בריוון פונעם ראש ישיבה שליט"א

בעזרת ה' יתברך

יום ה' פרשת וארא, כ"ו טבת, שנת תש"פ לפרט קטן

... תחי'.

איך פריי זיך זייער צו הערן אז יעדע זאך וואס איר דארפט בעט איר דעם אייבערשטן; איר האט אזויפיל מעשיות פון תפילה, יעדע זאך וואס גייט אריבער אויף אייך און אויף אייער משפחה ווענדט איר זיך נאר צום אייבערשטן.

זייטס מחזק אנדערע מיידלעך; טראכטס אלע סארט וועגן ווי אזוי איר קענט מחזק זיין אנדערע זיי זאלן לעבן מיט אמונה.

דער הייליגער רבי האט אמאל געזאגט, די סיבה פארוואס דער הייליגער בעל שם טוב זכותו יגן עלינו האט אזוי ליב געהאט זיין טאכטער אדל (דעם רבינ'ס באבע) און איר שטענדיג אויסגערימט איז געווען ווייל זי איז שטענדיג ארום געגאנגען מיט א בענקעניש צום אייבערשטן און געטראכט: 'וואס קען איך טון צו מאכן א נחת רוח פאר'ן אייבערשטן? וואס קען איך טון צו הייליגן זיין נאמען?'

עס איז דא צו באקומען אין ירושלים יעדע וואך די קונטרסים "עצתו אמונה"; איר דארפט זיך פארבינדן מיט די מפיצים וועט איר דאס קענען זען וועכנטליך, דאס וועט אייך מחזק זיין און אייך אויסקלארן אלע אייערע ספיקות.

דער אייבערשטער זאל העלפן איר זאלט מצליח זיין אין אלע אייערע וועגן.

בעזרת ה' יתברך

יום ג' פרשת שמות, י"ז טבת, שנת תש"פ לפרט קטן

לכבוד ... נרו יאיר.

ווען דו וואלסט געוואוסט דיין גרויסקייט אין הימל מיט דעם וואס דו דרוקסט די בריוו פון עצתו אמונה און דו ביסט עס מסדר אזוי הערליך שיין; מענטשן זענען זיך מחי' מיט די בריוו, מענטשן הויבן אן לעבן דורך די בריוו - וואלסטו געטאנצט פאר שמחה.

איך ווייס אז דער יצר הרע ארבעט אויף דיר, ער לאקערט אויף דיר, ער וויל דיר מחליש דעת זיין וכו' מיט בלבולים וכו'; בעט איך דיר זייער זאלסט זיך נישט לאזן צעברעכן און זאלסט ווייטער ממשיך זיין מיט'ן דרוקן די בריוו. הלואי ווען דו קענסט יעדע וואך ארויסגעבן א גאנצע קונטרס, אז די מפיצים זאלן דאס קענען פארשפרייטן פאר אלעמען.

שטארק זיך; דו וועסט זוכה זיין צו קינדער און אייניקלעך און זען נחת ביי זיי. דער זוהר הקדוש זאגט (תרומה קכח:): דער וואס ברענגט צוריק מענטשן צום אייבערשטן איז זוכה אנצוקומען צו מדריגות וואס קיין שום מענטש איז נישט זוכה; ווייל ער נעמט אוועק טומאה פון די וועלט און מאכט אז דעם אייבערשטנ'ס נאמען זאל ווערן געהייליגט אויף די וועלט, אלע וועלטן שטייען אויף זיין זכות, "וְזָכֵי לְמֵחַמֵי בְּנִין לִבְנוֹי", און ער איז זוכה צו זען קינדער און אייניקלעך; זאלסטו ווייטער ממשיך זיין מיט'ן דרוקן די בריוו, דאס שיין מסדר זיין און וואס מער פארשפרייטן. ווייל די בריוון זענען מחזק צעבראכענע בחורים און צעבראכענע מיידלעך וואס האבן זיך שוין מייאש געווען פון זייער לעבן, און דייקא די בריוון רעדט זיי און איז זיי מחזק.

דראפע זיך און דערהאלט זיך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת ויגש, ד' טבת, שנת תש"פ לפרט קטן

לכבוד ... נרו יאיר.

איך האב יעצט ערהאלטן דעם ספר עצתו אמונה וואס דו ביסט מתרגם; עס איז הערליך שיין, דאס וועט צוריק ברענגען אסאך בחורים און אינגעלייט צום אייבערשטן.

טייערער ברודער שטארק זיך; זיי ממשיך מיט'ן איבער טייטשן די בריוו און פארשפרייט דאס צווישן בחורים און אינגעלייט, ווער עס ווייסט אביסל וואס טוט זיך אפ היינט מיט בני הנעורים... עס גייט אריבער אויף זיי שווערע ביטערע נסיונות און די ספרים איז זיי מחזק, דאס איז געשריבן אויף א שפראך וואס זיי פארשטייען.

וואס דארף מען מער פון א טובה טון פאר א אידן; מחזק זיין א צווייטער איד. דער הייליגער בעל התניא האט נאכגעזאגט פון זיין רבי'ן דער הייליגער מגיד פון מעזריטש זכותו יגן עלינו וואס האט געהערט פונעם הייליגן בעל שם טוב זכותו יגן עלינו דעם דיבור: "א נשמה קומט אראפ אויף די וועלט און לעבט דא אפ זיבעציג אכציג יאר - נאר כדי א טובה טון פאר א צווייטן איד"; הער ווערטער וואס הייסט א טובה טון פאר א צווייטן איד: "עס לוינט זיך צו לעבן זיבעציג יאר אבי א טובה צו טון פאר א צווייטן"; וואס הייסט א טובה טון א איד? נאר אז מען איז יענעם מזכה מיט תורה, תפילה, מצוות ומעשים טובים.

איך דארף מקצר זיין ווייל איך בין זייער פארנומען, איך וועל דיר נאך שרייבן מער באריכות.

בעזרת ה' יתברך

יום ה' פרשת וישב, כ"א כסליו, שנת תש"פ לפרט קטן

לכבוד האברך היקר לי ... נרו יאיר.

וואויל איז דיר אז דו האסט אנגעהויבן גיין הפצה; דו פארשפרייטסט די ליכטיגע עצות פון רבי'ן פאר אנדערע. עס איז א גרויסע רחמנות אויף מענטשן וואס ווייסן נישט פון די שיינע זיסע וועגן פון רבי'ן.

בעיקר זאלסטו גיין צווישן כולל אינגעלייט, זיי דארפן נאך דאס מערסטע חיזוק; די אינגעלייט, יונגע אברכים וואס האבן יעצט חתונה געהאט זיי דארף מען עפענען די אויגן זיי זאלן זען אז מען קען לעבן א לעבן, זיין דבוק צום אייבערשטן צוזאמען מיט די ווייב.

רוב אינגעלייט ווייסן נישט דערפון, זיי האבן יסורים ווייל פון איין זייט ציט זיי אהיים צו גיין צו די ווייב און פון די אנדערע זייט האט מען זיי אזוי פארדריידט דעם קאפ אז מען טאר נישט טראכטן פון די ווייב, מען זאל נישט צופיל אהיים גיין וכו', זיי קוקן אויף די ווייב ממש כאילו כפאו שד.

בעט איך דיר זייער, זוך אויף די קונטרסים "עצתו אמונה" וואס האבן אין זיך הנהגות פאר אינגעלייט, וואו זיי וועלן קענען ארויס נעמען רמזים, זיין א מבין דבר מתוך דבר, וויסן ווי אזוי צו לעבן אן ערליכע לעבן מיט די ווייב, זוכה זיין צו האבן א ריינעם מח, א זויבערע מחשבה און קענען דינען דעם אייבערשטן בשמחה ובטוב לב.

בעזרת ה' יתברך

ערב שבת קודש פרשת וישלח, ט"ו כסליו, שנת תש"פ לפרט קטן

מרת ... תחי'.

איר זאלט זיין געבענטשט מיט אלע ברכות פונעם אייבערשטן פאר'ן אהערשטעלן הילף פאר קימפעטארנס צו קאכן עסן, מיט'ן צוזאמנעמען אלע פרויען פון שטעטל, יעדער זאל העלפן איינער דעם צווייטן.

געבטס איבער פאר אלע פרויען אנשי שלומינו, אז מיט חסד וועט זיך בויען די שטעטל, און מיט אחדות און ליבשאפט וועלן מיר מצליח זיין. מוסדות בויט זיך נישט מיט געלט און מאכט, קהילות בויען זיך נישט פון נגידים און עשירים, נאר דורך אחדות און ליבשאפט.

שטארקטס אייך און זייטס ממשיך מיט'ן איבערטייטשן די שאלות ותשובות פון ספר עצתו אמונה – אויף די ענגלישע שפראך; די מפיצים זאגן אז מענטשן זענען זיך מחי' מיט די ענגלישע בריוו, עס מאכט ליכטיג אזויפיל אידישע שטובער, כשמו כן הוא: "די ליכט פון אמונה". אויך ליינט מען דאס פאר אויף די האטליין, סיי פאר מענער און סיי פאר פרויען, הונדערטער מענטשן זענען זיך מחי' מיט דעם; דאס אלעס גייט פאר אייך א זכות, און פאר אייערע דורות.

א גוט שבת.

בעזרת ה' יתברך

יום ב' פרשת וישב, י"ח כסליו, שנת תש"פ לפרט קטן

לכבוד מיין טייערער ליבער ... נרו יאיר.

איך בעט דיר זייער, שטארק זיך מיט דיין הייליגע ארבעט צו דרוקן די שיינע בריוון פון עצתו אמונה. דו קענסט זיך נישט פארשטעלן וויפיל אידן זענען זיך מחי' יעדן טאג מיט די בריוון.

דער הייליגער רבי האט געזאגט: "פון אייך קענט איר וויסן וואס גייט אריבער אויף אנדערע"; מיר האבן דאך אזויפיל חיזוק פון רבי'ן און מיט דעם אלעם זענען מיר ווי אזוי מיר זענען, פול מיט חלישות הדעת, פול מיט בלבולים וכו', וכו', איז דאך זיכער אז אנדערע וואס האבן נישט דעם רבינ'ס חיזוקים דארפן דאך זיכער אסאך חיזוק צו קענען אנגיין אין לעבן; די בריוון, די פשוט'ע דיבורי אמונה איז זיי אזוי שטארק מחי'.

בעט איך דיר ליבער ..., זיי נישט אזוי בקטנות הדעת, טראכט נישט פון שלעכטס; טראכט פון דאס גוטס וואס מיר האבן, און זיי ממשיך שטערקער און שענער ווייטער צו דרוקן די ספרים. געב אכטונג עס זאל נישט זיין מיט גרייזן, אזוי אויך זאלסטו עס דרוקן מיט גרויסע אותיות און נקודות אז עס זאל זיין גרינג צו ליינען.

ווער עס ליינט די בריוון זאגט אז דאס איז ממש מוהרא"ש'ס בריוון; די זעלבע ווערטער, די זעלבע חיזוקים, נאר אביסל מער אראפגעברענגט פאר היינטיגע בחורים און מיידלעך, זיי זאלן זיך קענען מחזק זיין און זיך אויפהייבן. "קָמָה אֲלֻמָּתִי וְגַם נִצָּבָה (בראשית לז, ז)", "קָמָה אֲלֻמָּתִי", די בינטלעך – די קונטרסים הייבן אויף אידישע קינדער, "וְגַם נִצָּבָה", עס געבט כח זיך צו דערהאלטן אין שווערע מצבים.

אין דעם זכות פון פארשפרייטן אמונה פאר אידישע קינדער וועסטו זוכה זיין צו דורות ישרים ומבורכים.

בעזרת ה' יתברך

יום ה' פרשת תולדות, א' דראש חודש כסליו, שנת תש"פ לפרט קטן

לכבוד מיין טייערער ... נרו יאיר.

דיין זכות איז זייער גרויס מיט'ן העלפן דרוקן דעם ערשטן חלק "עצתו אמונה".

דער אייבערשטער זאל העלפן זאלסט האבן גרויס שפע, זאלסט ווייטער האבן די זכות צו העלפן דרוקן אלע אנדערע חלקים.

דיין ראש ישיבה.

בעזרת ה' יתברך

ערב שבת קודש פרשת וירא, י"ז חשון, שנת תש"פ לפרט קטן

לכבוד מיין טייערער ... נרו יאיר.

דו קענסט זיך נישט פארשטעלן דיין זכות וואס דו האסט מיט'ן דרוקן די בריוון פון עצתו אמונה און איש אמונות.

עס גייט נישט אריבער א טאג וואס מען זאל מיר נישט שרייבן בריוון און אפשטעלן און אנרופן זאגן ווי מען איז זיך מחי' ומחזק מיט די בריוון.

באמת איז דאס נישט מיינע חיזוקים, מיינע חידושים; דאס איז אלעס וואס איך האב געלערנט ביי מוהרא"ש זכר צדיק לברכה וואס האט זיין גאנץ לעבן - מיט מסירות נפש - פארשפרייט דעם הייליגן רבינ'ס עצות.

הלוואי זאלסטו צוזאמנעמען די אלע בריוון און קונטרסים און דאס דרוקן – א חלק נאך א חלק, וועסטו האבן א זכות לנצח נצחים מיט מחזק זיין אזויפיל מענטשן, זיי צוריק ברענגען צום אייבערשטן.

א שאד אז דו דרוקסט דאס נישט אין א פארמאט פון א געהעריגע ספר; איך האף אז דו וועסט זיך נישט באגנוגן מיט'ן ארויסגעבן די בריוון אלס קונטרסים נאר דו וועסט דאס ארויסגעבן אין געהעריגע ספרים.

געדענק, ווען עס קומט צו רוחניות טאר מען נישט זיין א שמח בחלקו, מען דארף אלץ וועלן טון נאך און נאך.

שטארק זיך; דו וועסט נאך זוכה זיין צו בניך כשתילי זיתים סביב לשלחניך.

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליכטיגער תלמיד ... נרו יאיר.

מאך זיך א שיעור אין "ספר עצתו אמונה" וועסטו האבן חיזוק, דו וועסט וויסן ווי אזוי זיך צו פירן אין לעבן; איך האב גארנישט מחדש געווען, איך שרייב וואס איך האב זוכה געווען צו לערנען דורכאויס די אלע יארן פון מוהרא"ש.

שטארק זיך און שטארק דיין ווייב, איר וועט נאך זוכה זיין צו זרע של קיימא; יעצט ראש השנה איז א צייט נפקד צו ווערן בזרע של קיימא, אזוי ווי חכמינו זכרונם לברכה זאגן (ראש השנה יא.) אז ראש השנה זענען אונזערע מאמעס די אמהות הקדושות נפקד געווארן בזרע של קיימא.

נעם זיך פאר לכבוד דעם נייעם יאר עוסק צו זיין ביתר שאת וביתר עוז אין פארשפרייטן די הייליגע עצות און חיזוק פון רבי'ן, דורכדעם וועסטו זוכה זיין צו מצליח זיין אין דיין נייע געשעפט, דו וועסט האבן גרויס הצלחה.

מיט יעדן איינעם וועם דו רעדסט; מיט אידן אדער להבדיל אומות העולם, זאלסטו שטענדיג מזכיר זיין דעם אייבערשטנ'ס נאמען, גא"ד בלע"ס י"ו, אזוי וועסטו זייער שיין מצליח זיין.

איך ליב דיר, דיין ראש ישיבה.

בעזרת ה' יתברך

ערב שבת קודש לסדר כי תבוא לאומאן, כ' אלול, שנת תשע"ט לפרט קטן

מרת ... תחי'.

איר קענט זיך נישט פארשטעלן ווי מענטשן זענען זיך מחי' מיט די איבערגעטייטשטע בריוון אין ענגליש פונעם "ספר עצתו אמונה"; הרב ר' ... נרו יאיר געבט מיר כסדר גריסן ווי מענטשן בעטן נאך פון די ענגלישע "עצתו אמונה".

איך האף אז איר וועט ממשיך זיין צו מתרגם זיין ווייטער נאך און נאך בריוון, מזכה זיין נשמות ישראל מיט די זיסע עצות פון רבי'ן.

עס איז נישט דא קיין גרעסערע זאך ביים אייבערשטן ווי מקרב זיין זיינע קינדער צו אים, אזוי ווי דער זוהר הקדוש זאגט (תרומה קכח:): "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר: א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; ער נעמט אוועק טומאה פון די וועלט און ער מאכט אז דעם אייבערשטנ'ס נאמען זאל ווערן געהייליגט אויף די וועלט. דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף דער וועלט און אויף יענער וועלט, "כָּל מָארֵי דִּינִין לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכט'ס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים און קיינער קען אים נישט צוריק האלטן".

דער אייבערשטער זאל העלפן איר זאלט האבן נחת פון אייערע קינדער, זיי זאלן אויפוואקסן ערליכע אידן לה' ולתורתו.

א גוט געבענטשט יאר, א גוט שבת.

בעזרת ה' יתברך

יום ב' לסדר כי תבוא לאומאן, ט"ז אלול, שנת תשע"ט לפרט קטן

לכבוד מיין טייערער ... נרו יאיר.

איך פריי זיך זייער צו הערן די גוטע בשורה אז עס איז יעצט ארויס פון דרוק די ערשטע חלק פון ספר "עצתו אמונה", שאלות ותשובות וואס דער אייבערשטער האט מיר מזכה געווען צו ענטפערן פאר בחורים און מיידלעך, זיי מחזק זיין זיי זאלן נישט זיין ביי זיך געפאלן און אויפגעגעבן, נאר זיי זאלן זיך צוריק קערן צום אייבערשטן.

באמת האב איך גארנישט מחדש געווען, איך האב נאר גענומען די ווערטער וואס מוהרא"ש האט מיט אונז געלערנט, עצות און חיזוק פון הייליגן רבי'ן און דאס אראפגעשריבן אויף א שפראך וואס די היינטיגע דור פארשטייט, אבער אלעס וואס שטייט אין די בריוו איז פון מוהרא"ש; עצות און הדרכה פון הייליגן רבי'ן.

שטארק זיך ווייטער מיט די הייליגע ארבעט, ווייטער אנגרייטן און מגיה זיין די בריוו פון עצתו אמונה און דאס דרוקן און נאכאמאל דרוקן. וואויל איז פאר אלע וואס העלפן דרוקן די ספרים וואס איז מחזק אידישע קינדער, דער וועט זוכה זיין צו די הבטחה וואס מוהרא"ש האט מבטיח געווען פאר ווער עס וועט דרוקן דעם ספר אשר בנחל, אז מען וועט זען גרויסע ישועות.

א כתיבה וחתימה טובה.

בעזרת ה' יתברך

יום א' פרשת שופטים, ב' דראש חודש אלול, שנת תשע"ט לפרט קטן

לכבוד מיין טייערער ... נרו יאיר.

יעצט הער איך אז שוין צוויי וואכן וואס עס איז נישט ארויסגעקומען דער וועכנטליכער קונטרס "עצתו אמונה"; עס איז ממש א שאד אז דאס זאל זיך אפשטעלן נאכדעם וואס אזויפיל מענטשן האבן חיזוק פון דעם, בפרט בחורים – זיי ווארטן זייער אויף דעם, דאס איז זייער גאנצע חיזוק.

איך בעט דיר זייער טייערער ... גיי אן מיט די מצוה וואס מען האט דיר מזכה געווען פון הימל; זע עס זאל ארויסקומען יעדע וואך די שיינע בריוון, ווייל די תלמידים ווארטן אויף דעם, בפרט די אלע תלמידים וואס נעמען נישט אריין אין שטוב קיין שום ליין מאטריאל – זיי ווארטן זייער און קוקן ארויס יעדן שבת פאר דעם. די פרויען וואס זענען געווען צוגעוואוינט צו ליינען וכו' און בזכות מוהרא"ש וואס האט נישט געהאלטן פון ארייננעמען אין שטוב קיין שום צייטונג, מאגאזינען וכו', נעמען זיי דאס מער נישט אריין אין שטוב, - זיי ווארטן און קוקן ארויס אז דאס זאל ארויסקומען וועכנטליך.

דו קענסט זיך נישט פארשטעלן דאס גרויסקייט פון פארשפרייטן דעם רבינ'ס עצות, וואס דאס ברענגט צוריק אידישע קינדער צום אייבערשטן; דער זוהר הקדוש זאגט (תרומה, קכח:): "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא, קום און זע, זאגט דער הייליגער זוהר: א מענטש וואס ברענגט צוריק זינדיגע מענטשן צום אייבערשטן, אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא. וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ. וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא, דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; דער מענטש נעמט אוועק טומאה פון דער וועלט, און ער מאכט אז דער אייבערשטער'ס נאמען זאל ווערן געהייליגט אויף דער וועלט, און דער מענטש איז גורם אז אלע וועלטן שטייען אויף זיין זכות. וְזָכֵי לְמֵחמֵי בְּנִין לִבְנוֹי, ער איז זוכה צו זען קינדער און אייניקלעך, וְזָכֵי בְּהַאי עָלְמָא, וְזָכֵי לְעָלְמָא דְּאָתֵי, און ער איז זוכה צו אלע גוטע זאכן אויף דער וועלט און אויף יענער וועלט, כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי, קיינער קען אים נישט שלעכט'ס טון, נישט אויף דער וועלט און נישט אויף יענער וועלט, עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ, ער גייט אריין אין דרייצן טויערן פון שערי רחמים, און קיינער קען אים נישט צוריק האלטן.

דער אייבערשטער זאל העלפן זאלסט מצליח זיין אין אלע דיינע וועגן.

א כתיבה וחתימה טובה, א גוט געבענטשט יאר.

בעזרת ה' יתברך

יום ה' פרשת ואתחנן, י"ד מנחם-אב, שנת תשע"ט לפרט קטן

מרת ... תחי'.

איך האב ערהאלטן די נדבה פאר די ישיבה, יישר כח.

איר קענט זיך נישט פארשטעלן ווי גרויס אייער זכות איז.

איך האב יעצט געזען די שאלות ותשובות פון "ספר עצתו אמונה" וואס איר האט איבערגעטייטשט אויף די ענגלישע שפראך; דאס איז אזוי שיין און אזוי הערליך, עס ליינט זיך זייער געשמאק. איר קענט זיך נישט פארשטעלן אייער זכות.

איך בעט אייך זייער, שטארקטס אייך און זייטס ממשיך מיט די הייליגע ארבעט; עס איז נישט דא קיין גרעסערע זאך ביים אייבערשטן ווי צוריק ברענגען אידישע קינדער צו די אמונה.

איך פריי זיך זייער אז מען הייבט שוין אן בויען ענקער הויז אין שטעטל; מיט'ן אייבערשטנ'ס הילף וועט איר דארט האבן מער ישוב הדעת און מער הרחבת הדעת, וועט איר קענען עוסק זיין ווייטער אין איבערטייטשן די בריוון ביתר שאת וביתר עוז.

בעזרת ה' יתברך

יום ג' פרשת בלק, י"ג תמוז, שנת תשע"ט לפרט קטן

מרת ... תחי'.

איך האב ערהאלטן אייער בריוו און די נדבה פאר די ישיבה, יישר כח.

איך וויל אייך מחזק זיין איר זאלט ווייטער עוסק זיין אין מסדר זיין די בריוון אויף לשון הקודש; אז איר האט אנגעהויבן מיט די מצוה איז א שאד דאס אפצולאזן.

נאך אביסל וועט זיין גענוג בריוון צו מאכן דערפון א ספר, דעמאלט וועט מען דאס דרוקן און פארשפרייטן אן א שיעור און די זכותים וועלן זיין אייער'ס.

דעריבער זאלט איר זיך שטארקן און ווייטער מסדר זיין די אלע בריוון.

באמת בין איך גארנישט מחדש, דאס איז אלעס גענומען פון ספר הקדוש אשר בנחל – שכל, חיזוק און עצות פון מוהרא"ש זכרונו לברכה. איך האב דאס נאר אראפגעברענגט מער פאר די היינטיגע דור אז בחורים און מיידלעך, יונגעלייט און ווייבלעך זאלן פארשטיין און וויסן פון די זיסע עצות פון הייליגן רבי'ן.

מנקד זיין די בריוון פון ספר "עצתו אמונה"

בעזרת ה' יתברך

יום ד' פרשת בלק, י"ד תמוז, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

א גרויסן יישר כח פאר'ן ארויסשיקן די גמרות פון מסכת תמורה; אם ירצה ה' דעם קומענדיגן וואך זונטאג הייבן מיר אן א פרישע מסכתא, "מסכת תמורה". איך האף אז דו לערנסט אויך יעדן טאג דעם דף גמרא.

איך בעט דיר זייער אויב דו קענסט זיך אונטערנעמען צו מנקד זיין די בריוון פון ספר "עצתו אמונה"; די מדפיסים זאגן מיר אז די סיבה פארוואס עס האלט זיך אפ און עס קומט נישט ארויס יעדע וואך איז צוליב די ניקוד.

איך האב גערעדט צו האברך ... נרו יאיר אז אפשר זאלסטו פון היינט און ווייטער איבערנעמען דעם ניקוד אז דאס זאל זיך נישט אפשטעלן אפילו לשעה; ווייל די מפיצים זאגן מיר אז אלע בחורים און אלע יונגעלייט, בפרט כולל יונגעלייט בעטן און מוטשען זיי צו באקומען וועכנטליך די בריוון ווייל דאס איז זיי מחזק לעבודת ה'.

באמת האב איך גארנישט מחדש געווען, איך שרייב נאר דיבורים, עצות וחיזוקים וואס איך האב זוכה געווען צו הערן פון מוהרא"ש און וואס איך לערן אין די ספרים פון מוהרא"ש, וואס איז ארויסגענומען פון רבינ'ס ספרים.

דעם שבת דערציילט מיר איינער פון די מפיצים אז א איד האט אים אנגערופן בעטן די ספרים פון עצתו אמונה, האט אים דער מפיץ געפרעגט: "ווי קומסטו אן צו די ספרים וכו'?" האט דער איד געענטפערט: "איך האב זיך אויסגערעדט פאר מיין דיין הרב הגאון ר' ... שליט"א, דומ"ץ ..., בעל מחבר ספר שאלות ותשובות ..., האט ער מיר גע'עצה'ט איך זאל לערנען די ספרים פון עצתו אמונה וועל איך האבן חיזוק אויף אלע ענינים".

דערפאר בעט איך דיר דו זאלסט אנהייבן מנקד זיין די בריוון אויפ'ן שענסטן אופן וואס איז שייך; אויך זאלסטו דאס מגיה זיין בשעת'ן מנקד זיין, אזוי אויך אויב דו זעסט אז עס פעלט מראי מקומות זאלסטו מיר רופן פרעגן דעם מראה מקום. און אז עס איז דא אן איבעריגע ווארט אדער עס פעלט א ווארט זאלסטו דאס מתקן זיין; נאר געב אכטונג נישט אוועק צו גיין פונעם מכוון.

אינעם זכות פון זיכוי הרבים וועסטו האבן א נס, עס וועט זיך אלעס איבערדרייען און דו וועסט זוכה זיין צו א גאנצע ישועה.

פון דיין ראש ישיבה.

בעזרת ה' יתברך

יום ד' פרשת חקת, ז' תמוז, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

א שאד אז מען דרוקט מער נישט וועכנטליך די בריוון פון "עצתו אמונה"; די מפיצים זאגן מיר ווי שטארק בחורים און יונגעלייט ווארטן אויף דעם, ווי מען צוכאפט דאס אין די כוללים און אין די ישיבות.

אז דו קומסט נישט אן דאס צו מנקד זיין זאלסטו דאס דרוקן אָן נקודות, ווייל עס גייט אריבער אין די היינטיגע טעג ביטערע שווערע נסיונות אויף בחורים און יונגעלייט און נאר די דיבורים פון הייליגן רבי'ן לויט ווי מוהרא"ש האט דאס אראפגעברענגט, אויף אזא פשוט'ע גרינגע שפראך – דאס האלט זיי ביים לעבן.

שטארק זיך ביתר שאת וביתר עוז; מגלגלין זכות על ידי זכאי, חבלים נפלו לך בנעימים אז דו האסט זוכה געווען מיט'ן דרוקן און פארשפרייטן די בריוון; זאלסטו נאר גיין פאראויס מיט דעם.

בעזרת ה' יתברך

יום ג' פרשת בהר, ט"ז אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

דו קענסט זיך נישט פארשטעלן די זכותים וואס דו האסט פון דעם וואס דו ביסט מסדר און מגיה די בריוון פון שאלות ותשובות עצתו אמונה; איך באקום צוריק אזויפיל גריסן פון בחורים, יונגעלייט און פרויען וואס זייער זיי לעבן פון די חיזוק פון דעם ספר.

אלעס וואס שטייט אינעם ספר "עצתו אמונה" איז גענומען געווארן פון ספר הקדוש "אשר בנחל", די שכל און חכמה פון מורי ורבי מוהרא"ש זכותו יגן עלינו וואס האט אונז מזכה געווען מיט די הייליגע ספרים אשר בנחל און די הייליגע קונטרסים וואס זענען געבויט און באגרינדעט אויף די ווערטער פון הייליגן רבי'ן.

איך בעט דיר זייער דו זאלסט זיך שטארקן מיט די הייליגע ארבעט; זוך נישט קיין אנדערע זאכן וואס צו טון. דאס איז עצת היצר צו פארדרייען דעם קאפ. יעדעס מאל א מענטש הייבט אן עפעס טון אין עבודת ה' קומט דער יצר הרע מבלבל זיין מיט ספיקות ובלבולים: 'אפשר זאל מען טון עפעס אנדערש?' 'אפשר זאל איך מאכן אן אנדערע ספר?' וכו' וכו'. דעריבער אז דער אייבערשטער האט דיר מזכה געווען מיט די ארבעט צו מסדר זיין די בריוון זאלסטו זוכן דאס נאר שענער און בעסער מאכן. לייג אריין קאפ, מח און דיין הארץ אז דאס זאל ארויסקומען אויף די שענסטע וועג.

פרעג דיין ווייב תחי' צי זי וויל דיר העלפן אויפטייפן, מגיה זיין, מנקד זיין וכו' וכו', וועט דאס זיין א זכות פאר איר להפקד בבנים ובני בנים.

...

ענקער ראש ישיבה.

בעזרת ה' יתברך

יום א' פרשת אחרי ב', אסרו חג, כ"ג ניסן, שנת תשע"ט לפרט קטן

 לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

אשריך ואשרי חלקיך אז דו פארשפרייטסט די נייע ספרים "עצתו אמונה" פאר בחורים און יונגעלייט. עס גייט נישט אריבער א טאג וואס בחורים און יונגעלייט זאלן מיר נישט זאגן אז דאס האט זיי געטוישט זייער לעבן צום גוטן.

ערב יום טוב האט מיר א פרוי פון מאנסי געשריבן אז זי האט באקומען אן עצתו אמונה (פרשת בשלח, ע"ט) און דאס האט איר געטוישט איר לעבן. זי קריגט זיך מיט איר מאן שוין פאר איבער 40 יאר און די קונטרס האט איר געגעבן שכל צו האבן שלום בית; אזוי אויך אז 50 יאר ליידט זי פון פחדים און דמיונות און אין דעם קונטרס איז דא א תפילה פאר א פרוי ניצול צו ווערן פון פחדים, זי זאגט דאס יעדן טאג און עס ווערט איר בעסער און בעסער. אויך האט זי זיך אנגעהויבן פארטראגן מיט אירע קינדער וכו', וכו'.

לויט ווי איך שטעל זיך פאר האט זי דאס באקומען פון דיר, ווייל דו ביסט דער מפיץ אין מאנסי-מאנרא; דו ווייסט גארנישט וואס א קונטרס טוט מיט א מענטש. די מפיצים ווייסן נישט וואס זיי טוען אלץ אויף, בעט איך דיר טייערער מפיץ, הייב אן פון פריש מיט א פרישקייט מפיץ זיין די נייע ספרים "עצתו אמונה" און די בריוון פון "איש אמונות", דאס איז נישט קיין נייע זאכן, דאס איז אלעס גענומען פונעם ספר הקדוש והנורא "אשר בנחל", עס איז נאר אנדערש געפאקט, אויף א נייע שפראך פאר די היינטיגע דור, אויף א וועג אז בחורים און מיידלעך זאלן דאס פארשטיין.

טייערער חבר, ליבער ברודער, שטארק זיך מיט אלע דיינע כחות צו זיין פרייליך; ווארף אוועק אלע עצבות ומרירות און לאז זיך פירן פונעם אייבערשטן. גיי ארום שטענדיג מיט א שמייכל.

ווען דו גייסט ארויף צום ציון פון הרב הקדוש מסאטמאר זכותו יגן עלינו אדער צום ציון פון הרב הקדוש מריבניץ זי"ע זאלסטו מיר מזכיר זיין: יואל בן ריצא רעכיל, איך זאל האבן כח ממשיך צו זיין מיט'ן משמש זיין דעם רבי'ן, משמש זיין מוהרא"ש, און קענען ווייטער פארשפרייטן די זיסע עצות פאר די וועלט.

...

בעזרת ה' יתברך

יום א' פרשת אחרי ב', אסרו חג, כ"ג ניסן, שנת תשע"ט לפרט קטן

 לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

איך האב געשריבן א בריוו פאר דיין ווייב תחי' איר צו מחזק זיין מיט איר הייליגע ארבעט וואס זי טוט מיט די בריוון; אלע מפיצים זאגן אז מענטשן זענען זיך מחי' מיט די ענגלישע קונטרסים מתורגם פון "עצתו אמונה" און פון "איש אמונות".

דאנק און לויב דעם אייבערשטן אז עס איז אייך אונטערגעקומען אזא זכות, אז פון אייער שטוב גייט ארויס א "ליכטיגקייט פון אמונה", וואס מאכט ליכטיג פאר אידישע קינדער.

בעט איך דיר דו זאלסט זיך שטארקן און שטארקן דיין ווייב; דו האסט זוכה געווען צו א וואוילע ווייב תחי', דארפסטו איר פרייליך מאכן. פארברענג מיט איר, אזוי אויך זאלסטו זען צו מאכן צייט אביסל ארויסצוגיין מיט איר; עס איז זייער געזונט פאר א פרוי אביסל ארויסצוגיין פון שטוב. זיי זיצן טעג, נעכט און וואכן אין שטוב מיט די קינדער, דארף דער מאן האבן שכל ארויס צו נעמען די ווייב אביסל צו שעפן פרישע כחות.

פון דיין ראש ישיבה וואס האט דיר ליב.

...

בעזרת ה' יתברך

יום א' פרשת אחרי ב', אסרו חג, כ"ג ניסן, שנת תשע"ט לפרט קטן

 מרת ... תחי'.

איך האב ערהאלטן די נדבה פאר די ישיבה, יישר כח.

איר קענט זיך נישט פארשטעלן דאס גרויסקייט פון זיין א "מזכה את הרבים"; בפרט ווען מען איז מזכה א צווייטן איד צוריק צו קומען צו די אמונה און צו די וועג פון די תורה.

איך באקום צוריק גריסן פון די מפיצים אז מענטשן זענען זיך מחי' מיט די קונטרסים אין ענגליש וואס איר זענט מתרגם; די נייע קונטרסים פון "עצתו אמונה".

בעט איך אייך מרת ... תחי' איר זאלט ווייטער ממשיך זיין מיט די הייליגע ארבעט וואס איר טוט; נאך אביסל וועלן מיר צוזאמנעמען אלע בריוון און מאכן פון דעם א שיינעם ספר וואס וועט פארשפרייט ווערן אין די הונדערטער טויזנטער און וועט מחי' זיין די גאנצע וועלט.

א גריס פון אייער טייערער מאן נרו יאיר; ער איז ליכטיג און טייער, ער פירט זיך מיט שיינע מידות און ער מאכט א קידוש השם; וואו ער גייט און וואו ער שטייט זעט מען אז דאס איז עפעס אויסנאם.

דער אייבערשטער זאל אייך געבן כח ממשיך צו זיין מיט אייער הייליגע ארבעט און האבן די כחות צו מגדל זיין אייערע ליכטיגע דורות.

...

בעזרת ה' יתברך

יום ד' פרשת צו, תענית אסתר, י"ג אדר ב', שנת תשע"ט לפרט קטן

מרת ... תחי'.

איך באקום יעדע וואך די קונטרס פון די איבערגעטייטשטע בריוון אויף ענגליש וואס איר זענט מתרגם; אלע זאגן אז דאס איז א וואונדערליכע ארבעט. די מפיצים זאגן מיר אז מענטשן נעמען דאס און זענען זיך מחי' דערמיט.

יעצט ווען מיר שטייען ערב פורים - א צייט וואס אידן האבן נאך אמאל מקבל געווען די תורה, אזוי ווי די הייליגע  חכמים זאגן (שבת פח.), איז יעצט א צייט וואס עס קומט אראפ א הייליגקייט אויף אידישע קינדער. וויל איך אייך מחזק זיין איר זאלט ווייטער טון די הייליגע ארבעט מיט וואס דער אייבערשטער האט אייך מזכה געווען - איבערטייטשן די בריוו אויף ענגליש אז נאך אידן זאלן זיך קענען מחזק זיין.

זייער אסאך מענטשן ווייסן נישט וואס זיי האבן צו טון ווען זיי באקומען א התעוררות צו זיין גוט; מען מיינט אז מען דארף טון עבודות און סיגופים, מען דארף פאסטן און זיך אפשיידן פון די וועלט, און וויבאלד מענטשן זענען ווייט פון די זאכן, איז ווען עס קומט אן התעוררות שטופט מען דאס אוועק און מען גייט ווייטער אן מיט וואס מען טוט - אן תשובה טון, אויף דעם קומט דער הייליגער רבי און געבט אונז אזעלכע שיינע עצות וואס מיר זאלן טון ווען מיר ווילן תשובה טון. דער רבי לערנט אונז אויס מיר זאלן ארויס זאגן א ווארט צום אייבערשטן; מיר זאלן זאגן פאר'ן אייבערשטן: "טאטע, איך וויל זיין גוט"; די איינע קליינע ווארט וועט שוין שלעפן דעם מענטש צו אלעס גוטס.

וויל איך אייך בעטן איר זאלט ווייטער איבער טייטשן די בריוון אויף ענגליש אז נאך מענטשן זאלן וויסן פון די געשמאקע זיסע וועג פונעם הייליגן רבי'ן; איך ווייס אז איר לייגט אריין צענדליגער שעות און דאס גייט אויפ'ן חשבון פון אייער שטוב און פון אייערע קינדער, זאלט איר אבער וויסן אז דער אייבערשטער גיבט א ברכה פאר די וואס טוען פאר אידישע קינדער און מען זעט נחת ביי די אייגענע קינדער.

דער אייבערשטער זאל אייך געבן הצלחה אין אלע ענינים.

בעזרת ה' יתברך

יום ד' פ' יתרו, י"ז שבט, יומא דהילולא של מוהרא"ש זצוק"ל שנת תשע"ט לפ"ק

מרת ... תחי'.

א גרויסן יישר כח פאר'ן העלפן די ישיבה מיטן צושטייער געבן פאר די רענט פון דעם חודש ... דאללער; דער אייבערשטער זאל ענק העלפן אז בזכות די צדקה זאלט איר זוכה זיין צו מצליח זיין אין אלע וועגן.

איר אליינס ווייסט נישט וואס איר טוט מיט'ן איבער טייטשן די בריוון אויף ענגליש; וויפיל אידן וואס קענען נישט ליינען אידיש זענען זיך אזוי שטארק מחי' מיט דעם, דאס טוישט זייער לעבן, זייער שלום בית און זייער צוגאנג צו די קינדער.

דערפאר בעט איך אייך איר זאלט זיך שטארקן מיט'ן מתרגם זיין די בריוו ביתר שאת וביתר עוז; עס איז כדאי אויפצוגעבן דאס טיטשן אין 'בית פיגא' אבי צו מתרגם זיין די בריוו. א צווייטע טיטשער איז גרינג צו טרעפן אבער א צווייטן וואס זאל מתרגם זיין איז נישט קיין גרינגע זאך.

א גריס פון אייער מאן ... נרו יאיר, איר האט זוכה געווען צו א טייערע יונגערמאן וכו'.

בעזרת ה' יתברך

ערב שבת קודש פרשת בא, ה' שבט, שנת תשע"ט לפרט קטן

מרת ... תחי'.

איך האב ערהאלטן די בריוון וואס איר זענט מתרגם אויף ענגליש.

איך האב דאס געוויזן פאר אפאר מפיצים, זיי זאגן אלע זיי אז דאס איז הערליך געשריבן און זיי ווילן דאס פארשפרייטן פאר אלע וואס קענען נישט קיין אידיש, אז זיי זאלן אויך וויסן פון די שיינע זיסע עצות וואס דער רבי לערנט אונז.

דעריבער וויל איך אייך מחזק זיין איר זאלט ווייטער ממשיך זיין מיט די הייליגע ארבעט, צו מזכה זיין אידישע קינדער צוריק צו קומען צום אייבערשטן.

מוהרא"ש זכרונו לברכה האט דערציילט, אז ווען דער הייליגער צדיק רבי יצחק מדראהביטש זכותו יגן עלינו איז נפטר געווארן איז אים רש"י הקדוש אנקעגן געקומען אויבן אין הימל און אים געפרעגט: "וואס פאר א גוטע מעשים טוט אייער זון דער צדיק רבי מיכל'ע זלאטשובער אז דא אין הימל מאכט מען אזא רעש פון אים?" האט דער טאטע רבי יצחק מדראהביטש געענפערט: "ער לייגט אריין שטארקע כוחות אינעם דאווענען וכו'", האט אים רש"י הקדוש געזאגט: "פאר דעם אליינס וואלט מען נישט געמאכט אזא רעש דא אין הימל פון אים; אסאך צדיקים לייגן אריין כוחות אינעם דאווענען און מען מאכט נישט אזא גרויסע עסק פון זיי", האט דער טאטע ווייטער געזאגט: "ער לערנט זייער פלייסיג", האט אים רש"י הקדוש געענפערט: "דאס קען אויך נישט זיין די סיבה, ווייל אסאך צדיקים לערנען פלייסיג די הייליגע תורה, און פאר דעם אליינס רעש'ט זיך נאך נישט", האט ער געזאגט: "צוליב זיין חסד און צדקה וכו'", האט רש"י הקדוש נאך אלץ נישט מסכים געווען, ביז רבי יצחק מדראהביטש האט אים געזאגט: "אפשר ווייל ער ברענגט צוריק מענטשן צום אייבערשטן? ער איז עוסק אין דעם זייער שטארק", האט רש"י הקדוש געזאגט: "היינו דאהני ליה, יעצט פארשטיי איך שוין פארוואס עס רעש'ט זיך פון אים"; ווייל ביים אייבערשטן איז זייער חשוב דער וואס ברענגט צוריק זיינע קינדער צו אים.

טראכט'ס אריין, אז א מענטש האט א קינד וואס איז צוקריגט מיט אים, דער קינד וויל נישט רעדן מיט אים און ער טוט נאר זאכן אנטקעגן אים, קומט איינער צו גיין און הייבט זיך אן פארען מיט דאס קינד, ער רעדט צו אים ער זאל צוריק גיין צו זיין טאטע, ער שיקט אים שיינע בריוון פון התחזקות אז זיין טאטע ווארט אויף אים, וועט דאך דער טאטע זיין אזוי דאנקבאר פאר דעם מענטש וואס ברענגט אים צוריק זיין קינד. און אמאל אז דער זון קען נישט ליינען די בריוו וואס ער באקומט, קומט א צווייטער און גיבט אוועק צייט עס איבער צו טייטשן אויף די שפראך וואס דער קינד פארשטייט, ווי דאנקבאר איז דער טאטע פאר אלע וואס באשעפטיגן זיך אז זיין זון זאל שוין צוריק קומען צו אים; ער איז מכיר טובה סיי פאר דער וואס שרייבט די בריוו, פאר דער וואס טייפט עס אויף, פאר דער וואס איז עס מתרגם, פאר דער וואס דרוקט עס און פאר דער וואס טראגט עס וכו' וכו'.

דאס איז די גרויסקייט פון אלע וואס טוען אין הפצה; זיי ווילן צוריק ברענגען אלע מענטשן צום אייבערשטן, און די מענטשן זענען זייער חשוב ביים אייבערשטן.

איך בין אייך זייער מכיר טובה פאר'ן זיין א טיטשער ביי אונז אין סקול; יעדע זאך וואס מען טוט פארן רבי'ן איז א זאך וואס בלייבט אויף אייביג, בפרט אז מען איז מחנך קינדער זיי זאלן זיך פירן מיט דרך ארץ און מידות טובות, איז דאס זייער חשוב ביים אייבערשטן.

לייגט אריין אין די מיידלעך דרך ארץ, ווייל דער רבי זאגט (ספר המידות, אות בנים, סימן סה): "צָרִיךְ לְלַמֵּד אֶת הַתִּינוֹק דֶּרֶךְ אֶרֶץ מִנְּעוּרָיו", מען דארף אויסלערנען דאס קינד דרך ארץ ווען ער איז נאך יונג; דאס איז די ארבעט פון א מחנך און מחנכת, אויסלערנען די קינדער זיי זאלן זיך פירן מיט דרך ארץ. קינדער דארפן וויסן אז א ווארט פונעם טיטשער איז א ווארט, און אויב מען פאלגט נישט איז מען נישט קיין 'בית פיגא תלמידה', ווייל דער רבי האט געזאגט: "איך קען יעדן איינעם העלפן, אויסער אן עזות פנים".

אין דעם זכות וועט איר זוכה זיין צו נחת פון אייערער קינדער.

איך שרייב א בריוו פאר אייערע תלמידות; איר זאלט דאס מתרגם זיין אויף ענגליש און זיי דאס פארליינען.

אויך שיק איך אייך בריוו פאר די מיידלעך וואס פירן זיך ערוואקסן, איר זאלט זיי דאס איבערגעבן.

בעזרת ה' יתברך

ערב שבת קודש פרשת בא, ה' שבט, שנת תשע"ט לפרט קטן

לכבוד ... נרו יאיר.

איך שיק דיר דא אסאך בריוון פון עצתו אמונה וואס מען האט מתרגם געווען אויף ענגליש; איך בעט דיר זייער זאלסט דאס אויסשטעלן פאר א קונטרס ווייל די מפיצים האלטן אין איין בעטן אז זיי דארפן די דיבורים און שכל אויף ענגליש.

יעצט איז געקומען ... תחי' און זי איז דאס אזוי שיין מתרגם, ממש צו באוואונדערן; ווייל פון איין זייט קען מען דאך נישט איבער טייטשן ווארט ביי ווארט ווייל עס וועט זיך נישט ליינען גוט, און פון די אנדערע זייט גייט זי נישט אוועק פונעם מכוון.

דעריבער בעט איך דיר, אזוי ווי דו האסט אזוי שיין מסדר געווען די בריוו אין אידיש, זאלסטו יעצט נעמען די בריוו און דאס מסדר זיין, און איינמאל דאס וועט זיין מסודר וועל איך דאס איבער געבן פאר א צווייטן וואס וועט זיך אפגעבן מיט דעם וועכנטליך; זי קומט אריין אזוי שטארק אין דעם אז זי ענדיגט יעדע וואך אלע בריוו וואס קומט ארויס אויף אידיש.

"הַמַּתְחִיל בְּמִצְוָה יְהֵא גּוֹמֵר אֶת כּוּלָהּ (תנחומא עקב, ו)"; געלויבט דעם אייבערשטן אז דו האסט אהער געשטעלט אזא שיינע "בית הדפוס" וואו מען דרוקט ספרים און קונטרסים א גאנצן טאג אן א אויפהער; איך ווייס נישט צי דו ביסט אויך דארט געווען ווען מוהרא"ש איז אריין געקומען דאס ערשטע מאל אין "בית הדפוס", צי דו האסט געזען דעם גרויסן שמייכל אויף זיין פנים און ווי ער האט געזאגט: "רבי נתן וואלט זיך מחי' געווען מיט אזא 'בית הדפוס'". און יעדעס מאל ווען עס איז געווען א שמחה אין ישיבה אדער א מלוה מלכה וואס מוהרא"ש איז געקומען האט ער נאר געוואלט זען דעם "בית הדפוס".

איז יעצט זאלסטו העלפן עס זאל ארויס קומען אויך אויף ענגליש.

איך ווארט צו זען וואס שנעלער א פערטיגע זאך.‎

בעזרת ה' יתברך

יום א' פרשת מקץ, כ"ד כסליו, ערב חנוכה, שנת תשע"ט לפרט קטן

לכבוד מיין טייערער ... נרו יאיר.

א גרויסן יישר כח פארן ארויסהעלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל דיר העלפן אז אין זכות פון די מצוה פון צדקה זאלסטו האבן הצלחה אין אלע ענינים.

איך האב ערהאלטן דיין בריוו.

איך האב זיך ממש מחי' געווען ווען איך האב געליינט אז דו האסט אנגעהויבן לערנען מסכת חולין – יעדן טאג א דף.

מוהרא"ש האט מיר געזאגט כמה פעמים אז לימוד גמרא האט אזא כח אז עס פארברענט אלע קליפות און כל זמן א מענטש לערנט גמרא האלט ער זיך ביים אייבערשטן.

איך האב זייער הנאה אז דו לערנסט די בריוון פון "עצתו אמונה" און דו ביסט זיך מחי' דערמיט; איך בין גארנישט מחדש אין די בריוון, איך חזר נאר איבער וואס מוהרא"ש האט אונז געלערנט פון הייליגן רבי'ן.

טייערער ברודער, דער רבי זאגט: "יֵשׁ עִנְיָן שֶׁנִתְהַפֵּך הַכֹּל לְטוֹבָה".

פון דיין ראש ישיבה וואס האט דיר זייער ליב.

...