בריוון פונעם ראש ישיבה שליט"א

בעזרת ה' יתברך - יום ב' פרשת ואתחנן, י' מנחם-אב, שנת תשפ"ה לפרט קטן

... נרו יאיר, קרית ברסלב

אפאר עלטערן זענען געקומען צו מיר מיט א טענה אז זייערע קינדער קומען אהיים און ווילן נישט גיין אין חדר, זיי זאגן דו שלאגסט די קינדער. איין טאטע האט מיר געזאגט אז ער גייט דיר געבן מכות פארן שלאגן זיין קינד שוין אפאר מאל דעם זומער.

איך וויל דיר קלאר מאכן, ביי מיר קענסטו מער נישט זיין קיין מלמד אויב דו שלאגסט די קינדער. מוהרא"ש האט א גוטע ארבעט פאר א מלמד וואס שלאגט קינדער, צו ארבעטן ביי די מיסט (וואס ווער עס ווייסט ווי די ארבעטערס ווארפן די קאנעס מיט רציחה); מוהרא"ש זאגט: "אנשטאט אויסגעבן רציחה אויף די קינדער – געב אויס די רציחה אויף די קאנעס".

על כן ווארן איך דיך, אויב דו וועסט אנרירן א קינד, ערשטנס וועסטו נישט זיין ביי מיר א מלמד, צווייטנס זיי גרייט אז די עלטערן וועלן דיך שלאגן און רופן די פאליציי; מער פון דעם האב איך נישט וואס צו זאגן.

בעזרת ה' יתברך - יום ב' פרשת ואתחנן, י' מנחם-אב, שנת תשפ"ה לפרט קטן

לכבוד ... נרו יאיר, מנהל תלמוד תורה היכל הקודש קרית ברסלב ליבערטי

דעם שבת זענען געקומען צו מיר עלטערן אז דער מלמד ... – שלאגט און פראסקעט די קינדער, איין טאטע זאגט מיר איך גיי אים געבן מכות, א צווייטער זאגט מיר איך וועל רופן די פאליציי.

וויל איך דיר בעטן נאכאמאל, רעד צו די מלמדים און ווארן זיי אויב וועט איינער אנרירן א קינד. מוהרא"ש האט שוין יארן צוריק געזאגט אז מלמדים וואס האבן לויזע הענט, זיי שלאגן, ציפן, שטופן, גראדזשען – זאלן גיין ארבעטן ביי די מיסט, ווארפן די מיסט קאסטענעס, זיך דארט אויסגעבן די נערווען (די איין זאך איז נאכנישט דא אין שטעטל). און אז מען דארף אמאל געבן א פעטשל קען דער מלמד דאס נישט טון, ער זאל מכבד זיין דעם מנהל.

איך בין געווען פינף יאר מלמד ביי די כתה ט', וואס געווענליך דארט גייט פעטש וכו', איך האב קיין איין מאל נישט געניצט מיינע הענט, נישט געווען אזא זאך שלאגן, (אויסער איין פאטש, וואס א קינד האט געשריבן אויפן טאוועל ניבול פה, א מעשה פאר זיך), און אז מען בעט דער מנהל צו שלאגן זאל דער מנהל זוכן איינעם מער חשוב צו שלאגן, ווייל חכמינו זכרונם לברכה זאגן (סנהדרין נח:): "הסוטר לועו של ישראל כאילו סוטר לועו של שכינה", ווער עס שלאגט א איד איז דאס כאילו ער פאטשט דעם אייבערשטן כביכול אין זיין פנים, השם ישמרינו.

איך בעט דיר זייער זאלסט שטיין אויף דעם דאס זאל נישט פאסירן מער ביי אונז.

בעזרת ה' יתברך - יום ה' פרשת בהעלותך, ט"ז סיון, שנת תשפ"ה לפרט קטן

מיין טייערער ... נרו יאיר

איך האב ערהאלטן דיין בריוו.

בנוגע דיין פראגע אויב דו זאלסט אויך טון וכו'; איך וויל זייער אז דיין גאנצע קאפ און מח זאל זיין אין חדר. לאז די זאכן פאר אנדערע, לייג אריין דיין הארץ, קאפ און מח אין די קינדער, און אויב עס בלייבט איבער נאך כח - זאלסטו פרעגן די מנהל וואס נאך דו קענסט טון פאר די חדר, ווייל נאר דאס איז אונזער הצלחה, אז אונזערע קינדער באקומען די בעסטע ווארעמסטע חינוך; קענסט האבן די שענסטע שול מיט די שענסטע קהילה, אויב די קינדער באקומען נישט די ריכטיגע חינוך - האסטו גארנישט, וד"ל.

דיין עבודת השם איז - זיין א ווארעמע אויסגערוטע פרייליכע מלמד; מאכן פרייליך די קינדער און זיי אנפילן מיט יראת שמים און גוטע מידות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת בהעלותך, י"ג סיון, שנת תשפ"ה לפרט קטן

לכבוד מיין טייערער ... נרו יאיר

ביטע געדענקען וואס די פליכט פון א מנהל איז, צו מחזק זיין די מלמדים, זיי מאכן שפירן וויכטיג, זיי מאכן שפירן גוט, זיי געבן יעדן טאג גוטע ווערטער; זיי זאלן נישט לעבן אין ספיקות אויב מען דארף זיי יא אדער נישט וכו'.

עס דרייט זיך ביים מלמד אין קאפ בלבולים, מחשבות וכו', און איין גוט ווארט פונעם מנהל קען אלעס בארואיגן.

איך דארף מקצר זיין, איך דארף גיין צו די בחורים געבן א שיעור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת במדבר, ב' סיון, מ"ו לעומר, שנת תשפ"ה לפרט קטן

מיין טייערער ... נרו יאיר

דו ביסט א מלמד, האסטו אן אחריות צו קומען אין שול אינדערפרי דאווענען שחרית מיט מנין, און אז דו קומסט נאכמיטאג טאג נאך טאג דאווענען נאך חדר, פרעגן די עלטערן: 'דאס איז דער מלמד פון מיין זון? ווי אזוי זאלן מיר טראכטן אויף די זאך?'

איך וויל זייער דו זאלסט דאווענען אינדערפרי, און אז דו קומסט נישט אן אינדערפרי זאלסטו וואס פריער דאווענען. נעם מיט דיין טלית ותפילין, דאווען אין חדר ביי הפסקה, נישט נאכמיטאג; ווייל נאך חצות קען מען נישט דאווענען, נאך חצות איז א ברכה לבטלה, נאך חצות איז א חילול השם.

איך וויל דיך נישט באליידיגן, אבער איך וויל האבן מלמדים יראי שמים. איך בעט יעצט נאך מער דעם אייבערשטן: "אייבערשטער געב מיר מלמדים יראי שמים, אייבערשטער איך דארף מער נישט קיין מומחים, איך דארף מלמדים וואס האבן יראת שמים, וואס דאווענען און לערנען און האבן מורא פונעם אייבערשטן".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת אחרי קדושים, ז' אייר, כ"ב לעומר, שנת תשפ"ה לפרט קטן

... נרו יאיר, מנהל תלמוד תורה היכל הקודש ברסלב ליבערטי

איך הער פון עלטערן אז דער מלמד אין כיתה ... – שלאגט; וויל איך דיר בעטן דו זאלסט רעדן צו די מלמדים אז זיי קענען נישט שלאגן, נישטא אזא זאך א מלמד זאל שלאגן. אויב מען דארף געבן א פאטש - זאל דאס דער מנהל טון, און אז דו שפירסט ווי דו דארפסט געבן א פאטש, זאלסטו גיין ערשט התבודדות און בעטן דעם אייבערשטן דו זאלסט טון נאר וואס איז ריכטיג, קענען אויסלערנען די קינדער וואס איז ריכטיג, זיי מחנך זיין מיט יראת שמים און אהבת הבורא.

מוהרא"ש האט אוועק געשטעלט אז א מלמד שלאגט נישט, נאר אז עס פעלט אויס - זאל דער מנהל זיך מטפל זיין אין דעם.דער אייבערשטער זאל העלפן זאלסט האבן הצלחה אין אלע ענינים.

 בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

מיין טייערער ... נרו יאיר

זיי מודיע פאר די חתנים פון ארץ ישראל זיי זאלן נישט קומען קיין אמעריקע, עס האט נישט קיין זין צו קומען קיין אמעריקע ווען מיר האבן א גאר גוטע ישיבה אין ירושלים מיט א גאר גוטער מגיד שיעור און א מדריך לחתנים וואס וועט זיי אנגרייטן פאר די חתונה.

אויך זאלסטו נישט געבן קיין בעט צו שלאפן אין דארמיטארי פאר די בחורים וואס קומען נישט אין ישיבה, איך וויל פארמאכן די דירות וואו די בחורים שלאפן, ווען רוב פון די בחורים זענען נישט געקומען אין ישיבה א גאנץ ווינטער. עס איז א גרויסע אחריות, איך וויל דו זאלסט שטיין אויף דעם און זיין אחראי אויף דעם, נאר געבן א בעט פאר די בחורים וואס קומען יעדן טאג אין צייט צו שחרית.

חיזוק קענען אלע קומען הערן, צו די נאכמיטאג שיעור קענען אלע קומען, אבער געבן א בעט - איז נאר פאר בחורים וואס קומען צו שחרית, וואס ליינען קריאת שמע אין צייט, דאווענען אין צייט, און פילן אן רוב טאג מיט תורה, תפילה והפצה.

אזוי אויך וויל איך דיר בעטן דו זאלסט זיין ממונה זומער ווען מיר וועלן זיין אין שטעטל, געבן אש"ל נאר פאר בחורים וואס האבן מיט געהאלטן א גאנץ יאר אלע סדרים.

אזוי אויך וויל איך דיר בעטן, די שעות וואס דו ביסט מלמד פון ניין אזייגער ביז דריי - זאלסטו נישט עוסק זיין אין קיין שום פרעמדע זאך, אפילו אין קהילה ענינים; דיין קאפ, הארץ אין מח - זאל זיין ביי די קינדער, זיי אנפילן מיט תורה, תפילה, יראת שמים און מידות טובות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמות, י"ג טבת, שנת תשפ"ה לפרט קטן

לכבוד מיין טייערער ... נרו יאיר

מלומדות איז א חכמה, פון איין זייט דארפן די קינדער ליב האבן חדר, און עס דארף זיך שפירן א פרייליכקייט אין כיתה, און אין די זעלבע צייט דארף זיין א שטארקע דיסציפלין, די קינדער דארפן זיצן שטיל, יעדער אויף זיין פלאץ אן ארויסרעדן א ווארט; אז די צוויי זאכן זאלן גיין אינאיינעם – איז א חכמה, און מיט תפילה קען מען מצליח זיין.

שטיי אויף פארטאגס, גיי שפאצירן מיטן אייבערשטן; בעט אים אז דו זאלסט מצליח זיין מיט יעדן תלמיד, זאלסט טון דיין ארבעט בנאמנות; געבן פאר דיינע תלמידים דאס מערסטע וואס איז שייך.

א מלמד מוז גיין אין מקוה, איך נעם זיך אויס אז אויב מען גייט נישט אין מקוה אינדערפרי – קען מען נישט זיין ביי מיר א מלמד. היות איך ווייס נישט, איך קוק נישט נאך, פארלאנג איך מען זאל זיין אפן מיט די מוסד.

בעזרת ה' יתברך - יום א' פרשת נח, כ"ה תשרי, שנת תשפ"ה לפרט קטן

לכבוד מיין טייערער מלמד ... נרו יאיר

איך האב נישט קיין ווערטער דיך צו דאנקען אויף אלעס וואס דו טוסט מיט אונזערע קינדער, אזויפיל יראת שמים לייגסטו אריין אין זיי, אזויפיל הארץ, אזויפיל כח; דער אייבערשטער זאל דיר געבן אסאך כח צו קענען ווייטער אנגיין מיט די הייליגע ארבעט.

אז דו זעסט א קינד שפילט זיך מיט א צווייטע קינד נישט איידל, זיי קיצלען זיך נישט איידל, און אזוי ווייטער, זאלסטו דאס גלייך אפשטעלן און רעדן צו די קינדער פון זיין איידל, דאס איז דיין פליכט בתורת מלמד; איך פארלאנג פון אלע אונזערע מלמדים זאלן רעדן מיט די קינדער פון קדושת הברית, ויפה שעה אחת קודם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת עקב, חמשה עשר באב, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך בין דיר זייער דאנקבאר פארן לערנען מיט מיין ... די אלע זומער וואכן, און אויך אינמיטן יאר ווען ער קומט אמאל אין שטעטל ביסטו אים מקרב אזוי ליבליך און אזוי ווארעם.

דער אייבערשטער זאל העלפן זאלסט מצליח זיין אין אלע דיינע גוטע מעשים, אין מלמדות, הצלה, אומאן, בית התבשיל, גבאי בית המדרש אשר בנחל, חתונות, איי ווי, ועוד.

בעזרת ה' יתברך - יום ה' פרשת עקב, י"ח מנחם-אב, שנת תשפ"ד לפרט קטן

לכבוד ... נרו יאיר

עלטערן זאגן מיר אז די קינדער ביי דיר אין חדר קומען אהיים מיט סימנים פון שלאגן און ציפן. איך בעט דיר זייער, זיי מיר מברר אויב איז דא איינער וואס רירט אן קינדער, ווייל איינער וואס שלאגט קינדער - האט נישט וואס צו זיין אין חדר; מוהרא"ש זאגט, איינער וואס שלאגט - דארף גיין ארבעטן אין סעניטעישן (ביים צאמנעמען די מיסט).

איך ווארט אויף אן ענטפער.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת ראה, כ"ד מנחם-אב, שנת תשפ"ד לפרט קטן

לכבוד ... נרו יאיר, מלמד בתלמוד תורה היכל הקודש

עס איז וויכטיג צו מאכן א סדר היום, די טאג זאל זיין פינקטליך, דאס איז ביי אלע כיתות און בפרט ביי יונגע קינדער; דער מלמד דארף זיין אנגעגרייט, 'וואס גיי איך טון די גאנצע יאר? וויפיל דארף איך אנקומען א טאג, א וואך, א חודש, ביז די יאר גייט אריבער? וואס דארפן די קינדער קענען?' נאר אזוי קען מען מצליח זיין, און אז דער מלמד קומט אין חדר אן קיין פלאן - דעמאלט שפירן דאס די קינדער, און דעמאלט ווערט א צעפארעניש, דאס מאכט מען זאל שרייען און ווערן פארלוירן.

דער טאג מוז נישט זיין פינקטליך ווי א מאשין, אבער מער ווייניגער דארף זיין די טאג מיט א סדר; וויפיל צייט מען דאווענט, וויפיל צייט מען עסט, וויפיל צייט מען שפילט, וויפיל צייט מען קאלירט, ווען מען זינגט די אני מאמינס, ווען מען נעמט צאם די שפילצייג וכו' וכו'.

אן תפילה איז גארנישט דא; מען דארף אסאך בעטן דעם אייבערשטן מען זאל מצליח זיין מיט די תלמידים און קיין איין תלמיד זאל חס ושלום נישט אוועק גיין פון די תורה וועג.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת אחרי-ב', כ"ד ניסן, ט' לעומר, שנת תשפ"ד לפרט קטן

לכבוד ... נרו יאיר, קרית ברסלב

עס האט מיר געלוינט צו זיין ביי די ברכת האילנות מיט די קינדער פון תלמוד תורה פון שטעטל, צו זען די הערליכע בילד ווי דער בעל הבית פון לעמאנעיד גראסערי בכבודו ובעצמו איז א במקום (סאב) פאר א מלמד וואס האט נישט געקענט קומען; איך האב אזוי הנאה געהאט דאס צו זען, דאס ווייזט אז דיין גאנצע הארץ איז פארן רבי'ן, דו ווילסט העלפן מיט וואס מען דארף, און אז יעצט דארף מען א במקום אין חדר - פאסט דיר צו קומען און דאס טון.

איך דאנק דיר פארדעם און איך בעט פאר דיין הצלחה.

לערן יעדן טאג גמרא, לאז נישט דער טאג אריבערגיין אן עפענען די גמרא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תצוה, שובבי"ם, י"ב אדר א', שנת תשפ"ד לפרט קטן

לכבוד ... נרו יאיר, טברי'

איך האב ערהאלטן דיין בריוו.

איך פריי זיך זייער אז דו לייגסט אריין אין די קינדער יראת שמים, מידות טובות מיט שמחה. איך ווייס דו ארבעטסט שווער, איך ווייס גאר גוט די שווערע ארבעט וואס א מלמד האט, איך אליינס בין א מלמד שוין צוואנציג יאר; דאך לוינט זיך עס, די שכר פון א מלמד איז נישט צו באגרייפן, די שכר גייט לנצח נצחים.

רייכער נישט, דו קענסט כמעט נישט אטעמען, לאז אפ דעם ציגארעטל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת תצוה, שובבי"ם, י' אדר א', שנת תשפ"ד לפרט קטן

לכבוד ... נרו יאיר, מנהל תלמוד תורה היכל הקודש ברסלב ליבערטי

וואלסטו געוואוסט וואס גייט אריבער אויף קינדער... עס זענען דא קינדער וואס קומען פון שטיבער וואס מען פייניגט און מען הרג'ט זיי; דער קינד ... נרו יאיר, די מאמע איז אזוי איבערגעשטרענגט, זי קען אים בייסן און אים שלאגן מכות אכזריות.

בעט איך דיר, זיי זיך זייער מחזק און זיי מחזק די מלמדים זיי זאלן זיך באנוצן מיט רחמנות, ווען מען נעמט אריין רחמנות - ווערט אלעס גוט; מען ווערט ווארעם און ווייך, און די קינדער שפירן דאס און זיי פאלגן.

געב זיך איבער צום אייבערשטן, גיי נישט אין חדר נאר נאכן גיין התבודדות; נאכן זיך אויסשמועסן, נאכן זיך אויסקרעכצן, נאכן זיך איבערגעבן - פארן אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת תרומה, שובבי"ם, ז' אדר א', שנת תשפ"ד לפרט קטן

לכבוד ... נרו יאיר, מנהל תלמוד תורה היכל הקודש קרית ברסלב ליבערטי

איך וויל דיר בעטן זאלסט פארהערן די קינדער, זען אויב די קינדער קענען דאס לערנען. איך הער צוריק פון אפאר עלטערן פון כיתה ... אז די קינדער זענען שוואך מיט קענען די חומש. אפשר לערנט מען צו סאך; ענדערש זאל דער מלמד לערנען ווייניגער פסוקים און מען זאל דאס גוט קענען, ווי איידער דער מלמד זאל לערנען אסאך און די קינדער קענען נישט.

עס איז וויכטיג דו זאלסט אריינגיין אין יעדע קלאס פארהערן, נישט אויף צו זוכן ווי צו כאפן די קינדער וואס קענען נישט, נאר צו פאררעכטן די וועג ווי אזוי מען לערנט, אז אלע זאלן קענען דאס לערנען.

אויך זאלסטו מחזק זיין אנשי שלומינו. ווען דו רעדסט ביי ספורי מעשיות און ביי שלש סעודות - זאלסטו מחזק זיין אנשי שלומינו זאלן קומען צו די שיעורים, אויסהערן די שיעורים, פאלגן וואס מען רעדט ביי די שיעורים. אויך זאל מען לערנען די בריוו פון עצתו אמונה; די מפיצים גייען הפצה מיט די ספרים, מענטשן זענען זיך מחי', יעצט דארף מען זען אז אין היכל הקודש - ביי אנשי שלומינו – זאל מען אויך אנהויבן לערנען און טון די עצות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת תרומה, שובבי"ם, ז' אדר א', שנת תשפ"ד לפרט קטן

לכבוד ... נרו יאיר, מנהל תלמוד תורה היכל הקודש קרית ברסלב ליבערטי

איך האב ערהאלטן דיין בריוו.

איך בעט דיר זייער עס זאל נישט זיין אין חדר קיין טעבלעט אדער סמארטפאון אפילו לצורך המוסד, און אז מען דארף צייכענען יעדן טאג די קינדער וואס קומען - זאל מען דאס נישט טון מיט א טעבלעט. געב אכטונג אז די קינדער זאלן אויפוואקסן ריין און הייליג.

די מלמדים זאלן רעדן צו די קינדער פון זיך היטן פון א נישט כשר'ע טעלעפאן, מען דארף רעדן צו די קינדער פון יראת שמים ווען זיי זענען נאך יונג, און אז די קינדער וועלן זען ווי מען נוצט די סארט כלים מטעם המוסד - וועלן זיי אפגעקילט ווערן פון יראת שמים.

איך וויל דיר נאכאמאל דערמאנען א וויכטיגע זאך וואס דער מנהל דארף געדענקען צו טון; געבן גוטע ווערטער פאר די מלמדים. עס איז די וויכטיגסטע זאך, וויכטיגער פון אלעם; געבן די הרגשה פאר די מלמדים אז מען איז צופרידן מיט זיי.

דאס איז נישט נאר פאר א מנהל, דאס איז פאר יעדע בעל הבית; אז מען האט ארבעטערס און מען מאכט זיי שפירן ווי מען דארף זיי - שפארט מען זיך זייער אסאך פראבלעמען, און מען איז נאכדעם זייער מצליח. דער ארבעטער האט א שטארקע ווילן צו טון וואס אימער פארן בעל הבית, כל שכן א מלמד וואס זיצט מיט נשמה'לעך און ער דארף האבן סבלנות מיט אייזערענע כוחות צו זיין רואיג און אויפהייבן די קינדער - דארף דער מנהל געדענקען צו געבן די גוטע געפיל אז מען ווייסט פון זיין שווערע ארבעט.

אז דו וועסט אויפלעבן דעם מלמד וועסטו זיך איינשפארן אסאך ארבעט.

געב זיך איבער צום אייבערשטן, הויב אן דיין טאג מיט התבודדות, בעט דעם אייבערשטן זאלסט מצליח זיין מיט יעדן מלמד און מיט יעדן תלמיד - וועסטו האבן א שטארקע הצלחה.

בעזרת ה' יתברך - יום ד' פרשת יתרו, שובבי"ם, כ"א שבט, שנת תשפ"ד לפרט קטן

לכבוד ... נרו יאיר

די וואך שבת וועל איך זיין אין וויליאמסבורג און אם ירצה ה' די קומענדיגע וואך - שבת פרשת משפטים - פאר איך אוועק פאר שבת מיט צען אינגעלייט וואס העלפן מיר צו קענען צאלן די מלמדים. מיר איז נישט גרינג אוועק צו פארן פון שטוב, מיר איז די געשמאקסטע זאך צו זיין שבת אין שטוב מיט מיין משפחה, אבער איך דארף דאס טון צו קענען דעקן די מלמדים און איינגעשטעלטע צו צאלן אין צייט.

איך וויל דיך מחזק זיין זאלסט לערנען דעם בלאט גמרא, היינט איז די דף בבא קמא דף צ. מיר גייען שוין ענדיגן די מסכתא, איך וויל אם ירצה ה' מאכן א שיינע סיום פאר די גאנצע קהילה ליל שישי פרשת כי תשא, א סיום מסכת בבא קמא, און בעיקר מחזק זיין צו אנהייבן מסכת בבא מציעא; ווייל איך זע ווי אינגעלייט פלאגן זיך אזוי פאר פרנסה, וויפיל מען דרייט, מען פרובירט צו מאכן אפאר דאלער - פארלירט מען און מען זינקט אין חובות, איך הער פון גרויסע ביזנעסלייט אז זייער גאנצע ביזנעס איז א גרויסע באלאן, אלעס איז חובות מיט שרעקליכע ריבית, איז דאך ממש א שאד מען זאל נישט לערנען יעדן טאג די בלאט גמרא; דאס איז יא, דאס בלייבט, דאס געבט פרנסה, גמרא געבט שלוות הנפש.

נעכטן איז געווען א חתונה אין ישיבה, אויך א ברית; ביידע, סיי די חתונה און סיי די ברית - האבן געקאסט די זעלבע, די ברית און די חתונה זענען ביידע געווען פול מיט טעם. דער אייבערשטער זאל העלפן מיר זאלן קענען חתונה מאכן אונזערע קינדער אן קיין חובות נאר מיט שמחה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת תרומה, שובבי"ם, ה' אדר א', שנת תשפ"ד לפרט קטן

לכבוד מיינע טייערע תלמידים, אנשי שלומינו שיחיו, תושבי קרית ברסלב ליבערטי

היינט נאכט איז דא אן אסיפת הורים פאר אלע עלטערן וואס שיקן די קינדער אין חדר, עס איז זייער וויכטיג צו האבן א שייכות מיט די מלמדים פון די קינדער, און נאך מער וויכטיג איז - האבן א שייכות מיטן מנהל.

ובכן וויל איך בעטן אלע עלטערן וואס שיקן ביי אונז אין חדר זאלן קומען צו די אסיפה, אלע זאלן קומען צייטליך, זיך טרעפן מיטן מלמד און אויך מיטן מנהל. זאג אלעס וואס ליגט דיר אויפן הארץ; אז דו טראכסט מיר מאכן נישט עפעס אדער דו זעסט עפעס וואס שמעקט נישט גוט - זאלסטו אלעס אויסשמועסן, מיר ווילן וויסן יעדע זאך וואס שטערט, מיר זענען דא צו ארבעטן אינאיינעם פאר די הצלחה פון די קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת בשלח, שובבי"ם, י"ב שבט, שנת תשפ"ד לפרט קטן

לכבוד ... נרו יאיר

דו ביסט צעשוידערט פון די שרעקליכע פאסירונג וואס האט פאסירט, ווי איינער האט צעשטאכן צום טויט זיינע עלטערן השם ישמרינו; דו ווילסט וויסן וואס האט די מעשה מיט דיר, וואס דארפסטו טון נאכן הערן אזא נייעס.

מיט יארן צוריק ווען עס האט פאסירט די שרעקליכע מעשה, איינער האט צעשניטן אן אומשולדיג קינד און אין די זעלבע צייט האט איינער געשטאכן א צדיק תמים אין ארץ ישראל, האט מוהרא"ש אונז געזאגט וואס מען ווייזט אונז פון הימל, אז מען צעשניידט קינדער אין חדר, מען נעמט מלמדים וואס טויגן אויף גארנישט און זיי צעשניידן קינדער, זיי שפעטן פון קינדער און צעקלאפן קינדער פאר די גאנצע לעבן, און די אנדערע פאסירונג קומט ווייל מען רעדט אויף צדיקים, מען שפעט פון צדיקים וואס זענען זיך מוסר נפש לאוקמא שכינתא מעפרא, ארויס נעמען די שכינה הקדושה פון גלות, זיי ברענגען צוריק אידישע קינדער צו די אמונה, פון זיי שפעט מען און אויף זיי רעדט מען.

יעצט ווען מיר הערן אזא פאסירונג דארפן מיר זיך פארנעמען מכבד זיין די עלטערן, רעדן צו די עלטערן מיט די גרעסטע כבוד און דאס גרעסטע דרך ארץ, חס ושלום נישט צעשטעכן די עלטערן דורך רעדן מיט חוצפה; ליידער ליידער קען מען זען און הערן ווי קינדער פירן זיך צו עלטערן מיט שרעקליכע חוצפה, מען נעמט זיך צוזאם גאנצע משפחות און מען מאכט פּרענקס אויף די עלטערן.

נעם זיך פאר פון יעצט מער צו מכבד זיין דיינע עלטערן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת וישב, כ"א כסליו, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

א גרויסן יישר כח פארן העלפן צאלן די מלמדים; מיר זענען יעצט זייער געדרוקט, שוין אפאר וואכן וואס מען צאלט נישט די איינגעשטעלטע, און בזכותך - וואס דו האסט געברענגט צוועלף טויזנט דאלער – האט מען געקענט צאלן איין וואך געהאלט.

אויב דו ווייסט פון מענטשן וואס האבן א געפיל צו אונזער מוסד – וואלט איך מיט דיר געגאנגען בעטן צדקה, ווייל איך מוז באצאלן די מלמדים און די איינגעשטעלטע. נעכטן בין איך געפארן קיין מאנסי זיך טרעפן מיט מענטשן וואס האבן א געפיל פאר די מוסד, זיי בעטן צו העלפן מיט געוויסע זאכן.

איך קוק צוריק, דער אייבערשטער האט געמאכט אזעלכע ניסים ביז אהער, איך גלייב עס קומט נאך גרויסע ניסים.

גיי יעדן טאג אין פעלד זיך אויסשמועסן מיטן אייבערשטן.

בעזרת ה' יתברך - חנוכה, שנת תשפ"ד לפרט קטן

לכבוד מיין טייערער ... נרו יאיר

איך האב אזויפיל נחת פון מיין ... נרו יאיר, ער קומט אהיים מלא וגדוש מיט יראת שמים, מיט תמימות, מיט מעשיות פון צדיקים; ער געבט איבער יעדע ווארט פון דיר, ער האט אזוי ליב צו גיין די יאר אין חדר.

דער אייבערשטער זאל דיך בענטשן, בזכות די מי און פלאג וואס דו לייגסט אריין אין די קינדער זאלסטו האבן נחת ביי דיינע קינדער און הצלחה מיט דיין הייליגע ארבעט.

א פרייליכן חנוכה.

בעזרת ה' יתברך - חנוכה, שנת תשפ"ד לפרט קטן

לכבוד מיין ליבער ... נרו יאיר

איך האב נישט קיין ווערטער דיך צו דאנקען פאר וואס דו טוסט מיט מיין טייערער זון ... נרו יאיר; ער האט אזוי ליב צו גיין אין חדר, ער האט אזוי ליב דעם מלמד. ער איז אזוי טייער, מען דארף נאר האבן דעם קלוגן מלמד זאל זען אז ער איז טייער, נישט אלע מלמדים האבן מיט אים מצליח געווען.

דעריבער דאנק איך דיר פאר דיין הארץ וואס דו לייגסט אריין אין אלע תלמידים, און בפרט אין אים.

דער אייבערשטער זאל דיך בענטשן מיט נחת ביי דיינע קינדער.

בעזרת ה' יתברך - יום ג' פרשת ויצא, ח' כסליו, שנת תשפ"ד לפרט קטן

לכבוד מיין טייערער באליבטער ... נרו יאיר, קרית ברסלב ליבערטי

האסט נישט קיין אנונג ווי חשוב א מלמד איז אין הימל, א מלמד טראכט ביי זיך 'וואס? ווער דארף מיך? ווער ווייסט ווי שווער איך ארבעט?' אבער ווען ער וואלט געוואוסט ווי אזוי מען קוקט אויף אים אין הימל – וואלט ער נישט געווען צעבראכן, נאר משונה פרייליך.

זיי ממשיך מיט דיין הייליגע ארבעט, גיי יעדן אינדערפרי שפאצירן מיטן אייבערשטן; הויב אן מיט תודה והודאה, דאנק פאר דיין לעבן, פאר דיין משפחה, פאר דיין הייליגע ארבעט און בעט פאר דיינע קינדער און דיינע תלמידים.

פון דיין ראש ישיבה וואס האט דיך זייער ליב.

בעזרת ה' יתברך - יום ב' פרשת ויצא, ז' כסליו, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

נישטא אזא זאך דער מלמד זאל געבן פעטש ביי מיר אין תלמוד תורה; מיר האבן א מנהל, און אז עס פעלט אויס - וועט ער מחליט זיין; דער מלמד טאר נישט געבן פעטש.

אויב געבסטו פעטש - וויל איך נישט זאלסט זיין מלמד ביי מיר.

דער אייבערשטער זאל העלפן זאלסט האבן הצלחה אין אלע ענינים.