בריוון פונעם ראש ישיבה שליט"א

בעזרת ה' יתברך - יום א' פרשת בהעלותך, ט"ו סיון, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

חכמינו זכרונם לברכה זאגן (נדה לא.): "אֵין בַּעַל הַנֵּס מַכִּיר בְּנִסוֹ", דער בעל הנס כאפט אליינס נישט די ניסים וואס דער אייבערשטער מאכט מיט אים; איך מיין דו כאפסט נישט די גרויסע נס וואס דער אייבערשטער האט מיט דיר געמאכט, דו האסט אן אשת חיל מיט ליכטיגע קינדער, שלא כדרך הטבע, דארפסטו מכיר טוב זיין דעם באשעפער.

ווי אזוי איז מען מכיר טוב? דורכדעם וואס מען פאלגט וואס דער רבי האט אונז געלערנט (שיחות הר"ן, סימן רסד) צו מכבד זיין די ווייב; רעדן שיין, ווייך און הארציג. דיין ווייב ווארט דו זאלסט איר געבן ליבשאפט און ווארעמקייט; עס קומט איר, געב איר גוטע ווערטער.

טייערער ברודער, גיי אביסל התבודדות, מאך זיך א חשבון הנפש, בעט דעם אייבערשטן ער זאל רחמנות האבן אויף דיר, ער זאל דיך מקרב זיין צו אים. וואוינסט דאך צווישן די ביימער און גראז; זאלסטו יעדן טאג שפאצירן אפאר מינוט און זיך אויסשמועסן מיט אים.

זיי מכבד דיין שווער און שוויגער. ווען דו גייסט שבת צו זיי - זאלסטו זיצן מיט דרך ארץ, אזוי ווי דו ווילסט דיינע איידעמער זאלן זיצן ביי דיין שבת טיש. פארגעס נישט, דו געבסט זיך איין דריי און דו האסט איידעמער, וואס וועסטו דעמאלט טון...?

בעזרת ה' יתברך

יום ב' פרשת וישב, י"ח כסליו, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

איך האב געזען א בילד וואס גייט מיר נישט ארויס פון קאפ; איך האב געזען מוהרא"ש אפאר טעג פאר'ן הסתלקות אין שפיטאל אויפ'ן בעטל, מוהרא"ש האט געפאטשט און געשמייכלט, מוהרא"ש האט געזאגט: "איך פאטש אז איך גיי אוועק פון די וועלט".

וואס זאל איך דיר זאגן, דאס בילד לויפט מיר נאך. מוהרא"ש האט אין זיין לעבן זיך אפגעליטן צרות צרורות און דאך האט ער נישט פארלוירן די אמונה, נישט געהאט קיין קשיות אויף די אמונה, ער האט זיין גאנץ לעבן נאר געטון פאר די אמונה; אריינברענגען אמונה אין אונז און אין די גאנצע וועלט.

אז מיר וועלן פאלגן מוהרא"ש, מיר וועלן גיין אין די וועגן, מיר וועלן זיך באנוצן מיט די עצות פון רבי'ן - וועלן מיר זוכה זיין צוצוקומען צו א שטארקע אמונה, מיר וועלן זיין צוגעקלעבט צום אייבערשטן, מיר וועלן אויך קענען פאטשן און שמייכלען, זיין אמת'דיג איבערגעגעבן צום אייבערשטן.

טייערער ברודער, גיי אביסל שפאצירן, זיי זיך מתבודד; בעט דעם אייבערשטן ער זאל דיר מקרב זיין צו אים, בעט אים: "קרבינו לעבודתיך, הט לבי ליראה את שמך", בעט אין אידיש: "טאטע איך וויל זיין ערליך, העלף מיר".

עס איז דאך א מחי' דאס לעבן ווען מען גייט התבודדות.

בעזרת ה' יתברך

יום ה' פרשת קרח, א' דראש חודש תמוז, שנת תשפ"א לפרט קטן

לכבוד ... נרו יאיר, קרית ברסלב

גיי מיט די קינדער התבודדות.

מאך זיך א סדר צו גיין מיט די קינדער הפצה.

אויך זאלסטו מיר שרייבן די נעמען פון די קינדער, ווער עס העלפט רייניגן די שול.

בעזרת ה' יתברך

יום ה' פרשת אמור, י"ז אייר, שנת תשפ"א לפרט קטן

לכבוד מיין טייערער ... נרו יאיר, קרית ברסלב

איך דאנק דיר פאר'ן מיר העלפן אזוי געטריי, עס זעט זיך אן דיין געפיל צום רבי'ן; לויט דיין ארבעט, דיין געטריישאפט ווי דו ביסט איבערגעגעבן צום רבי'ן – איז א סימן אז עס ברענט אין דיר דעם רבי'ן.

איך בין יעצט אויפ'ן פליגער, איך פאר קיין ארץ ישראל; איך האב נישט געהאט קיין צייט זיך צו געזעגענען פון דיר. נעכטן – מיטוואך – פארטאגס האב איך באקומען א ידיעה אז איך האב א רשות אריינצוקומען קיין ארץ ישראל, נאך אזויפיל תפילות, נאך אזויפיל בענקעניש – בין איך זוכה יעצט אנצוקומען.

וואס זאל איך דיר זאגן, פאר דעם אליינס, פאר די מתנה פון התבודדות – האט זיך שוין געלוינט מקורב צו ווערן צום הייליגן רבי'ן, צו קענען זוכה זיין צו זיצן אויפ'ן פליגער צעקוועטשט און צעדרוקט שעות אויף שעות און קענען האבן די שכל צו רעדן און שמועסן מיט'ן אייבערשטן.

וואוינסט אין שטעטל צווישן פעלדער און וועלדער, זאלסטו גיין אביסל שפאצירן מיט'ן אייבערשטן, אים דאנקען פאר דיין שיינע לעבן; עס איז נישטא עפעס זיסער, עס איז נישטא עפעס בעסערס.

בעזרת ה' יתברך

ערב שבת קודש פרשת אחרי-קדושים, י"א אייר, שנת תשפ"א לפרט קטן

לכבוד ... נרו יאיר, קרית ברסלב

איך פריי זיך זייער אז עס איז דא שלום צווישן דיר און דיין ווייב, שלום איז דער נאמען פונעם אייבערשטן (שבת י:); ווען עס איז דא שלום אין שטוב - איז דא אלע ברכות אין שטוב.

שטארק זיך מיט די עצה פון רבי'ן, גיי אביסל התבודדות; אין שטעטל איז דאך אזוי געשמאק, וואו מען גייט און וואו מען שטייט האט מען פעלדער און וועלדער. עס איז אזוי איינגענעם צו שמועסן מיט'ן אייבערשטן, אלעס גייט אנדערש נאך התבודדות, אלעס גייט כסדרן ווען מען געבט זיך איבער צום אייבערשטן.

בעזרת ה' יתברך

יום ד' פרשת מקץ, ראש חודש טבת, ו' דחנוכה, שנת תשפ"א לפרט קטן

לכבוד מיין טייערער ... נרו יאיר, קרית ברסלב ליבערטי

איך פריי זיך אז דו האסט אנגעהויבן לערנען די פאך פון שרייבן, זיין א סופר סת"ם. מיר האבן שוין אין די קהילה א סופר, אבער די קהילה וואקסט כן ירבו - דארפן מיר נאך סופרים.

אנשי שלומינו ווילן מזוזות און תפילין פון סופרים וואס פאלגן דעם רבי'ן, סופרים וואס האבן שיעורים כסדרן בכל התורה כולה, סופרים וואס זענען זיך מתבודד, וואס לעבן מיט'ן אייבערשטן.

הייב אן לערנען דעם ספר קסת הסופר, דו וועסט דארפן לערנען דעם ספר אן א שיעור מאל און זיך דאס פארהערן ארויסצונעמען א קבלה צו קענען שרייבן.

יעדן אינדערפרי זאלסטו גיין אביסל התבודדות אין פעלד; דער שטעטל איז דאך גן עדן התחתון, מען קען זיך מתבודד זיין צווישן די פעלדער און וועלדער.

בעזרת ה' יתברך - א' לסדר כי תבוא לאומאן, י"א אלול, שנת תש"פ לפרט קטן

 מרת ... תחי', קרית ברסלב ליבערטי

איך האב זייער הנאה געהאט צו זיין אין שטעטל דורכאויס די זומער וואכן; עס איז א הייליג פלאץ, א ריינע פלאץ; עס איז נישטא נאך אזא פלאץ אין די וועלט, א פלאץ וואו יעדער איינער לעבט פאר זיך מיט'ן אייבערשטן.

יעדע דינסטאג נאכט וועט זיין א צאמקום פאר אלע פרויען פון שטעטל; איך האף אנצוגרייטן אפאר ווערטער, חיזוק פון רבי'ן וואס מען וועט אויפשפילן; דאס וועט אייך געבן חיזוק ווייטער אנצוגיין מיט אייער ארבעט מיט די קינדער.

נוצטס אויס די שטעטל פאר התבודדות; יעצט איז נאך נישט קאלט, עס איז שיינע וועטערס, זעצט אייך ארויס אויפ'ן פעלד נעבן שטוב מיט א תהילים און זינגטס די שיינע געזאנגען וואס דוד המלך האט געזינגען צום אייבערשטן. בעטס דעם אייבערשטן וואס איר דארפט וועט איר זען וואונדער וואס ער וועט טון מיט אייך.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה און א גוט געבענטשט יאר.