בריוון פונעם ראש ישיבה שליט"א

#3355 - שיק מיר נישט סתם אימעילס, עס נעמט אוועק מיין טייערעצייט
שאלות, היטן די צייט

בעזרת ה' יתברך


יום ג' פרשת מצורע, ד' ניסן, שנת תשפ"ב לפרט קטן


 


לכבוד ... נרו יאיר


איך האב דיר שוין איינמאל געבעטן זאלסט מיר אויפהערן שיקן אימעילס; מילא דו ווילסט עפעס פרעגן, א שאלה, אן עצה - וועל איך זיך פרייען דיר צו ענטפערן, אבער דורך סתם שיקן אימעילס גנב'עסטו אוועק מיין צייט.


איך האב דיר שוין געבעטן אין ארץ ישראל זאלסט אויפהערן.

#3354 - פארשפרייטן די זיסע וועג פון רבי'ן פאר די גאנצע וועלט
הפצה, סיום, דרשות, לימוד התורה

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד ... נרו יאיר, לעיקוואד


איך האב אזוי הנאה יעדעס מאל דו לאזט מיר איבער אן הודעה אז דו לערנסט און דו ביסט מסיים מסכתא נאך מסכתא, דאס איז ממש מיין גאנצע חיות.


באזונדער האב איך הנאה אז דו גייסט הפצה, דו פארשפרייטסט די הייליגע ספרים, קונטרסים און גליונות - אין לעיקוואד; נישטא קיין גרעסערע זאך ביים אייבערשטן ווי עוסק זיין אין הפצה, פארשפרייטן די זיסע וועג פון רבי'ן פאר די גאנצע וועלט אז אלע זאלן זיך קענען צוריקקערן צום אייבערשטן.


בנוגע קומען קיין לעיקוואד געבן א שיעור; איך דארף זען אויב עס איז נאך שייך צו קומען פאר יום טוב פסח.


דער אייבערשטער זאל העלפן זאלסט האבן הצלחה אין אלע ענינים.

#3353 - עס איז נישט כדאי צו ארבעטן אויף א פלאץ וואו מען האט נסיונות
סגולות, פרנסה, נסיונות, ברכת המזון

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


דאנק דעם אייבערשטן אז דו האסט א גוטע ריינע פרנסה, בלייב מיט די פרנסה נקיה וקלה; עס איז נישט כדאי צו גיין ארבעטן מיט מיידלעך פאר נאך געלט, עס וועט דיר זיין ביטער שווער, וועסט זיך דארפן רייסן צו זיין אפגעהיטן. חכמינו זכרונם לברכה זאגן (יומא כט:): "הִרְהוּרֵי עֲבֵירָה קָשִׁים מֵעֲבֵירָה", טראכטן פון עבירות איז ערגער פון טון עבירות; וואס פעלט דיר אויס די קאפ וויי.


בענטש ברכת המזון דוקא פון א בענטשער, נישט אויסנווייניג - וועסטו האבן פרנסה בריוח. מוהרא"ש פלעגט זאגן אז דאס איז א סגולה פאר עשירות, און ער פלעגט זאגן אז דאס וואס ער האט זוכה געווען צו זיין גרויסע עשירות - איז נאר ווייל ער האט זיך צוגעוואוינט נאך פון אלס בחור צו בענטשן אינעווייניג.


דער אייבערשטער זאל העלפן זאלסט האבן הצלחה אין אלע ענינים.

#3352 - איך וויל ארויסקומען אין שטעטל צו זיין ביי דיין סיום הש"ס
תפילה והתבודדות, כיבוד אב ואם, סיום, מדות טובות

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד ... נרו יאיר, קרית ברסלב


איך האב ערהאלטן א בריוו פון דיין מאמע תחי', זי שרייבט אז דו ביסט זייער וואויל, דו העלפסט איר; דו העלפסט יעדן איינעם אין שטעטל, אלע זענען זיך מחי' מיט דיר; דו האסט גאלדענע מידות.


זי שרייבט אז איינער פון דיינע געשוויסטער האבן דיך אנגעגאסן מיט זייפיגע וואסער און דו האסט גארנישט צוריק געטון, דו ביסט ווייטער געווען פרייליך; איך פריי זיך זייער צו הערן די שיינע זאכן אויף דיר.


איך ווארט דו זאלסט מיר מודיע זיין ווען דו ווילסט מאכן די סיום הש"ס; איך וויל ארויסקומען אין שטעטל צו זיין ביי דיין סיום הש"ס.


איך בעט דיר זייער זאלסט יעדן טאג אביסל גיין אין פעלד רעדן צום אייבערשטן. יעצט ווען דו ביסט יונג, אז דו וועסט דאס טון יעדן טאג - וועט דאס ווערן א חלק פון דיין לעבן, עס וועט דיר זיין גרינגער צו טון דיין גאנץ לעבן; א לעבן מיט רעדן צום אייבערשטן - איז אן אנדערע לעבן.


דער אייבערשטער זאל העלפן זאלסט האבן הצלחה אין אלע ענינים.

#3351 - מישט נישט אריין קיינעם אין אייער לעבן
קינדער, כיבוד אב ואם, רפואה, תהלים

בעזרת ה' יתברך


יום א' פרשת מצורע, ב' ניסן, שנת תשפ"ב לפרט קטן


 


מרת ... תחי'


איך האב ערהאלטן אייער בריוו.


מוהרא"ש זאגט מען זאל נישט פרעגן וואס עס גייט זיין וכו', וועגן עין הרע.


אז איר האט יא געפרעגט און איר ווייסט וואס עס גייט זיין וכו' – זאלט איר נישט רעדן פון דעם מיט קיינעם; דאס רעדט מען נישט אפילו מיט עלטערן.


נעמט א תהלים און בעטס דעם אייבערשטן יעדן טאג אז אלעס זאל זיין גוט און גרינג.


מישט נישט אריין קיינעם אין אייער לעבן.


דער אייבערשטער זאל העלפן איר זאלט האבן הצלחה אין אלע ענינים.

#3350 - ביי דיינע עלטערן אין שטוב זאלסטו זיך פירן אזוי ווי זיי ווילן
תפילה והתבודדות, כיבוד אב ואם, בחור, דרך ארץ, לימוד התורה

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


קריג זיך נישט מיט דיינע עלטערן, ביי זיי אין שטוב זאלסטו זיך פירן אזוי ווי זיי ווילן. דו קענסט גיין אין ישיבה מיט א הוט און רעקל, און אויך ווען דו וועסט חתונה האבן וועסטו גיין מיט א הוט אין רעקל; יעצט ווען דו ביסט ביי זיי אין שטוב זאלסטו זיך נישט קריגן מיט זיי.


אויך אז עס שטערט דיינע עלטערן ווען דו ברענגסט אהיים אזויפיל ספרים - זאלסטו נישט אהיים ברענגען אזויפיל ספרים, האלט דיינע ספרים אין ישיבה און נאך דיין חתונה וועסטו האבן א שיינע ספרים שטוב אנגעפולט מיט ספרים.


אז דו וועסט זיך פירן מיט דרך ארץ צו דיינע עלטערן, דו וועסט רעדן צו זיי אזוי ווי מען רעדט צו א רבי, מיט גרויס דרך ארץ; דו וועסט זיך נישט טענה'ען מיט זיי - וועלן זיי אויך מקורב ווערן צום הייליגן רבי'ן.


דער עיקר זאלסטו זיך שטארקן מיט'ן לערנען אויפ'ן סדר דרך הלימוד פון רבי'ן (כמובא בשיחות הר"ן, סימן עו), דער רבי זאגט דארט: "שֶׁאֵין צְרִיכִין בְּלִמּוּד רַק הָאֲמִירָה לְבַד, לוֹמַר הַדְּבָרִים כְּסֵדֶר, וּמִמֵּילָא יָבִין", מען דארף נישט פארשטיין ווען מען לערנט, מען דארף נאר זאגן די ווערטער פון די הייליגע תורה און צום סוף וועט מען פארשטיין, "וְלֹא יְבַלְבֵּל דַּעְתּוֹ בִּתְחִלַּת לִמּוּדוֹ שֶׁיִּרְצֶה לְהָבִין תֵּכֶף, וּמֵחֲמַת זֶה יִקְשֶׁה לוֹ הַרְבֵּה תֵּכֶף וְלֹא יָבִין כְּלָל, רַק יַכְנִיס מֹחוֹ בְּהַלִּמּוּד, וְיֹאמַר כְּסֵדֶר בִּזְרִיזוּת וּמִמֵּילָא יָבִין", מען זאל נישט ווערן צעבראכן ווען מען זעט אז מען פארשטייט נישט וואס מען לערנט, וואס דאס אליין - אז מען וויל גלייך פארשטיין - מאכט אז עס זאל זיין שווער צו פארשטיין דאס לערנען, נאר מען זאל בלויז זאגן די ווערטער כסדרן, און מען וועט פון זיך אליינס פארשטיין, "וְאִם לֹא יָבִין תֵּכֶף, יָבִין אַחַר כָּךְ, וְאִם יִשָּׁאֲרוּ אֵיזֶה דְּבָרִים, שֶׁאַף עַל פִּי כֵן לֹא יוּכַל לַעֲמֹד עַל כַּוָּנָתוֹ, מַה בְּכָךְ", און אויב מען פארשטייט נישט דעם ערשטן מאל, וועט מען עס פארשטיין ביים צווייטן מאל, און אויב מען וועט נישט פארשטיין דעם צווייטן מאל, איז אויך גארנישט, "כִּי מַעֲלַת רִבּוּי הַלִּמּוּד עוֹלָה עַל הַכֹּל", עיין שם.


אויך זאלסטו זיך מתבודד זיין. זוך א פלאץ וואו קיינער איז נישט דארט און רעד זיך אויס דיין הארץ צום אייבערשטן אויף דיין שפראך, אזוי ווי מען רעדט צו א גוטער פריינט.


דער אייבערשטער זאל העלפן זאלסט האבן הצלחה אין אלע ענינים.

#3349 - וואויל איז דעם וואס שווייגט אפ אויף בזיונות
מחלוקת, וויכוחים, בזיונות, סיפורי צדיקים, חסידות

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


... תחי'


אז אייער שוועסטער טשעפעט אייך וועגן ברסלב, מען שפעט פון היכל הקודש, מען העצט אויף די משפחה קעגן אייך - זאלט איר נישט צוריק טשעפען.


דער רבי האט אונז געלערנט: "ענדערש זיין פון די נרדפים, ווי איידער זיין פון די רודפים", ווייל חכמינו זכרונם לברכה זאגן (שבת פח:): "הַנֶּעֱלָבִים וְאֵינָם עוֹלְבִים", די וואס ווערן פארשעמט און זיי פארשעמען נישט צוריק, "שׁוֹמְעִין חֶרְפָּתָם וְאֵינָן מְשִׁיבִין", זיי הערן ווי מען שענדט זיי און ענטפערן נישט, "עוֹשִׂים מֵאַהֲבָה וּשְׂמֵחִים בְּיִסּוּרִים", זיי דינען דעם אייבערשטן מיט ליבשאפט און פרייען זיך מיט אלעס וואס דער אייבערשטער שטראפט זיי, אויף זיי זאגט דער פסוק (שופטים ה, לא): "וְאוֹהֲבָיו כְּצֵאת הַשֶּׁמֶשׁ בִּגְבוּרָתוֹ", לעתיד לבוא ווען משיח וועט קומען וועלן זיי שיינען דריי הונדערט און דריי און פערציג מאל שטערקער ווי די זון שיינט יעצט.


מוהרא"ש דערציילט, אמאל איז דער טשערינער רב זכרונו לברכה געגאנגען מיט איינעם פון אנשי שלומינו צום הייליגן רבינ'ס ציון, אויפ'ן וועג איז געקומען א מתנגד און געווארפן אויפ'ן טשערינער רב א שטיק צואה. דער טשערינער רב איז געגאנגען מיט א שיינע זיידענע בעקיטשע און די בעקיטשע איז אים פארשמירט געווארן, ער האט זיך אבער נישט וויסנדיג געמאכט פון דעם, ער איז ווייטער געגאנגען כאילו לא הי'. דער אנדערער וואס איז מיטגעגאנגען מיט'ן רב האט זיך אויסגעדרייט צום מתנגד און געשריגן אויף אים "שגץ, שעם זיך, דרך ארץ!" און דער מתנגד האט צוריקגעשריגן וכו', האט דער טשערינער רב אים אנגעכאפט און געזאגט: "שווייג, דאס איז דאך אונזער זאך, דער רבי האט אונז געלערנט מיר זאלן שווייגן", און ער האט צוגעלייגט: "אויב א מענטש שווייגט אפ אויף בזיונות איז ער זוכה צו גאר שיינע זאכן אויף די וועלט".


וואויל איז דעם וואס שווייגט אפ אויף בזיונות.


דער אייבערשטער זאל העלפן איר זאלט האבן הצלחה אין אלע ענינים.


 

#3348 - מאכט נישט קיין שאדן פאר אייער אייגענע שטעטל
שטעטל

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד אנשי שלומינו תלמידי היכל הקודש תושבי ברסלב ליבערטי, ה' עליהם יחיו


איך האב געצאלט שווערע צענדליגער טויזנטער דאלער צוצושטעלן פארקינג ארום די שול, מען זאל נישט פארקן די קארס אויפ'ן ראוד; איך ווייס נישט וויפיל איז די שיעור זיך צו בעטן ביי אנשי שלומינו מען זאל פאלגן און נישט פארקן אויף די ראוד. יעדעס מאל מען שטעלט אפ די קאר אויפ'ן ראוד מאכט איר מיר שאדן, און איר מאכט זיך אליינס שאדן.


נעכטן איז געווען א מיטינג ביי די טאון, מיר ווארטן צו באקומען רשות צו קענען בויען נאך הייזער אין שטעטל און נאך זאכן וואס מיר דארפן רשות, און זיי שטעלן אונז אונטער פיסלעך א גאנצע צייט, זיי טענה'ען אז מיר פאלגן נישט, מיר שטערן די געגנט מיט די טרעפיק ביים שול.


אויך האט איינער אראפגעבראכן די סיינס וואס זיי האבן געלייגט: "נישט פארקן" - דאס רעגט זיי אויף, דאס ברענגט מיר זאלן נישט קענען באקומען רשות אויסצוברייטערן די שטעטל.


איך ווייס נישט וואס צו זאגן, איך ווייס נישט וואס צו שרייבן; איך בעט נאכאמאל: "מאכט מיר נישט שאדן". איך האב ממנה געווען א אינגערמאן וואס פון היינט און ווייטער וועט ער פארקלעבן די פענסטערס פון די קארס וואס וועלן פארקן אויפ'ן ראוד, און אז דו וועסט וועלן וועסטו מיך קענען רופן צו דין תורה.


איך שעם זיך אז איך דארף סטראשען, עס העלפט שוין נישט בעטן.

#3347 - געב גוטע ווערטער פאר דיינע ארבייטער
קאמפלימענטס, פרנסה

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


לכבוד ... נרו יאיר


אז דו ביסט צופרידן פון אן ארבעטער – זאלסטו אים דאס זאגן, מען מוז זאגן פאר א גוטע ארבעטער: "איך בין צופרידן פון דיר", "דו טוסט גוט".


עס איז א רחמנות אויף ארבעטער וואס ארבעטן ביטער שווער, און זיי ווייסן נישט צי מען איז צופרידן פון זיי אדער נישט, זיי דרייען זיך ארום מיט פייגלעך אין קאפ.


רוב בעלי בתים מאכן דעם טעות, מען זאגט נישט פאר גוטע ארבעטער: "איך בין צופרידן פון דיין ארבעט", און אפילו די וואס זאגן - זאגן נישט גענוג; מען האט מורא אז אויב מען וועט זאגן אז מען איז צופרידן - וועט מען בעטן א גרעסערע געהאלט; דאס איז נישט ריכטיג, געהאלט צאלט מען וויפיל עס קומט פאר אזא ארבעט, און גוטע ווערטער מוז מען געבן.


אזוי אויך, אויב איז דא ארבעטער וואס טוען נישט די ארבעט - זאלסטו זיי זאגן. זאג עס שיינערהייט, זאג פאר'ן ארבעטער: "איך האב גארנישט שלעכטס אויף דיר פריוואט, אבער די ארבעט טוסטו נישט", און אז יענער מאכט זיך נישט וויסנדיג - שיק אים לחיים ולשלום.


פארליר זיך נישט, דער אייבערשטער וועט מאכן מיט דיר גרויסע ניסים.

#3346 - מיט'ן צופיל מקרב זיין, קען מען יענעם מרחק זיין
שלום בית, הפצה, זיכוי הרבים, ריבוי אור

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


מרת ...


מוהרא"ש שרייבט איינעם א בריוו: "אז ביי דיר האט אויפגעשיינט דעם רבינ'ס אור, דו זעסט נאר ליכטיגקייט, - דו ווילסט לויפן שרייען אין גאס אזוי ווי רבי נתן האט געוואלט טון, ער האט געוואלט לויפן שרייען 'ווי קען מען שלאפן, ווי קען זיין אז דער רבי איז דא און קיינער ווייסט נישט וכו' וכו'?!' ביז דער רבי האט אים געזאגט, 'שטיי דא, דו וועסט נישט פועל'ן' - מיינט נאכנישט אז דאס האט אויפגעשיינט אויך פאר דיין ווייב; מוהרא"ש שרייבט יענעם: "געב אכטונג ווי אזוי דו רעדסט מיט דיין ווייב, דו זאלסט איר נישט מער מרחק זיין".


דאס זעלבע זאג איך אייך: "אז ביי אייך ברענט א פייער, איר ברענט מיט'ן רבי'ן, מיינט נאכנישט אז אייער מאן האלט דארט"; בעט איך אייך, מאכט אים נישט משוגע, איר מאכט נאר א חורבן; ווייל די וועג ווי אזוי איר רעדט צו אים וועט אים נאר מרחק זיין. דאנקט דעם אייבערשטן אז ער איז שוין אביסל מקורב, געבט אכטונג אים נישט צו דערווייטערן.

#3345 - רעדט מיט חבר'טעס פון נארמאלע זאכן, נישט פון חלומות און דמיונות
חברים, רעדן, דמיונות, חלומות

בעזרת ה' יתברך


יום ב' פרשת מצורע, ג' ניסן, שנת תשפ"ב לפרט קטן


 


מרת ... תחי'


איך האב ערהאלטן אייער בריוו.


רעדט מיט חבר'טעס וואס רעדן נארמאלע זאכן, די וואס רעדן פון חלומות און דמיונות - די וועלן אייך אריינווארפן אין טפשות.


איר ווייסט זיכער וואס רבי נתן פלעגט זאגן ווען מען איז אים געקומען דערציילן חלומות: "זאגט מיר וואס איר טראכט ווען איר זענט אויף", אנשטאט רעדן פון דמיונות, חלומות און חזיונות רעדט פון קלארע זאכן; אז מען חלומ'ט זיך פון צדיקים - איז דאס פאר זיך אליינס גוט, דער רבי האט זייער אויסגעלויבט דער וואס זעט אים אין חלום וכו', אבער דערציילן פאר אנדערע איז טפשות.


עס איז דא גענוג און נאך פרויען צווישן אנשי שלומינו וואס רעדן שיינע זאכן. פון אמונה, פון שמחה, פון התבודדות ותפלה, מעשיות פון צדיקים; אזעלכע פרויען זאלט איר נעמען פאר חבר'טעס.


דער אייבערשטער זאל העלפן איר זאלט האבן הצלחה אין אלע ענינים.

#3344 - גיי נישט אהיים נאר אויב דו ביסט אפגעהיטן
סכנה, אידישע שטוב, מנוולים

בעזרת ה' יתברך


יום א' פרשת מצורע, ב' ניסן, שנת תשפ"ב לפרט קטן


 


לכבוד ... נרו יאיר


אויב דער מניוול איז דארט - זאלסטו נישט אהיים גיין. געב אכטונג אויף דיין לעבן, דו ביסט יונג, ער וועט דיר הרג'ענען דיין לעבן.


עס איז מיר א וואונדער אז דיינע עלטערן נעמען זיך נישט אן פאר דיר, זיי זענען ברוגז אויף דיר אז דו ביסט געגאנגען צו די פאליציי; ווי קען זיין אזא זאך, עלטערן זאלן לאזן זייער קינד גע'שחט'ן ווערן השם ישמרינו?!


גיי נישט אהיים נאר אויב דו ביסט אפגעהיטן.

#3343 - מען מעסט א מענטש לויט וואס ער וויל און בענקט צו זיין
רצונות, התחדשות, חתונה, חתן, כלה

בעזרת ה' יתברך


יום א' פרשת מצורע, ב' ניסן, שנת תשפ"ב לפרט קטן


 


הכלה ... תחי'


אז איר ווילט זיין גוט, איר ווילט זיין וואויל – זענט איר גוט און וואויל; ווייל מען מעסט נישט דעם מענטש לויט זיינע מעשים וואס ער טוט, מען מעסט דעם מענטש לויט זיינע רצונות, מען קוקט וואס דער מענטש וויל זיין, וואס דער מענטש בענקט צו זיין; ווער עס וויל זיין גוט, ווער עס בענקט צו זיין וואויל - דער איז זייער חשוב אויבן אין הימל.


הערט זיך אויף צו צעברעכן, קלאפט זיך נישט אראפ, טאנצט איבער אלעס וואס איר האט געטון ביז אהער, הויבט אן א נייע בלעטל אין לעבן. איר גייט יעצט צו אייער חתונה, פארגעסט וואס איז געווען ביז אהער. דער הייליגער רבי האט אמאל געזאגט פאר א חתן (חיי מוהר"ן, סימן תקפו) חכמינו זכרונם לברכה זאגן (כתובות יז.): "כֵּיצַד מְרַקְּדִין לִפְנֵי הַכַּלָּה", דער רבי האט אים דאס מסביר געווען: "כֵּיצַד 'מְרַקְּדִין וּמְדַלְּגִין' עַל מַה שֶּׁהָיָה לִפְנֵי הַכַּלָּה, הַיְנוּ לִפְנֵי הַחֲתֻנָּה", מרקדים איז טייטשט טאנצן און שפרינגען, מען דארף איבערשפרינגען וואס איז געווען פאר די חתונה; א חתן און כלה דארפן פארגעסן די גאנצע עבר, מען דארף אנהייבן פונדאסניי.


דער אייבערשטער זאל העלפן איר זאלט האבן הצלחה אין אלע ענינים.

#3342 - זיך דערהאלטן טראץ די שווערע ביטערע נסיונות און צרות ויסורים
צרות, התחזקות, הכרת הטוב, זיכוי הרבים, נסיונות

בעזרת ה' יתברך


יום א' פרשת מצורע, ב' ניסן, שנת תשפ"ב לפרט קטן


 


לכבוד מיין טייערער ליבער ... נרו יאיר


איך האב ערהאלטן דיין בריוו.


איך בין דיר זייער מכיר טובה פאר'ן מיך מקרב זיין צום הייליגן רבי'ן. עס איז שוין אריבער כמעט צוואנציג יאר, אבער ביי מיר איז דאס נאך פריש אזוי ווי די מעשה וואלט היינט פאסירט, דו האסט מיר אריינגעשלעפט אין היכל הקודש, האסט מיר געזאגט איך זאל קומען דאווענען אין היכל הקודש; דארט האב איך אנגעהויבן הערן אביסל אמת'ע דיבורים און נאכדעם האב איך באקומען דעם ספר אשר בנחל; דורך דיר האב איך מיין חיים טובים.


איך בעט דיר זייער, שטארק זיך און שטארק דיין ווייב תחי'; דער אייבערשטער וועט מאכן מיט דיר גרויסע ניסים, העיקר מה שקורין זיך דערהאלטן. דאס איז די שיינקייט פון א איד, אפילו עס גייט אריבער אויף אים שווערע ביטערע נסיונות, צרות ויסורים - דאך דערהאלט ער זיך, ער האט נישט קיין קשיות אויפ'ן אייבערשטן.


חכמינו זכרונם לברכה זאגן (בראשית רבה לב, ג) אויפ'ן פסוק (תהלים יא, ה): "'ה' צַדִּיק יִבְחָן', הַיּוֹצֵר הַזֶּה אֵינוֹ בּוֹדֵק קַנְקַנִּים מְרוֹעָעִים", ווען דער טעפער וויל בודק זיין די כלים אויב זיי זענען גענוג שטארק - וועט ער נישט נעמען א שוואכע כלי און קלאפן דערויף ווייל עס וועט זיך צעברעכן, "וּמִי הוּא בּוֹדֵק, בְּקַנְקַנִּים יָפִים", ער נעמט די גוטע שטארקע כלים, "אֲפִלּוּ מֵקִישׁ עֲלֵיהֶם כַּמָּה פְעָמִים אֵינָם נִשְׁבָּרִים", אפילו ער האקט אויף זיי שטארקע קלעפ - צעברעכן זיי זיך נישט, "כָּךְ אֵין הַקָּדוֹשׁ בָּרוּךְ הוּא מְנַסֶּה אֶת הָרְשָׁעִים אֶלָּא אֶת הַצַּדִּיקִים", אזוי אויך, דער אייבערשטער פרובירט נישט די רשעים - נאר די צדיקים, אזוי ווי עס שטייט "ה' צַדִּיק יִבְחָן", דער אייבערשטער פרובירט אויס צדיקים.


נאך זאגן זיי: "הַפִּשְׁתָּנִי הַזֶּה בְּשָׁעָה שֶׁהוּא יוֹדֵעַ שֶׁהַפִּשְׁתָּן שֶׁלּוֹ יָפָה כָּל שֶׁהוּא כּוֹתְשָׁהּ הִיא מִשְׁתַּבַּחַת", ווען מען האט גוטע פלאקס - דעמאלט קען מען דאס גוט אויסקלאפן, עס ווערט בעסער און בעסער, "וְכָל זְמַן שֶׁהוּא מַקִּישׁ עָלֶיהָ הִיא מִשְׁתַּמֶּנֶת", ווי מער מען קלאפט דערויף ווערט עס פעטער, "וּבְשָׁעָה שֶׁהוּא יוֹדֵעַ שֶׁהַפִּשְׁתָּן שֶׁלּוֹ רָעָה, אֵינוֹ מַסְפִּיק לָקוּשׁ עָלֶיהָ אַחַת עַד שֶׁהִיא פּוֹקַעַת", און ווען די פלאקס איז א שוואכע - דעמאלט קלאפט מען נישט אויף דעם, ווייל עס וועט צוגרינד גיין, "כָּךְ אֵין הַקָּדוֹשׁ בָּרוּךְ הוּא מְנַסֶּה אֶת הָרְשָׁעִים אֶלָּא אֶת הַצַּדִּיקִים", אזוי אויך, דער אייבערשטער פרובירט נישט די רשעים - נאר די צדיקים, אזוי ווי עס שטייט: "ה' צַדִּיק יִבְחָן", דער אייבערשטער פרובירט אויס צדיקים.


נאך זאגן זיי: "מָשָׁל לְבַעַל הַבַּיִת שֶׁהָיָה לוֹ שְׁתֵּי פָּרוֹת", עס איז צוגעגליכן צו איינער וואס האט צוויי קוען, "אַחַת כֹּחָהּ יָפֶה וְאַחַת כֹּחָהּ רַע", איין קו איז א שטארקע און איינע איז א שוואכע, "עַל מִי הוּא נוֹתֵן אֶת הָעֹל", אויף וועלכע קו לייגט ער ארויף די שווערע לאסט? "לֹא עַל זֹאת שֶׁכֹּחָהּ יָפֶה", אויף די קו וואס איז שטארק, "כָּךְ הַקָּדוֹשׁ בָּרוּךְ הוּא מְנַסֶּה אֶת הַצַּדִּיקִים, שֶׁנֶּאֱמַר, ה' צַדִּיק יִבְחָן", אזוי טוט דער אייבערשטער, ער פרובירט אויס נאר די צדיקים, ער ווייסט אז זיי האבן כוחות, זיי וועלן נישט צאמפאלן, זיי וועלן בלייבן ביי די אמונה.


דער אייבערשטער וועט דיר העלפן, עס וועט זיך אלעס איבערדרייען לטובה, וועסט נאך זען נחת ביי דיינע קינדער געזונטערהייט.

#3341 - דעם רבינ'ס ספרים ברענגען צוריק צום אייבערשטן
חסידות ברסלב, עבודת השם, ספרי ברסלב

בעזרת ה' יתברך


יום א' פרשת מצורע, ב' ניסן, שנת תשפ"ב לפרט קטן


 


לכבוד ... נרו יאיר


איך פריי זיך זייער צו הערן אז דיין גאנצע לעבן האט זיך דיר געטוישט צום גוטן פון ווען דו האסט זיך דערוויסט פון הייליגן רבי'ן; זייט דו הערסט די שמועסן פון רבי'ן - האסטו אנגעהויבן גיין אין די גוטע וועג, דו האסט אנגעהויבן דינען דעם אייבערשטן, דו האסט אפגעלאזט די נישט גוטע מעשים; ממש אזוי ווי דער רבי האט פאראויס געזאגט. דער הייליגער רבי האט געזאגט (חיי מוהר"ן, סימן שנח): "מיט יעדע שיחה וואס איך שמועס מיט ענק קען מען זיין אן ערליכער איד, און נישט סתם אן ערליכער איד נאר אן ערליכע איד אזוי ווי איך מיין אן ערליכער איד"; רבי נתן זאגט (שם): "וְגַם אֲפִלּוּ עַכְשָׁו כְּשֶׁלּוֹמְדִין דְּבָרָיו הַקְּדוֹשִׁים יֵשׁ לָהֶם גַּם כֵּן כֹּחַ גָּדוֹל לְעוֹרֵר לְהַשֵּׁם יִתְבָּרַךְ לִזְכּוֹת לְדַרְכֵי ה' בֶּאֱמֶת, לְמִי שֶׁיָּשִׂים לִבּוֹ הֵיטֵב לִדְבָרָיו וּלְשִׂיחוֹתָיו הַקְּדוֹשִׁים הַנֶּאֱמָרִים בְּזֶה הַסֵּפֶר, וּבִשְׁאָר סְפָרָיו הַקְּדוֹשִׁים", דעם רבינ'ס ספרים פארמאגן א מורא'דיגן כח צו מעורר זיין א מענטש צו דינען דעם אייבערשטן, אין יעדע שמועס פון רבי'ן ליגן געוואלדיגע עצות און הדרכות פאר'ן לעבן.


מאך זיך א שיעור אין רבינ'ס ספרים - וועסטו טרעפן דארט גוטע עצות און חיזוק ווי אזוי זיך צו דערהאלטן. דער רבי האט געזאגט (חיי מוהר"ן, סימן תצה): "אִלּוּ הָיִינוּ רוֹאִין אוֹצָר הָיִינוּ רָצִים בְּוַדַּאי אֵלָיו, וְהָיִינוּ חוֹפְרִים וּמְלַכְלְכִים עַצְמֵנוּ בְּרֶפֶשׁ וָטִיט בִּשְׁבִיל לַחְתֹּר אַחֲרָיו וּלְמָצְאוֹ", ווען איר וואלט ווען געטראפן אן אוצר, וואלט איר דאך זיכער אהין געלאפן און געגראבן צו זוכן ווי מער מען קען נעמען פונעם אוצר, איר וואלט נישט געקוקט צי איר ווערט שמוציג, נאר איר וואלט אריינגעקראכן אין בלאטע אבי צו נעמען פונעם אוצר, "וַהֲלֹא אֲנִי אוֹצָר שֶׁל יִרְאַת שָׁמַיִם, וּמַדּוּעַ לֹא יִהְיוּ לְהוּטִים וְרָצִים אַחֲרַי לְקַבְּלוֹ", איך בין דאך אן אוצר פון יראת שמים, פארוואס לויפט איר מיר נישט נאך צו נעמען פון מיין אוצר?! וְשָׁאֲלוּ אוֹתוֹ: "אֵיךְ אֶפְשָׁר לְקַבֵּל", האט איינער געפרעגט דעם רבי'ן: "ווי אזוי נעמט מען פון דעם אוצר?" וְהֵשִׁיב: "עִם הַפֶּה וְהַלֵּב צְרִיכִין לַחְתֹּר וּלְבַקֵּשׁ, 'מיט'ן פיסק און מיט'ן הארץ', בְּפִיךָ וּבִלְבָבְךָ לַעֲשׂוֹתוֹ".


דער אייבערשטער זאל העלפן זאלסט האבן הצלחה אין אלע ענינים.

#3340 - זאגט תהלים וועלן אוועק גיין אלע אייערע פחדים
פחדים, תפילות אויף אידיש, תהלים

בעזרת ה' יתברך


ליל שישי פרשת תזריע, ערב ראש חודש ניסן, שנת תשפ"ב לפרט קטן


 


... תחי'


זאגט תהלים וועלן אוועק גיין אלע אייערע פחדים, דער אייבערשטער וועט אייך היטן.


נאכן זאגן תהלים זאלט איר זאגן די ווערטער: "יהי רצון מלפניך, בזכות דעם קאפיטל תהלים בעט איך דיר באשעפער, היט מיך פון שלעכטס; זיי מיט מיר, איך זאל נישט מורא האבן פון קיין שום זאך, איך זאל זיין פרייליך, איך זאל זיין רואיג, יהיו לרצון אמרי פי והגיון לבי לפניך, ה' צורי וגואלי, אמן".


פון דער ראש ישיבה

#3339 - איך פריי זיך אויף די גוטע נייעס אז דו ביסט ארויס פון דיינע חובות
צדקה, מוסדות, חובות

בעזרת ה' יתברך


יום ה' פרשת תזריע, כ"ח אדר ב', שנת תשפ"ב לפרט קטן


 


לכבוד מיין טייערער ... נרו יאיר וזוגתו ... תחי', ברסלב


איך דאנק דיר פאר'ן העלפן צאלן די מלמדים און טיטשערס, איך פריי זיך זייער אז אנשי שלומינו העלפן די אייגענע מוסד, מען העלפט מען זאל קענען באצאלן די מלמדים און טיטשערס פון די אייגענע קינדער.


נאך מער פריי איך זיך אויף די גוטע נייעס אז דו ביסט ארויס פון דיינע חובות, דו האסט די וואך געענדיגט באצאלן אלע דיינע חובות, דו ביסט ארויס פון תפיסה; יעצט וועסטו שוין קענען זיין אן ערליכער איד. דער רבי זאגט (ספר המדות אות תשובה, סימן מו): "מִי שֶׁרוֹצֶה לָשׁוּב, יִזָּהֵר מִלִּהְיוֹת בַּעַל חוֹב", ווער עס וויל תשובה טון זאל זיך אכטונג געבן פון חובות.


איך בין אזוי פרייליך פאר דיר און דיין ווייב, איך האב מיטגעהאלטן ענקערע הונגער יארן, יעצט זענט איר באפרייט; דאנקט און לויבט דעם אייבערשטן פאר אלע חסדים, אייערע קינדער זענען טייער און ליכטיג.


איר זאלט זוכה זיין צום פסח אליינס.


 

#3338 - די שייטל זאל זיין איידל און באשיידן
צניעות, חיזוק פאר פרויען, סגולות, שייטל

בעזרת ה' יתברך


יום ג' פרשת תזריע, כ"ו אדר ב', שנת תשפ"ב לפרט קטן


 


מרת ... תחי' ברסלב, ליבערטי


בלייבט מיט אייער שייטל, נאר בענקט און ווילט זיין ערליך. מוהרא"ש זכותו יגן עלינו האט געזאגט מען מעג גיין מיט א שייטל; מען זאל נאר אכטונג געבן עס זאל זיין איידל און באשיידן.


דאס וואס אייער מאן זאגט אייך, אפשר זיך אנטון א טיכל; ער האט געליינט אין איינע פון די שמועסן אז דאס ברענגט גוטע קינדער, איר פרעגט וואס צו טון; אויב איר וועט בלייבן מיט אייער איידעלע שייטל און איר וועט נישט אוועק מאכן די פרויען וואס גייען אנגעטון מיט א טיכל, איר וועט שעצן צניעות – וועלן אייערע קינדער אויסוואקסן ערליכע אידן.


עס איז גארנישט ווערד ווען מען טוט זיך אן צניעות'דיג און מען וויל נישט אזוי גיין, די קינדער שפירן דאס, זיי כאפן פינקטליך; זיי פארשטייען גאר גוט וואס די עלטערן ווילן.


בלייבט אזוי ווי איר גייט, איך פריי זיך זייער צו האבן אזא חשוב'ע משפחה ביי אונז אין שטעטל.

#3337 - ווי נעמט מען דעם פסח אליינס?
תפילה והתבודדות, מוהרא"ש, סיפורי צדיקים, פסח, ארץ ישראל, חומרות, שבת החודש

בעזרת ה' יתברך


ערב שבת קודש פרשת תזריע-החודש, כ"ט אדר ב', שנת תשפ"ב לפרט קטן


 


לכבוד מיינע טייערע חברים, אנשי שלומינו תלמידי היכל הקודש בארץ ישראל, ה' עליהם יחיו


איך בין נאכנישט צו זיך געקומען פון זיין מיט אייך אין ארץ ישראל, יעדע סעקונדע האט זיך געשפירט אזא זיסע געשמאקע טעם. איך האב אזוי ליב זיך צו טרעפן מיט די חברים אנשי שלומינו אין ארץ ישראל, איך טראכט אסאך פון ענק.


די וואך שבת החודש, שבת ראש חודש, שבת דעם רבינ'ס יום הולדת - איז א גוטע צייט זיך צו באנייען, אנהויבן פון פריש זיין אן ערליכער איד. חכמינו זכרונם לברכה זאגן (ראש השנה יא.): "בניסן נגאלו אבותינו ממצרים", חודש ניסן זענען אונזערע עלטערן ארויס פון מצרים, "ובניסן עתידין ליגאל", און אין חודש ניסן וועלן מיר אויסגעלייזט ווערן; איז דאך יעצט א פאסיגע צייט אויסגעלייזט צו ווערן - יעדער איינער - פון זיין גלות.


ווי אזוי גייט מען ארויס פון גלות מצרים? דורך רעדן צום אייבערשטן, אלע צרות און פראבלעמען איז נאר ווען מען פארגעסט פונעם אייבערשטן; ווען מען געדענקט אז דער אייבערשטער איז דא, דער אייבערשטער מאכט אלעס, ער טוט אלעס, עס איז גארנישט דא אויסער אים - גייען אוועק אלע פראבלעמען, מען ווערט אויסגעלייזט.


א איד איז געקומען פסח צו מוהרא"ש און געקרעכצט: "ווי אזוי איז מען זוכה צום פסח אליינס?" ווייל רבי נתן פלעגט זאגן, אויף פסח וועט זיין געלט, "אויף פסח וועט זיין", עסן אויף פסח וועט זיין, "אבער ווי נעמט מען דעם פסח אליינס?" ווי נעמט מען דעם קדושת הפסח; דער איד האט אזוי געקרעכצט צו מוהרא"ש: "ווי איז מען זוכה צום פסח?" האט אים מוהרא"ש געזאגט שארף און קלאר: "דו ווילסט זוכה זיין צום פסח? עפן דיין מויל און הויב אן רעדן צום אייבערשטן, דו האסט א גרינגע וועג צו קומען צו אלע מדריגות".


א איד דערציילט, ער האט אמאל גערעדט מיט מוהרא"ש, ער האט געבעטן מוהרא"ש זאל אים געבן אן עצה ווי אזוי מען איז זוכה צו קדושה וטהרה, מוהרא"ש איז דעמאלט געשטאנען אינדרויסן פון שטוב און געהאלטן אינמיטן נעמען די פאסט, מוהרא"ש זאגט אים: "קוק איך וועל דיר ווייזן אין די פאסט ווי אזוי מען איז זוכה צו קדושה וטהרה", ער נעמט ארויס די פאסט, דארט איז געלעגן א הזמנה פאר א חתונה, מוהרא"ש עפנט עס אויף און ווייזט אים: "קוק וואס מען שרייבט דיר, 'קידושא רבה אחר התפילה' מען איז זוכה צו קדושה רבה נאכן דאווענען"; אז מען בעט דעם אייבערשטן, מען עפנט די מויל און מען שעפשעט א תפילה: "רבונו של עולם העלף מיר, איך וויל זיין ערליך, איך וויל זיין הייליג, איך וויל זיין אפגעהיטן" - דאס ברענגט צו די גרעסטע קדושה.


מאכט זיך נישט נאריש מיט חומרות, ברענגט אריין דעם פסח מיט שמחה און דביקות אינעם אייבערשטן, דער רבי האט נישט געוואלט מיר זאלן עוסק זיין אין חומרות אפילו פסח. ברענגט אריין דעם פסח מיט שמחה, און בעטס דעם אייבערשטן איר זאלט האבן א שיינעם פסח, איר זאלט ניצול ווערן פון חמץ.


מוהרא"ש פלעגט דערציילן יעדעס יאר פסח די מעשה פון רבי דוד ממיקולייב זכר צדיק לברכה, א תלמיד פון בעל שם טוב זכותו יגן עלינו, וואס האט זיך אונטערגענומען צו מאכן וויין פאר'ן הייליגן בעל שם טוב. ער האט עס אליינס געמאכט מיט אלע חומרות, מיט אלע ענינים און מיט אלע בחינות וכו' וכו'. אויפ'ן וועג אהיים האט מען אים אפגעשטעלט ביים גרעניץ, ר' דוד האט זייער געהאפט אז מען גייט נישט עפענען דעם טייערן פאס, אבער צו זיין גרויס ווייטאג האט דער גרעניץ וועכטער געעפנט די וויין און עס געמאכט יין נסך. למעשה איז ער צוריקגעקומען צום הייליגן בעל שם טוב מיט ליידיגע הענט און ער איז געווען זייער צעבראכן פארוואס דאס האט פאסירט, האט אים דער הייליגער בעל שם טוב געזאגט: "האסטו געבעטן דעם אייבערשטן אז אלעס זאל זיך אויסארבעטן לטובה?" האט ער געענטפערט פאר'ן הייליגן בעל שם טוב אז ער האט טאקע אינגאנצן פארגעסן צו בעטן דעם אייבערשטן.


א פרייליכן שבת און א גוטן חודש.

#3336 - מסיים געווען די פערטע מאל ששה סדרי משנה
סיום, משניות, סדר דרך הלימוד, לימוד התורה, מנהגים, תיקון חצות, שמיטה

בעזרת ה' יתברך


יום ה' פרשת תזריע, כ"ח אדר ב', שנת תשפ"ב לפרט קטן


 


לכבוד ... נרו יאיר, ירושלים


איך האב ערהאלטן דיין בריוו.


איך פריי זיך זייער צו הערן אז דו לערנסט אויפ'ן סדר דרך הלימוד פון הייליגן רבי'ן (כמבואר בשיחות הר"ן, סימן עו); דו האסט מסיים געווען די פערטע מאל ששה סדרי משנה.


שטארק זיך און זיי ממשיך מיט'ן לערנען משניות, אזוי אויך זאלסטו לערנען מקרא, גמרא, הלכה און מדרש. ביי אלע שיעורים זאלסטו זיך נישט אפשטעלן אויב דו פארשטייסט נישט, נאר לערנען אזוי ווי דער רבי האט אונז געלערנט.


עס איז כדאי דו זאלסט אריין קוקן אין שיחות הר"ן (סימן עו), דער לשון פון הייליגן רבי'ן: "שֶׁאֵין צְרִיכִין בְּלִמּוּד", מען דארף נישט ביים לערנען, "רַק הָאֲמִירָה לְבַד, לוֹמַר הַדְּבָרִים כְּסֵדֶר וּמִמֵּילָא יָבִין", נאר זאגן די ווערטער פון די הייליגע תורה, און צום סוף וועט מען פארשטיין. "וְלֹא יְבַלְבֵּל דַּעְתּוֹ בִּתְחִלַּת לִמּוּדוֹ שֶׁיִּרְצֶה לְהָבִין תֵּכֶף, וּמֵחֲמַת זֶה יִקְשֶׁה לוֹ הַרְבֵּה תֵּכֶף וְלֹא יָבִין כְּלָל, רַק יַכְנִיס מֹחוֹ בְּהַלִּמּוּד, וְיֹאמַר כְּסֵדֶר בִּזְרִיזוּת וּמִמֵּילָא יָבִין", מען זאל נישט ווערן צעבראכן ווען מען זעט אז מען פארשטייט נישט נאר זאגן די ווערטער כסדרן און מען וועט פון זיך אליינס פארשטיין, "וְאִם לֹא יָבִין תֵּכֶף, יָבִין אַחַר כָּךְ, וְאִם יִשָּׁאֲרוּ אֵיזֶה דְּבָרִים, שֶׁאַף עַל פִּי כֵן לֹא יוּכַל לַעֲמֹד עַל כַּוָּנָתוֹ, מַה בְּכָךְ", און אויב מען פארשטייט נישט דעם ערשטן מאל וועט מען עס פארשטיין ביים צווייטן מאל, און אויב מען וועט נישט פארשטיין דעם צווייטן מאל איז אויך גארנישט, "כִּי מַעֲלַת רִבּוּי הַלִּמּוּד עוֹלָה עַל הַכֹּל, וּכְמוֹ שֶׁאָמְרוּ רַבּוֹתֵינוּ זִכְרוֹנָם לִבְרָכָה: 'לִגְּמוֹר וַהֲדַר לִסְבֹּר, וְאַף עַל גַּב דְּלָא יָדַע מַה קָאָמַר' שֶׁנֶּאֱמַר: 'גָּרְסָה נַפְשִׁי לְתַאֲבָה'", ווייל די מעלה פון לערנען אסאך שטייגט אלעס איבער, אזוי ווי חכמינו זכרונם לברכה זאגן (עבודה זרה יט.) אז א מענטש זאל קודם אסאך זאגן די ווערטער פון די הייליגע תורה אפילו ער פארשטייט נישט וואס ער לערנט און דערנאך זאל ער לערנען צו פארשטיין, "כִּי עַל יְדֵי רִבּוּי הַלִּמּוּד, שֶׁיִּלְמַד בִּמְהִירוּת וְיִזְכֶּה לִלְמֹד הַרְבֵּה, עַל יְדֵי זֶה יִזְכֶּה לַעֲבֹר כַּמָּה פְּעָמִים אֵלּוּ הַסְּפָרִים שֶׁלּוֹמֵד, לְגָמְרָם, וְלַחֲזֹר לְהַתְחִיל וּלְגָמְרָם פַּעַם אַחַר פַּעַם, וְעַל יְדֵי זֶה מִמֵּילָא יָבִין וכו'", אז מען געוואוינט זיך צו צו לערנען שנעל קען מען זוכה זיין צו לערנען זייער אסאך, ווייל אזוי איז מען זוכה איבערצוגיין יעדע זאך זייער אסאך מאל, ביז מען איז זוכה צו פארשטיין וואס מען לערנט.


בנוגע זאגן תיקון חצות אין שנת השמיטה; מוהרא"ש זאגט אז אונזער מנהג איז יא צו זאגן.


דער אייבערשטער זאל העלפן זאלסט האבן הצלחה אין אלע ענינים.


 

#3335 - די טעלעפאן הרג'עט דיר
טעלעפאן

בעזרת ה' יתברך


יום ד' פרשת תזריע, כ"ז אדר ב', שנת תשפ"ב לפרט קטן


 


לכבוד ...


קוקן אויפ'ן טעלעפאן א גאנצן טאג און א גאנצע נאכט מאכט קראנק דעם מענטש, עס נעמט אוועק די גאנצע טעם פון לעבן.


בעט דעם אייבערשטן ער זאל דיר אויסלייזן פון דיין גלות פון קוקן מאוויס, סטעטו"ס, וכדומה לזה.


ביסט א טייער קינד, נאר די טעלעפאן הרג'עט דיר.

#3334 - איך האב נישט געקענט אנקומען צו אייער חתונה
חתונה, שמחות, ברכות

בעזרת ה' יתברך


יום ג' פרשת תזריע, כ"ו אדר ב', שנת תשפ"ב לפרט קטן


 


מזל טוב ... נרו יאיר! מזל טוב ... תחי'!


איך האב זייער געוואלט זיין ביי ענקער חתונה, איך האב געהאט געמאכט אלע פלענער צו זיין ביי די חתונה; למעשה האט זיך דאס נישט אויסגעארבעט, איך בין געבליבן שטעקן אין יבנאל ביי א שמחה פון א וואך נאכט, פון דארט בין איך געלאפן גלייך צום לופטפעלד.


א ברכה אבער קען איך נאך געבן, און דאווענען פאר ענקער הצלחה וועל איך ווייטער; דער אייבערשטער זאל העלפן איר זאלט אויפשטעלן א בית נאמן בישראל, ליכטיגע אידישע דורות, נאמנים לה' ולתורתו.

#3333 - מיין ישיבה און כולל איז דער סדר דרך הלימוד
כולל, חסידות ברסלב, וויכוחים, סדר דרך הלימוד, לימוד התורה, תכלית, ישיבה

בעזרת ה' יתברך


יום ג' פרשת תזריע, כ"ו אדר ב', שנת תשפ"ב לפרט קטן


 


לכבוד ... נרו יאיר, צפת


איך האב ערהאלטן דיין בריוו.


וואויל איז דיר אז דו לערנסט אויפ'ן סדר דרך הלימוד (כמבואר בשיחות הר"ן, סימן עו). איך האב זייער הנאה געהאט דיר צו זען פנים בפנים אין ארץ ישראל, איך האב הנאה אז דו נוצט אויס דיינע יונגע יארן. דו האסט נישט קיין ישיבה, דו דארפסט נישט קיין ישיבה; דיין ישיבה איז דער סדר דרך הלימוד פון רבי'ן. מוהרא"ש פלעגט זאגן: "מיין ישיבה איז סדר דרך הלימוד, מיין כולל איז סדר דרך הלימוד", מען קען דאס נישט מסביר זיין פאר דער וואס האט דאס נאכנישט טועם געווען.


טענה נישט מיט קיינעם, ובעיקר מיט די וואס פאררופן זיך ברסלב'ע. קוק וואס מוהרא"ש זכרונו לברכה שרייבט אין די צוואה (צוואת מוהרא"ש, אות יג): "וּכְשֶׁתַּגִיעוּ לְעוֹלָם הָאֱמֶת אָז תִּיוָכְחוּ צִדְקַת 'סֵדֶר דֶּרֶך הַלִימוּד' שֶׁל רַבֵּינוּ זַ"ל", ווען איר וועט ארויפקומען אויף יענע וועלט וועט איר זיך איבערצייגן די ווארהייט פונעם הייליגן רבינ'ס סדר דרך הלימוד; "וְעַל כֵּן מַה וְלָמָּה לָכֶם לְהִתְוַכֵּחַ?! טַעֲמוּ וּרְאוּ כִּי טוֹב הַשֵּׁם, הַרְגִילוּ עַצְמְכֶם לָזֶה וְאָז תִּרְאוּ וְתִּרְגְשׁוּ כָּל מִינֵי טַעֲמִים בְּחַיֵּיכֶם", דעריבער זאלט איר זיך נישט טענה'ען מיט קיינעם, נאר געוואוינט אייך צו צו לערנען לויט דעם סדר דרך הלימוד, דעמאלט וועט איר זען און שפירן אלע טעמים אויף די וועלט, "כִּי הַתּוֹרָה הִיא חִיוּתֵנוּ בָּעוֹלָם הַזֶה וּבָעוֹלָם הַבָּא, חִיוּת גַּשְׁמִי וְחִיוּת רוּחְנִי", ווייל די תורה איז אונזער לעבן אויף די וועלט און אויף יענע וועלט, די תורה געבט אונז לעבן סיי בגשמיות און סיי ברוחניות, "אַשְׁרֵי מִי שֶׁאֵינוֹ מַטְעֶה עַצְמוֹ בָּזֶה הָעוֹלָם כְּלָל, וְיוֹדֵעַ אֲשֶׁר עִיקָר הַלִימוּד הוּא רַק לַעֲשׂוֹת רְצוֹנוֹ יִתְבָּרַךְ וְלוֹמֵד עַל מְנָת לְקַיֵים מִצְווֹתָיו יִתְבָּרַךְ וְלַעֲשׂוֹת נַחַת רוּחַ לוֹ יִתְבָּרַךְ", וואויל איז דעם מענטש וואס לאזט זיך נישט נארן און ווייסט אז דער עיקר לימוד התורה איז צו טון דעם רצון פונעם אייבערשטן, עיין שם.


דער אייבערשטער זאל העלפן זאלסט האבן הצלחה אין אלע ענינים.

#3332 - בעטן דעם אייבערשטן צו טרעפן די ריכטיגע וועג אין די תורה
שלום בית, חיזוק פאר פרויען, עבודת השם, הדרכות

בעזרת ה' יתברך


יום ג' פרשת תזריע, כ"ו אדר ב', שנת תשפ"ב לפרט קטן


 


מרת ... תחי'


איך האב ערהאלטן אייער בריוו.


עס איז נישט גרינג צו שרייבן פון דעם ענין, איך וועל פרובירן ווארפן רמזים, איך האף צום אייבערשטן איר וועט פארשטיין וואס א איד האט צו טון און ווי אזוי דער אייבערשטער האט באשאפן די וועלט, ווי אזוי מען זאל לעבן.


מען קען זיך נישט פארשטעלן דאס גרויסקייט פון א פרוי וואס איז שטענדיג גרייט פאר איר מאן, ווער רעדט נאך אויב זי גייט אים אנטקעגן, זי ווייזט אים ליבשאפט. אזוי ווי די הייליגע חכמים זאגן אונז (עירובין ק:): "אָמַר רֶבִּי שְׁמוּאֵל בַּר נַחְמֵנִי אָמַר רֶבִּי יוֹחָנָן, כָּל אִשָׁה שֶׁתּוֹבַעַת בַּעְלָהּ לִדְּבַר מִצְוָה הַוְיָן לָהּ בָּנִים שֶׁאֲפִלּוּ בְּדוֹרוֹ שֶׁל משֶׁה לֹא הָיוּ כְּמוֹתָן", א פרוי וואס ווייזט ליבשאפט פאר איר מאן וועט זוכה זיין צו הייליגע קינדער, אזוי ווי מיר געפונען ביי לאה, זי איז געקומען בעטן יעקב ער זאל קומען ביי איר שטוב וכו' - האט זי זוכה געווען דעמאלט צו יששכר, וואס ביי זיי שטייט (דברי הימים-א יב, לג): "וּמִבְּנֵי יִשָּׂשְׂכָר יוֹדְעֵי בִינָה לַעִתִּים, לָדַעַת מַה יַּעֲשֶׂה יִשְׂרָאֵל".


עס איז זייער שווער צו שרייבן פון דברים של בינו לבינה, זוכט אויף צווישן אנשי שלומינו אן ערליכע פרוי וואס וועט אייך מדריך זיין מיט די ריכטיגע השקפה. ליידער לערנט מען מיט חתנים און כלות פאלשע וועגן, מען רעדט איין חומרות ופרישות. חתן כלה גייען צו די חתונה מיט נערווען און שרעק, מען שרעקט אן מיט נישט ערליכע קינדער וכו' וכו', דאס איז גורם אלע פראבלעמען. מיר האבן אין אמעריקע ערליכע כלה טיטשערס וואס זיי לערנען אזוי ווי צדיקים האבן געהייסן לערנען.


בענין וואס איר שרייבט אז איר שפירט נישט קיין שום טעם אין די זאך וכו', איר טוט דאס אן א טעם וכו'; דאס איז נישט קיין פראבלעם, העכסטנס וועט איר באקומען מער שכר. ווייל ווען מען טוט א מצוה און עס קומט אן שווער באקומט מען מער שכר, אזוי ווי די הייליגע חכמים זאגן (אבות ה, כג): "לְפוּם צַעֲרָא אַגְרָא", לויט די שוועריקייט - באקומט מען די שכר, און אז עס קומט אייך אן דאס זיין מיט אייער מאן אזוי שווער - וועט איר באקומען גאר אסאך שכר.


דער אייבערשטער זאל העלפן מיר זאלן נישט דארפן קיין שכר, מיר זאלן וועלן נאר טון דעם אייבערשטנ'ס ווילן. ווען מען טוט א מצוה איז דא צוויי סארט מענטשן, איינער טוט די מצוה געצווינגענערהייט (נישט ממש געצווינגען, נאר אן א טעם), דער ווארט אויף שכר, ער טוט דאס נאר כדי צו באקומען שכר פאר די מצוה. נאכדעם איז דא איינער וואס טוט די מצוה ווייל דער אייבערשטער האט געהייסן, ער פריידט זיך אז ער קען טון רצון השם, ער דארף נישט קיין שכר, ער דארף דעם (אבות ד, ב): "שְׂכַר מִצְוָה, מִצְוָה", אזוי ווי דער רבי זאגט (לקוטי מוהר"ן חלק א', סימן ה): "עַד שֶׁאֵין רוֹצֶה בְּשׁוּם שְׂכַר עוֹלָם הַבָּא, אֶלָּא הוּא רוֹצֶה שֶׁיַּזְמִין לוֹ הַקָּדוֹשׁ בָּרוּךְ הוּא מִצְוָה אַחֶרֶת בִּשְׂכַר מִצְוָה זֹאת", אזוי ווי די הייליגע חכמים זאגן (אבות ד, ב): "'שְׂכַר מִצְוָה, מִצְוָה'; כִּי הוּא נֶהֱנֶה מֵהַמִּצְוָה בְּעַצְמָהּ", ער וויל די מצוה אליינס.


נאכאמאל, עס איז שווער צו שרייבן בפרטיות; מען דארף בעטן דעם אייבערשטן צו טרעפן די ריכטיגע וועג אין די תורה, טון וואס די הייליגע חכמים זאגן (תנא דבי אליהו רבא, פרק ט): "אֵיזוֹהִי אִשָׁה כְּשֵׁרָה, כָּל שֶׁעוֹשָׂה רְצוֹן בַּעֲלָהּ", וואס איז אן ערליכע פרוי? א פרוי וואס טוט די ווילן פונעם מאן; איך האף איר וועט ארויסנעמען רמזים און וויסן ווי אזוי צו זיין אן אשה כשרה.


דער אייבערשטער זאל העלפן איר זאלט האבן הצלחה אין אלע ענינים.

#3331 - אפגעשוירן די האר, א קרבן פאר'ן אייבערשטן
קינדער, חיזוק פאר פרויען, תהלים, שערן די האר

בעזרת ה' יתברך


יום א' פרשת שמיני, י"ז אדר ב', שנת תשפ"ב לפרט קטן


 


מרת ... תחי'


אייער מאן נרו יאיר האט מיר דערציילט פון אייער מסירות נפש, איר האט זיך אפגעשוירן אייער האר, איר האט געברענגט א קרבן פאר'ן אייבערשטן. פאר אייך איז דאס ממש מסירות נפש, אייער שוועסטער שערט זיך נישט, עס איז אייך געווען א שווערע זאך צו טון, דאך האט איר געטון די ווילן פונעם אייבערשטן, איר טוט וואס די הייליגע צדיקים זאגן.


בזכות די מסירות נפש וועט איר זוכה זיין צו קינדער צדיקים, איר וועט זוכה זיין אז די שכינה הקדושה וועט רוען ביי ענק אין שטוב.


זאגט יעדן טאג אביסל תהלים.