בעזרת ה' יתברך
אדר, שנת תשפ"א לפרט קטן
חשוב'ע כלה ... תחי'
מזל טוב פאר אייער חתונה; דער אייבערשטער זאל העלפן עס זאל זיין צווישן אייך נאר אהבה ואחוה, שלום וריעות.
דעם ספר געב איך פאר אלע תלמידים ותלמידות; דער ספר "לכל זמן" איז זייער א וויכטיגע ספר, די הלכות זענען געשריבן זייער קלאר.
מען דארף דאס חזר'ן גאר אסאך מאל מען זאל קענען די הלכות אויסנווייניג צו קענען פירן א אידישע שטוב און האבן געזונטע קינדער.
בעזרת ה' יתברך
יום ה' פרשת כי תשא, כ' אדר, שנת תשפ"א לפרט קטן
לכבוד מיין טייערער ... נרו יאיר, קרית ברסלב
מזל טוב פאר דיין חתונה, דער אייבערשטער זאל העלפן זאלסט זוכה זיין אז די שכינה זאל רוען ביי דיר אין שטוב.
טייערער ..., יעצט איז די שענסטע צייט פון לעבן; האסט זוכה געווען האסט חתונה געהאט, קענסטו יעצט דינען דעם אייבערשטן בקדושה ובטהרה.
לדעתי זאלסטו אננעמען אן ארבעט ביי ...; דו וועסט זייער הנאה האבן, סיי אז עס איז אין שטעטל, סיי דו וועסט האבן א גוטע בעל הבית און סיי עס איז א ריינע ארבעט, דו וועסט זיין באשעפטיגט מיט טליתים און בייטלעך.
מאך זיך א סדר אויפצושטיין פארטאגס; דאס ערשטע זאך זאלסטו גיין אביסל שפאצירן, זיך מתבודד זיין.
טייל איין די התבודדות אין דריי חלקים. די ערשטע חלק זאל זיין וידוי דברים, דערצייל דעם אייבערשטן וואס דו האסט געטון. די צווייטע חלק, זאלסטו דאנקען דעם אייבערשטן און די דריטע חלק - זאלסטו בעטן אויף ווייטער.
נאכדעם זאלסטו לויפן אין שול דאווענען און לערנען; גיי יעדן טאג צום שיעור גמרא, לערן א בלאט גמרא יעדן טאג. נאכדעם וועסטו גיין ברענגען פרנסה און ווען דו ענדיגסט ארבעטן וועסטו אהיים גיין צו דיין ווייב איר פרייליך מאכן.
בעזרת ה' יתברך
יום ה' פרשת משפטים, כ"ט שבט, שנת תשפ"א לפרט קטן
חשוב'ע כלה ... תחי', תלמידה בית פיגא ברסלב
אלע כלות פרעגן די זעלבע זאך, 'אויף וואס דארף מען דער עיקר בעטן ביום החופה?' אסאך כלות גייען אריין אין א לחץ פון "אויסנוצן דעם יום החופה", מען שפירט שלעכט טעג און וואכן פאר די חתונה אז "אפשר וועל איך נישט 'אויסנוצן מיין יום החופה'", "וואס קען איך טון 'אויסצונוצן מיין יום החופה'"?
אמת טאקע, די יום החופה איז זייער א גרויסע טאג, מען קען אין דעם טאג אלעס פאררעכטן, אבער אויב קומט אריין לחצים און פחדים, דארף מען וויסן אז דאס האט גארנישט צוטון מיט עבודת השם. אויב איז מען רואיג און פרייליך, דעמאלט איז מען נאנט צום אייבערשטן, פחדים פון "אויסנוצן די צייט" האט נישט מיט עבודת השם.
ווען עס קומט אריין אין מחשבה 'וואס דארף איך טון?' זאלט איר געדענקען וואס צו טון; מען דארף איין זאך טון, זאגן: "יישר כח אייבערשטער"; דאנקען און לויבן דעם אייבערשטן.
אינעם יום החופה זאלט איר דאנקען דעם אייבערשטן אז איר האלט שוין דא, איר שטייט שוין אינעם טאג פון אייער חופה.
איר האט מיר געבעטן א תפלה וואס צו בעטן ביום החופה:
"רבונו של עולם, איך דאנק דיר זייער; דו ביסט אזוי גוט צו מיר, דו געבסט מיר אלעס, איך דאנק דיר אז איך בין זוכה חתונה צו האבן.
העלף מיר רבונו של עולם אז מיין גאנץ לעבן זאל איך האבן אמונה; איך, מיין מאן, מיינע קינדער און אייניקלעך זאלן האבן א שטארקע, ריינע און קלארע אמונה אין דיר; איך מיט מיין משפחה זאלן זיין צוגעבינדן צו הייליגע צדיקים, צום הייליגן רבי'ן.
הייליגער באשעפער, העלף אלע אידן זאלן זיין געזונט, אלע זאלן האבן שפע, פרנסה בריווח. הייליגער באשעפער, האב רחמנות אויף אונז, דערבארעם זיך אויף דיינע קינדער, לייז אונז שוין אויס פונעם גלות".
אזוי זאלט איר בעטן און צולייגן אייערע אייגענע תפילות, אבער אן קיין לחץ.
דער אייבערשטער זאל העלפן איר זאלט אויפשטעלן מיט אייער חתן א ליכטיגע שטוב, בנים ובני בנים עוסקים בתורה ובמצוות, אמן.
בעזרת ה' יתברך
יום ג' פרשת יתרו, כ' שבט, שנת תשפ"א לפרט קטן
לכבוד מיין טייערער ... נרו יאיר
א גרויסן יישר כח פאר אלעס וואס דו טוסט פאר די מוסד. א דאנק פאר'ן איבערנעמען די טראנספארטעישן; דו טראגסט די אחריות אז אלע זאלן זיין צייטליך און אכטונג געבן אויף די נכסים פון ישיבה, אלע עלטערן באדאנקען זיך פאר'ן מאכן טראנספארטעישן אין די טאג פון די שניי.
איך וויל דיר בעטן זאלסט העלפן דעם חתן ... נרו יאיר ער זאל קענען איינקויפן פאר זיין חתונה. ער האט חתונה אין צוויי וואכן ארום ואין בידו לפורטה אפילו שוה פרוטה, ער וואלט ווען געקענט האבן היינט אוועקגעלייגט געלט אזוי ווי אנדערע בחורים וואס זארגן פאר זיך און גייען ארבעטן, למעשה האט ער זיינע אלע יארן נאר געזארגט פאר די מוסד, אנגעהויבן מיט'ן זיין א מלמד, שפעטער געדרייווט, ועל כולם די לעצטע צוויי יאר, זייט מען האט געעפנט די שטעטל - האט ער זיך אוועקגעגעבן כל כולו פאר'ן שטעטל.
זע עס זאל זיין בדרך כבוד.
בעזרת ה' יתברך
יום ג' פרשת יתרו, כ' שבט, שנת תשפ"א לפרט קטן
מרת ... תחי'
בשם אונזער גאנצע קהילה טוען מיר זיך באדאנקען פאר אייך פאר'ן ארויסהעלפן מיט'ן צושטעלן עסן פאר אנשי שלומינו בעת שמחתם, איר ארגאניזירט אלע משפחות זאלן זיך באטייליגן ווען עס איז דא א חתונה, א בר מצוה, א שבת שבע ברכות - עס זאל נישט קאסטן קיין געלט פאר די מחותנים.
יעצט קומט נאך פיר חתונות איינס נאכן צווייטן. מיטוואך פרשת תרומה מאך איך בעזר ה' חתונה, א וואך נאכדעם - דינסטאג פרשת תצוה איז דא נאך א חתונה, פון החתן ..., א וואך נאכדעם - מאנטאג כי תשא מאכט דער מנהל ... חתונה און זונטאג ויקרא - ראש חודש ניסן איז די חתונה פון ... בן הרב ר' ...
איך האף איר וועט קענען ווייטער זארגן פאר אנשי שלומינו עס זאל זיין בחנם די יום החתונה; איר וועט פרעגן משפחות ווער עס קען העלפן מיט א קוגל וכדומה, מען שטעלט נאר צו פאר די נאנטע משפחה, געשוויסטער פון די מחותנים.
אויך וויל איך מאכן די סעודת פורים אום מוצאי שבת פאר אנשים ונשים; וויל איך אייך בעטן אויב מען קען דאס אויך אינזין האבן.
יישר כח
בעזרת ה' יתברך
יום ב' פרשת יתרו, י"ט שבט, שנת תשפ"א לפרט קטן
לכבוד מיין טייערער ... נרו יאיר
א גרויסן יישר כח פאר'ן מיר העלפן חתונה מאכן מיין זון הרב אלחנן חיים נרו יאיר; אינעם זכות פון צדקה, הכנסת כלה - זאלסטו האבן גרויס שפע.
איך לאדן דיר פערזענליך צו די חתונה; די חתונה וועט פארקומען מיטוואך פרשת תרומה אין ישיבה.
מיר האלטן יעצט ביי די צוואנציגסטע חתונה אין ישיבה; יעדע פאר חדשים קומט א צווייטער מיט א גראגער און הייבט אן גראגערן מיט נייע פלענער ווי אזוי צו ראטעווען מחותנים פון קראנק ווערן, אבער אויף למעשה דארף מען דעם רבי'ן, דער רבי עפנט אויף די אויגן מען זאל זען דאס נארישקייט פון אויסגעבן געלט פאר אביסל כח המדומה.
אנשי שלומינו מאכן חתונה אין בית המדרש; עס קאסט נישט קיין געלט, די חתונה איז הערליך שיין, עס פעלט גארנישט - נאר חובות.
בעזרת ה' יתברך
יום ב' פרשת יתרו, י"ט שבט, שנת תשפ"א לפרט קטן
לכבוד מיין טייערער ... נרו יאיר
מיט'ן אייבערשטנ'ס הילף מאך איך חתונה מיין טייערער זון הרב אלחנן חיים נרו יאיר, די חתונה וועט פארקומען אין ישיבה מיטוואך פרשת תרומה; איך וועל זיך זייער פרייען אז דו וועסט זיך באטייליגן ביי די שמחה מיט דיין משפחה.
איך בענק זיך נאך דיר, איך האב דיר שוין לאנג נישט געזען, איך האף אז אלעס איז אין ארדענונג ביי דיר.
איך וואונדער זיך אויב דו לערנסט נאך דיינע שיעורים כסדרן, מקרא, משנה, גמרא וכו', וכו'; איך געדענק די התמדת התורה דיינע, ווי דו פלעגסט זיצן אין בית המדרש מיט'ן משניות, מיט'ן גמרא.
איך האף איך וועל דאס נאך זוכה זיין צו זען.
בעזרת ה' יתברך
יום א' פרשת יתרו, י"ח שבט, שנת תשפ"א לפרט קטן
הכלה ... תחי', תלמידה בית פיגא
מזל טוב פאר אייער שידוך! דער אייבערשטער זאל העלפן איר זאלט זוכה זיין צו ליכטיגע דורות אינאיינעם מיט אייער טייערער חתן.
יעצט ווען איר גרייט זיך צו די חתונה זאלט איר אכטונג געבן אויף אייערע עלטערן; עס איז נישט ווערד די גאנצע חתונה האבן אויב מען טוט וויי די מאמע, עס איז נישט ווערד די גאנצע לעבן וויי צו טון טאטע מאמע. אז אייער מאמע וויל אייך קויפן איין זאך און איר ווילט א צווייטע זאך, זאלט איר זיך נישט קריגן, איר קענט איינמאל זאגן שיינערהייט: "מאמי, איך וויל זייער שטארק די קלייד, די שיך וכו'", און אז אייער מאמע וויל אנדערש - זאלט איר גיין ווי זי וויל.
פארגעסט נישט, נאך אביסל זענט איר די מאמע; נאך אביסל וועט איר זאגן פאר אייערע קינדער וואס צו טון, ווי אזוי וועט איר זיך שפירן ווען אייער קינד וועט זיך אוועק גיין, זי וועט נישט וועלן רעדן מיט אייך? זי וועט נישט אננעמען וואס איר זאגט?
איך האף איר וועט אננעמען מיין בריוו, וועט אייך גוט זיין.
בעזרת ה' יתברך
יום ב' פרשת בשלח, י"ב שבט, שנת תשפ"א לפרט קטן
מרת ... תחי', קרית יואל
איך האב ערהאלטן אייער בריוו.
איך פריי זיך זייער צו הערן גוטע גרוסן פונעם חדר; איך האף צום אייבערשטן צו עפענען א סקול פאר מיידלעך בקרוב.
בנוגע וואס איר ווילט העלפן מאכן די האר ביי חתונות אין ישיבה; ביטע זיך פארבינדן מיט אונזער מנהלת, זי טיילט איין די ארבעט ביי די עזרת נשים.
בעזרת ה' יתברך
יום ג' פרשת בא, ו' שבט, שנת תשפ"א לפרט קטן
מרת ... תחי', טיטשער בית פיגא וויליאמסבורג
איך בין אייך זייער דאנקבאר פאר'ן העלפן די מוסד אזוי געטריי.
איר זענט זייער געטריי צו די תלמידות, איר געבט זייער אכטונג אויף זיי, איר באנעמט זיך מיט יעדעס קינד ווי אן איינציג קינד.
אויך דאנק איך אייך פאר'ן העלפן מיט די חתונות אין ישיבה, ביי די פרויען.
דער אייבערשטער זאל העלפן איר זאלט זוכה זיין צו בנים ובני בנים עוסקים בתורה ובמצוות.
בעזרת ה' יתברך
יום ב' פרשת וארא, כ"ז טבת, שנת תשפ"א לפרט קטן
לכבוד ... נרו יאיר
עס איז זייער שיין און וואויל דיינע פרישע געדאנקען מיט וואס דו קומסט אויף יעדע שני וחמישי וכו', אבער דאס דארף זיין מיט שכל; צום ביישפיל, האסט געמאכט פענער אויפגעשריבן דערויף "ברסלב"...; דאס איז זייער פיין און זייער שיין בשעת עס טוט זיך אין די גאסן, מענטשן זענען פארקאכט אין פאליטיק; דער לייגט אזא פאן און א צווייטער א צווייטע פאן - קומסטו מיט א ברסלב'ער פאן, אבער עס דארף זיין מיט שכל.
ביי די פאריגע חתונה אין ישיבה האסטו גענומען אפאר בחורים זיי זאלן דרייען מיט די פאן; זיי מיר מוחל, עס האט אויסגעזען מער ווי א פראטעסט ווי א חתונה, מענטשן זענען געקומען וואונטשן מזל טוב, זיי האבן געזוכט וואו עס איז די חתונה, עס האט אויסגעזען ווי אן הפגנה; די זיידעס און משפחה שטייען אין דער זייט, זיי ווייסן נישט וואס צו טראכטן, אזוי אויך איך.
ווילסט עוסק זיין אין הפצה - זאלסטו נעמען גליונות, ספרים און קונטרסים און דאס פארשפרייטן. דו קענסט זיך נישט פארשטעלן ווי מענטשן זענען זיך מחי' מיט דעם, מענטשן זאגן אז די ספרים עצתו אמונה איז פאר זיי ווי לופט צום לעבן, זיי נעמען דאס פאר זייער וועג ווייזער.
נייע זאכן זאלסטו מאכן מיט שכל.
בעזרת ה' יתברך
יום ה' פרשת ויגש, ט' טבת, שנת תשפ"א לפרט קטן
לכבוד תלמידות בית פיגא - "בית פיגא" וויליאמסבורג, "בית פיגא" ליבערטי
איך געפון זיך יעצט אין אומאן ביים הייליגן רבינ'ס ציון, איך בין מתפלל פאר אייך אלע, איר זאלט אלע מצליח זיין.
איך בין זייער פרייליך צו הערן די גוטע נייעס אז אלע מיידלעך קויפן קליידער ביי אונזער נייע באזאר; מען שטאלצירט צו גיין אנגעטון מיט קליידער וואס זענען נישט טייער, מען האט רחמנות אויף אידיש געלט, מען האט רחמנות אויף טאטע מאמע.
שטארקט אייך, געבט אכטונג אויף אידיש געלט; קויפט ביי אונז אין באזאר שיינע קליידער פאר ממש בחינם. העלפט ארויס די עלטערן זאלן בלייבן געזונט, זיי זאלן נישט דארפן בארגן געלט השם ישמרינו, קוקט נישט אויף די וואס גייען אנגעטון טייער, זייט זיי נישט מקנה.
די וואך איז געווען א הערליכע חתונה אין ישיבה, איר זענט אלע געווען, איר האט אלע געזען ווי שיין און לעבעדיג די חתונה איז געווען; איך האף אז אלע וועט איר חתונה האבן אין ישיבה פאר בחנם, איר וועט האבן שכל נישט אויסצוגעבן געלט פאר די פאר שעה אז 'אנדערע' זאלן מיינען מיר האבן געלט.
בעזרת ה' יתברך
יום ד' פרשת ויגש, ח' טבת, שנת תשפ"א לפרט קטן, אויפ'ן עראפלאן פארנדיג קיין אומאן
לכבוד מיין טייערער ... נרו יאיר
יעצט אז דו האסט זוכה געווען האסט חתונה געהאט - קענסטו ווערן א גרויסער צדיק. חכמינו זכרונם לברכה זאגן (פסחים קיב ע"ב; עיין יומא עב ע"ב): "מִצְוָה וְגוּף טָהוֹר, נוֹשֵׂא אִשָׁה וְלוֹ בָּנִים", ווען מען האט חתונה קען מען לערנען תורה מיט א ריינקייט.
זיי זיך קובע צו לערנען שיעורים בכל התורה; מקרא, משנה, גמרא, מדרש, הלכה ואגדה; שפעטער הייבט זיך אן טירדות, יעצט איז די שענסטע צייט; דיין ווייב וועט דיר נישט שטערן, זי וועט נאר הנאה האבן יעדע מינוט וואס דו וועסט לערנען.
בעזרת ה' יתברך
יום ד' פרשת ויגש, ח' טבת, שנת תשפ"א לפרט קטן, פארנדיג אויפ'ן עראפלאן קיין אומאן
לכבוד מיין טייערער ... נרו יאיר
איך וויל דיר בעטן דו זאלסט ווייטער מאכן די מוזיק פאר די חתונות אין ישיבה; ווען דו פלעגסט אנגרייטן די ניגונים האט עס געהאט עפעס א שטיקל טעם, דו האסט צאמגעשטעלט שיינע חסידישע געשמאקע ניגונים.
ביי די לעצטע חתונות גרייט מען אן ניגונים אן קיין טעם, פון זינגערס וואס איך ווייס נישט און זיי ווייסן נישט די פשט פון די ניגונים.
איך בעט דיר זייער דו זאלסט נישט אפלאזן די זאך; בלייב שמש, בלייב באדינען דעם רבי'ן מיט דעם זאך. לייג ניגונים וואס איז אידיש, היימיש, חסידיש, ערליך און אין די זעלבע צייט קנאקעדיג לעבעדיג; ווייז פאר די יונגט אז פאר היימישע ניגונים פעלט גארנישט, עס איז מער לעבעדיג וכו'.
בעזרת ה' יתברך
יום ד' פרשת מקץ, ראש חודש טבת, ו' דחנוכה, שנת תשפ"א לפרט קטן
לכבוד מיין טייערער ... נרו יאיר
אם ירצה ה' מאנטאג ויגש איז דא א חתונה אין ישיבה, לאז מיר וויסן אויב דו קומסט אריין און אויב דו פירסט די חתונה.
לאז וויסן די מחותנים אז מיר האבן א פרוי צו מאכן די פנימ'ער וכו' - בחנם. איך האב באצאלט פאר איינע פון די תלמידות זי זאל זיך לערנען די פאך בתנאי אז זי וועט דאס טון בחינם פאר די חתונות אין ישיבה.
אלע רעדן פון חתונה מאכן ביליג, אלע מאכן אסיפות; מען שרייבט, מען רעדט - אבער גארנישט אויף למעשה. דער מאכט א כח היחיד, א צווייטער מאכט א כח הרבים און א דריטער מיט אן אנדערע נאמען.
מיר האבן כח הצדיק, דער כח פון מוהרא"ש זכרונו לברכה, מיר האלטן ביי די זיבעצנסטע חתונה, נישט ביליג - נאר גענצליך בחינם; עס קאסט נישט קיין איין פרוטה פאר די מחותנים, יעצט וועט נישט קאסטן אפילו די זייטיגע זאכן - די האר פאר די מיידלעך און פאר די וואס מאכן די פנים וכו'.
לאז מיר וויסן דיינע פלענער.
בעזרת ה' יתברך
יום ד' פרשת מקץ, ראש חודש טבת, ו' דחנוכה, שנת תשפ"א לפרט קטן
מרת ... תחי'
קומענדיגע וואך, מאנטאג פרשת ויגש וועט זיין א חתונה אין ישיבה, משפחת ...; ביטע זיי מודיע זיין אז איר וועט מאכן די האר פאר די משפחה בחנם. אויך, אויב זיי מאכן די פנים, וועט איר דאס מאכן; מיר האבן אפגעשמועסט אז איר וועט העלפן אנשי שלומינו צו קענען חתונה האבן אין ישיבה אן קיין איין פרוטה.
ביז דערווייל איז דא נאך דריי חתונות; זונטאג פרשת בא - משפחת ... מיט ..., דינסטאג בא - משפחת ... מיט ... און מיטוואך תרומה - משפחת ... מיט ....
איך האף אז איר זאגט נאך תהלים אזוי ווי אלס מיידל - נאר מיט אן אנדערע טאן, מיט א פרייליכע ניגון, א תודה והודאה ניגון.
בעזרת ה' יתברך
יום ד' פרשת מקץ, ראש חודש טבת, ו' דחנוכה, שנת תשפ"א לפרט קטן
לכבוד מיין טייערער ליבער ... נרו יאיר
שטארק זיך מיט דיין עבודת הקודש, זיין א מלמד איז די גרעסטע זאך; דו בויסט אויף כלל ישראל, דו שטעלסט אוועק אידן פאר'ן קומענדיגן דור, דו פלאנצט איין אידישקייט.
איך בעט דיר זייער זאלסט זיך שטארקן מיט אלע כוחות. איך ווייס אז עס דיר ביטער שווער, נישט אלע קינדער און בחורים הערן אויס, נישט אלע פאלגן; בעט איך דיר, פרוביר זיך אריינצולייגן אין זייער מצב. דו האסט קינדער און בחורים וואס קומען פון אזעלכע צעבראכענע שטובער השם ירחם, דיין תלמיד הבחור ... האט שוין געהאט פיר מאמעס השם ירחם, יעצט איז זי אויך אנטלאפן, באלד קומט א פיפטע מאמע; עס גייט נישט אריין אין קאפ די צער און יסורים פון אזא קינד. איין גוט ווארט, איין שמייכל פונעם מלמד קען אים טראגן ביז ער וועט אויסוואקסן אן ערליכער איד.
איך וויל דיר בעטן אויב דו וועסט מיר ווייטער קענען העלפן מיט די חתונות אין ישיבה. קומענדיגע וואך, מאנטאג ויגש וועט זיין א חתונה, די זיבעצנסט'ע חתונה אין ישיבה; איך האף דו וועסט מיר העלפן מיט די תלמידים, אלעס זאל זיין צוגעשטעלט גענצליך בחנם.
בעזרת ה' יתברך
ב' פרשת מקץ, כ"ט כסליו, ה' דחנוכה, שנת תשפ"א לפרט קטן
לכבוד החתן ... נרו יאיר
איך האף דו האסט פארשטאנען וואס מיר האבן גערעדט; פון היינט וועסטו נישט בלייבן ביי א חתונה וכדומה וואס די מחיצה עפנט זיך אויף און עס ווערט תערובות מענער און פרויען, דו וועסט גלייך ארויסגיין.
איך האב געהאט א מעשה יארן צוריק מיט מוהרא"ש, מוהרא"ש איז געווען אויפ'ן וועג צו א חתונה אין וויליאמסבורג, איך בין אויך געווען אויפ'ן וועג אהין. א בחור האט מיר אנגערופן אז עס איז נישט אזוי גלאטיג ביי די חתונה, בחורים האבן געעפנט די מחיצה און עס איז נישטא קיין יראת שמים, די זיידעס האבן פרובירט צוריק צו שטעלן די מחיצה - זענען געקומען בחורים און נישט געלאזט. איך האב גערופן מוהרא"ש דאס דערציילן און מוהרא"ש האט זיך גלייך צוריק געדריידט, אויך האט ער מיר געהייסן איך זאל נישט גיין צו חתונות וואס איז נישט מיט יראת שמים.
איך האף דו וועסט האבן שכל צו וויסן צו וועלכע חתונות און מסיבות צו גיין; נאר וואו עס איז דא א פארמאכטע מחיצה מיט יראת שמים.
בעזרת ה' יתברך
יום ה' פרשת וישב, כ"ד כסליו, ערב חנוכה, שנת תשפ"א לפרט קטן
... תחי', תלמידה בית פיגא
איך האב ערהאלטן אייער בריוו.
בנוגע אז אלס קינד פלעגט איר גנב'ענען פון געשעפטן; אסאך קינדער טוען דאס. אויב איר געדענקט די געשעפט זאלט איר אריינשיקן די געלט; אויב איר שעמט זיך קענט איר עס אריינטראגן און זאגן אז א חבר'טע האט אייך געפרעגט וכו', אדער דורך די פאסט.
די געשעפטן וואס איר ווייסט נישט, זאלט איר טון וואס דער רמב"ם פסק'נט (עיין פרק ד' מהלכות תשובה, הלכה ג'; ביצה כט.): "גָּזַל וְאֵינוֹ יוֹדֵעַ לְמִי גָּזַל, יַעֲשֶׂה בָּהֶם צָרְכֵי רַבִּים", מען זאל טון גוטס פאר אנדערע; דאס איז א תיקון פאר דער זאך.
שטארקט זיך, האט נישט מורא פון דעם וואס איר ווילט נאכנישט חתונה האבן; דאס קומט מיט די צייט, נאך אביסל וועט איר וועלן א שידוך און דאס באקומען.
בעזרת ה' יתברך
יום ה' פרשת ויצא, י' כסליו, שנת תשפ"א לפרט קטן
לכבוד ... נרו יאיר.
דאס וואס דו טוסט מיט וכו' - איז נישט גערעכט; אז דו ווילסט - נעם אים ארויס פון חדר, אז ער לערנט אין חדר איז נישט גערעכט אוועק צו מאכן און אים זאגן ער זאל נישט רעדן מיט'ן ראש ישיבה.
מיר מאכן חוזק פון טערעפי, מיר גלייבן נישט אין די נארישקייטן; מיר ווייסן דעם אמת אז דאס איז א גניבה, עס העלפט נישט און קען נישט העלפן, והא ראי' אז דער טערעפיסט קען זיך אליינס נישט העלפן, ווי אזוי קען ער מיר העלפן?! אזוי ווי דער רבי זאגט (ליקוטי מוהר"ן, חלק א', סימן סא): "יֵשׁ מַנְהִיגִים שֶׁנִּקְרָאִים בְּשֵׁם רַבִּי, וְלֹא דַּי שֶׁאֵינָם יְכוֹלִים אֲפִילּוּ לְהַנְהִיג אֶת עַצְמָן, וּמִכָּל שֶׁכֵּן שֶׁאֵינָם יְכוֹלִים לְהַנְהִיג אֶת אֲחֵרִים", עס זענען דא פירערס וואס רופן זיך רבי'ס, אבער נישט נאר זיי קענען זיך אליינס נישט העלפן, איז דאך זיכער אז זיי קענען נישט העלפן א צווייטן.
טערעפי איז נישט קיין דרך התורה, דאס קומט פון די אומות העולם, דאס איז מדרכי האמורי; מיר היילן אויס אלע קינדער - אינגלעך, מיידלעך און בחורים מיט די וועג פון די תורה.
מיר זענען מחזק די בחורים און מיידלעך זאלן חתונה האבן וואס פריער; די גוי'שע קאפ זאגט: 'האב נישט חתונה, ביסט נאך נישט גרייט', און להבדיל אלף אלפי הבדלות - די הייליגע תורה זאגט: 'נאר חתונה האבן איז די עצה; חתונה האבן איז די וועג געראטעוועט צו ווערן פון עבירות'.
איך מיש זיך נישט ווי אזוי איר זאלט מחנך אייערע קינדער און אייער משפחה, אבער אזויפיל קען איך זיך יא מישן, אז דו שיקסט דיינע קינדער דא קענסטו נישט חוזק מאכן פון אונזער חינוך; ... איז אין א סכנה, ער ווערט צעריסן, אין חדר הערט ער איין זאך און פון דיר הערט ער א צווייטע זאך.
איך זוך זיך נישט צו קריגן און זיך צו מישן, אבער איך זאג דיר קלאר: "איך וועל טון וואס איך דארף טון על פי תורה; איך האב פון קיינעם נישט מורא, נאר פונעם בורא".
בעזרת ה' יתברך
יום א' פרשת ויצא, ו' כסליו, שנת תשפ"א לפרט קטן
לכבוד החתן ... נרו יאיר, תלמיד ישיבת תפארת התורה ברסלב.
דו זאלסט זיך נישט מישן אין קיין שום מחלוקת; חכמינו זכרונם לברכה זאגן שוין (שבת קל.): "לֵיכָּא כְּתוּבָה, דְּלָא רָמוּ בָּהּ תִּיגְרָא", נישטא קיין חתונה אן א מחלוקת; דאס איז פונעם יצר הרע וואס האט נישט חשק מען זאל חתונה האבן, אים לוינט בעסער ווען מען בלייבט א פלג גוף, דעריבער זוכט ער צו שטערן יעדע שמחה.
לאך זיך גוט אויס, דאנק און לויב דעם אייבערשטן אויף די גרויסע ניסים, אז דו האסט געפונען א כלה פון א חשוב'ע משפחה; מער פון דעם דארפסטו נישט, עס זאל דיר נישט אנגיין וואו די חתונה איז, ווער דער שפילער איז, דער בדחן וכדומה; גרייט זיך אן מיט תפלה והתבודדות. געדענק פונעם עיקר, דו גייסט מקיים זיין דעם רצון השם; אלעס אנדערש איז דברים של הבל.
בעזרת ה' יתברך
יום א' פרשת ויצא, ו' כסליו, שנת תשפ"א לפרט קטן
לכבוד מיין טייערער ... נרו יאיר.
א גרויסן יישר כח פאר'ן מיר העלפן חתונה מאכן מיין זון הרב הגאון אלחנן חיים שליט"א.
אין דעם זכות פון הכנסת כלה זאלסטו זוכה זיין צו ערליכע אידישע דורות, נחת ביי אלעמען; דו און דיין ווייב אינאיינעם געזונטערהייט, אמן.
...
די חתונה וועט אם ירצה ה' פארקומען מיטוואך פרשת תרומה, ה' אדר בשעה טובה ומוצלחת, אין ישיבה אין וויליאמסבורג; איך ליידן דיר פערזענליך מיט דיין גאנצע משפחה.
בעזרת ה' יתברך
יום ג' פרשת תולדות, ראש חודש כסליו, שנת תשפ"א לפרט קטן
לכבוד החתן ... נרו יאיר.
מזל טוב! דו גייסט יעצט חתונה האבן, וועסטו קענען זיין אן ערליכער איד, לערנען תורה בטהרה; איך האף דו וועסט אויסנוצן דיינע יונגע יארן נאך די חתונה מיט תורה און עבודת השם.
געב אכטונג פון די וואס זוכן אריין צו שטעקן די נאז וכו'; רעד נישט מיט אנדערע קיין איין ווארט וואס איך האב דיר געלערנט, אלע הדרכות וואס דו האסט געלערנט איז נאר צווישן דיר און דיין ווייב תחי'.
געב אכטונג פון די וואס מאכן אן ערנסטן פנים און פרעגן קשיות וכו'; רעדן פון די זאכן איז ניבול פה, דאס איז נישט פאר שמועסן, דאס איז נאר פאר די וואס זענען מדריך חתנים. בפרט אז דו גייסט קיין ארץ ישראל, דארט זענען דא כמה בטלנים איכא בשוקא - אסאך גייען דארט ליידיג; געווענליך די ליידיגגייערס - די רעדן ניבול פה. דער רבי זאגט (ספר המדות, אות נאוף, חלק ב', סימן י): "אִישׁ בָּטֵל שֶׁאֵין עוֹסֵק בְּשׁוּם עֵסֶק, עַל יְדֵי זֶה תַּאֲוָתוֹ מְרֻבָּה בְּמִשְׁגָּל וּמְדַבֵּר דִּבְרֵי טִנוּף תָּמִיד", על פי רוב, די אלע וואס גייען ליידיג די ליגן אין די תאוה.
פיר זיך מיט די עצות וואס דו האסט געלערנט די אלע יארן אין ישיבה; זיי זיך קובע שיעורים בכל התורה כולה, יעצט איז די צייט צו לערנען פלייסיג. אויך זאלסטו זיך מתבודד זיין; מאך זיך א באשטומטע צייט צו רעדן מיט'ן אייבערשטן אויף דיין אייגענע שפראך און מאך פרייליך דיין ווייב.
בעזרת ה' יתברך
יום ה' פרשת וירא, י"ח מר-חשון, שנת תשפ"א לפרט קטן
לכבוד מיין טייערער ... נרו יאיר.
זאג פאר'ן מחותן ... נרו יאיר אז פון מיין זייט קען ער חתונה מאכן זיין טאכטער אין א זאל; איך זוך נישט צו מאכן קיין מחלוקת, איך האב אים נאר געוואלט העלפן. אז די אנדערע צד פארפירט, ער סטראשעט אז ער גייט פארברענען די ישיבה, ער גייט מיר ארעסטירן - זאל ער עס מאכן אין א זאל.
נישט אז איך האב מורא, פארקערט, איך בין צוגעוואוינט צו האנדלען מיט אזעלכע מעשיות, נאר עס פעלט נישט אויס קיין מחלוקת, וד"ל.
שטארק זיך, דו מאך נאך שידוכים; ווי מער דו קענסט מאכן שידוכים זאלסטו מאכן נאך און נאך, דאס איז די גרעסטע מצוה - מאכן שידוכים.
איך האף דו וועסט אים איבערגעבן די שליחות, ער זאל טון וואס איז גוט פאר אים, ער דארף נישט קומען מאכן די חתונה אין ישיבה.
בעזרת ה' יתברך
יום ג' פרשת לך לך, ט' מר-חשון, שנת תשפ"א לפרט קטן
לכבוד מיינע טייערע מחותנים שיחיו.
מיר זענען זייער דאנקבאר צום הייליגן באשעפער אז מיר האבן זוכה געווען זיך צו משדך זיין מיט אזא חשוב'ע משפחה, א משפחה מיט אלע מעלות, מיר האבן זוכה געווען צו באקומען א חשוב'ע כלה פאר אונזער זון, החתן המופלג בתורה ויראת שמים ... נרו יאיר, מיר זענען פרייליך ביז גאר אז מען האט שוין קובע געווען דעם זמן החתונה בשעה טובה ומוצלחת.
איך בעט אייך זייער איר זאלט נישט שיקן קיין מתנות; דער חתן דארף גארנישט, דער חתן איז פרייליך מיט זיין כלה תחי', ער איז פרייליך אז ער האט זוכה געווען צו באקומען א בת תלמוד חכם, דאס איז ביי אים דער עיקר, מער פון דעם דארף ער נישט; מיר זענען פשוט'ע מענטשן, מיר מאכן פשוט'ע שמחות אזוי ווי מוהרא"ש האט אונז געלערנט.
איך וויל זייער שטארק די חתונה זאל זיין אין ישיבה, אן קיין שום הוצאות; איך האף אז איר זענט איינשטימיג מיט דעם. מיר מאכן נישט קיין חתונה בריוולעך, מיר דארפן נישט קיין שום זייטיגע זאך.
דער אייבערשטער זאל העלפן מיר זאלן זוכה זיין צו זען נחת ביי דעם פארפאלק און ביי אלע קינדער, עס זאל ארויסקומען ליכטיגע דורות פון זיי.
