תנא דבי אליהו (פרק יג): "מַעֲשֶׂה בְּאָדָם אֶחָד שֶׁהָיָה עוֹמֵד הוּא וּבְנוֹ בְּבֵית הַכְּנֶסֶת; וְכָל הָעָם הָיוּ עוֹנִין אָמֵן וְהַלְלוּיָהּ אַחַר הָעוֹבֵר לִפְנֵי הַתֵּיבָה, וּבְנוֹ עוֹנֶה דְּבָרִים שֶׁל תִּפְלוּת, וְלֹא אָמַר לוֹ אָבִיו שׁוּם דָּבָר". עס איז געווען א מעשה מיט א מענטש וואס איז געווען יום טוב סוכות אין בית המדרש, אלע מתפללים האבן שיין געדאוונט הלל, אבער דעם איד'ס זון האט נישט געדאוונט און נישט געזאגט הלל, נאר ער האט גערעדט ניבול פה וכו' הויעך פאר אלעמען. "וְאָמְרוּ לוֹ הַבְּרִיּוֹת שֶׁיִּמְחֶה בִּבְנוֹ, וְהֵשִׁיב וְאָמַר לָהֶם: 'מָה אֶעֱשֶׂה לוֹ? תִּינוֹק הוּא! יְשַׂחֵק!'" מען איז צוגעגאנגען רעדן צו דעם איד ער זאל אכטונג געבן אויף זיין זון, אבער דער איד האט זיך נישט וויסנדיג געמאכט, ער האט געזאגט: "ס'איז גארנישט, ער איז נאך א קינד", "שׁוּב לְמָחָר עָשָׂה כֵּן, כָּל אוֹתָן יְמֵי הֶחָג עָנָה בְּנוֹ דְּבָרִים שֶׁל תִּפְלוּת וְלֹא אָמַר לוֹ אָבִיו שׁוּם דָּבָר". אזוי איז געווען א גאנץ יום טוב סוכות, טאג נאך טאג, מען האט אים געבעטן ער זאל אכטונג געבן אויף זיין זון, אבער ער האט זיך געהאלטן ביי זיינס: "ס'איז גארנישט, ער איז נאך א קינד", "לֹא יָצְתָה אוֹתָהּ שָׁנָה לֹא שְׁנִיָּה וְלֹא שְׁלִישִׁית עַד שֶׁמֵּתוּ אִשְׁתּוֹ וּבָנָיו וּבֶן בְּנוֹ וְיָצְאוּ לוֹ חֲמֵשׁ עֶשְׂרֵה נְפָשׁוֹת בְּתוֹךְ בֵּיתוֹ, וְלֹא נִשְׁתַּיֵּר לוֹ אֶלָּא שְׁנֵי בָּנִים: אֶחָד חִגֵּר וְסוּמָא וְאֶחָד שׁוֹטֶה וְרָשָׁע", דער סוף איז געווען אז ער האט נעבעך פארלוירן אלע קינדער.
אז דו האסט איבעריגע צייט זאלסטו עוסק זיין אין הפצה; דאס איז חשוב'ער ווי די גרעסטע עבודות. א סימן אז מען האט ליב דעם טאט'ן – אז מען זארגט פאר זיינע קינדער.
האלט מיט דיר שטענדיג א משניות און ווען דו האסט איבעריגע מינוטן כאפ אריין א משנה; דאס וועט דיר באגלייטן בזה ובבא.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
מרת ... תחי'.
איך האב ערהאלטן די נדבה פאר די ישיבה, יישר כח.
איר קענט זיך נישט פארשטעלן דאס גרויסקייט פון זיין א "מזכה את הרבים"; בפרט ווען מען איז מזכה א צווייטן איד צוריק צו קומען צו די אמונה און צו די וועג פון די תורה.
איך באקום צוריק גריסן פון די מפיצים אז מענטשן זענען זיך מחי' מיט די קונטרסים אין ענגליש וואס איר זענט מתרגם; די נייע קונטרסים פון "עצתו אמונה".
בעט איך אייך מרת ... תחי' איר זאלט ווייטער ממשיך זיין מיט די הייליגע ארבעט וואס איר טוט; נאך אביסל וועלן מיר צוזאמנעמען אלע בריוון און מאכן פון דעם א שיינעם ספר וואס וועט פארשפרייט ווערן אין די הונדערטער טויזנטער און וועט מחי' זיין די גאנצע וועלט.
א גריס פון אייער טייערער מאן נרו יאיר; ער איז ליכטיג און טייער, ער פירט זיך מיט שיינע מידות און ער מאכט א קידוש השם; וואו ער גייט און וואו ער שטייט זעט מען אז דאס איז עפעס אויסנאם.
דער אייבערשטער זאל אייך געבן כח ממשיך צו זיין מיט אייער הייליגע ארבעט און האבן די כחות צו מגדל זיין אייערע ליכטיגע דורות.
...
בעזרת ה' יתברך
יום א' פרשת אחרי ב', אסרו חג, כ"ג ניסן, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך האב שוין לאנג נישט געהערט פון דיר; איך וואונדער זיך אויב דו לערנסט נאך פלייסיג. איך געדענק ווען דו ביסט מקורב געווארן צום רבי'ן ווען דו האסט זיך דערוויסט פונעם "סדר דרך הלימוד" (כמבואר בשיחות הר"ן, סימן עו), האסטו געברענגט ווי א ברענעדיגע פאקל; דו האסט געלערנט ממש גזמאות א טאג, צענדליגער בלעטער גמרא און צענדליגער פרקים משניות.
איך האף אז דו ביסט ווייטער ממשיך מיט א פרישקייט. חכמינו זכרונם לברכה זאגן (ספרי, לג): אויפן פסוק (דברים ו, ו): אֲשֶׁר אָנֹכִי מְצַוְּךָ הַיּוֹם – "לֹא יִהְיוּ בְּעֵינֶיךָ כִּיְשָׁנָה, אֶלָּא כַּחֲדָשָׁה שֶׁהַכֹּל רָצִין לִקְרָאתָהּ", מען דארף יעדן טאג לערנען מיט א פרישקייט, א נייע תורה! א נייע משניות!
וואס זאל איך דיר זאגן, אשרינו מה טוב חלקינו אז מיר זענען מקורב צו א לעבעדיגע רבי; א רבי וואס ברענגט אונז צו אייבערשטן און צו די תורה. מען רופט אונז אן "טויטע חסידים" און מען מאכט פון אונז א געשפעט, אבער באמת זענען מיר די "לעבעדיגע חסידים". מען קען זיצן ביי א רבי וואס זעט אויס ווי לעבעדיג אבער עס איז א בחינה פון טויט, מען באקומט גארנישט וד"ל.
דער אייבערשטער זאל העלפן זאלסט האבן הצלחה אין אלע ענינים.
