בריוון פונעם ראש ישיבה שליט"א

בעזרת ה' יתברך

יום ד' פרשת נצבים, כ"ה אלול, שנת תשע"ט לפרט קטן

לכבוד מיין טייערער ליבער ... נרו יאיר.

ווער נאך קומט אויף אומאן אזוי ווי דיר טייערער ... נרו יאיר, מיט פולע באגאזשן? דו קומסט צום רבינ'ס ציון נאך א גאנצע יאר עוסק זיין פיר און צוואנציג שעה בלי גוזמא אין "הפצה". אנגעהויבן מיט'ן תלמוד תורה וואס דו פירסט אזוי שיין, די קינדער לעבן מיט'ן אייבערשטן, דו געבסט אכטונג אויף יעדן קינד אזוי ווי מען קוקט אויף א דערוואקסענעם וכו', וכו'.

נאכדעם מיט'ן "גליון היכל הקודש" וואס טויזנטער מענטשן זענען זיך מחי' מיט דעם וועכנטליך. און בעיקר מיט'ן "האט-ליין", די מענער האט-ליין און די פרויען האט-ליין, וואס הונדערטער טויזנטער מענטשן זענען זיך מחי' מיט דעם טאג טעגליך, און אויך אלע אנדערע זאכן וואס דו טוסט.

דאס אלעס זאלסטו דערציילן דעם רבי'ן; מען זאגט נאך אז עס זענען געווען צדיקים וואס האבן געבעטן די תלמידים אז ווען זיי שרייבן זייער קוויטל זיך מזכיר זיין זייערע בקשות זאלן זיי אויך שרייבן די גוטע זאכן וואס זיי האבן געטון פאר אנדערע אידן, אלע פעולות אין הפצה; אזוי איז ביי דיר, ווען דו גייסט צום ציון זאלסטו דערציילן דעם רבי'ן וואס פאר א מהפכה די דרשות און בריוון מאכן יעצט אין די וועלט, וועסטו פועל'ן אלעס גוטס.

בעט פאר מיר, יואל בן ריצא רעכיל.

בעזרת ה' יתברך

ערב שבת קודש לסדר כי תבוא לאומאן, כ' אלול, שנת תשע"ט לפרט קטן

מרת ... תחי'.

איר קענט זיך נישט פארשטעלן ווי מענטשן זענען זיך מחי' מיט די איבערגעטייטשטע בריוון אין ענגליש פונעם "ספר עצתו אמונה"; הרב ר' ... נרו יאיר געבט מיר כסדר גריסן ווי מענטשן בעטן נאך פון די ענגלישע "עצתו אמונה".

איך האף אז איר וועט ממשיך זיין צו מתרגם זיין ווייטער נאך און נאך בריוון, מזכה זיין נשמות ישראל מיט די זיסע עצות פון רבי'ן.

עס איז נישט דא קיין גרעסערע זאך ביים אייבערשטן ווי מקרב זיין זיינע קינדער צו אים, אזוי ווי דער זוהר הקדוש זאגט (תרומה קכח:): "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר: א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; ער נעמט אוועק טומאה פון די וועלט און ער מאכט אז דעם אייבערשטנ'ס נאמען זאל ווערן געהייליגט אויף די וועלט. דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף דער וועלט און אויף יענער וועלט, "כָּל מָארֵי דִּינִין לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכט'ס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים און קיינער קען אים נישט צוריק האלטן".

דער אייבערשטער זאל העלפן איר זאלט האבן נחת פון אייערע קינדער, זיי זאלן אויפוואקסן ערליכע אידן לה' ולתורתו.

א גוט געבענטשט יאר, א גוט שבת.

בעזרת ה' יתברך

ערב שבת קודש לסדר כי תבוא לאומאן, כ' אלול, שנת תשע"ט לפרט קטן

מרת ... תחי'.

איך פריי זיך זייער צו הערן אז איר האט איינגעליידנט מרת ... צו אייך אויף ראש השנה; הלוואי זאלן נאך אנדערע זיך לערנען פון אייך צו טון חסד איינער מיט'ן צווייטן, בפרט ראש השנה ווען אלע אנשי שלומינו פארן אוועק קיין אומאן און נישט אלע פרויען האבן וואו צו גיין עסן די סעודות, דערפאר וואלט געווען א גרויסע זאך ווען מען ליידנט איין די פרויען וואס האבן נישט וואו צו זיין.

אין דעם זכות זאלט איר זוכה זיין צו מגדל זיין אייערע קינדער גרינגערהייט, אזוי ווי דער הייליגער רבי זאגט (ספר המידות, אות הכנסת אורחים, סימן ג): "הַכְנָסַת אוֹרְחִים מְזַכֶּה אֶת הָאִשָּׁה לְבָנִים", הכנסת אורחים איז מסוגל פאר קינדער; אזוי ווי מיר זעען ביי די פרוי שונמית וואס האט זייער חשוב געהאלטן די מצוה פון הכנסת אורחים (מלכים ב ד, ט-י), דערפאר האט איר אלישע הנביא צוגעזאגט א קינד (שם, שם, טז), און זי האט זוכה געווען צו א קינד – חבקוק הנביא (זוהר הקדוש, פרשת בשלח, דף מד:).

איך האט מיר געשריבן זוממער אז איר זענט מתרגם דעם קונטרס "געדולד צו קינדער" אויף ענגליש, איך ווארט צו הערן אויב עס איז שוין פארטיג, כדי מען זאל דאס קענען דרוקן און פארשפרייטן פאר אלע וואס פארשטייען נאר ענגליש.

א כתיבה וחתימה טובה, א גוט געבענטשט יאר.

בעזרת ה' יתברך

יום ב' לסדר כי תבוא לאומאן, ט"ז אלול, שנת תשע"ט לפרט קטן

לכבוד מיין טייערער ... נרו יאיר.

איך פריי זיך זייער צו הערן די גוטע בשורה אז עס איז יעצט ארויס פון דרוק די ערשטע חלק פון ספר "עצתו אמונה", שאלות ותשובות וואס דער אייבערשטער האט מיר מזכה געווען צו ענטפערן פאר בחורים און מיידלעך, זיי מחזק זיין זיי זאלן נישט זיין ביי זיך געפאלן און אויפגעגעבן, נאר זיי זאלן זיך צוריק קערן צום אייבערשטן.

באמת האב איך גארנישט מחדש געווען, איך האב נאר גענומען די ווערטער וואס מוהרא"ש האט מיט אונז געלערנט, עצות און חיזוק פון הייליגן רבי'ן און דאס אראפגעשריבן אויף א שפראך וואס די היינטיגע דור פארשטייט, אבער אלעס וואס שטייט אין די בריוו איז פון מוהרא"ש; עצות און הדרכה פון הייליגן רבי'ן.

שטארק זיך ווייטער מיט די הייליגע ארבעט, ווייטער אנגרייטן און מגיה זיין די בריוו פון עצתו אמונה און דאס דרוקן און נאכאמאל דרוקן. וואויל איז פאר אלע וואס העלפן דרוקן די ספרים וואס איז מחזק אידישע קינדער, דער וועט זוכה זיין צו די הבטחה וואס מוהרא"ש האט מבטיח געווען פאר ווער עס וועט דרוקן דעם ספר אשר בנחל, אז מען וועט זען גרויסע ישועות.

א כתיבה וחתימה טובה.

בעזרת ה' יתברך

יום ה' פרשת ואתחנן, י"ד מנחם-אב, שנת תשע"ט לפרט קטן

מרת ... תחי'.

איך האב ערהאלטן די נדבה פאר די ישיבה, יישר כח.

איר קענט זיך נישט פארשטעלן ווי גרויס אייער זכות איז.

איך האב יעצט געזען די שאלות ותשובות פון "ספר עצתו אמונה" וואס איר האט איבערגעטייטשט אויף די ענגלישע שפראך; דאס איז אזוי שיין און אזוי הערליך, עס ליינט זיך זייער געשמאק. איר קענט זיך נישט פארשטעלן אייער זכות.

איך בעט אייך זייער, שטארקטס אייך און זייטס ממשיך מיט די הייליגע ארבעט; עס איז נישט דא קיין גרעסערע זאך ביים אייבערשטן ווי צוריק ברענגען אידישע קינדער צו די אמונה.

איך פריי זיך זייער אז מען הייבט שוין אן בויען ענקער הויז אין שטעטל; מיט'ן אייבערשטנ'ס הילף וועט איר דארט האבן מער ישוב הדעת און מער הרחבת הדעת, וועט איר קענען עוסק זיין ווייטער אין איבערטייטשן די בריוון ביתר שאת וביתר עוז.

בעזרת ה' יתברך

יום ג' פרשת ואתחנן, י"ב מנחם-אב, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

איך בעט דיר זייער זאלסט היינט מגיה זיין דעם לוח פון שנת ה'תש"פ, ווייל פון די וואך – שבת נחמו – הייבט מען אן אלע יארן מפיץ זיין דעם לוח פונעם קומענדיגן יאר. די מפיצים ווארטן אויף דעם עס זאל שוין ארויסקומען פון דרוק.

לעת עתה קען מען דאס נאכנישט דרוקן ווייל עס פעלט די הגהה.

רעד צו הבחור ... נרו יאיר, ער האט מסדר געווען די שיעורים כסדרן פונעם לוח, פרעג אים צי מען דארף דאס מגיה זיין נאכאמאל אדער עס איז גוט.

איך האף אז דו וועסט דאס נאך היינט ענדיגן כדי מען זאל דאס שוין קענען דרוקן, ווייל דער לוח איז א זאך וואס אלע נעמען; אפילו די מתנגדים וואס נעמען נישט קיין ספרים און קונטרסים נעמען אבער יא דעם לוח.

שטארק זיך ווייטער מיט דיינע שיעורים כסדרן, דאס וועט בלייבן פון אונז.

מנקד זיין די בריוון פון ספר "עצתו אמונה"

בעזרת ה' יתברך

יום ד' פרשת בלק, י"ד תמוז, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

א גרויסן יישר כח פאר'ן ארויסשיקן די גמרות פון מסכת תמורה; אם ירצה ה' דעם קומענדיגן וואך זונטאג הייבן מיר אן א פרישע מסכתא, "מסכת תמורה". איך האף אז דו לערנסט אויך יעדן טאג דעם דף גמרא.

איך בעט דיר זייער אויב דו קענסט זיך אונטערנעמען צו מנקד זיין די בריוון פון ספר "עצתו אמונה"; די מדפיסים זאגן מיר אז די סיבה פארוואס עס האלט זיך אפ און עס קומט נישט ארויס יעדע וואך איז צוליב די ניקוד.

איך האב גערעדט צו האברך ... נרו יאיר אז אפשר זאלסטו פון היינט און ווייטער איבערנעמען דעם ניקוד אז דאס זאל זיך נישט אפשטעלן אפילו לשעה; ווייל די מפיצים זאגן מיר אז אלע בחורים און אלע יונגעלייט, בפרט כולל יונגעלייט בעטן און מוטשען זיי צו באקומען וועכנטליך די בריוון ווייל דאס איז זיי מחזק לעבודת ה'.

באמת האב איך גארנישט מחדש געווען, איך שרייב נאר דיבורים, עצות וחיזוקים וואס איך האב זוכה געווען צו הערן פון מוהרא"ש און וואס איך לערן אין די ספרים פון מוהרא"ש, וואס איז ארויסגענומען פון רבינ'ס ספרים.

דעם שבת דערציילט מיר איינער פון די מפיצים אז א איד האט אים אנגערופן בעטן די ספרים פון עצתו אמונה, האט אים דער מפיץ געפרעגט: "ווי קומסטו אן צו די ספרים וכו'?" האט דער איד געענטפערט: "איך האב זיך אויסגערעדט פאר מיין דיין הרב הגאון ר' ... שליט"א, דומ"ץ ..., בעל מחבר ספר שאלות ותשובות ..., האט ער מיר גע'עצה'ט איך זאל לערנען די ספרים פון עצתו אמונה וועל איך האבן חיזוק אויף אלע ענינים".

דערפאר בעט איך דיר דו זאלסט אנהייבן מנקד זיין די בריוון אויפ'ן שענסטן אופן וואס איז שייך; אויך זאלסטו דאס מגיה זיין בשעת'ן מנקד זיין, אזוי אויך אויב דו זעסט אז עס פעלט מראי מקומות זאלסטו מיר רופן פרעגן דעם מראה מקום. און אז עס איז דא אן איבעריגע ווארט אדער עס פעלט א ווארט זאלסטו דאס מתקן זיין; נאר געב אכטונג נישט אוועק צו גיין פונעם מכוון.

אינעם זכות פון זיכוי הרבים וועסטו האבן א נס, עס וועט זיך אלעס איבערדרייען און דו וועסט זוכה זיין צו א גאנצע ישועה.

פון דיין ראש ישיבה.

בעזרת ה' יתברך

יום ד' פרשת בלק, י"ד תמוז, שנת תשע"ט לפרט קטן

לכבוד מיין טייערער ליבער ... נרו יאיר, מנהל תלמוד תורה היכל הקודש ברסלב.

איך האב ערהאלטן דיין נדבה פאר די ישיבה, יישר כח.

א גרויסן יישר כח פאר'ן זארגן פאר מיר און מיין ווייב, זי זאל זיך קענען גיין אביסל אפרוען נאכן האבן דעם קינד. אויך זאלסטו איבערגעבן א יישר כח פאר דיין ווייב פאר'ן מאכן פיינע עסן פאר די קימפערטארין און פאר'ן שיקן פיינע קוגל לכבוד שבת קודש; אין די זכות פון צדקה זאלסטו זוכה זיין צו אלע ברכות.

שטארק זיך אין דיין הייליגע ארבעט פון פארשפרייטן די הייליגע עצות פון רבי'ן פאר די גאנצע וועלט; בפרט מיט'ן ארויסגעבן דעם שיינעם "גליון היכל הקודש", וואס ווערט צעשפרייט וועכנטליך אין די צענדליגער טויזנטער.

היינט דערציילט מיר האברך ... נרו יאיר וועלכער פארשפרייט דעם גליון וועכנטליך אין בית שמש, אז מענטשן באדאנקען זיך, זיי זאגן אז די גליון געבט זיי לעבן און זיי ווארטן א גאנצע וואך דערויף.

זיי ממשיך מיטן קו "קול ברסלב"; מיין ווייב תחי' וועלכע געפונט זיך יעצט אין "אם בישראל" – אן אפרו פלאץ פאר קימפעטארינס, האט מיר נעכטן דערציילט אז יעדע פאר מינוט קומט צו איר א צווייטע פרוי זיך באדאנקען, ווי זייער לעבן און שלום בית האט זיך געטוישט דורך דעם (האט ליין) קו.

דער אייבערשטער זאל העלפן מיר זאלן זוכה זיין אונזער גאנץ לעבן צו משמש זיין דעם רבי'ן.

בעזרת ה' יתברך

יום ד' פרשת חקת, ז' תמוז, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

א שאד אז מען דרוקט מער נישט וועכנטליך די בריוון פון "עצתו אמונה"; די מפיצים זאגן מיר ווי שטארק בחורים און יונגעלייט ווארטן אויף דעם, ווי מען צוכאפט דאס אין די כוללים און אין די ישיבות.

אז דו קומסט נישט אן דאס צו מנקד זיין זאלסטו דאס דרוקן אָן נקודות, ווייל עס גייט אריבער אין די היינטיגע טעג ביטערע שווערע נסיונות אויף בחורים און יונגעלייט און נאר די דיבורים פון הייליגן רבי'ן לויט ווי מוהרא"ש האט דאס אראפגעברענגט, אויף אזא פשוט'ע גרינגע שפראך – דאס האלט זיי ביים לעבן.

שטארק זיך ביתר שאת וביתר עוז; מגלגלין זכות על ידי זכאי, חבלים נפלו לך בנעימים אז דו האסט זוכה געווען מיט'ן דרוקן און פארשפרייטן די בריוון; זאלסטו נאר גיין פאראויס מיט דעם.

בעזרת ה' יתברך

יום א' פרשת במדבר, כ"ח אייר, שנת תשע"ט לפרט קטן

לכבוד ... נרו יאיר.

איך האב ערהאלטן דיין בריוו.

אויב דו קענסט פארדינען מער געלט און גרינגער ארבעטן איז דאך נישט קיין פראגע וואס צו טון, אודאי זאלסטו אננעמען די נייע ארבעט; נעם דיר דעם כלל אין לעבן: "קוק שטענדיג אויף וואס עס איז גוט פאר דיר".

בנוגע הפצה וכו'; דער עיקר זאלסטו זיך אריין לייגן מפיץ צו זיין די גליונות. ווען א מענטש טרעפט דעם 'גליון היכל הקודש' וועט דאס אים שוין טראגן צו הערן די שיעורים און אנקומען צו אלע ספרים; דעריבער זאלסטו אריין לייגן כוחות מיט דיינע חברים צו פארשפרייטן די גליונות אין ירושלים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת בחוקותי, כ"ו אייר, מברכים החודש, שנת תשע"ט לפרט קטן

לכבוד החתן ... נרו יאיר.

איך האב ערהאלטן דיין בריוו.

מזל טוב פאר דיין שידוך! דער אייבערשטע זאל העלפן אז דו זאלסט זוכה זיין אויפצושטעלן א שיינע ליכטיגע שטוב, און זוכה זיין צו דורות ישרים ומבורכים, בנים ובני בנים עוסקים בתורה ובמצות.

שטארק זיך און גיי ווייטער אן מיט דיין הייליגע ארבעט צו מזכה זיין אידישע קינדער זיי צוריק צו ברענגען צום אייבערשטן. דער הייליגער רבי זאגט (ספר המידות, אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה - שֶׁיִּשְׁתַּדֵּל לְהַחֲזִיר בְּנֵי-אָדָם בִּתְשׁוּבָה", ווער עס וויל פאררעכטן זיינע עבירות זאל צוריק ברענגען מענטשן צום אייבערשטן.

עס איז נישט דא קיין גרעסערע זאך ביים אייבערשטן ווי הפצה. דער זוהר הקדוש זאגט (תרומה, דף קכח): "תָּא חֲזִי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע - זאגט דער הייליגער זוהר: א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה, "גָּרִים לְאַכְפְּיָיא סִטְרָא אַחֲרָא", ער נעמט אוועק טומאה פון די וועלט, "וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ", ער מאכט אז דעם אייבערשטנ'ס נאמען זאל ווערן געהייליגט אויף די וועלט, "וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", און ער איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", דער מענטש איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", ער איז זוכה צו אלע גוטע זאכן אויף די וועלט און אויף יענע וועלט. "כָּל מָארֵי דִּינִין לָא יַכְלִין לְמֵידָן לֵיהּ בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכט'ס טון - נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים און קיינער קען אים נישט צוריק האלטן.

מוהרא"ש פלעגט זאגן פאר די מפיצים אז פאר די פארלוירענע אידן וואס זענען ווייט פון שמירת המצות, זיי ווייסן נישט פון תורה ומצות - דארף מען געבן ספרים און קונטרסים וואס רעדן זיך פון אמונה, אבער פאר פרומע אידן האט מוהרא"ש זכרונו לברכה געהייסן בעיקר געבן ספרים און קונטרסים וואס רעדט זיך פון קדושה וטהרה וכו'; היינט איז ליידער דער דור שוין אזוי געפאלן אז פאר פרומע אידן דארף מען אויך געבן ספרים פון אמונה. עס דרייען זיך ארום בתוכינו יונגעלייט און בחורים, פרויען און מיידלעך אנגעפילט מיט קשיות אויף די אמונה רחמנא לצלן, דארף מען בעיקר פארשפרייטן די אמונה, דאס איז דער עיקר וואס מענטשן דארפן היינט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת בהר, ט"ז אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

א גרויסן יישר כח פאר'ן אהערשטעלן אזא שיינע מסיבת "טיי אווענט" פאר'ן כולל, איך האב זייער הנאה געהאט צו זיין ביי דיר אין שטוב אנטייל נעמען ביי די מסיבה. דער אייבערשטער זאל דיר געבן הצלחה וברכה אין אלע דיינע וועגן.

מאך זיך א שיעור אין "תיקוני זוהר"; מען זאגט נאך בשם צדיקים א ווארט, אז "תיקוני זוהר" איז א באד פאר די נשמה.

דער הייליגער אריז"ל האט געגעבן א תיקון פאר א בעל עבירה ער זאל זאגן יעדן טאג 5 דפים תיקוני זוהר, וועט ער זוכה זיין צו תשובה טון.

איך ווארט צו הערן פון דיר אז דו ביסט מפיץ דעם גליון היכל הקודש אין מאנסי; נעם צוזאם אלע תלמידים פון ישיבה וואס וואוינען אין מאנסי און זיי זאלן דאס ארומטיילן אין מאנסי, א טייל זאלן גיין יעדן ערב שבת ארומטיילן די גליונות וואס זענען מחי' אזויפיל בחורים און יונגעלייט וואס זענען אויסגעדורשט פאר אביסל חיזוק.

דיין ראש ישיבה.

...

בעזרת ה' יתברך

יום ג' פרשת בהר, ט"ז אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

איך פריי זיך זייער אויף די גוטע נייעס אז דו גייסט יעצט ענדיגן ש"ס; דאס מיינט רייך, דאס איז וואס בלייבט פונעם מענטש.

בנוגע וואו צו מאכן דעם סיום הש"ס; מאך עס פאר דיר פריוואט אין שטוב צוזאמען מיט דיין ווייב תחי' און דיינע קינדער, עס פעלט נישט אויס דאס צו מאכן אין ישיבה. פאר די בחורים מאך איך א סיום אין ישיבה, אזוי ווי חכמינו זכרונם לברכה זאגן (שבת קיט.): "אָמַר אַבַּיֵי, תֵּיתֵי לִי דְּכִי חֲזִינָא צוּרְבָא מֵרַבָּנָן דְּשָׁלִים מְסֶכְתֵּיהּ עֲבִידְנָא יוֹמָא טָבָא לְרַבָּנָן", אביי וואס איז געווען א ראש ישיבה האט געזאגט: "ווען איך זע א בחור אין ישיבה וואס ענדיגט א מסכתא מאך איך א יום טוב אין ישיבה פאר אלע בחורים"; אריינצוגעבן א געשמאק אין אלע בחורים.

דאנק דעם אייבערשטן אויף די נס אז דו האסט חתונה געהאט, דו האסט א ווייב און קינדער, זאלסטו מאכן פאר דיר א שיינע סיום.

איך ווארט צו הערן צי דו שטארקסט זיך אין "הפצה"; יעדע וואך ליל שישי נאכ'ן שיעור זאלסטו אהיימנעמען "גליונות" און דאס אויסלייגן אין שול'ן ערב שבת. אויך קענסטו דאס לייגן א גאנצע וואך, ווייל מענטשן זענען אזוי דורשטריג פאר אביסל חיזוק, עס איז נישט משנה צי עס איז א גליון פון די וואכעדיגע פרשה אדער פון א פריערדיגע פרשה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת בהר, ט"ז אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

דו קענסט זיך נישט פארשטעלן די זכותים וואס דו האסט פון דעם וואס דו ביסט מסדר און מגיה די בריוון פון שאלות ותשובות עצתו אמונה; איך באקום צוריק אזויפיל גריסן פון בחורים, יונגעלייט און פרויען וואס זייער זיי לעבן פון די חיזוק פון דעם ספר.

אלעס וואס שטייט אינעם ספר "עצתו אמונה" איז גענומען געווארן פון ספר הקדוש "אשר בנחל", די שכל און חכמה פון מורי ורבי מוהרא"ש זכותו יגן עלינו וואס האט אונז מזכה געווען מיט די הייליגע ספרים אשר בנחל און די הייליגע קונטרסים וואס זענען געבויט און באגרינדעט אויף די ווערטער פון הייליגן רבי'ן.

איך בעט דיר זייער דו זאלסט זיך שטארקן מיט די הייליגע ארבעט; זוך נישט קיין אנדערע זאכן וואס צו טון. דאס איז עצת היצר צו פארדרייען דעם קאפ. יעדעס מאל א מענטש הייבט אן עפעס טון אין עבודת ה' קומט דער יצר הרע מבלבל זיין מיט ספיקות ובלבולים: 'אפשר זאל מען טון עפעס אנדערש?' 'אפשר זאל איך מאכן אן אנדערע ספר?' וכו' וכו'. דעריבער אז דער אייבערשטער האט דיר מזכה געווען מיט די ארבעט צו מסדר זיין די בריוון זאלסטו זוכן דאס נאר שענער און בעסער מאכן. לייג אריין קאפ, מח און דיין הארץ אז דאס זאל ארויסקומען אויף די שענסטע וועג.

פרעג דיין ווייב תחי' צי זי וויל דיר העלפן אויפטייפן, מגיה זיין, מנקד זיין וכו' וכו', וועט דאס זיין א זכות פאר איר להפקד בבנים ובני בנים.

...

ענקער ראש ישיבה.

בעזרת ה' יתברך

יום ב' פרשת בחוקותי, כ"ב אייר, שנת תשע"ט לפרט קטן

לכבוד החתן ... נרו יאיר.

איך האב ערהאלטן דיין בריוו.

איך בעט דיר זייער זאלסט זיך שטארקן מיט אלע דיינע כוחות ווייטער ממשיך זיין אין די הייליגע ארבעט פון פארשפרייטן די עצות, שכל און חיזוק פון רבי'ן אין גאנץ ארץ ישראל.

איך האב געהערט אז דו האסט געלייגט ל"ג בעומר אין מירון אויפ'ן בארג א גרויסע סקרין פון די "חיזוק יומי", והוה מה דהוה אז מען האט דאס צעבראכן. יעצט ווילסטו וויסן צי דו זאלסט דאס אויפשטעלן נאכאמאל ביי די קומענדיגע יארצייט וואו עס קומען אסאך אידן. עס איז נישט כדאי דאס צו מאכן, מכמה סיבות וואס איך וועל דיר מסביר זיין פנים בפנים.

גיי הפצה מיט ספרים, קונטרסים, סידי'ס און קארטלעך; אדרבה, גיי ביי אלע מקומות הקדושים ביים טאג פון די יארצייט און פארפלייץ אן א שיעור. נעם מיט נאך חברים, צוזאמען וועט עס גיין גרינגער.

יעצט ווען דו גייסט חתונה האבן זאלסטו זיך שטארקן אין הפצה; דער הייליגער רבי זאגט (ספר המידות, אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה - שֶׁיִּשְׁתַּדֵּל לְהַחֲזִיר בְּנֵי-אָדָם בִּתְשׁוּבָה", ווער עס וויל מתקן זיין וואס ער האט פוגם געווען אין פגם הברית, דער זאל עוסק זיין אין די מצוה פון צוריק ברענגען מענטשן צום אייבערשטן און צו די תורה; עס איז נישט דא קיין גרעסערע זאך וואס א מענטש קען טון צו פאררעכטן וואס ער האט פוגם געווען - ווי צו עוסק זיין אין הפצה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת בהר, ט"ו אייר, שנת תשע"ט לפרט קטן

לכבוד מיין טייערער... נרו יאיר.

איך האב ערהאלטן דיין נדבה פאר די ישיבה, יישר כח.

מזל טוב פאר דיין סיום משניות צום זיבעציגסטן מאל! דו האסט מיר מחי' געווען. ווען איך האב געהערט פון דיין האט דאס מיר ממש מחי' געווען.

דער עיקר זאלסטו דאס איבערגעבן פאר נאך מענטשן. ווען דו רעדסט שבת ביי סיפורי מעשיות און ביי שלש סעודות זאלסטו רעדן פונעם סדר דרך הלימוד (כמבואר בשיחות הר"ן, סימן עו).

נעם דיר פאר א ביישפיל צו זען וואס פאסירט אז מען פאלגט דעם רבי'ן; דו ביסט אנגעקומען אין ישיבה אין קעמפ קיץ תשס"ט לפרט קטן פאר א שבת, שלא בכוונה צו נעמען פון רבי'ן. האסט פשוט נישט געהאט וואו צו זיין שבת ווען דיין טאטע שליט"א איז געווען מנהל אין מיידל קעמפ, ביסטו געקומען אויף שבת צו דיין ברודער. און פון איין דרשה האסטו אנגעהויבן צו לערנען און לעבן א חיים טובים, א חיים נצחיים, א לעבן מיטן אייבערשטן.

דאס זאלסטו שטענדיג געדענקען, ווי איין שיעור, איין דרשה, איין שמועס קען טוישן דאס לעבן פון א מענטש.

איך ווארט צו הערן פון דיר ווער עס קומט צום גמרא שיעור; עס גייט מיר ממש בנפשי אז מיינע תלמידים זאלן לערנען יעדן טאג גמרא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת בהר, י"ד אייר, פסח שני, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

מען האט מיר געוויזן די צעטלעך וואס דו קלעבסט ארום אין אלע שול'ן, פונעם האטליין "קול ברסלב". אז מען קען הערן מעשיות פון תפלה און חיזוק אין אמונה וכו' אן דעם וואס עס זאל שטיין "ברסלב".

וויל איך דיר מחזק זיין מיט דיין ארבעט, ווייל דער הייליגער רבי האט אונז בפירוש געזאגט אז מען זאל עוסק זיין אין צוריק ברענגען מענטשן צו די אמונה אפילו מען דערמאנט נישט פון וואו די התחזקות קומט. "וואס הארט מיר אז א איד וועט בענטשן ברכת המזון מיט מער כוונה אן דעם וואס ער וועט וויסן אז דאס קומט פון מיר?" – האט דער רבי געזאגט.

זיי ממשיך בעבודתך הקדושה לקרב נשמות ישראל לאביהם שבשמים.

איך קען קוים ווארט אויף קעמפ צו זיין צוזאמען מיט דיר, זיך מחזק זיין אינאיינעם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת בהר, ט"ז אייר, שנת תשע"ט לפרט קטן

לכבוד ... נרו יאיר.

איך האב ערהאלטן דיין בריוו.

תחזקנה ידיכם אז דו גרייטסט זיך עוסק צו זיין אין הפצה אינעם הייליגן טאג ל"ג בעומר ביים הייליגן פלאץ אין מירון.

עס איז נישט דא קיין גרעסערע זאך ביים אייבערשטן ווי עוסק זיין אין צוריק ברענגען אידישע קינדער צו די אמונה און צו די תורה. אזוי ווי דער הייליגער תנא אלוקי רבי שמעון בר יוחאי זאגט (זוהר תרומה, קכח.): "תָּא חֲזִי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא", איז זוכה ארויף צו גיין אויף א פלאץ וואס קיין שום מענטש איז נישט זוכה; "גָּרִים לְאַכְפְּיָיא סִטְרָא אַחֲרָא", דער מענטש נעמט אוועק טומאה פון די וועלט, "וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ", און ער מאכט אז דעם אייבערשטנ'ס נאמען זאל ווערן געהייליגט אויף די וועלט, "וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", אזוי אויך איז ער גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", ער איז זוכה צו אלע גוטע זאכן אויף די וועלט און אויף יענע וועלט. "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכטס טון - נישט אויף די וועלט און נישט אויף יענע וועלט. "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים און קיינער קען אים נישט צוריק האלטן.

יעדע ספר און יעדע קונטרס פון מוהרא"ש איז נאכאמאל צוריק צו ברענגען דעם איד צום אייבערשטן, עס איז נאר איינגעפאקט מיט אן אנדערע סארט וועג צו קענען כאפן אלע סארט מענטשן אין אלע סארט מצבים, אבער באמת ליגט אין דעם די זעלבע מעדעצינען - נאר צוריק צו ברענגען דעם איד צום אייבערשטן; דעריבער איז נישט קיין חילוק וואס מען טיילט ל"ג בעומר, דער עיקר דארף מען עס געבן בשמחה און מיט א שטארקייט, מיט א פאר גוטע ווערטער, ווי למשל: "דא האט איר שיינע חיזוק, שיינע עצות פאר'ן לעבן".

דער אייבערשטער זאל העלפן זאלסט מצליח זיין אין אלע דיינע וועגן.

בעזרת ה' יתברך

יום א' פרשת אמור, ז' אייר, שנת תשע"ט לפרט קטן

לכבוד מיין טייערער ליבער ... נרו יאיר.

איך האב ערהאלטן דיין נדבה פאר די ישיבה, יישר כח.

איך דאנק דיר פאר אלעס וואס דו העלפסט מיר צו פארשפרייטן די הייליגע ליכטיגע עצות פון רבי'ן פאר די גאנצע וועלט.

עוסק זיין אין "הפצה" איז העכער פון אלצדינג. היינטיגע צייטן איז גרינגער אין א געוויסע זין דער ענין פון הפצה, ווייל מען דארף זיך נישט ארומשלעפן אין די היץ און אין די קעלט, מען קען זיצן אין שטוב מיט א ווארעמע טרונק – ווינטער, און זומער מיט א קאלטע טרונק און פארשפרייטן חיזוק פאר די גאנצע וועלט - מיט דעם וואס דו טוסט מיט די "האט ליין" פון קול ברסלב, וואס צענדליגער טויזנטער מענטשן – בעיקר בחורים, מיידלעך, יונגעלייט און יונגע ווייבלעך רופן אריין טאג טעגליך, און דאס געבט זיי לעבן, עצות, חיזוק און הדרכה ווי אזוי צו קענען אנגיין מיט'ן לעבן.

אזוי אויך מיט די וועבסייט – וואס די ביסט דארט מפרסם די שאלות ותשובות בריוון און די חיזוק יומי דרשות, וכו', וכו', פאר טויזנטער מענטשן, און אויף אלע אנדערע וועגן.

דער אייבערשטער זאל דיר געבן כח ווייטער עוסק צו זיין אין די הייליגע ארבעט; מען טאר נישט אונטערברעכן פון שוועריקייטן, די שוועריקייטן וואס דער ס"מ ברעגנט אלץ מיט א פרישקייט כדי דער מענטש זאל אונטערברעכן און אויפגעבן.

גלייב מיר, אויף מיר גייט אויך איבער שווערע ביטערע נסיונות וכו', וכו', - וואס טו איך? איך דערמאן זיך פון מוהרא"ש, איך דערמאן זיך פון דעם עצה – התבודדות, איך וויין זיך אויס צום אייבערשטן. דאס איז וואס געבט מיר כח אנצוגיין אין מיין לעבן.

זאלסטו דאס אויך טון, דערצייל פאר'ן אייבערשטן אלעס וואס גייט אריבער אויף דיר, שמועס מיט אים אזוי ווי מען שמועסט מיט א גוטער חבר – וועסטו האבן כח אין לעבן, און קיין שום זאך וועט דיר נישט קענען צעברעכן.

וואס זאל איך דיר זאגן, מיר זענען אזוי גליקליך אז מיר האבן אזא גרויסע רבי מיט אזעלכע גרויסע תלמידים וואס געבן אונז פשוט לעבן.

אויב דו קענסט ענדיגן מגיה זיין "אשר בנחל חלק ב'" און ענדיגן די מפתחות; ווייל איך וויל דאס דרוקן. נדרי לה' אשלם, איך האב צוגעזאגט פאר מוהרא"ש אז איך וועל דאס דרוקן און דרוקן און פארשפרייטן פאר אלעמען, ווייל איך בין מקורב געווארן דורך דעם ספר "אשר בנחל חלק כ"ז". איך האב געלערנט דעם ספר נאכאמאל און נאכאמאל, דאס האט מיר געטוישט מיין לעבן. דערפאר וועל איך דאס פארשפרייטן אז נאך מענטשן זאלן זוכה זיין צו א זיס לעבן.

חבריך וידידיך.

...

בעזרת ה' יתברך

יום א' פרשת אמור, ז' אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

מזל טוב פאר'ן אפשערן פון אייער זון ... נרו יאיר; דער אייבערשטער זאל דיר העלפן זאלסט אים מגדל זיין מיט אלע דיינע קינדער געזונטערהייט מיט דיין ווייב אינאיינעם און זען פול נחת.

איך וויל דיר געבן אביסל חיזוק זאלסט זיך שטארקן צו עוסק זיין יעדן טאג אין "הפצה"; דו קענסט קיינמאל נישט וויסן... דו קענסט ראטעווען דאס לעבן פון א בחור, פון א מיידל זיי זאלן נישט גיין אויפן וועג וואס פירט צום טויט, נאר גיין אויפן וועג וואס פירט צום לעבן.

אידישע קינדער גייען יעצט אריבער דעם לעצטן נסיון פאר ביאת משיח, עס גייט א מבול, א מבול פון ניאוף און פון כפירות און אפיקורסות. אזוי ווי דער רבי האט שוין פאראויס געזאגט (שיחות הר"ן, סימן רכ) אז פאר משיח וועט קומען, "יִהְיֶה אַפִּיקוֹרְסוּת גָדוֹל בָּעוֹלָם", עס וועט זיין ביטערע שווערע נסיונות, אזוי ווי עס שטייט (דניאל יב, י): "יִתְבָּרֲרוּ וְיִתְלַבְּנוּ וְיִצָּרְפוּ רַבִּים", דאס גייט ארויף אז פאר משיח וועט קומען וועט אראפגיסן א מבול, אלע וועלן ווערן באגאסן און אפילו די ערליכע וועלן ווערן אנגעשפריצט. און נאר די ספרים און קונטרסים וואס מוהרא"ש האט געשריבן מיט מסירות נפש זיין גאנצע לעבן – דאס ראטעוועט די בני הנעורים. וואויל איז פאר דער וואס איז עוסק אין די מצוה פון צוריק ברענגען אידישע קינדער צום אייבערשטן.

איך בעט דיר טייערער ... נרו יאיר, דער אייבערשטער האט דיר געגעבן א טייערע מתנה, א טייערע ווייב תחי'. זאלסטו אכטונג געבן אויף איר; זיי איר מחזק, הער אויס אירע שמועסן, פארברענג מיט איר, שפאציר מיט איר און שפיל מיט איר. דאס איז דער רצון פונעם אייבערשטן. געדענק, ביים רבי'ן איז געווען שלום בית א יסוד היסודות, ווייל אז מען לעבט מיט די ווייב בשלום האט מען א ריינע מח און אן א ווייב קען מען נישט האבן קדושת המחשבה.

שטארק איר און זיי איר מחזק, דאס בעסטע חיזוק פאר א פרוי איז ווען איר אייגענע מאן טרייסט איר און פארשטייט איר.

ווען איך זע דיר ארויפקומען אין ישיבה שעפ איך נחת פון דיר.

פון דיין ראש ישיבה.

...

בעזרת ה' יתברך

יום א' פרשת אמור, ז' אייר, שנת תשע"ט לפרט קטן

לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

וואויל איז דיר און וואויל איז דיין חלק אז דו ביסט זוכה עוסק צו זיין בהדפסת ספרי מוהרא"ש וואס איז ארויסגענומען פון הייליגן רבינ'ס ספרים און פון דער גרויסער תלמיד רבי נתן זכרונו לברכה.

איך ווייס און איך בין זיכער אז דער ס"מ שפילט מיר דיר מער ווי ער שפילט מיט א צווייטן, ער איז דיר מחליש דעת, ער צעברעכט דיר און ווארפט דיר אראפ כסדר, עד כדי כך אז דו טראכסט צו זיך "אפצולאזן די הייליגע ארבעט", בעט איך דיר און איך בין דא דיר צו שטארקן אז דו זאלסט נישט טראכטן פאר קיין איין רגע אפצולאזן דאס דרוקן די הייליגע ספרים און קונטרסים וואס ראטעווען הונדערטער און טויזנטער און צענדיליגער טויזנטער אידישע קינדער, אדרבה, יעדעס מאל ווען דער ס"מ איז דא און ער אויף דיר – זאלסטו אים צוריק שלאגן מיט נאך א ספר דרוקן, מיט נאך א קונטרס פארשפרייטן, און מיט פארשפרייטן נאך א סידי וואס וועט אריינברענגען אמונה.

אהובי אחי, דו ווייסט דאך יא אביסל וואס גייט פאר אויף די וועלט, וויפיל טרפה'נע און שמוציגע מאוויס קומען ארויס יעדע רגע און יעדע מינוט, דו ווייסט אביסל וואו אידישע קינדער פאלן נעבעך אריין און נאר די ספרים, קונטרסים און גליונות וכו', וכו', העלפט זיי אז זיי זאלן צוריק קומען צום אייבערשטן. דעריבער זאלסטו נישט טראכטן קיין איין רגע אפצולאזן די הייליגע ארבעט, נאר טראכט אלע וועגן ווי אזוי מיר קענען שענער און בעסער מאכן אז דעם רבינ'ס זאך זאל אריינגיין אין די וועלט.

זע אנצוגרייטן ספרים און קונטרסים פאר ראש השנה; עס זעט אויס ווי עס איז נאך דא אסאך צייט אבער מען געבט זיך איין דריי און מען פארט שוין אין קעמפ, און נאך קעמפ פארן מיר צום הייליגן רבינ'ס ציון. דארט קומען זיך צוזאם א קיבוץ אידן מארבע כנפות הארץ – פונעם ארום דעם גאנצן גלאוב, דארפן מיר זיין גרייט מיט ספרים און קונטרסים צו קענען שפייזן אזויפיל מענטשן.

איך בעט דיר זייער זיי מכבד דיין ווייב, בפרט יעצט נאכ'ן געבוירן למזל טוב א ליכטיגע מיידל – דארף זי האבן כח. עס נעמט צייט אז א ווייב זאל קומען צו די כחות, און ווען דער מאן האט שכל און געבט איר חיזוק נעמט ווייניגער צייט זי זאל קומען צו די כחות. אז דו האסט איבעריגע צייט גיי אהיים צו איר און העלף איר, האב רחמנות אויף איר וועט דער אייבערשטער רחמנות האבן אויף דיר. דו האסט א טייערע ווייב, זע איר צו האלטן טייער.

פון דיין ראש ישיבה.

...

בעזרת ה' יתברך

יום א' פרשת אחרי ב', אסרו חג, כ"ג ניסן, שנת תשע"ט לפרט קטן

 לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

חכמינו זכרונם לברכה זאגן (מדרש תנחומא עקב, סימן ו; הובא ברש"י דברים ח, א): "אִם הִתְחַלְתָּ בְּמִצְוָה, גְמוֹר אוֹתָהּ", ווער עס הייבט אן א מצוה דארף דאס ענדיגן; אז דו האסט זוכה געווען צו אנהייבן מיט די חיזוק יומי המתורגם, דו האסט געברענגט דיין חבר ... נרו יאיר זאל יעדן טאג מתרגם זיין פאר די אידן וואס פארשטייען נישט קיין אידיש און צענדליגער טויזנטער אידן בלי גוזמא פלעגן זיך מחי' זיין דערמיט טאג טעגליך, דארפסטו זען אים צו מחזק זיין ער זאל ווייטער ממשיך זיין דאס צו טון.

מיט די היינטיגע וועלט וואס איז אזוי פארגעשריטן קען מען זיצן אין שטוב, ווינטער אין א ווארימע שטוב און זוממער און א שטוב מיט פיינע ערקאנדישן און מחזק זיין צענדליגער טויזנטער אידן מיט גרינגע ארבעט. שטעל זיך פאר ווי דער הייליגער רבי נתן האט ארומגעקלעטערט פון שטאט צו שטאט פארשפרייטן די הייליגע ספרים פון רבי'ן, אויפן וועג צוריק פון ארץ ישראל האט אים די שיף געטראגן קיין מצרים, רבי נתן האט געהאט גרויס צער דערפון, ווייל אין די תורה שטייט אז מען זאל נישט אהין גיין (דברים יז-טז): "לֹא תֹסִפוּן לָשׁוּב בַּדֶּרֶךְ הַזֶּה עוֹד", (דברים כח-סח): "לֹא תֹסִיף עוֹד לִרְאֹתָהּ", (שמות יד-יג): "לֹא תֹסִפוּ לִרְאֹתָם עוֹד עַד עוֹלָם'; נאכדעם האט ער מפיץ געווען דארט א ספר פון רבי'ן; שרייבט רבי נתן מיט גרויס פרייד אז עס האט זיך אים געלוינט אהין צו גיין כדי מפיץ צו זיין.

וואס זאלן מיר שוין זאגן ווען מען קען ארויסשיקן חיזוק, שכל און עצות פון רבי'ן, חיזוק יומי פאר טויזנטער מענטשן; דארפן מיר דאס טון מיט די גרעסטע שמחה.

בעט איך דיר אחי היקר, חזק ואמץ מחדש לעסוק בהעסק הקדוש לתרגם את החיזוק היומי.

איך פאר יעצט קיין ארץ ישראל, מיר זיצן יעצט אינעם פליגער אין הימל העכער די וואלקענעס; איך וועל בעטן פאר דיר און דיין ווייב און קינדער ביי מוהרא"ש און ביי אלע קברי צדיקים.

דו האסט מיר געוואלט נעמען צום ערפארט, אבער איך פאר שטענדיג מיט דעם יונגערמאן וואס מאכט מיר די טיקעטס און שטעלט מיר אויס די נסיעה. אם ירצה ה' ביי אן אנדערע געלעגנהייט וועל איך פארן מיט דיר.

...

בעזרת ה' יתברך

יום א' פרשת אחרי ב', אסרו חג, כ"ג ניסן, שנת תשע"ט לפרט קטן

 לכבוד מיין טייערער ... נרו יאיר.

איך האב ערהאלטן דיין נדבה פאר די ישיבה, יישר כח.

אשריך ואשרי חלקיך אז דו פארשפרייטסט די נייע ספרים "עצתו אמונה" פאר בחורים און יונגעלייט. עס גייט נישט אריבער א טאג וואס בחורים און יונגעלייט זאלן מיר נישט זאגן אז דאס האט זיי געטוישט זייער לעבן צום גוטן.

ערב יום טוב האט מיר א פרוי פון מאנסי געשריבן אז זי האט באקומען אן עצתו אמונה (פרשת בשלח, ע"ט) און דאס האט איר געטוישט איר לעבן. זי קריגט זיך מיט איר מאן שוין פאר איבער 40 יאר און די קונטרס האט איר געגעבן שכל צו האבן שלום בית; אזוי אויך אז 50 יאר ליידט זי פון פחדים און דמיונות און אין דעם קונטרס איז דא א תפילה פאר א פרוי ניצול צו ווערן פון פחדים, זי זאגט דאס יעדן טאג און עס ווערט איר בעסער און בעסער. אויך האט זי זיך אנגעהויבן פארטראגן מיט אירע קינדער וכו', וכו'.

לויט ווי איך שטעל זיך פאר האט זי דאס באקומען פון דיר, ווייל דו ביסט דער מפיץ אין מאנסי-מאנרא; דו ווייסט גארנישט וואס א קונטרס טוט מיט א מענטש. די מפיצים ווייסן נישט וואס זיי טוען אלץ אויף, בעט איך דיר טייערער מפיץ, הייב אן פון פריש מיט א פרישקייט מפיץ זיין די נייע ספרים "עצתו אמונה" און די בריוון פון "איש אמונות", דאס איז נישט קיין נייע זאכן, דאס איז אלעס גענומען פונעם ספר הקדוש והנורא "אשר בנחל", עס איז נאר אנדערש געפאקט, אויף א נייע שפראך פאר די היינטיגע דור, אויף א וועג אז בחורים און מיידלעך זאלן דאס פארשטיין.

טייערער חבר, ליבער ברודער, שטארק זיך מיט אלע דיינע כחות צו זיין פרייליך; ווארף אוועק אלע עצבות ומרירות און לאז זיך פירן פונעם אייבערשטן. גיי ארום שטענדיג מיט א שמייכל.

ווען דו גייסט ארויף צום ציון פון הרב הקדוש מסאטמאר זכותו יגן עלינו אדער צום ציון פון הרב הקדוש מריבניץ זי"ע זאלסטו מיר מזכיר זיין: יואל בן ריצא רעכיל, איך זאל האבן כח ממשיך צו זיין מיט'ן משמש זיין דעם רבי'ן, משמש זיין מוהרא"ש, און קענען ווייטער פארשפרייטן די זיסע עצות פאר די וועלט.

...

בעזרת ה' יתברך

יום ה' פרשת אחרי א', י"ג ניסן, שנת תשע"ט לפרט קטן

מרת ... תחי'.

איך האב ערהאלטן אייער בריוו און די געלט.

איך פריי זיך זייער צו הערן אז איר זענט זיך מחי' מיט די עצות פון הייליגן רבי'ן; איר שרייבט בפרטיות פון אייער לעבן וואס האט זיך געטוישט, אז נאך פערציג יאר זיך קריגן איז אייער שלום בית בעסער געווארן, אייער נאנטקייט מיט אייערע קינדער איז פארבעסערט און בעיקר לגבי אייערע מחשבות וואס האט זיך געטוישט נאך פופציג יאר ליידן פון מחשבות וכו', אז זייט איר האט געטראפן דעם ספר עצתו אמונה איז אייך בעסער געווארן, און ווען איר זאגט די תפילה פון עצתו אמונה (פרשת בשלח ע"ט, דף ח) גייען אוועק פון אייך אלע דמיונות און פחדים.

איר דערמאנט מיר א מעשה וואס מוהרא"ש האט געהאט; מוהרא"ש האט אמאל דערציילט ביי א שיעור אז פאר פופציג יאר צוריק בשעת ער איז געגאנגען "הפצה" אין וויליאמסבורג איז ער אריין אינעם סיגוט'ער בית המדרש וואו ער האט מפיץ געווען דעם ספר "השתפכות הנפש". איינער פון די אידן פאר וועם ער האט דאס מפיץ געווען איז געווען זייער אן אלטער איד, נאכ'ן אריינקוקן אינעם ספר איז ער צוגעקומען צו מוהרא"ש און אים געזאגט מיט א געוויין: "אוי אוי אוי, ווען איך וואלט ווען געוויסט פון די עצה אז מען קען רעדן צום אייבערשטן וואלט מיר מיין לעבן געווען גרינגער"; דער איד איז אריבער דעם דייטשן גיהנום בשעת די צווייטע וועלט מלחמה - וואו ער האט פארלוירן זיין גאנצע משפחה, ער איז געווען אין לאגער וואו ער איז געפייניגט געווארן דורך די רוצחים וכו' וכו', "ווען איך וואלט געוויסט פון די עצה פון רעדן צום אייבערשטן וואלט מיין לעבן מיר געווען אסאך גרינגער" - האט ער געזאגט פאר מוהרא"ש.

דאס זעלבע איז ביי אייך; ווען איר זאלט וויסן ביים אנהייב פון אייער לעבן די זיסע עצות פון רבי'ן וואלט איר זיך נישט געדארפט מוטשען פופציג יאר מיט שלעכטע מחשבות.

דאנקטס און לויבטס דעם אייבערשטן פאר די זיסע לעבן וואס איר האט און פאר די ליכטיגע קינדער און אייניקלעך, וועט דער אייבערשטער אייך געבן נאך מער גוטס.

דער אייבערשטער זאל העלפן אז מיר אלע זאלן שוין זוכה זיין צו עסן דעם קרבן פסח אין בית המקדש (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

א פרייליכן יום טוב.

בעזרת ה' יתברך

יום ד' פרשת צו, תענית אסתר, י"ג אדר ב', שנת תשע"ט לפרט קטן

מרת ... תחי'.

איך באקום יעדע וואך די קונטרס פון די איבערגעטייטשטע בריוון אויף ענגליש וואס איר זענט מתרגם; אלע זאגן אז דאס איז א וואונדערליכע ארבעט. די מפיצים זאגן מיר אז מענטשן נעמען דאס און זענען זיך מחי' דערמיט.

יעצט ווען מיר שטייען ערב פורים - א צייט וואס אידן האבן נאך אמאל מקבל געווען די תורה, אזוי ווי די הייליגע  חכמים זאגן (שבת פח.), איז יעצט א צייט וואס עס קומט אראפ א הייליגקייט אויף אידישע קינדער. וויל איך אייך מחזק זיין איר זאלט ווייטער טון די הייליגע ארבעט מיט וואס דער אייבערשטער האט אייך מזכה געווען - איבערטייטשן די בריוו אויף ענגליש אז נאך אידן זאלן זיך קענען מחזק זיין.

זייער אסאך מענטשן ווייסן נישט וואס זיי האבן צו טון ווען זיי באקומען א התעוררות צו זיין גוט; מען מיינט אז מען דארף טון עבודות און סיגופים, מען דארף פאסטן און זיך אפשיידן פון די וועלט, און וויבאלד מענטשן זענען ווייט פון די זאכן, איז ווען עס קומט אן התעוררות שטופט מען דאס אוועק און מען גייט ווייטער אן מיט וואס מען טוט - אן תשובה טון, אויף דעם קומט דער הייליגער רבי און געבט אונז אזעלכע שיינע עצות וואס מיר זאלן טון ווען מיר ווילן תשובה טון. דער רבי לערנט אונז אויס מיר זאלן ארויס זאגן א ווארט צום אייבערשטן; מיר זאלן זאגן פאר'ן אייבערשטן: "טאטע, איך וויל זיין גוט"; די איינע קליינע ווארט וועט שוין שלעפן דעם מענטש צו אלעס גוטס.

וויל איך אייך בעטן איר זאלט ווייטער איבער טייטשן די בריוון אויף ענגליש אז נאך מענטשן זאלן וויסן פון די געשמאקע זיסע וועג פונעם הייליגן רבי'ן; איך ווייס אז איר לייגט אריין צענדליגער שעות און דאס גייט אויפ'ן חשבון פון אייער שטוב און פון אייערע קינדער, זאלט איר אבער וויסן אז דער אייבערשטער גיבט א ברכה פאר די וואס טוען פאר אידישע קינדער און מען זעט נחת ביי די אייגענע קינדער.

דער אייבערשטער זאל אייך געבן הצלחה אין אלע ענינים.