בריוון פונעם ראש ישיבה שליט"א

בעזרת ה' יתברך

יום ד' פרשת בראשית, אסרו חג, כ"ד תשרי, שנת תש"פ לפרט קטן

לכבוד ... נרו יאיר.

אז זי האט זיך למעשה ארויסגעדרייט און זי האט נישט געכאפט וואס ער האט געוואלט טון וכו' וכו' און זי האט ברוך ה' חתונה געהאט און זי לעבט מיט דיר כדרך כל הארץ וכו', דארף זי גארנישט טון.

שטארק דיין ווייב און מאך איר פרייליך; מען דארף נישט אריין גריבלען אין אלטע זאכן נאכדעם וואס דער מניוול האט נישט מצליח געווען וכו', חזר'ט אייך איין וואס דער רבי האט געזאגט (שיחות הר"ן, סימן כו): "ביי די וועלט איז שכחה א חסרון, אבער ביי מיר איז שכחה א מעלה", מענטשן רעדן זיך אפ אז זיי האבן נישט קיין גוטע זכרון און זיי פארגעסן וואס איז געווען, מען מיינט אז דאס איז א חסרון, אבער עס איז פארקערט, עס איז נאר א מעלה, ווייל ווען עס וואלט ווען נישט געווען שכחה וואלט מען נישט געקענט דינען דעם אייבערשטן, מען וואלט נישט אויפגעהערט צו טראכטן פונעם פארגאנגענהייט, פון אלע דורכפעלער און אלע פראבלעמען וואס מען איז דורך, דאס וואלט גורם געווען אז דער מענטש זאל נישט וועלן נאכאמאל פרובירן צו זיין אן ערליכער איד, אבער יעצט אז עס איז דא שכחה, קען מען זיך באנייען און אנהייבן פונדאסניי.

דער אייבערשטער זאל העלפן זאלסט מצליח זיין אין אלע דיינע וועגן.

בעזרת ה' יתברך

יום ד' פרשת בראשית, אסרו חג, כ"ד תשרי, שנת תש"פ לפרט קטן

לכבוד הכלה ... תחי'.

איך האב ערהאלטן דיין בריוו.

דו קענסט ארויסגיין פון שטוב און דו דארפסט נישט מורא האבן פון קללות; קללות שאדט נאר פאר דעם מקלל.

בנוגע זיך אפשערן; עס איז זייער א גרויסע זאך זיך אפצושערן די האר נאך די חתונה, רבי שמעון בן יוחאי זאגט צו גוטע דורות און פרנסה וכו' וכו' פאר די פרוי וואס שערט אפ אירע האר נאך די חתונה (עיין זוהר הקדוש פרשת נשא, דף קכה עמוד ב).

אויב איז ממש אזוי ווי דו שרייבסט אינעם בריוו, דו שפירסט אז אויב מען גייט דיר אפשערן איז דאס ווי מען גייט דיר אפהאקן דיין האנט וכו', דעמאלט קענסטו ווארטן וכו' און מיט'ן אייבערשטנ'ס הילף, מיט אסאך תפילה והתבודדות וועסטו אנהייבן שפירן א געשמאק אין אידישקייט און דו וועסט זיין גרייט אויף דעם, וועסטו דאס טון בשמחה ובטוב לבב.

האב נישט מורא פון קללות; שלמה המלך זאגט (משלי כו, ב): "כַּצִּפּוֹר לָנוּד, כַּדְּרוֹר לָעוּף, כֵּן קִלְלַת חִנָּם לוֹ תָבֹא", אזוי ווי א פייגל פליט ארויס פון איר נעסט צו זוכן עסן און נאכדעם קערט זי זיך צוריק, אזוי אויך ווען איינער שעלט וועט דאס צוריק קומען צו דעם וואס שעלט.

דער אייבערשטער זאל העלפן זאלסט מצליח זיין אין אלע דיינע וועגן.

בעזרת ה' יתברך

יום א', הושענא רבה, כ"א תשרי, שנת תש"פ לפרט קטן

לכבוד ... נרו יאיר.

חול המועד טאר מען נישט שרייבן נאר ווען עס איז א דבר האבד, איך שפיר ווי דאס איז א דבר האבד, אז דיין שלום בית זאל דיר נישט גיין צוגרינד.

הער אויף נאך לויפן דיין ווייב וכו', עס איז נישט גוט צו זיצן אין שטוב א גאנצן טאג אויף דיין ווייב'ס קאפ. חכמינו זכרונם לברכה זאגן (כתובות נט:): "הַבַּטָּלָה מְבִיאָה לִידֵי זִמָּה וְלִידֵי שִׁעֲמוּם", גיין ליידיג ברענגט צו נישט גוטע זאכן.

דו דארפסט נישט קיין פילן וכו', דו דארפסט ארויסגיין פון שטוב; אדער גיין ארבעטן, אדער גיין הפצה - מפיץ זיין קונטרסים פאר אידישע קינדער, אדער גיין לערנען וכו'. פילן העלפט נישט ווען מען גייט ליידיג; אז דו וועסט זיצן אין שטוב וועט דיר נישט העלפן טאבלעטן וכו', דו וועסט ווייטער וועלן זיין הונדערט מאל א טאג מיט דיין ווייב וכו'.

דיין ווייב שפירט נישט גוט פון דעם אליינס וואס דו זיצט איר אויפ'ן קאפ; אז דו וועסט איר אויפהערן נאכלויפן וועט זי זיין געזונט און שטארק.

הייב אן נאכאמאל לערנען ח"י פרקים משניות; אלס בחור האסטו געלערנט אזוי פלייסיג משניות, פארוואס זאלסטו נישט ממשיך זיין יעצט נאך די חתונה ווייטער מיט ח"י פרקים משניות? משניות איז די בעסטע טאבלעטן פאר'ן מענטש, משניות קילט אפ דעם מענטש פונעם ברענעדיגן יצר הרע.

איך האף אז דו האסט זיך נישט באליידיגט פון די נעכטיגע שמועס, איך האב פשוט רחמנות אויף דיר; עס איז א שאד אז דיין שלום בית זאל זיך דיר אפקילן. ווען א פרוי שפירט ווי דער מאן לויפט איר נאך וכו', קילט זיך אפ די ליבשאפט וכו'. אזוי ווי עס איז באקאנט די מעשה, א איד איז אמאל געקומען צום הייליגן צמח צדק פון ליובאוויטש זכותו יגן עלינו און זיך באקלאגט אז זיין ווייב גרויסט זיך אויף אים, זי דערנידערט אים און טשעפעט אים. האט דער הייליגער צדיק אים געזאגט: די תורה זאגט (בראשית ג, טז): "וְאֶל אִישֵׁךְ תְּשׁוּקָתֵךְ, וְהוּא יִמְשָׁל בָּךְ", דער אייבערשטער האט געזאגט פאר חוה אז זי וועט גליסטן נאכ'ן מאן און דער מאן וועט געוועלטיגן איבער איר, און דער צמח צדק האט אויסגעפירט: "דאס גייט אינאיינעם, און אויב טוישט מען אויף דעם ערשטן חלק, מען גליסט צו איר, דאן טוישט זיך דער צווייטער חלק און זי ווערט די געוועלטיגער".

א גוט קוויטל.

בעזרת ה' יתברך - יום א' פרשת האזינו, ז' תשרי, שנת תש"פ לפרט קטן

לכבוד משפחת ... שיחיו.

מען האט מיר מודיע געווען פון אפיס אז איר זענט שולדיג פאר שכר לימוד דער סכום פון ... טויזנט דאללער; נישט נאר דו צאלסט נישט קיין שכר לימוד, נאר דו מאכסט חוזק און א געשפעט פון די גאנצע זאך.

מיר גייען יעצט בעטן דעם אייבערשטן ביי תפילת נעילה: "אַתָּה נוֹתֵן יָד לַפּוֹשְׁעִים, וִימִינְךָ פְשׁוּטָה לְקַבֵּל שָׁבִים, וַתְּלַמְּדֵנוּ ה' אֱלהֵינוּ לְהִתְוַדּוֹת לְפָנֶיךָ עַל כָּל עֲוֹנוֹתֵינוּ, 'לְמַעַן נֶחְדַּל מֵעֹשֶׁק יָדֵינוּ' וּתְקַבְּלֵנוּ בִּתְשׁוּבָה שְׁלֵמָה לְפָנֶיךָ כְּאִשִּׁים וּכְנִיחוֹחִים" וכו', נאכדעם בעט מען נאכאמאל: "וַתִּתֶּן לָנוּ ה' אֱלֹהֵינוּ בְּאַהֲבָה אֶת יוֹם צוֹם הַכִּפֻּרִים הַזֶּה, קֵץ וּמְחִילָה וּסְלִיחָה עַל כָּל עֲוֹנוֹתֵינוּ, 'לְמַעַן נֶחְדַּל מֵעֹשֶׁק יָדֵינוּ' וְנָשׁוּב אֵלֶיךָ לַעֲשׂוֹת חֻקֵּי רְצוֹנְךָ בְּלֵבָב שָׁלֵם"; עס איז נישט פארהאן נאך תפילות וואס מען בעט צוויי מאל ביי נעילה, זעט מען פון דעם די הארבקייט פון זיין שולדיג פאר א צווייטן געלט.

איך בין נישט מוחל קיין איין פרוטה וואס דו קומסט מיר, איך בלוטיג אוועק יעדע רגע פאר די מוסד, פאר דיינע קינדער וכו'; דער אייבערשטער ווייסט אז איך נעם נישט קיין איין פרוטה פונעם מוסד פון ווען די מוסד שטייט, איך לייג אריין אינעם מוסד אלעס וואס איך האב צו קענען באצאלן די איינגעשטעלטע אז די מוסד זאל אנגיין און דו מאכסט זיך נישט וויסנדיג, עס איז א בושה און א חרפה.

איך ווארט צו הערן פונעם מנהל המוסד אז דו האסט אים גערופן און געמאכט א פלאן ווי אזוי צו באצאלן.

דער אייבערשטער זאל דיר געבן שכל דו זאלסט וויסן אז שכר לימוד איז די חשוב'סטע זאך, אז מען צאלט שכר לימוד איז מען מצליח מיט די קינדער.

בעזרת ה' יתברך

יום א' פרשת ברכה, ערב חג הסוכות, י"ד תשרי, שנת תש"פ לפרט קטן

... תחי'.

איך האב ערהאלטן דיין בריוו.

איך האב דיר שוין געשריבן פאריגע וואך אז עס גייט מיר נישט ארויס פון קאפ וואס דו האסט מיר דערציילט וואס דו ליידסט אין שטוב, ובעיקר אז קיינער ווייסט נישט וואס דו ליידסט, ווייל ווען איינער ליידט פון מענטשן, מען טשעפעט אים און מען רודפ'ט אים, אויב ווייסן מענטשן וואס ער ליידט איז דאס גרינגער פאר'ן מענטש, ווייל מען קען אים מחזק זיין וכו', אבער ווען א קינד גייט אריבער יסורים אין שטוב און קיינער ווייסט נישט וואס ער ליידט און קיינער גלייבט אים נישט, מען זאגט אים: "נע, דו טרייבסט איבער, עס קען נישט זיין", "דו ביסט שולדיג", וכדומה, דעמאלט איז כמעט אוממעגליך דורך צו טראגן די יסורים.

דעריבער ביסטו א חידוש ווי אזוי דו גייסט אן אין לעבן מיט אזויפיל יסורים ווען קיינער קען נישט חלומ'ן וואס מען טוט מיט דיר; דיינע נאנטע, דיינע חבר'טעס ווייסן גארנישט וואס דו ליידסט נעבעך צאם.

איך בעט דיר זייער, ווארט נאך אביסל; דו ביסט שוין אין די יארן פון ווערן א כלה, נאך אביסל וועסטו האבן דיין אייגענע לעבן מיט מזל און הצלחה.

געב זיך איבער צום אייבערשטן; איך האב געהערט פון א ברסלב'ער חסיד וואס האט א שווערע לעבן, אז יעדעס מאל ווען ער קען מער נישט נעמען די יסורים טראכט ער צו זיך: 'איך בין א נפטר און די מלאכי חבלה זענען מיר מטהר ומנקה פון מיינע עבירות'; דעמאלט ווערט אים גרינגער.

א גוט יום טוב.

בעזרת ה' יתברך

יום א' פרשת האזינו, ז' תשרי, שנת תש"פ לפרט קטן

... תחי'.

איך בעט דיר זייער זאלסט זיך שטארקן מיט אלע דיינע כוחות זיך צו דערהאלטן, נאך אביסל וועסטו זוכה זיין צו טרעפן א גוטע שידוך און אויפשטעלן א בית נאמן בישראל.

איך האב נישט קיין מנוחה פון דאס אלעס וואס דו האסט מיר דערציילט, וואס דו גייסט אריבער אין שטוב וכו' וכו'; עס איז נישט צום גלייבן אז עלטערן זאלן שלאגן די אייגענע קינדער מכות רצח, איך האף צום אייבערשטן אז דאס וועט מער נישט פאסירן, אויב יא ווייסטו וואס דו האסט צו טון, זאלסט נעמען דיין טאשקע און אוועק גיין פון שטוב.

זייער גוט טוסטו אז דו דערציילסט קיינעם נישט וואס דו גייסט אריבער, נאר דו גייסט ארום מיט א שמייכל, אלע מיינען אז דו ביסט די גליקליכסטע וכו', קיינער קען נישט חלומ'ן ווי צעבראכן און צעבלוטיגט דיין הארץ איז אין דיר. זאלסט דערציילן פאר'ן אייבערשטן דיין צעבראכענע הארץ, רעדן צום אייבערשטן געבט א מורא'דיגע שטארקייט, מען קען אריבער טראגן שווערע ביטערע נסיונות און נישט צעפאלן ווערן.

איך האב באקומען ערב ראש השנה ביים רבינ'ס ציון אין אומאן א ליסטע פון אלע תלמידות בית פיגא פון ארץ ישראל, איך האב דיין נאמען, איך בעט פאר דיר דו זאלסט מצליח זיין אין אלע דיינע וועגן.

זיי ממשיך צו זאגן תהלים.

א גמר חתימה טובה און א גוט געבענטשט יאר.

בעזרת ה' יתברך

יום א' פרשת האזינו, ז' תשרי, שנת תש"פ לפרט קטן

לכבוד ... נרו יאיר.

איך פריי זיך זייער אז דו האסט צעבראכן אלע מניעות און דו ביסט געקומען קיין אומאן; דער אייבערשטער זאל העלפן זאלסט האבן א זיס יאר, א ליכטיג יאר, נחת ביי דיינע קינדער, שידוכים, פרנסה מיט אלעס גוטס.

איך ווארט צו הערן צי עס איז נאך דא א קלער פון צוריק באקומען די פופציג טויזנט דאללער וואס ער האט גע'גנב'ט, איך דערטרענק זיך אין חובות.

בנוגע גיין צו ערכאות וואס דארט קען מען באקומען די געלט ביז פיר און צוואנציג שעה; איך בין גרייט צו פארלירן די גאנצע געלט אבי נישט צו מחלל זיין שם שמים. אויב בית דין וועט אונז געבן א היתר ערכאות איז אן אנדערע זאך.

איך ווארט צו הערן פון דיר.

א גמר חתימה טובה.

בעזרת ה' יתברך

יום א' פרשת האזינו, ז' תשרי, שנת תש"פ לפרט קטן

לכבוד ... נרו יאיר, מנהל מוסדות היכל הקודש ברסלב.

איך האב ערהאלטן דיין בריוו.

איך בעט דיר זייער אויב דו קענסט זיך אנשטרענגען מיט אלע כוחות צו באצאלן די מלמדים און איינגעשטעלטע די וואך פאר די קומענדיגע וואכן ביז נאך סכות; דאס הייסט אויף דריי וואכן: פרשת האזינו, די וואך פון יום טוב סוכות און פרשת בראשית. זיי ארבעטן אזוי געטריי א גאנץ יאר, איז יעצט ווען עס קומט יום טוב לאז זיי האבן א שמחת יום טוב זיי זאלן קענען משמח זיין די ווייב און קינדער.

פרוביר דאס צו געבן שוין היינט אדער מארגן, אז עס זאל נישט זיין וואס חכמינו זכרונם לברכה זאגן (חגיגה ה.): "הַמַמְצִיא לוֹ מָעוֹת לֶעָנִי בְּשַׁעַת דָּחְקוֹ", ווער עס ברענגט גלעט פאר'ן ארימאן די לעצטע מינוט ווען ער קען נישט קויפן פאר ביליג, ער מוז קויפן פאר טייער, וואס דאן איז דאס פאר אים א קללה.

איך ווארט צו הערן די גוטע נייעס אז דו האסט זיי באצאלט אויף יום טוב, אזוי וועלן מיר קענען זאגן ביי תפילת נעילה: "לְמַעַן נֶחְדַּל מֵעֹשֶׁק יָדֵינוּ, וּתְקַבְּלֵנוּ בִּתְשׁוּבָה שְׁלֵמָה לְפָנֶיךָ".

איך וועל דיר אם ירצה ה' שיקן ד' מינים אויף יום טוב.

איך שיק דיר א בריוו וואס דו זאלסט שיקן צו די פאר משפחות וואס מאכן זיך נישט וויסנדיג א גאנץ יאר ווען דו רופסט זיי בעטן שכר לימוד; נישט נאר זיי צאלן נישט קיין שכר לימוד, נאר זיי מאכן א געשפעט ווען מען רופט זיי בעטן שכר לימוד.

דער אייבערשטער זאל העלפן זאלסט מצליח זיין אין אלע דיינע וועגן.

א גמר חתימה טובה און א גוט געבענטשט יאר.

...

בעזרת ה' יתברך

ערב שבת קודש פרשת האזינו, י"ב תשרי, שנת תש"פ לפרט קטן

... תחי'.

איך האב ערהאלטן דיין בריוו.

גלייב מיר, איך בין אויך זייער דערשראקן פון די פרשה און איך האב גרויס רחמנות אויף איר, בפרט אויף דעם חתן; אן אומשולדיגער חתן גרייט זיך חתונה צו האבן און ער ווייסט נישט וואס ווארט אים אין לעבן, ער חלומ'ט נישט אז זיין כלה דארף אים נישט און וויל אים נישט.

דו זאלסט זיך נישט מבלבל זיין פון קיינעם נישט; דאס מערסטע וואס דו קענסט טון איז "תפילה", דערציילן פאר'ן אייבערשטן דעם סיפור הדברים און אים בעטן עס זאל נישט ארויסקומען קיין ווייטאג פאר קיינעם, עס זאל זיך ענדיגן גוט.

בעיקר זאלסטו בעטן פאר דיר אליינס, אזוי ווי דער רבי זאגט (ליקוטי מוהר"ן, חלק ב', סימן סז): "וְהָעִקָּר לְהִסְתַּכֵּל עַל עַצְמוֹ", א מענטש דארף אסאך בעטן פאר זיך, פאר זיינע דורות הבאים און בכלליות פאר אידישע קינדער.

נאך אביסל וועסטו זוכה זיין צו א גוטע שידוך; איך האף צום אייבערשטן אז איך וועל זיין דיין שדכן.

בעזרת ה' יתברך

ערב שבת קודש פרשת האזינו, י"ב תשרי, שנת תש"פ לפרט קטן

מרת ... תחי'.

איך האב ערהאלטן אייער בריוו.

איך פריי זיך זייער צו הערן אז איר זענט צוריק געגאנגען צו אייער מאן, איר האט פארקוקט אויף אלעס אבי אז אייערע קינדער זאלן האבן א געזונטע שטוב, זיי זאלן אויפוואקסן מיט א טאטע מאמע.

אויף אייער פראגע אז ער שלעפט אייך אויף יום טוב וכו'; טראכט צו זיך אז איר האלט שוין נאך אייער פטירה, איר זענט א נפטרת און די מלאכי חבלה טראגן אייך צו דעם פלאץ וכו', וואס וואלט איר דעמאלט געטון?

געבט זיך איבער צום אייבערשטן; זאגטס פאר'ן אייבערשטן די ווערטער: "אֵייבֶּערְשְׁטֶער אִיךְ גֶעבּ זִיךְ אִיבֶּער צוּ דִיר; אִיךְ וִויל גָארְנִישְׁט, אִיךְ וִויל נָאר וָואס דוּ וִוילְסְט, אִיךְ בִּין צוּרִיק גֶעגַאנְגֶען צוּ מַיין מַאן נָאר וֶועגְן דִיר, כְּדַאי אַז מַיינֶע קִינְדֶער זָאלְן אוֹיסְוָואקְסְן גֶעזוּנְט, זֵיי זָאלְן הָאבְּן אַ טַאטֶע אוּן אַ מַאמֶע; הֶעלְף מִיר אֵייבֶּערְשְׁטֶער אִיךְ זָאל זַיין פְרֵיילִיךְ, הֶעלְף מִיר אִיךְ זָאל גָארְנִישְׁט וֶועלְן, אִיךְ זָאל זַיין צוּפְרִידְן פוּן מַיין לֶעבְּן".

שרייבטס מיר נאך וועל איך אייך מחזק זיין; איך וועל אייך שטענדיג מחזק זיין, איך וועל אייך נישט לאזן פאלן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

ערב שבת קודש פרשת האזינו, י"ב תשרי, שנת תש"פ לפרט קטן

מרת ... תחי'.

איך האב ערהאלטן אייער בריוו.

איך פריי זיך זייער צו הערן אז איר שטארקט זיך מיט די עצות פון רבי'ן, מיט די עצה פון רעדן צום אייבערשטן; ווער עס נעמט די עצה פון רעדן צום אייבערשטן ווערט אויסגעהיילט פון אלע פחדים און שלעכטע מחשבות.

א גריס פון אייערע ליכטיגע קינדער; סיי אייער זון און סיי אייער טאכטער, ביידע פון זיי זענען אויסנאם קינדער קיין עין הרע, זיי זענען זייער דרך ארץ'דיג און פאלגעדיג.

דער אייבערשטער זאל אייך געבן כח צו קענען מחנך זיין די קינדער געזונטערהייט צוזאמען מיט אייער טייערער מאן.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

א גריס פון דיינע ליכטיגע קינדער; דער אייבערשטער זאל העלפן זאלסט זיי מגדל זיין צוזאמען מיט דיין ווייב בניקל ובנחת.

ווען עס קומט א נייע יאר דארפן מיר מאכן א חשבון הנפש וואס מיר האבן געטון דעם פארלאפענעם יאר פאר'ן אייבערשטנ'ס וועגן און מאכן פרישע קבלות פאר די נייע יאר. פאר ווער עס פרעגט מיר וואס ער זאל זיך פארנעמען לכבוד דעם נייעם יאר, זאג איך אים: "נעם זיך פאר מוסיף צו זיין אין הפצה, צוריק ברענגען נאך אידישע נשמות צום דרך התורה".

איך האף אז דו וועסט אויך מאכן א שטארקע קבלה מוסיף צו זיין אין הפצה; סיי לייגן גליונות וכו' און סיי אויסטיילן ספרים, קונטרסים, סידי'ס, קארטלעך פאר בחורים און מיידלעך. זאלסט זיך נישט צוטון מאכן פון לצים וואס רופן אונז אן מיט צונעמען וכו', נאר גלייך ווען דו זעסט א בחור זאלסטו צוגיין צו אים און אים מזכה זיין מיט עצות און חיזוק פאר'ן לעבן, טראכט נישט צי מען קוקט... צי מען לאכט...

  האלט פאר דיינע אויגן ווי למשל איינער דערטרענקט זיך אין וואסער און דו האסט די מעגליכקייט אים צו ראטעווען, וואלסטו דען געקוקט צי איינער קוקט? צי איינער לאכט? וואלסט זיכער אריינגעשפרינגען יענעם צו ראטעווען.

אין דעם זכות זאלסטו האבן א שנה טובה ומבורכת.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליבער ... נרו יאיר.

איך האב געזען דעם נייעם בלעטל וואס איר געבט ארויס יעדע וואך; איך בין זייער נתפעל געווארן פון דעם גליון, בעיקר פון די "מעשיות פון תפלה", וואס ברענגט אריין אמונה בתמימות ובפשיטות אין אנשי שלומינו, מען זאל וויסן אז וואס מען דארף און וואס מען וויל זאל מען זיך ווענדן נאר צום אייבערשטן, אים בעטן אויפ'ן פשוט'ן שפראך.

פון דעם באשטייט דאס גאנצע ברסלב'ער חסידות; דער הייליגער רבי לערנט אונז אויס אז מיר זאלן לעבן אונזער טאג טעגליכער לעבן מיט תפילה והתבודדות, נאר דאס איז איין אמת'ער תכלית.

איך האף אייך צו שרייבן יעדע וואך א בריוו פאר'ן גליון; עס איז כדאי דו זאלסט דאס אויסשפרייטן פאר אלע משפחות, אלע זאלן האבן דערפון חיזוק און הדרכה ווי אזוי צו לעבן א חיים טובים.

דער עיקר זאלט איר זען צו לעבן בשלום איינער מיט'ן צווייטן; די וואך האבן זיך אריינגעצויגן נאך א משפחה, משפחת ... הי"ו, דער אינגערמאן זאגט מיר אז זיי קענען נישט קומען צו זיך פון די שיינע ווארעמע ברוך הבא וואס אלע משפחות האבן זיי געמאכט, מיט אזא חסד און אהבה.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

מרת ... תחי'.

איך בעט דיר זייער זאלסט זיך שטארקן מיט אמונה אינעם אייבערשטן, וועט דיר דאס לעבן זיין זיס און האניג'דיג.

ווען א מענטש ווייסט קלאר אז אלעס אויף די וועלט טוט דער אייבערשטער, עס איז גארנישט דא אויסער דעם אייבערשטן – איז אים אלעס גוט; ער ווייסט אז אלעס איז לטובתו, אויך דאס אז מען פארשטייט נישט די טובה איז אויך דער אייבערשטער, דעמאלט איז גרינגער צו נעמען דאס שלעכטס.

געב א קוק דיינע ליכטיגע קינדער וואס דער אייבערשטער האט דיר געגעבן און אזא טייערע מאן נרו יאיר, בלייבט דיר איבער נאר איין זאך: "תודה והודאה" – דאנקען און לויבן דעם אייבערשטן און אים בעטן אויף ווייטער.

איך בעט זייער אסאך דעם אייבערשטן פאר דיר און דיין מאן; דיין מאן העלפט מיר זייער אסאך, ער העלפט מיר מיט א געטריישאפט, אין דעם זכות וועט איר זוכה זיין צו א גוט געבענטשט יאר.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליבער חבר ... נרו יאיר.

איך האף אז דו ביסט נישט ברוגז אדער אנגעווייטאגט אויף מיר אויב דורכ'ן יאר האב איך דיר געזאגט אדער געשריבן וכו'; נעם אן מיינע ווערטער אויף א פאזיטיווער וועג, ווייל איך וויל נאר דו זאלסט האבן א גוט לעבן.

יעצט ביים רבינ'ס ציון וועלן מיר פועל'ן א גוט יאר; ביים רבינ'ס ציון קען מען פועל'ן ישועות שלא כדרך הטבע. מוהרא"ש זאגט נאך בשם רבי אברהם בן רבי נחמן זכרונו לברכה: "אז מען עקשנ'ט זיך ביים ציון, קען מען אלעס פועל'ן".

דעריבער זאלסטו נישט זיין קיין בטלן, זאלסט זיצן ביים ציון און וויינען און וויינען אז דו זאלסט ארויסגיין פון דיין צוגעקלעבטקייט צו אלקאהאל; בעט דעם רבי'ן אז דו זאלסט זיך פאר'עקלען פון אלקאהאל, און מיט תפילה קען מען אלעס פועל'ן.

א אינגערמאן האט מיר דערציילט אז זיין זיידע (א מחותן פון מוהרא"ש זכרונו לברכה) פלעגט רייכערן צוויי פושקעס צוגרעטלעך יעדן טאג (רויטע צוגרעטלעך), ער איז געווען אזוי צוגעבינדן צו דעם, ער האט זיך ממש נישט געקענט שיידן דערפון.

ווען ער איז מקורב געווארן צום רבי'ן האט ער אנגעהויבן בעטן דעם אייבערשטן: "הייליגער באשעפער, העלף מיר איך זאל מער נישט רייכערן; דער רבי זאגט מען זאל נישט רייכערן, העלף מיר איך זאל זיך אפלאזן פון דעם", איין אינדערפרי ווען ער האט גענומען דעם צוגרעטל אין האנט האט ער געשפירט ווי עס עקלט אים און ער האט דאס אראפגעווארפן, נאכדעם האט ער ווייטער פרובירט איינמאל און נאכאמאל ביז ער האט געזען אז זיינע תפילות און געבעטן זענען נתקבל געווארן און ער האט זיך אפגעוואוינט פון דעם. זעט מען פון דעם, אז מען בעט העלפט דער אייבערשטער.

א כתיבה וחתימה טובה.

בעט פאר מיר, יואל בן ריצא רעכל.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר, תלמיד ישיבת תפארת התורה.

איך בעט דיר זייער, זיי שטארק און לאז נישט אפ גארנישט פון אידישקייט; אמת, עס איז דיר זייער שווער, דו ווילסט שוין אזוי שטארק חתונה האבן און דו האלסט עס מער נישט אויס, דו שפירסט זיך ווי א שמאטע; דאך זאלסטו גלייבן באמונה שלמה אין די ווערטער וואס חכמינו זכרונם לברכה זאגן (סוטה ב.): "אַרְבָּעִים יוֹם קוֹדֶם יְצִירַת הַוָּלָד בַּת קוֹל יוֹצֵאת וְאוֹמֶרֶת בַּת פְּלוֹנִי לִפְלוֹנִי", פערציג טעג פאר'ן געבוירן ווערן רופט מען אויס אין הימל ווער די שידוך איז און וועט זיין און ווען עס זאל אנקומען.

נעם די עצה פון רבי'ן; גיי אין א זייט, אין א פלאץ וואו קיינער זעט נישט און וויין צום אייבערשטן, זאג פאר'ן אייבערשטן: "אייבערשטער, איך האב מער נישט קיין כח צו זיין א בחור, א פלג גוף; אייבערשטער איך וויל חתונה האבן, איך וויל זיין הייליג און ריין, איך האלט שוין נישט אויס דעם נסיון פון זיין א בחור"; אזוי זאלסטו בעטן דעם אייבערשטן יעדן טאג ביז דו וועסט זוכה זיין צו געהאלפן ווערן.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליבער ... נרו יאיר.

איך שרייב דיר דעם בריוו אויפ'ן פליגער פארנדיג צום רבי'ן אויף ראש השנה.

עס טוט מיר אזוי וויי, ממש עס רייסט מיר ביים הארץ וואס דו גייסט אריבער מיט דיין משפחה; זיי ווילן נישט רעדן מיט דיר און זיי וויל נישט האבן מיט דיר, מיט דיין ווייב און קינדער. אלעס צוליב דעם גרויסן חטא אז דו ביסט א ברסלב'ער, דו פארסט קיין אומאן אויף ראש השנה און פאר'ן שיקן די קינדער אין די ברסלב'ע מוסדות.

וואס זאלן מיר טון אז דער רבי איז אזוי פארשעמט; מען רעדט אויף אונז כל דבר אסור, כאילו ביי אונז איז א פלאץ פון הפקרות און קלות ראש, ווען באמת איז דאס פונקט פארקערט. ווי יעדער פרישער מקורב דערציילט ווי אזוי דער הייליגער רבי האט אים געטוישט דאס לעבן צו א לעבן מיט אמונה, א לעבן מיט חשבון הנפש און א לעבן מיט תכלית פון תורה ותפלה, וכו', וכו'.

דער רבי האט שוין דאס געזאגט פאר איבער צוויי הונדערט יאר צוריק (שיחות הר"ן, סימן קפב): "עָלַי אֵין חוֹלְקִים כְּלָל, רַק הֵם חוֹלְקִים עַל מִי שֶׁעָשָׂה כָּךְ כְּמוֹ שֶׁבּוֹדִים הַחוֹלְקִים עָלָיו, וְעַל אִישׁ כָּזֶה בְּוַדַּאי רָאוּי לַחֲלֹק", אויף מיר קריגט מען נישט, "זֵייא הָאבִּין זִיךְ אוֹיס גִּישְׁנִיצְט אַה מֶענְטְשׁ, אוּן קְרִיגְן אוֹיף אִיהם", מען רעדט אויף דעם מענטש כל דבר אסור און אויף יענעם קריגט מען, זאגט דער רבי: "אויף יענעם קריג איך אויך".

איך בעט דיר זייער זאלסט נישט זיין צעבראכן; זיי מחזק דיין ווייב, קודם איז שוין אביסל גרינגער ווען אירע עלטערן רעדן שוין יא מיט ענק, נאך אביסל וועלן דיינע עלטערן רעדן מיט דיר און עס וועט זיך אלעס איבערדרייען לטוב.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

יעצט ווען מיר האלטן סוף יאר וויל איך דיר וואונטשן א גוט געבענטשט יאר.

איך דאנק דיר פאר'ן מיר העלפן צוזאמנעמען חודש'ליך די רענט פאר'ן מוסד, מיט דעם האסטו מיר גרינגער געמאכט איך זאל האבן כח ווייטער צו לערנען און מחזק זיין די בחורים און אינגעלייט.

איך וועל מתפלל זיין פאר דיר, דיין ווייב און דיין זון ... ביים רבינ'ס ציון, אז דו זאלסט האבן הצלחה אין אלע דיינע מעשים.

איך האף אז דו וועסט ווייטער ממשיך זיין לשנת תש"פ ווייטער צו העלפן די מוסד מיר זאלן ווייטער קענען פארשפרייטן די זיסע ליכטיגע עצות פון רבי'ן פאר די גאנצע וועלט.

יום כיפור, סוכות, הושענא רבה און שמחת תורה וועל איך אם ירצה ה' בלייבן אין וויליאמסבורג, איך פארמאך נישט די מוסד און בית המדרש אין וויליאמסבורג; מיר גייען נישט בבחינת פוחת והולך, נאר מיר גייען ווי די בית הלל - מוסיף והולך, מיר האבן געעפנט נאך א מוסד אין שטעטל אבער נישט אויף צו פארמאכן די מוסד אין שטאט.

א כתיבה וחתימה טובה פון דיין ראש ישיבה וואס האט דיר ליב און ווארט אויף דיין הצלחה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

ווען מיר שטייען שוין ביים ענדע פונעם יאר, ביים אנהויב פונעם נייער יאר – וויל איך דיר וואונטשן זאלסט האבן א זיס ליכטיג יאר און דו זאלסט קענען ערציען דיינע קינדער געזונטערהייט צוזאמען מיט דיין טייערע ווייב תחי'.

דאס ווייסטו אוודאי אז דער יצר הרע ימח שמו האט זייער פיינט אונזער פלאץ "היכל הקודש"; ער טוט אלעס אויף דער וועלט אוועק צו שלעפן און אפקילן א מענטש פון "היכל הקודש". דעריבער דארף מען אסאך בעטן דעם אייבערשטן מען זאל בלייבן מקושר צום הייליגן רבי'ן, און מען זאל געדענקען דאס גוטס און די טובות וואס דער רבי האט מיט אונז געטון.

איך בעט דעם אייבערשטן אז דו זאלסט האבן הצלחה אין אלע דיינע וועגן.

א כתיבה וחתימה טובה און א גוט געבענטשט יאר.

פון דיין ראש ישיבה וואס האט דיר ליב נאך מער פון אמאל, גארנישט ווייניגער פון אמאל און ווארט צו זען דיין הצלחה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליכטיגער תלמיד ... נרו יאיר.

מאך זיך א שיעור אין "ספר עצתו אמונה" וועסטו האבן חיזוק, דו וועסט וויסן ווי אזוי זיך צו פירן אין לעבן; איך האב גארנישט מחדש געווען, איך שרייב וואס איך האב זוכה געווען צו לערנען דורכאויס די אלע יארן פון מוהרא"ש.

שטארק זיך און שטארק דיין ווייב, איר וועט נאך זוכה זיין צו זרע של קיימא; יעצט ראש השנה איז א צייט נפקד צו ווערן בזרע של קיימא, אזוי ווי חכמינו זכרונם לברכה זאגן (ראש השנה יא.) אז ראש השנה זענען אונזערע מאמעס די אמהות הקדושות נפקד געווארן בזרע של קיימא.

נעם זיך פאר לכבוד דעם נייעם יאר עוסק צו זיין ביתר שאת וביתר עוז אין פארשפרייטן די הייליגע עצות און חיזוק פון רבי'ן, דורכדעם וועסטו זוכה זיין צו מצליח זיין אין דיין נייע געשעפט, דו וועסט האבן גרויס הצלחה.

מיט יעדן איינעם וועם דו רעדסט; מיט אידן אדער להבדיל אומות העולם, זאלסטו שטענדיג מזכיר זיין דעם אייבערשטנ'ס נאמען, גא"ד בלע"ס י"ו, אזוי וועסטו זייער שיין מצליח זיין.

איך ליב דיר, דיין ראש ישיבה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליבער ... נרו יאיר.

זונטאג פאר דו ביסט געפארן קיין אומאן, ווען דו ביסט זיך געקומען געזעגענען האסטו מיר געבעטן איך זאל מתפלל זיין פאר דיר, ווייל זייט דו ביסט אריבער די פרשה מיט'ן אפלאזן די שידוך ביסטו נאכנישט צו זיך געקומען.

וויל איך דיר יעצט מגלה זיין, וויסן זאלסטו אז זייט דו ביסט געווארן באפאטשט פון די פרשה גייט נישט אריבער א טאג וואס איך זאל נישט מתפלל זיין פאר דיר, אויך מיין ווייב און קינדער – אלע זענען מיר נאכנישט געקומען צו זיך פון די פרשה, וויפיל נעכט איז אוועק פון אונז פון דיין פרשה, דאס הארץ רייסט אונז אלעמען.

פון די אנדערע זייט דארפן מיר זיך מחזק זיין מיט אמונה פשוטה, מיר דארפן חזר'ן אן א שיעור אז "דער אייבערשטער פירט די וועלט; מיר ווייסן גארנישט, מיר זענען דא געסט און מיר דארפן טון דעם ווילן פונעם אייבערשטן אן קיין חשבונות און אן קיין חכמות".

איין זאך זאגן אלע (די וואס קענען דיר), זי האט פארלוירן, עס איז איר שאדן.

אז דו וועסט זיין שטארק, דו וועסט זיך דערהאלטן, וועסטו זוכה זיין צו שענער"ס און בעסער"ס.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר וזגתו ... תחי'.

זייט נישט באזארגט וועגן קינדער; איר וועט בקרוב זוכה זיין צו זרע של קיימא.

חכמינו זכרונם לברכה זאגן (ראש השנה יא.) אז ראש השנה זענען די אמהות נפקד געווארן מיט קינדער; דער אייבערשטער זאל העלפן איר זאלט נפקד ווערן יעצט ראש השנה מיט זרע של קיימא.

מען דארף שטענדיג דערמאנען חסדי ה' וואס דער אייבערשטער טוט שטענדיג מיט'ן מענטש, מיט דעם מאכט מען א כלי צו מקבל זיין פרישע חסדים. פאריאר ראש השנה האט איר ניטאמאל גע'חלומ'ט אז איר וועט טרעפן א שידוך און חתונה האבן, קוקט ווי דער אייבערשטער האט אייך אזוי שיין געהאלפן, אזוי וועט דער אייבערשטער אייך ווייטער העלפן מיט קינדער, פרנסה און כל טוב.

לכבוד דעם נייעם יאר זאלט איר זיך מקבל זיין ווייטער צו העלפן דעם רבי'ן בכל פרט ופרט, דער רבי בלייבט קיינעם נישט שולדיג, דער רבי זאגט: "ביי וועם איך נעם געב איך", און ווען א צדיק געבט, געבט ער בעין טובה.

א גוט געבענטשט יאר.

פון ענקער ראש ישיבה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

איך שרייב דיר יעצט א בריוו פון הימל פארנדיג קיין אומאן.

געלויבט דעם אייבערשטן אז מיר פארן יעצט קיין אומאן אויף ראש השנה, דער אייבערשטער זאל העלפן מיר זאלן זוכה זיין צו אלע תיקונים און צו א שנה טובה ומבורכת.

ביים ציון זאלסטו בעטן דעם אייבערשטן אז דו זאלסט מצליח זיין מיט מלמדות, אלע דיינע תלמידים זאלן אויסוואקסן ערליכע אידן.

איך האף דאס יאר צו פארשטערקערן די חדר און די סקול; ברוך ה' מיר האבן זוכה געווען דאס יאר צו האבן גאר חשוב'ע מלמדים און טיטשערס וואס וועלן אריינלייגן אין די קינדער אמונה פשוטה, די קינדער זאלן אויפוואקסן מיט א פשטות צו וויסן אז וואס זיי דארפן און וואס זיי ווילן נאר – זאלן זיי בעטן דעם אייבערשטן. אריינווארצלען אין זיי די אמונה אז דער אייבערשטער פירט די וועלט, עס איז נישט דא קיין טבע, מקרה און מזל, נאר אלעס איז דער אייבערשטער. דומם, צומח, חי און מדבר, הכל לכל איז עצם עצמיות חיות אלקותו יתברך.

בשעת די קינדער שפילן אין זייער פרייע צייט, זאלסטו זיי אנצינדן ניגוני אמונה, "טאנץ מיט אמונה"; עס זאל זיי אריינגיין אין די ביינער אז דער אייבערשטער פירט די וועלט.

איך וועל דערציילן דעם רבי'ן אלעס וואס דו העלפסט מיר דורכאויס דעם יאר בכלל ובמלמדות בפרט.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

דו האסט מיר געמאכט דעם חשבון אויף פען און פאפיר אז דו האסט נישט קיין געלט צו ענדיגן דעם חודש, דו קענסט זיך דעקן זייער מצומצם.

וואס מיינסטו, דער אייבערשטער האט בלויז איין וועג ווי אזוי דיר צו געבן פרנסה? הרבה דרכים למקום, דער אייבערשטער האט אסאך וועגן ווי אזוי צו העלפן דעם מענטש, מיר דארפן מקיים זיין דעם (מלשון הכתוב דברים טו, יח): "וּבֵרַכְתִּיךָ בְּכָל אֲשֶׁר תַּעֲשֶׂה", מיר דארפן מאכן מיט די הענט כאילו מיר שטעלן אליינס אויף דעם משכן און דער אייבערשטער אליינס איז דער וואס שטעלט אויף דעם משכן, דער אייבערשטער איז דער וואס געבט פרנסה.

איך בעט דיר זייער מיין טייערער ... נרו יאיר, נעם דעם רבינ'ס עצה, גיי אויף א שפאציר און וויין זיך אויס צום אייבערשטן, לייג אים פאר אלע דיינע קאסטן, זאג אים אלעס וואס דו דארפסט יעצט; א סוכה, נוי סוכה, ד' מינים, מתנה פאר די ווייב, סעודות יום טוב, וכו', וכו', - וועסטו זען נסים, עס וועט קומען פרנסה בריווח פון א פלאץ וואו דו האסט זיך נישט פארגעשטעלט אז עס וועט קומען.

אין שטעטל איז דאך ממש גן עדן התחתון, דארט איז גאר גוט זיך צו מתבודד זיין; הייב אן דיין טאג מיט התבודדות אויף די פרישע ריינע לופט און ענדיג דיין טאג מיט התבודדות.

א כתיבה וחתימה טובה.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ... נרו יאיר.

חכמינו זכרונם לברכה זאגן (נדה לא.): "אֵין בַּעַל הַנֵּס מַכִּיר בְּנִסוֹ", דער מענטש וואס האט נסים ווייסט גארנישט וואס פאר א נס דער אייבערשטער טוט מיט אים; דו ווייסט גארנישט וואס פאר א נס דער אייבערשטער האט מיט דיר געטון, דו האסט געטראפן א שידוך פון הימל, אזא טייערע ערליכע פרוי, זאלסטו נישט אויפהערן דאנקען דעם אייבערשטן אויף דעם גרויסן נס.

אויך זאלסטו רעדן שיין צו דיין ווייב תחי'; זאלסט איר אויסהערן און איר מחזק זיין. בפרט יעצט ווען זי ווארט למזל טוב, זאלסטו איר אויסהערן און מחזק זיין, ווייל פרויען זענען זייער דערשראקן ווען זיי ווארטן די ערשטע מאל וכו', זיי האבן כל מיני פחדים וואס גייט זיין וכו', וואס, ווען און וואו.

אז דער אייבערשטער האט דיר געשיקט קיין ארץ ישראל זאלסטו דארטן עוסק זיין אין העלפן פארשפרייטן די זיסע עצות פון הייליגן רבי'ן וואס מיר האבן מקבל געווען פון מוהרא"ש.

אלס בחור אין ישיבה ביסטו געווען זייער הילפבאר, דארפסטו ווייטער ממשיך זיין בבחינת מוסיף והולך, ומעלין בקודש.

א כתיבה וחתימה טובה און א גוט געבענטשט יאר.

בעט פאר מיר, יואל בן ריצא רעכל.