בעזרת ה' יתברך
ערב שבת קודש פרשת בהעלותך, י"ח סיון, שנת תשע"ט לפרט קטן
לכבוד מיין טייערער ליבער ... נרו יאיר, מנהל מוסדות ברסלב בארה"ב.
ברוך הבא בשם ה' ברכנוכם מבית ה'! אשריך ואשרי חלקך אז דו האסט זיך ארויסגעצויגן קיין קרית ברסלב, ליבערטי.
דו ביסט פון די עשרה ראשונים אינעם שטעטל וואו מיר וועלן אויפשטעלן א שיינעם קריה על שם רבינו ז"ל.
דארט וועלן מיר מחנך זיין אונזערע קינדער בקדושה ובטהרה בשלוות הנפש.
א פרייליכן שבת.
וואונטשט דיין ראש ישיבה.
...
בעזרת ה' יתברך
יום ה' פרשת בהעלותך, י"ז סיון, שנת תשע"ט לפרט קטן
מרת ... תחי'.
איך האב ערהאלטן דיין בריוו.
איך פריי זיך זייער צו הערן אז דו לעבסט אפן מיט דיין מאן נרו יאיר און דו האסט אראפגענומען פון זיך דעם טאפלט'ן לעבן וכו'; יעצט וועט דיר זיין גרינגער דאס לעבן בכלל און בפרט צו קענען בייקומען אלע שווערע נסיונות. יעצט וועט ענקער שלום בית ווערן בעסער און בעסער ווען דו וועסט נישט לעבן א טאפלטע לעבן.
בנוגע דיין עדיקשן וואס דו ביסט צוגעקלעבט צו קוקן מאווי"ס השם ישמרינו; אויף דעם איז נאר דא איין עצה - די עצה פון התבודדות, צו בעטן דעם אייבערשטן יעדן טאג ער זאל דיר ארויס נעמען פון די תאוה.
אפילו דו ווילסט נישט בעטן אויף דעם, אזוי ווי דו שרייבסט אינעם בריוו אז דו ווילסט אפילו נישט בעטן אויפצוהערן קוקן מאוויס; דאס איז נישט אמת, ווייל באמת ווילסטו טון וואס דער אייבערשטער זאגט און וואס די תורה זאגט, נאר וויבאלד דו האסט זיך צוגעוואוינט צו קוקן אין דיינע יונגע יארן וכו' איז דיר זייער שווער דאס אפצולאזן, אבער באמת ווילסטו א גוט לעבן, א זיס לעבן און ערליכע קינדער, וואס דאס קומט בזכות דעם וואס מען פירט זיך ערליך. אזוי ווי חכמינו זכרונם לברכה זאגן (נדרים כ.) אז אויב מען קוקט אויף עבירות: "הַוְיָין לוֹ בָּנִים שֶׁאֵינָן מְהוּגָנִין", וועט מען האבן קינדער וואס זענען נישט ערליך; דערפאר זאלסטו בעטן יעדן טאג דעם אייבערשטן אז דו זאלסט האבן כח דאס אפצולאזן.
איך שרייב דיר דא א קליינע תפילה וואס דו זאלסט זאגן יעדן טאג:
"הֵיילִיגֶער בַּאשֶׁעפֶער אִיךְ דַאנְק דִיר פַאר מַיין שֵׁיינֶע לֶעבְּן וָואס דוּ הָאסְט מִיר גֶעגֶעבְּן; הֶעלְף מִיר אִיךְ זָאל זַיין פְרֵיילִיךְ אוּן שְׁפִּירְן שְׁטֶענְדִיג וִוי דוּ בִּיסְט מִיט מִיר, הֶעלְף מִיר אִיךְ זָאל זוֹכֶה זַיין צוּ זֶען עֶרְלִיכֶע דוֹרוֹת, קִינְדֶער וָואס וֶועלְן דִיר דִינֶען.
הֵיילִיגֶער בַּאשֶׁעפֶער הֶעלְף מִיר אִיךְ זָאל קֶענֶען פְרֵיילִיךְ מַאכְן מַיין מַאן, עֶס זָאל זַיין נָאר לִיבְּשַׁאפְט צְוִוישְׁן מִיר אוּן מַיין מַאן. הֶעלְף מִיר אִיךְ זָאל אוֹיפְהֶערְן קוּקְן מָאוִויס, עֶס צִיעֶט מִיר שְׁטֶענְדִיג צוּ קוּקְן נָאךְ אוּן נָאךְ, אִיךְ בִּין זֵייעֶר צוּגֶעקְלֶעבְּט צוּ דֶעם, הֶעלְף מִיר אִיךְ זָאל דָאס אָפְּלָאזְן אוּן אַיינְזֶען דִי נַארִישְׁקַייט פוּן קוּקְן מָאוִויס.
אֵייבֶּערְשְׁטֶער זַיי מִיר מוֹחֵל אוֹיף אַלֶעס וָואס אִיךְ הָאבּ גֶעקוּקְט בִּיז אַהֶער, אִיךְ בִּין נִישְׁט שׁוּלְדִיג, קֵיינֶער הָאט מִיר נִישְׁט גֶעזָאגְט אִין מַיינֶע יוּנְגֶע יָארְן וִוי שֶׁעדְלִיךְ דָאס אִיז, אִיךְ הָאבּ זִיךְ צוּגֶעוואוֹינְט אַלְץ יוּנְגֶע מֵיידְל צוּ קוּקְן אוּן יֶעצְט אִיז מִיר זֵייעֶר שְׁוֶוער זִיךְ אָפְּצוּלָאזְן פוּן דֶעם, בֶּעט אִיךְ דִיר אֵייבֶּערְשְׁטֶער זַיי נִישְׁט בְּרוֹגֶז אוֹיף מִיר, אִיךְ גֵיי פְּרוּבִּירְן דָאס בֶּעסְטֶע וָואס אִיךְ קֶען אוּן הֶעלְף מִיר אִיךְ זָאל אָנְהֵייבְּן לֶעבְּן אַ פְרֵיילִיכֶע לֶעבְּן".
זע צו האבן א שיעור אין רבינ'ס ספרים; מאך זיך א שיעור אין ספר אשר בנחל אין אידיש, אדער אין ספר עצתו אמונה וואס איז צוזאמגענומען פון רבינ'ס ספרים עצות און חיזוק זיך צו שטארקן צו זיין א איד. דער רבי זאגט (חיי מוהר"ן, סימן שמט): "שֶׁיְּכוֹלִין לִהְיוֹת נַעֲשֶׂה בַּעַל תְּשׁוּבָה גָּמוּר עַל יְדֵי לִמּוּד הַסֵּפֶר שֶׁלּוֹ", מען קען ווערן א גרויסער בעל תשובה אז מען לערנט זיין ספר, "וְאָמַר, שֶׁמִּי שֶׁיֵּשֵׁב וְיַעֲסֹק בִּסְפָרָיו, רַק בְּלִי קִנְטוּר וְנִצָּחוֹן, וְיִסְתַּכֵּל בּוֹ בֶּאֱמֶת, אָז בְּוַדַּאי יִהְיוּ נִבְקָעִין אֶצְלוֹ כָּל גִּידֵי קַשְׁיוּת לְבָבוֹ", נאך האט דער רבי געזאגט, אז ווער עס וועט לערנען זיין ספר מיט אן אמת וועט זיך אים עפענען אלע זיינע פארשטאפטע אדערן.
בעזרת ה' יתברך
יום ד' פרשת בהעלותך, ט"ז סיון, שנת תשע"ט לפרט קטן
לכבוד ... נרו יאיר.
איך האב ערהאלטן דיין בריוו.
דיין ווייב תחי' וויל צוריק גיין וואוינען נעבן איר משפחה ווייל זי איז נישט פרייליך, זי איז איבערגעשטרענגט מיט די קינדער וכו'; מאך פרייליך דיין ווייב וועט זי מסכים זיין צו בלייבן וואוינען אין... חכמינו זכרונם לברכה זאגן (קידושין לד:): "אִשָּׁה - בַּעֲלָהּ מִשַּׂמְחָהּ", דאס איז דער ארבעט פונעם מאן - פרייליך מאכן די ווייב.
חוץ מזה וועסטו פארדינען אויך אין פרנסה, אזוי ווי רבא האט געזאגט פאר די מענטשן פון די שטאט מחוזא (בבא מציעא נט.): "אוֹקִירוּ לִנְשַׁיְכוּ, כִּי הֵיכִי דְּתִתְעַתְרוּ", זייט מכבד אייערע ווייבער וועט איר ווערן רייך; אז דו וועסט איר פרייליך מאכן, דו וועסט רעדן שיין צו איר וועט זי מסכים זיין צו בלייבן מיט דיר וואוינען וואו דו ווילסט.
דער אייבערשטער זאל העלפן זאלט מצליח זיין אין אלע דיינע וועגן.
בעזרת ה' יתברך
ערב שבת קודש פרשת בהעלותך, י"ח סיון, שנת תשע"ט לפרט קטן
לכבוד ... נרו יאיר.
איך האב ערהאלטן דיין בריוו.
איך האף אז דו האסט הנאה פון די סעט "אשר בנחל" וואס איך האב דיר געגעבן; דארט וועסטו טרעפן תשובות אויף אלע דיינע ספיקות און פראגעס. עס איז ממש ווי דו שרייבסט אז 'אשר בנחל' באטרעפט (קהלת י, יט): "יַעֲנֶה אֶת הַכֹּל"; אלעס שטייט דארט, דורך דעם ספר ווערט מען קלאר און מען טרעפט תשובות אויף אלע ספיקות.
מוהרא"ש האט געזאגט אז ער פלעגט זען ווי יונגעלייט זוכן פאר'ן דאווענען אין חסידי'שע ספרים שטיקלעך וואס וועט זיי דערווארעמען דאס הארץ צו דאווענען בכוונה, ער האט געזען ווי מען מישט אהער און מען מישט אהין, מען נעמט איין ספר און נאכדעם נאך א ספר, ביז מען גייט דאווענען אינגאנצן צעבראכן. האט מוהרא"ש געזאגט: 'איך וועל ארויס געבן ספרים וואס מען וועט נישט דארפן מישן אהין און אהער, נאר וואו אימער מען וועט עפענען וועט מען גלייך טרעפן א שטיקל וואס מען וועט ווערן דורכדעם צוגעקלעבט צום אייבערשטן', אזוי ווי דו שרייבסט אינעם בריוו אז 'אשר בנחל' באטרעפט (תהלים קיח, ח): "טוֹב 'לַחֲסוֹת בַּיהוה מִבְּטֹחַ' בָּאָדָם"; דאס איז בקיצור די זיבציג טויזנט בריוו פון 'אשר בנחל' און פון די אכט הונדערט בריוו אין אידיש: 'טוֹב לַחֲסוֹת בַּה' מִבְּטֹחַ בָּאָדָם', מען זאל זיך פארלאזן אויפן אייבערשטן און נישט אויף א מענטש, ווייל ווען מען פארלאזט זיך אויף א מענטש ווערט מען נאכדעם זייער אנטוישט ווען מען זעט אז יענער קען נישט העלפן.
מוהרא"ש שרייבט פאר איינעם אין 'אשר בנחל': "אויבן אין הימל לאכט מען פון דיר אז דו ביסט צעבראכן ווען דו קענסט ווען לערנען אשר בנחל וואס דאס וועט דיר ארויסנעמען פון דיין צעבראכענקייט"; ווייל ווער עס לערנט דעם ספר 'אשר בנחל' הייבט אן לעבן מיט'ן אייבערשטן, ער זעט אין יעדע זאך דעם אייבערשטן און עס איז מער נישט דא ביי אים קיין שלעכטס, נאר אלעס וואס גייט אריבער אויף אים איז גוט, ממש אזוי ווי דו שרייבסט אז 'אשר בנחל' באטרעפט (קהלת ח, ה): "לֹא יֵדַע דָּבָר רָע"; ווי מער מען לערנט דאס, אלץ מער ווערט מען קלאר אין די אמונה.
נישט קיין חילוק וואו א מענטש איז, אין וועלכע מצב ער געפונט זיך - קען ער זיך טרעפן אין דעם ספר 'אשר בנחל'. עס איז ממש ווי דער רבי זאגט (ליקוטי מוהר"ן, חלק א, סימן עח) אז דער דיבור פונעם מענטש ווערט אנגערופן 'אם הבנים', ווי א מאמע וואס גייט אלעמאל נאך איר קינד און אפילו ווען דאס קינד פארשמירט זיך וועט די מאמע דאס קיינמאל נישט אפלאזן, אזוי ווי עס שטייט אין פסוק (ירמיהו לא, יט): "כִּי מִדֵּי דַבְּרִי בּוֹ, זָכֹר אֶזְכְּרֶנּוּ עוֹד"; דו שרייבסט אז די ווערטער "זָכֹר אֶזְכְּרֶנּוּ עוֹד" באטרעפט פונקט ווי 'אשר בנחל', דאס איז ממש אזוי, ווייל דער ספר 'אשר בנחל' וועקט אויף דעם מענטש ער זאל רעדן צום אייבערשטן און טראכטן פונעם אייבערשטן.
וואס זאל איך דיר זאגן, זייט איך האב זוכה געווען צו מקורב ווערן צום הייליגן רבי'ן דורך דעם ספר הקדוש אשר בנחל (חלק כז) האט זיך מיין לעבן געטוישט; מיינע אלע דיבורים און חיזוקים נעם איך פון די הייליגע בריוון, און איך האב צוגעזאגט פאר'ן אייבערשטן אז איך וועל דאס דרוקן נאכאמאל און נאכאמאל אן קיין אויפהער.
דער אייבערשטער זאל העלפן מיר זאלן שוין זוכה זיין צו משיח צדקינו וואס וועט צוזאמנעמען אלע אידן, "כל ישראל", איז בגיגמטריא 'אשר בנחל' און אונז אויסלייזן פון גלות.
בעזרת ה' יתברך
ערב שבת קודש פרשת בהעלותך, י"ח סיון, שנת תשע"ט לפרט קטן
לכבוד ... נרו יאיר.
איך האב זיך נאכגעפרעגט אויף וכו', עס איז זייער א גוטע זאך; לדעתי זאלסטו גיין צום שידוך, דער אייבערשטער זאל דיר באגלייטן אויף טריט און שריט.
אחי היקר, שטארק זיך און שטארק אנדערע מיט די עצות פון רבי'ן. דער הייליגער רבי זאגט (עיין שיחות הר"ן, סימן ג; אשר בנחל ח' תקע"ח): "גאט איז גרויס, גרויס, גרויס, מען ווייסט גארנישט"; מיר ווייסן נישט דעם אייבערשטנ'ס דרכים, א מענטש קען צומאל טראכטן: 'פארוואס דארף אזוי זיין?!' 'פארוואס דארף איך דאס דורכגיין?' 'פארוואס דארפן מיינע קינדער דאס מיט מאכן?' איין תירוץ איז דא: "דער אייבערשטער פירט די וועלט".
איך ווארט צו הערן בקרוב א מזל טוב.
א פרייליכן שבת.
בעזרת ה' יתברך
ערב שבת קודש פרשת בהעלותך, י"ח סיון, שנת תשע"ט לפרט קטן
מרת ... תחי'.
וואויל איז אייער חלק אז איר האט זיך ארויסגעצויגן קיין קרית ברסלב, ליבערטי יצ"ו.
איר זענט פון די עשרה ראשונים צו בויען א פלאץ וואו מיר וועלן מחנך זיין אונזערע דורות בקדושה ובטהרה אויפ'ן וועג ווי דער רבי האט אונז געלערנט ווי אזוי מוהרא"ש האט אונז דאס איבערגעגעבן.
חכמינו זכרונם לברכה זאגן (מדרש תנחומא עקב, סימן ו; הובא ברש"י דברים ח, א): "אִם הִתְחַלְתָּ בְּמִצְוָה, גְמוֹר אוֹתָהּ", איר זענט געווען פון די ערשטע משפחות ווען מיר האבן געעפנט די חדר אין ברוקלין, וויליאמסבורג און אויך פון די ערשטע משפחות אריין צו שיקן אינעם מיידל סקול, יעצט זענט איר די ערשטע צו עפענען מוסדות אין ליבערטי.
דער אייבערשטער זאל אייך געבן כח אויפצוציען די קינדער געזונטערהייט צוזאמען מיט אייער טייערער מאן נרו יאיר.
איך פריי זיך צו הערן אז אייער שטוב וועט דינען אלץ אן אכסניא לתורה ולתפלה, מען וועט אנהייבן ביי אייך אין שטוב מיט א מנין.
אין דעם זכות זאלט איר האבן שפע, ברכה און הצלחה.
א פרייליכן שבת.
בעזרת ה' יתברך
יום ה' פרשת נשא, י' סיון, שנת תשע"ט לפרט קטן
מרת ... תחי'.
איך האב ערהאלטן אייער בריוו מיט די געלט.
א גריס פון אייער חשוב'ער זון ... נרו יאיר, ער לערענט פלייסיג און פירט זיך מיט דרך ארץ ויראת שמים; דער אייבערשטער זאל העלפן אז איר מיט אייער מאן זאלן האבן נחת ביי אלע אייערע קינדער צוזאמען געזונטערהייט.
איר שרייבט אינעם בריוו אז איר זענט געזיצן און געוויינט ל"ג בעומר וכו'; שפיר איך פאר וויכטיג אייך מחזק זיין אויף תודה והודאה. דאנקט און לויבט דעם אייבערשטן אויף דעם שיינעם גארטן וואס איר האט זוכה געווען אויפצושטעלן לשם ולתפארת; איר ארבעט אזוי שווער צו פלאנצן און צו בויען, געלויבט דעם אייבערשטן אז מען זעט שוין הערליכע פירות, עס ציעט זיך ווייטער הערליכע דורות. זאלט איר נישט אויפהערן דאנקען דעם אייבערשטן אויף אייערע טייערע קינדער וועט דער אייבערשטער אייך באשאנקען מיט דאפעלטע נחת.
בעזרת ה' יתברך
יום ה' פרשת נשא, י' סיון, שנת תשע"ט לפרט קטן
מרת ... תחי'.
איך האב ערהאלטן אייער בריוו.
איך האב אייך שוין צוריק געשריבן פאר יום טוב שבועות א בריוו, סיי פאר אייך און אויך פאר די תלמידות, אבער ווייזט זיך אויס אז עס איז פארלוירן געווארן.
איך האב גערעדט מיט אונזער מנהלת תחי'; זי וויל און האפט אז איר וועט ווייטער העלפן די סקול אנגרייטן די לימודים, זי זאגט אז אייער ארבעט איז זייער חשוב און וויכטיג פאר די מוסד. מיר האפן אז איר וועט ווייטער ממשיך זיין דעם קומענדיגע יאר.
בנוגע צעטיילן די קלאס וכו'; אם ירצה ה' דעם קומענדיגן יאר וועט מען עס צעטיילן. יעצט וועל איך אייך זאגן דעם אמת'ן טעם פארוואס איך האב נישט צעטיילט די קלאס דאס יאר - תשע"ט ווען איך האב קלאר געזאגט אנהייב יאר אז מען גייט עס צעטיילן וכו'. דער סיבה איז אז ווען איך האב געשפירט ווי אפאר משפחות הייבן אן אונטערגראבן וכו' (היה לא תהיה) האב איך מחליט געווען נאך אסאך תפילה והתבודדות נישט צו צעטיילן די קלאס כדי צו געבן א פתח פאר די וואס זענען נישט צופרידן צו טרעפן אנדערע מוסדות וד"ל.
א גריס פון אייערע טייערער מאן; ווען איך זע אים האב איך זייער הנאה, מען זעט אים שטענדיג אדער מיט א משניות אדער א חומש, תהלים, וכדומה.
איך שיק אייך א בריוו פאר דעם יארבוך.
דער אייבערשטער זאל העלפן איר זאלט מצליח זיין מיט אייערע תלמידות און מיט אייער ארבעט.
בעזרת ה' יתברך
יום ה' פרשת נשא, י' סיון, שנת תשע"ט לפרט קטן
לכבוד אלע טייערע 'בית פיגא' תלמידות שתחיו.
איך שרייב אייך אפאר ווערטער וואס איר זאלט אריין לייגן אין אייער יארבוך, עס זאל בלייבן פאר אייך פאר די קומענדיגע יארן.
יעצט ווען מיר ענדיגן דעם יאר וואס איז די אכטע יאר פון אונזער מוסד, טו איך די ערשטע זאך דאנקען דעם אייבערשטן אויף דעם וואס מיר האבן זוכה געווען צו האבן אזא סקול וואו מען איז מחנך די קינדער מיט די עצות פון הייליגן רבי'ן.
איך בעט אייך זייער טייערע תלמידות פון 'בית פיגא', געוואוינט אייך צו צו רעדן צום אייבערשטן אויף אייער אייגענע שפראך וואס איר זענט געוואוינט צו רעדן, דורכדעם וועט איר זוכה זיין צו אלעס גוטס. דער הייליגער רבי זאגט (ליקוטי מוהר"ן, חלק א', סימן רנ): "הַטֶּבַע מְחַיֵּב כָּךְ, וּתְפִלָּה מְשַׁנָּה הַטֶּבַע", תפילה איז משנה די טבע; דורך תפילה וועט איר זוכה זיין צו ניסים למעלה מדרך הטבע.
שטארקט אייך אלע צו גיין אנגעטון צניעות'דיג; צניעות איז די שענסטע זאך פאר א אידישע פרוי. דער הייליגער בעל שם טוב זכותו יגן עלינו האט דערציילט אז ווען ער איז געווען אויפן וועג קיין ארץ ישראל איז ער געווען אינעם שטאט איסטאנבול וואו ער האט געזען יונגעלייט וואס האבן אזעלכע הייליגע נשמות - ממש ווי די הייליגע תנאים, ווייל די פרויען דארט זענען געווען זייער צניעות'דיג און דערפאר האבן זיי זוכה געווען צו קינדער מיט אזעלכע הייליגע נשמות.
נאך איין זאך בעט איך אייך אלע - טייערע תלמידות שתחיו, איר זאלט אכטונג געבן זיך אויפצופירן מיט דרך ארץ. די הייליגע חכמים זאגן (תנא דבי אליהו רבא, א): "דֶּרֶךְ אֶרֶץ קָדְמָה לַתּוֹרָה", די ערשטע זאך איז דרך ארץ און מידות טובות; בפרט ביים הייליגן רבי'ן איז דרך ארץ געווען די ערשטע זאך. אזוי ווי דער רבי האט געזאגט: "ווען קעניגן וואלטן געוואוסט וואס פאר א דרך ארץ איך לערן אויס פאר מיינע תלמידים, וואלטן זיי געשיקט זייערע קינדער צו מיר איך זאל זיי אויסלערנען דרך ארץ".
אז איר וועט זיך פירן אויף דעם וועג וועט איר גורם זיין א נחת רוח פאר'ן אייבערשטן, פאר אלע צדיקים און פאר אייערע עלטערן.
בעזרת ה' יתברך
יום ה' פרשת במדבר, ג' סיון, שנת תשע"ט לפרט קטן
הכלה ... תחי'.
קודם כל וויל איך אייך וואונטשן א מזל טוב פאר אייער שידוך; איר האט זוכה געווען צו באקומען א חתן איינס אויף דער וועלט. א בחור א בעל מידות און א גרויסער ירא שמים; דער אייבערשטער זאל העלפן איר זאלט אויפשטעלן א שיינע שטוב, דורות ישרים ומבורכים.
אייער חתן נרו יאיר האט מיר געפרעגט אין אייער נאמען, אז ווען מען שערט זיך אפ נאך די חתונה אויב מען דארף זיך אינגאנצן אפשערן אדער מען קען איבערלאזן אביסל האר אין פארנט; וויל איך אייך זאגן אז ווען איר וואלט ווען געוויסט דאס גרויסקייט און די שכר פון א פרוי וואס שערט זיך אפ אינגאנצן איר האר נאך די חתונה וואלט איר נישט געהאט קיין שום ספק אין דעם, נאר אדרבה, איר וואלט געווארט אויף די מינוט ווען איר וועט קענען טון דעם ווילן פונעם אייבערשטן.
דער הייליגער תנא רבי שמעון בר יוחאי זאגט (נשא קכה:): "'תּוּנְבָא לֵיתֵי', א קללה זאל קומען, 'עַל הַהוּא בַּר נָשׁ', אויף דעם מענטש, 'דְּשָׁבַק לְאִנְתְּתֵיהּ', וואס לאזט זיין ווייב, 'דְּתִתְחַזֵי מִשַׂעֲרָא דְּרֵישָׁה לְבַר', אז איר האר פון קאפ זאל זיך ארויסזען. 'וְדָא הוּא חַד מֵאִינּוּן צְנִיעוּתָא דְּבֵיתָה', דאס איז פון די יסודות פון א אידישע שטוב, אז מען זאל נישט זען די האר פון די פרוי. 'וְאִתְּתָא דַּאֲפִּיקַת מִשַׂעֲרָא דְּרֵישָׁה לְבַר', און א פרוי וואס גייט מיט אויפגעדעקטע האר, 'לְאִתְתַּקְּנָא בֵּיהּ', זיך שיין צו מאכן, 'גָּרִים מִסְכְּנוּתָא לְבֵיתָא', איז זי גורם אז עס זאל זיין ארימקייט אין שטוב, 'וְגָרִים לִבְנָהָא דְּלָא יִתְחַשְּׁבוּן בְּדָרָא', און זי איז גורם אז אירע קינדער וועלן נישט מצליח זיין און זיי וועלן נישט זיין חשוב. 'וְגָרִים מִלָּה אַחֲרָא דְּשַׁרְיָא בְּבֵיתָא', אזוי אויך איז זי גורם אז דער ס"מ און די נישט גוטע זאלן זיך געפונען אין איר שטוב. 'מַאן גָּרִים דָּא?' ווער איז דאס אלעס גורם? 'הַהוּא שַׂעֲרָא דְּאִתְחֲזֵי מֵרֵישָׁהּ לְבַר', די פרוי וואס איר האר זעט זיך ארויס; און פארקערט אויך, אז א פרוי וואס שערט זיך אפ איר האר וועט זוכה זיין צו האבן ערליכע דורות און זוכה זיין אז אירע קינדער זאלן זיין חשוב'ע מענטשן; זי וועט זוכה זיין אז די שכינה הקדושה וועט רוען אין איר שטוב און צו ברכות אן א שיעור. אזוי ווי חכמינו זכרונם לברכה זאגן (סוטה יא.): "מִדָּה טוֹבָה מְרֻבָּה מִמִּדַּת פֻּרְעָנוּת", ווען עס קומט צו גוטס איז עס פיל מער ווי שלעכטס, איז דאך זיכער אז א פרוי וואס טוט דעם רצון פונעם אייבערשטן וועט זוכה זיין צו האבן אלעס גוטס אין איר לעבן.
איך שרייב אייך דעם בריוו בשעת אייער חתן נרו יאיר שטייט דא; ער זאגט מיר אז ער דארף 'דיר אליינס' ער דארף נישט אייער האר און ער וועט זיך זייער פרייען אז איר וועט זיך אפשערן. ער זאגט מיר אז ער האט אלע יארן מתפלל געווען צו באקומען א כלה וואס וועט זיך פירן ווי די צדיקים האבן אונז געזאגט צו טון; וואויל איז אייך אז איר האט זוכה געווען צו א חתן אן ערליכער איד וואס וויל פאלגן וואס צדיקים זאגן, ער וויל אויפשטעלן א שטוב אויף דעם וועג ווי אזוי אלע צדיקים האבן געהייסן.
דער אייבערשטער זאל העלפן איר זאלט מצליח זיין אין אלע אייערע וועגן.
בעזרת ה' יתברך
יום ה' פרשת במדבר, ג' סיון, שנת תשע"ט לפרט קטן
לכבוד ... נרו יאיר, תלמיד ישיבת תפארת התורה ברסלב.
איך האב ערהאלטן דיין בריוו.
איך פריי מיר זייער צו הערן אז דו קענסט שוין עסן מילכיגס; דו האסט מיר געשריבן בערך א יאר צוריק א בריוו אז דו קענסט נישט עסן מילכיגס און יעצט זעסטו אז ווען מען פאלגט דעם רבי'ן און מען דאנקט און לויבט אויף וואס מען האט יא דעמאלט העלפט דער אייבערשטער און מען באקומט ישועות.
אויף דיין פראגע וואס דו זאלסט ענדערש לערנען - משניות אדער גמרא; די ערשטע זאך זאלסטו זאגן יעדן טאג ח"י פרקים משניות וואס דאס איז די ערשטע שיעור וואס יעדע תלמיד הישיבה דארף לערנען, נאכדעם זאלסטו לערנען אן א שיעור דפים גמרא, דורכדעם וועסטו זוכה זיין צו ווערן א גרויסער צדיק.
ווען דו לערנסט גמרא זאלסטו מזכיר זיין פאר דעם מוהרא"ש'ס נאמען; מוהרא"ש האט געשריבן א בריוו פון שפיטאל - ממש געציילטע שעה פאר זיין הסתלקות - פאר די בחורים פון יבניאל און פאר די בחורים פון אונזער ישיבה וואו ער בעט אז מען זאל מזכיר זיין זיין נאמען ווען מען לערנט.
דא קענסטו זען די בריוו וואס מוהרא"ש האט געשריבן עטליכע שעה פאר'ן הסתלקות:
בעזה"י יוֹם ה' לְסֵדֶר יִתְרוֹ ט"ז בִּשְׁבַט ה'תשע"ה.
שָׁלוֹם וּבְרָכָה לִיְנִיקֵי הַצֹאן הַתַּלְמִידִים הַיְקָרִים אֶצְלִי אֵלוּ שֶׁלּוֹמְדִים בְּמִסְגֶּרֶת "הֵיכָל הַקוֹדֶשׁ" בְּ"בֵּית מְנַחֶם" וְכֵן בְּ"בֵּית שְׁלֹמֹה" וּבְ"תִּפְאֶרֶת הַתּוֹרָה".
אִיךְ בֶּעט אַייךְ זֵייעֶר אַז אוֹיבּ אִיר וִוילְט עֶפֶּעס טוּן פַאר מַיין זְכוּת, זָאלְט אִיר נֶעמֶען סֵיי וֶועלְכֶע מַסֶכְתָּא גְמָרָא אִיר וִוילְט, אוּן אִיר זָאלְט דָאס אִיבֶּער'חַזֶר'ן הוּנְדֶערְט אוּן אֵיין מָאל.
אִיר זָאלְט מַזְכִּיר זַיין מַיין נָאמֶען וֶוען אִיר לֶערְנְט דִי מַסֶכְתָּא, אוּן אִיר קֶענְט אַייךְ נִישְׁט פָארְשְׁטֶעלְן וִוי הוֹיךְ אִיר וֶועט מִיר אוֹיפְהֵייבְּן מִיט דֶעם.
אִיךְ בֶּעט אַייךְ זֵייעֶר אַז אִיר זָאלְט זִיךְ נִישְׁט חַבֶרְ'ן מִיט שְׁלֶעכְטֶע חֲבֵרִים וֶועלְכֶע גְלִיטְשְׁן לַיידֶער אַוֶועק. אִיר זָאלְט קוּמֶען צוּ מַיין קֵבֶר, אִיר זָאלְט דָארְט מִתְפַּלֵל זַיין אוּן רֶעדְן צוּם אֵייבֶּערְשְׁטְן, אוּן לֶערְנֶען דָארְטְן, אוּן אִיךְ וֶועל אַייךְ דַאנְקְבַּאר זַיין פַאר דֶעם. אִיךְ וֶועל הֶערְן וָואס אִיר זֶענְט מִתְפַּלֵל, אוּן אִיךְ וֶועל פְּרוּבִּירְן אַייךְ צוּ הֶעלְפְן אוֹיבְן אִין הִימְל.
אִיר זָאלְט זִיךְ פָארְנֶעמֶען צוּ הָאבְּן גוּטֶע מִדוֹת, אוּן אִיךְ וֶועל בֶּעטְן פַאר אַייךְ אוֹיבְן אִין הִימְל.
אִיךְ וואוּנְטְשׁ אַייךְ בְּרָכָה אוּן הַצְלָחָה.
צום ערשט ווען מוהרא"ש האט געשריבן די בריוו האט מוהרא"ש נאר געשריבן פאר די תלמידים פון די ישיבה אין יבניאל; איך האב דעמאלט זייער שטארק געבעטן דעם אייבערשטן אז מוהרא"ש זאל פאר אונז אויך שרייבן - פאר די בחורים ביי אונז אין ישיבה. שפעטער האט זיך מוהרא"ש אנגערופן צו דעם יונגערמאן וואס האט געטייפט דעם בריוו דארט אין צימער און אים געזאגט: "איך האב דאך נאך א ישיבה, לייג צו ובתפארת התורה".
דער אייבערשטער זאל העלפן זאלסט מצליח זיין אין אלע דיינע וועגן.
בעזרת ה' יתברך
יום ה' פרשת במדבר, ג' סיון, שנת תשע"ט לפרט קטן
לכבוד מיין טייערער תלמיד ... נרו יאיר.
יעצט ווען מיר שטייען פאר דעם יום טוב שבועות ווען מיר גייען מקבל זיין די תורה וויל איך דיר דאנקען פאר'ן מיר העלפן צושטעלן א פלאץ פאר די בחורים און קינדער זיי זאלן האבן וואו צו לערנען, דורך דעם וואס דו העלפסט צו קענען דעקן די חודש'ליכע הוצאת הבנין.
חכמינו זכרונם לברכה זאגן (שיר השירים רבה א, ד) אז ווען דער אייבערשטער האט געגעבן די תורה פאר די אידן האט ער געבעטן פון די אידן: "הָבִיאוּ לִי עֲרֵבִים טוֹבִים שֶׁתִּשְׁמְרוּהָ", ברענגטס מיר א גאראנטי אז איר וועט היטן די תורה, האבן די אידן פרובירט צו ברענגען אסאך ערבים, אבער דער אייבערשטער האט אויף אלעמען געענטפערט: "עֲרֵבְךָ צָרִיךְ עָרֵב", דער ערב אליינס דארף א גאראנטי, ביז די אידן האבן געזאגט: "בָּנֵינוּ עוֹרְבִים אוֹתָנוּ", אונזערע קינדער זענען אונזערע גאראנטיס אז מיר וועלן האלטן די תורה, "אָמַר הַקָּדוֹשׁ בָּרוּךְ הוּא הָא וַדַּאי עֲרֵבִים טוֹבִים, עַל יְדֵיהֶם אֶתְּנֶנָּהּ לָכֶם, הֲדָא הוּא דִכְתִיב (תהלים ח, ג): מִפִּי עוֹלְלִים וְיֹנְקִים יִסַּדְתָּ עֹז", דאס זענען גוטע גאראנטיס, בזכות די קינדער וועל איך ענק געבן די תורה.
זעט מען פון דעם אז דער אייבערשטער האט גענומען אונזערע קינדער פאר א גאראנטי אז מיר וועלן האלטן די תורה; דאנק איך דיר פאר'ן העלפן חודש'ליך דעקן די רענט אזוי געטריי אז מיר זאלן קענען אנגיין מיט די חדר, ישיבה און מיידל סקול.
א גוט יום טוב.
בעזרת ה' יתברך
יום ג' פרשת במדבר, ראש חודש סיון, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
דו קענסט זיך נישט פארשטעלן די נחת און פרייד וואס איך האב יעדעס מאל ווען איך קוק אריין אין כולל און איך זע ווי איר לערנט בהתמדה רבה.
צומאל גיי איך ארויף אינמיטן טאג נאר צו כאפן א בליק און זיך אנפולן מיט נחת, נאכ'ן זיין פארנומען מיט אזויפיל זאכן וכו', - עס איז נישט גרינג צו עוסק זיין מיט מענטשן, מען קען פשוט אראפגיין פון זינען; די ישיבה – די בחורים, תלמוד תורה, בית פיגא, ועל כולם יונגעלייט, שלום בית וכו', וכו' – איז דער כולל מיין גאנצע נחת.
איך בעט דיר זייער זאלסט מקרב זיין מיינע זון החתן ... נרו יאיר ואחיו הבחור ... זיי זאלן לערנען פלייסיג גמרא והלכה; טוט מיט מיר דעם חסד וועל איך דיר שטענדיג מכיר טובה זיין.
בנוגע דעם הכשר וכו'; זיין ... האט איבער גענומען דעם געשעפט און עס האט מער נישט מיט ... נרו יאיר, ער נעמט א צווייטע הכשר, דארפן מיר מער נישט געבן דארט דעם הכשר.
איך האף אז דעם זוממער הבא עלינו לטובה וועסטו אויך לערנען מיט די יונגע בחורים הלכה; עס גייט מיר אין לעבן צו האבן תלמידים וואס לערנען הלכה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ג' פרשת במדבר, ראש חודש סיון, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך האב ערהאלטן א בריוו פון דיין ווייב תחי' וואו זי שרייבט אז איר לעבן איז אזוי זיס, ממש זי לעבט אין "גן עדן"; זי שרייבט ווי שיין דו פירסט זיך אין שטוב, פון דיינע מידות און פון דיין לערנען, אז כסדר מאכסטו סיומים...
געב איר איבער אז זי האט מיר ממש מחי' געווען; עס איז מיר געווען אזוי וויכטיג צו הערן עפעס גוטע נייעס נאכ'ן זיצן טאג און נאכט און הערן צרות און יסורים וואס מענטשן גייען אריבער.
שטארק זיך און זיי ממשיך מיט דיין עבודת ה'; באניי זיך אין התבודדות, מאך זיך א צייט צו רעדן צום אייבערשטן אויף דיין פשוט'ע שפראך. דאנק און לויב דעם אייבערשטן אויף די גרויסע ניסים וואס ער טוט מיט דיר און בעט אים אויף ווייטער.
געב איבער פאר אלע פרישע יונגעלייט אז מיר הייבן אן א שיעור ספעציעל פאר תלמידי ישיבה וואס זענען אין שנה ראשונה וכו', איך וועל דיר איבערגעבן ווען דאס וועט זיין און דו וועסט זיין ממונה דאס צו איבערגעבן פאר זיי אלע.
דיין ראש ישיבה וואס ליבט דיר.
...
בעזרת ה' יתברך
יום ג' פרשת במדבר, ראש חודש סיון, שנת תשע"ט לפרט קטן
לכבוד מיין טייערער ליבער... נרו יאיר.
איך האב ערהאלטן דיין נדבה פאר די ישיבה, יישר כח.
איך האף אז דו ביסט מסודר און איך האף אז דו פירסט זיך ווייטער מיט די לימודים וואס דו האסט ארויסגעכאפט פון ישיבה.
ברוך ה' געלויבט דעם אייבערשטן אז איך האב נאך קיינעם נישט פארפירט; יעדע בחור וואס האט זיך דא דורכגעדרייט האט ארויסגעכאפט א ששה סדרי משנה, געענדיגט חמשה חומשי תורה; דו אליינס האסט זוכה געווען צו לערנען און ענדיגן משניות כמה פעמים, און כמה מסכתות הש"ס.
איך זע אז דו קומסט נישט לעצטנס אין ישיבה, די גאס זעט דיר אויס מער "גלאנציג און בליטשקעדיג"; הלואי זאלסטו צוריק קומען אין די הייליגע ישיבה וואו מען חזר'ט אמונה ויראת שמים, אדער כאטשיג ארויפקומען מפעם לפעם.
פון דיין ראש ישיבה וואס האט דיר ליב.
בעזרת ה' יתברך
יום ג' פרשת במדבר, ראש חודש סיון, שנת תשע"ט לפרט קטן
לכבוד מיין טייערער ... נרו יאיר, תלמיד ישיבת תפארת התורה.
איך האב ערהאלטן דיין נדבה פאר די ישיבה, יישר כח.
עס טוט מיר זייער וויי אז דו האסט שטילערהייט באהאלטענערהייט א וכו' אויף וואס דו קענסט קוקן מאוויס; דו ווערסט אריינגעשלעפט אין דעם גאנצע נעכט און דו פארברענסט זיך דיין ריינע הייליגע מח-מחשבה.
איך בעט דיר ליבער תלמיד, ווארף אוועק די עבירות. א שאד דו זאלסט זיך דארפן מוטשען דיין גאנצע לעבן; דו ביסט פול מיט חן, דו קענסט זוכה זיין צו טרעפן א גוטע שידוך. א שאד אז דו האסט גענומען פאר דיר דעם נישט גוט'ן וועג.
איך האף אז דו וועסט אננעמען מיינע ווערטער וואס קומען ארויס פון מיין צעבראכענעם הארץ – לטובה, דו וועסט תשובה טון און אנהייבן פונדאסניי, וועסטו האבן א גוט לעבן בזה ובבא.
פון דיין ראש ישיבה וואס האט דיר ליב.
בעזרת ה' יתברך
יום א' פרשת במדבר, כ"ח אייר, שנת תשע"ט לפרט קטן
לכבוד מיין טייערער ליבער ... נרו יאיר.
איך האב ערהאלטן דיין נדבה פאר די ישיבה, יישר כח.
טייערער ..., איך בעט דיר האלט זיך מיט אלע כוחות. איך שעפ פון דיר אזויפיל נחת, פון דיין דאווענען און לערנען, און בעיקר פון דיין שיינע חסידי'שע שטוב וואס דו בויסט מיט אלע דיינע כוחות.
יעצט ווען עס איז דיר ענג אין פרנסה בעט איך דיר זייער דו זאלסט זיך נישט פארלירן; אנטלויף נישט... נאך אביסל וועסטו האבן גרויס שפע... זיי ממשיך מיט דיינע גוטע מעשים, נאך אביסל וועט דיר גרינגער ווערן.
יעצט ווען עס קוועטשט דיר וכו' גיי אין א ווינקל און געב א גוטע קרעכץ צום אייבערשטן, זאג: "טאטע! עס איז מיר אזוי שווער! אייבערשטער איך קען נישט מער", וכו', וכו'; מיט די פאר ווערטער וועסטו געבן א שאקל אלע הימלען...
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום א' פרשת במדבר, כ"ח אייר, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך בעט דיר זייער זאלסט זיך פארנעמען צו דאווענען מיט מנין, גיין דריי מאל א טאג אין שול דאווענען מיט מנין.
חכמינו זכרונם לברכה זאגן (ברכות טז.): "אָמַר רַבִּי חָמָּא בֵּרַבִּי חֲנִינָא: לָמָּה נִסְמְכוּ אֹהָלִים לַנְּחָלִים וכו'? לוֹמַר לָךְ: מַה נְּחָלִים מַעֲלִין אֶת הָאָדָם מִטֻּמְאָה לְטָהֳרָה, אַף אֹהָלִים מַעֲלִין אֶת הָאָדָם מִכַּף חוֹבָה לְכַף זְכוּת", פונקט אזוי ווי ווען א טמא'נער מענטש טובל'ט זיך אין טייך ווערט ער ריין, אזוי אויך ווען מען גייט אין שול דאווענען און לערנען – נעמט מען אראפ פון זיך אלע שלעכטס.
דעם פארגאנגענעם שבת בין איך געווען אין בלומינג גראוו, איז צוגעקומען דיין ברודער זיך באדאנקען פאר די דרשות און התחזקות; ער זאגט מיר אז דאס איז פאר אים ווי אטעמען. זעט מען ווי צוביסלעך גייט אריין דעם רבינ'ס דיבורים מער און מער אין די וועלט.
אז דו שטייסט אין געשעפט אינמיטן די ארבעט און דו שפירסט ווי דו ווערסט פארברענט, עס הייבט אן ברענען די תאוות – השם ישמרינו, זאלסטו דארט שרייען צום אייבערשטן פון צווישן די מענטשן, זאג ארויס: "אייבערשטער, ראטעווע מיר!" "איך ווער פארברענט!" דאס וועט דיר היטן פון נישט אראפפאלן אינגאנצן.
דער אייבערשטער זאל העלפן זאלסט האבן הצלחה אין אלע ענינים.
...
בעזרת ה' יתברך
יום א' פרשת במדבר, כ"ח אייר, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך וויל דיר בעטן אויב דו קענסט מחזק זיין דיין ברודער ... ער זאל האבן מער שייכות מיט זיין ראש ישיבה.
לויט ווי איך פארשטיי און איך הער גייט אויף אים אריבער שוועריקייטן - אזוי ווי עס גייט אריבער אויף אלע פון אונז. אבער היות ער האט נישט קיין שייכות מער מיט זיינע חברים ובפרט מיט זיין ראש ישיבה ווערט ער איינגעגעסן וכו'. בעט איך דיר זייער דו זאלסט אים מחזק זיין ער זאל רופן זיין ראש ישיבה לכל הפחות איין מאל א וואך, און אז ער קען נישט צוקומען זאל ער פרובירן נאכאמאל צו רופן ביז ער וועט אנקומען.
שטארק זיך און שטארק דיין ווייב; עס איז "דיין" ארבעט אריינצוברענגען א חיות אין דיין שטוב, ווארט נישט אז א צווייטער זאל עס טון. הייב אויף די מוט פון דיין ווייב און קינדער; טאנץ יעדן טאג מיט דיינע קינדער, ווייל דער עיקר און דער יסוד פון א אידישע שטוב איז אז עס זאל זיין פרייליך און גוט מוטיג וכו'.
דער אייבערשטער זאל העלפן זאלסט האבן הצלחה אין אלע ענינים.
...
בעזרת ה' יתברך
יום א' פרשת במדבר, כ"ח אייר, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
א גרויסן יישר כח פאר'ן צושטעלן אזא שיינע שבת; איך האב זייער הנאה געהאט צו זיין ביי דיר אויף שבת.
די וועלט זאגט: "א גאסט אויף א ווייל זעט אויף א מייל"; איך מוז דיר זאגן אז דו אליינס ווייסט נישט די ניסים וואס דער אייבערשטער האט געטון מיט דיר, דו האסט זוכה געווען צו אן אשת חיל מיט ליכטיגע קינדער – קיין עין הרע; איך האף אז דו שעצט און ביסט מכבד דיין ווייב, דורכדעם וועסטו זוכה זיין צו עשירות, אזוי ווי חכמינו זכרונם לברכה זאגן (בבא מציעא נט.): "אוֹקִירוּ לִנְשַׁיְכוּ כִּי הֵיכִי דְּתִתְעַתְרוּ", זייטס מכבד ענקערע ווייבער וועט איר רייך ווערן.
איך בעט דיר זייער: "שטארק זיך", "דראפע זיך און דערהאלט זיך"; האב שייכות מיט די חברים פון בלומינג גראוו, זיי זענען טייערע אינגעלייט און איך האב זייער הנאה געהאט צו זיין דארט שבת; עס הערשט א ריינע לופט אין בית המדרש נאר צוליב דאס ליבשאפט איינער צום צווייטן.
האלט פאר דיינע אויגן די ווערטער וואס מוהרא"ש האט דיר געזאגט ווען דו האסט געוואלט וכו': "אז דו וועסט נישט אנטלויפן וועסטו האבן שיינע זאכן"; קוק ווי עס ווערט נאר שענער און שענער.
דיין ראש ישיבה וואס האט דיר ליב.
...
בעזרת ה' יתברך
יום א' פרשת במדבר, כ"ח אייר, שנת תשע"ט לפרט קטן
לכבוד מיין טייערער ... נרו יאיר.
איך האב ערהאלטן דיין נדבה פאר די ישיבה, יישר כח.
איך האף אז דו וועסט אנהאלטן מיט די זכות וואס דו האסט אלע יארן געהאט, די זכיה צו באצירן און באשיינען דעם בית המדרש לכבוד חג השבועות; איך ווארט צו הערן פון דיר צי דו וועסט דאס ווייטער טון אויך היי יאר.
אין זכות פון באשיינען און באצירן דעם רבינ'ס בית המדרש, זאלסטו זוכה זיין צו ערליכע דורות, קינדער און אייניקלעך ערליכע אידן.
געדענק, יעדע זאך וואס מיט טוען פאר'ן רבי'ן איז א נצחיות; א זאך וואס בלייבט פאר אייביג.
דיין ראש ישיבה.
...
בעזרת ה' יתברך
יום ה' פרשת בחוקותי, כ"ה אייר, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
איך פריי מיר זייער שטארק צו הערן פון דיר אז דו זאגסט תהילים און יעצט האסטו זוכה געווען צו מסיים זיין די ערשטע מאל תהילים, האסט מיר ממש מחי' געווען מיט דיין בריוו.
געב א גריס פאר דיין טאטע.
בעזרת ה' יתברך
יום ה' פרשת בחוקותי, כ"ה אייר, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
איך פריי זיך זייער צו הערן אז דו ביסט מצליח אין סקול. נעכטן האט מיר די מנהלת מרת ... תחי' דערציילט פון דיר הערליכע זאכן; אז דו ביסט אויסגעצייכנט אין מידות און אין יראת שמים, ווי אויך אז די מיידלעך האבן דיר זייער ליב.
מיט דיין שיינע אויפפירונג מאכסטו א נחת רוח פאר'ן אייבערשטן, פאר די רבי און פאר מוהרא"ש וואס די סקול איז אויף זייער נאמען.
איך טראכט פון א גוטע שידוך פאר דיר, איך וועל רעדן מיט דיינע עלטערן פון דעם.
בעזרת ה' יתברך
יום ה' פרשת בחוקותי, כ"ה אייר, שנת תשע"ט לפרט קטן
לכבוד ... וזוגתו ... שיחיו.
איך דאנק אייך זייער פאר'ן אהער שטעלן די פרויען פארטי אין קרית יואל פאר אונזערע מוסדות; יעדע זאך וואס מען טוט צו העלפן דעם רבי'ן, בפרט די מוסדות וואס זענען מגלה ומפרסם די הייליגע עצות פון רבי'ן פאר די גאנצע וועלט, איז א גרויסע זכות; א זכות וואס בלייבט אויף אייביג, דאס וועלן מיר מיט נעמען אויף די וועלט און אויף יענע וועלט.
געבטס איבער א יישר כח פאר אלע פרויען וואס האבן געהאלפן אז די פארטי זאל זיין מיט הצלחה.
בעזרת ה' יתברך
יום ה' פרשת בחוקותי, כ"ה אייר, שנת תשע"ט לפרט קטן
לכבוד ... וזוגתו ... שיחיו.
איך האב ערהאלטן ענקער בריוו.
איך דאנק אייך זייער פאר'ן אהער שטעלן די פרויען פארטי אין קרית יואל פאר אונזערע מוסדות; יעדע זאך וואס מען טוט צו העלפן דעם רבי'ן, בפרט די מוסדות וואס זענען מגלה ומפרסם די הייליגע עצות פון רבי'ן פאר די גאנצע וועלט, איז א גרויסע זכות; א זכות וואס בלייבט אויף אייביג, דאס וועלן מיר מיט נעמען אויף די וועלט און אויף יענע וועלט.
געב איבער א יישר כח פאר אלע פרויען וואס האבן געהאלפן אז די פארטי זאל זיין מיט הצלחה.
