בעזרת ה' יתברך
יום ד' פרשת ויקרא, כ"ז אדר, שנת תשע"ח לפרט קטן
לכבוד ... נרו יאיר
טייערער ברודער, דראפע דיר און דערהאלט זיך. ר' יצחק דער זון פון ר' נתן שרייבט אין א בריוו פאר זיין טאטע, דער הייליגער ר' נתן זכרונו לברכה אז מ'מוטשעט אים זייער, דאס הייסט ער האט געפערליכע נסיונות, שרייבט אים ר' נתן צוריק אין א בריוו (עלים לתרופה, מכתב יד): "דאס וואס דו שרייבסט מיר אז מע מוטשעט דיך וכו'. וויסן זאלסטו מֶע מוּטְשֶׁעט אִיטְלִיכֶען, מִיךְ הָאט מֶען שׁוֹין זֵעהֶר פִיעל גִּימוּטשֶׁעט"; מיר מיטשעט מען אויך אסאך, יעדן איינעם מיטשעט מען און יעדער האט גרויסע נסיונות, נאר מען דארף זיך דערהאלטן מיט אלע כוחות.
איך בעט דיר ברודער שטארק זיך; געדענק וואס איך זאג דיר אלץ אז דו ביסט א מלומד בניסים. קוק צוריק וואס דער אייבערשטער האט געטון מיט דיר ביז יעצט; האב נישט מורא, דער אייבערשטער וועט דיר ווייטער העלפן.