בריוון פונעם ראש ישיבה שליט"א

בעזרת ה' יתברך - יום ד' פרשת בחוקותי, כ"א אייר, ל"ו לעומר, חסד שביסוד, שנת תשפ"ד לפרט קטן

לכבוד ... נרו יאיר

האסט מיר געבעטן א בריוו, חיזוק אויף דעם וואס דו ווארסט אזוי לאנג אויף דיין שידוך.

ליבער ברודער היינט איז די יום הולדת פון מוהרא"ש, וואס האט זיין גאנץ לעבן עוסק געווען אין מחזק זיין בחורים און מיידלעך, זיי ווייזן די חסדים פונעם אייבערשטן; אפילו מען האלט אין איין פאלן אין די מידה פון יסוד, מען פאלט אין פגם הברית - זאל מען וויסן אז דער אייבערשטער ווארפט נישט אוועק קיינעם. אזוי ווי חכמינו זכרונם לברכה זאגן (שמות רבה יט, ד): "אֵין הַקָּדוֹשׁ בָּרוּךְ הוּא פּוֹסֵל לִבְרִיָּה", דער אייבערשטער ווארפט קיינעם נישט אוועק, "אֶלָּא לַכֹּל הוּא מְקַבֵּל", ער נעמט אן יעדן איינעם וואס טוט תשובה, "הַשְּׁעָרִים נִפְתָּחִים בְּכָל שָׁעָה", די טירן זענען שטענדיג אפן, "וְכָל מִי שֶׁהוּא מְבַקֵּשׁ לִכָּנֵס יִכָּנֵס", און ווער עס וויל צוריק קומען - קען צוריק קומען.

איך בעט דיר זייער טייערער ליבער ברודער, איך ווייס דיין צעבראכן הארץ, איך ווייס דו ביסט שוין אריבער די צוואנציג יאר און דו ביסט אזוי דערשראקן פון וואס די הייליגע חכמים זאגן (קידושין כט:), דער וואס האט נישט חתונה פאר די צוואנציג יאר ווערט באשטראפט: "תיפח עצמותיו", עס זאל אים צעגיין זיינע ביינער, דו פרעגסט 'וואס בין איך שולדיג אז עס גייט מיר נישט קיין שידוך? וואס בין איך שולדיג אז מען שעלט מיר מיינע ביינער זאלן מיר צעגיין? וואס בין איך שולדיג אז מיין גאנץ לעבן וועל איך זיך מוטשען צו זיין ערליך, אז מען זאגט אויף מיר 'כל ימיו בהרהור עבירה', אז מען האט נישט חתונה ביז די צוואנציג וועט מען זיך א גאנץ לעבן מוטשען מיט עבירות?'

טייערער ברודער, דאס מיינט מען נישט איינער וואס וויל חתונה האבן און עס גייט אים נישט קיין שידוך, דאס מיינט מען די וואס האלטן זיך קלוגער פון די הייליגע חכמים, די אויבער חכמים וואס זאגן אז זיי ווילן נאכנישט חתונה האבן, זיי ווילן ארבעטן און אוועקלייגן געלט, אויך די וואס זאגן 'מיר ווילן ווארטן ביז נאך די צוואנציג כדיי צו קענען לערנען', אויף זיי איז געזאגט געווארן די אלע שרעקעדיגע זאכן, אבער ווען א בחור איז גרייט חתונה צו האבן און עס גייט אים נישט קיין שידוך - נישט זיי מיינט מען.

מיין טייערער ליבער חבר, זוך דיר אויף א שטילע פלאץ, גיי אהין און וויין זיך אויס צום אייבערשטן, בעט אים ער זאל רחמנות האבן אויף דיר, זאג פארן אייבערשטן:

"הייליגער באשעפער איך בעט דיר זייער, געב מיר א שידוך, איך וויל זיין אן ערליכער איד, איך וויל זיין אפגעהיטן, לעבן בקדושה וטהרה. חכמינו זכרונם לברכה זאגן (פסחים קיב:): 'לוֹמֵד תּוֹרָה בְּטָהֳרָה', ווי אזוי קען מען לערנען תורה מיט א ריינעם מח? 'זֶה הַנּוֹשֵׂא אִשָּׁה וְלוֹ בָּנִים', אז מען האט חתונה און מען האט קינדער, נאר אזוי קען מען זיין אפגעהיטן מיט ריינע מחשבות, בעט איך דיר הייליגער באשעפער געב מיר מיין שידוך.

רבונו של עולם איך בין אזוי צעבראכן, איך בין שוין אריבער די צוואנציג יאר, וואס בין איך שולדיג אז איך האב נישט קיין שידוך? דערבארעמדיגער באשעפער, וואס קומט מיר די קללה פון תיפח עצמותיו? איך וויל דאך חתונה האבן, איך וויל זיין גוט! עס איז מיר אזוי שווער, קיינער אין די וועלט פארשטייט נישט מיין ווייטאג און מיין פלאג.

הייליגער באשעפער, איך וויל זיך אויסרעדן מיין ווייטאג; וואס בין איך שולדיג אז מיין גאנצע לעבן זאל זיין בהרהור עבירה? פארוואס?! נישט גענוג איך האב נישט מיין שידוך, קומט מיר דאס אויך? נישט האבן א ריינע מח?! איך וויל א שידוך און איך וויל א ריינעם מח.

איך האלט אין איין אראפפאלן אין די עבירה פון פגם הברית, הוצאת זרע לבטלה און דאס איז גורם אז מיין שידוך זאל זיך אפשטופן, אבער אייבערשטער וואס קען איך טון נישט אראפצופאלן אין די עבירה? איך קען נישט עומד זיין בנסיון, איך דארף חתונה האבן; אז איך וועל חתונה האבן וועל איך זיך קענען האלטן בקדושה ובטהרה, חכמינו זכרונם לברכה זאגן דאך זאגן (יבמות סב:): 'כָּל אָדָם שֶׁאֵין לוֹ אִשָׁה שָׁרוּי בְּלֹא שִֹמְחָה, בְּלֹא בְּרָכָה, בְּלֹא טוֹבָה', איז דאך נישט שייך פאר מיר צו זיין ערליך און אפגעהיטן.

בעט איך דיר אייבערשטער, בזכות די הייליגע צדיקים וואס האבן זיך מוסר נפש געווען פאר דיר געב מיר א שידוך, און אזוי וועל איך קענען זיין ערליך און הייליג, אמן סלה".

דער אייבערשטער זאל דיר העלפן זאלסט בקרוב טרעפן דיין שידוך.

בעזרת ה' יתברך - יום ד' פרשת בהר, י"ד אייר, פסח שני, כ"ט לעומר, שנת תשפ"ד לפרט קטן

טייערער ליכטיגער ... נרו יאיר

איך בין זייער פרייליך צו זען ווי דו פירסט זיך ביראת שמים, און ווי פלייסיג דו לערנסט.

עס איז געווען א תענוג רוחני צו זיין אין מירון מיט דיר און מיט די חברים תלמידי ישיבת היכל הקודש ירושלים. איך בין זייער מרוגש פון ענק, פון די אחדות און מידות טובות.

שטארק זיך בעבודת השם און זארג נישט, וועסט בקרוב האבן א גוטע שידוך און אויפשטעלן שיינע דורות.

פון דיין ראש ישיבה וואס האט דיך ליב.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו, אויך האב איך ערהאלטן גאר גוטע גריסן פון דיין מגיד שיעור און פון דער מנהל, זיי זאגן אז דו פירסט זיך אויף מיט גאר גוטע מידות און יראת שמים.

דו פרעגסט אויב דו זאלסט צולייגן נאך שיעורים צו די שיעורים וואס דו לערנסט יעדן טאג; דארפסט נישט צולייגן יעצט נאך שיעורים, בלייב מיט די שיעורים וואס דו האסט יעצט, א שיעור אין מקרא - שנים מקרא ואחד תרגום מיט רש"י הקדוש, א שיעור אין נ"ך, א שיעור אין משנה – ח"י פרקים משניות, גמרא - בבלי און ירושלמי, הלכה, מדרש, זוהר, תיקוני זוהר און דעם רבינ'ס ספרים; באפלייס זיך אין די שיעורים, און נאך א יאר זאלסטו נאכאמאל פרעגן אויב דו זאלסט צולייגן.

אלע קוקן אויף דיר, מען וויל זען ווי אזוי פירט זיך א ברסלב'ער חסיד א תלמיד היכל הקודש; זאלסטו זיך פירן מיט גרויס דרך ארץ. ווייל די הייליגע חכמים זאגן (יומא פו.) אויפן פסוק (דברים ו, ה): "וְאָהַבְתָּ אֵת ה' אֱלֹקֶיךָ" - זאלסט זען עס זאל ארויסקומען א קידוש השם דורך דיר, דער אייבערשטער זאל באליבט ווערן דורך דיר, ווייל ווען מען פירט זיך אויף שיין זאגן אלע: "אַשְׁרֵי אָבִיו שֶׁלִּמְּדוֹ תּוֹרָה", וואויל זענען זיינע עלטערן וואס האבן אים געלערנט תורה; "אַשְׁרֵי רַבּוֹ שֶׁלִּמְּדוֹ תּוֹרָה", וואויל איז זיין רבי וואס האט אים געלערנט תורה; "אוֹי לָהֶם לַבְּרִיוֹת שֶׁלֹא לָמְדוּ תּוֹרָה", וויי איז פאר די מענטשן וואס לערנען נישט קיין תורה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

לכבוד ... נרו יאיר, ישיבת היכל הקודש קרית ברסלב ליבערטי

איך האב זייער הנאה געהאט צו זיין אין ישיבה די וואך פאר יום טוב פסח, איך האב זייער הנאה געהאט צו זען ווי דו פירסט זיך מיט גוטע מידות און יראת שמים, און אויך פון דיין התמדה.

איך וויל דיר בעטן זאלט זיך אכטונג געבן אויף דיינע אויגן, אפילו אין שטעטל וואס איז נישט אזוי שלעכט ווי אין שטאט - דארף מען אויך רחמי שמים, מען קען זיך חס ושלום אנטרעפן מיט אריך אנפין דקליפה, וואס דער הייליגער רבי זאגט (לקוטי מוהר"ן חלק א', סימן רמב): "דַּע שֶׁיֵּשׁ בְּחִינַת אֲרִיךְ אַנְפִּין בַּקְּלִפָּה", עס איז דא די זאך פון 'אריך אנפין' אויך ביי די קליפה, "וּמִי שֶׁפּוֹגֵעַ בְּאִשָּׁה מִבְּחִינָה זוֹ קָשֶׁה לוֹ לְהִנָּצֵל מֵהִרְהוּר", און ווער עס פאלט אריין אין דעם איז אים זייער שווער צו בלייבן מיט ריינע מחשבות, "וְאַף אִם יַעֲצִים עֵינָיו", וואס אפילו ער וועט אראפקוקן און צומאכן די אויגן, "אַף עַל פִּי כֵן בְּכָל צַד שֶׁיִּפְנֶה תִּזְדַּמֵּן לוֹ", וועט עס אים נאכלויפן און ער וועט ווייטער טראכטן פון די שלעכטע זאכן וואס ער האט געזען, "כִּי הִיא בְּחִינַת אֲרִיךְ אַנְפִּין שֶׁל הַקְּלִפָּה, שֶׁהֵם פָּנִים אֲרֻכִּים וְעַל כֵּן בְּכָל צַד שֶׁיִּפְנֶה תִּזְדַּמֵּן לוֹ", ווען מען פאלט אריין אין די קליפה איז זייער שווער צו האבן ריינע אויגן, ווייל וואו מען גייט און וואו מען קוקט - זעט מען די קליפה רחמנא לצלן.

דעריבער בעט איך דיר, גיי נישט אין די גאסן, גיי נישט צו די גראסערי; ברענג זיך מיט אינדערפרי מזונות וכדומה, און בלייב אין די ד' אמות פון די הייליגע ישיבה. עס לוינט נישט צו גיין אין גראסערי און האבן איין שלעכטע קוק, ווייל די גוים און גויות גייען מיט א שרעקליכע פריצות, און דער יצר הרע ברענט, מען ווערט אזוי משוגע, מען קוקט און מען קוקט, און נאכדעם פארלירט מען אלע הייליגקייטן.

אויך זאלסטו לערנען אסאך משניות, דאס וועט דיך ראטעווען פון דער יצר הרע, אזוי ווי דער רבי זאגט (שיחות הר"ן, סימן יט): "אֲפִלּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה, עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד", אויב וועט ער זיך מאכן א קביעות צו לערנען יעדן טאג 'כך וכך' - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת שמיני, כ"ד אדר ב', שנת תשפ"ד לפרט קטן

לכבוד מיין טייערער ליבער ... נרו יאיר

איך האף דו שטארקסט זיך, דו גייסט יעדן טאג דאווענען דריי תפילות און דו לערנסט שיעורים אין משניות און גמרא. איך ווייס דו האסט נישט קיין לעבן פון ווארטן אזוי לאנג אויף א שידוך, דו ביסט דערביטערט ביז צום טויט, מוהרא"ש זכרונו לברכה זאגט: "קיינער פארשטייט נישט קיין בחור, קיינער ווייסט נישט די צער וואס א בחור גייט אדורך"; א בחור וויל זיין ערליך, ריין און הייליג, אבער עס גייט אים נישט, ער האלט אין איין אראפפאלן אין די עבירה פון פגם הברית, הוצאת זרע לבטלה רחמנא לצלן.

דאך בעט איך דיר זייער זאלסט ארויסטרייבן די עקלדיגע מחשבות אז דער אייבערשטער איז ברוגז אויף דיר; עס איז נישט אמת, דער אייבערשטער איז נישט ברוגז אויף דיר, דער אייבערשטער ווארט זאלסט זיך קומען אויסוויינען צו אים און תשובה טון.

פאלג א צדיק, פאלג מוהרא"ש; נעם א משניות, לערן איין פרק נאכן צווייטן. אין אנהויב וועסטו נישט פארשטיין וואס דו לערנסט, ווייל פון אזויפיל מאל זינדיגן אין די עקלדיגע עבירה פון פגם הברית - פארלירט מען דעם מח, אזוי ווי דער זוהר הקדוש זאגט (עיין פרשת משפטים, קי.): "סִלּוּקָא דִּיסוֹדָא עַד אַבָּא וְאִמָּא", אז מען איז פוגם בברית - מען איז פוגם ביסוד, גייט דער פגם ביזן מח; מען פארלירט דעם כח פון זיך קענען קאנצעטרירן וכו'; אבער אז מען לערנט אויפן סדר דרך הלימוד פון רבי'ן (כמבואר בשיחות הר"ן, סימן עו), אז אפילו מען פארשטייט נישט וואס מען לערנט - זאל מען ווייטער זאגן די ווערטער פון די הייליגע תורה; דורכדעם איז מען זוכה אז מען הערט אויף צו טון עבירות און מען רייסט זיך ארויס פון די קליפות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

איך פריי זיך זייער צו הערן גוטע גריסן אויף דיר פון דיין מגיד שיעור און פון דעם מנהל, זיי זאגן מיר אז דו פירסט זיך מיט יראת שמים און מיט גוטע מידות.

בנוגע וכו'; מוהרא"ש זאגט בשם דעם צדיק רבי אברהם בן רבי נחמן זכותו יגן עלינו, יעדע נאכט ביי חצות הלילה קען מען טרעפן דעם רבינ'ס נשמה ביים שער השמים, און אזוי טוען ברסלב'ער חסידים, זיי גייען צום שער השמים ביי חצות הלילה און זיי זענען זיך דארט מתבודד.

נוץ אויס דיינע יונגע יארן מיט תורה ותפילה. חכמינו זכרונם לברכה זאגן (שבת קנב.): "יַנְקוּתָא כְּלִילָא דְוַרְדָא", די שענסטע צייט פונעם מענטש זענען זיינע יונגע יארן; יעצט איז דיין שענסטע צייט פון לעבן, זיץ אין ישיבה מיט א הויפן ספרים; א חומש, א משניות, גמרא, שלחן ערוך און דעם רבינ'ס ספרים, אויך זאלסטו זיך מאכן א שיעור אין תיקונים; וועסטו זוכה זיין צו ווערן א גרויסער צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

איך פריי זיך זייער צו ליינען דיינע בריוו.

יעצט אז דו האסט מסיים געווען אלע ספרים פון נ"ך זאלסטו זיך מאכן א שיעור אין ספר המידות, פרוביר צו ענדיגן יעדע וואך ספר המידות. דער רבי האט געזאגט (חיי מוהר"ן, סימן שעט): "דער ספר האט מיך געמאכט פאר א איד", אויך זאלסטו זאגן יעדן טאג ח"י פרקים משניות און דעם יום תהלים.

אויך בעט איך דיר, זיי מעביר סדרה יעדע וואך די פרשה שנים מקרא ואחד תרגום, זיי מעביר סדרה פון אנהויב וואך, און פרוביר צו ענדיגן שוין די פרשה שנים מקרא ואחד תרגום אויף דאנערשטאג, אזוי זאלסטו נישט פארפאסן א וואך פון מעביר סדרה זיין.

אויך זאלסטו לערנען יעדן טאג הלכה. דער רבי זאגט (שיחות הר"ן, סימן כט): "כָּל אִישׁ יִשְׂרְאֵלִי מְחֻיָּב לִלְמֹד בְּכָל יוֹם וָיוֹם פּוֹסְקִים, וְלֹא יַעֲבֹר", יעדער איד איז מחויב צו לערנען יעדן טאג הלכות, "וְאִם הוּא אָנוּס וְאֵין לוֹ פְּנַאי, יִלְמַד עַל כָּל פָּנִים אֵיזֶה סְעִיף שֻׁלְחָן עָרוּךְ בְּאֵיזֶה מָקוֹם שֶׁהוּא, אֲפִילּוּ שֶׁלֹּא בִּמְקוֹמוֹ שֶׁהוּא עוֹמֵד עַתָּה בְּשֻׁלְחָן עָרוּךְ", אויב מען האט נישט קיין צייט וכו' זאל מען לערנען א הלכה אפילו נישט כסדרן וואו מען האלט וכו', "כִּי צָרִיךְ לִלְמֹד אֵיזֶה דִּין בְּשֻׁלְחָן עָרוּךְ בְּכָל יוֹם וָיוֹם כָּל יְמֵי חַיָּיו", ווייל מען איז מחויב צו לערנען יעדן טאג הלכה.

הער אויס דיין מגיד שיעור הרב משה שמואל שליט"א און פאלג וואס ער זאגט דיר.

געב א גרוס פאר אלע בחורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמיני, כ"ב אדר ב', שנת תשפ"ד לפרט קטן

לכבוד מיין טייערער ליבער ... נרו יאיר

איך האב ערהאלטן דיין בריוו.

ווארף אוועק דיין טעבלעט, ווער ווייסט אויב דאס איז נישט דער שטער צו דיין ישועה; אזויפיל דאווען איך פאר דיר דו זאלסט שוין טרעפן דיין שידוך און קען זיין אז די מאוויס וואס דו קוקסט אויפן טעבלעט - דאס האלט אלעס צוריק.

ענדערש קויף זיך א כשר'ע טעלעפאן ווי איידער האבן די כלים וואס נאכן פילטערן קענסטו דאס נאכאלץ עפענען, און קוקן ניאוף רחמנא לצלן. דער רבי זאגט קלאר (לקוטי מוהר"ן חלק ב', סימן פז): "וּמֵחֲמַת זֶה הַפְּגָם יוּכַל לְאַבֵּד אֶת זִוּוּגוֹ, כִּי מֵאַחַר שֶׁנָּטָה מִזִּוּוּגוֹ קָשֶׁה לוֹ לִמְצֹא אֶת זִוּוּגוֹ", ווען א מענטש זינדיגט אין פגם הברית - פארלירט ער זיין שידוך, "וַאֲפִילּוּ אִם יִמְצָא אֶת זִוּוּגוֹ", און אפילו איינער וואס האט שוין זיין שידוך, ער האט שוין חתונה געהאט, "תִּהְיֶה לוֹ מְנַגֶּדֶת וְלא תִּהְיֶה נוֹטָה אַחַר רְצוֹנוֹ", וועט זיך זיין ווייב קריגן מיט אים וכו', אבער אז מען טוט תשובה - "אֲזַי מוֹצֵא זִוּוּגוֹ, וְהִיא אֵינָהּ כְּנֶגְדּוֹ, רַק כִּרְצוֹנוֹ", איז מען דעמאלט זוכה צו טרעפן דעם שידוך.

טייערער ברודער, ווארף אוועק די טעבלעט, ווארף אוועק די כלים וואס דו קענסט זען ניאוף, מען פארלירט אלעס אז מען קוקט ניאוף; מען פארלירט די לעבן, די פרנסה, די שמחה, די מנוחה; אז מען איז פוגם בברית - ווערט די לעבן טונקל, שווארץ, קאמפליצירט; אלעס פון זיך נישט היטן די אויגן.

טייערער ..., גיי יעדן טאג התבודדות, וויין צום אייבערשטן אויף דיין שפראך, שריי צו אים ער זאל דיר געבן דיין שידוך, זאג אים: "הייליגער באשעפער איך וויל שוין מיין שידוך, איך וויל חתונה האבן, איך וויל זיין ערליך, איך וויל זיין הייליג, איך וויל האבן מיין לעבן, מיין ווייב, מיינע קינדער.

רבונו של עולם, איך בין אזוי צעבראכן, איך בין אזא רחמנות, איך האלט אין איין זינדיגן אין די עבירה פון פגם הברית, הוצאת זרע לבטלה, איך ווייס אז דאס איז גורם אז מיין שידוך זאל זיך אפשטופן, אבער אייבערשטער וואס קען איך טון נישט אראפצופאלן אין די עבירה? טאטעניו וואס קען איך טון אז איך קען נישט עומד זיין בנסיון, איך דארף חתונה האבן, נאר אז איך וועל חתונה האבן וועל איך זיך קענען האלטן בקדושה ובטהרה, אנא ה' איך בעט דיר אייבערשטער, וואו איז מיין שידוך? ווען באקום איך מיין שידוך? איך קען נישט מער, איך וויל א שידוך און איך וויל א ריינעם מח".

אזוי זאלסטו בעטן דעם אייבערשטן יעדן טאג, ביז דער אייבערשטער וועט רחמנות האבן און דיר געבן א שידוך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר

איך ווייס עס איז דיר ביטער שווער, דו ווילסט שוין אזוי לאנג דיין שידוך, דו ווארסט שוין אזא לאנגע צייט, דו קוקסט ארויס 'ווען וועל איך שוין חתונה האבן? ווען וועל איך שוין האבן א שטוב?' און נאכאלץ האסטו נישט דיין שידוך, עס איז דיר ביטער שווער, דו פאלסט אראפ וכו', דער יצר הרע ברענט אין דיר, עס איז דיר אזוי געפערליך.

דאך בעט איך דיר מיין ליבער ברודער, מיין הארציגער חבר, געב נישט אויף, לאז זיך נישט נאך, בלייב שטארק, באנוץ זיך מיט די עצה פון רבי'ן, פון התבודדות; זוך א שטילע ווינקל וואו קיינער הערט נישט, און רעד זיך אויס צום אייבערשטן, רעד צו אים אויף דיין אייגענע שפראך, מיט דיין מאמע לשון, רעד אויפן קול, זאג:

"רבונו של עולם איך דארף אזוי שטארק מיין שידוך, איך וויל שוין אזוי שטארק חתונה האבן, עס איז מיר אזוי שווער צו זיין אליין, איך קען נישט זיין אליין, איך מוז שוין האבן מיין שידוך. רבונו של עולם, ווילאנג נאך וועל איך דארפן זיין אליין? איך פאל אראפ אין נישט גוטע זאכן, איך בין פוגם בברית, זיי מיר מוחל, נעם אן מיין תשובה, זע מיין צעבראכן הארץ, איך וויל זיין גוט, איך וויל זיין וואויל".

אזוי זאלסטו טון יעדן טאג און אפאר מאל א טאג, און דו וועסט בקרוב זוכה זיין צו חתונה האבן.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר

א גריס פון דיין טייערער זון ... נרו יאיר, ער איז ביי מיר ליכטיג און טייער, ער לערנט זיינע שיעורים, ער דאווענט ערליך, אויך העלפט ער אין ישיבה.

איך געב זייער אכטונג אויף אים, און ווען ער קומט שפעט בין איך מעלים עין, איך מאך זיך ווי איך זע נישט, ווייל איך וויל אים נישט פארלירן, ער איז ביי מיר זייער חשוב.

איך בעט דיר זייער זאלסט אומגיין מיט אים זייער איידל, אים זאגן איין מאל, מערסטנס צוויי מאל און נישט צופיל דרוקן, יעצט אין די יארן דארף מען נוצן די ימין מקרבת, אויסלויבן און אויסרומען אן א שיעור.

ווען קינדער זענען יונג דעמאלט איז די צייט פון גיין שטרענג, אבער ווען זיי ווערן גרויס – דארף מען זיך אנטון זיידענע הענטשיך און פארמאכן די אויגן, און נאר אויסרומען.

איך זאג דיר צו דו וועסט האבן נחת פון אים, אבער איך וויל זאלסט מיט ארבעטן מיט מיר, אים נאר אויסרומען און אויסלויבן, וסוף הכבוד לבוא.

דיין ראש ישיבה וואס וויל נאר די טובה פון דיר און דיינע קינדער.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין ליבער ... נרו יאיר

איך האב ערהאלטן דיין בריוו.

איך האב היינט גערעדט צו דיינע עלטערן, איך האב אנגעטראגן א שידוך, איך האף צום אייבערשטן צו קענען זיין דער גוטער שליח, אויספירן ביי דיר א שידוך.

זיי ממשיך מיט דיין עבודת השם, מיט דיינע שיעורים כסדרן על פי סדר דרך הלימוד פון הייליגן רבי'ן (המבואר בשיחות הר"ן, סימן עו); לערן יעדן טאג מקרא, משנה, גמרא, אויך לערן תיקונים אין דעם רבינ'ס ספרים.

ועל כולם גיי שרייען צום אייבערשטן: "רבונו של עולם, ראטעווע מיך, איך פאל אין בלאטע, איך בין פוגם בברית, רבונו של עולם איך וויל זיין ערליך, איך וויל זיין גוט און עס גייט מיר נישט, וויפיל איך פרוביר פאל איך מער אראפ, רבונו של עולם זיי מיר מוחל, פארגעב מיר מיינע זינד, און העלף מיר זיין גוט".

טייערער ברודער, שטארק זיך מיט די צוויי עצות, לערנען און דאווענען; דאס איז די עצה צו לעשן די פייער פון ניאוף.

איך האף צום אייבערשטן צו הערן גוטע נייעס ביי דיר בקרוב.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין טייערער ... נרו יאיר

עס קומט די הייליגע יום טוב פורים, זאלסטו אויסנוצן דעם טאג מיט תפילה והתבודדות. די ערשטע נאכט (די יאר איז עס מוצאי שבת קודש) טרינקט מען נישט, עס איז נישט קיין מצוה צו טרינקען – נאר פורים בייטאג; זאלסטו גיין שלאפן פרי און אויפשטיין פורים פרי, גיי אין מקוה און אז דו קענסט אויסזאגן תהלים – מה טוב ומה נעים. צדיקים טייטשן וואס די הייליגע חכמים זאגן (ירושלמי מגילה א, ד): "כָּל הַפּוֹשֵׁט יַד נוֹתְנִים לוֹ", דאס גייט ארויף אויף תפילה, פורים קען מען פועל'ן ישועות.

דו דארפסט דאך א גרויסע ישועה, דו דארפסט א שידוך; זאלסטו פורים זאגן תהילים און בעטן: "הייליגער באשעפער, געב מיר מיין שידוך, הייליגער באשעפער איך בין פול מיט פארדרייטע חכמות, איך זאג אפ שידוכים, איך ווער עלטער און עלטער, העלף מיר איך זאל אפלאזן מיינע חכמות, נאר חתונה האבן פאר דיינעט וועגן".

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... שליט"א, קרית ברסלב

זיי מחזק די בחורים ביי דיר אין ישיבה זאלן עוסק זיין אין גיין נאך געלט פאר די ישיבה; א גאנץ יאר זאלן זיין עוסק זיין אין די מצוה, בפרט אינעם יום טוב פורים.

די בחורים קענען זיך צאמנעמען און גיין אין הייזער, טאנצן און פרייליך מאכן, און בעטן צדקה פאר אונזער ישיבה.

אויך זאלסטו זיי מחזק זיין זיך אויפצופירן מיט דרך ארץ, איך הער פון מענטשן אז בחורים גייען נאך געלט ביי אונזער גראסערי צו קויפן פיצא וכו'. זאג זיי עס איז נישט קיין דרך ארץ, עס איז נישט קיין גוטע געוואוינהייט; סיי דאס עסן אין געשעפט ווען עס איז דא עסן אין ישיבה, און סיי דאס בעטן געלט פון מענטשן פאר איבריגע זאכן.

ווער נישט מיד און שוואך ווען דו זעסט אז נאכן רעדן פועל'ט מען נישט, גלייב אז דיינע ווערטער גייען אריין אין די טייערע הערצער און יעדעס ווארט וואס מען רעדט מיט הארץ – ווערט אנגענומען, נכנסין ללב.

דו רעד, אז מען רעדט – פועל'ט מען, אמאל גלייך און אמאל נעמט עס אביסל צייט.

רעד צו זיי פון אמונה, פון תפילה, פון קדושת היסוד, און אפהיטן אות ברית קודש און פון מדות טובות.

ווען דו ווערסט מיד – זאלסטו זיך דערמאנען ווי מוהרא"ש האט געהאט כח צו אונז, גערעדט און גערעדט צו אונז און נישט געווארן מיד.

איך האב צוגעזאגט פאר דיינע תלמידים צו מאכן א שבת התוועדות מיט זיי, איך האף צום אייבערשטן צו גיין מיט זיי אויף א שבת זיי מחזק זיין, זיי אויפבויען מיט די חיזוק און עצות פון רבי'ן.

פון דיין ראש ישיבה וואס בעט פאר דיין הצלחה.

בעזרת ה' יתברך - יום ד' פרשת תצוה, שובבי"ם, י"ב אדר א', שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

הער אויף צו קריטיקירן דיין זון; ער איז א ליכטיגער טייערער בחור, הער אויף אים צו נאכקוקן.

געב אים גוטע ווערטער, געב אים א שמייכל, קוק אויף אים נאר אויף די גוטע זאכן.

אויב דו וועסט אים נישט אויפהערן קריטיקירן, איז ענדערש שיק אים אוועק פון שטוב, שיק אים שלאפן ביי א זיידע אדער פעטער, ווי איידער זיין נפש זאל צעקלאפט ווערן.

איך בעט דיר, אנא, האב רחמנות אויף דיינע קינדער; ווען די קינדער זענען שוין גרויס דארף מען זייער אכטונג געבן די וועג ווי מען זאגט, די וועג ווי מען איז מחנך.

איך האף דו וועסט פאלגן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תצוה, שובבי"ם, י"א אדר א', שנת תשפ"ד לפרט קטן

לכבוד מיין טייערער ... נרו יאיר

מיין הארץ גייט מיר אויס דו זאלסט שוין טרעפן דיין שידוך, עס איז אזא רחמנות אויף בחורים און מיידלעך, קיינער פארשטייט נישט זייער צער און ווייטאג, קיינער קען זיי נישט פארשטיין.

איך בעט דיר זייער, דערהאלט זיך, ווארט אויס, לויף נישט אוועק, אז דו זוכסט וואו צו אנטלויפן – זאלסטו אנטלויפן צום אייבערשטן און צו די תורה. זיי זיך מתבודד, זאג פארן אייבערשטן און דיין שפראך: "רבונו של עולם איך בין אזוי צעבראכן, איך וויל נישט זיין אליין, איך דארף א ווייב, איך וויל חתונה האבן, איך וויל זיין הייליג, איך וויל נישט פאלן אין פגם הברית, הייליגער באשעפער ווען וועל איך שוין טרעפן מיין שידוך; ווען? ווילאנג נאך?"

טייערער ברודער, בלייב שטארק מיט דיין צלם אלקים, מיט דיין בארד און פאות, זיי שטארק מיט אנטון תפילין און מיט היטן שבת.

איך בעט פאר דיר.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

טייערער ליבער ... נרו יאיר

איך ווייס עס איז דיר ביטער שווער, דו ווילסט שוין דיין שידוך, דו קענסט נישט זיין אפגעהיטן, דער יצר הרע ווארפט זיך אראפ, עס איז דיר ביטער שווער, עס איז דיר טונקל און פינסטער.

דאך בעט איך דיר מיין ליבער ברודער, דראפע זיך און דערהאלט זיך מיט אלע דיינע כוחות, גלייב באמונה שלמה אז דער אייבערשטער האט פאר דיר א שידוך, און אפילו דיינע עלטערן האבן זייערע חשבונות וכו' – האט דער אייבערשטער א גוטע פלאן פאר דיר.

איך בעט דיר, דערהאלט זיך, גיי יעדן טאג אין א שטילע פלאץ און רעד זיך אויס דיין הארץ, זאג: "אייבערשטער עס איז מיר ביטער שווער, איך דארף מיין שידוך, איך וויל שוין חתונה האבן און זיין ריין און הייליג, איך קען נישט זיין אליין, איך פאל אראפ אין פגם הברית. אייבערשטער האב רחמנות אויף מיר, זיי נישט ברוגז אויף מיר אז איך זינדיג, עכט וויל איך נישט זינדיגן, עכט וויל איך זיין ערליך, עכט וויל איך זיין ריין, אבער יעדעס מאל פאל איך אראפ נאכאמאל און נאכאמאל, העלף מיר, געב מיר שמחה, געב מיר ישוב הדעת, איך זאל קענען יעדן איינעם פרייליך מאכן, און אויך א שידוך, א גוטע ערליכע פרומע מיידל, איך וויל אויפשטעלן אן ערליכע שטוב".

איך האף צום אייבערשטן איך וועל זיין דיין שדכן.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד מיין טייערער ... נרו יאיר

שטארק זיך טייערער ברודער, לאז זיך נישט נאך, מוהרא"ש זאגט אויפן פסוק (בראשית א, ה): "וַיְהִי עֶרֶב וַיְהִי בֹקֶר", ערשט איז פינסטער, אבער נאכדעם ווערט טאג, עס ווערט ליכטיג.

אז עס איז דיר גאר ביטער – זאלטו זיך אויסגיסן דאס הארץ צום אייבערשטן, זאג פארן באשעפער, דערצייל אים ווי עלנד דו ביסט, דערצייל אים די פרטים פון דיין משפחה, וואס גייט איבער אויף דיר, און ווי שווער עס איז דיר צו זיין א בחור, וכל המרבה להתבודד – הרי זה משובח; ווי מער מען שמועסט מיטן באשעפער – ווערט אלעס גרינגער און לייכטער.

בעזרת ה' יתברך - יום ג' פרשת שמות, שובבי"ם, כ"א טבת, שנת תשפ"ד לפרט קטן

לכבוד מיין טייערער ... נרו יאיר, בני ברק

איך האב ערהאלטן דיין בריוו.

א שאד יעדן טאג וואס דו פארסט נישט קיין ירושלים זיין אין ישיבה, דו וועסט אזויפיל קונה זיין דארט; דער מגיד שיעור משה שמואל האט אזויפיל דיר צו געבן, א שאד יעדן טאג וואס דו גייסט נישט.

קום אין ישיבה און הער זיך צו צום מגיד שיעור, לערן דיינע שיעורים כסדרן און גיי התבודדות, וועסטו שנעל טרעפן דיין שידוך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת מקץ, כ"ח כסליו, ד' דחנוכה שנת תשפ"ד לפרט קטן

לכבוד מיין טייערער ... נרו יאיר

טייערער ברודער, אפילו דו ביסט אזוי צעבראכן, דו דארפסט א שידוך, דו טראכסט שווארץ, דו זעסט נאר טונקל, דו ווייסט קלאר דו וועסט נישט טרעפן קיין שידוך – דאך בעט איך דיר ליבער ברודער, חזק ואמץ בכל כוחך, שטארק זיך מיט אלע דיינע כוחות, דראפע זיך און דערהאלט זיך.

נעם די עצות פון רבי'ן, די עצה פון התבודדות ותפילה; גיי אין א ווינקל און וויין צום אייבערשטן, זאג אים די ווערטער: "רבונו של עולם, האב אויף מיר רחמנות, איך וויל שוין חתונה האבן, איך בין א פלג גוף, איך בין צעריסן און צעשניטן, איך בין אזוי צעבראכן, איך פאל אראפ אין פגם הברית, אין הוצאת זרע לבטלה. הייליגער באשעפער, זיי נישט בייז אויף מיר, פארגעב מיר, איך וויל אזוי שטארקן זיין גוט, הייליג און ריין, וואס זאל איך טון, איך פאל אראפ בשוגג, במזיד, באונס וברצון, הייליגער באשעפער, געב מיר מיין שידוך. הייליגער באשעפער קיינער ווייסט נישט ווי שווער עס איז מיר, קיינער חלומ'ט נישט אז איך שלאג זיך יעדע רגע צו בלייבן א איד, אנא ה' הושיעה נא, בזכות הצדיקים שמסרו נפשם אליך יתברך, אמן".

ביי די איבריגע צייט פון טאג זאלסטו טאנצן און פאטשן און הערן פרייליכע באמבעדיגע מוזיק.

בעזרת ה' יתברך - יום ג' פרשת תולדות, ראש חודש כסליו, שנת תשפ"ד לפרט קטן

לכבוד מיין טייערער ... נרו יאיר

שמיר זיך נישט קיין פערפיום. דער רמב"ם זאגט (פרק ה' מהלכות דעות, הלכה ט): "לֹא יֵצֵא מְבֻשָּׂם לַשּׁוּק", מען זאל זיך נישט שמירן מיט בשמים, "וְלֹא בִּבְגָדִים מְבֻשָּׂמִים", אויך די קליידער זאל מען נישט אנשמירן; מאך זיך נישט נאריש מיט די מעשה נערות, דאס וועט דיר נישט ברענגען קיין גליק.

לייג אריין דיין מח מחשבה אין תורה, תפילה און הפצה; נישט אין קליידער, דאס איז מעשה יצר. דער הייליגער רבי זאגט (שיחות הר"ן, סימן ק): "הַבַּעַל דָּבָר וְהַסִּטְרָא אַחֲרָא תּוֹפֶסֶת אֶת הָאָדָם בְּבִגְדוֹ", דער יצר הרע כאפט א מענטש מיט די קליידער, דאס איז וואס שטייט ביי אשת פוטיפר (בראשית לט, יב): "וַתִּתְפְּשֵׂהוּ בְּבִגְדוֹ", די קליפות כאפן דעם מענטש דורך די קליידער, אבער יוסף הצדיק לערנט אונז (שם): "וַיַּנַּח בִּגְדוֹ אֶצְלָהּ וַיָּנָס" וְכוּ', ער קוקט נישט אויף די קליידער.

איך וויל זיין מיט דיר אפן, זייט דו פוצט זיך אויס האסטו ווייניגער חן, ענדערש לייג אריין קאפ און מח אין תורה ותפילה והפצה – וועסטו האבן חן און טרעפן דיין שידוך

בעזרת ה' יתברך - יום ג' פרשת חיי שרה, כ"ג מר-חשון, שנת תשפ"ד לפרט קטן

לכבוד מיין טייערער ליבער ... נרו יאיר

זייער גוט טוסטו אז דו האסט נישט גענומען אן אנדערע ארבעט, ביסט געבליבן ארבעטן נעבן די ישיבה, אז דו זאלסט קענען ארויפקומען יעדן טאג אין ישיבה לערנען אביסל און בעיקר הערן די שיינע זיסע שיעורים פון רבי'ן.

איך געדענק יארן צוריק האט מיר מוהרא"ש געזאגט, בחורים מעגן ארבעטן אבער זע נאר זיי זאלן בלייבן צוגעבינדן צו די ישיבה.

רבי נתן האט געבעטן דעם רבי'ן: "רבי, בינד מיך צו אין דיין זאק, איך זאל נישט קענען אנטלויפן"; דאס דארף מען בעטן און אויך טון במעשה, אלע סארט שפיצלעך און דריידלעך צו בלייבן פארקנופט ביים רבי'ן.

שרייב מיר אויך אמאל א בריוו. שרייבן בריוו איז א זאך וואס קנופט צו דעם מענטש.

בעזרת ה' יתברך - יום ג' פרשת חיי שרה, כ"ג מר-חשון, שנת תשפ"ד לפרט קטן

לכבוד מיין טייערער ליבער ... נרו יאיר

עס לוינט צו אויסווארטן אויף "שלחן עורך"; נאך אביסל וועסטו טרעפן דיין שידוך און אויפשטעלן א אידישע שטוב, א בית המקדש מעט.

איך ווייס עס איז דיר ביטער שווער, ביסט אליין, ווילסט שוין האבן דיין שידוך; וועם אויף דער וועלט איז נאך אזוי ביטער ווי א בחור אדער מיידל וואס ווארטן אויף א שידוך...

דאך בעט איך דיר, דראפע זיך, בלייב שטארק, גיי אן מיט דינען דעם אייבערשטן.

אויך זאלסטו זיך נישט נאכלאזן, גיי יעדן טאג אין מקוה, און איידער דו טובל'סט זיך זאלסטו זיך אפבאדן, זאלסט זיין פריש. טויש זיך קליידער יעדן טאג, און די אויסגענוצטע וועש זאלסטו אוועקווארפן. נעם צוזאם דיינע פיאות, עס זאל נישט זיין צופלויגן, מעגסט לייגן אביסל דזשעל.

גיי ארום מיט א שמייכל, מענטשן ווארטן צו זען א שמייכל, דאס איז וואס מען זוכט ביי א שידוך, א פרייליכע פנים מיט חן.

בעזרת ה' יתברך - יום ב' פרשת תולדות, כ"ט מר-חשון, שנת תשפ"ד לפרט קטן

לכבוד מיין טייערער ... נרו יאיר

פארליר זיך נישט, אפילו דו ווארטסט אזוי לאנג אויף דיין שידוך – בלייב שטארק, גיי אן מיט דיין עבודת השם.

איך ווייס אז איך קען דיך נישט פארשטיין, איך האב נישט קיין אנונג פון דיין צער, ווייל קיינער פארשטייט נישט די צער פון א בחור, פון זיין א פלג גוף; דאך בעט איך דיר ליבער ברודער, גיי אן מיט תורה, מיט תפילה, מיט גמילת חסדים, און פלוצלונג וועט קומען דיין ישועה.

למען השם לאז זיך נישט נאך, לאז זיך נישט אראפפאלן; זיי פעלזן פעסט. גיי יעדן טאג אין מקוה, אויך זאלסטו זיך אפוואשן יעדן טאג און אנטון פרישע קליידער. דיין הוט און שיך און רעקל זאלן זיין אן פלעקן. אויך זאלסטו ארויפציען א שמייכל, אפילו עס איז פאלש, אפילו עס איז נישט עכט; אזוי וועסטו באקומען דיין שידוך.

בעזרת ה' יתברך - יום ה' פרשת נח, ד' מר-חשון, שנת תשפ"ד לפרט קטן

לכבוד מיין טייערער ... נרו יאיר

מיין הארץ גייט אויס פאר דיר, עס איז מיר צעריסן אויף שטיקער צו זען ווי דו ווארסט אויף דיין שידוך אזוי לאנג, און גארנישט רוקט זיך נישט; עס גייט אריבער א יאר און נאך א יאר, אלע דיינע חברים מאכן שוין אפשערנס, און נאך אביסל איז שוין דא בר מצווה'ס - און ביי דיר גייט נישט קיין שידוך.

וואס זאל איך דיר זאגן מיין טייערער ליבער ברודער, איך האב דיר נישט וואס צו זאגן, איין זאך קען איך דיר זאגן: "לאז נישט אפ די אמונה, לאז נישט אפ די אמונת חכמים און חס ושלום אפלאזן דיינע עבודות השם"; דו זיי ממשיך מיט דיינע שיעורים כסדרן, מיט דיין שיעור אין חומש, משניות, גמרא וכו' וכו', און גיי ווייטער התבודדות, ביז דער אייבערשטער וועט דיר העלפן.

איין זאך וויל איך פון דיר, דו זאלסט זיך אונטערנעמען צו זאגן יעדן טאג די תפילה וואס מוהרא"ש האט געשריבן פאר בחורים וואס זענען שוין העכער צוואנציג, וואס חכמינו זכרונם לברכה זאגן (קידושין כט:) אויב מען האט נישט חתונה איידער די צוואנציג - וועלן די ביינער צעגיין, מען שעלט דעם בחור: "תיפח עצמותיו"; מוהרא"ש האט געשריבן א מורא'דיגע תפילה, ווי אין די תפילה טענה'ט מען זיך אויס מיטן אייבערשטן: "רבונו של עולם, נישט גענוג עס גייט מיר נישט קיין שידוך, שעלט מען מיך אז מיינע ביינער זאלן צעגיין? רבונו של עולם, נישט גענוג איך פאל אין עבירות, איך וויל אזוי שטארק זיין אפגעהיטן, איך וויל אזוי שטארק שוין לעבן אן ערליכע לעבן, א געזונטע לעבן מאן און ווייב - שעלט מען מיר..."

וויל איך דיר בעטן זאלסט מיר זאגן אז דו גייסט יעדן טאג זאגן די תפילה, עס מוז נישט זיין מיט געפיל, דער עיקר, זאלסט יעדן טאג זאגן די תפילה; זאג איך דיר צו, עס וועט נישט אריבערגיין קיין סאך צייט און דו וועסט האבן דיין שידוך.

"רִבּוֹנוֹ שֶׁל עוֹלָם, הֵיילִיגֶער בַּאשֶׁעפֶער, הֶעלְף מִיר אַז אִיךְ זָאל שׁוֹין זוֹכֶה זַיין צוּ טְרֶעפְן אַ גוּטֶע שִׁידוּךְ, אִיךְ זָאל זוֹכֶה זַיין חֲתוּנָה צוּ הָאבְּן שְׁנֶעל אוּן גְרִינְג אוּן נִישְׁט דַארְפְן וַוארְטְן מֶער אַזוֹי לַאנְג.

הֵיילִיגֶער בַּאשֶׁעפֶער אִיךְ וֵוייס אַז אִיךְ הָאבּ זִיךְ נִישְׁט אוֹיפְגֶעפִירְט וִוי עֶס דַארְף צוּ זַיין, אוּן אַז אִיךְ בִּין נִישְׁט אֵייבִּיג גֶעוֶוען אַזוֹי וואוֹיל אוּן עֶרְלִיךְ. אִיךְ בֶּעט דִיר אָבֶּער, רִבּוֹנוֹ שֶׁל עוֹלָם, אַז דוּ זָאלְסְט נִישְׁט קוּקְן אוֹיף דֶעם אוּן צוּלִיבּ דֶעם צוּרִיק הַאלְטְן מַיין שִׁידוּךְ. זֵיי מִיר מוֹחֵל אוֹיף אַלֶעס וָואס אִיךְ הָאבּ נִישְׁט גוּט גֶעטוּן, אוּן הֶעלְף מִיר אַז אִיךְ זָאל שׁוֹין שְׁנֶעל חֲתוּנָה הָאבְּן, אוּן דָאס וֶועט מִיר הֶעלְפְן אוּן רַאטֶעוֶוען אַז אִיךְ זָאל מֶער נִישְׁט טוּן קַיין עֲבֵירוֹת אוּן אִיךְ זָאל שׁוֹין זַיין וואוֹיל אוּן עֶרְלִיךְ.

וָואס זָאל אִיךְ טוּן, רִבּוֹנוֹ שֶׁל עוֹלָם? פוּן מַיין זַייט בִּין אִיךְ גְרֵייט חֲתוּנָה צוּ הָאבְּן הַיינְט נַאכְט! וָואס קֶען אִיךְ טוּן אַז אִיךְ הָאבּ נָאכְנִישְׁט גֶעטְרָאפְן מַיין שִׁידוּךְ? אִיךְ וַוארְט אוּן אִיךְ וַוארְט אוּן אִיךְ בֶּעט דִיר שׁוֹין אַזוֹי לַאנְג אַז אִיךְ וִויל שׁוֹין חֲתוּנָה הָאבְּן, אוּן דֶערְוַוייל אִיז עֶס נָאכְנִישְׁט אָנְגֶעקוּמֶען.

דִי חַזַ"ל זָאגְן אוּנְז אַז וֶוען אֵיינֶער הָאט חֲתוּנָה נָאךְ דִי צְוָואנְצִיג יָאר, וֶועט עֶר שׁוֹין זַיין גַאנְץ לֶעבְּן טְרַאכְטְן פוּן עֲבֵירוֹת, אוּן דוּ זָאגְסְט אוֹיף אַזַא מֶענְטְשׁ אַז זַיינֶע בֵּיינֶער זָאלְן צוּגֵיין. פַארְוָואס זָאל מִיר קוּמֶען אַזַא הַארְבֶּער עוֹנֶשׁ אַז אִיךְ זָאל מַיין גַאנְץ לֶעבְּן טְרַאכְטְן פוּן עֲבֵירוֹת, אוּן אַז מַיינֶע בֵּיינֶער זָאלְן צוּגֵיין? וָואס בִּין אִיךְ דֶען שׁוּלְדִיג? פַארְוָואס קוּמְט עֶס מִיר? אִיז מִיר נִישְׁט גֶענוּג דִי שְׁרֶעקְלִיכֶע פַּיין אוּן וֵוייטָאג וָואס אִיךְ הָאבּ פוּן דֶעם אַלֵיין אַז אִיךְ הָאבּ נָאכְנִישְׁט חֲתוּנָה גֶעהַאט?

הֵיילִיגֶער בַּאשֶׁעפֶער הֶעלְף מִיר אַז אִיךְ זָאל זוֹכֶה זַיין צוּ הָאבְּן סַבְלָנוּת אוּן גֶעדוּלְד, אוּן אוֹיסְוַוארְטְן מִיט רוּאִיגְקֵייט בִּיז אִיךְ וֶועל שׁוֹין זוֹכֶה זַיין חֲתוּנָה צוּ הָאבְּן. הֶעלְף מִיר אַז אִיךְ זָאל נִישְׁט הָאבְּן קַיין קֻשְׁיוֹת אוֹיף דִיר. הֶעלְף מִיר אַז אִיךְ זָאל גְלֵייבְּן מִיט אַ שְׁטַארְקֶע אֱמוּנָה אַז דוּ טוּסְט אַלֶעס נָאר צוּם גוּטְן, אוּן יֶעדֶע זַאךְ הָאט אַ פּוּנְקְטְלִיכֶער חֶשְׁבּוֹן, אוּן מִיט דֶעם זָאל אִיךְ זִיךְ שְׁטַארְקְן אוּן נִישְׁט זַיין אַזוֹי צוּבְּרָאכְן פוּן מַיינֶע שְׁוֶוערִיקַייטְן.

הֵיילִיגֶער בַּאשֶׁעפֶער, נָאר דוּ קֶענְסְט מִיר פַארְשְׁטֵיין! נָאר דוּ וֵוייסְט מַיינֶע גֶעפִילְן! וִוי אַזוֹי אִיךְ שְׁפִּיר זִיךְ אַזוֹי פַארְשֶׁעמְט אוּן דֶערְנִידֶערְט פוּן מִיר אַלֵיין! אַז אַלֶע מַיינֶע חֲבֵרִים הָאבְּן שׁוֹין חֲתוּנָה גֶעהַאט אוּן נָאר אִיךְ בִּין גֶעבְּלִיבְּן אַלֵיין! הֶעלְף מִיר אַז דִי בִּזְיוֹנוֹת זָאלְן זַיין פַאר כַּפָּרַת עַווֹנוֹת אַז מִיט דֶעם זָאל אִיךְ אָפְּקוּמֶען אַלֶע מַיינֶע עֲבֵירוֹת, אִיךְ זָאל מֶער נִישְׁט דַארְפְן לַיידְן אַזוֹיפִיל אוּן אִיךְ זָאל שׁוֹין זוֹכֶה זַיין חֲתוּנָה צוּ הָאבְּן בְּקָרוֹב.

אִיךְ וֵוייס אוּן אִיךְ גְלֵייבּ, הֵיילִיגֶער בַּאשֶׁעפֶער, אַז דוּ וֶועסְט מִיר זִיכֶער נִישְׁט פַארְלָאזְן. סוֹף כָּל סוֹף וֶועל אִיךְ זוֹכֶה זַיין חֲתוּנָה צוּ הָאבְּן. אוּן דֶערְפַאר בֶּעט אִיךְ דִיר, רִבּוֹנוֹ שֶׁל עוֹלָם, אַז וֶוען אִיךְ וֶועל שׁוֹין חֲתוּנָה הָאבְּן זָאל אִיךְ זוֹכֶה זַיין צוּ הָאבְּן אַ גוּטֶע שָׁלוֹם בַּיִת, אִיךְ זָאל זִיךְ קֵיינְמָאל נִישְׁט קְרִיגְן אִינְדֶערְהֵיים, עֶס זָאל שְׁטֶענְדִיג הֶערְשְׁן בַּיי אוּנְז אַהֲבָה וְאַחְוָה וְשָׁלוֹם וְרֵעוּת, מִיר זָאלְן זִיךְ לִיבּ הָאבְּן אוּן הָאבְּן אַ גְלִיקְלִיךְ לֶעבְּן אִינְאֵיינֶעם, אוּן אִיךְ זָאל זִיךְ קֵיינְמָאל נִישְׁט דַארְפְן גֶט'ן חַס וְשָׁלוֹם.

הֶעלְף מִיר אַז אִיךְ זָאל שְׁטֶענְדִיג זַיין אַ וַתְּרָן, אִיךְ זָאל אֵייבִּיג מְוַותֵּר זַיין אוּן נִישְׁט זִיךְ קְרִיגְן נָאר שְׁטֶענְדִיג אַרוֹיסְהֶעלְפְן. מִיר זָאלְן הָאבְּן אַ פְרֵיילִיכֶע הוֹיז, עֶס זָאל זִיךְ שְׁפִּירְן דִי שִׂמְחָה אִין דִי לוּפְט בַּיי אוּנְז אִינְדֶערְהֵיים. אִיךְ זָאל זוֹכֶה זַיין צוּ הָאבְּן גֶעזוּנְטֶע אוּן עֶרְלִיכֶע קִינְדֶער, אִיךְ זָאל זֵיי אוֹיפְצִיעֶן אוֹיפְן עֶרְלִיכְן אִידִישְׁן וֶועג אוּן זֶען אַסַאךְ אִידִישׁ נַחַת פוּן זֵיי. מַיין שְׁטוּבּ זָאל זַיין אָפְן פַאר אַנְדֶערֶע אִידִישֶׁע קִינְדֶער אַרַיינְצוּנֶעמֶען אוֹרְחִים אוּן צוּ טוּן אַסַאךְ צְדָקָה אוּן חֶסֶד.

הֵיילִיגֶער בַּאשֶׁעפֶער, נֶעם אָן מַיין תְּפִלָה, אוּן הֶעלְף מִיר שׁוֹין, אִין זְכוּת פוּן אַלֶע צַדִיקִים וּבִּפְרַט אִין דִי זְכוּת פוּן הֵיילִיגְן רֶבִּי'ן רַבֵּנוּ נַחְמָן בֶּן פֵיגָא זְכוּתוֹ יָגֵן עָלֵינוּ, [אוּן אִין זְכוּת פוּן רַבֵּנוּ אֱלִיעֶזֶר שְׁלֹמֹה בֶּן מְנַחֵם זְאֵב זְכוּתוֹ יָגֵן עָלֵינוּ, וָואס הָאט גֶעמַאכְט דִי תְּפִלָה], אָמֵן כֵּן יְהִי רָצוֹן".

*

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת לך לך, י' מר-חשון, שנת תשפ"ד לפרט קטן

לכבוד מיין טייערער ליבער ... נרו יאיר, תלמיד ישיבת תפארת התורה

איך האב ערהאלטן דיינע בריוו.

וואס קען איך דיר זאגן? וואס איז דא צו זאגן? די צער פון א בחור איז נישט צו פארשטיין, עד כדי כך, מוהרא"ש זאגט (ארך אפים, אות סבלנות לבחור): "אין צער כצערו של בחור, ואף אחד בעולם מבין את הצער של רווק", קיינער פארשטייט נישט די ווייטאג פון א בחור וואס וויל חתונה האבן און וויל זיין אפגעהיטן בשמירת הברית – און עס גייט אים נישט, ער האלט אין איין פוגם זיין רחמנא לצלן.

גיי התבודדות יעדן טאג און וויין צום אייבערשטן, בעט אים ער זאל רחמנות האבן אויף דיר. בעט אין דיין שפראך, אין אידיש, אייגן געמאכטע תפילות. לאז נישט אפ די שווערד פון תפילה – וועסטו מנצח זיין, וועסט אראפנעמען אלע דינים פון דיר און זוכה זיין צו א שידוך בקרוב.

האלט זיך פריש, לאז זיך נישט נאך. בייט יעדן טאג די וועש, גיי נישט צוויי טעג מיט די זעלבע וועש.

אויך זאלסטו זיך אפוואשן יעדן טאג און זיך צוזאמנעמען די פיאות, די בארד.

גיי אנגעטון ריין, אן קיין פלעקן.