בריוון פונעם ראש ישיבה שליט"א

בעזרת ה' יתברך - יום ה' פרשת במדבר, כ"ט אייר, מ"ד לעומר, שנת תשפ"ד לפרט קטן

לכבוד ... נרו יאיר

דאס וואס דו גייסט אריבער מיט דיין ווייב, זי ליידט וכו', יעדע נאכט פרעגט זי דיר אויף ענקער קינד, אויב דאס קינד איז ענקער קינד אדער איז דאס א קינד וואס מען האט פארטוישט אין שפיטאל, זי וויינט בכיות נוראות און נאכן איר בארואיגן הויבט זי אן נאכאמאל פרעגן: "אפשר איז דאס יא פארטוישט?" דו פרעגסט וואס דו קענסט טון.

איך האב שוין געהאט אזעלכע מעשיות, פרויען וואס האבן די שלעכטע מחשבות, אויך פון אינגעלייט וואס זענען געקומען זיך אויסרעדן אז עפעס האט פאסירט אין שטוב, די ווייב וויינט און זאגט "אפשר האט זיך פארטוישט א קינד אין שפיטאל?"

האסט איין עצה, רעד צו איר אסאך דיבורי אמונה און פון רבינ'ס עצות. ברענג איר דעם רבינ'ס ספרים (-וואס פרויען קענען לערנען; קונטרסים פון מוהרא"ש, בפרט דעם ספר הנפלא 'אוצר האמונה'), דאס וועט איר אוועק נעמען די מחשבות רעות און איר שטארקן בגוף ונפש.

זיי נישט צעבראכן, ווער נישט צעפאלן, מיט סבלנות וועסטו אנקומען גאר ווייט. זיי נישט קיינעם מקנא, קיינער האט נישט בעסער חתונה געהאט פון דיר, יעדער מוטשעט זיך מיט א צווייטע מעשה, יעדער מוטשעט זיך מיט יסורי הנפש, זה בכה וזה בכה, מיט תפילה און מיט די עצות פון רבי'ן ווערט מען אויסגעהיילט, אזוי ווי דער רבי האט געזאגט (ספורי מעשיות מעשה יג, דעם זעקסטן טאג): "און איך הייל זי".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ז אייר, מ"ב לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איר זענט געזונט און שטארק, גייט נישט צום דאקטער זיך אונטערזוכן, עס איז גארנישט אז מען פארלירט די סדר וכו' און א לאנגע צייט וואס עס קומט נישט אן וכו'.

זייט נישט באזארגט, דאנקט און לויבט דעם אייבערשטן פאר די קינדער וואס ער האט אייך געגעבן און דאס וועט עפענען די טויערן אין הימל און איר וועט זוכה זיין צו נאך קינדער.

זאגט יעדן טאג תהילים, דאס וועט ברענגען ישועות און רפואות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

בנוגע וכו'; ביי אונז פירט מען זיך אז דער מאן ווארט אינדרויסן פון צימער, און זאגט קאפיטל ק' 'מזמור לתודה'. דער רבי זאגט (לקוטי מוהר"ן חלק ב', סימן ב) אז די קאפיטל איז מסוגל להולדה, מען זאגט די קאפיטל נאכאמאל און נאכאמאל ביז מען רופט מיט א מזל טוב.

אויך געבט מען צדקה לזכות די ווייב ולזכות די קינד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

לכבוד מיין טייערער ... וזוגתו תחי'

זארגט נישט וועגן קינדער, ענק וועלן האבן קינדער; דאס זארגן צו סאך - דאס אליין קען אפהאלטן פון האבן קינדער.

טו וואס חכמינו הקדושים זאגן (בבא בתרא י:): "מַה יַעֲשֶֹה אָדָם וְיִּהְיוּ לוֹ בָּנִים זְכָרִים", וואס זאל א מענטש טון ער זאל זוכה זיין צו קינדער זכרים? רבי אליעזר זאגט: "יְפַזֵר מָעוֹתָיו לַעֲנִיִּים", ער זאל געבן צדקה, און רבי יהושע זאגט: "יְשַׂמַּח אִשְׁתּוֹ לִדְּבַר מִצְוָה", ער זאל פרייליך מאכן זיין ווייב.

זייט מתפלל צום אייבערשטן פאר קינדער, און ווען איר צינדט אן די שבת ליכט זאלט איר בעטן פאר קינדער, אזוי אויך ווען איר טוט די מצוה פון חלה, און ווען מען טוט די הלכות פון טהרת המשפחה - דעמאלט איז אן עת רצון צו בעטן פאר קינדער און צו געהאלפן ווערן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת תזריע, ראש חודש ניסן, שנת תשפ"ד לפרט קטן

לכבוד מיין טייערער ליבער ... נרו יאיר, וזוגתו תחי'

היינט איז אליהו הנביא געווען אין ישיבה ביי א ברית, איך בין געווען סנדק, איך האב געוויינט צו אליהו הנביא פאר ענק, ענק זאלן שוין זוכה זיין צו זרע של קיימא.

פסח ביים סדר זאלן ענק ביידע בעטן פאר קינדער. דער זוהר הקדוש זאגט (בא, דף מ:) דער אייבערשטער רופט צוזאם אלע מלאכים און זאגט זיי זאלן זיך צוהערן צו די אידישע סדר נאכט, "כְּדֵין כֻּלְּהוּ מִתְכַּנְּשִׁין, וְאַתְיָין וּמִתְחַבְּרִין בַּהֲדַיְיהוּ דְּיִשְׂרָאֵל", און די מלאכים קומען מיטן באשעפער הערן די סדר נאכט.

ליל הסדר איז א פאסיגע צייט צו פועל'ן ישועות, פארמאך זיך די אויגן און זאג: "אייבערשטער מאך מיר א מתנת חנם, געב מיר אן אומזיסטיגער געשאנק, ליכטיגע געזונטע קינדער, צדיקים, וואס וועלן ליכטיג מאכן די וועלט".

אזוי זאלסטו טון כמה פעמים, זיך פארמאכן די אויגן און שטילערהייט מיט די ליפן בעטן פאר קינדער.

א פרייליכן יום טוב, איך ווארט צו הערן די גוטע נייעס.

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך בין זייער פרייליך אז עס איז דא גוטע נייעס ביי ענק, דער אייבערשטער זאל העלפן איר זאלט האבן כח און אלעס זאל זיין בנקל ובנחת.

דאנקט דעם אייבערשטן אויף די חסדים וואס ער טוט מיט אייך, דאנקט און לויבט דעם אייבערשטן אז איר האט חתונה געהאט און אז עס איז דא גוטע נייעס; דאס איז די בעסטע סגולה, די בעסטע שמירה - אז אלעס זאל אריבער גיין בנקל ובנחת.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת שמיני, כ"ב אדר ב', שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך זאג אייך נאכאמאל, יעצט איז א צייט פון זיך אפרוען, יעצט איז א צייט פון קומען צו די כוחות; איר האט ברוך ה' א שיינע שטוב מיט קינדער, און דער אייבערשטער וועט העלפן איר וועט נאך האבן נאך קינדער, אבער יעצט דארף מען זיך אביסל אפרוען.

וואס קוקט איר אויף אנדערע? און וואס האט צוטון מיט אייך וואס מען פסק'נט פאר אנדערע? יעדער מענטש איז א באזונדערע וועלט פאר זיך, איז וואס איז שייך צו באקומען א חלישות הדעת ווען מען הערט אז די פרוי האט מען געזאגט אזוי און פאר אייך אזוי? אלע צרות הויבן זיך אן ווען מען קוקט אויף אנדערע; אז מען האט אייך גע'פסק'נט צו ווארטן און זיך אפרוען - איז דאס דער רצון השם און דאס דארף זיין די גרעסטע שמחה.

מען פארלירט נישט אז מען פאלגט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר

האסט מיר אזוי מחי' געווען מיט די הודעה אז דו האסט מסיים געווען די ניין און פערציגסטע מאל ששה סדרי משנה, איך בין אזוי איבערגענומען פון דיר. איך געדענק אלס בחור האסטו פלייסיג געלערנט, אבער יעצט ווען דו ביסט פארנומען רוב טאג מיט ברענגען פרנסה און צאלן חובות, דאך האסטו די שכל, די געפיל ווייטער צו לערנען און מסיים זיין נאכאמאל און נאכאמאל משניות; וואויל איז דיר און וואויל איז דיין חלק, דאס וועסטו מיט נעמען מיט דיר אויף יענע וועלט.

פרעג דיין ווייב אויב ענק ווילן קומען רעדן אינאיינעם בנוגע וכו'; איך וויל ענק העלפן סיי ארויסקריכן פון די חובות און סיי מיט זרע של קיימא.

בעזרת ה' יתברך - יום ג' פרשת ויקהל, כ"ה אדר א', שנת תשפ"ד לפרט קטן

מרת ... תחי', צפת

איך האב ערהאלטן אייער בריוו.

עס איז זייער גוט און זייער וואויל צו עוסק זיין אין הפצה, אבער נאך העכער און נאך וויכטיגער פאר א מאמע איז צו זען אז די קינדער זאלן זיין צייטליך אין חדר און אין שולע, נישטא אזא זאך קינדער זאלן קומען שפעט.

שטעלט אויס אייער טאג אז אלעס זאל זיך דרייען ארום די קינדער'ס סדר היום; צום ביישפיל אז מען וויל גיין באזוכן עלטערן, מען וויל גיין ביינאכט - דארף מען טראכטן עס איז טאקע זייער א גרויסע מצוה צו גיין צו עלטערן, אבער די קינדער דארפן גיין שלאפן צייטליך, אויפשטיין צייטליך און זיין אין חדר און אין שולע צייטליך, און אויב מען שלעפט קינדער ביינאכט צו עלטערן אדער צו מלווה מלכה'ס - איז יצא שכרו בהפסידו, עס לוינט נישט די גאנצע זאך.

איך זאג שטענדיג פאר די ווייבלעך וואס ווילן מיטהאלטן זומער די מלוה מלכה'ס, אז דאס איז גוט פאר די יונגע משפחות וואס האבן נאכנישט קינדער צו שיקן אין חדר, אדער פאר עלטערע משפחות וואס האבן שוין חתונה געמאכט די קינדער, אדער משפחות וואס האבן נאר טעכטער און ביי אונז אין אמעריקע איז נישטא קיין שולע זונטאג - די קענען פראווען מלוה מלכה'ס עד עלות השחר, אבער די וואס האבן קינדער וואס גייען אין חדר - די דארפן לייגן שלאפן די קינדער צייטליך, דאס מיינט א גוטע מאמע, א געזונטע שטוב.

אזוי אויך מיט הפצה; אלעס איז פיין, אלעס איז חשוב, אלעס איז געוואלדיג, אבער אז מען האט קינדער - דארף זיך אלעס דרייען ארום די קינדער'ס סדר היום.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

שטיי אויף פארטאגס, גיס אפ נעגל וואסער, לויף אין מקוה און זאג דעם "יום תהילים", דאס וועט זיין א סגולה פאר דיר פאר קינדער. דער הייליגער רבי זאגט (ספר המידות אות בנים, סימן סה): "הַשִּׁירוֹת וְהַתִּשְׁבָּחוֹת, שֶׁאוֹמְרִין קדֶם אוֹר הַיּוֹם, הוּא סְגֻלָּה לְבָנִים" , זינגען און לויבן צום אייבערשטן פארטאגס - איז א סגולה פאר קינדער, "גַּם לְאִשָּׁה שֶׁנֶּחְסַר חֲלָבָהּ", אויך איז דאס א סגולה פאר א פרוי וואס האט ווייניג מילך, "גַּם לְאִשָּׁה רָעָה שֶׁהִיא כַּעֲסָנִית", אויך איז דאס א סגולה פאר א פרוי וואס איז שלעכט און כעס'יג.

פלעכט אריין דיינע אייגענע תפילות צווישן די פסוקים, לויב אין דאנק אין דיין שפראך; אידיש, ענגליש, רוסיש, ספאניש, נישט קיין חילוק וואס פאר א שפראך; זאג: "שכוח אייבערשטער פאר די חסדים", הויב אן זוכן, זוך גוט וועסטו זען עס איז מיט גרויסע חסדים, דער אייבערשטער איז נאר גוטס; דאס וועט עפענען די הימלען פאר דיר פאר זרע של קיימא.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

עס איז שוין אריבער אפאר יאר און דו ווארסט אויף קינדער, דו ווילסט אזוי שטארק געהאלפן ווערן מיט קינדער, דו פרעגסט: "וואס קען איך טון זוכה זיין צו קינדער?"

דער רבי פרעגט דיין פראגע (ספר המדות אות בנים, סימן כב): "מַה יַּעֲשֶׂה אָדָם", וואס זאל מען טון, "וְיִהְיֶה לוֹ בָּנִים", זוכה זיין צו קינדער? "יְפַזֵּר מְעוֹתָיו לַעֲנִיִּים", געבן צדקה, געבן געלט פאר ארעמעלייט, "וִישַׂמַּח אֶת אִשְׁתּוֹ לִפְנֵי תַּשְׁמִישׁ", און פרייליך מאכן די ווייב.

אויך זאלסטו געבן צדקה צו דרוקן ספר אשר בנחל; מוהרא"ש האט צוגעזאגט, אז מען וועט געבן צדקה צו דרוקן דעם הייליגן ספר אשר בנחל – וועט מען זען אויסטערלישע ישועות, און פארגעס נישט וואס איז אויבן געשריבן; פרייליך מאכן די ווייב.

בעזרת ה' יתברך - יום ג' פרשת תצוה, שובבי"ם, י"א אדר א', שנת תשפ"ד לפרט קטן

מרת ... תחי'

איך האב ערהאלטן אייער בריוו.

מזל טוב פאר די חתונה, דער אייבערשטער זאל העלפן עס זאל זיין א בית נאמן בישראל, ענק זאלן זיך קיינמאל נישט קריגן, עס זאל זיין ליבשאפט און שלום צווישן ענק.

בנוגע וכו'; וויסן זאלט איר, עס איז נישט קיין קינדער שפיל, עס איז א שפיל מיט פייער, אויב חס ושלום מען היט נישט די הלכות פון א אידישע שטוב - כאפט מען שרעקליכע קלעפ. איך זאג אייך עס לוינט נישט, עס לוינט צו היטן הלכות, צו בלייבן געזונט און צו האבן געזונטע קינדער, אויב חס ושלום מען הויבט אן מזלזל זיין אין די הלכות - ענדיגט זיך דאס זייער טראגיש.

בעט איך אייך, האט רחמנות אויף אייך, אויף אייער מאן און אויף אייערע דורות הבאים; די צייט וכו' - איז נישטא קיין מעשיות, נישטא קיין תירוצים 'איך האב פארגעסן', 'איך האב נישט געוואוסט וכו'', היטס די הלכות וועט אייך גוט זיין.

ווייזט דעם בריוו פאר אייער מאן נרו יאיר וועט ער אויך האבן חיזוק צו זיין שטארק מיט די הלכות פון א אידישע שטוב, און ביידע וועלן זיך שטארקן איינער דעם צווייטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת משפטים, שובבי"ם, כ"ז שבט, שנת תשפ"ד לפרט קטן

לכבוד מיין טייערער ... נרו יאיר

פאריגע וואך האב איך זיך געטראפן מיט אליהו הנביא, צוויי מאל איז ער געקומען אין ישיבה ביי א ברית, און בשעת'ן זיין סנדק האב איך ספעציעל געבעטן פאר דיר און דיין ווייב, ער זאל רחמנות האבן אויף ענק און ענק געבן זרע של קיימא.

ביז דערווייל זאלסטו זיך זייער שטארקן, איך ווייס אז עס איז דיר זייער טונקל און ביטער שווער – דאך זאלסטו זיך שטארקן און גלייבן אז דער אייבערשטער וועט ענק נישט פארלאזן.

נעם זיך פאר עפעס טון לכבוד שבת, צום ביישפיל, שניידן די נעגל יעדע וואך לכבוד שבת; אז מען איז מכבד שבת זעט מען ישועות.

בעזרת ה' יתברך - יום ב' פרשת יתרו, שובבי"ם, י"ט שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

אז אייער טאכטער קומט אהיים זאגן אז מען טשעפעט איר, מען רופט איר 'עקלדיגע מיידל', מען זאגט איר זי האט א שלעכטע גערוך, זאלט איר רעדן צו די לערערינס זיי זאלן אכטונג געבן אז די מיידלעך זאלן איר נישט פארשעמען, אויך זאלט איר אכטונג געבן זי זאל זיך באדן און האבן א גוטע גערוך, און גיין אנגעטון שיין צאמגענומען.

בנוגע וכו'; אז דער שכן קומט מיטן האק און ברעכט אויף די טיר – זאלט איר גלייך רופן די פאליציי, ווארטס נישט קיין מינוט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת יתרו, שובבי"ם, י"ט שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

עס איז דא צוויי וועגן ווי אזוי צו מאכן קינדער פאלגן, איינס איז א גרינגע און שנעלע וועג, דורך באשטראפן און ארויסשיקן פון כיתה, אדער פארשפארן אין א ליידיגע צימער וכו', די צווייטע וועג איז א וועג וואס נעמט אביסל לענגער, דורך אויפהייבן און אויסלויבן, שמייכלען און געבן ווארעמקייט וכו'.

וואויל איז א לערערין וואס געבט גוטע ווערטער פאר יעדן קינד און ספעציעל די קינדער וואס פאלגן נישט גלייך, ווייל די קינדער וואס הערן נישט ווען מען זאגט זיי דאס ערשטע מאל - די קינדער דארפן מער גוטע ווערטער, זיי דארפן אזוי וויכטיג א שמייכל, זיי ווארטן אויף ווארעמקייט און הארץ פון די לערערין.

זיין א לערערין איז א חכמה, עס איז נישט געמאכט פאר יעדן איינעם, עס איז נישט אן ארבעט וואס יעדע ווייבל, יעדע מיידל וואס זוכט א פרנסה - מעג דאס טון; מען דארף צולייגן הארץ, ווארעמקייט, שמייכל און חכמה - ווי אזוי אויפצוהייבן און אויפצולעבן די קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת יתרו, שובבי"ם, י"ט שבט, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

שטארק זיך מיט אמונה, דער אייבערשטער מאכט נאר גוטס, עס איז זיכער נאר לטובה; מיר ווייסן נישט, מיר פארשטייען נישט און מיר קענען נישט פארשטיין פארוואס און פארווען, אבער מיר ווייסן אז דער אייבערשטער מאכט נאר גוטס.

דאנקט און לויבט דעם אייבערשטן פאר דיינע ליכטיגע קינדער, און שטארק דיין ווייב, זי איז אסאך מער צעבראכן וכו', פאר דיר איז דאס אויך זייער ווייטאגליך אבער פאר איר איז דאס נאך מער ווייטאגליך; זארגט נישט, איר וועט נאך האבן קינדער.

דורך דאנקען וועלן ענק זוכה זיין צו קינדער און קינד'ס קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בא, שובבי"ם, ז' שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

א סמארטפאון איז נישט גוט פאר אייך, איר ווילט דאך ערליכע קינדער, איר ווילט דאך הייליגע קינדער; זאלט איר נישט האבן קיין טעלעפאן.

א פרוי מיט א נישט גוטע טעלעפאן איז אזוי שרעקעדיג, מען פארלירט די גאנצע לעבן, די גאנצע שטוב צעפאלט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת בשלח, שובבי"ם, י"ג שבט, שנת תשפ"ד לפרט קטן

מרת ... תחי'

איך האב ערהאלטן אייער בריוו.

ווערט נישט דערשראקן פון וואס די דאקטוירים זאגן, זיי שרעקן אן אלעמען, זיי זאגן פאר יעדן עפעס א שרעקעדיגע זאך, נעמט עס נישט צום הארצן; א דאקטער האט רשות נאר צו מאכן גוט, א דאקטער האט נישט קיין רשות צו דערשרעקן.

זיי ווייסן גארנישט פון זייער לעבן צו זאגן, איר דארפט אייך גארנישט דערשרעקן פון וואס זיי שרעקן אן.

זאגט שמות הצדיקים. מוהרא"ש זאגט, ביי די חדשים וואס מען ווארט זאל מען זאגן "שמות הצדיקים" - נעמען פון צדיקים, און בעטן דעם אייבערשטן אז בזכות די הייליגע צדיקים זאל מען האבן גרינג דאס קינד. ווייל דער רבי זאגט (ספר המדות אות צדיק חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", דורכן דערמאנען די נעמען פון צדיקים - קען מען טוישן די טבע.

זאגט די נעמען יעדן טאג: אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך, שלמה המלך, רבי שמעון בר יוחאי, רבי יצחק לוריא אשכנזי, רבי ישראל בעל שם טוב, רבי נחמן בן פיגא מברסלב, רבי נתן מברסלב, מוהרא"ש מברסלב וכו' וכו', און נאך נעמען פון צדיקים וואס מען געדענקט, און נאכדעם די תפילה:

"יְהִי רָצוֹן מִלְּפָנֶיךָ אָבִי שֶׁבַּשָׁמַיִם, אִין דִי זְכוּת וָואס אִיךְ הָאבּ דֶערְמַאנְט דִי נֶעמֶען פוּן דִי צַדִּיקִים, בִּזְכוּת זֵייעֶר תּוֹרָה, זֵייעֶרֶע מַעֲשִׂים טוֹבִים אוּן זֵייעֶר מְסִירַת נֶפֶשׁ, וִוי זֵיי הָאבְּן זִיךְ מוֹסֵר נֶפֶשׁ גֶעוֶוען פַאר דַיינֶעט וֶועגְן, זָאלְסְטוּ מִיר הֶעלְפְן אִיךְ זָאל גֶעבּוֹירְן גְרִינְגֶערְהֵייט אַ גֶעזוּנְט קִינְד בְּרַמַ"ח אֵיבָרִים וּשְׁסָ"ה גִּידִים; אִיךְ זָאל זוֹכֶה זַיין אַרִיבֶּער צוּ גֵיין דִי אַלֶע טֶעג וָואס אִיךְ וַוארְט גְרִינְגֶערְהֵייט. נֶעם אַוֶועק פוּן מִיר אַלֶע מִינֵי עַיִן הָרַע'ס אַז קֵיינֶער זָאל מִיךְ נִישְׁט קֶענֶען שֶׁעדִיגְן. הֶעלְף מִיר אִיךְ זָאל זוֹכֶה זַיין צוּ הָאבְּן עֶרְלִיכֶע קִינְדֶער וָואס וֶועלְן טוּן דַיין וִוילְן זֵייעֶר גַאנְץ לֶעבְּן. הֵיילִיגֶער בַּאשֶׁעפֶער, הִיט מִיךְ אוּן הִיט דָאס קִינְד, דִי דָאקְטוֹרִים שְׁרֶעקְן מִיךְ אָן אַז עֶפֶּעס טוֹיג נִישְׁט אוּן דָאס מַאכְט מִיר אַזֶעלְכֶע פְּחָדִים אַז אִיךְ הַאלְט דָאס מַמָּשׁ נִישְׁט אוֹיס, גֶעבּ מִיר אַ גֶעזוּנְט קִינְד, אַ לִיכְטִיג קִינְד, אַ הֵיילִיג קִינְד. רִבּוֹנוֹ שֶׁל עוֹלָם הֶעלְף מִיר אִיךְ זָאל זַיין גֶעזוּנְט אוּן שְׁטַארְק מַיין גַאנְצֶע לֶעבְּן, אִיך זָאל אֵייבִּיג טוּן נָאר גוּטֶע מַעֲשִׂים וָואס דוּ וֶועסְט הָאבְּן פוּן דֶעם אַ נַחַת רוּחַ, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ, יְ"יָ צוּרִי וְגוֹאֲלִי, אָמֵן כֵּן יְהִי רָצוֹן".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת בא, שובבי"ם, ה' שבט, שנת תשפ"ד לפרט קטן

לכבוד מיין טייערער ... נרו יאיר

איך האב ערהאלטן דיין בריוו.

אז דיין ווייב איז יעצט אין א דעפרעסיע - דארפסטו איר היילן, א טערעפיסט קען נישט היילן, אבער דער מאן קען אויסהיילן. די הייליגע חכמים דערציילן (שבת קכט.): "בְּרַתֵּיהּ דְּרַב חִסְדָּא טָבְלָה בְּגוֹ תְּלָתִין יוֹמִין שֶׁלֹא בִּפְנֵי בַּעְלָהּ וְאִצְטְנִיאַתְּ", רבא'ס ווייב האט זיך פארקילט און זי איז קראנק געווארן, רבא איז דעמאלט נישט געווען אין שטוב, ער איז געווען אין ישיבה אין פומבדיתא (דעמאלט איז געווען דער סדר אז מען פלעגט אוועק פארן פאר א לאנגע צייט לערנען תורה), "וְאַמְטוּי לְעַרְסָה בַּתְרֵיהּ דְּרָבָא לְפוּמְבַּדִיתָא", האט מען איר געטראגן מיט איר בעט קיין פומבדיתא אין די ישיבה וואו רבא איז געווען ראש ישיבה און זי איז אויסגעהיילט געווארן; קוק נאך די גמרא, ודו"ק.

מיט שמחה קעסטו איר היילן, מיט ווערטלעך, מיט גוטע ווערטער, און בעיקר מיט אויסהערן, איר געבן די געפיל אז דו ביסט מיט איר און דו פארשטייסט איר.

אויך זאלסטו רעדן מיט איר אסאך ווערטער פון אמונה, דאס איז די איינציגסטע מעדעצין פאר דעפרעסיע; ווי מער מען חזר'ט 'אין עוד מלבדו, עס אזי גארנישט דא אויסער דעם אייבערשטן, אלעס איז דער אייבערשטער, ער מאכט אלעס, ער טוט אלעס, גארנישט פאסירט פון זיך אליינס, אז מען געבוירט א קינד איז דאס פונעם אייבערשטן, און אז מען איז מפיל איז דאס אויך פונעם אייבערשטן' - דער ווערט פרייליך, און אז מען פארגעסט פון אייבערשטן, מען טראכט 'איך מאך, איך טו, איך קען, איך ברענג קינדער, איך בין שולדיג' - דאס ווארפט אריין אין א דעפרעסיע.

יעצט איז נישט קיין צייט פון האבן קינדער, יעצט איז א צייט פון ווארטן. חכמינו זכרונם לברכה זאגן (פסחים כב:): "כְּשֵׁם שֶׁקִּבַּלְתִּי שָׂכָר עַל הַדְּרִישָׁה, כָּךְ קִבַּלְתִּי שָׂכָר עַל הַפְּרִישָׁה", יעדע זאך האט זיין צייט; עס איז דא עת ללדת, און עס איז דא צייטן פון מאכן זיכער אז די ווייב איז געזונט פיזיש און גייסטיש.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד מיינע טייערע ... שיחיו

ענק האבן קוים חתונה געהאט און שוין זענט איר באזארגט אויף קינדער; וואס דארפט איר זארגן? זארגן וועט אייך נישט העלפן, זארגן מאכט שוואך און אלט; אין ברסלב האט מען נישט אנגענומען די סגולה פון זארגן, אין ברסלב איז דא די סגולה פון שמחה, פון טאנצן, פאטשן און זינגען.

איך בעט ענק מיינע טייערע, באליבט ווי קינדער – זארגט נישט, מאכט אייך נישט משוגע מיט זארגן, זייט פרייליך, דאנקט און לויבט דעם אייבערשטן, געבט אוועק יעדן טאג א צייט פאר דאנקען און לויבן דעם אייבערשטן, און אויך אביסל צייט אויף טאנצן, און איר וועט זען גרויסע ניסים.

בעזרת ה' יתברך - יום ה' פרשת שמות, שובבי"ם, כ"ג טבת, שנת תשפ"ד לפרט קטן

לכבוד מיין טייערער ... נרו יאיר, צפת

איך האב ערהאלטן דיין בריוו.

איך פריי זיך זייער צו הערן אז דו ביסט עוסק אין הפצה, דו ביסט מזכה אידישע קינדער מיט די ספרים און קונטרסים וואס מוהרא"ש האט געשריבן, תמצית פון רבינ'ס ספרים.

מוהרא"ש ברענגט אין די בריוו אן א שיעור מאל די ווערטער פון הייליגן זוהר הקדוש (תרומה קכח:) "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע זאגט דער הייליגער זוהר, א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא, גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ, וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; דער מענטש נעמט אוועק טומאה פון דער וועלט, און ער מאכט אז דעם אייבערשטנ'ס נאמען זאל ווערן געהייליגט אויף דער וועלט, און דער מענטש איז גורם אז אלע וועלטן שטייען אויף זיין זכות, "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף די וועלט און אויף יענע וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכטס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן, עיין שם.

גיי ווייטער הפצה, גיי מיט א שטארקקייט, האב פון קיינעם נישט מורא, און זארג נישט וועגן קינדער; וועסט זוכה זיין צו קינדער, ליכטיגע אידישע דורות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויחי, ט"ו טבת, שנת תשפ"ד לפרט קטן

לכבוד ... נרו יאיר

וואס איז מיט דיר? וואס איז די שאלה בכלל?! אז דער אייבערשטער געבט דיר א מתנה - דארפסטו טאנצן פאר שמחה, אז דו ביסט געוואויר געווארן אז דיין ווייב ווארט למזל טוב און עס איז נישט געווען מיט ענקער הסכמה - דארפט איר טאנצן פאר שמחה; דאס ווייסטו וואס חכמינו זכרונם לברכה זאגן (נדה לא.): "שלשה שותפין יש באדם, הקדוש ברוך הוא ואביו ואמו", קומט אויס אז די חדשים וואס מען ווארט איז מען אין א שותפות מיטן אייבערשטן, און אז ענק האבן נישט געוואלט גיין מיט א שותפות מיטן אייבערשטן און דער אייבערשטער האט ענק בעל כרחך אריינגעשלעפט אין א שותפות - דארפן ענק טאנצן פאר שמחה און נישט אויפהערן דאנקען און לויבן דעם אייבערשטן.

דאס ווייסטו אודאי וואס דער הייליגער זוהר זאגט (פרשות שמות, דף ג): "תְּלָתָא אִינּוּן דְּדַחְיָין שְׁכִינְתָּא מֵעָלְמָא, וְגַרְמִין, דְּדִיוּרֵיהּ דְּקוּדְשָׁא בְּרִיךְ הוּא לָא הֲוֵי בְּעָלְמָא, וּבְנִי נָשָׁא צַוְוחִין וְלָא אִשְׁתְּמַע קַלֵּיהוֹן", עס איז דא א זינד וואס דאס מאכט אלע צרות אויף די וועלט און עס האלט צוריק אלע תפילות, און אפילו מען שרייט און מען וויינט, מען פאסט און מען מאכט אלע סגולות - איז דער זינד אזוי הארב אז דאס ברענגט אלע צרות און מען קען נישט מבטל זיין די צרות; אויב חס ושלום מען ציט זיך ארויס פון די שותפות אינמיטן די חדשים השם ישמרינו. ליידער ביי די אומות העולם, ביי די ליבעראלע, זיי זענען אזוי געמיין אז רצח'ענען און הרג'ענען רחמנא לצלן איז ביי זיי מותר, און זיי זענען גאר וואס שטעלן זיך ארויס צו זיין די העפליכע, השם ישמרינו, זאלסטו חס ושלום נישט טראכטן פאר איין רגע עפעס צו טון.

דאנק און לויב דעם אייבערשטן אז דו און דיין ווייב זענען כביכול שותפים מיטן אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויחי, ט"ו טבת, שנת תשפ"ד לפרט קטן

לכבוד מיין טייערער ... נרו יאיר וזוגתו תחי'

דאס וואס איר זענט אריבער השם ישמרינו דארף ענק מאכן טראכטן 'וואס קען מען מאכן עס זאל נישט פאסירן נאכאמאל?' זאלט איר מקפיד זיין אויף אפגיסן נעגל וואסער, אזוי וועלן נישט זיין ביי ענק אין שטוב רוחות רעות און שדים.

גייט נישט שלאפן נאר נאכן זיך אנגרייטן "נעגל וואסער", און ליינט קריאת שמע שעל המטה. חכמינו זכרונם לברכה זאגן (ברכות ה.): "כָּל הַקּוֹרֵא קְרִיאַת שְׁמַע עַל מִטָּתוֹ", ווער עס ליינט קריאת שמע פארן גיין שלאפן – "מַזִּיקִין בְּדֵלִין מִמֶּנּוּ", גייען אלע מזיקים אוועק פון אים, "שֶׁנֶּאֱמַר", אזוי ווי עס שטייט (איוב ה, ז): "וּבְנֵי רֶשֶׁף", די מזיקים, "יַגְבִּיהוּ", גייען אוועק, "עוּף", דורך תורה, דורך ליינען קריאת שמע.

איך זאג ענק צו, אז איר וועט זיין געווארענט אין די צוויי זאכן, נעגל וואסער און קריאת שמע – וועט איר זוכה זיין, איר וועט נישט פארלירן, און זוכה זיין צו זרע של קיימא.

בעזרת ה' יתברך - יום ג' פרשת ויגש, ז' טבת, שנת תשפ"ד לפרט קטן

לכבוד מיין טייערער ליבער הארציגער ... נרו יאיר

דו ווילסט געהאלפן ווערן מיט קינדער; נעם די עצה, די סגולה פון הייליגן רבי'ן, (ספר המידות אות בנים, סימן כב): "מַה יַּעֲשֶׂה אָדָם וְיִהְיֶה לוֹ בָּנִים", וואס קען א מענטש טון ער זאל זוכה זיין צו קינדער? "יְשַׂמַּח אֶת אִשְׁתּוֹ", ער זאל פרייליך מאכן זיין ווייב; ווייל א פרוי ציט זיך מער צו עצבות, א פרוי האט נישט קיין תורה וואס מאכט פרייליך, דארף דער מאן פרייליך מאכן.

ווארט נישט זי זאל דיך פרייליך מאכן, עס איז נישט איר חיוב דאס צו טון, עס איז דיין חיוב, עס איז דיין מצוה. זאלסט זיך נישט אויסטראכטן נאך א טאג ארבעט אז דו קומסט אהיים צו א ליכטיגע שטוב מיט א ווייב וואס די פנים שמייכלט און שיינט, און נאכדעם ווערן אנטוישט, ענדערש טראכט 'איך דארף אהיים גיין ליכטיג מאכן אין שטוב, פרייליך מאכן, מיין ווייב ווארט אויף מיין שמייכל' – וועסטו זוכה זיין צו א שטוב מיט קינדער און צו א פרייליכע שטוב.

בעזרת ה' יתברך - יום ב' פרשת ויגש, ו' טבת, שנת תשפ"ד לפרט קטן

מרת ... תחי'

מיין באבע רחל לאה טייטלבוים עליה השלום, מיין מאמע'ס מאמע, פלעגט זאגן פאר יעדן איינעם: "איך בין די רייכסטע"; ווען איך בין אריינגעקומען צו איר – האט זי מיר געזאגט: "איך בין די רייכסטע, איך האב געזונטע ערליכע קינדער, ווער איז רייכער...?"

זינגט אויך דעם ניגון: "איך בין די רייכסטע, איך האב געזונטע ערליכע קינדער"; דאנקט דעם אייבערשטן פאר אייער שיינע גארטן, טייערע ליכטיגע קינדער, דאס איז די גרעסטע פארמעגן.

מוהרא"ש פלעגט אונז שטענדיג זאגן, די ראשי תיבות פון 'עשיר' איז: ע'ינים, ש'ינים, י'דים, ר'גלים; איינער וואס האט אויגן, ציינער, הענט און פיס – איז רייך, און אז מען האט האט א דאך איבערן קאפ, מיט הייצונג, מיט ליכטיגע קינדער – איז מען טאקע רייך.