בריוון פונעם ראש ישיבה שליט"א

בעזרת ה' יתברך

ערב שבת קודש פרשת יתרו, י"ט שבט, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

ערשטנס זאלסטו זיך זייער שטארקן אין דיין הייליגע ארבעט פון דרוקן און פארשפרייטן די הייליגע ספרים פון מוהרא"ש.

חכמינו זכרונם לברכה זאגן (אבות ה, יח): "הַמְזַכֶּה אֶת הָרַבִּים, אֵין חֵטְא בָּא עַל יָדוֹ", ווער עס איז מזכה אידישע קינדער - היט אים דער אייבערשטער אפ פון שלעכטס; נישטא נאך אזא מזכה את הרבים ווי דער וואס דרוקט די ספרים און קונטרסים און פארשפרייט דאס פאר אנדערע.

אויף דיין פראגע, ווען מוהרא"ש האט מבטיח געווען אז ווער עס וועט דרוקן זיינע ספרים וועט האבן א ישועה – צי מיינט דאס נאר איין ישועה אדער קען מען דאס טון פאר כמה וכמה ישועות; אודאי און אודאי, ווער עס העלפט דרוקן די ספרים קען דאס טון פאר כמה ישועות און מען וועט זען גרויסע נסים.

אויף דיין פראגע אויב די הבטחה פון מוהרא"ש איז נאר פאר ווער עס דרוקט אשר בנחל, אדער דאס איז אויך אויף די אנדערע ספרים; אלע קונטרסים און ספרים וואס מוהרא"ש האט געשריבן - האבן אין זיך די הבטחה אז ווער עס וועט נעמען א חלק און וועט דאס דרוקן - וועט זען ישועות, בפרט דעם ספר אשר בנחל, דארט האט מוהרא"ש מבטיח געווען מיט א שטארקע הבטחה אז מען וועט זען גרויסע ישועות.

דער אייבערשטער זאל העלפן זאלסט האבן כח ווייטער ממשיך זיין מיט דיין הייליגע ארבעט.

בעזרת ה' יתברך

א' פרשת ויגש, ב' טבת, זאת חנוכה, שנת תשפ"ב לפרט קטן

לכבוד מיין טייערער ליבער ... נרו יאיר

איך ווארט שוין אזוי לאנג צו הערן פון דיר וואו דו האלסט מיט'ן מגיה זיין די אידישע בריוו פון אשר בנחל.

דו האסט נישט קיין אנונג וויפיל טויזנטער בחורים, מיידלעך, ווייבלעך און אינגעלייט זענען זיך מחי' מיט די חיזוק פון מוהרא"ש; די חיזוק פון מוהרא"ש איז וואונדערליך, עס העלפט אין יעדן מצב, עס העלפט יעדן איינציגסטן מענטש.

דעריבער בעט איך דיר זייער, לאז מיר וויסן וואו די בריוו, די ספרים – האלטן. אויך די מפתחות איז זייער וויכטיג צו ענדיגן; אינו דומה א ספר אָן מפתחות צו א ספר מיט מפתחות, לאז מיר וויסן ווי דאס האלט, איך וויל יעצט איבערדרוקן אלע אידישע חלקים.

דו וועסט זען א גרויסע ישועה בכל ענינים, דו וועסט זען קלאר די גרויסע ניסים; מוהרא"ש האט מבטיח געווען, ווער עס וועט דרוקן די בריוו – וועט האבן א ישועה למעלה מדרך הטבע.

בעזרת ה' יתברך

יום ה' פרשת וישב, כ"א כסליו, שנת תשפ"ב לפרט קטן

לכבוד ... נרו יאיר

איך בעט דיר זייער, דערהאלט זיך מיט אלע דיינע כוחות; עס איז יעצט טאקע זייער שווער, אבער אחר הרע יבוא הטוב, עס וועט דיר שוין ליכטיג ווערן.

בלייב שטארק, לערן דיינע שיעורים כסדרן; לערן יעדן טאג חומש רש"י, לערן ח"י פרקים משניות, א בלאט גמרא און אסאך אשר בנחל. אשר בנחל האט א כח אויפצוהייבן א מענטש פון יעדע פראבלעם, אפילו מען זאל דורכגיין שווערע ביטערע טעג, אויב לערנט מען אשר בנחל האט מען כח אלעס אריבערצוגיין.

בנוגע קומען אין ישיבה; יעצט איז נישט כדאי דו זאלסט קומען, איך וויל זיך נישט פארפלאנטערן מיט די רעגירונג. איך ווייס אז דיר גייט גארנישט אן, דו ביסט גרייט אויף מסירות נפש, דו ביסט א פלאם פייער, אבער איך דארף אכטונג געבן אויף מיר און אויף די ישיבה, איך קען נישט טון קיין ווילדע זאכן. סתם אזוי ווען בחורים קומען אין ישיבה נעם איך יעדן איינעם אריין, אפילו עס איז דא סטראשערייען, מען ווארנט מיר - איך האב נישט מורא פון קיינעם, אבער אז די רעגירונג זוכט דיר - דארף איך זייער אכטונג געבן.

פארבינד זיך מיט עסקנים; איך בין זיכער אז עס זענען דא עסקנים וואס וועלן דיר העלפן אלעס זאל זיין ליגאל, דעמאלט וועסטו קומען קיין אמעריקע.

זיי נישט ברוגז, איך זוך דיר נישט אוועק צו שטופן; איך האב דיר ליב און איך וויל דיר האבן אין ישיבה, עס איז פשוט א סכנה פאר מיר און פאר דיר אז דו זאלסט קומען.

רעד צו האברך ... נרו יאיר, ער איז א מענטש מיט ישוב הדעת, ער איז א מענטש מיט פארשטאנד; ער וועט דיר העלפן עס זאל זיין ליגאל, אזוי וועסטו קענען קומען אין ישיבה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת שופטים, ה' אלול, שנת תשפ"א לפרט קטן

לכבוד מיין טייערער ליבער ... נרו יאיר

איך שרייב דיר דעם בריוו דיר צו מזרז זיין זאלסט ווייטער ארבעטן ארויסצוגעבן נאך א חלק "אשר בנחל"; ענדיגן די תוכן ענינים, מפתחות און דאס מגיה זיין עס זאל זיין אן קיין גרייזן.

געווענליך זאגט מען אלץ "איך וויל דיר נישט לייגן קיין פרעשור (דרוק)"; איך זאג דיר קלאר אז איך זוך יא צו לייגן דרוק דו זאלסט ענדיגן די אידישע חלקים, אזוי וועט מען דאס קענען דרוקן און דרוקן און דרוקן.

די בריוו האבן אין זיך אזויפיל חיזוק; נישטא קיין פראבלעם אדער צרה וואס עס זאל נישט זיין חיזוק אויף דעם אינעם הייליגן ספר אשר בנחל.

וואויל איז דעם וואס נעמט א חלק אין די גרויסע מצוה, ער דרוקט און פארשפרייט די הייליגע בריוו, וועט ער געהאלפן ווערן מיט גרויסע ישועות.

א גוט געבענטשט יאר.

בעזרת ה' יתברך

יום ב' פרשת פנחס, י"ח תמוז, שנת תשפ"א לפרט קטן

לכבוד מיין ליבער ... נרו יאיר

וואו האלט די מפתחות אויף ספר אשר בנחל חלק ג'? איך ווארט שוין אזוי לאנג דאס צו ענדיגן און דרוקן.

איך האב צוגעזאגט פאר מוהרא"ש אז איך וועל דאס דרוקן און פארשפרייטן, איך וויל מקיים זיין מיין צוזאג; בעט איך דיר העלף מיר, וועט דאס זיין פאר דיר אן אייביגע זכות.

מוהרא"ש האט מבטיח געווען אז ווער עס וועט דרוקן דעם ספר אשר בנחל וועט זען גרויסע ישועות; איך אליין האב צו דערציילן גרויסע זאכן וואס איך האב געזען ביי מיר נאכן דרוקן די הייליגע ספרים.

אויך זאלסטו צאמנעמען אלע מפתחות און מאכן פון דעם א באזונדערע באנד. אויסער די זיבן חלקים וויל איך דרוקן א באזונדערע באנד 'ספר המפתחות' און 'תוכן ענינים' פון אלע זיבן בענדער, דאס וועט פארגרינגערן צו קענען טרעפן אלעס וואס מען וויל טרעפן.

כל זמן מיר וועלן לערנען אשר בנחל און דאס פארשפרייטן – איז גערעכנט אזוי ווי מוהרא"ש איז דא צווישן אונז; נאר וואו מען לערנט די ספרים פונעם צדיק – דארט איז דער צדיק.

בעזרת ה' יתברך

יום א' פרשת שלח, י"ט סיון, שנת תשפ"א לפרט קטן

לכבוד מיין טייערער ... נרו יאיר

דו דארפסט דאך א גרויסע ישועה, זאלסטו מנדב זיין געלט צו דרוקן אשר בנחל, אדער עצתו אמונה, איש אמונות - וואס איז א המשך פון אשר בנחל.

ווייל מוהרא"ש האט מבטיח געווען, ווער עס וועט נעמען א חלק אין דרוקן די הייליגע בריוו פון אשר בנחל - וועט גלייך זען א גרויסע ישועה, למעלה מדרך הטבע.

די הבטחה גייט אויך ארויף אויפ'ן ספר עצתו אמונה, און ספר איש אמונות; די בריוו פון עצתו אמונה און איש אמונות איז א שטיק אשר בנחל, אלעס איז גענומען פון מוהרא"ש, יעדע בריוו איז שכל פון מוהרא"ש.

איך האב געגעבן דעם נאמען איש אמונות, געבויט אויף דעם וואס שלמה המלך זאגט (משלי כח, כ): "אִישׁ אֱמוּנוֹת", א מענטש מיט אמונה, "רַב בְּרָכוֹת", האט אסאך ברכות; אין די ווארט אי"ש איז דא די אותיות א' ש' - די נאמען פון מוהרא"ש, און אויך איז מרומז מיין נאמען - י' - אריינגעלייגט צווישן די אותיות פון מוהרא"ש'ס נאמען; איך האף צום אייבערשטן איך זאל בלייבן ביי מוהרא"ש מיין גאנץ לעבן בזה ובבא.

אז דו וועסט מנדב זיין צו דרוקן די הייליגע בריוון וואס ברענגט אריין אזויפיל קדושה וטהרה און חיזוק צו מקיים זיין די תורה, וועסטו זען א גרויסע ישועה בקרוב ממש.

בעזרת ה' יתברך

יום ג' פרשת ויקהל-פקודי, כ"ה אדר, שנת תשפ"א לפרט קטן

לכבוד מיין טייערער ... נרו יאיר

איך פריי זיך צו הערן אז דו ביסט מסדר ווייטער די הייליגע בריוו פון "אשר בנחל", דו ענדיגסט יעצט חלק ג'.

דו האסט נישט קיין השגה וואס די בריוו טוט; וויפיל הונדערטער אידן זענען זיך מחי' מיט די בריוו, די בריוו בלאזט אריין א חיות, א נשמה – אין מענטשן, עס ברענגט אמונה אין די וועלט.

שטארק זיך אין די הייליגע ארבעט, לייג אלעס אין דער זייט ביז דו ענדיגסט ארויסגעבן די אידישע בריוו שיין אויסגעארבעט אן קיין טעותים. טו עס אן מיט א שיינע מפתח, אין דעם זכות וועסטו זוכה זיין צו ישועות, רפואות, פרנסה און אלע ברכות.

בעזרת ה' יתברך

יום א' פרשת שמות, שובבי"ם, י"ט טבת, שנת תשפ"א לפרט קטן

לכבוד ... נרו יאיר

מיר זענען יעצט אריין אין די שובבי"ם טעג, די וואכן איז א צייט פון תיקון המעשים; דארפן מיר עוסק זיין אין הפצה, ווייל דער רבי זאגט (ספר המידות, אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה, שֶׁיִּשְׁתַּדֵּל לְהַחֲזִיר בְּנֵי אָדָם בִּתְשׁוּבָה", ווער עס וויל פאררעכטן חטאות נעורים זאל עוסק זיין אין הפצה, צוריק ברענגען מענטשן צום אייבערשטן.

קענסט עוסק זיין אין נאך א פרנסה, אבער דיין עיקר זאך זאל זיין הפצה, אזוי ווי דער רבי האט געזאגט (סיפורי מעשיות, מעשה ג): "מעשה, אמאל איז געווען א חכם, פאר זיין טויט האט ער גערופן זיינע קינדער און זיין משפחה, און האט זיי געלאזט צוואה אז זיי זאלן 'אנטרינקען ביימער'. איר מעגט עוסק זיין אין אנדערע פרנסות אויך, נאר דאס זאלט איר זען שטענדיג צו טון: 'אנטרינקען ביימער'"; מוהרא"ש זאגט (ספר נהרי אפרסמון) אנטרינקען ביימער מיינט מען הפצה, ווייל א מענטש איז צוגעגליכן צו א בוים, אזוי ווי עס שטייט אין פסוק (דברים כ, יט): "כִּי הָאָדָם עֵץ הַשָּׂדֶה", און אז מען טרינקט אים אן מיט גוטע חיזוק ועידוד פונעם הייליגן רבי'ן קען ער וואקסן.

עס איז יעצט אנגעקומען פינף טויזנט אשר בנחל אידיש חלק ב'; הלואי וואלסטו דאס פארפלייצט ביי היימישע משפחות וואס ליינען אידיש, זיי ליכטיג מאכן און ווייזן די וועג ווי אזוי מען קען האבן דעם גן עדן בזה העולם.

בעזרת ה' יתברך

יום ד' פרשת מקץ, ראש חודש טבת, ו' דחנוכה, שנת תשפ"א לפרט קטן

לכבוד מיין טייערער ליבער מחותן, מזכה את הרבים, ר' ... נרו יאיר, מנהל תלמוד תורה היכל הקודש ברסלב וויליאמסבורג

איך בעט דיר זייער, העלף מיר איך זאל קענען זאגן ביי הלל "נדרי לה' אשלם", איך זאל קענען מקיים זיין מיין צוזאג וואס איך האב זיך אונטערגענומען ביי מוהרא"ש'ס הסתלקות, אז איך וועל דרוקן און דרוקן און פארשפרייטן די אשר בנחל.

עס דארף אנקומען יעצט נאך פינף טויזנט ספרים, אשר בנחל חלק ב'; העלף מיר גיין צום דריטן חלק, דאס מגיה זיין און מסדר זיין מיט די שיינע מפתחות אז מען זאל דאס קענען דרוקן.

מוהרא"ש האט מבטיח געווען אז ווער עס וועט דרוקן די בריוו וועט זען אפענע ישועות.

איך ווייס אז דו ביסט פארנומען, יעדע מינוט איז ביי דיר אויסגענוצט; אנגעהויבן מיט די חדר, נאכדעם מסדר זיין די שיעורים און איבערטייטשן קונטרסים, דעם וועכנטליכן גליון און נאך הונדערטער זאכן, דאך בעט איך דיר העלף מיר ענדיגן די חלקים אשר בנחל באידיש, עס זאל זיין דאס שענסטע וואס איז שייך, ווייל מיט די חלקים אשר בנחל וועלן זיך מחי' זיין צענדליגער טויזנטער אידן וואס רעדן און ליינען אידיש.

בעזרת ה' יתברך

                        יום ב' פרשת תולדות, כ"ט מר-חשון, שנת תשפ"א לפרט קטן

מרת ... תחי', צפת.

איך האב ערהאלט אייער בריוו.

פארוואס זענט איר געווארן צעבראכן פון דעם בריוו? איך האב אייך געשריבן איר זאלט דאנקען דעם אייבערשטן אז איר זענט היינט ביים רבי'ן, איר זענט געראטעוועט געווארן פון די טונקעלע לעבן, פארוואס האט איר דאס גענומען אויף א שלעכטע וועג?

עס איז נישט אייער שולד, אלע וואקסן אזוי אויף; איך בין אויך געווען אין דעם זעלבן גרוב, איך האב אויך געמיינט פאר איך בין מקורב געווארן צום רבי'ן אז זיין פרום איז עבודת השם, איך האב געמיינט אז נאר איך בין א איד וכו' וכו', ביז דער אייבערשטער האט רחמנות געהאט אויף מיר און איך האב זיך דערוואוסט פון הייליגן רבי'ן, איך האב געטראפן א קליין ספר'ל אשר בנחל חלק כז און עס האט זיך מיר געעפנט א נייע וועלט; איך האב צוביסליך אנגעהויבן שפירן אמת'ע ליכטיגקייט.

דער עיקר זאלט איר ווייטער טון אייער הייליגע ארבעט, ווייטער מחזק זיין פרויען און מיידלעך, ליכטיג מאכן פאר די וואס גייען אין די פינסטערניש. חכמינו זכרונם לברכה דערציילן (סוטה כא.) א מענטש איז אמאל געווען אונטערוועגנס שפעט ביינאכט, ער האט זייער מורא געהאט ער זאל זיך נישט צעשטעכן פון דערנער און נישט אריינפאלן אין גרובער, אויך האט ער זייער מורא געהאט פון רויבער און פון שלעכטע חיות און א דריטע צרה האט ער געהאט אז ער האט נישט געוואוסט וואו צו גיין, פלוצלונג: "נִזְדַּמְּנָה לוֹ אֲבוּקָה שֶׁל אוּר", ער האט באקומען א פאקל פייער, האט ער שוין געקענט זען וואו צו גיין און ער האט מער נישט מורא געהאט פון די דערנער און גרובער אבער ער האט נאכאלץ מורא געהאט פון רויבער און חיות רעות, אויך האט ער נאכאלץ נישט געוואוסט וואו צו גיין, "כֵּיוָן שֶׁעָלָה עֲמֹד הַשַּׁחַר", ווען עס איז געווארן טאג האט ער שוין נישט מורא געהאט פון רויבער און חיות, אבער ער האט נאכאלץ נישט געוואוסט וואו צו גיין, "הִגִּיעַ לְפָרָשַׁת דְּרָכִים נִיצַל מִכּוּלָם".

דאס איז ווען מען באקומט דעם רבינ'ס ספרים; מענטשן דרייען זיך ארום אין א טונקלקייט, זיי ווייסן נישט וואו צו גיין, מען האט מורא וכו' וכו', ביז מען באקומט א פאקל פייער. מען באקומט דעם רבינ'ס שכל, עס ווערט טאג און מען זעט א פרשת דרכים, ווען מען הייבט אן הערן דעם רבי'ן ווערט ליכטיג, מען ווייסט ווי אזוי זיך צו פירן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת נח, ג' מר-חשון, שנת תשפ"א לפרט קטן

מרת ... תחי'.

איך האב ערהאלטן אייער בריוו.

איך קען נישט גלייבן וואס איר שרייבט, עס קען נישט זיין אז תלמידות היכל הקודש זאלן חוזק מאכן אין פארנט פון אייך פון אייער חסידות, פון די פלאץ וואו איר זענט אויפגעוואקסן; די פרויען וואס טשעפען אייך מיט די פלאץ פון וואו איר קומט זענען נישט קיין תלמידות היכל הקודש, תלמידות היכל הקודש וועלן קיינמאל נישט מבטל זיין א צווייטע חסידות, א חשוב'ע קהילה; היכל הקודש האט גענוג און נאך וואס צו פארקויפן, עס פעלט נישט אויס אפצושפעטן פון אנדערע.

וויסן זאלט איר אז נישט יעדע גאסט וואס איז נעכטן אנגעקומען אין היכל הקודש איז היכל הקודש; אסאך מאל ווערט מען צעבראכן, מען ווערט אנטוישט ווען מען זעט מענטשן וואס דרייען זיך אין היכל הקודש פירן זיך נישט ווי עס דארף צו זיין וכו' וכו', מען הייבט אן טראכטן: 'הזאת נעמי? דאס איז היכל הקודש? פארדעם האב איך זיך געדארפט קריגן מיט מיין משפחה צו קומען אויף ברסלב?!'

כדי נישט צו קומען צו די חלישות הדעת איז זייער וויכטיג אריין צו נעמען אין זיך וואס היכל הקודש איז, וואס ברסלב איז; היכל הקודש איז די ספרים פון מוהרא"ש, די שכל און עצות פון מוהרא"ש, ווער עס נעמט די שכל און חיזוק דער האט א חיים טובים, דער האט נישט קיין חלישות הדעת.

דאס מיינט נישט צו זאגן אז מען זאל נישט האבן קיין חבר'טעס, מען דארף האבן חבר'טעס און פארברענגען, אבער אז מען ווייסט פון פאראויס די הקדמה - ווערט מען נישט צעבראכן ווען מען הערט ווי דער רעדט אזוי און דער פירט זיך אזוי וכו' וכו'.

מאכט אייך א שיעור אין ספר אשר בנחל און אין ספר עצתו אמונה, דארט וועט איר טרעפן גוטע חיזוק פאר אייך, דארט וועט איר געפונען עצות פאר יעדע פרט אין לעבן.

ווייזט דעם בריוו פאר די אלע וואס מאכן אוועק די חסידות וואו איר זענט אויפגעוואקסן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת בראשית, כ"ו תשרי, שנת תשפ"א לפרט קטן

מרת ... תחי'.

אייער מאן האט מיר געפרעגט, איר ווילט וויסן אויב עס איז אמת אז נאך אביסל וועלן מיר אלע דארפן אנטלויפן פון אמעריקע; א פרוי זאגט פאר אלע פרויען אז זי האלט מיט זיך א גאנצן צייט די פאספארטן פון די גאנצע משפחה ווייל מוהרא"ש האט געזאגט מען וועט דארפן אנטלויפן, איר פרעגט אויב איר זאלט אויך אזוי טון.

עס דערמאנט מיר די מעשה וואס מוהרא"ש האט דערציילט, מען האט אמאל דערציילט פאר רבי נתן זכרונו לברכה אז עס זענען דא חסידים וואס פירן זיך צו לייגן אונטער זייער קישן א פלאש ברוינפן, און ווען זיי וועקן זיך אויף פרעגן זיי: 'משיח איז נאך נישט דא?!' און זיי הייבן אן טרינקען ביז זיי ווערן שיכור און שלאפן נאכאמאל איין; זיי זאגן אז ווילאנג משיח איז נאך נישט דא דארף מען איינשלעפן דעם יצר הרע, ווייל אז מען שלאפט זינדיגט מען נישט, האט רבי נתן געזאגט: "דאס איז נישט קיין עצה; מען דארף לייגן א תהילים אונטערן קישן, און ווען מען וועקט זיך אויף און מען זעט אז משיח איז נאך אלץ נישט דא, זאל מען נעמען דעם תהילים, זאגן תהילים און שרייען צום אייבערשטן".

זאגט פאר די פרוי וואס טראגט אירע פאספארטן מיט זיך וכו', אז אנשטאט האלטן אין איר טאשקע טאג און נאכט אירע פאספארטן זאל זי האלטן מיט זיך א תהילים און דאנקען דעם אייבערשטן אויף אלע חסדים און בעטן אויף ווייטער.

אז איר ווילט וויסן וואס מוהרא"ש האט געהאלטן זאלט איר לערנען 'אשר בנחל', אין די בריוו ליגט אלעס; אלע סודות, אלעס וואס גייט זיין ביז משיח וועט קומען - ליגט אין די בריוו. קיינער זאל נישט קומען זאגן דאס און יענץ ווען מיר האבן די בריוו און דארט ווייזט אונז מוהרא"ש וואס מיר זאלן טון, ווי אזוי מיר זאלן זיך פירן.

מיר וועלן ווייטער פארשפרייטן די הייליגע עצות, די גראדע שכל און זיסע לעבן פאר אלעמען און אזוי וועלן מיר ברענגען משיח וואס וועט אונז מיט נעמען קיין ארץ ישראל.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת ראה, כ"ב מנחם-אב, שנת תש"פ לפרט קטן

לכבוד ... נרו יאיר.

א גרויסן יישר כח פאר'ן מיר העלפן אראפ נעמען פון מיר דעם גאנצן עול פון אומאן; דו נעמסט אויף דיר שוין אפאר יאר די גאנצע עול פון פארדינגען בעטן און צושטעלן די פלאץ אזוי שיין.

אז דו נעמסט צאם געלט פאר בעטן פון אנשי שלומינו פון ארץ ישראל און דו האסט געלט ליגן דארט, אפשר קען איך דיר געבן געלט דא און די געלט פון דארט זאל איך קענען נוצן צו דרוקן אשר בנחל? איך דארף יעצט שיקן א גרויסע סומע געלט קיין ארץ ישראל, מיר גייען יעצט נאכאמאל דרוקן אשר בנחל.

לאז מיר וויסן אויב מען קען דאס ערלעדיגן, איך וויל נישט אפשטעלן דאס דרוקן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת שלח, כ"ג סיון, שנת תש"פ לפרט קטן

לכבוד ... נרו יאיר.

איך האב ערהאלטן דיין בריוו.

איך פריי זיך זייער צו הערן אז דו נעמסט צאם מעשיות פון צדיקים זכותם יגן עלינו וואס מוהרא"ש זכותו יגן עלינו ברענגט אין ספר אשר בנחל.

איך זאג דיר דעם אמת, איך האב שוין זייער אסאך מאל געטראכט אז איך וויל דאס טון; איך האב מיר אנגעצייכנט אין יעדן באנד אשר בנחל אלע מעשיות וואס ווערט געברענגט אין דעם חלק. יעצט אז דו זאגסט מיר אז דו גייסט דאס ארויסגעבן, פריי איך זיך זייער.

דער אייבערשטער זאל העלפן זאלסט מצליח זיין אלע דיינע וועגן.

בעזרת ה' יתברך

יום ה' פרשת בהעלותך, י"ט סיון, שנת תש"פ לפרט קטן

לכבוד ... נרו יאיר, יבנאל.

א גרויסן יישר כח פאר'ן מיר שיקן די צוויי נייע בענדער אשר בנחל - חלק קע"ז און חלק קע"ח.

איך האב זיך זייער געפריידט צו טרעפן אין חלק קע"ח (מכתב מז אלף, רנו) דעם בריוו וואס מוהרא"ש האט מיר געשריבן זונטאג פרשת תרומה, מיר מחזק צו זיין נאכדעם וואס ליל שישי פרשת משפטים האט מען אויסגעווארפן פאשקעווילן אויף מיר אין די גאנצע שטאט; דער בריוו האט מיר זייער מחזק געווען און עס איז מיר מחזק ביז היינט.

איך האב דורך געלערנט ביידע בענדער אין איין אטעם, איך ווארט שוין אויף פרישע בענדער.

אויך בעט איך דיר אויב דו קענסט מיר שיקן דעם זמירות וואס איז יעצט ארויסגעקומען, איך ווארט מיט דארשט אויף נאך א ווארט פון מוהרא"ש; יעדעס ווארט איז פאר מיר כמים קרים על נפש עיפה, אויך קען איך דאס איבער געבן פאר די בחורים.

מוהרא"ש האט מיר אמאל געזאגט נאכן שיעור ליל שישי: "יעצט נעם די שיעור און מאך פון דעם הונדערט שיעורים".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת נשא ב', י' סיון, שנת תש"פ לפרט קטן

לכבוד מיין טייערער ליבער ... נרו יאיר.

איך דאנק דיר פאר'ן העלפן חודש'ליך מיט די רענט פאר די מוסדות; בזכות די מצוה זאלסטו האבן גרויס שפע.

איך וויל דיר מחזק זיין זאלסט ווייטער אנגיין מיט'ן ארויסגעבן מוהרא"ש'ס מכתבים – "אשר בנחל"; מוהרא"ש האט מבטיח געווען אז ווער עס וועט דרוקן די בריוו וועט זען גרויסע ישועות, איז דאך זיכער אז דו וועסט ענדיגן די מפתחות און הגהות, מען זאל דאס קענען דרוקן אן אן אפשטעל – וועסטו זוכה זיין צו גרויסע ישועות.

איך שטיי גרייט יעדן טאג צו דרוקן נאך חלקים; איך האב צוגעזאגט בשעת'ן זיך געזעגענען פון מוהרא"ש, ביים טראגן די מטה קיין ארץ ישראל - אז איך וועל דרוקן די אידישע בריוו אן אויפהער.

דערפאר בעט איך דיר זייער, שטארק זיך; פרוביר דאס אריינצושטופן, זע צו מאכן אביסל צייט יעדן טאג פאר די בריוון, כדי מען זאל דאס קענען דרוקן.

בעזרת ה' יתברך

יום ג' פרשת אחרי-קדושים, ד' אייר, שנת תש"פ לפרט קטן

לכבוד מיין טייערער ... נרו יאיר.

איך בעט דיר זייער, יעצט ווען די וועלט דארף רחמים רבים, יעדער איינער דארף ישועות, רפואות און פרנסה; איז די ריכטיגע צייט נאכאמאל צו דרוקן דעם "ספר אשר בנחל".

מוהרא"ש האט מבטיח געווען אז ווער עס וועט האבן א שייכות מיט'ן דרוקן דעם הייליגן ספר וועט זען נסים גלויים.

בעט איך דיר זייער זאלסט זיך אנשטרענגען מער פון דיינע כחות מיר צו העלפן דרוקן די אידישע אשר בנחל לזכות אלע אידן וואס דארפן רפואות ולזכות אז די אידישע קינדער זאלן שוין צוריק גיין לערנען, די תלמוד תורה'ס זאלן מעגן זיין אפן און די בתי מדרשים זאלן זיך עפענען.

איך האף אז דו וועסט אננעמען די בקשה.

בעזרת ה' יתברך

יום ד' פרשת וארא, כ"ה טבת, שנת תש"פ לפרט קטן

לכבוד מיין טייערער ... נרו יאיר.

איך פריי זיך זייער צו זען דיין נאמען צווישן די וואס העלפן צאלן רענט חודש'ליך פאר'ן בנין הישיבה, בית המדרש, כולל, תלמוד תורה, חתונה זאל, הדפסה, אפיסעס, בית התבשיל, וכו', וכו'; מיט'ן העלפן דעקן די רענט פאר'ן בנין הישיבה העלפסטו יעדע פרט ופרט אין ישיבה.

זיי נישט צעבראכן, זאג נישט אז דו ביסט איינער אליין אויף די וועלט, דער אייבערשטער איז מיט דיר, דער אייבערשטער וועט דיר נישט פארלאזן.

איך בין אויך איינער אליין, איך האב נאר דעם אייבערשטן דורך די לימודים וואס איך לערן פון הייליגן רבי'ן דורך מוהרא"ש.

זיי זיך קובע א שיעור קבוע אין ספר "אשר בנחל"; ווער עס לערנט אשר בנחל פאלט נישט, די הייליגע בריוו פון מוהרא"ש לאזט נישט פאלן, עס בלאזט אריין חיות, עס געבט לעבן.

ווען דו לערנסט די בריוו זאלסטו דאס לערנען בקול, נישט סתם ליינען מיט די אויגן; זאג ארויס די ווערטער הויך אויפ'ן קול שטייטערהייט, וועט דאס דיר מחזק זיין.

נאך אביסל ווערסטו אויך א חתן.

בעזרת ה' יתברך

יום ג' פרשת שמות, י"ז טבת, שנת תש"פ לפרט קטן

מרת ... תחי'.

זיי נישט ברוגז אז איך ענטפער נישט דעם טעלעפאן און איך ענטפער נישט וכו'; איך בין אביסל אפגעשוואכט, איך האף צום אייבערשטן ער זאל מיר העלפן, מיר געבן כח ווייטער אנצוגיין און מיר געבן מח ווייטער צו ענטפערן אויף אלע שאלות וואס איז נוגע צו די מוסדות וכו'.

זיי ממשיך מיט דיין הייליגע ארבעט; יעדע שאלה וואס דו האסט, יעדע ספק וכו' – זאלסטו בעטן דעם אייבערשטן אז דו זאלסט וויסן ווי אזוי זיך צו פירן, הן אין דיין שטוב און סיי מיט אנדערע.

ווען דו ווייסט נישט וואס צו טון זאלסטו עפענען א ספר אשר בנחל. דער הייליגער רבי זאגט (ספר המידות, אות עצה, סימן א): "אַל תִּשְׁאַל עֵצָה", פרעג נישט אן עצה, "אֶלָּא מִמִּי שֶׁיּוֹדֵעַ סִתְרֵי תּוֹרָה", נאר פון איינעם וואס קען סודות התורה; אין אשר בנחל איז דא אלע עצות און אלע תשובות פאר יעדע זאך.

זיי פרייליך אז מיר האבן אזא רבי; טאנץ מיט דיינע קינדער: "אשרינו מה טוב חלקינו, ומה נעים גורלינו, אז מיר ווייסן פון רבי'ן".

בעזרת ה' יתברך

יום ב' פרשת וישב, י"ח כסליו, שנת תש"פ לפרט קטן

לכבוד מיין טייערער ליבער ... נרו יאיר.

איך בעט דיר זייער, שטארק זיך מיט דיין הייליגע ארבעט צו דרוקן די שיינע בריוון פון עצתו אמונה. דו קענסט זיך נישט פארשטעלן וויפיל אידן זענען זיך מחי' יעדן טאג מיט די בריוון.

דער הייליגער רבי האט געזאגט: "פון אייך קענט איר וויסן וואס גייט אריבער אויף אנדערע"; מיר האבן דאך אזויפיל חיזוק פון רבי'ן און מיט דעם אלעם זענען מיר ווי אזוי מיר זענען, פול מיט חלישות הדעת, פול מיט בלבולים וכו', וכו', איז דאך זיכער אז אנדערע וואס האבן נישט דעם רבינ'ס חיזוקים דארפן דאך זיכער אסאך חיזוק צו קענען אנגיין אין לעבן; די בריוון, די פשוט'ע דיבורי אמונה איז זיי אזוי שטארק מחי'.

בעט איך דיר ליבער ..., זיי נישט אזוי בקטנות הדעת, טראכט נישט פון שלעכטס; טראכט פון דאס גוטס וואס מיר האבן, און זיי ממשיך שטערקער און שענער ווייטער צו דרוקן די ספרים. געב אכטונג עס זאל נישט זיין מיט גרייזן, אזוי אויך זאלסטו עס דרוקן מיט גרויסע אותיות און נקודות אז עס זאל זיין גרינג צו ליינען.

ווער עס ליינט די בריוון זאגט אז דאס איז ממש מוהרא"ש'ס בריוון; די זעלבע ווערטער, די זעלבע חיזוקים, נאר אביסל מער אראפגעברענגט פאר היינטיגע בחורים און מיידלעך, זיי זאלן זיך קענען מחזק זיין און זיך אויפהייבן. "קָמָה אֲלֻמָּתִי וְגַם נִצָּבָה (בראשית לז, ז)", "קָמָה אֲלֻמָּתִי", די בינטלעך – די קונטרסים הייבן אויף אידישע קינדער, "וְגַם נִצָּבָה", עס געבט כח זיך צו דערהאלטן אין שווערע מצבים.

אין דעם זכות פון פארשפרייטן אמונה פאר אידישע קינדער וועסטו זוכה זיין צו דורות ישרים ומבורכים.

בעזרת ה' יתברך

יום ב' פרשת וישב, י"ח כסליו, שנת תש"פ לפרט קטן

לכבוד מיין טייערער ליבער ... נרו יאיר.

הודו לה' כי טוב כי לעולם חסדו! פאר די גוטע נייעס וואס דו האסט מיר היינט דערציילט, אז דיין ווייב תחי' איז געזונט און שטארק

מען זעט וואס תפלה טוט, ווי שטארק תפלה איז; אזוי ווי דער הייליגער רבי זאגט (ליקוטי מוהר"ן, חלק א', סימן ט): "תְּפִלָּה מְשַׁנֶּה אֶת הַטֶּבַע", תפלה איז שטערקער פון די טבע; אפילו די נאטור זאגט איין זאך, קען מען מיט תפלה איבערדרייען די נאטור.

איך האב איבערגעגעבן די פינף הונדערט דאללער צו דרוקן די צווייטע חלק "עצתו אמונה"; עס גייט בקרוב אריין צום דרוק. אין דעם זכות פון דרוקן די בריוון וואס איז מחזק טויזנטער טויזנטער מענטשן וועסטו זען נאך נסים ביי דיר און ביי דיין גאנצע משפחה.

דער אייבערשטער זאל דיך היטן מיט דיין גאנצע משפחה.

בעזרת ה' יתברך

ערב שבת קודש פרשת בהעלותך, י"ח סיון, שנת תשע"ט לפרט קטן

לכבוד ... נרו יאיר.

איך האב ערהאלטן דיין בריוו.

איך האף אז דו האסט הנאה פון די סעט "אשר בנחל" וואס איך האב דיר געגעבן; דארט וועסטו טרעפן תשובות אויף אלע דיינע ספיקות און פראגעס. עס איז ממש ווי דו שרייבסט אז 'אשר בנחל' באטרעפט (קהלת י, יט): "יַעֲנֶה אֶת הַכֹּל"; אלעס שטייט דארט, דורך דעם ספר ווערט מען קלאר און מען טרעפט תשובות אויף אלע ספיקות.

מוהרא"ש האט געזאגט אז ער פלעגט זען ווי יונגעלייט זוכן פאר'ן דאווענען אין חסידי'שע ספרים שטיקלעך וואס וועט זיי דערווארעמען דאס הארץ צו דאווענען בכוונה, ער האט געזען ווי מען מישט אהער און מען מישט אהין, מען נעמט איין ספר און נאכדעם נאך א ספר, ביז מען גייט דאווענען אינגאנצן צעבראכן. האט מוהרא"ש געזאגט: 'איך וועל ארויס געבן ספרים וואס מען וועט נישט דארפן מישן אהין און אהער, נאר וואו אימער מען וועט עפענען וועט מען גלייך טרעפן א שטיקל וואס מען וועט ווערן דורכדעם צוגעקלעבט צום אייבערשטן', אזוי ווי דו שרייבסט אינעם בריוו אז 'אשר בנחל' באטרעפט (תהלים קיח, ח): "טוֹב 'לַחֲסוֹת בַּיהוה מִבְּטֹחַ' בָּאָדָם"; דאס איז בקיצור די זיבציג טויזנט בריוו פון 'אשר בנחל' און פון די אכט הונדערט בריוו אין אידיש: 'טוֹב לַחֲסוֹת בַּה' מִבְּטֹחַ בָּאָדָם', מען זאל זיך פארלאזן אויפן אייבערשטן און נישט אויף א מענטש, ווייל ווען מען פארלאזט זיך אויף א מענטש ווערט מען נאכדעם זייער אנטוישט ווען מען זעט אז יענער קען נישט העלפן.

מוהרא"ש שרייבט פאר איינעם אין 'אשר בנחל': "אויבן אין הימל לאכט מען פון דיר אז דו ביסט צעבראכן ווען דו קענסט ווען לערנען אשר בנחל וואס דאס וועט דיר ארויסנעמען פון דיין צעבראכענקייט"; ווייל ווער עס לערנט דעם ספר 'אשר בנחל' הייבט אן לעבן מיט'ן אייבערשטן, ער זעט אין יעדע זאך דעם אייבערשטן און עס איז מער נישט דא ביי אים קיין שלעכטס, נאר אלעס וואס גייט אריבער אויף אים איז גוט, ממש אזוי ווי דו שרייבסט אז 'אשר בנחל' באטרעפט (קהלת ח, ה): "לֹא יֵדַע דָּבָר רָע"; ווי מער מען לערנט דאס, אלץ מער ווערט מען קלאר אין די אמונה.

נישט קיין חילוק וואו א מענטש איז, אין וועלכע מצב ער געפונט זיך - קען ער זיך טרעפן אין דעם ספר 'אשר בנחל'. עס איז ממש ווי דער רבי זאגט (ליקוטי מוהר"ן, חלק א, סימן עח) אז דער דיבור פונעם מענטש ווערט אנגערופן 'אם הבנים', ווי א מאמע וואס גייט אלעמאל נאך איר קינד און אפילו ווען דאס קינד פארשמירט זיך וועט די מאמע דאס קיינמאל נישט אפלאזן, אזוי ווי עס שטייט אין פסוק (ירמיהו לא, יט): "כִּי מִדֵּי דַבְּרִי בּוֹ, זָכֹר אֶזְכְּרֶנּוּ עוֹד"; דו שרייבסט אז די ווערטער "זָכֹר אֶזְכְּרֶנּוּ עוֹד" באטרעפט פונקט ווי 'אשר בנחל', דאס איז ממש אזוי, ווייל דער ספר 'אשר בנחל' וועקט אויף דעם מענטש ער זאל רעדן צום אייבערשטן און טראכטן פונעם אייבערשטן.

וואס זאל איך דיר זאגן, זייט איך האב זוכה געווען צו מקורב ווערן צום הייליגן רבי'ן דורך דעם ספר הקדוש אשר בנחל (חלק כז) האט זיך מיין לעבן געטוישט; מיינע אלע דיבורים און חיזוקים נעם איך פון די הייליגע בריוון, און איך האב צוגעזאגט פאר'ן אייבערשטן אז איך וועל דאס דרוקן נאכאמאל און נאכאמאל אן קיין אויפהער.

דער אייבערשטער זאל העלפן מיר זאלן שוין זוכה זיין צו משיח צדקינו וואס וועט צוזאמנעמען אלע אידן, "כל ישראל", איז בגיגמטריא 'אשר בנחל' און אונז אויסלייזן פון גלות.

בעזרת ה' יתברך

יום ב' פרשת בחוקותי, כ"ב אייר, שנת תשע"ט לפרט קטן

לכבוד מיין טייערער ... נרו יאיר.

איך בעט דיר, גלייך ווען עס קומט ארויס א פרישע חלק "אשר בנחל" זאלסטו מיר דאס גלייך שיקן קיין אמעריקע; איך וועל דיר באצאלן בלי נדר פאר יעדע חלק וואס דו שיקסט מיר.

שיק מיר די חשבון אויב איך קום דיר נאך געלט און שיק מיר שוין נאך חלקים, ווייל די בריוו פון אשר בנחל איז מיין גאנצע חיות און לעבן, די בריוו פון אשר בנחל וועקט מיר אויף פון שלאף יעדן טאג פונדאסניי.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת אמור, ז' אייר, שנת תשע"ט לפרט קטן

לכבוד מיין טייערער ליבער ... נרו יאיר.

איך האב ערהאלטן דיין נדבה פאר די ישיבה, יישר כח.

איך דאנק דיר פאר אלעס וואס דו העלפסט מיר צו פארשפרייטן די הייליגע ליכטיגע עצות פון רבי'ן פאר די גאנצע וועלט.

עוסק זיין אין "הפצה" איז העכער פון אלצדינג. היינטיגע צייטן איז גרינגער אין א געוויסע זין דער ענין פון הפצה, ווייל מען דארף זיך נישט ארומשלעפן אין די היץ און אין די קעלט, מען קען זיצן אין שטוב מיט א ווארעמע טרונק – ווינטער, און זומער מיט א קאלטע טרונק און פארשפרייטן חיזוק פאר די גאנצע וועלט - מיט דעם וואס דו טוסט מיט די "האט ליין" פון קול ברסלב, וואס צענדליגער טויזנטער מענטשן – בעיקר בחורים, מיידלעך, יונגעלייט און יונגע ווייבלעך רופן אריין טאג טעגליך, און דאס געבט זיי לעבן, עצות, חיזוק און הדרכה ווי אזוי צו קענען אנגיין מיט'ן לעבן.

אזוי אויך מיט די וועבסייט – וואס די ביסט דארט מפרסם די שאלות ותשובות בריוון און די חיזוק יומי דרשות, וכו', וכו', פאר טויזנטער מענטשן, און אויף אלע אנדערע וועגן.

דער אייבערשטער זאל דיר געבן כח ווייטער עוסק צו זיין אין די הייליגע ארבעט; מען טאר נישט אונטערברעכן פון שוועריקייטן, די שוועריקייטן וואס דער ס"מ ברעגנט אלץ מיט א פרישקייט כדי דער מענטש זאל אונטערברעכן און אויפגעבן.

גלייב מיר, אויף מיר גייט אויך איבער שווערע ביטערע נסיונות וכו', וכו', - וואס טו איך? איך דערמאן זיך פון מוהרא"ש, איך דערמאן זיך פון דעם עצה – התבודדות, איך וויין זיך אויס צום אייבערשטן. דאס איז וואס געבט מיר כח אנצוגיין אין מיין לעבן.

זאלסטו דאס אויך טון, דערצייל פאר'ן אייבערשטן אלעס וואס גייט אריבער אויף דיר, שמועס מיט אים אזוי ווי מען שמועסט מיט א גוטער חבר – וועסטו האבן כח אין לעבן, און קיין שום זאך וועט דיר נישט קענען צעברעכן.

וואס זאל איך דיר זאגן, מיר זענען אזוי גליקליך אז מיר האבן אזא גרויסע רבי מיט אזעלכע גרויסע תלמידים וואס געבן אונז פשוט לעבן.

אויב דו קענסט ענדיגן מגיה זיין "אשר בנחל חלק ב'" און ענדיגן די מפתחות; ווייל איך וויל דאס דרוקן. נדרי לה' אשלם, איך האב צוגעזאגט פאר מוהרא"ש אז איך וועל דאס דרוקן און דרוקן און פארשפרייטן פאר אלעמען, ווייל איך בין מקורב געווארן דורך דעם ספר "אשר בנחל חלק כ"ז". איך האב געלערנט דעם ספר נאכאמאל און נאכאמאל, דאס האט מיר געטוישט מיין לעבן. דערפאר וועל איך דאס פארשפרייטן אז נאך מענטשן זאלן זוכה זיין צו א זיס לעבן.

חבריך וידידיך.

...

בעזרת ה' יתברך

יום א' פרשת אחרי ב', כ"ג ניסן, שנת תשע"ט לפרט קטן

... תחי', תלמידה בית פיגא ברסלב.

איך האב ערהאלטן דיין בריוו.

דאס וואס דו פרעגסט צי מען מעג ליינען שבת פון מלחמות; עס ווענדט זיך וואס פאר א מעשיות. מעשיות פון היסטאריע פון די אידישע פאלק וואס ברענגט ארויס דאס גרויסקייט פון אידן, וואס איז געפלאכטן מיט עובדות פון צדיקים - דאס מעג מען ליינען שבת, אויך נאר אויב מען ווערט נישט בצער פון דעם, ווייל שבת טאר מען נישט זיין בצער.

זע צו ליינען מעשיות פון צדיקים און צדקניות; דאס וועט אריין גיין אין דיין הארץ און וועט אויפפלאמען דיין הארץ אז דו זאלסט אויך וועלן זיין א צדקת.

דער הייליגער רבי זאגט (ליקוטי מוהר"ן, חלק א', סימן רמח): "דַּע שֶׁסִּפּוּרֵי מַעֲשִׂיּוֹת מִצַּדִּיקִים, הוּא דָּבָר גָּדוֹל מְאֹד", וויסן זאלסט אז דערציילן מעשיות פון צדיקים איז זייער א גרויסע זאך, "כִּי עַל יְדֵי סִפּוּרִים מִצַּדִּיקִים נִתְעוֹרֵר וְנִתְלַהֵב הַלֵּב בְּהִתְעוֹרְרוּת גָּדוֹל לְהַשֵּׁם יִתְבָּרַךְ, בְּחֵשֶׁק נִמְרָץ מְאֹד", ווייל ווען מען הערט א מעשה פון א צדיק ווערט אויפגעפלאמט דאס הארץ, מען באקומט א מורא'דיגע בענקעניש צו ווערן אן ערליכער איד ווען מען הערט ווי דער צדיק האט זוכה געווען און איז בייגעשטאנען אלע זיינע נסיונות, דורכדעם וויל מען אויך זוכה זיין צו דעם און ווערן א צדיק. דאס זאלסטו ליינען ווען דו האסט איבעריגע צייט.

אויך זאלסטו ליינען די בריוו פון ספר אשר בנחל אין אידיש וועסטו ווערן א גרויסע צדקת; מוהרא"ש זאגט: "דער ספר אשר בנחל איז דער אייבערשטער אליינס"; מען קען נישט טרעפן נאך א ספר וואס זאל זיין א שטיק געטליכקייט ווי דער ספר; וואו מען עפנט נאר אויף דעם ספר, יעדע איינציגסטע בריוו זעט מען די לויטערע ריינע אמונה און מען הייבט אן בענקען צום אייבערשטן.

איך פריי זיך זייער צו הערן אז דו האסט שוין מסיים געווען תהילים די ניינטע מאל; עס איז נישט דא קיין שענערע זאך פאר א יונג מיידל ווי זאגן דעם יום תהילים יעדן טאג. אזוי זאלסטו טון דיין גאנץ לעבן; זאלסט שטענדיג זאגן תהילים וועסטו זען גרויסע ישועות.

שרייב מיר יעדעס מאל ווען דו ענדיגסט תהלים וועסטו מיר מחי' זיין.

דער אייבערשטער זאל העלפן זאלסט מצליח זיין אין אלע דיינע וועגן.