בריוון פונעם ראש ישיבה שליט"א

בעזרת ה' יתברך - יום ד' פרשת קרח, ב' תמוז, שנת תשפ"ג לפרט קטן

מרת ... תחי'

איך האב ערהאלטן אייער בריוו.

פארוואס אפערירן? מען מאכט נישט קיין אפערעישן נאר אז מען מוז.

אויך ווען איין דאקטער זאגט מען מוז - מאכט מען נאך אויך נישט, נאר מען פרעגט נאך א דאקטער.

קיינמאל מאכט מען נישט קיין אפעראציע ווען מען דארף נישט. מוהרא"ש זכותו יגן עלינו איז געווען זייער קעגן די אלע וואס פלעגן קומען פרעגן אויב מען זאל מאכן אפילו קליינע אפעראציעס וואס אלע מאכן, צום ביישפיל זיך קלענער מאכן די מאגן (סלי"וו) אדער זיך מאכן די אויגן וכו'; מוהרא"ש זכותו יגן עלינו זאגט: "מען לייגט זיך קיינמאל נישט אונטערן מעסער, און אפילו ווען א דאקטער זאגט מען מוז - פרעגט מען נאך א דאקטער".

דער אייבערשטער זאל העלפן אייער קינד זאל זיין געזונט און שטארק.

דורך מוותר זיין אין שטוב, דורך לעבן מיט ליבשאפט - ברענגט מען אריין די שכינה אין שטוב און מען זעט ניסים למעלה מן הטבע.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת קרח, ב' תמוז, שנת תשפ"ג לפרט קטן

לכבוד מיין טייערער ... נרו יאיר

איך האב ערהאלטן דיין בריוו.

בנוגע גיין שפאצירן מיט די ווייב אין גאס, דו פרעגסט וואס טוט מען מיט דעם וואס חכמינו זכרונם לברכה זאגן (ברכות מג:): "לא יספר אדם עם אשה בשוק, ואפילו היא אשתו", מען זאל נישט שמועסן אין גאס אפילו מיט די אייגענע ווייב, צוליב חשד וכו'; עס ווערט געברענגט אין די פוסקים (יוסף אומץ דיני נדה וערוה, סימן ח): "בעיירות קטנות כהנהו דידן בארץ אשכנז שרוב העולם מכירין בהן, שרי", אין די פלעצער וואו מיר וואוינען און די מענטשן ווייסן אז דאס איז די ווייב - איז מותר; עיין שם.

גיי אביסל שפאצירן מיט דיין ווייב, עס איז געזונט אין אלע בחינות; סיי פארן געזונט בגוף, סיי פארן געזונט בנפש און פארן שלום בית, און אז זי קרעכצט 'וואס וועט זיין מיט דאס?' 'וואס וועט זיין מיט יענץ?' זאלסטו איר אויסהערן און איר בארואיגן. שמועסט פון אמונה, שמועסט פון די ניסים וואס דער אייבערשטער האט געטון מיט אייך ביז אהער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת קרח, ג' תמוז, שנת תשפ"ג לפרט קטן

לכבוד ... נרו יאיר

ווען מען וויל אנטלויפן - אנטלויפט מען צום אייבערשטן, ווייל ערגעץ אנדערש - איז נישטא וואו צו לויפן. אלקאהאל העלפט נישט, עס מאכט מער ביטער, סמים - דראגס השם ישמרינו - זאל דער אייבערשטער אפהיטן, דאס איז אזוי ווי איינער זאל זיך אראפווארפן פון א בנין און זיך נעמען דאס לעבן השם ישמרינו; נישטא וואו צו אנטלויפן - נאר צום אייבערשטן, נאר צו די הייליגע תורה.

אז דיין ווייב דערביטערט דיך - זאלסטו נישט טראכטן אז עס וואלט דיר געקענט זיין בעסער אלס נישט חתונה געהאט, אדער אנדערע טריפה'נע מחשבות, מיט א צווייטן וואלט דיר געווען גרינגער; גלייב מיר, נישטא וואו צו לויפן - נאר צום אייבערשטן, קענסט קומען אין שול דאווענען און בעטן דעם אייבערשטן עס זאל דיר זיין גרינגער, עס זאל דיר ווערן בעסער.

היינט נאכט וועט זיין די וועכנטליכע שיעור, עס וועט זיין אביסל שפעטער ווי געווענליך; צוליב וואס מען בויט איבער דעם היכל בית המדרש פאר די בחורים פארן זומער, און איך וויל נישט שטערן די מנין מנחה מעריב פון שטעטל, וועט די שיעור זיין צען אזייגער.

איך בין נעכטן געקומען אין שטעטל; וואס זאל איך דיר זאגן, איך שפיר זיך דא אין שטעטל ווי אין גן עדן, א ריינע פלאץ, אנשי שלומינו מיט תמימות און פשיטות. מענטשן מיינען מיר זענען הולטייעס, מענטשן רעדן אויף אונז אז דא איז א פלאץ פון הפקירות, איך בין אזוי שטאלץ מיט אונזער קהילה; אזא ריינקייט, אזא הייליגקייט.

איך וועל דיר בלי נדר שרייבן מער באריכות, איך יאג זיך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת קרח, ד' תמוז, שנת תשפ"ג לפרט קטן

לכבוד ... נרו יאיר

לאז נישט דעם שטן ביי דיר אין שטוב, פארטרייב אים, בעט זיך איבער מיט דיין ווייב און גיי אריין מיט א שמחה אין שבת קודש.

פרייטאג צו נאכטס ביי די סעודה און אזוי אויך שבת צופרי ביי די סעודה - זאלסטו נאר זיין פרייליך, חס ושלום זיין בעצבות ומרה שחורה.

אשרינו אז מיר האבן א רבי וואס איז אונז מחזק און לאזט אונז נישט פאלן.

א פרייליכן שבת.

בעזרת ה' יתברך - יום א' פרשת פנחס, י"ג תמוז, שנת תשפ"ג לפרט קטן

מרת ... תחי'

איך פריי זיך זייער צו הערן פון אייער מאן נרו יאיר אז איר לעבט מיט אים וכו', און אפילו עס איז איך נישט גרינג וכו' און איר האט נישט קיין טעם וכו' - דאך טוט איר די ווילן פונעם אייבערשטן און איר גייט אפילו קעגן אייער ווילן.

דאס איז וואס די הייליגע חכמים זאגן (תנא דבי אליהו רבא, פרק ט): "אֵיזוֹהִי אִשָׁה כְּשֵׁרָה", ווער איז אן ערליכע פרוי - אן אשה כשרה? "כָּל שֶׁעוֹשֶׂה רְצוֹן בַּעֲלָהּ", די פרוי וואס טוט די רצון פונעם מאן.

דער אייבערשטער זאל אייך באצאלן מיט ערליכע דורות, און יהי רצון - שתשרה שכינה במעשה ידיכם.

איר האט א טייערער מאן, ער רעדט זיך קיינמאל אפ, אפילו ווען עס גייט אריבער אסאך צייט וואס מען לעבט נישט אינאיינעם - איז ער פרייליך און דינט דעם אייבערשטן.

בעזרת ה' יתברך - מוצאי שבת קודש פרשת חקת בלק, י"ב תמוז, שנת תשפ"ג לפרט קטן

מרת ... תחי'

טוט די רצון פונעם אייבערשטן, לעבט מיט אייער מאן וכו', און אז עס איז אייך שווער - זאלט איר זיך דערמאנען פון די הייליגע אמונה; אז מיר טוען נאר וואס דער אייבערשטער זאגט, און ווער עס טוט די ווילן פונעם אייבערשטן - דער מענטש וועט זוכה זיין צו בנים ובני בנים, ליכטיגע דורות.

חכמינו זכרונם לברכה זאגן (תנא דבי אליהו רבא, פרק ט): "אֵיזוֹהִי אִשָׁה כְּשֵׁרָה? כָּל שֶׁעוֹשֶׂה רְצוֹן בַּעֲלָהּ", די פרוי וואס טוט רצון בעלה - די ווילן פונעם מאן.

איר האט זוכה געווען צו א טייערער מאן, א ירא שמים און א גוטע הארץ מיט גאלדענע מידות; ער בעט מיר ער וויל זיין ערליך, ער וויל זיין אפגעהיטן, ער דארף א ווייב.

וואויל איז די פרוי וואס היט איר מאן, וועט זי זוכה זיין צו גאר א גרויסע שכר.

בעזרת ה' יתברך - יום ג' פרשת קרח, ב' דראש חודש תמוז, שנת תשפ"ג לפרט קטן

לכבוד ... נרו יאיר

ווילסט וויסן ווי אזוי דיין בחור וועט זיך פירן, וואס פאר א טעלעפאן ער וועט האבן אין טאש? קוק אין שפיגל, אזוי ווי דיר; ווי אזוי דו פירסט זיך - אזא טעלעפאן, מיט אזעלכע ווערטלעך, אלעס אלעס, פונקט אזוי, מיט פראצענט - וועלן זיי זיין, דעריבער האב שכל, טו זיך אליין א טובה און לאז אפ די שטותים.

זאלסט נישט קומען מיט טענות: 'מיין זון קוקט מאוויס', 'מיין זון קוקט סטעטוס', 'מיין זון איז פאר'כישופ'ט צום טעלעפאן וכו' וכו'' ווייל אזוי גייט עס, "כְּאִמָּה בִּתָּהּ" (תנחומא וישלח, ז), אזוי ווי די מאמע - אזוי איז די טאכטער, און אזוי ווי דער טאטע - אזוי איז דער זון.

היינט ראש חודש תמוז, ווען מיר קומען שוין נענטער צום סוף יאר, מיר גרייטן זיך שוין צום רבינ'ס ראש השנה - מאך די ריכטיגע החלטה, לאז אפ די געטשקע, גיי ארויס פון דיין גלות.

נעכטן שרייבט מיר א ווייבל ווי ביטער עס איז איר, זי איז פארקנעכטעט צום טעלעפאן, זי האט נישט קיין געדולד פאר גארנישט; נישטא קיין וועש, נישטא קיין קינדער, נישטא גארנישט, נאר מאוויס; זי וויינט זי וויל ארויסגיין פון איר תפיסה, זי קען נעבעך נישט, סיי זי, סיי איר מאן, ביידע זענען ארעסטירט ביי די נישט גוטע.

א אינגערמאן פון אנשי שלומינו פון בארא פארק זאגט מיר: "איך בין ארויס פון מיין תפיסה, איך האב אוועק געווארפן דעם געטשקע; עס איז מיר געווען ביטער שווער, צוויי וואכן האב איך געמיינט איך ווער משוגע פון זיין יעדע רגע צוגעקלעבט צום וואטס-עפפ, אבער יעצט בין איך אן אויסגעלייזטער מענטש, איך האב אסאך צייט; איך האב צייט צו לערנען, איך קען טראכטן, איך הער מיין ווייב רעדן צו מיר, איך הער מיינע קינדער'ס ווערטלעך, און אזוי ווייטער".

נעם א גמרא און לערן דעם בלאט, זאג די ווערטער - וועסטו זוכה זיין צו ווערן א צדיק.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ב' פרשת קרח, א' דראש חודש תמוז, שנת תשפ"ג לפרט קטן

לכבוד מיין טייערע ליבער ... נרו יאיר

איך האב ערהאלטן דיין בריוו.

גיי אביסל שפאצירן יעדן טאג מיט דיין ווייב, שמועס מיט איר, מאך איר פרייליך, מאך איר לאכן; דאס וועט איר געבן פרישע כוחות, ביז זי וועט ווערן אינגאנצן געזונט.

די דאקטורים זאגן דאך אז זי איז געזונט, עס איז אלעס אין מח; אז דו וועסט איר פרייליך מאכן און דו אליין וועסט אויך זיין פרייליך - וועט זי זיין געזונט און שטארק. ווייל דער הייליגער רבי זאגט (לקוטי מוהר"ן חלק ב', סימן כד): "מִצְוָה גְּדוֹלָה לִהְיוֹת בְּשִֹמְחָה תָּמִיד", עס איז א גרויסע מצוה צו זיין שטענדיג פרייליך, "וּלְהִתְגַּבֵּר לְהַרְחִיק הָעַצְבוּת וְהַמָּרָה שְׁחֹרָה בְּכָל כֹּחוֹ", און אוועק נעמען פון זיך די עצבות און מרה שחורה מיט אלע כוחות.

"וְכָל הַחוֹלַאַת הַבָּאִין עַל הָאָדָם, כֻּלָּם בָּאִין רַק מִקִּלְקוּל הַשִֹֹּמְחָה", אלע מחלות און קרענק וואס קומען אויפן מענטש - קומט נאר צוליב עצבות און מרה שחורה, און דער רבי זאגט ווייטער: "וְגַם חַכְמֵי הָרוֹפְאִים הֶאֱרִיכוּ בָּזֶה, שֶׁכָּל הַחוֹלַאַת עַל יְדֵי מָרָה שְׁחֹרָה וְעַצְבוּת, וְהַשִֹֹּמְחָה הוּא רְפוּאָה גְּדוֹלָה", אויך די דאקטורים זענען מודה אז אלע פראבלעמען און קרענק קומען פון נישט זיין פרייליך, און שמחה איז א רפואה פאר אלע קרענק; ווען א מענטש איז פרייליך - נעמט ער אוועק פון זיך אלע צרות און יסורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שלח, כ"ג סיון, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

איך האב דיך שוין לאנג נישט געזען, איך האף אז דו האסט זיך נישט באליידיגט פון וואס איך האב דיר געזאגט יום טוב שבועות, אז דו זאלסט העלפן דיין ווייב מיט די קינדער.

דו בעטסט מיר שטענדיג איך זאל דיר זאגן ווי אזוי זיך צו פירן אין שטוב, דעריבער האב איך דיר געזאגט; אבער אויב עס איז דיר צו שטארק נישט אנגענעם - וועל איך נישט זאגן.

ברודער, איך וויל נאר דו זאלסט האבן לעבן, שלום בית, נחת; איך בין נישט מרוויח פון דעם, דאס איז נאר פאר דיר.

ברודער שטארק זיך, העלף דיין ווייב מיט עבודת החינוך, עס איז די העכסטע עבודה צו מחנך זיין די קינדער, זיי זאלן ליב האבן דעם אייבערשטן און גיין אין די תורה וועג.

בעזרת ה' יתברך - יום ה' פרשת שלח, כ"ו סיון, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

עס טוט מיר זייער וויי צו הערן אז דו ביסט נאכאלץ שטעקן געבליבן מיט די מחשבות, נאכן רעדן מיט דיר שוין פאר אפאר חדשים צוריק; דו האסט א טייערע ווייב, אן אשת חיל, א מתנה פונעם אייבערשטן, זי איז א גרויסע צדיקת. דאס וואס דו טראכסט חשדות אויף איר - איז נעבעך א נערוון זאך, זי איז אן ערליכע פרוי, א צדיקת.

זאלסט וויסן אז די סארט מחשבות פון חושד זיין די ווייב וכו' - זענען פון די סטרא אחרא; זיי ווילן דיך פארכאפן אין זייער נעסט, איך ציטער אויב דו וועסט פארכאפט ווערן ביי זיי.

נעם די עצה פון רבי'ן, גיי יעדן טאג שרייען צום אייבערשטן ער זאל דיך ראטעווען פון די קליפות, זאג:

"רבונו של עולם מאך מיך פרייליך, רבונו של עולם מאך מיך געזונט. עס בוזשעוועט מיר די קאפ, איך טראכט א גאנצן צייט חשדות אויף מיין ווייב, אנשטאט איך זאל אנערקענען די מתנה וואס איך האב באקומען פון דיר; א טייערע ווייב, אן ערליכע ווייב - פייניג איך זיך אז זי איז נישט ערליך, און דאס לאזט מיך ממש נישט לעבן.

אנא ה' איך בעט דיר אייבערשטער, העלף מיר, נעם מיך ארויס פון שאול תחתית. נעם מיך ארויס פון די קליפות, פארטרייב די רוח רעה וואס איז אריין אין מיר, בזכות דיינע הייליגע צדיקים וואס האבן זיך מוסר נפש געווען פאר דיינעט וועגן. בזכות רבי שמעון בר יוחאי, בזכות האריז"ל, בזכות הבעל שם טוב זכותו יגן עלינו, בזכות רבינו נחמן בן פיגא ותלמידיו הקדושים ובזכות רבינו אליעזר שלמה בן מלכה זכותו יגן עלינו.

מִזְמוֹר לְדָוִד הָבוּ לַה' בְּנֵי אֵלִים הָבוּ לַה' כָּבוֹד וָעֹז, הָבוּ לַה' כְּבוֹד שְׁמוֹ הִשְׁתַּחֲווּ לַה' בְּהַדְרַת קֹדֶשׁ. קוֹל ה' עַל הַמָּיִם אֵל הַכָּבוֹד הִרְעִים ה' עַל מַיִם רַבִּים. קוֹל ה' בַּכֹּחַ קוֹל ה' בֶּהָדָר. קוֹל ה' שֹׁבֵר אֲרָזִים וַיְשַׁבֵּר ה' אֶת אַרְזֵי הַלְּבָנוֹן. וַיַּרְקִידֵם כְּמוֹ עֵגֶל לְבָנוֹן וְשִׂרְיֹן כְּמוֹ בֶן רְאֵמִים. קוֹל ה' חֹצֵב לַהֲבוֹת אֵשׁ. קוֹל ה' יָחִיל מִדְבָּר יָחִיל ה' מִדְבַּר קָדֵשׁ, קוֹל ה' יְחוֹלֵל אַיָּלוֹת וַיֶּחֱשֹׂף יְעָרוֹת וּבְהֵיכָלוֹ כֻּלּוֹ אֹמֵר כָּבוֹד, ה' לַמַּבּוּל יָשָׁב וַיֵּשֶׁב ה' מֶלֶךְ לְעוֹלָם, ה' עֹז לְעַמּוֹ יִתֵּן ה' יְבָרֵךְ אֶת עַמּוֹ בַשָּׁלוֹם".

אויך זאלסטו זאגן יעדן טאג מזמור כט פון תהילים. דער רבי זאגט (ספר המדות אות קליפה, סימן ו): "הַשִּׁבְעָה קוֹלוֹת שֶׁאָמַר דָּוִד עַל הַמַּיִם, בְּדִבּוּרָן מַכְנִיעִין הָרוּחַ רָעָה", דער קאפיטל איז מסוגל אוועק צו טרייבן א רוח רעה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת בהעלותך, ט"ז סיון, שנת תשפ"ג לפרט קטן

... תחי', תלמידה בית פיגא ירושלים

איך האב ערהאלטן אייער בריוו.

איר האט זייער טייערע עלטערן, אייער טאטע איז א גרויסער עובד ה', און אייער מאמע איז אן ערליכע פרוי, פון די נשים צדקניות אין אונזער דור. שטאלצירט מיט אייערע עלטערן, אפילו זיי געהערן נישט אין היכל הקודש; דאנקט דעם אייבערשטן יעדן טאג פאר אזעלכע עלטערן און זייט ביידע מכבד מיט גרויס פרייד.

בנוגע א שידוך וכו'; בעטס פאר א גוטן מאן, א מאן א ירא שמים מיט הייליגע דורות, בעטס נישט אויף א בחור פון ישיבה, בעטס פאר השראת השכינה, אז ביי אייך אין שטוב זאל רוען די שכינה, ביי אייך אין שטוב זאל מען לעבן מיט שלום און מיט ליבשאפט.

היכל הקודש איז עצות, שכל און חיזוק ווי אזוי צו לעבן מיטן אייבערשטן, גארנישט מער און גארנישט ווייניגער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת בהעלותך, י"ז סיון, שנת תשפ"ג לפרט קטן

מרת ... תחי' ברסלב, ליבערטי

איך האב ערהאלטן אייער בריוו.

שטארקט אייך מיט אלע כוחות אז אייער שטוב זאל נישט צעפאלן, און אז עס איז אייך ביטער שווער - זאלט איר ארויפקוקן צום אייבערשטן און אים בעטן ער זאל העלפן עס זאל גרינגער ווערן.

ווארטס נישט אייער מאן זאל אייך איבערבעטן וכו' וכו'; איר זאלט ווייטער זיין פרייליך און ווייטער זיין געטריי צו אים און צו די קינדער.

עס איז דא א ווארט פון הייליגן רבי'ן: "אז מען וויל נישט ליידן אביסל - ליידט מען אסאך"; די ווארט איז אזוי אמת, אזוי הייליג; ווייל יעדער איינער אויף די וועלט ליידט, נישטא אזא זאך מען זאל נישט ליידן; נאר וואס דען, דער וואס לעבט מיטן אייבערשטן, ווען עס גייט אים עפעס אריבער, אן איבערגייאכץ - ווייסט ער אז דאס איז פונעם אייבערשטן, איז אים גרינגער צו ליידן; אבער אז מען אנטלויפט פון די תורה, מען אנטלויפט פונעם אייבערשטן - ווערט שפעטער גאר ביטער.

וויפיל ווייבלעך גרושות זאגן קלאר, ווען מיר וואלטן געוויסט ווי שווער עס וועט אונז זיין - וואלטן מיר געבליבן ליידן דאס ביסל.

איך האף די פאר ווערטער וועט אייך געבן חיזוק און איר וועט האלטן אייער שטוב שטארק, איר וועט זיין פון די נשים צדקניות וואס ווערן פארשריבן אין הימל אז זיי האבן געבויט זייער שטוב מיט מסירת נפש פארן אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת בהעלותך, י"ח סיון, שנת תשפ"ג לפרט קטן

לכבוד ... נרו יאיר ברסלב, ליבערטי

זיי מחזק דיין ווייב זי זאל גיין אנגעטון איידל; שלעפ איר נישט אראפ, מאך איר נישט משוגע צו גיין אנגעטון פראסט.

עס איז גוט פאר איר און פאר דיר אז זי ארבעט אין אונזער סקול, אין בית פיגא; אבער מיר קענען נישט זיין פארנומען מיט אירע קליידער, מיר דארפן אז אלע אונזערע ארבעטערס זאלן וויסן ווי אזוי צו קומען אנגעטון שיין איידל.

זיי איר מחזק זי זאל גיין אנגעטון ווי אלס מיידל, איידל און שיין, שלעפ איר נישט אראפ; חס וחלילה אז די ווייב ווארפט אוועק פון זיך די שיינע מידה פון צניעות, דאן צעפאלט די גאנצע שטוב.

זיי שטארק מיט דאווענען אין שול די דריי תפילות און אויך מיט די בלאט גמרא; דאווען די דריי תפילות אין שול און לערן א בלאט גמרא אין שטוב, דאס וועט דיך העלפן אין אלעס, ברוחניות ובגשמיות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת בהעלותך, ט"ו סיון, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

חכמינו זכרונם לברכה זאגן (נדה לא.): "אֵין בַּעַל הַנֵּס מַכִּיר בְּנִסוֹ", דער בעל הנס כאפט אליינס נישט די ניסים וואס דער אייבערשטער מאכט מיט אים; איך מיין דו כאפסט נישט די גרויסע נס וואס דער אייבערשטער האט מיט דיר געמאכט, דו האסט אן אשת חיל מיט ליכטיגע קינדער, שלא כדרך הטבע, דארפסטו מכיר טוב זיין דעם באשעפער.

ווי אזוי איז מען מכיר טוב? דורכדעם וואס מען פאלגט וואס דער רבי האט אונז געלערנט (שיחות הר"ן, סימן רסד) צו מכבד זיין די ווייב; רעדן שיין, ווייך און הארציג. דיין ווייב ווארט דו זאלסט איר געבן ליבשאפט און ווארעמקייט; עס קומט איר, געב איר גוטע ווערטער.

טייערער ברודער, גיי אביסל התבודדות, מאך זיך א חשבון הנפש, בעט דעם אייבערשטן ער זאל רחמנות האבן אויף דיר, ער זאל דיך מקרב זיין צו אים. וואוינסט דאך צווישן די ביימער און גראז; זאלסטו יעדן טאג שפאצירן אפאר מינוט און זיך אויסשמועסן מיט אים.

זיי מכבד דיין שווער און שוויגער. ווען דו גייסט שבת צו זיי - זאלסטו זיצן מיט דרך ארץ, אזוי ווי דו ווילסט דיינע איידעמער זאלן זיצן ביי דיין שבת טיש. פארגעס נישט, דו געבסט זיך איין דריי און דו האסט איידעמער, וואס וועסטו דעמאלט טון...?

בעזרת ה' יתברך - יום א' פרשת בהעלותך, ט"ו סיון, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

חכמינו זכרונם לברכה זאגן (נדה לא.): "אֵין בַּעַל הַנֵּס מַכִּיר בְּנִסוֹ", דער בעל הנס כאפט אליינס נישט די ניסים וואס דער אייבערשטער מאכט מיט אים; איך מיין דו כאפסט נישט די גרויסע נס וואס דער אייבערשטער האט מיט דיר געמאכט, דו האסט אן אשת חיל מיט ליכטיגע קינדער, שלא כדרך הטבע, דארפסטו מכיר טוב זיין דעם באשעפער.

ווי אזוי איז מען מכיר טוב? דורכדעם וואס מען פאלגט וואס דער רבי האט אונז געלערנט (שיחות הר"ן, סימן רסד) צו מכבד זיין די ווייב; רעדן שיין, ווייך און הארציג. דיין ווייב ווארט דו זאלסט איר געבן ליבשאפט און ווארעמקייט; עס קומט איר, געב איר גוטע ווערטער.

טייערער ברודער, גיי אביסל התבודדות, מאך זיך א חשבון הנפש, בעט דעם אייבערשטן ער זאל רחמנות האבן אויף דיר, ער זאל דיך מקרב זיין צו אים. וואוינסט דאך צווישן די ביימער און גראז; זאלסטו יעדן טאג שפאצירן אפאר מינוט און זיך אויסשמועסן מיט אים.

זיי מכבד דיין שווער און שוויגער. ווען דו גייסט שבת צו זיי - זאלסטו זיצן מיט דרך ארץ, אזוי ווי דו ווילסט דיינע איידעמער זאלן זיצן ביי דיין שבת טיש. פארגעס נישט, דו געבסט זיך איין דריי און דו האסט איידעמער, וואס וועסטו דעמאלט טון...?

בעזרת ה' יתברך - יום א' פרשת בהעלותך, ט"ו סיון, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

איך האב זייער הנאה אז דו ביסט מצליח מיט פרנסה, דו ארבעטסט נישט פאר יענעם, דו ארבעטסט פאר זיך און צוביסלעך גייסטו ארויס פון דיינע חובות; דער אייבערשטער זאל העלפן זאלסט האבן גרויס שפע.

איין זאך, געב אכטונג נישט צו ארבעטן אין די שפעטע שעות, עס לוינט נישט די ארבעט אויב איז דאס אויף די חשבון פון די ווייב און קינדער. זעקס אזייגער זאלסטו זיין אין שטוב, העלפן דיין ווייב לייגן שלאפן די קינדער, עס נאכטמאל און גיי אין שול; זיי זיך קובע א צייט צו לערנען.

הלוואי וועסטו מיך פאלגן מיט די זאך, נישט ארבעטן נאך זעקס אזייגער. דו האסט מיך געפאלגט ביז אהער אין לעבן, ברוך ה' איך האב דיך נישט פארפירט; האסט שיין חתונה געהאט, האסט טייערע זיסע קינדער, יעצט אז דו וועסט טון וואס שטייט אין די בריוו, זיין אין שטוב זעקס אזייגער העלפן די ווייב, איר מחזק זיין, איר געבן אפאר גוטע ווערטער - וועסטו האבן גרויס הצלחה.

בעזרת ה' יתברך - ערב שבת קודש פרשת נשא ב', י"ג סיון, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

טענה נישט מיט קיינעם און זיכער נישט מיט דיין ווייב; וואס איז זי שולדיג אז מען העצט איר אויף קעגן דעם הייליגן רבי'ן...? דו גיי דיין וועג, און אז מען רעדט אויפ'ן הייליגן רבי'ן, און מען רעדט אויף מוהרא"ש - זאלסטו זיך נישט טענה'ן.

ווער רעדט אויפן רבי'ן? ווער רעדט אויף היכל הקודש? נאר בעלי עבירה, און אפילו זיי זעען אויס פון אינדרויסן ווי גרויסע מענטשן - זאלסטו וויסן דאס זענען אלע בעלי עבירה.

אזוי מוז זיין. דער רבי האט דערציילט (סיפורי מעשיות, מעשה ז') איידער זיין נשמה איז אראפגעקומען אויף די וועלט האט דער סמ"ך מ"ם געשריגן: "רבונו של עולם, אויב די נשמה קומט אראפ אויף די וועלט - פארוואס האסטו מיך באשאפן?!" האט מען אים געענטפערט: "די נשמה מוז אראפקומען אויף די וועלט, דו גיי און זוך דיר אן עצה". איז ער אוועק געגאנגען און ער איז צוריק געקומען מיט אן אלטיטשקן, זיי האבן געלאכט און געזאגט אז זיי האבן שוין אן עצה, און דאס איז די עצה פונעם סמ"ך מ"ם, מען לאכט פונעם רבי'ן און מען שפעט אפ פון ברסלב'ער חסידים.

אבער באמת איז דאס נישט אמת; די אלע לשון הרע'ס וואס מען רעדט אויפ'ן רבי'ן - איז נישט אמת. אזוי ווי דער רבי האט געזאגט (שיחות הר"ן, סימן קפב): "עָלַי אֵין חוֹלְקִים כְּלָל, רַק הֵם חוֹלְקִים עַל מִי שֶׁעָשָׂה כָּךְ, כְּמוֹ שֶׁבּוֹדִים הַחוֹלְקִים עָלָיו, וְעַל אִישׁ כָּזֶה בְּוַדַּאי רָאוּי לַחֲלֹק", אויף מיר קריגן זיי נישט, זיי קריגן אויף איינעם וואס מען זאגט אויף אים די אלע לשון הרע'ס, און אויף אים דארף מען קריגן, אויף אזא איינעם קריג איך אויך; דער רבי האט געזאגט: "זֵייא הָאבִּין זִיךְ אוֹיס גִּישְׁנִיצְט אַ מֶענְטְשׁ, אִין קְרִיגְן אוֹיף אִיהם", אויף אים קריג איך אויך.

טענה נישט מיט דיין ווייב; דו בעט דעם אייבערשטן זאלסט קענען זיין ראש השנה ביים רבי'ן, אבער נישט טענה'ן מיט איר. זי איז נישט שולדיג, שולדיג זענען די מנהיגים וואס שפעטן פון רבי'ן, זיי האבן מורא אז זיי וועלן בלייבן אן מנין, זיי האבן מורא אז זיי וועלן נישט האבן ראש השנה קיין חסידים. עס וועט זיי סיי ווי נישט העלפן, ביים סוף וועלן אלע קומען צום רבי'ן, אלע וועלן זוכה זיין צו די תיקונים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת נשא ב', י"ג סיון, שנת תשפ"ג לפרט קטן

מרת ... תחי'

איך האב ערהאלטן אייער בריוו.

איך פריי זיך זייער צו הערן אז איר זאגט תהילים און איר האט יעצט געענדיגט די ערשטע מאל ספר תהילים. דער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה, יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה", ווער עס וויל תשובה טון - זאל זאגן תהילים, תהילים ברענגט נאנט צום אייבערשטן, תהילים ווייזט דעם מענטש א וועג אין לעבן ווי אזוי צו זיין גוט.

איך פריי זיך זייער צו הערן אז איר האט א גוטע שלום בית, איך הער אזויפיל צרות יעדן טאג, אזויפיל פראבלעמען, און ווען איך האב געליינט אייער בריוו און געזען ווי גוט עס איז אייך, ווי דאנקבאר איר זענט און ווי איר לויבט דעם אייבערשטן פאר אייער מאן - האט דאס מיר זייער דערפריידט.

זארגט נישט, איר וועט האבן קינדער, און ווען עס קומען אריין מחשבות פונעם יצר הרע, נעגעטיווע מחשבות אז 'אפשר נישט', זאלט איר אריינלייגן אפאר פרוטות אין די פושקע און בעטן א קורצע תפילה: "הייליגער באשעפער, העלף מיר איך זאל האבן ערליכע קינדער, געזונטע קינדער".

טראכטס נישט נעגעטיווע מחשבות, טראכטס פאזעטיוו, טראכטס 'נאך אביסל האב איך א קינד און עס וועט זיין אזוי פרייליך און אזוי גוט'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ערב שבת קודש פרשת נשא ב', י"ג סיון, שנת תשפ"ג לפרט קטן

מרת ... תחי'

זייער גוט אז איר האט אנגעהויבן רעדן אידיש אין שטוב, אזוי וועלן די קינדער קענען די שפראך. אידיש איז א הייליגע שפראך, איז כדאי צו רעדן אין שטוב אידיש, אז די קינדער זאלן אויפוואקסן מיט די שפראך. מאכט זיך נישט צו טון פון די וואס לאכן און שפעטן; מען טוט וואס איז ריכטיג, נישט וואס די משפחה טוט.

דאנקט דעם אייבערשטן פאר אזא טייערע מאן וואס איר האט באקומען, און פון היינט איז דא א נייע משפחה: איר, אייער מאן און נאך אביסל אייערע קינדער און אייניקלעך; איר דארפט נישט פרעגן יעדע ברודער און יעדע שוועסטער וואס צו טון וכו' וכו'.

זאגט תהילים, אביסל איז אויך גוט. דער הייליגער רבי האט געזאגט (חיי מוהר"ן, סימן תפה): "א קאפיטל תהילים איז אזוי ווי א גוטע פאנטש", ווען מען איז הייס, מען איז גוט אויסגעדארשט - איז מען זיך מחי' מיט א גלעזל טרינקען.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת נשא א', ג' סיון, מ"ז לעומר, שנת תשפ"ג לפרט קטן

לכבוד ... נרו יאיר

מזל טוב, מזל טוב! דער אייבערשטער זאל העלפן די שידוך זאל זיין א קשר של קיימא, זאלסט אויפשטעלן שיינע, ערליכע, אידישע דורות.

איך בין גרייט ענק צו באגלייטן, קענסט מיך פרעגן אלע דיינע פראגעס און מיטן אייבערשטנ'ס הילף וועל איך דיר ענטפערן.

דערצייל נישט פאר דיין כלה נאר גוטע זאכן; רעד נישט איבריגע רייד, רעד נישט פון דיין עבר, און פון שוואכקייטן; רעד נאר פאזעטיוו, אזוי וועט זי דיר ארויפקוקן און שעצן.

אויך זאלסטו חס ושלום נישט רעדן קעגן אירע עלטערן, אפילו זי אליינס וויינט און דערציילט ווי מען האט איר נישט געלאזט טון דאס און דאס וכו' וכו' - זאלסטו נישט אנהויבן רעדן קעגן זיי; הער איר אויס און שוין.

גיי דאווען דריי מאל א טאג די דריי תפילות מיט מנין - וועסטו האבן גרויס הצלחה אין לעבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

                   יום ג' פרשת נשא א', ג' סיון, מ"ז לעומר, שנת תשפ"ג לפרט קטן

מרת ... תחי'

איך פריי זיך צו הערן אז דאס לעבן ווערט ביי אייך אין שטוב בעסער און בעסער, מיט אייער חכמת נשים בויט איר ווייטער אייער שטוב.

 בנוגע וואס אייער מאן מאכט נאך אייער טאטע וכו'; איר זענט גענוג קלוג און געלונגען זיך נישט וויסנדיג מאכן וכו', און ווען ער הויבט אן נאכמאכן אייער טאטע, ער מאכט נאך ווי אזוי ער רעדט און ווי אזוי ער קלאפט – דארפט איר קענען שפילן תמ'עוואטע און ווייטער אנגיין כאילו מען מיינט נישט אייך, ביז עס וועט זיך ענדיגן די זאך.

וואויל איז די פרוי וואס בויט איר שטוב מיט מסירת נפש, וועט זי זוכה זיין צו זיצן אין גן עדן מיט אלע צדקניות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

                   יום ג' פרשת נשא א', ג' סיון, מ"ז לעומר, שנת תשפ"ג לפרט קטן

מרת ... תחי'

איך האב ערהאלטן אייער בריוו.

איך פריי זיך צו הערן אז איר זענט א געטרייע ווייב, איר מאכט יעדן טאג עסן, אפילו עס איז אייך שווער, און אז איר זענט שטענדיג גרייט פאר אייער מאן וכו' וכו'; דאס איז אן אישה כשירה, דאס איז אן ערליכע פרוי העושה רצון בעלה, וואס טוט דעם מאן'ס ווילן.

זייט שטארק, זייט א גוטע ווייב, לאזט נישט אריין די טעלעפאן אין שטוב. זאגט אייער מאן אז אויף דעם קענט איר נישט מוותר זיין; אלעס איז פיין, אלעס איז וואויל, אבער אין שטוב זאל נישט אריין קומען די מלאך המות.

ווי אזוי איר וועט אוועק שטעלן אייער שטוב יעצט נאך די חתונה - אזוי וועט עס זיין; אז מען הויבט אן נישט גוט, שפעטער איז שוין זייער שווער צוריק צו דרייען.

אייער מאן איז טייער און וואויל, אבער ער דארף אייער שטארקייט. איר קענט אים האלטן אין פארעם, איר קענט אוועק שטעלן א שיינע חסידי'שע שטוב.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

   יום א' פרשת נשא א', ראש חודש סיון, מ"ה לעומר, שנת תשפ"ג לפרט קטן

לכבוד ... נרו יאיר

אנשטאט ווארפן די שולד אויף די ווייב און זאגן אז זי איז דער פראבלעם - זאלסטו ענדערש תשובה טון. ווייל דער הייליגער בעל שם טוב זכותו יגן עלינו זאגט: "ווען א מענטש איז פוגם במחשבה, ער טראכט שלעכטע זאכן - ליידט ער נאכדעם צרות פון זיינע אייגענע קינדער, ווען א מענטש איז פוגם בדיבור, ער רעדט זאכן וואס מען טאר נישט - ליידט ער נאכדעם צרות פון זיין ווייב, און ווען א מענטש איז פוגם במעשה, ער זינדיגט און טוט עבירות - ליידט ער נאכדעם פון מענטשן".

גיי אין א ווינקל, זוך א פלאץ וואו קיינער זעט נישט וואס דו טוסט, און וויין זיך גוט אויס צום אייבערשטן אויף אלעס וואס דו האסט פוגם געווען במחשבה, דיבור ומעשה; וועסטו זוכה זיין צו וואס שלמה המלך זאגט (משלי טז, ז): "בִּרְצוֹת ה' דַּרְכֵי אִישׁ, גַּם אוֹיְבָיו יַשְׁלִם אִתּוֹ", ווען א מענטש גייט מיטן אייבערשטן - וועלן זיינע פיינט ווערן פריינט; חכמינו זכרונם לברכה זאגן (בראשית רבה נד, א): ווער זענען זיינע פיינט? "רַבִּי יוֹחָנָן אָמַר, זוֹ אִשְׁתּוֹ", דאס מיינט מען די ווייב; ווייל ווען א מענטש פירט זיך אויף ווי עס דארף צו זיין - דעמאלט ווערט זיין ווייב זיין העלפער, זי וועט שלום מאכן מיט אים און זיין פאר אים אן עזר.

איך וועל זיין אם ירצה ה' שבועות אין שטעטל. איך האב איינגעטיילט די ימים טובים; פסח און שבועות בין איך דארט, און חודש תשרי בין איך אין שטאט. איך גיי אהין ווייל איך דארף זיי אויך מחזק זיין, אבער נישט אז אלע דארפן אהין קומען. מאך נישט דא קיין חסידות, דו דארפסט נישט איבערדרייען דיין גאנצע שטוב צו קומען, עס פעלט בכלל נישט אויס צו קומען. דער עיקר איז, וואו מען איז - זאל מען פרובירן דאווענען מיט אנשי שלומינו און מקבל זיין די תורה פונדאסניי.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת נשא א', ד' סיון, מ"ח לעומר, ערב חג השבועות, שנת תשפ"ג לפרט קטן

לכבוד מיין טייערער ... נרו יאיר

איך וויל דיך מחזק זיין און אויפוועקן זאלסט זיך צוריק באנייען מיט דיינע שיעורים כסדרן, סיי אין מקרא - לערנען יעדן טאג אביסל חומש מיט תרגום לויט די טאג, זונטאג ביז שני, מאנטאג ביז שלישי. סיי מיט משנה - לערנען יעדן טאג כמה פרקים משניות, און ועל כולם גמרא - לערנען סיי דעם בלאט גמרא פונעם טאג, און סיי א שיעור אין ש"ס כסדרן.

טייערער ברודער, אז דו וועסט זיך קובע זיין צו לערנען אין שטוב דיקא יעדן אויפדערנאכט - וועט זיך אלעס טוישן צום גוטן. סיי דו וועסט ווערן מער פרייליך; עכט פרייליך. סיי דיין שלום בית; דיין ווייב וועט זיך פרייען דיך צו זען לערנען, ווי איידער שפילן מיט אפגעריסענעם טעלעפאן, ווי שטיין און קוקן אומבא'טעמ'טע סטעטוס. סיי דיינע קינדער וועלן וואקסן מיט יראת שמים.

פרוביר עס אויס, וועסט אנהויבן שפירן א גוטע טעם אין לעבן, וועסט אינדזשויען יעדן טאג.

פון דיין ראש ישיבה וואס האט דיך ליב.

בעזרת ה' יתברך

יום ג' פרשת נשא א', ג' סיון, מ"ז לעומר, שנת תשפ"ג לפרט קטן

מרת ... תחי'

איך האב ערהאלטן אייער בריוו.

אויב אייער מאמע זאגט מען זאל צוריק גיין צום דאקטער - איז נישט געפערליך צוריק צו גיין, ווייל פון פאלגן א מאמע - באקומט מען נאר ברכות פון אריכות ימים ושנים.

בנוגע וכו'; אין שטוב קענט איר זיך אויספוצן, בפרט נאך די חתונה, פאר'ן מאן - איז דאס א גרויסע מצוה.

בנוגע ארומנעמען, האלזן - א ברודער; עס שטייט קלאר אין רמב"ם (ספר המצוות, לא תעשה שנג; פרק כא מהלכות איסורי ביאה, הלכה ו) אז עס איז אן עקלדיגע זאך און מען זאל דאס נישט טון.

בנוגע זינגען; נוצט אייער טאלאנט צו זינגען פאר סקולס, זינגט ניגוני אמונה, ניגוני צניעות, וכדומה.

בנוגע שמועסן מיט בחורים, פעטערס; טוט דאס נישט.

בנוגע טעקסט און ווידיאו; אויב מען נוצט עס נאר מיט חבר'טעס וואס זענען איידל - איז דאס נישט קיין פראבלעם.

בנוגע א שפיצל, שייטל; איר דארפט נישט רעדן פון דעם מיט אייער זיידע, האט נישט מורא, ער וועט קומען צו אייערע שמחות.

דער עיקר זאלט איר זיך שטארקן מיט תפילה און התבודדות; בעטס דעם אייבערשטן, שמועסט מיט אים; דער אייבערשטער האט אייך ליב און ווארט איר זאלט קומען צו אים, שמועסן מיט אים.