בעזרת ה' יתברך - יום ג' פרשת אמור, ו' אייר, כ"א לעומר, שנת תשפ"ד לפרט קטן
מרת ... תחי', קרית ברסלב
עסט נישט אויף אייער מאן'ס קישקעס, לייגט אים נישט צוגרונד; ער איז געווען פול מיט חן, פול מיט חיות ביז די חתונה, יעצט קוקט ער אויס ווי א מת מצוה; איר הערט נישט אויף אים דערקוטשען די יארן, איר רעדט צו אים מיט גאווה, איר טשעפעט אים און איר דערנידערט אים.
עס איז א גרויסע עבירה אז מען טשעפעט א מאן, מען קען ליידן ביטערע יסורים פון דעם.
בעזרת ה' יתברך - יום ב' פרשת אמור, ה' אייר, כ' לעומר, שנת תשפ"ד לפרט קטן
לכבוד ... נרו יאיר, קרית ברסלב
וואס איז מיט דיר, דו געבסט דיין קאר צו דרייוון אין שטעטל פאר דיין בחור וואס האט נישט קיין לייסענס? דאס איז דאך קעגן די געזעץ און עס איז דאך סכנת נפשות, און דו זאגסט נאך א ליגנט אז איך האב דיר געזאגט אז דו מעגסט דאס טון; דאס איז נישט אמת, עס איז א גרויסע סכנה און א חילול השם.
געב אכטונג אויף די לעבן פון דיין קינד און אויף אונזערע קינדער.
בעזרת ה' יתברך - פסח, שנת תשפ"ד לפרט קטן
א מתנה פאר ...
וואויל איז דיר אז דו האסט א געפיל און שכל צו העלפן פארשפרייטן די זיסע עצות פון הייליגן רבי'ן.
דער אייבערשטער זאל העלפן זאלסט ווייטער האבן די זכי' צו העלפן דרוקן דעם רבינ'ס ספרים.
וואונטשט דיין ראש ישיבה.
בעזרת ה' יתברך - פסח, שנת תשפ"ד לפרט קטן
א גרויסן יישר כח פאר דיר ר' ... נרו יאיר, און פאר דיין ווייב תחי'
פארן נעמען די מהדורה פונעם ספר אשר היה אל יואל.
בזכות דעם זאלסטו האבן ליכטיגע ערליכע דורות
וואונטשט דיין ראש ישיבה.
בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן
לכבוד ... נרו יאיר
זיי נישט צעבראכן פון די אלע חלישות הדעת וואס גייט אריבער אויף דיר, מען פרובירט אויס יעדן איינעם פון הימל מיט שווערע ביטערע נסיונות. די געפיל וואס דו שפירסט, ווי קיינער דארף דיך נישט, און ווי דו וועסט שוין סיי נישט ווערן א צדיק - דאס האבן אלע צדיקים געשפירט בתחילת התקרבותם, דער רבי אליין האט אויך געהאט דעם געפיל. דער רבי האט געזאגט (לקוטי מוהר"ן חלק ב' סימן מח): "שָׁמַעְנוּ מִצַּדִּיק אֲמִתִּי שֶׁאָמַר", איך האב געהערט פון א אמת'ן צדיק וואס האט געזאגט, (מיר האבן געהערט פון מוהרא"ש אז דאס איז דער רבי אליין), "שֶׁאִלּוּ הָיָה אוֹמֵר לוֹ אֶחָד יִהְיֶה מִי שֶׁיִּהְיֶה", אויב וואלט ער געהאט איינעם - נישט קיין חילוק ווער דער מענטש איז - וואס זאל אים זאגן, "בְּעֵת שֶׁעָסַק בַּעֲבוֹדַת הַשֵּׁם בִּתְחִלָּתוֹ", ווען ער האט אנגעהויבן דינען דעם אייבערשטן: "אָחִי", ברודער, "חֲזַק", שטארק זיך, "וֶאֱחֹז עַצְמְךָ", און דערהאלט זיך - "הָיִיתִי רָץ וּמִזְדָּרֵז מְאֹד בַּעֲבוֹדָתוֹ יִתְבָּרַךְ", וואלט איך זוכה געווען צו טון אסאך מער אין עבודת השם, "כִּי גַּם עָלָיו עָבַר כָּל הַנַּ"ל", ווייל אויף אים איז אויך אריבער שווערע ביטערע נסיונות, "וְלֹא הָיָה שׁוֹמֵעַ שׁוּם הִתְחַזְּקוּת מִשּׁוּם אָדָם", ער האט אויך געשפירט ביי זיך ווי קיינער דארף אים נישט, און קיינער האט אים נישט געגעבן קיין שום חיזוק ווערטער.
ברודער טייערער שטארק זיך, דער אייבערשטער איז מיט דיר, ביי דיר און נעבן דיר, און אז דו שפירסט ווי מען שטופט דיך אוועק פון אלע היכלות, מען לאזט דיר נישט אריין בהיכל הצדיקים - זאלסטו נעמען די עצה פון רבי'ן, די עצה פון התבודדות; זיך גוט גוט אויסוויינען צום אייבערשטן, אים בעטן: "פתחו לי שערי צדק, עפן מיר די טיר רבונו של עולם, איך וויל זיין נאנט צו דיר, איך וויל זיין מיט דיר"; לאז נישט נאך די הייליגע זאך פון התבודדות, ביי דעם דארף מען עקשנות, נישט אפלאזן דעם אייבערשטן, נישט אוועק גיין פונעם אייבערשטן, אפילו ווען מען טרייבט אוועק וכו' וכו'.
מארגן וועט זיין דער וועכנטליכער ליל שישי שיעור אין די נייע בארא פארקער שול, מען האט זיך געדארפט אריבערציען צו א נייע פלאץ, וועט דארט זיין דער שיעור מיט קביעות מזוזה.
דעם שבת קודש וועל איך זיין אין ישיבה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת אמור, ו' אייר, כ"א לעומר, שנת תשפ"ד לפרט קטן
לכבוד ... נרו יאיר
ווארף ארויס פון שטוב דיין טעלעפאן מיט דיין טעבלעט, אין א אידישע שטוב קומט נישט אריין די זאכן; לאז דיינע קינדער אויפוואקסן ערליך און געזונט.
א אינגערמאן דערציילט מיר, ער האט געזען מייז אין זיין דירה, האט ער פארשטאפט די לעכער מיט סטילוואל; פרעגט אים זיין קליינע טאכטער: "וואס איז די סטילוואל וואס דו לייגסט דא אריין אין די לאך?" זאגט ער: "דאס איז צוריק צו האלטן די מייז זאלן נישט קומען".
אפאר מינוט שפעטער זעט ער ווי זיין טאכטער שלעפט ארויס די אלע שטיקלעך סטילוואל, פרעגט ער איר: "פארוואס טוסטו דאס?" זאגט זי: "איך וויל די מייז זאלן קומען, עס איז אזוי זיס מייז, מאמי ווייזט מיר אויף איר טעלעפאן ווי די מייז שפילן זיך, איך וויל די מייז זאלן קומען אין מיין צימער איך וויל שפילן מיט זיי".
דער אינגערמאן זאגט מיר: "נישט גענוג מיין ווייב האט א טעלעפאן, וואס קען איך טון אז זי זאל נישט ווייזן פאר די קינדער...?"
בעט דעם אייבערשטן זאלסט קענען ביישטיין די נסיונות פון עקבתא דמשיחא, בלייבן ערליך מיט דיינע דורות.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ב' פרשת אמור, ה' אייר, כ' לעומר, שנת תשפ"ד לפרט קטן
לכבוד ... נרו יאיר
איך בעט דיר זייער זאלסט זיך דערהאלטן מיט אלע דיינע כוחות, ווער נישט צעפאלן פון וואס דו גייסט אריבער. אלעס וואס גייט אריבער אויף דיר איז נאר פאר איין סיבה, מען וויל זען פון הימל וואס דו גייסט טון און צו וועם דו גייסט זיך ווענדן; צו זען ווי דו וועסט גיין צום אייבערשטן, דו וועסט גיין אין א זייט און זיך אויסגיסן דיין הארץ צום אייבערשטן, אים בעטן ער זאל רחמנות האבן אויף דיר און דיר העלפן.
גיי יעצט אין א זייט און זאג אפאר ווערטער פארן אייבערשטן, זאג אים: טאטע זיסער איך וויל זיין גוט, טאטע זיסער איך וויל זיין ערליך, טאטע זיסער האב רחמנות אויף מיר"; די פאר ווערטער שפאלט אלע הימלען, און עס וועט אויפשפאלטן דיין הארץ צו בענקען צום אייבערשטן.
איך דארף מקצר זיין, איך דארף לויפן צו די בחורים, זיי ווארטן אויף מיר איך זאל זיי מחזק זיין.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת אמור, ד' אייר, י"ט לעומר, שנת תשפ"ד לפרט קטן
לכבוד ... נרו יאיר
שבת אין ישיבה איז געווען זייער שיין. שבת אינדערפרי ביי סיפורי מעשיות האבן מיר געלערנט מעשה ניסים, די פערטע מעשה אין ספורי מעשיות, ווי דער באהאלטענער איד האט געבעטן דעם קעניג זאל אים צוזאגן אז ער וועט קענען זיין א איד, קענען לייגן טלית ותפילין בפרהסיא, אז דאס דארף זיין די בענקעניש פון יעדן איד, זוכה זיין צו קענען גיין אין שול דריי מאל א טאג אנטון טלית ותפילין, דאווענען די דריי תפילות מיט מנין, און בעטן דעם אייבערשטן פאר דעם.
מיר האבן זיך זייער מחזק געווען ווי גליקליך מיר זענען אז מיר האבן דעם רבינ'ס עצות, ווייל אלע עצות וואס מען וועט נאר האבן דארף מען דאך אן עצה פאר די עצה; אז מען הערט א שיעור פון דאס וויכטיגקייט פון גיין אין שול דריי מאל א טאג דאווענען מיט מנין, דאס מיינט נישט אז מען הויבט אן דאווענען מיט מנין, אבער ביים רבי'ן האסטו גלייך די עצה; דער רבי זאגט, אז דו הערסט א שיעור, מען זאגט דיר וואס מען דארף טון און דו ביסט נאך ווייט פון דעם - זאלסטו בעטן דעם אייבערשטן אויף דעם, בעט: "הייליגער באשעפער איך וויל זוכה זיין צו גיין אין שול דריי מאל א טאג דאווענען מיט מנין מיט א סידור, הייליגער באשעפער איך וויל ליב האבן צו דאווענען, איך וויל דיך שפירן ווי דו ביסט נעבן מיר, אזוי וועל איך קענען דאווענען ווי מען דארף".
אזוי איז מיט יעדע זאך, מיט יעדע עצה; אז מען לערנט ספרי מוסר, מען זעט ווי אזוי מען דארף זיך ווען אויפפירן און מען זעט זיך אזוי ווייט, מען ווערט פון דעם צעבראכן, אבער אז מען האט די הקדמה פון רבי'ן מאכט מען אויף דעם אליין תפילות, מען בעט: "הייליגער באשעפער איך בין אזוי ווייט פון אלעס וואס שטייט אין די הייליגע ספרים, וואס וועט זיין מיט מיר..."
אויך האבן מיר גערעדט פון די יארצייט פונעם גרויסן צדיק רבי ישעי'לע קערעסטירער זכותו יגן עלינו, אז מען קען אויך דא פועל'ן ישועות בזכות דעם צדיק דורך טון א גוטע זאך פאר די נשמה פונעם צדיק. וועט איינער פרעגן, ווי איז שייך א פשוט'ער מענטש זאל א טובה טון פאר א צדיק, דער צדיק איז דאך זייער הויך אין גן עדן? אבער עס איז דא זאכן וואס דער צדיק קען נישט טון, וואס א פשוט'ער מענטש קען טון, אז מען טוט א גוטע זאך בזה העולם לזכות די נשמה פון א צדיק - מאכט מען א גרויסע נחת פארן צדיק'ס נשמה און דער צדיק צאלט צוריק פארן מענטש גוטע זאכן; אז מען לערנט א פרק משניות לזכות א נשמה, אדער מען געבט צדקה לזכות א נשמה, אדער מען טובל'ט זיך א טבילה לזכות דעם צדיק, מען צינדט א ליכט - דאס מאכט א נחת פאר די נשמה און מען באקומט ישועות.
שבת אינדערפרי האבן מיר געלערנט סידור עת רצון, דאס גרויסקייט פון זאגן יעדן אינדערפרי די פרשה פון די עקידה, דער אייבערשטער איז מוחל אויף אלע עבירות.
פרייטאג צו נאכטס איז נישט געווען קיין באטע, זומער איז נישטא קיין באטע; דער זמן איז שפעט, מען ענדיגט די סעודה שפעט - מאך איך נישט קיין באטע.
ביי שלש סעודות האבן מיר געלערנט ליקוטי מוהר"ן חלק א', סימן קסה, דער רבי זאגט: "תְּקַבֵּל בְּאַהֲבָה כָּל הָרָעוֹת וְהַיִּסּוּרִין הַבָּאִים עָלֶיךָ", מען דארף אננעמען אלע שלעכטס און יסורים, "כִּי רָאוּי שֶׁתֵּדַע, שֶׁלְּפִי מַעֲשֶׂיךָ אַחַר כָּל הַיִּסּוּרִים וְהָרָעוֹת שֶׁיֵּשׁ לְךָ, עֲדַיִן הוּא מִתְנַהֵג עִמְּךָ בְּרַחֲמִים, כִּי הָיָה מַגִּיעַ לְךָ יוֹתֵר וְיוֹתֵר, חַס וְשָׁלוֹם, לְפִי מַעֲשֶׂיךָ", ווייל לויט דיינע מעשים פירט זיך דער אייבערשטער צו דיר מיט גרויס רחמנות, עס וואלט דיר געקומען אסאך מער שלעכטס חס ושלום, דער רבי טייטשט מיט דעם די פסוק (ויקרא יט, יח): "וְאָהַבְתָּ לְרֵעֲךָ", זאלסט ליב האבן די שלעכטס, "כָּמוֹךָ"; ווייל אזוי ווי דו ביסט - "אֲנִי ה'", פיר איך זיך מיט גרויס חסדים.
מיר האבן זיך מחי' געווען מיט די ווערטער פון רבי'ן נישט צו האבן קיין קשיות אויפן אייבערשטן, נישט צו פרעגן קיין קשיות נאר גלייבן אז אלעס האט א חשבון, מיר ווייסן גארנישט, מיר ווייסן נאר אז וואס דער אייבערשטער טוט - איז אויסגערעכנט גוט, און דאס אז מען פארשטייט נישט - דאס איז די שיינקייט פון אייבערשטן. אזוי ווי דער רבי זאגט (לקוטי מוהר"ן חלק ב', סימן נב): "כָּךְ רָאוּי לִהְיוֹת דַּיְקָא, שֶׁיִּהְיוּ קֻשְׁיוֹת עַל הַשֵּׁם יִתְבָּרַךְ, וְכָךְ נָאֶה וְיָפֶה לוֹ יִתְבָּרַךְ", אזוי דארף זיין, אזוי קומט עס זאל זיין און עס איז שיין עס זאל זיין קשיות אויפן אייבערשטן, דער רבי זאגט ווייטער: "אִם הָיָה הַנְהָגָתוֹ כְּפִי חִיּוּב דַּעְתֵּנוּ אִם כֵּן הָיָה, חַס וְשָׁלוֹם, דַּעְתּוֹ כְּדַעְתֵּנוּ", ווייל אויב וואלט מען ווען פארשטאנען יעדע זאך וואס דער אייבערשטער טוט - וואלט דאך חס ושלום געווען אונזער שכל אזוי ווי דעם אייבערשטנ'ס פארשטאנד, אבער - האט דער רבי אויסגעפירט: "וואויל איז דעם מענטש וואס האט נישט קיין שום קשיות אויפן אייבערשטן, ער גלייבט אז אלעס וואס גייט אריבער אויף אים איז נאר פאר זיין טובה".
עס איז א מחי' צו זיין א שבת מיט אנשי שלומינו, מען ווערט גוט אנגעזאפט מיט גוטע חיזוק פאר נאך א וואך זיך צו קענען דערהאלטן צו קענען אנגיין, נישט ווערן צעפאלן פון וואס עס גייט אריבער.
ברודער נעם א משניות און זאג א פרק משניות, נעם א גמרא זאג א בלאט גמרא, די תורה וועט דיך היילן פיזיש און גייסטיש.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - ערב שבת קודש פרשת קדושים, ב' אייר, י"ז לעומר, שנת תשפ"ד לפרט קטן
לכבוד ... נרו יאיר, מנהל ישיבת היכל הקודש קרית ברסלב ליבערטי
איך האב ערהאלטן פון איינע פון די עלטערן פון די בחורים אין ישיבה אז ער האט געזען אויף זיין בחור'ס טעלעפאן צווישן די ניגונים עקלדיגע ניגונים פון ניבול פה, זינגערס וואס זינגען אויף העברעאיש ניבול פה. ער האט געפרעגט זיין בחור היתכן, זאגט אים דער בחור אז אלע פעסטע בחורים אין ישיבה האבן דאס. ער האט געגעבן צו פארשטיין זיין זון אז דאס איז ניבול פה, זיין זון האט ניטאמאל געוויסט. ברוך ה' אז די בחורים זענען ערליך, זיי פארשטייען נישט קיין העברעאיש.
וואס באדערט מיר יא, ער דערציילט מיר אז זיין זון זאגט אים: "איך וויל נישט זיין פון די נעבעכס אין ישיבה, איך וויל זיין פון די פעסטע בחורים אין ישיבה"; דאס באדערט מיר, און דו אלס מנהל וויל איך דיר בעטן זאלסט מאכן די מצב רוח אין ישיבה זאל זיין אז ערליך איז וואויל, ערליך איז חשוב, נישט יראי חטא ימאסו, די ערליכע זענען די נעבעכדיגע, נאר פארקערט די ערליכע זענען צו וואס מיר שטרעבן צוצוקומען, און אויך ווער עס איז נאכנישט אזוי - איז אויך גוט.
איך נעם אריין אין ישיבה, אין בית פיגא און אין די קהילה - ווער עס וויל קומען, אבער דער ראש ישיבה זעט אז די ארויפגעקוקטע זענען די ערליכע. אזוי אויך אין בית פיגא - זאג איך אלץ פאר די מנהלת – "מיר קענען ארייננעמען קינדער וואס דארפן חיזוק, אבער די לופט דארף זיין אז איידל איז שיין, באשיידן איז חשוב וכו'"; איך האף דו וועסט מיר העלפן מיט דעם.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן
מרת ... תחי'
עס וועט אייך נישט העלפן דאס נישט זיין פרייליך און דאס וויינען א גאנצן טאג, הויבט אן טון דעם רבינ'ס עצות, טראכטס פון איין גוטע זאך וואס איר האט און הויבט אן דאנקען דעם אייבערשטן אויף דעם, און נאכדעם זוכט אויף נאך איין גוטע זאך וואס איר האט און דאנקט און לויבט דעם אייבערשטן אויף דעם.
עס איז נישט קיין עצה זיך צו ציען צו עצבות און מרה שחורה, ציט זיך צו שמחה; בעטס דעם אייבערשטן: "הייליגער באשעפער העלף מיר, נעם מיך ארויס פון מיין עצבות און מרה שחורה, העלף מיר איך זאל זיין פרייליך, איך זאל האבן א שטארקע אמונה, איך זאל דיך שפירן ווי דו ביסט מיט מיר.
הייליגער באשעפער געב מיר כח דיך צו קענען דינען, איך זאל פאלגן דעם הייליגן רבי'ן מיט א תמימות און נישט ניצן מיינע פארדרייטע חכמות, נאר זוכן אין מיר נאר דאס גוטס, און אויך אין מיין מאן זאל איך זען נאר גוטס, און אין יעדן איינעם זאל איך זען נאר גוטס".
יעצט אז איר זענט אזוי דעפרעסט מעגט איר הערן מוזיק אין די טעג פון ספירה, עס איז א סכנה צו זיין אזוי צעבראכן, איר מוזט זיין פרייליך.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן
מרת ... תחי'
איך האב ערהאלטן אייער בריוו.
איך ווייס אייך נישט וואס צו זאגן, איך האב נישט קיין עצה פאר אייך; עס טוט מיר זייער וויי אייער מצב אז אייער מאן איז אינדרויסן פון שטוב א גאנצע נאכט און וויפיל איר רעדט צו אים מיט שיינעם - העלפט דאס נישט; איך האלט נישט אויס אייער צער.
איין עצה איז געבליבן, בעטס דעם אייבערשטן נאכאמאל און נאכאמאל, מיט אסאך געדולד, ביז איר וועט זען א ישועה.
דא האט איר א קורצע תפילה צו בעטן דעם אייבערשטן יעדן טאג:
"הייליגער באשעפער איך דאנק דיך און איך לויב דיך פאר מיין לעבן, ביסט אזוי גוט צו מיר, דו געבסט מיר נאר גוטס, איך דאנק דיך אז איך בין א איד און איך בין געזונט, און פאר מיין טייערער מאן און מיינע געזונטע ליכטיגע קינדער, אלעס איז אזוי גוט.
הייליגער באשעפער איך בעט דיר זייער, העלף מיר און העלף מיין טייערער מאן, ער האט א פארדרייטע סדר, ער שלאפט רוב טאג און פארנאכטס גייט ער ארויס און קומט נישט אהיים ביז פארטאגס. מיין מאן איז א גוטער, אן ערליכער, ער איז נאר אזוי צעבראכן און ער קען זיך נישט זען צווישן מענטשן, און מיר איז דאס זייער שווער.
אנא ה' העלף מיר, איך וויל מיין מאן זאל זיין מיט מיר, עס איז מיר זייער שווער, איך שפיר ווי עס בארירט מיר מיינע נערוון, העלף מיר אייבערשטער איך זאל זיך קענען שטארקן, נישט ווערן אויסער זיך, עס איז מיר אזוי שווער צו זיין יעדע נאכט אליין, איך דארף א נס, איך דארף א נס".
אזוי זאלט איר בעטן, די קורצע תפילה איז נאר אויף צו ווייזן די וועג ווי זיך אויסצושמועסן, און לייגט צו אייערע אייגענע תפילות, שמועסט מיטן אייבערשטן, דערציילט אים פינקטליך אלעס וואס גייט אריבער אויף אייך.
איך בעט אויך דעם אייבערשטן פאר אייך און איך פרוביר צו שטארקן אייער מאן, אים פרייליך מאכן.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן
מרת ... תחי', קרית ברסלב
איך האב ערהאלטן אייער בריוו.
וואס איז בכלל די פראגע? אודאי זאלט איר רעדן מיט די מיידל! איר קענט ראטעווען א מענטש מיט זיינע דורות, איז וואס איז בכלל די פראגע?!
ווען איר רעדט מיט איר זאלט איר בעיקר רעדן פון די עצה פון תפילה והתבודדות, ווייל תפילה והתבודדות קענען אלע הערן; מה שאין כן אויב מען רעדט פון מצוות, איז ווען דער מענטש איז נעבעך פאר'שיכור'ט קענען די ווערטער נישט אריינגיין אין יענעם, דאס קען יענעם גאר דערווייטערן.
ווען מען רעדט מיט א בחור אדער מיידל וואס זענען געפאלן אין חילול שבת רחמנא לצלן - דארף מען רעדן פון איין זאך, פון ווי דער אייבערשטער האט ליב א איד, און אז מען רעדט צום אייבערשטן, מען בעט אים - באקומט מען אלעס, און פון דאס גרויסקייט פון תשובה; פון דאס רחמנות פונעם אייבערשטן, ווי ער האט רחמנות און ער פארגעבט ווען מען טוט תשובה.
למען השם זאלט איר מאכן א שטארקע קשר מיט די מיידל. אז איר מאמע האט אייך גערופן און אייך געבעטן צו ראטעווען איר טאכטער - דארפט איר אלעס טון צו פרובירן ראטעווען איר, זי זאל קענען חתונה האבן און אויפשטעלן אידישע דורות.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן
מיין ליבער טייערער הארציגער ... נרו יאיר
עס איז נישט גוט אז דו גייסט ליידיג, דו האסט נישט קיין פרנסה; עס איז א גרויסע סכנה. חכמינו זכרונם לברכה זאגן (כתובות נט.) גיין ליידיג ווארפט אראפ דעם מענטש אין א דעפרעסיע, און אויך אין עבירות.
זע זיך צו נעמען א פרנסה וואס אימער, וואס עס קומט דיר אונטער, אבי נישט צו גיין ליידיג, דאס וועט דיר העלפן זיין אפגעהיטן פון נישט גוטע זאכן. די הייליגע חכמים זאגן (אבות ב, ב): "יָפֶה תַלְמוּד תּוֹרָה עִם דֶּרֶךְ אֶרֶץ", עס איז גוט פארן מענטש ער זאל לערנען און ארבעטן, "שֶׁיְּגִיעַת שְׁנֵיהֶם מְשַׁכַּחַת עָוֹן"; 'מְשַׁכַּחַת' איז דער זעלבער לשון פון: 'שִׁכְחָה', אז מען ארבעט און מען לערנט פארגעסט מען צו זינדיגן און מען האט ניטאמאל קיין צייט צו זינדיגן.
דיין ווייב איז דערשראקן דיך זען אויפשטיין פארנאכטס, זי קומט אהיים נאך א טאג ארבעט און דו ביסט נאכנישט אויפגעשטאנען פון דעפרעסיע; עס איז נישט גוט פאר דיר, עס איז נישט גוט פאר די שלום בית, פאר גארנישט.
איך האף דו וועסט מיר פאלגן, דו וועסט זיך נעמען א פרנסה. איך האב אסאך אוועק געגעבן פאר דיר און פאר דיין משפחה, איז א שאד אז אלעס זאל צעפאלן צוליב ליידיג גיין.
זאג יעדן טאג משניות, אכצן פרקים וואלט גאר גוט געווען; דאס וועט דיר העלפן אויסרייניגן דיין מח.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ד' פרשת קדושים, א' דר"ח אייר, ט"ו לעומר, שנת תשפ"ד לפרט קטן
לכבוד ... נרו יאיר, מנהל ישיבת היכל הקודש קרית ברסלב
איך האב ערהאלטן דיין בריוו.
רעד צו די בחורים זיי זאלן זיך אויפפירן דערוואקסן, נישט מאכן קיין ליצנות פון מענטשן. איך הער אז עס איז דא צוויי בחורים וואס פירן זיך ווי קינדער, זיי רופן מענטשן מאכן פּרענקס, זיי מיינען אז אזוי ווערט מען דערוואקסן; דארפסט רעדן צו זיי פון גוטע מידות. לערן זיי אויס וואס הלל האט געלערנט מיטן גר (שבת לא.): "דְּעַלָּךְ סָנֵי, לַחֲבֵרָךְ לָא תַעֲבֵיד", וואס דו ווילסט נישט מען זאל דיר טון - טו נישט מיט א צווייטן, לערן מיט זיי די לימוד פון ימי הספירה, וואס רבי עקיבא האט געלערנט: "'וְאָהַבְתָּ לְרֵעֲךָ כָּמוֹךָ', זֶה כְּלַל גָדוֹל בַּתּוֹרָה" (ירושלמי נדרים ט, ד; שבת לא.).
איך בעט דיר זייער, שטארק זיך מיט דיין הייליגע ארבעט, איך האב דיך נישט געשטעלט צו זיין מנהל אויף טישן און בענק, איך האב דיך געשטעלט צו זיין מנהל אויף מענטשן, יונגע בחורים וואס זענען ליכטיג און טייער, מען דארף זיי לערנען; ווער נישט צעפאלן ווען דו זעסט אז עס איז דא אסאך קינדערישקייט צווישן זיי, לערן מיט זיי, העלף זיי, שמועס מיט זיי, שפאציר מיט זיי, שפיל זיך מיט זיי, כמעשה האינדיק וואס דער רבי האט דערציילט, ביז זיי וועלן אויסוואקסן געזונט און ערליך.
אחי היקר חזק ואמץ.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ד' פרשת קדושים, א' דר"ח אייר, ט"ו לעומר, שנת תשפ"ד לפרט קטן
לכבוד מיין טייערער ליבער ... נרו יאיר, קרית ברסלב
האסט געזאגט אז דו גייסט פאלגן, דו גייסט אהיימגיין פינף אזייגער, און נאר אויף דעם סמך האב איך דיר געזאגט זאלסט עפענען די ביזנעס, יעצט זע איך אז דו בלייבסט ביז שפעט; פאר דעם דארפסטו נישט קיין אייגענע ביזנעס, אויף צו איבערלאזן די ווייב און קינדער קענסטו זיין אן ארבעטער.
איך זאג דיר נאכאמאל, זיי נישט נאריש, און פארלאז דיין אפיס פינף אזייגער; נישט פינף אזייגער נאר א מינוט צו פינף, און גיי אהיים עס עפעס, העלף אביסל דיין ווייב מיט די קינדער, און גיי צו דיינע שיעורים און צו דאווענען, און אז עס איז דא זייער וויכטיגע זאכן צו ערלעדיגן זאלסטו אויפשטיין פרי פארטאגס, גיין התבודדות, גיין אין מקוה, לערנען און דאווענען און זיך איבערגעבן צום אייבערשטן, און זיין אין אפיס ניין אזייגער ביז א מינוט צו פינף, און אז עס בלייבט איבער נאך ארבעט וועסטו אויך די אנדערע טאג אריינגיין אין אפיס, אבער קיין מינוט לענגער ווי די שעות זאלסטו נישט אוועקגעבן פאר די ביזנעס.
איך האף צום אייבערשטן דו וועסט מצליח זיין, און מיט די צייט וועסטו קענען אויפנעמען אן ארבעטער וואס וועט זיצן פון ניין ביז פינף, און דו וועסט סך הכל אריינגיין אין אפיס א שעה צוויי, און אין די איבריגע שעות וועסטו קענען לערנען מיט א חברותא.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד ... נרו יאיר, קרית ברסלב
ווען מען ווערט מקורב צום הייליגן רבי'ן דארף מען זיך היטן פון איין זאך, פון לצים וואס דרייען זיך בתוכינו; נישט צו האבן קיין שייכות מיט זיי.
וואס איז דער סימן פון א לץ, פון וועם זיך צו היטן? דער וואס רעדט פון אנדערע, דער וואס טראגט און ברענגט לשון הרע; פון אזא איינעם דארף מען זיך היטן, ווייל ליצנות איז א געפערליכע קליפה; רבי נתן רופט דאס אן 'אבי אבות הטומאה' רחמנא לצלן.
בעט דעם אייבערשטן פאר גוטע חברים, און ער זאל דיך היטן פון שלעכטע חברים. די הייליגע חכמים האבן מתקן געווען (ברכות טז:) מען זאל בעטן יעדן אינדערפרי פאר א חבר טוב און זיך באהיטן פון א חבר רע, ווייל גוטע חברים קענען ברענגען דעם מענטש צו שיינע זאכן, און חברים לצים קענען אראפווארפן דעם מענטש אין נוקבא דתהומא רבא.
איך בין געווען די וואך פרייטאג באזוכן מיין טאטע שליט"א, רב דקארלסבורג, דערציילט ער מיר וואס טוט זיך אין אומאן; עס קומען אן צו אים די שווערע שאלות פון אומאן, די שאלות פון כהנים און פון מקוואות, זאגט ער מיר, דער רעדט אויף דעם און דער רעדט אויף יענעם, דער זאגט ער בויט א בנין אויף עצמות פון מתים און דער שרייט אויף דעם, זאגט מיר מיין טאטע שליט"א: "אמאל האט מען געוויסט, ווער עס האט געזוכט א ווינקל פון אמת איז געגאנגען קיין ברסלב, היינט זע איך אז אין ברסלב איז דא אזויפיל רייבערייען"... ער האט מיר עס געזאגט מיט ווייטאג.
לאמיר זען ביי אונזער ד' אמות זאל נישט זיין קיין שום ליצנות, קיין שום לשון הרע און רכילות.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד ... נרו יאיר
זיי שטארק מיט דאווענען די דריי תפילות שחרית מנחה מעריב מיט מנין, זיי אויף דעם מקפיד מער ווי אויף אלעס, גיי דאווענען יעדן טאג די דריי תפילות מיט מנין; דאס האלט דעם איד אין מחנה ישראל, מען זאל נישט אוועק פאלן פון אידישקייט.
פארשטייט זיך אז עס איז דא א גרויסע נסיון אויף דעם, די קליפה פון עוג מלך הבשן ווארפט ארויף א בארג עצלות און עצבות, מען ווערט אזוי פויל, מען טראכט 'שפעטער וועל איך דאווענען', 'מארגן וועל איך דאווענען', דארף מען זיך זייער שטארקן נישט אפשטופן דאס דאווענען.
מאך פרייליך דיין ווייב, דו האסט א וואוילע ווייב, א גוטע ווייב.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
מרת ... תחי'
איך האב ערהאלטן אייער בריוו.
איך האב גרויס צער פון די גאנצע פרשה, עס איז אזוי שרעקעדיג צו זען ווי אזא שיינע משפחה צעפאלט דורך מחלוקת; אייערע עלטערן האבן געלעבט אזוי שיין אלע יארן, און יעצט וועגן א מחלוקת צעפאלט אלעס.
איר זאלט ווייטער מחזק זיין אייער מאמע, און זיין זייער שטארק נישט צו ווערן אריינגעדרייט אין די פרשה. אויך זאלט איר רעדן מיט אייער טאטע, און נישט ווערן אריינגעדרייט אין די פרשה.
איך בעט דעם אייבערשטן פאר אייך איר זאלט האבן קינדער, און הצלחה, ובזכות די מצוה פון כיבוד אב ואם, און בזכות שלום – זאלט איר האבן זרע של קיימא מיט אלעס גוטס.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
בנוגע וכו'; ביי אונז פירט מען זיך אז דער מאן ווארט אינדרויסן פון צימער, און זאגט קאפיטל ק' 'מזמור לתודה'. דער רבי זאגט (לקוטי מוהר"ן חלק ב', סימן ב) אז די קאפיטל איז מסוגל להולדה, מען זאגט די קאפיטל נאכאמאל און נאכאמאל ביז מען רופט מיט א מזל טוב.
אויך געבט מען צדקה לזכות די ווייב ולזכות די קינד.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד מיין טייערער ... נרו יאיר
איך וויל דיר בעטן זאלסט קומען צייטליך און כולל, איך ווייס עס איז דיר שווער, דו ביסט צוגעוואוינט צו האבן א סדר פון גיין שלאפן שפעט וכו'; דאך וויל איך דיר בעטן זאלסט האלטן די זמנים, קומען צייטליך און זיין א חלק פון כולל, זיין א חלק פון די חבורה.
אויך וויל איך דיר בעטן זאלסט אדורכשמועסן מיטן ראש הכולל מיט וועם דו זאלסט לערנען און וואס דו זאלסט לערנען; זיי א חלק פון כולל, זיי א חלק פון די שיינע חבורה - וועסטו זייער מצליח זיין.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
... תחי'
לכבוד אייער געבורטסטאג וואס געפאלט דעם שבת, ג' אייר, זאלט איר זוכה זיין צו געזונטע לאנגע יארן מיט אלעס גוטס.
נעמט זיך פאר לכבוד אייער געבורטסטאג צו זאגן יעדן טאג "נשמת"; לויבט און דאנקט דעם אייבערשטן פאר די חסדים וואס דער אייבערשטער מאכט מיט אייך, דאס וועט אייך געבן צו שפירן טעם גן עדן. אזוי ווי דער הייליגער רבי זאגט (לקוטי מוהר"ן חלק ב', סימן ב): "כִּי זֶה עִקָּר שַׁעֲשׁוּעַ עוֹלָם הַבָּא, לְהוֹדוֹת וּלְהַלֵּל לִשְׁמוֹ הַגָּדוֹל יִתְבָּרַךְ וּלְהַכִּיר אוֹתוֹ יִתְבָּרַךְ", די תענוג פון עולם הבא איז צו דאנקען דעם אייבערשטן און אים לויבן, וויסן אז אלעס איז ער און ער איז אלעס, "שֶׁעַל יְדֵי זֶה סְמוּכִים וּקְרוֹבִים אֵלָיו יִתְבָּרַךְ", ווי מער מען דאנקט דעם אייבערשטן איז מען נענטער צו אים, "כִּי כָּל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווייל ווי מער מען ווייסט אז אלעס איז בלויז דער אייבערשטער אליין - "סְמוּכִים אֵלָיו בְּיוֹתֵר", איז מען נענטער צו אים.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
מרת ... תחי', מנהלת בית פיגא, קרית ברסלב
איך האב ערהאלטן אייער בריוו.
יעצט אין די ספירה טעג שטעלט מען אפ דאס טאנצן מיט די קינדער, אזוי ווי עס ווערט גע'פסק'נט אין הלכה אז אין די טעג טאנצט מען נישט (מגן אברהם סימן תצג, סעיף קטן ג); נישט מיט קיין עכטע מוזיק און נישט מיט קיין געמאכטע מוזיק.
יעצט אין די טעג פון ספירה דארף מען באזונדער רעדן צו די קינדער פון גוטע מידות; די ארבעט פון א מנהלת איז - דערמאנען שטענדיג די לערערינס זאלן זיך אומקוקן אויב מען טשעפעט א קינד, און נאכקוקן אויב מען בא'עולה'ט א קינד, און אכטונג געבן מען זאל קיינעם נישט טשעפען.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן
לכבוד ... נרו יאיר, מנהל מוסדות היכל הקודש קרית ברסלב ליבערטי
איך האב ערהאלטן דיין בריוו.
וואס ווערסטו דערשראקן אז דער מענעדזשער רופט אינדערפרי אין שטוב די באס דרייווער'ס ווייב זי זאל אויפוועקן איר מאן דעם באס דרייווער? וואס דען זאל דער מענעדזשער טון אז דער באס דרייווער שלאפט און הייבט נישט אויף דעם טעלעפאן? זאל מען לאזן די גאנצע שטעטל שטיין מיט די קינדער און ווארטן און נישט גיין אין חדר?! זייער גוט האט ער געטון.
פון היינט און ווייטער נעם נאר אינגעלייט וואס דאווענען די ערשטע מנין, זיבן אזייגער - פאר די מוסד צו ארבעטן, די וואס דאווענען שפעט די זענען נישט געמאכט צו ארבעטן אין חדר. וואס דארפסטו זיך עסן דאס געזונט יעדן אינדערפרי? וואס דארפסטו זיין דער וועקער פון די מלמדים און דרייווערס? קוק זיך אום אינדערפרי ווער עס שטייט אויף צייטליך און דאווענט די ערשטע מנין, זיבענע, אדער די צווייטע מנין - און נאר די זאלן ארבעטן אין די מוסד.
שטיי אויף אפאר מינוט פריער און גיי התבודדות צווישן די גראז, זיי זיך מתוודה, דערצייל אלעס פארן אייבערשטן - וועסטו זוכה זיין צו גוטע מלמדים. אזוי ווי דער רבי זאגט (ספר המדות אות דרך חלק ב', סימן א): "עַל יְדֵי וִוידוּי דְבָרִים גוֹרְמִים שֶׁהַקָדוֹשׁ בָּרוּךְ הוּא מַזְמִין מְלַמְדֵי תִּינוֹקוֹת שֶׁלוֹמְדִים בֶּאֱמוּנָה".
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן
לכבוד ... נרו יאיר, קרית ברסלב
האסט מיר געבעטן איך זאל דיר שרייבן און זיך נישט צוריק האלטן פון זאגן, דו זאגסט דו ווילסט הערן וואס בעסער צו מאכן וכו', וועל איך דיר שרייבן.
זאלסט זיך שטארקן מיט אלע כוחות עס זאל זיין שלום ביי ענק אין שטיבל; אז דו האסט זאכן וואס שטערן דיך פון דעם און פון יענעם וכו' וכו' - זאלסטו דאס דערציילן נאר פארן אייבערשטן ביי התבודדות, אבער אין שול זאלסטו נישט מאכן קיין שום עסק דערפון; אפגעזען אויב מען דאווענט שפעט אדער פרי, שנעל אדער שטייט, דאס איז נישט דיין זאך, דיין זאך איז קומען אין שטיבל מיט א שמייכל, אויפזוכן אין יעדן איינעם דאס גוטס.
מוהרא"ש זאגט, ביי יעדע שטיבל היכל הקודש איז דא אינדרויסן קליפות ומזיקין וואס האלטן צוריק מענטשן פון קומען דאווענען; דאס איז נישט נאר פאר פרישע מקורבים, דאס איז ביי יעדן איינעם, מען קען זיין יארן אין היכל הקודש און פלוצלונג ווערט מען פארכאפט ביי די קליפה פון מחלוקת, מען ווערט פארנומען מיט דעם און מיט יענעם, מען פארגעסט פארוואס מען איז בכלל געקומען קיין ברסלב, פארוואס מען איז געקומען צום רבי'ן.
אויב דו וועסט זיך שטארקן, דו וועסט נישט מאכן קיין עסק פון קיין שום זאך, דו וועסט נאר שמייכלען - וועלן ענק האבן הצלחה מיט די קינדער, און אויב מען וועט זיך בייסן - איז א גרויס רחמנות אויף ענקערע קינדער.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
וואס דו הערסט פון מיר ביי די שיעורים, און וואס דו ליינסט אין די בריוו - דאס קענסטו אננעמען, און וואס אנדערע זאגן דיר נאך אין מיין נאמען - אויף דעם נעם איך נישט אחריות.
זיי זיך נישט מבלבל פון די זאכן, נעם די התחזקות פון הייליגן רבי'ן, נעם די חיזוק צו לערנען די הייליגע תורה אויפן סדר דרך הלימוד פון רבי'ן (המבואר בשיחות הר"ן, סימן עו), נעם די חיזוק אויף התבודדות ותפילה, נעם חיזוק אויף זיך דערהאלטן אפילו עס גייט אריבער וואס גייט אריבער; צו בלייבן שטארק מיט אמונה פשוטה, גלייבן אינעם אייבערשטן אז אלעס איז לטובה; נאר דאס זאל דיך אינטערעסירן.
בנוגע זיך אריבערציען קיין פלארידע; זיי מברר אויב די נייע ישוב וועט זיין געבויט אויף תורה ויראת שמים, אויב עס וועט זיין דארט א רב מיט מוסדות התורה. דאס איז אויף וואס א איד דארף קוקן איידער ער גייט וואוינען אין א פלאץ, אויב ער וועט קענען דארט קונה זיין יראת שמים, אויב די סביבה איז ערליך.
דער אייבערשטער זאל העלפן זאלסט האבן הצלחה אין אלע ענינים.
